නූගත් මවුජි ඉතා කටුක මෙන්ම කළබලකාරී ජීවිතයක් ගෙවන විවාහක තරුණයෙකු වන අතර සිය පවුලෙන් මෙන්ම රැකියාව කරන ස්ථානයෙන්ද අනේක විධ කරදරයන්ට නිතර ලක්වෙයි. ඔහුගේ ස්වාමියා ඔහුට සලකනු ලබන්නේ සුනඛයෙකුට වගේය. ඔහුගේ පියාද නිතර මෙම තරුණයා පීඩාවට පත් කරන අතර විවාහකයෙකු වුවද විවාහක යුවලක් ලෙස දිවිගෙවන්නට ඔවුන්ට නොහැකි වන්නේ එසේ ජීවත් වීමට තරම් ප්‍රමානවත් ඉඩකඩක් ඔවුන් ජීවත්වන නිවසේ නොමැති වීම නිසාය. ඔහුගේ බිරිඳ වන මම්තා මේ නිසා දැඩි අපහසුතාවයට කළකිරීමටත් පත් වුවද මවුජි ඒ සියල්ල විඳදරාගෙන සැමවිටම සිනහ මුසු මුහුණින් කල් ගෙවයි.

සැමටම වැඩකට නැති පුද්ගලයෙක් ලෙස කල් ගෙවූවද මවුජි එක් දෙයකට සුවිශේෂී වෙයි. එනම් අඳුම් මැසීම හෙවත් ටේලර් කෙනෙකු ලෙස ඔහුගේ දක්ෂතාවය ඉතා ඉහලයි. නමුත් ඔහුගේ පියා සලකන ආකාරයෙන් එය කිසිදු ප්‍රයෝජනවත් හැකියාවක් නොවන්නේ ටේලර් වෘත්තිය පිළිබඳව ඔහුට ඇති අඩු තක්සේරුව හේතුවෙන්.

ඔහුට රැකියා ස්ථානයෙන් හිමි වන පීඩනය දරා ගත නොහැකි තැන ඔහු රැකියාවෙන් ඉවත් වන්නේ සිය පියාගේ දැඩි දෝෂ දර්ශනයට ලක් වෙමින්. නමුත් සිය බිරිඳ මම්තාගේ සහය හා දිරිගැන්වීම මත ඔහු තමන්ගේ පැරණි රෙදි මහන යන්ත්‍රය අලුත්වැඩියා කර තනිව මහමග රෙදි මසන්නට පටන් ගනී.

එතැන් පටන් පවුලක් ලෙස ජීවිතය ගොඩ නගා ගන්නට මේ යුවල වන වෙහෙස හා ඔවුන් හට මුහුණ දීමට වන අනේක විධ අභියෝග හරහා සිනාමා සිත්තම ගොඩ නැගෙයි. ඔවුන්ගේ ප්‍රයත්නයේ අවසානය කෙසේ සිදුවනාද යන්න දැන ගැනීමට ඔබට මෙම සිනමා සිත්තම රසවිදින්නට සිදුවනවා. ආනන්දනීය මෙන්ම විහිළු තහළුවෙන් පිරි එමෙන්ම ජීවිතය හා බැඳුනු බොහෝ හැඟීම් ඉස්මතු කරමින් දිවෙන මේ සිනමාත්මක ගමන විඳගන්නට අපි ඔබට ෆිමිලි සිනමා තුළින් මේස් ආරාධනා කරනවා.

ෂාරත් කතාරියා ගේ අධ්‍යක්‍ෂණයෙන් හා යාෂ් රාජ් චිත්‍රපට වෙනුවෙන් මනීෂ් ෂර්මාගේ නිෂ්පාදනයෙන් එළි දකින සුයි ධාගා චිත්‍රපටයේ ප්‍රධාන චරිත වන මවුජි ගේ චරිතයට පනපොවනු ලබන්නේ බොලිවූඩ් සිනමාවේ නමතම සිහින කුමරු වන වරූන් ධවන් විසිනි. එමෙන්ම ඔහුගේ බිරිඳ ලෙස රඟන අනුෂ්කා ෂර්මා මම්තාගේ චරිතය ඉතා සාර්ථකව තිරයේ ප්‍රතිනිර්මාණය කරයි.

