දිශාන්ති වෙදගේ, Author at familylife

මෙම ලිපිය සැකසීමේදී සිය දැනුම නොමසුරුව ලබා දෙමින් රාගම උතුරු කොළඹ ශික්ෂණ රෝහලේ ප්‍රසව හා නාරිවේද විශේෂඥ වෛද්‍ය චාමින්ද මාතොට මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කිරි සිහිනයක පෙළගැස්ම ~ නමවන දිගහැරුම – මුල් අවදියෙහි සංකූලතා 2 appeared first on familylife.

කිරි සිහිනයක පෙළගැස්ම ~ අටවන දිගහැරුම – මුල් අවදියෙහි සංකූලතා

දිශාන්ති වෙදගේ — Fri, 29 Mar 2019 10:40:55 +0000

මුල් අවදියෙහි සංකූලතා ලෙසින් familylife.lk මවු සිහිනය තුළින් ඔබ හමුවට එන මෙම ලිපිය, පළමු වතාවට මවක් වන ඔබ කියවිය යුතුම ලිපියක් බවයි අපේ අදහස. මීට පෙර පළවූ ලිපි හතම කියවන්න මෙතන ක්ලික්/ටැප් කරන්න

අටවන දිගහැරුම

ගර්භණි මවක් තමන්ගෙ චූටී පැටියා වෙනුවෙන් මාස නමයක් පේ වෙනවා. ගෙවිලා යන මේ මාස නමය පුරාවටම දවසක් දවසක් පාසාම ඔබට අත්දකින්නට සිදු වන්නේ නව අත්දැකීම්ය. කුළුඳුලේම මව් පිය පදවිය දරන්නට සූදානම් වනවා නම් ඔබ දෙදෙනාම මේ කාලය තුල ඊළඟ දිනය පිළිබඳ සිටින්නේ කුතුහලයෙන් බියෙන් හා චකිතයකින්ය. එය සෑම නවක මවකටම ඇති වන තත්ත්වයකි. ඒත් ඔබ සතුටින්ය. මාස නමයක කාලය පුරාවටම ඇති විය හැකි සංකූලතාවයන් හා ඒවාට විසඳුම් පිළිබඳ ඔබ පූර්ව දැනුමකින් පොහොසත් වීමෙන් අනවශ්‍ය ලෙස බිය වන්නට සිදුවන්නෙ නැහැ. ගර්භණී සමයේ මුල් අවදියෙහි අත්දකින්නට සිදු වන සංකූලතා මොනවාදැයි බලමු.

වමනය සහ ඔක්කාරය
යෝනී ප්‍රදේශයෙන් හදිසි රුධිරය වහනය වීම
යෝනි මාර්ගයෙන් දියරමය ස්‍රාවයක් පිටවීම
බඬේ කැක්කුම ඇති වීම.
බෝවන රෝග වලට ගොදුරු වීම. (උණ, සෙංගමාලය, පැපොල)

ගර්භණී මවකට ඇති වන වමනය සහ ඔක්කාරය

ගර්භණී මව්වරුන්ගෙන් බොහෝ දෙනෙක්ට අත්දකින්නට සිදු වන වමනය සහ ඕක්කාරය ඇතිවීම ගර්භණී සමයේ සාමාන්‍ය මෙන්ම මුල් අවදියෙහි සංකූලතා අතර සුලබ තත්ත්වයක්ය. බොහෝ ගර්භණී මව්වරුන් මෙම තත්ත්වයෙන් පීඩාවට පත් වන්නෙ උදෑසන අවදි වූ පසුය. එනිසාම උදා ආබාධය ලෙස හඳුන්වයි. එහෙත් ඇතැම් අයට දවසේ වෙනත් ඕනෑම වේලාවක මෙම තත්ත්වය ඇති විය හැකිය.

ඔබ දන්නවද වමනය සහ ඔක්කාරය නිරෝගී ගර්භණීභාවයක ලක්ෂණයක් බව.

මෙම රෝග ලක්ෂණ ඇති මවකට ගබ්සාවක් සිදු වීමට ඇති අවදානම තරමක් අඩු බව පරීක්ෂණ මගින් සොයා ගෙන තිබේ. මෙම තත්ත්වය ඇති වීමට හේතුව නිශ්චිතවම දැක්විය නොහැකි වුවත් වැදෑමහ මගින් නිපදවන (Human Chorionic Gonadotropin hCG) නම් හෝමෝනය හේතු විය හැකි බවට නිගමනය කරයි.

නිවුන් දරුවන්, Molar pregnancy වැනි තත්වයන් තත්ත්වයක සිටින මවකට සාමාන්‍ය ගර්භණී මවකට වඩා වැඩියෙන් වමනය සහ ඔක්කාරය ඇති විය හැකිය.

සාමාන්‍යයෙන් ගර්භණීත්වයෙන් පසු සති 8දී පමණ වමනය සහ ඔක්කාරය ඇති විය හැකිය. මෙම තත්ත්වය ක්‍රමයෙන් සති 16-18ක් පමණ පහව යයි. වමනය සහ ඔක්කාරය හේතුවෙන් ඔබේ කුසෙහි වැඩෙන සිඟිත්තාට නම් කිසිදු හානියක් නොවෙයි. වමනය සහ ඔක්කාරය සඳහා විශේෂ ප්‍රතිකාරයක් අවශ්‍ය නොවේ.

එහෙත් එදිනෙදා කටයුතු වලට බාධා වෙන පරිදි සහ දිගින් දිගටම වමනය පවතී නම් සහ වෙනත් රෝග ලක්ෂණ පෙන්නුම් කරයි නම් ප්‍රතිකාර වෙත යොමුවීමට සිදුවේ.

වමනය සහ ඔක්කාරය අවදානම් වන අවස්ථාද ඇත

ගර්භණී වීමෙන් පසු ප්‍රථම වතාවට සති 20දී වමනය සහ ඔක්කාරය ඇති වීම රෝග ලක්ෂණයක පූර්ව දැනුම් දීමක් විය හැකිය. එනිසා සති 20දී පමණ මෙම තත්ත්වය ඇති වුවහොත්ඔබේ වෛද්‍යවරයාව වහාම දැනුවත් කරන්න.
ඉතා දරුණු වමනය ලෙස පවතින විට එම තත්ත්වය පාලනය නොකල හොත් ඉන් දරු ගැබට යම් බලපෑමක් විය හැකිය. විජලනය, අයනක අසමතුලිතතාවය සහ බර අඩු වීමත් සිදු විය හැකිය. ඒ නිසා අධික ලෙස වමනය නතර නොවන අවස්තා වලදී රෝහල් ගතව ප්‍රතිකාර ලබා ගැනීමට ඔබට සිදුවේ.
එසේම සාමාන්‍ය ලෙස ආහාර ගැනීම අපහසුවී අධික වමනය සමග පහත රෝග ලක්ෂණ ඇති අවස්ථාවක රෝහලට ගොස් පරීක්ෂා කරගත යුතුය.

වමනය සමග ලේ පිටවීම.
උණ.
නැවත නැවත නතර නොවී වමනය ඇතිවීම.
මුත්‍රා වල වර්ණය තද පැහැ වීම හෝ පිටවන මුත්‍රා ප්‍රමාණය ඉතා
අඩු වීම.
උදරයේ අධික වේදනාවක් ඇති වීම.
ක්ලාන්ත ගතිය.

වමනය නිසා දරුවාට හානියක් වෙයිද?

බොහෝ ගර්භණී මව්වරුන් බියටත් කනස්සලයටත් පත් වන්නේ මෙම කාලයේදී ආහාර නොගැනීම නිසා තම කුෂ තුල වැඩෙන කිරි කැටියාට බලපෑමක් වෙතැයි සිතන නිසාවෙන්ය. ඔබේ කිරි කැටියාට අවශ්‍ය පෝෂණය ඔබේ ශරීරයේ තැන්පත්වී ඇති පෝෂ්‍ය පදාර්ථ මගින් ලබා ගැනීමේ හැකියාව කිරි කැටියාට ඇත.

එසේම වමනය කිරීමේදී ඔබ දරන ආයාසය හෝ ඇදීම දරු ගැබට හානියක් වන්නේ නැත. නමුත් වමනයවීම නිසා නිසා ඔබේ ශරීරයේ ජල මටට්ම පහත යා හැකි බැවින් ඒ පිළිබඳව ඔබේ අවදානය යොමු කිරීම වැදගත්ය. එයට හේතුව ඔබේ ශරීරයේ ජල මට්ටම පහල යාමෙන් කිරි කැටියා විජලනයට පත් විය හැකි නිසාවෙන්ය. එනිසා හැකිතාක් දියර වර්ග පානය කරන්න.

වමනය සහ ඔක්කාරය අවම කර ගැනීමට හා මැඩ පවත්වා ගැනීමට ඔබට පුළුවන්.

දරු ගැබට කිසිම හානියක් නොවන පරිදි මෙම රෝග ලක්ෂණ වලින් සහනය ලබන්න පුළුවන් ඖෂධ ප්‍රතිකාර ඇත. නමුත් එවැනි ඖෂධ භාවිත කළ යුත්තේ වෛද්‍ය නිර්දේශ මත පමණක් බව මතක තබා ගන්න. මුල් අවදියෙහි සංකූලතා ලෙසින් ගැනෙන වමනය සහ ඔක්කාරය අවම කර ගරනීමට ප්‍රතිකාර වලට අමතරව කල හැකි දෑ කරන්නත් ඔබට හැකිය.

ඔබ ගන්නා ආහාර ගැනීමේදී සැලිකිලිමත් වන්න. – කාබෝහයිඩ්‍රේට් සහ ප්‍රෝටීන් බහුල ආහාර දිරවීමට පහසු බැවින් එවැනි ආහාර වැඩියෙන් තෝරා ගන්න. මේදය සහිත ආහාර දිරවීමට වැඩි කාලයක් ගත වන හෙයින් මේදය අඩු ආහාර ලබා ගන්න. මදක් ලූණු රසැති ආහාර සහ ඉඟුරු උදා ආබාධය සමනය කරයි. මිරිස්, තුනපහ වැඩි, සහ තෙල් අධික ආහාර ගැනීමෙන් වළකින්න.
නිතර කෙටි ආහාර ගන්න. – උදෑසන අවදි වූ වහාම ක්‍රැකර් බිස්කට් කිහිපයක් හෝ ටෝස්ට් කරන ලද සැන්ඞ්විච් එකක් වැනි කෙටි ආහාරයක් ගැනීම වඩා සුදුසුය. දවසට තුන් වරක් විශාල ආහාර වේල් ගැනීම වෙනුවට, දවස පුරා නිතර පෝෂ්‍යදායී කෙටි ආහාර ගන්න. නිරාහාරව සිටීම තුලින් වමනයසහ ඔක්කාර තත්ත්වය තවත් උග්‍රවිය හැක.
හොඳින් දියර පානය කරන්න. – ජලය බීමත් ඔබට අපහසු නම් වරකට ජලය ස්වල්පය බැගින් පානය කරන්න. ඉඟුරු රසැති පානයන්, දොඩම් දෙහි වැනි යුෂ සහ ඔබට පානය කිරීමට රුචි පළතුරු යුෂ වර්ග පානය කරන්න. එමෙන්ම, අයිස් කැට, ඝන ටොෆී වැනි දේවල් ක්‍රමයෙන් මුව තුළ දියකරමින් උරාබීමද සිදුකල හැක.
ඔක්කාරය උග්‍ර කරවන සාධක මගහරින්න. – ඔබට ඔක්කාරය ඇතිවීමට හේතුවන ආහාර හෝ ගන්ධයන් හෝ සුගන්ධයන් මගහරින්න.

සියළුම කිරි සිහිනයක පෙළ ගැස්ම ලිපි සඳහා පිවිසීමට මෙතැන ක්ලික්/ටැප් කරන්න

මෙම ලිපිය සැකසීමේදී සිය දැනුම නොමසුරුව ලබා දෙමින් රාගම උතුරු කොළඹ ශික්ෂණ රෝහලේ ප්‍රසව හා නාරිවේද විශේෂඥ වෛද්‍ය චාමින්ද මාතොට මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කිරි සිහිනයක පෙළගැස්ම ~ අටවන දිගහැරුම – මුල් අවදියෙහි සංකූලතා appeared first on familylife.

නින්දේදී ගෙරවීම සාමාන්‍ය දෙයක් කියල නම් හිතන්න එපා

දිශාන්ති වෙදගේ — Sun, 24 Feb 2019 05:22:30 +0000

ඔබ නොදන්න, අනිත් අයට වදයක් වුණ, සමහර විට ඔබටම වදයක් වුණ නින්දේදී ගෙරවීම අපි සාමාන්‍ය දෙයක් ලෙස බැහැර කලත් එසේ බැහැර කල නොහැකි තත්ත්වයක්. familylife.lk අපි සුව පියස තුළින් අද කතා බහ කරන්නෙ සාමාන්‍යයෙන් අසාමාන්‍ය තත්ත්වයක් වන නින්දේදී ගෙරවීම සම්බන්ධවයි.

“ගර්…ගර්… ගර්…”
“අපෝයී නින්දක් නැහැ මෙයාගෙ ගෙරවිල්ල නිසා”
“ආ… මම ගොරවනවා”
“නැතිව, හරියට පරණ එන්ජින් එකක් ස්ටාට් කරලා වගේ ”

ඇතැම් විට ගොරවන තැනැත්තාට ශාරීරිකව හා මානසිකව බලපාන අතරම ගොරවන තැනැත්තා සමග නිදන සාමාජිකයන්ටද ශාරීරිකව හා මානසිකව මෙම තත්ත්වය නිසා ගැටළු ඇතිවිය හැකිය.

ඇයි නින්දෙන් ගොරවන්නේ ?

ගෙරවීමට බලපාන හේතුව හුස්ම ගැනීම හා සම්බන්ධයි. සාමාන්‍යයෙන් අපේ ශ්වසන මාර්ගය දහවල් කාලයට වඩා රාත්‍රී කාලයේදී ප්‍රමාණයෙන් අඩුවීමක් සිදුවෙනවා. එසේම ඇතැම් පුද්ගලයන්ගේ විවිධ හේතූන් නිසා සාමාන්‍ය තත්ත්වයට වඩා ශ්වසන මාර්ගය පටුවීම හේතුවෙන් හුස්ම ගැනීමේදී ශබ්දයක් පිටවේ.

ශාරීරික හා ඇතැම් පුරුදු නිසා ශ්වසන මාර්ගයේ අර්ධ අවහිරතාවය හේතුවෙන් හුස්ම ගැනීම අපහසු වේ. මේ නිසා අර්ධව අවහිර වූ මාර්ගය ඔස්සේ වායු ධාරාවක් ගමන් කිරීමෙන් ශබ්දයක් නිකුත් වේ.

ඇතැමුන් නින්දේදී ගොරවන්නේ පහත ශාරිරික ව්‍යුහමය ගැටලුකාරී තත්ත්වයන් නිසාය

ශ්වසන මාර්ගයේ පැති බිත්ති අධික ලෙස හැකිලීම.
නාසයේ ඇති අවහිරතා තිබීම.
එනම් නාසයේ බිත්තියේ ඇඳ තිබීම , නාසයේ මස් දළු තිබීම.
මෘදු තල්ල විශාලව පිහිටීම සහ එහි අධික නම්‍යශීලිභාවය නිසා.
ඉතා විශාල දිවක් පිහිටා තිබීම.
විශාල ඇඩිනොයිඩ් ග්‍රන්ථියක් පිහිටීම.
සෙම් ගෙඩි විශාල වීම.
අපිජීවිකාවේ අධික නම්‍යශීලිභාවය.
ස්ථූලභාවය නිසා ගෙලෙහි අධික මේදය තැනැපත්ව තිබීම.
ඇතැමුන් නින්දේදී ගොරවීමට හේතුව ඔවුන්ගේ ජීවන චර්යාවේ විවිධ පුරුදු විය හැකිය.
අධික ලෙස නිදිමැරීම.
දුම්පානය කිරීම.
මත්පැන්, හා මත් බෙහෙත් භාවිත කිරීම.

නින්දෙන් ගෙරවීමට ගොදුරු වූවෙක් නම්

දහවල් අධික නිදිමත
අධික තෙහෙට්ටුව
අධ්‍යාපනයට හෝ රැකියාවට අවධානය යොමු කිරීමට නොහැකිවීම
අධික රුධිර පීඩනය නිසා හිසරදය ඇති වීම

වැනි තත්ත්වයන්ගෙන් පීඩාවට ලක්වේ. එසේම ගොරවන පුද්ගලයකු සමීපයේ නිදන අයටද සුව නින්දක් නොලැබෙන අතර එය පවුලේ අසමගියට හේතු වේ. එසේම අන් සාමජිකයන්ට අධික රුධිර පීඩන තත්ත්වයන් හා නින්ද ආශ්‍රීත රෝගද ඇතිවිය හැකියි.