ඉන්දියාවේ මධ්‍ය ප්‍රදේශයේ චන්දාරි නගරයේ 2018 වසරේ පෙබරවාරි මාසයේ රූගත කිරීම් ආරම්භ කළ මෙම සිනමා සිත්තම පසුගිය සැප්තැම්බර් 28 වන දා ඉන්දියාවේ සිනමා හල් පුරා තිරගත වීම ආරම්භ කළා. ආරම්භක දිනයේම ඉන්දියානු රුපියල් කෝටි අට හමාරකට ආසන්න මුදලක් ඉපයූ මෙම චිත්‍රපටය දෙවන දිනයේ ඉන්දියානු රුපියල් කෝටි දොලහක් හා තෙවන දිනයේ ඉන්දියානු රුපියල් කෝටි දහසයක් උපයමින් සාර්ථක නිර්මානයක් ලෙස දැන් තිරගත වෙමින් පවතිනවා.

ප්‍රථමයෙන් මෙහි ප්‍රධාන චරිතය සඳහා රන්බීර් කපූර් තෝරාගෙන තිබුනත් විවිධ හේතු නිසා රන්බීර්ට මෙම සිනමා සිත්තමට දායක වීමට නොහැකි වුනා. ඉන් පසුව ඒ සඳහා තෝරා ගනු ලබුවේ වරුන් දවන් වන අතර රන්බීර්ගේ අඩුව පුරවමින් වරුන් මෙහි සුවිශිෂ්ට රංගනයක නියැලෙන බව විචාරකයන් පවසා තිබෙනවා. මම්තාගේ චරිතය රඟන අනුෂ්කා ෂර්මා සිය නිසඟ ප්‍රතිභාව ඉහලම තලයට ගෙනෙමින් සිය චරිතය ප්‍රේක්‍ෂකයන්ගේ ආදරය නොමසුරුව ලබාගන්නා තැනට පත්කොට තිබෙනවා.

මෙම චිත්‍රපටයේ තිර රචනය බොහෝ දෙනාගේ අවධානයට හා ප්‍රසාදයට ලක් වූවත් එය සිනමාවට නැගෙද්දී පිටපතෙහි වූ ප්‍රබලත්වය යම් තරමකට ගිලිහී ඇතැයි යන්න මෙම සිනාමා සිත්තමට එල්ල වන ප්‍රධාන චෝදනාවක්. එමෙන්ම දෙවන භාගය ඉතා මන්දගාමීව ගලා යෑම බොහෝ දෙනාගේ අකමැත්තට ලක් වූවත් එයින් චිත්‍රපයේ කූටප්‍රාප්තිය වැඩියෙන් ඉසමතු වන බව තවත් පිරිසක් පවසා සිටිනවා. එමෙන්ම ඉන්දියානු රසික ප්‍රජාවට හුරුව ඇති වානිජ සිනමාවට වඩා මෙය කලාත්මක සිනමාවට බර චිත්‍රපටයක් ලෙස නිමවා තිබීමෙන් යම් රසික පිරිසක් මෙය නැරඹීමෙන් බැහැර වනු ඇතැයි යන්නත් විචාරකයන්ගේ අදහසක්.

මේ දේවල් කෙසේ සිදුවුවද සුයී දාගා යනු පවුලක් ලෙස ධෛර්‍යය සම්පන්නව උත්සාහයෙන් කටයුතු කරන බොහෝ දෙනාට පිදෙන තිළිණයක් බඳු සිනමා සිත්තමක්.සැප දුක නිසි ලෙස බෙදා ගනිමින් ජීවිතයේ යම් අරමුණක් කරා ගමන් කරන්නටත් දිනෙක ඒ වෙනුවෙන් තමන්ට හිමි වන අහිමි වන දේ පිළිබඳව පවුලක් ලෙස ඇති අනේකවිධ හැඟීම් සමුදායත් අත්දැකීමෙන් දන්නා බොහෝදෙනාට මෙම කතාව තමන්ගේ කතාව ලෙසෙ දැනෙනු ඇති. විශේෂයෙන් පවුල යන සංකල්පය යම් ප්‍රමාණයකට අභියෝගයට ලක් වන සමාජයකට මෙම සිනමා සිත්තම කදිම පිළිතුරක් සපයා තිබේ.

ෆැමිලි සිනමා යටතේ ලියවුණු සියළු ලිපි බලන්න

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ආදරය පිරුණු පවුලක ආනන්දනීය උත්සාහය – සුයී ධාගා – මේඩ් ඉන් ඉන්ඩියා appeared first on familylife.