ගෙරවීමේ රෝගය නිසා වෙනත් රෝග වැළඳිය හැකිය

හෘදයට, මොළයට, රුධිර වාහිනීවලට මෙම තත්ත්වය තදින් බලපානු ලබයි. ඉතා තරුණ වියේදීම අධික රුධිර පීඩනයට, හෘදයාබාධ වලට හා ආගාධයන්ට ගොදුරු විය හැකිය.
ලිංගික බෙලහීනතාවය ඇතිවීමට ද සරුභාවය අඩුවීමට ද රුධිරයේ ඔක්සිජන් මඳ බව හේතු වන බව දැන් සොයාගෙන තිබේ.

නින්දෙන් ගෙරවීම සුව කරගත හැකිද?

උගුර,කන , නාසය හා ගෙල පිළිබඳ විශේෂඥ වෛද්‍යවරයකු වෙත යොමු වන්න. එහිදී ඔබේ නාස, උගුර හොඳින් පරීක්ෂා කරනු ඇත.
ඔබට දහවලට නින්ද ඇති වීම පිළිබඳ වෛද්‍යවරයා හොඳින් අධ්‍යනය කොට ඔබව නිද්‍රා පරීක්ෂණයක් සඳහා යොමු කර නින්දෙන් ගෙරවීම හා සම්බන්ධ ශ්වසන අවහිරතා පිළිබඳ නිගමනයකට එළැඹ ඒ අනුව ප්‍රතිකාර තීරණය කරනු ඇත.
නින්දෙන් ගෙරවීමට හේතු වන නාසයේ ඇදයක් තිබේනම්, සෙම් ගෙඩි තිබේනම් හෝ උගුරේ හෝ නාසයේ වෙනත් ආබාධයක් තිබේනම් ශල්‍යකර්මයක් මගින් එම තත්ත්වයට විසඳුමක් ලබා ගත හැකිය.
තරබාරු බව නිසා නින්දෙන් ගොරවන්නේ නම්, තරබාරු බව පාලනය කිරීමෙන් එම තත්ත්වයෙන් මිදිය හැකිය.
නින්දෙන් ගොරවන පුද්ගලයන් සඳහා “සී පැප්” නමින් හැඳින්වෙන උපකරණය වෛද්‍ය උපදෙස් අනුව වෙළෙඳපොළෙන් මිලදී ගැනීමට හැකිය. එම උපකරණය පැළඳගෙන නින්දට යාමෙන් නින්දෙන් ගෙරවීම පාලනය කළ හැකිය. “සී පැප්” උපකරණය සැමවිටම ස්වසන මාර්ගය විවෘත කර තැබීමට උපකාරී වෙනවා. පුද්ගලයා මහත පුද්ගලයකු වුවත්, ශ්වසන මාර්ගයේ වෙනත් අවහිරතා තිබුණත්, මෙම සී පැප් උපකරණය මගින් නිරන්තරයෙන්ම උගුර, ග්‍රසනිකාව යන ස්ථාන විවෘතව තබා පෙනහළු තුළට පහසුවෙන් වාතය ඇතුළු කරනු ලැබේ. එසේ වාතය පෙනහළු තුළට ඇතුළු වන්නේ උපකරණය මගින් අධික පීඩනයකින් වාතය තල්ලූ කිරීම නිසයි. මෙම සී පැප් උපකරණය ඉතා පහසුවෙන් භාවිතා කළ හැකි අතර පැළඳගෙන සිටීමටද පහසු උපකරණයක්ය.

ඉතින් ඔබටත් හොරා ඔබ තුලින් නින්දෙන් ඇති වන අමිහිරි ගෙරවීමට පියවරක් ගෙන ඔබත් සතුටින් නීරෝගීව ජීවත් වන්න.

මෙම ලිපිය සැකසීමේදී සිය දැනුම නොමසුරුව ලබා දෙමින් ගෝල්ඩන් කී රෝහලේ උගුර කන, නාසය හා ගෙල පිළිබඳ විශේෂඥ ශල්‍ය වෛද්‍ය සීතා අරඹේපොළ මහත්මිය දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post නින්දේදී ගෙරවීම සාමාන්‍ය දෙයක් කියල නම් හිතන්න එපා appeared first on familylife.

තරුණකම රැකගන්න හිතන අය මේ ලිපිය අනිවාර්යයෙන් කියවන්න

දිශාන්ති වෙදගේ — Thu, 21 Feb 2019 10:15:16 +0000

තරුණකම රැකගන්න කවුද අකමැති “ආනේ අවුරුදු හතලිහක් වුණාට ඔයා තාම කෙල්ල වගේනේ ” ඔය වගේ තමන්ගේ රූපයේ තරුණකම, ලස්සන ගැන අගය කරනවා අහනකොට කාගෙත් හිතට ගෙන එන්නේ සතුටක්. පුංචි ආඩම්බරයක්. familylife.lk සුව පියසෙන් ගෙන එන මෙම ලිපිය තරුණ කම රැකගන්න ඔබට කළ හැකි බොහෝ දේ ගැනයි.

තරුණකම රැකගන්න කළ යුතු දේ ගැන කතා කරන විට ඒ කතා බහ කාන්තාවන්ට වගේම පුරුෂ පක්ෂයටත් අදාලයි. ඒ කොහොම වුනත් පිරිමියකුට සාපේක්ෂව කාන්තාවකගෙ වියපත් පෙනුම ඉක්මණින්ම ලඟා වෙන්නෙ විවාහයෙන් පසු දරුවන් ලැබුණට පසු තමන්ට තමන්ව අමතක වීම නිසයි.

වයසින් මහලු වුනත් පෙනුමින් තරුණකම රැකගන්න පුළුවන්නම් කොයිතරමි අගේද?

ඔව් පුළුවන්, භෞතචිකිත්සාවේදී ඇන්ටි ඒජින් (Anti Aging) ඒ කියන්නේ වයසට යාම කල් දමා ගැනීමයි. භෞතචිකිත්සාවේදී භෞතික විද්‍යාවේ මූලධර්ම අනුව ශාරීරිකව සහ මානසිකව සිදුවන සංකූලතාවයන්ට ප්‍රතිකාර කිරීම තුලින් ඇන්ටි ඒජින් ඒ කියන්නේ වයසට යාම කල් දමා ගැනීම කල හැකියි.

අපි හැමෝගෙම සුන්දරත්වය පිළිඹිබු වන්නේ මුහුණෙන් එනිසා තරුණකම ගැන කතාබහේදී මුහුණට ලැබෙන්නේ සුවිශේෂී ස්ථානයක්. තරුණකම, මුහුණේ හැඩය සහ මුහුණෙහි වර්ණය අතර තිබෙන්නේ සහ සම්බන්ධතාවයකි.

සාමාන්‍යයෙන් කුඩා අවදියේ සිට මුහුණෙහි හැඩය ඕවලාකාර ස්වභාවයක් ගනියි. එහෙත් වයසින් මුහුකුරායත්ම මුහුණේ හැඩය වෙනසකට ලක්වේ. මුහුණේ අස්ථි පද්ධතියට අනුව මුහුණේ මාංශපේෂීන් මගින් මුහුණේ හැඩය තීරණය කරයි. මුහුණේ මාංශපේෂීන් වැඩි වශයෙන් එක් අස්ථියකින් පටන් ගෙන අවසන් වනුයේ සම හෝ තවත් මෘදු පටකයකින්ය. එම නිසා මුහුණේ සම ඉතා ඉක්මණින් එල්ලාවැටීමක් සිදු විය හැකිය

ළමා වියේ සිට යොවුන් විය දක්වා මුහුණේ මාංශපේෂීන් මුහුණේ ඉරියව් අනුව ඉතා නම්‍යහීලීව හොඳ ක්‍රියාකාරීත්වයකින් යුක්තවනවා. ඒත් සමගම නව යොවුන් වියට පත් වන විට ක්‍රමයෙන් මුහුණේ මාංශපේෂීවල ක්‍රියාකාරීත්වය අඩුවේ. ඒ අනුව අප දිනෙන් දින වයසට යාමත් සමඟම මාංෂ පේෂීන් හී ක්‍රියාකාරීත්වය අඩු වන බව ඔබට තේරුම් යන්නට ඇත. මෙසේ ක්‍රියාකාරීත්වය අඩුවීම නිසා මුහුණේ තැනින් තැන අපදව්‍ය රැස් වන නිසා ඇස් යට කළු පැහැවීම, ලප කැළැල් ඇති වීම, මුහුණෙහි පැහැපත් බව අඩු වී සම දුර්වර්ණ වීම ආදිය සිදුවේ.