01. දීපිකා පදුකෝන්

බොළිවුඩ් රජදහනේ මේ වන විට අග රැජිනියගේ චරිතයට පන පොවන දීපිකා පදුකෝන් කාගේත් මතකයේ රැඳෙන ඉතා විශි්ෂ්ඨ නිර්මාන කීපයකම තම නිසඟ හැකියාව ප්‍රදර්ශනය කළ වෘත්තීය නිලියක්. එය කලාත්මක හෝ වානිජ සිනමාව වේවා ඇගේ ප්‍රතිභාව එකසේ ලබා දෙමින් එම නිර්මාණය උසස් තලයකට ගෙන ඒමට කටයුතු කරන අංක එකේ නිලිය මේ වන විට චිත්‍රපටයක් සඳහා අය කරන මුදල ඉන්දියානු රුපියල් කෝටි පහලොවක් (ශ්‍රී ලංකා රුපියල් වලින් කෝටි 35 ආසන්න මුදලක්). බොලිවුඩ් මෙන්ම හොලිවුඩ් නිෂ්පාදන වලටද දායක වන දීපිකා මේ වසරේ රඟපෑ පද්මාවත් චිත්‍රපටයේ පනදෙන චරිතය බොහෝ දෙනාගේ අපමන පැසසුමට ලක්වුනා. 2015 වසරේ තිරගත වූ පජිරාඕ මස්තානි, එම වසරේම පීකු, 2014 වසරේ තිරගත වූ රාම්ලීලා වැනි දැවැන්ත නිෂ්පාදන ඇයට මේ වාසනාව ගෙන ආවා.

02. ප්‍රියංකා චොප්රා

දීපිකා හා බොහෝ අවස්ථාවල සම තැන් ගනිමින් ඉතා දැඩි තරඟයක නිරත වන හොලිවුඩ්, බොලිවුඩ් කර්මාන්ත දෙකම ජයගත් ප්‍රියංකා චොප්රා මේ වන විට චිත්‍රපටයක් සඳහා ඉන්දියානු රුපියල් කෝටි 13ක් (ශ්‍රී ලංකා රුපියල් වලින් කෝටි 30 අධික මුදලක්) අය කරනවා. විශේෂයෙන් ඇය දායක වන හොලිවුඩ් රූපවාහිනී කතා මාලව වන කොන්ටිකෝ හි ඇගේ රංගනයෙන් පසුව මෙලෙසින් ඇගේ වටිනාකම ඉතාමත් ඉහල තලයකට පැමිණ තිබෙනවා. ඇය සිය රංගන ජීවිතය අරඹා ඇත්තේත් හොලිවුඩ් නිෂ්පාදන කීපයකින් වීමත් විශේෂයි. ඇය මේ වසරේ චිත්‍රපට දෙකක් සඳහා ගිවිසුම් ගත වී තිබෙනවා

03. කරීනා කපූර්

කපූර් යන නාමය බොලිවුඩ් සිනමාව සැමදා ඔසවා තැබූ නාමයක්. කබී කුෂී කබී ගම්, ජබ් වී මෙට්, ත්‍රී ඉඩියට්ස්, ආදී චිත්‍රපට රැසකින් සිය දක්ෂතාවය ඉදිරිපත් කළ කරීනා කපූර් මේ වන විට එක් චිත්‍රපටයක් සඳහා ඉන්දියානු රුපියල් කෝටි එකොලහක් ( ශ්‍රී ලංකා රුපියල් වලින් කෝටි 25 අධික මුදලක්) අය කරනවා. සෑම වසරකම ඇයගේ රංගනයෙන් බොක්ස් ඔෆීස් වාර්තා පිහිටවන චිත්‍රපටයක් නිපද වන බැවින් ඉතාමත් ස්ථාවර බොලිවුඩ් නිලිය ලෙස ඇය හඳුන්වනවා. වීරේ දි වෙඩින් ඇය මේ වසරේ දායකත්වය ලබාදුන් චිත්‍රපටයක් වන අතර එහි සාර්ථකත්වයත් මෙවැන් මුදලක් ඇයට හිමි කර දීමට බලපා ඇති බවයි පැවසෙන්නේ.

04. කංගනා රාවුට්

2015 වසරේ ක්වීන් චිත්‍රපට වෙනුවෙන් හොඳම නිළියට හිමි ෆිල්ම් ෆෙයා සම්මානයෙන් පිදුම් ලැබූ කංගනා බොලිවුඩ් සිනාමාවට ලැබුනු සම්පතක් ලෙසයි බොහෝ දෙනා හඳුන්වන්නේ. විශේෂයෙන් කලාත්මක චිත්‍රපට වල ඇය රගපෑ ඇති චරිත සෑම එකක් පාහේම විශේෂ අවධානයට පාත්‍ර වුනා. 2019 වසරේ තිරගත වීමට ඇති මානික්කර්නිකා – ජාහානසි මහ රැජින චිත්‍රපටයේ රංගනය වෙනුවෙන් ඇය ඉන්දියානු රුපියල් කොටි එකොලහකට ආසන්න මුදලක් ( ශ්‍රී ලංකා රුපියල් වලින් කෝටි 25 අධික මුදලක්) අය කර ඇති බවයි වාර්තා වන්නේ. ක්වීන් හා තනු වෙඩ්ස් මනු රිටර්න්ස් චිත්‍රපට වෙනුවෙන් ඇය ඉන්දියානු රුපියල් කොටි දහය බැගින් අය කර තිබෙනවා.

05. කත්රිනා කායිෆ්

කත්රිනා ගේ රංගනය මෙන්ම ඇය චිත්‍රපටයක් සඳහා අය කරනු ලබන මුදලත් නිරන්තරයෙන් වෙනස් වන සුලුයි. 2015 වසරේ වැඩිම මුදලක් අය කරන නිලියන් අතර හය වන ස්ථානයේ පසුවූ ඇය 2017 වසර වන විට එම සටහනේ එකොලොස් වන තැන දක්වා පහලට ගොස් තිබුනා. නමුත් 2018 වසරේ ටයිගර් සින්දා හේ චිත්‍රපටයේ සාර්ථකත්වයත් සමග ඇය මේ සටහනේ පස්වන ස්ථානය අත් කරගන්නේ චිත්‍රපටයක් වෙනුවෙන් ඉන්දියානු රුපියල් කෝටි 9යක මුදලක් අය කරමින්. එය ශ්‍රී ලංකා රුපියල් වලින් කෝටි 21 ආසන්න මුදලක්. එමෙන්ම අමීර් ඛාන් රඟන තග්ස් ඔෆ් හින්දුස්තාන් චිත්‍රපටයත් ඇයට වාසනාව ගෙන එනු ඇති බව විචාරකයින් පවසනවා.

06. සෝනම් කපුර්

බොලිවුඩ් නිෂ්පාදකයන්ගේ නොමද පැසසුම් හා විශ්වාසය දිනාගත් සෝනම් කපූර් මේ වන විය චිත්‍රපටයක් වෙනුවෙන් ඉන්දියානු රුපියල් කෝටි අටක මුදලක් අය කරනවා. ඇගේ එක දිගට සාර්ථක වූ චිත්‍රපට වූ ඩෝලි කි ඩෝලි, නීර්ජා, පෑඩ් මෑන්, වීරේ ඩී වෙඩින් ආදී චිත්‍රපට ඇයව මෙම ස්ථානයේ රඳවන්නට දායක වී තිබෙනවා. විශේෂයෙන්ම ඇය බොහෝ සන්නම් නාම වෙනුවෙන් මේ වන විට ගිවිසුම් ගතව සිටිනවා. ඇය සංජු චිත්‍රපටය වෙනුවෙන් මෙම ඉන්දියානු රුපියල් කෝටි අටක මුදල අය කර තිබෙනවා.

07. විද්‍යා බාලන්

බොලිවුඩ් සිනමා කර්මාන්තයට පැමිණ කලක් ගත වුවත් විද්‍යා බාලන් හට ඇති ප්‍රේක්‍ෂක ප්‍රතිචාරය නම් කිසි දිනක අඩු වූවක් නොවේ. බොලිවුඩයේ වැඩිම මුදලක් අය කරන නිලියන්ගේ ලයිස්තුවේ සිය සුපුරුදු ස්ථානය මෙවරත් ඇය සහතික කර ගෙන ඇත්තේ චිත්‍රපටයක් සඳහා ඉන්දියානු රුපියල් කෝටි අටක මුදලක් අය කිරීම වෙනුවෙන්.(ශ්‍රී ලංකා රුපියල් වලින් කෝටි 19 ආසන්න මුදලක්). විශේෂයෙන්ම පසුගිය වසරේ අති සාර්ථක චිත්‍රපයක් වූ තුමාරී සුලු සමගින් ඇයගේ මෙම වටිනාකම තවත් ඉහල යනු ඇතැයි බලාපොරොත්තු වෙනවා.