මුහුණ එල්ලා වැටීම් සහ අවපැහැ වීම සාමාන්‍යයෙන් නම් වයස අවුරුදු 30ත් 35ත් අතර මෙම තත්ත්වය ඇති වුවත් වර්තමානය වන විට මෙම තත්ත්වය අවුරුදු 18, 19 වයස් වල පසුවන අයටද බලපාන තත්ත්වයක් බවට පත්ව ඇත.

අකාලයේ මුහුණ වියපත් වන්නට හේතූ

මාංෂ පේෂීන් අතර ඇති ඉඩ ප්‍රමාණය ආවරණය කරන්නේ තෙල් තට්ටුවක් මගින්ය. මුහුණේ බර ඉහළට ඇද තබා ගනිමින් මුහුණේ මාංෂ පේෂීන් ශක්තිමත්ව ඝණව සහ මුහුණේ හැඩය නිසිපරි දිපවත්වා ගැනීමට මෙම තෙල් තටිටුව උපකාරීවේ. මාංෂ පේෂීන් වල තෙල් තට්ටුවේ බර අනවශ්‍ය ලෙස වැඩි වු විට සම එල්ලා වැටීමට ලක්වේ.
එසේම මුහුණේ මාංෂ පේෂීන් හී තෙල් තට්ටුව වැඩිවූ විට පරිවෘත්තීය ක්‍රියාවලියද අඩපණ වේ එවිට සම මගින් තෙල් නිෂ්පාදනය කෙරෙන ග්‍රන්ථීන් මේද නිපදවීම අඩු කරන නිසා සමෙහි තෙතමනය රඳවා ගැනීමට අවශ්‍ය තෙල් අඩුවී සම වියළීමට, සම රැලි වැටීම මුහුණ වයස් ගත පෙනුමක් ඇති කරමින් එල්ලා වැටීමත් සිදුවේ.
හිරු එළියට සහ සම මත කුණු දූවිලි සහ වාහන දුම් ආදිය නිසා සහ මුහුණේ මැරුණ සම ඉවත් නොකිරීම මුහුණේ සම අවපැහැයට ලක්වේ.
සමෙහි මාංෂ පේෂීන වල ශක්තිමත් බව අඩු වන විට රුධිර සැපයුමද අඩුවේ. එම නිසා සම ඇතුලත මාංෂ පේෂීන් වලට ඔක්සිජන් හා නිසි පෝෂණය නොලැබීම නිසාත් පරිවෘත්තීය ක්‍රියාවලිය නිසි පරිදි සිදුනොවීම.
නිතර නිතර සබන් භාවිත කර මුහුණ සේදීම.

තරුණ බව ඉස්මතු වන්නට සම රැක ගන්න

මුහුණෙහි පැහැපත් බව ඉස්මතු කිරීමට නම් මුහුණේ තැන්පත්ව ඇති අපද්‍රව්‍ය ඉවත් කර සමට නිසි පරිදි ඔක්සිජන් සැපයුමක් සහ නිසි පෝෂණයත් ලබා දිය යුතුය. භෞත චිකිත්සාවේදී මෙම කාරණා සපුරා පැහැපත් නීරෝගී සමක් ලබා ගැනීමට අල්ට්‍රා සවුන් නමැති විද්‍යුත් උපකරණය මගින් ශබ්ද තරංග උපයෝගී කරගනියි.
අල්ට්‍රා සවුන්ඞ් ශබ්ද තරංග කියූ සැනින් ඔබ යම් චකිතයක් බියක් ඇති වන්නේ මෙම තරංග මිනිසාගේ සිරුරට අහිතකර වේ යැයි යන අදහස මතය. එහෙත් අල්ට්‍රා සවුන්ඞ් ශබ්ද තරංග වාතයේ ඇති අපේ කනට ඇසෙන ශබ්ද තරංග වලටත් වඩා සියුම්ය. මෙම උපකරණය මගින් හර්ඞ්ස් 20000 කට වඩා වැඩි ඉතා සියුම් ශබ්දතරංග ප්‍රතිකාර සඳහා භාවිතයට ගනියි.
කෙසේ වුවද මෙම තරංග මිනිස් ශරීරයට අහිතකර නොවන බව විද්‍යාත්මකව තහවුරු කර ඇත. මුහුණේ තරුණකම රැකගන්න, තරුණ පෙනුම උද්දීපනයේදී වඩාත් වැදගත් වන්නේ මාංෂ පේෂීන් ශක්තිමත් කිරීමය. ඒ සඳහා විවිධ ආකාරයේ සංවේදීතාවය අඩු විද්‍යුත් උපකරණ මගින් මුහුණේ කුඩා මාංෂ පේෂීන් පවා උද්දීපනය කර නැවත ක්‍රියාකාරී තත්ත්වයට පත් කිරීම සිදු කල හැකිය.

නිවසේදීම ඔබට තනිවම කළ හැකි සරල ව්‍යායාම කිහිපයක් කිරීමෙන්

මාංෂ පේෂීන් ශක්තිමත් කිරීම.
සම තුල අනවශ්‍ය ලෙස මේදය තැන්පත් වීම අවම කිරීම.
මනා රුධිර සංසරණය තුලින් මාංෂ පේෂීන් වලට හොඳ පෝෂණයක් ලබා දීම.
මුහුණෙහි සමෙහි අපද්‍රව්‍ය ඉවත් වීම.
සම රැළි වැටීම, මුහුණෙහි සම එල්ලා වැටීම. රේඛා මතු වීම ආදිය පාලනය වීම.

යනාදී වාසි රැසක් හිමි කරගත හැකිය.

අපි දැන මෙම සරල ව්‍යායාම කිහිපයක සලකා බලමු.

ඇස් වටා රැළි වැටීම අවම කිරීම

ඔබේ දෑස් අඩවන් කරගන්න.
දැන් සෙමින් සෙමින් දෑස් තද කරමින් දෑස් තද කර වසා ගන්න.
මෙසේ තත්පර පහක් පමණ සිටින්න.
දැන් සෙමෙන් සෙමෙන් දෑස් ලිහිල් කරමින් පෙර සිටි අඩවන් තත්ත්වයට එන්න.
තත්පර දෙක තුනක් එසේ අඩවන් දෙනෙතින් සිට නැවත පෙර පියවර අනුගමනය කරන්න.
මෙම ව්‍යායාමය විසි වතාවක් පමණ කරන්න.

කට දෙපැත්ත රැළි වැටීම වලක්වා ගැනීම

1 වන ක්‍රමය

කට බාගෙට ඇර ඕ අකුර ශබ්ද වන ලෙස තොල් උල් කරන්න.
මෙම ඉරියව්වෙන් තත්පර පහක් පමණ ඉන්න.
දැන් නැවත සෙමෙන් සෙමෙන් නැවත කට වහන්න.
තත්පර පහක් පමණ සිට නැවත ඉහත පියවර අනුගමනය කරන්න.

2 වන ක්‍රමය

කට බාගෙට ඇර ඊ අකුර ශබ්ද වන ලෙෂ කට තබා ගන්න.
මෙම ඉරියව්වෙන් තත්පර පහක් පමණ ඉන්න.
දැන් නැවත සෙමෙන් සෙමෙන් නැවත කට වහන්න.
තත්පර පහක් පමණ සිට නැවත ඉහත පියවර අනුගමනය කරන්න.

3 වන ක්‍රමය

කට හොඳින් පුම්බා ගන්න.
මෙම ඉරියව්වෙන් තත්පර පහක් පමණ ඉන්න.
දැන් නැවත සෙමෙන් සෙමෙන් නැවත කට ලිහිල් කරන්න.
තත්පර පහක් පමණ සිට නැවත ඉහත පියවර අනුගමනය කරන්න.

මේ ඉතාම සරල ව්‍යායාම කිහිපයක්ය. මෙම ක්‍රම හොඳින් ප්‍රගුණ කල පසු සංකීර්ණ ව්‍යායාම සඳහා ඔබට යොමු විය හැකිය. එහිදී මුළු මුහුණම එකවර ව්‍යායාමක යෙදේ.