08. අනුෂ්කා ෂර්මා

අනුෂ්කා ගැන පසුගිය වසරේ වැඩිම අවධානය දිනාගත් පුවත වූ ඇයගේ හා සුප්‍රසිද්ද ඉන්දියානු ක්‍රිකට් නායක විරාත් කෝලි ගේ විවාහය ගැන වුවත් 2017 වසරේ අමීර් සමග රඟපෑ පීකේ චිත්‍රපටය වෙනුවෙන් දැවැන්ත මුදලක් අය කිරීම වැඩි අවදානයකට ලක් වූයේ නෑ. නමුත් ඇයත් ඉන්දියානු රුපියල් කෝටි අටක මුදලක් චිත්‍රපටය සඳහා අය කර තිබුනා. වැඩිම මුදලක් උපයන ක්‍රිකට් ක්‍රීඩකයා ලෙස සැලකෙන විරාත් ට අනුෂ්කාගේ ආදයම එකතු වූ විට ඉන්දියාවේ තරු යුවලක් (සෙලිබ්‍රිටි ෆැමිලි) උපයන වැඩිම ආදායම ලෙස විරාත් අනුෂ්කා යුවල ඉදිරියෙන්ම සිටිනවා. ගියවර ලයිස්තුව සමග සැසඳීමේදී ඇය එක් ස්ථානයක් පහල බැස තිබීමත් අවදානයට ලක් විය යුතුයි.

09. ආලියා බාට්

මෑත ඉතිහාසයේ බොලිවුඩයේ සාර්ථකත්වය අතින් ඉහලම නිලිය වශයෙන් සැලකෙන ආලියා වසරින් වසර සිය අයකිරීම ඉන්දියානු රුපියල් කෝටියකින් ඉහල දමන නිලිය ලෙස වාර්ථා වනවා. මේ වසර වන විට ආලියා ඉන්දියනු රුපියල් කෝටි අටක් එක් චිත්‍රපටයක් වෙනුවෙන් අය කරනවා. පසුගිය වසර වල ඈ අය කළ ඉන්දියානු රුපියල් කෝටි හය වෙනුවට මේ වන විට ඇයට කෝටි අටක සීමාවට පිවිසීමට හැකියාව ලැබී ඇත්තේ ඇය රඟපෑ රාසි චිත්‍රපටයේ සාර්ථකත්වයත් සමගින්. ඉදිරියේදී තිරගත වීමට නියමිත කලාන්ක් චිත්‍රපටයේ රංගනයත් සමගින් ඇය ලබන වසර වන විට කොපමන මුදලක් අයකරාවිද යන්න පිළිබඳ බොහෝ දෙනා විමසිලිමත් වන්නේ මෙම ලැයිස්තුවේ ඉදිරි පෙල ස්ථානයක් ආලියා තමා වෙනුවෙන් වෙන්කරගනු ඇතැයි යන බලාපොරොත්තුවත් සමගයි.

10. ෂද්ධා කපූර්

කරීනගෙන් පසුව බොලිවුඩයට පෑයූ සාර්ථකම කපූර් තාරකාව වන ෂද්ධා මේ වන විට ලැයිස්තුවේ අවසන් ස්ථානයේ පසුවන්නේ චිත්‍රපටයක් සඳහා ඉන්දියානු රුපියල් කෝටි පහක් පමණ අය කරමින්. නමුත් පසුගිය වසරේ ඇය රඟපෑ ඕකේ ජානු, රොක් ඔන් 2, චිත්‍රපට ආදායම් අතින් අසාර්ථක වීමත් සමගම ඇයගේ ස්ථානය පිළිබඳ අවිනිෂ්චිතභාවයක් ඇතිවී තිබෙනවා. කෙසේ නමුත් සාහෝ හා නවබ්සාදේ චිත්‍රපට තුලින් නැවතත් ඇය සිය ජනප්‍රියභාවය රඳවා ගනු ඇතැයි විචාරකයන් පවසනවා.