1 වන ක්‍රමය

මෙම ක්‍රමය මග මුළු මුහුණටම ව්‍යායාමයක් ලැබේ.
වහල දෙසට මුහුණ සිටින සේ ඉහළ බලා ගන්න.
දැන් ඔබ හාද්දක් දෙන විට කට උල් කරන ආකාරයට දෙතොල් උල් කරන්න.
මෙම ඉරියව්වෙන් තත්පර පහක් පමණ සිට නැවත ලිහිල් කරන්න.
මෙම ව්‍යායාමයද වාර පහක් පමණ කරන්න.

2 වන ක්‍රමය

දෙනෙත් සෙමෙන් සෙමෙන් පියාගන්න.
ඒ සමගම දිව එළියට දමන්න.
දැන් දෙනෙත් ලිහිල් කරමින් දිව ඇතුලට ගන්න.
මෙම ව්‍යායාමයද වාර පහක් පමණ කරන්න.

මෙම ව්‍යායාම කිරීමට වයස් භේදයක් නැත. අපේ සුන්දරත්වය අහිමි වූ පසු දුක් වනවාට වඩා තරුණකම රැකගන්න, සුන්දරත්වය එලෙසම පවත්වා ගන්න හැකියාව ඇති බව මේ ලිපියෙන් ඔබට පසක් වන්නට ඇත. එසේ නම් පමා නොවන්න. මේ ලස්සන වන්නට කාලයයි.

මෙම ලිපිය සැකසීමේදී සිය දැනුම නොමසුරුව ලබා දෙමින් වරලත් භෞතචිකිත්සක සංගමයේ ජාතික සංවිධායක, ෆිසියෝ ලයිෆ් ආයතනයේ අධ්‍යක්ෂ, වරලත් භෞතචිකිත්සක ආචාර්ය සුජීව වීරසිංහ මහතා (072 – 4506976) දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post තරුණකම රැකගන්න හිතන අය මේ ලිපිය අනිවාර්යයෙන් කියවන්න appeared first on familylife.

කිරි සිහිනයක පෙළ ගැස්ම ~ හත්වන දිගහැරුම – දරු උපත සිදුවන දිනය

දිශාන්ති වෙදගේ — Sat, 16 Feb 2019 04:50:57 +0000

කිරි සිහිනයක සේයාව දැනුන ගත් මොහොතතේ සිටම අම්මටත් තාත්තටත් හිතට ඇති වන ගැටලු දෙකක් වන දරු උපත සිදුවන දිනය හා දරුවා දුවෙක්ද පුතෙක්ද යන්න දැනගන්නා ආකාරය තමයි මෙවර කිරි සිහිනයක පෙළ ගැස්ම (පසුගිය ලිපි සඳහා මෙතන ක්ලික්/ටැප් කරන්න) තුළින් සාකච්ඡාවට ගැනේ.

හත්වන දිගහැරුම

අපේ කිරි සිහිනය සැබෑ වන දිනය කවදාද ?

අම්මගෙ කුස තුලට වැඩිය පැටියා දස මාසයක් මවි කුසෙහි වැඩෙනවා. ඒ කියන්නේ සති හතලිහක්. දින වලින් දැක්වුවහොත් දින 280 කින් දරුවා බිහිවීමට නියමිත දිනය ලෙස සලකනවා. මේ ක්‍රමය සියයට සියයක්ම නිවැරදි නොවන්නේ ප්‍රසූතිය සිදුවන කාලය දරුවකුගෙන් දරුවකුට වෙනස් වන නිසාය. ප්‍රසූතිය ගර්භයට සති 37ත් සති 42ත් අතර එනම් දින 259- 294 කාලය තුල සිදු විය හැකියි.

ඉතින් දැන් පැටියා හරියටම මේ ලොවට එන දිනය (දරු උපත සිදුවන දිනය) අපි ගණනය කරමුද? සාමාන්‍ය ලෙස දින 28කට වරක් පිළිවෙලට ඔසප් වීම සිදු වෙන මවකට අවසන් වරට ඔසප් වූ දිනයේ සිට සති 40ක් වෙන දිනය ගණනය කරන සරල ක්‍රමය මගින් ප්‍රසූත දිනය ගණනය කරගත හැකිය. ඒ අනුව අවසන් වරට ඔසප් වූ දිනයට මාස 9ක් සහ දින 7ක් එකතු කිරීමෙන් දරුවා බිහි වීමට නියමිත දිනය ඔබට ම ගණනය කර ගන්න පුළුවන්.

අවසන් වරට ඔසප් වූයේ 2019 ජනවාරී 05 දා යැයි සිතමු

වෛද්‍ය වරුදරු උපත සිදුවන දිනය ගණනය කර ගැනීම පහසු වීම සඳහා Pregnancy Wheel ලෙස හඳුන්වන රෝදයක් වැනි උපකරණයක් භාවිතා කරයි. තාක්ෂණය බොහොම දියුණු අද කාලයේ ප්‍රසූත දිනය ගණනය කර ගැනීමට පරිගණක මෘදුකාංග සහ Mobile Apps දැන් තිබෙනවා. මෙම ගණනය කිරීමට නම් අනිවාර්යෙන්ම ඔබට අවසන් වරට ඔසප් වූ දිනය පිළිබඳ දැනීමක් තිබිය යුතුය.

ස්කෑන් පරීක්ෂණයක් මගින් දරුවා ලැබෙන දිනය ගණනය කිරීම වඩාත් නිරවද්‍යයි. මෙම ස්කෑන් පරීක්ෂණයේ දී දරුවාගේ ප්‍රමාණය මැන බලා දරු ගැබේ වයස ඉතා නිවැරදිව අනුමාන කළ හැකියි. ස්කෑන් පරීක්ෂණයේ දී ඔසප් වීමට අනුව දරුවා ලැබෙන දිනයට වඩා වෙනස් දිනයක් දරුවා ලැබෙන දිනය ලෙස අනුමාන කල හොත් ස්කෑන පරික්ෂණයේ දිනය නිරවද්‍ය ගණනය කිරීම ලෙස පිළිගනු ලබයි.

පැටියා දුවෙක්ද පුතෙක්ද දන්නෙ නැහැ

ඔන්න ඉතින් ඉවසිල්ලක් නැති අනෙක් ගැටලුව. කුසෙහි වැඩෙන පැටියා දුවක් වුනත් පුතෙක් වුනත් ඒ ඔබේම වස්තුවයි. පැටියගෙ ස්ත්‍රී පුරෂ භාවය තීරණය වන්නේ පැටියා මව් කුසෙහි ස්ථාපනය වන විටදිමයි. මවකගේ කුසෙහි නව ජීවයක් පිළිසිඳ ගන්නේ ශුක්‍රාණුවක් සහ ඩිම්බයක් එකතු වීමෙන්.

ඩිඛ්ම්බයක ගැහැණු වර්ණ දේහ එනම් X වර්ණ දේහ තිබෙන්නේ 1යි. ශුක්‍රාණුවක් ගැහැණු වර්ණ දේහ එනම් X වර්ණ දේහ 1 ක් හෝ පිරිමි වර්ණදේහයක් එනම් Y වර්ණ දේහ 1 ක් තිබිය හැකියි. ශුක්‍රාණුවේ තිබෙන වර්ණ දේහය අනුව තමයි කළලයේ ස්ත්‍රී පුරුෂ බව තීරණය වන්නෙ. වරකට පිටවෙන ශ්‍රක්‍රාණු වලින් 50% පිරිමි වර්ණදේහ සහිත ශ්‍රක්‍රාණු වන අතර ඉතිරි 50% ගැහැණු වර්ණ දේහ සහිත ශ්‍රක්‍රාණුත් වේ. ඒ අනුව ඩිම්බය සමඟ X වර්ණ දේහ සහිත ශ්‍රක්‍රාණුවක් සංසේචනය වුවහොත් දූ පැටියෙකුත් ඩිම්බය සමඟ Y වර්ණ දේහ සහිත ශ්‍රක්‍රාණුවක් සංසේචනය වුවහොත් පුතු පැටියෙකුත් ඔබේ දෝතට වඩීවි.

දුවක් වුවත් පුතෙක් වුවත් කොන්දේසි විරහිතව මේ පුංචි අමුත්තව ආදරෙන් පිළිගන්න ඔබ දෙදෙනාම සුදානම් විය යුතුයි. කුසෙහි වැඩෙන පැටියා දුවෙක්ද පුතෙක්ද යන්න ගර්භණි සමයෙ සිදු කරන ස්කෑන් පරික්ෂණ සහ වෙනත් පරික්ෂණ මගින් සනාථ කරගැනීමට හැකියි.