ඉතිං ඔබට මේ අයගෙන් අතමාරුවක් ලබා ගන්න අවස්ථාවක් ලැබුනොත් ඔබ තෝරා ගන්නේ කවුරුන්ද යන්න තීරනය කරන්න මේ කරනු ප්‍රමානවත් කියල අපි විශ්වාස කරනවා. සැබෑ ලෝකයේ තරමක් අතාත්වික අදහසක් ලෙස පෙනුනත් හෙට දවස ගැන අපි කාටවත් අනාවැකි කියන්න බැරි තරමට මේ ලෝකය කුඩා වෙමින් පවතිනවා. ඒ නිසා හෙට දවසේ මේ අතරින් කෙනෙක් ඔබේ ළඟම මිතුරිය වීමටත් බැරි කමක් නෑ.

බොලිවුඩ් සිනමාව ගැන ලියවුනු මෙම ලිපියත් ඔබට රසවත් දැයි බලන්න

හිතුවක්කාර සිත්තරා – සල්මාන් ඛාන්

මුල් පිටුවට පිවිසෙන්න

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post අතමාරුවක් ඉල්ලා ගැනීමට හොඳම බොලිවුඩ් නිළිය කවුද? appeared first on familylife.

සල්මන් ඛාන් කියූ සැනින් අපේ මතකයට එන්නේ කඩවසම්, විසේකාර, ආඩම්බරයෙන් පිරුණු බොලිවුඞ් සිනමා තාරකාවක්. විශේෂයෙන් ඔහුගේ රංගන දිවියේ මෙන්ම පුද්ගලික ජීවිතයේ ඇතිවන නිමක් නොවන හැලහැප්පීම් මැද ඔහු කවදත් පුවත් මවන්නෙක් ලෙසින් සුප්‍රසිද්ධයි.

ඔහුට 1998 වසරේ දුර්ලභ ඝනයේ ඉන්දියානු මුව වර්ගයකට අයත් සතුන් දෙදෙනෙකු ඝාතනය කිරීමේ වරදට සිරගත වීමට සිදූවුවා. එමෙන්ම මහමග පදිකයෙකු අනතුරකට ලක් කර සිය රථය ධාවනය කිරීමේ වරදටද ඔහුට යලිත් වරක් සිරගත වූවා. පසුව මෙම චෝදනා වලින් වරින් වර ඔහු නිදහස් වුවත් ඔහුගේ මෙම හිතුවක්කාරී ජීවිතය නිසා සමාජයට ඔහු කළු චරිතයක් ලෙස පෙනෙන්නට පටන් ගත්තා.

මේ සිදිධීන් කෙසේ වුවත් අද අපි සල්මාන් ගැන කථා කරන්නේ බොහෝ දෙනා සල්මාන් ගැන නොදන්නා පැතිකඩක් විවිර කරන්නයි. සල්මාන් ඛාන් කියන්නෙ අති දක්‍ෂ සිත්තරෙක් බව ඔබ දන්නවාද?

සල්මන් කුඩා කාලයේ සිටම චිත්‍ර ඇඳීමට මහත් රුච්කත්වයක් දැක්වූ බව ඔහුගේ පියා සලීම් පවසනවා. එය සල්මාන්ගේ මව වන සල්මා ගෙන් ඔහුට දායාද වී ඇති හැකියාවක් බවයි ඔහු වැඩි දුරටත් පවසන්නේ. පසු කාලයේදී සල්මාන් ඉන්දියාවේ සුප්‍රසිද්ධ චිත්‍ර හා මූර්ති ආචාර්යවරයෙක් වන නිලේෂ් වේඩා වෙතින් චිත්‍ර කලාව පිළිබඳ ගුරුහරුකම් ලබාගෙන තිබෙනවා.

සල්මාන්ගේ බොහොමයක් චිත්‍ර වලින් ගම්‍ය වන්නේ ආගමික සංහිඳියාව පිළිබඳ සංකල්පයි. සියලු ශාස්ත්‍රවරුන් එකම දෙවියෙක් වශයෙන් පිළඹිබු වන නිර්මාණ කීපයක්ම ඔහු අතින් නිර්මාණය වී තිබෙනවා.