සාමාන්‍යයෙන් සති 20දී කරන කළලයට ඇති අවදානම් සහ දින නිර්ණනය කිරීමට සිදු කරන ස්කෑන් පරීක්ෂණයේදී කළලයේ ස්ත්‍රී පුරුෂ භාවය දැනගත හැකියි. නවීන ස්කෑන් යන්ත්‍රයක් භාවිතා කර පළපුරුදු වෛද්‍ය වරයෙකුට සති 16දී පමණ පවා මෙය පැවසීමට හැකියාව තිබේ. මෙම කාලය වන විට දරුවාගේ බාහිර ලිංගේන්ද්‍රියන් වැඩී ඇති නිසා ස්කෑන් යන්ත්‍රය ආධාරයෙන් පරීක්ෂා කර කුසෙහි වැඩෙන්නේ දුවෙක්ද පුතෙක්ද යන්න නිර්ණනය කරයි.

කලාතුරකින් ගර්භාෂයට සිහින් කටුවක් ඇතුල් කර කළලයේ අසාමාන්‍ය තත්වයන් හඳුනා ගැනීමට ඇම්නියොසෙන්ටෙසිස් නම් පරීක්ෂණය සිදු කරයි. මෙම පරීක්ෂණයෙන්ද කුසෙහි වැඩෙන්නේ දුවෙක්ද පුතෙක්ද යන්න නිර්ණනය කල හැකිය.

සති 11දී පමණ කරන රුධිර පරීක්ෂණයක් මගින් දරුවාගේ DNA පරීක්ෂා කිරීමේ හැකියාව ඇත. දරුවාට තිබිය හැකි ජානමය රෝග තත්වයන් පිළිබඳව සති 11ක පමණ කාලයෙ දී ම දැන ගැනීමට හැකිය. මෙම පරික්ෂණය ඉතාමත් මිල අධික පරීක්ෂණයක් වන අතර බොහෝ විට සිදු කරන්නේ ජානමය රෝග තත්ත්වයන්ට ගොදුරු වීමේ අවදානමක් ඇත්නම්ය.

ලිපිය කියවා අවසන් වූවා නම් විද්‍යාත්මකව ඔබේ ගැටලු දෙකට පිළිතුරු ලැබෙන්නට ඇති බව නොඅනුමානය.

සියළුම කිරි සිහිනයක පෙළ ගැස්ම ලිපි සඳහා පිවිසීමට මෙතැන ක්ලික්/ටැප් කරන්න

මෙම ලිපිය සැකසීමේදී සිය දැනුම නොමසුරුව ලබා දෙමින් රාගම උතුරු කොළඹ ශික්ෂණ රෝහලේ ප්‍රසව හා නාරිවේද විශේෂඥ වෛද්‍ය චාමින්ද මාතොට මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කිරි සිහිනයක පෙළ ගැස්ම ~ හත්වන දිගහැරුම – දරු උපත සිදුවන දිනය appeared first on familylife.

කිරි සිහිනයක පෙළ ගැස්ම ~ හයවන දිගහැරුම – සුරක්‍ෂිත දරු උපතක්

දිශාන්ති වෙදගේ — Wed, 30 Jan 2019 06:57:00 +0000

සෑම දෙමාපිය යුවලකගේ බලාපොරොත්තුව නීරෝගී දරු උපතක්ය. නීරෝගී දරු උපතක් යනු ඔබ දෙපළට පමණක් නොව රටටද සම්පතක්ය. එහෙයින් රජය විසින් මාතෘ හා ළමා සායන පවත්වනු ලැබේ. familylife.lk කිරි සිහිනයක පෙළ ගැස්ම (පසුගිය ලිපි සඳහා මෙතන ක්ලික්/ටැප් කරන්න) මගින් අද අපි ඔබට ගෙන එන්නේ නොමිලයේ ඔබට ලැබෙන වටිනා මෙහෙවරක් වන මාතෘ සායන හා එහිදී ඔබට හිමිවන ප්‍රතිලාභ මොනාවාද යන්න ගැන සැකසුනු ලිපියකි.

සයවන දිගහැරුම

විවාහ වූ පසු ඔබ පදිංචි ප්‍රදේශයේ සෞඛ්‍යය වෛද්‍ය නිළධාරි කාර්යාලයේ පවුල් සෞඛ්‍යය සේවා නිළධාරිණිය යටතේ ලියාපදිංචි වී සිටිය යුතුය. ඒ අනුව ඔබේ ප්‍රදේශයේ පවුල් සෞඛ්‍ය සේවා නිළධාරිණියට ඔබගේ ගර්භණීත්ව දැනුම් දෙන්න. එසේ නොමැති නම් ගර්භණීත්වය තහවුරු කර ගත් වහා ඔබ පදිංචි ප්‍රදේශයේ පවුල් සෞඛ්‍ය සේවා නිලධාරිණිය මුණ ගැසී ලියාපදිංචි වන්න.

ඉක්මණින්ම සායනයේ ලියාපදිංචි වීමට ඔබව යොමු කරන්නෙ ගැබ් ගෙන සති අටක් ඉක්ම යන්නට ප්‍රථම ගර්භණී මවට ඇති කලින් හඳුනාගත හැකි විවිධ සංකූලතා හා රෝගී තත්ත්වයන්ට හඳුනා ගෙන වහාම ප්‍රතිකාර වෙත යොමු කල හැකි නිසාවෙන්ය.

ගර්භණිත්වය දැනුම් දීමෙන් අනතුරුව

ගර්භණී මවගේ බී.එම්.අයි. දර්ශකය මැනිම,
ගර්භණී මවගේ රුධිර ඝනය
එච්.අයි.වී සඳහා රුධිර පරීක්ෂණය සිදු කරයි.

එසේම සෑම සායන වාරයකදීම

බර පරීක්ෂා කර දරුවාගේ වර්ධනය පිළිබඳ තක්සේරූ කිරීම
මුත්‍රා වල ඇල්බියුමින් හා සීනී සඳහා පරීක්ෂාවන් සිදු කිරීම
රුධිර පීඩනය මැනීම
වෛද්‍යවරයකු විසින් සෑම මවක්ම පරීක්ෂාවට ලක් කරන අතර එහි දී දරුවාගේ වැඩීම, හෘදස්පන්ධනය ,දරුවා සිටින ආකාරය පිළිබඳ වැනි තත්ත්වයන් නිරීක්ෂණය කරයි.

සති දොළහ පසු වූ විට පණු බෙහෙත් ලබා දෙයි. නව ජන්ම පිට ගැස්ම වැලැක්වීම සඳහා පිට ගැස්ම එන්න ලබා දෙයි. එසේම මාස තුනක් පසු වූ පසු කැල්සියම් සහ යකඩ පෙති සායනයෙන්ම ඔබට ලබා දෙනු ඇත.

පවුල් සෞඛ්‍ය සේවා නිළධාරිනිය ඔබේ නිවස පැමිණ ඔබගේ ගර්භ පරික්ෂාව, අමතරව පෝෂණය, ප්‍රසුතිය පිළිබඳ දැනුවත් කරනු ලැබේ. ප්‍රාදේශීය සෞඛ්‍ය ආයතන තුල මාතෘ සායනය මගින් පූර්ව ප්‍රසව සැසි ඔබ වෙනුවෙන්මය.

එහිදී,

ගර්භණි මුල් කාලයේදී ඇති වන අපහසුතා එනම් වමනය, ආහාර අරුචිය ,කලන්තය, පපුවේ දැවිල්ල,ආදීය අවම කර ගැනීමට උපදෙස්
දරුවා වැඩෙන අයුරු විඩීයෝ දර්ශන අනුසාරයෙන් දැනුවත් කිරීම
ගර්භණී සමයේ අවදානම් තත්ත්වයන්
ගර්භණී සමයේ පෝෂණය පිළිබඳ
ගර්භණී සමයේ ලිංගිකව සම්ප්‍රේෂණය වන රෝග
ගර්භණී සමයේ යහ පැවැත්ම
දන්ත සෞඛ්‍යය
ගර්භණී මව කෙරෙහි සැමියාගේ කාර්්‍යය භාර්්‍යය ආදී මාතෘකා පිළිබඳ ඔබට දැනුම ලබා දෙයි.
දරුවාගේ චලනය පිළිබඳ දැනුවත් කිරීම
ගර්භණී සමයේ රුධිර වහනය, අධික හිසරදය, උදර වේදනාව, පෙනීමේ වෙනසක් දැකීම, හුස්ම ගැනීමේ අපහසුතා ආදිය පිළිබදව දැනුවත් කිරිම
ළදරු ඇඳුම් පිළිබදව හා රෝහල් ගතවීමේදී අවශ්‍ය දේ පිළිබදව දැනුවත් කිරිම
ප්‍රසවයේ ලක්‍ෂණ
දරුවා ලැබෙන ක්‍රමය පිළිබඳව
මව්කිරි දීම පිළිබඳව
දරුවා නෑවිම පිළිබඳව,
ප්‍රසවයෙන් පසු ඇතිවන පසු ප්‍රසව සංකූලතා පිළිබඳව
පවුල් සංවිධාන ක්‍රම පිළිබඳ
දරුවා සහ මවගේ පෝෂණය පිළිබඳව
පූර්ව ළමා විය සංවර්ධනය පිළිබඳව

වැනි සුරක්‍ෂිත දරු උපතක් සඳහා ඉතා වැදගත් කාරණා පිළිබඳව මෙම සැසි වලදී ඔබව දැනුමින් පෝෂණය කරයි.

දරු ප්‍රසූතිය සිදුවන්නේ කුමන රෝහලේද?

දස මාසයක් කුස හොවාගෙන සිටින ඔබේ ජීවිතයේ වටිනාම සම්පත දෝතට පත් කරගන්නේ රජයේ රෝහලකද පෞද්ගලික රෝහලකද යන්න ඔබේ තීරණයකි. දරු ප්‍රසුතිය සඳහා ඔබ තෝරා ගන්නේ රජයේ රෝහලක් නම් අදාල රෝහලට ගොස් ලියාපදිංචි විය යුතුය. ලියාපදිංචි වීමට යන විට ඔබ ගමේ සායනයේ ලියාපදිංචි වූ ගර්භණී සටහන් කාඞ් පත අනිවාර්යයෙන්ම රැගෙන යන්න. රෝහලේ ලියාපදිංචි වීමෙන් අනතුරුව පළපුරුදු දක්ෂ ප්‍රසව හා නාරි විශේෂඥ වෛද්‍යවරයන් යටතේ පවත්වන සායනයට සහභාගී විය හැකිය.

මෙම සායනයේදී

මවට ඇති විවිධ සංකූලතා කල් තියාම හඳුනා ගැනීම.
ස්කෑන් පරික්ෂණ
කළලය ගර්භාෂයෙන් පිටත පිහිටා තිබීම වැනි තත්ත්වයන් හඳුනා ගැනීම.
රෝගයකට දැනටමත් ප්‍රතිකාර ගන්නේ එයින් දරු ගැබට විය හැකි අවදානම් හඳුනා ගැනීම සහ ඒ සදඟා ගත යුතු නිසි ප්‍රතිකාර හා ගත යුතු ක්‍රියාමාර්ග පිළිබඳ උපදෙස් ලබාදීම.
ඉදිරියේදී ඇතිවිය හැකි සංකූලතාවලින් මිදෙන්නට උපදෙස් ලබාදීම.
දරුවා නීරෝගීව බිහි කිරීමට අවශ්‍ය ක්‍රියා මාර්ග ගැනීම

වැනි ප්‍රතිලාභ ඔබට භුක්ති විඳිය හැකිය.

දස මසක් කිරි සිහිනය වෙනුවෙන් පේවෙන ඔබ නොමිලේ ලැබෙන සායනික සේවාවන් ලබා ගනිමින් සුරක්‍ෂිත දරු උපතක් හිමිවන වාසනාවන්ත මවක් ලෙස ඔබගේ කිරි සිහිනය සැබෑ කරගන්න.

දරු ප්‍රසූතිය පෞද්ගලික රෝහලක සිදු කිරීමට බලාපොරෝතුවන්නේ නම් දරු ගැබට සති හතරක් පමණ වන විට සුදුසු පළපුරුදු දක්ෂ ප්‍රසව හා නාරි විශේෂඥ වෛද්‍යවරයෙක් හමුවන්න. දරුප්‍රසූතිය සඳහා පහසුකම් වලින් පරිපූර්ණ පළපුරුදු සේවා මඩුල්ලක් සිටින පෞද්ගලික රෝහලක් තෝරා ගන්න.

සියළුම කිරි සිහිනයක පෙළ ගැස්ම ලිපි සඳහා පිවිසීමට මෙතැන ක්ලික්/ටැප් කරන්න

මෙම ලිපිය සැකසීමේදී සිය දැනුම නොමසුරුව ලබා දෙමින් අත්තිඩිය සෞඛ්‍ය නිළධාරී කාර්යාලයේ පවුල් සෞඛ්‍ය සේවා නිළධාරිනී රූපා පෙරේරා මහත්මිය දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කිරි සිහිනයක පෙළ ගැස්ම ~ හයවන දිගහැරුම – සුරක්‍ෂිත දරු උපතක් appeared first on familylife.

නින්ද නැති රැයේ… සිදුවන දේ දැනගන්න, මේ ලිපිය කියවන්න…

දිශාන්ති වෙදගේ — Sat, 26 Jan 2019 14:40:34 +0000

Familylife.lk සුවපියස තුළින් අද අපි කථා කරන්නේ හැමෝගෙම ශාරිරක සහ මානසික සෞඛ්‍යය ආරක්ෂා කර ගැනීමට අත්‍යාවශ්‍යම සාධකයක් වන නින්ද පිළිබඳවයි.

අපි හැමෝගෙම ශාරිරක සහ මානසික සෞඛ්‍යය ආරක්ෂා කර ගැනීමට නම් නින්ද අත්‍යාවශ්‍යම සාධකයක්. යන්ත්‍රයක් වුවත් එක දිගටම ක්‍රියාත්මක කළහොත් ක්‍රියා විරහිත වන බව අපට අමුතුවෙන් කිවයුතු නැත. මිනිස් ශරීරයේ ප්‍රධාන පාලක මධ්‍යස්ථානය ප්‍රතිසංස්කරණය කිරීමටත් නිසි ලෙස පවත්වාගෙන යාමටත් නින්ද ලබා ගත යුතුය.

නින්දේදී සිදු වන දේ

අපි අවදිව සිටින සෑම විටම අපේ මොළය ක්‍රියාකාරීයි. මොළයට විවේකයක් ලැබෙන්නේ නින්දේදීය.
කුඩා දරුවන්ගේ වර්ධනයට අත්‍යාවශ්‍ය මානව වර්ධක හෝමනය ශ්‍රාවයවීම සිදුවන්නේ නින්දේදීය.
දිනපතා අපේ ශරීරයේ හානි වන පටක යලි අලුත් වැඩියාවීම .
හොඳ නින්දකින් ආයුෂ වැඩි කරන අතරම පෙනුමද ආරක්ෂා කරයි.
දවස පුරාම ඔබ රැස් කරගත් තොරතුරු දිගුකාලීන මතකයක් ලෙස තැන්පත්වීම සිදුවන්නෙ නින්දේදීය.
ශරීරයේ බර පවත්වාගෙන යාමට නින්ද උපකාරී වේ.

©timeslive.co.za

ඔබට ප්‍රමාණවත් නින්දක් නොලැබුනහොත්

පසු දිනය ඇරඹන්නට සිදුවන්නෙ අලසවය.
ඇස් රතුවීම, ඇසිපිය හා ඇස් අවට ඉදිමීම, ඇස් වටා අඳුරු පැහැවීම, සහ යටි ඇසිපිය එල්ලා වැටීම , ඇස් වටා රැලි හටගැනීම, ඉදිමීමක් දැකිය හැකිය. පර්යේෂකයන් පවසන ආකාරයට එසේ වීමට හේතුව වන්නේ නිසි නින්දක් නොලැබීම නිසා හෝමෝන ක්‍රියාකාරීත්වය අඩපන වීමය’
මෙහි සෘජු බලපෑම වන්නෙ ඔබේ ශරීරයේ බර වැඩිවීමයි. ඔබේ එයට හේතුව කස ගින්න කෙරෙහි බලපාන හෝමෝන වල ක්‍රියාකාරීත්වය නිසි පරිදි පාලනය නොවීමයි.
නින්ද නොලබා විඩාවට පත්වුණු පසුව ගන්නා තීරණ එතරම් නිවැරදි සහ තියුණු නොවන ඒවා වීම.
නින්ද මට්ටු කිරීමට කැෆෙන් අඩංගු ආහාර පාන වලට යොමුවනු දැකිය හැක. නමුත්. කෙටි කාලීනව කැෆෙන් අඩංගු ආහාර පාන වලින් නින්ද පමා කලත් දිගුකාලීනව එසේ කිරීමෙන් නින්ද නොයාම ( හෝ අනිසි බිය හටගැනීමට වැඩි අවදානමක් ඇත.
නොරුස්සනා සුළු බව, නින්ද නොයාම සමග ඇතිවන ප්‍රධාන ලක්ෂණයකි.
කෙසේ වුවත්, නැවත සාමාන්‍ය ලෙස නිදාගැනීමෙන් අනතුරුව ඔවුන් යථා තත්ත්වයට පත්වීම සිදුවිය.
මානසික අවපීඩනය, මානසික ඒකාග්‍රතාවය සහ මතකය දුර්වල වීම.