ඊට අමතරව ඔහුගේ මිතුරන්ගේ ආලේඛ්‍ය ඡායාරූප නිර්මාණය කර දීමටත් ඔහු කැමැත්තක් දක්වනවා. ගජිනි චිත්‍රපටයේ රඟපෑ අමීර් ඛාන්ගේ රුව ඉතා කදිමට සල්මාන් විසින් සිත්තම් කර තිබෙනවා. ඒ වගේම ඔහු මෙම චිත්‍ර සිය මිතුරන්ට ත්‍යාග වශයෙන් ලබාදීමත් සිදුකරනවා. පසුගිය දිනෙක දස් කා දම් රූපවාහිනී වැඩසටහනට සහභාගී වූ සිය මිත්‍ර රනබීර් කපූර්ට ඔහුගේ නැසීගිය සියා වන රාජ් කපූර්ගේ සිත්තමක් තෑගි කරනු ලැබුවා. බොනී කපූර් හා නැසී ගිය ශ්‍රීදේවිගේ නිවහනත් සල්මාන්ගේ සිත්තමෙන් හැඩවී ඇති බවයි වාර්තා වන්නේ.

මුල් කාලයේදී සල්මන් සිය සිත්තර ප්‍රතිභාව ලෝකයෙන් වසන් කොට රහසක් ලෙස පවත්වා ගෙන තිබුනා. නමුත් පසුකලෙක මෙවැනි ප්‍රතිභාවක් ලොවෙන් වසන් නොකළ යුතුය යන්න ඔහුටම පසක් වූ විට සල්මන් සිය නිර්මාණ ලෝකට විවෘත කළා. 2014 වසරේ ඔහුගේම චිත්‍රපටයක් වූ ජෙයි හෝ සඳහා නිර්මාණය වූ පෝස්ටරය හැඩ වූයේත් සල්මාන්ගේ සිත්තමකින් බව බොහෝ දෙනා අදටත් නොදන්නා රහසක්. එම චිත්‍රපටයේ නම සඳහා පෝස්ටරයේ භාවිත කර ඇත්තේ සල්මන් ඛාන්ගේම අත් අකුරු වීම තවත් සුවිශේෂීත්වයක්.

ඔහු අතින් නිමවූ චිත්‍ර වෘත්තීය මට්ටමේ නිර්මාණ බව පසක් කරන්නට තවත් හොඳම සහතිකයක් වන්නේ මෙම නිර්මාණ සඳහා වෙන්දේසි වලදී ලැබෙන ඔබත් මමත් මවිත වන ලංසු ප්‍රමාණයයි. සල්මාන් විසින් අඳින ලද මවක් සිය පුතු සමග සිටින ඉතාමත් සංවේදී චිත්‍රය ඉන්දියන් රුපියල් කෝටියකට අලෙවි වී තිබෙනවා. එමෙන්ම මෙම නිර්මාණ වලට ලැබිය යුතු නියම මිල නොලැබුනු අවස්ථා වල ඔහු සිය නිර්මාණ වෙන්දේසියෙන් ඉවත් කරගෙන තිබෙනවා.

මෙම නිර්මාණ වලින් උපයන සම්පූර්ණ මුදල ඔහු වෙනකරනු ලබන්නේ ලාභ නොලබන සංවිධානයක් ලෙස පිහිටුවා ඇති සල්මාන් ඛාන් පදනමේ අභිවෘද්ධිය සඳහායි. සල්මන් මෙම පදනම පිහිටුවා ඇත්තේ ඉන්දියාවේ දිළිඳු දරුවන්ගේ සෞඛ්‍ය හා අධ්‍යාපනය නගා සිටුවීම සඳහායි.

සමාජයේ හිතුවක්කාර චරිතයක් ලෙස ප්‍රසිද්ධියට පත්ව සිටින චරිතයක සැඟවුනු කථාව එලෙසයි. මෙවැනි බොහෝ යහපත් දේ සිදුකරන සල්මාන් ගේ චරිතටය බොහෝ විට එල්ල වන්නේ මඩ ප්‍රහාරයන්. ඒ මේ ලෝකයේ ඉක්මනින්ම පැතිරෙන්නේ නරකයි යන කතාව ඇත්තක් බව සනාත කරමින්.

ඔහු පිළිබඳ කොතරම් කටකතා පැතිරුනද ඉන්දියාවේ ඔහුට ඇති රසික ප්‍රතිචාර නම් මදකින් හෝ අඩු වෙන්නේ නෑ. මොකද ඔහුට සිටින්නේ ඔහු වෙනුවෙන් සිය ජීවිතය වුවත් පූජා කිරීමට කැපවුනු රසියකයන් පිරිසක්. කෙසේ වෙතත් එවැනි ආදරයක් අන් අයගෙන ලබා ගන්නට හැකිවීම ඔහුගේ ලොකුම වාසනාවක්.

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post හිතුවක්කාර සිත්තරා – සල්මාන් ඛාන් appeared first on familylife.

එකම තරුපහේ හෝටලයක සේවය කරන තරුණ යුවලක් වටා ගෙතුනු මම සිනමා සිත්තම තරමක් වෙනස් ප්‍රේමකථාවක් ලෙසින් හඳුන්වා දෙන්න පුළුවන්. බොලිවුඩයේ ඉදිරි දශකයේ රජු ලෙසින් නම් දරා සිටින වරුන් දවන් විසින් නිරූපනය කරන ඩෑන් හා බෙනිටා ෂන්දු විසින් නිරූපනය කරන ෂියුලිගේ චරිත චිත්‍රපටයේ ප්‍රධාන භූමිකාවන් වෙයි. ඉතාමත් සොඳුරු බැඳීමක් ඇති මේ යුවලගේ ජීවිතයට ඩෑන්ගේ වෘත්තීමය ජීවිතය තුළ සිදුවන පෙරළිය හා ෂියුලි මුහුණ දෙන හදිසි අනතුර ගෙන එන්නේ කිසිවෙකුත් නොසිතන කාල පරිච්ඡේදයක්. ඔවුන් ජීවිතය තුල මුහුණ දෙන අනේක විධ අවස්ථාවන් හරහා චිත්‍රපටයේ ඉතිරි කොටස ගලා යනවා.

බොලිවුඩයට වෙනස් නිර්මාණ ගෙන එන අධ්‍යක්ෂකවරයෙකු වූ ෂුජිත් සර්කාර් විසින්

අධ්‍යක්‍ෂනය කළ ”ඔක්තෝම්බර්” චිත්‍රපටය රූනි ලහිරි හා ශීල් කුමාර් විසින් නිෂ්පාදනය කර තිබෙනවා. ජුහි චතූර්වේදි විසින් රචනා කළ තිරපිටපත හා ශාන්තනු මොයිත්‍රාගේ පසුබිම් සංගීතය විසින් මෙම සිනාමා පටය වෙනම තලයකට ඔසවා තබන බව විචාරකයින් සඳහන් කර තිබෙනවා. විශේෂයෙන් චිත්‍රපටය නිකුත්වීමට පෙර මෙහි පසුබිම් සංගීතය මැඞ්රාස්හි මෝසාට් ලෙසින් හඳුන්වන ඒ ආර් රහමන් විසින් සිදුකළ බවට ආරංචි පැතිර යන්නට වූයේ මෙහි පසුබිම් සංගීතය එතරම් අගනා මට්ටමක පැවතීම නිසයි.

විචාරකයින් විසින් චිත්‍රපටයේ පවතින මන්දගාමී දිගහැරුම විවේචනයට ලක් කළ නමුත් ඉතාමත් භාවාත්මක කූටප්‍රාප්තියකට එය මනාව ගැලපෙන බවට බොහෝ දෙනා තර්ක කරනවා. චිත්‍රපටයේ ප්‍රධාන භුමිකාව රඟන බෙනීට ෂන්දුගේ කුළුදුල් බොලිවුඞ් රංගනය මෙය වීමත් විශේෂයක් වනවා.

යම් තරමක සුරංගනා කථාවක අඩුවැඩිය සපුරන ඔක්තෝම්බර් චිත්‍රපටයේ ඉතා ප්‍රේමණීය ජවනිකා ගනණාවක් සමග සියුම් භාවාත්මක අවසානය මෙය නැරඹීම සඳහා ඔබ වැය කරන කාලයට සාධාරන වින්දනයක් ලබාදෙන බව නම් සත්‍යයක්. ඉතිං මේ සිනමා සිත්තම රස විඳින්නට අපි ඔබ සැමට ෆැමිලි සිනමා තුළින් ආරාධනා කරනවා.

The post බොලිවුඩයට තවත් කඳුලු බිංදුවක් appeared first on familylife.