©natural-cure.org

දිනකට කොපමණ වෙලාවක් නින්ද අවශ්‍යද?

බොහොමයක් අවුරුදු 18 වැඩි වැඩිහිටියන්ට දිනකට පැය 7-9 ක් නිදාගැනීම ප්‍රමාණවත්ය.. කුඩා දරුවන්ගේ වර්ධනයට අවශ්‍ය මානව වර්ධක හෝමෝනය (්‍යමප්බ ඨරදඅඑය ්‍යදරපදබැ) ශ්‍රාවය වන්නේ ද නින්දෙහි පසුවන විට බැවින්, ඔබේ දරුවා හොඳින් නිදාගැනීම ඔහුගේ හෝ ඇයගේ මනා වර්ධනයට ඉතා වැදගත් වේ.

එනිසා අලුත උපන් දරුවකුට මාස 2ක් ගත වන තුරු, පැය 12ක 18ක වේලාවක්ද, මාස 3 සිට අවුරුද්දක් පමණ වන තුරු, පැය 14-15ක්ද, වසර 1ත් 3ත් අතර පැය 12-14ක්ද, වසර 3-5ත් අතර පැය 11- 13ක්ද වයස 5ත් 12 ත් අතර පැය 10- 11 ද, වයස 12ත් 18 අතර පැය 8ක් 9ක්ද ප්‍රමාණවත්ය.

සුවදායක නින්දක් ලැබීමෙන්

දවස පුරා වෙහෙස වූ ඔබේ මොළයට විවේකයක් අත්‍යවශ්‍යමයි. නින්දේදී මොළයේ සිදු වන ප්‍රතිසංස්කරණ නිසා පසු දින ඔබට නැවුම් ජීවයක් ලැබෙනු ඇත.
නැවුම් බවකින් අවදි වන නිසා දිනය පුරාවටම ඔබ කරන කටයුතු සාර්ථක කරගත හැකිය.
හොඳ නින්දක් ලැබීමෙන්, ඔබේ ක්‍රියාකාරීත්වය, මානසික තත්ත්වය (ඵදදා), සහ මානසික ඒකාග්‍රතාවය වැඩිදියුණු වෙනවා. ඒ වගේම, ඔබ වැඩකරන අතරතුර අනතුරු වලට ලක්වීමට සහ තුවාළ වීමට ඇති ඉඩකඩත් අවම වෙනවා.
දිනපතා ඔබගේ ශරීරයේ හානි වන පටක යලි අලූත්වැඩියා කරගන්නේත් ඔබ නින්දෙහි පසුවන විටයි. ඒ නිසා, හොඳ නින්දක් ලබාගැනීම ඔබගේ ජීවිත කාලය වැඩිකරනවා මෙන්ම, ඔබගේ පෙනුම ආරක්ෂා කරගැනීමටත් වැදගත් වෙනවා.
වැදගත් තොරතුරු දිගුකාලීන මතක ගබඩාවෙහි තැන්පත් වන්නෙ නින්දෙහි පසුවන විටදීය. නින්ද යාමට පෙර මතකයේ තබාගත යුතු තොරතුරු නැවත මෙනෙහි කිරීම ඔබේ මතකය තවත් වැඩිකරනු ඇත.
හෘද රෝග, අංශභාගය, දියවැඩියාව, සන්ධි ප්‍රදාහ , අධික රුධිර පීඩනය වැනි රෝග වලට ඇති අවදානම අවම වේ.
අකාලයේ වයසකට යාම වලක්වයි.
හොඳ නින්දක් මගින් ඔබේ ප්‍රතිශක්තිය ද වැඩිවේ.
ප්‍රමාණවත් නින්දක් ලැබීමෙන් දිගුකලක් සුවෙන් සිටීමට හැකියාව ලැබේ.
සෞඛ්‍ය සම්පන්න බරක් ඔබේ ශරීරයේ පැවතීමට ද නින්ද ඉවහල් වේ.

සුවදායක නින්දකට ඇවසි සාධක

සුවදායක නින්දකට ප්‍රමාණවත් කාලයක් නිදා ගැනීම මෙන්ම නිදා ගන්නා ඇදෙහි මතුපිට සකස් වී ඇති ආකාරය, මෙට්ටය සහ කොට්ටයත් වැදගත්ය. එසේම ඔබ නිදා ගන්නා ඉරියව් හේතුවෙන්ද ඔබට සුවදායක නින්දක් අහිම් වීම මෙන්ම රෝග රැසකට මුහුණ දීමටද සිදු වනු ඇත

මෙම ලිපිය සැකසීමේදී සිය දැනුම නොමසුරුව ලබා දෙමින් වරලත් භෞතචිකිත්සක සංගමයේ ජාතික සංවිධායක, ෆිසියෝ ලයිෆ් ආයතනයේ අධ්‍යක්ෂ, වරලත් භෞතචිකිත්සක ආචාර්ය සුජීව වීරසිංහ මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

කවරයේ ඡායාරුපය – anxiety.org

The post නින්ද නැති රැයේ… සිදුවන දේ දැනගන්න, මේ ලිපිය කියවන්න… appeared first on familylife.

කිරි සිහිනයක පෙළ ගැස්ම ~ පස්වන දිගහැරුම – ගර්භණී සමයේ ආහාර රටාව

දිශාන්ති වෙදගේ — Tue, 15 Jan 2019 05:05:09 +0000

ජීවිතයේ තවත් නව පරිච්ජේදයක ඇරඹුමයි මේ. ආදරණීය ඔබ දරු ගැබක් දරන පින්බර මව් කිරුළ පළඳින්නට සුදානම් වන වාසනාවන්තයික්. දරු ප්‍රසූතියකට සූදානම් වන මවක් යහපත් සෞඛ්‍ය තත්ත්වයකින් සිටීමට ගර්භණී සමයේ පෝෂණය ඉතා වැදගත්ය. මවගේ කුස තුල වැඩෙන දරුවාගේ වර්ධනයට අවශ්‍ය සියලුම පෝෂණ අවශ්‍යතාවයන් සපුරාලිය යුත්තේ මවය. එහෙයින් familylife.lk අපි Family doctor මවු සිහිනය තුළින් ගෙන එන කිරි සිහිනයක පෙළගැස්ම ලිපි පෙළේ පස්වැන්න ගර්භණී සමයේ මවගේ පෝෂණය ගැන සාකච්ඡා කිරීමට වෙන් කළා.

පස්වන දිගහැරුම

ගැබිනි මවගේ බර වැඩිවීම

දරුප්‍රසූතිය වන විට ආසන්න වන විට මවගේ බර 10Kg පමණ වැඩි විය යුතුය යන පැරණි මතය වෙනසකට ලක්ව ඇත. මවකගේ බර වැඩිවීම මවකගෙන් මවකට වෙනස්වේ. ඒ අනුව ගර්භණී මව්වරුන්ගේ බර වැඩි වියයුත්තේ ඒ ඒ මවගේ ශරීර ස්කන්ධ දර්ශකයට අනුවය. ශරීර ස්කන්ධ දර්ශකය පහත සමීකරණයට ආදේශ කිීමෙන් ලබාගත හැකිය.

ඒ අනුව ගර්භණී සමයේ ඔබගේ බර වැඩි වීම පහත පරිදි සිදුවීම ප්‍රමාණවත්ය

ගර්භණී වීමට පෙර අඩු බරක් තිබූ මවක් නම් ගර්භණී සමයේ පෝෂණය පිළබිඳ වඩා අවදානයක් යොමු කල යුතුය. එසේ නොවුනහොත් දරුප්‍රසූතියට ආසන්න වන විට නියමිත බර කරා ළඟාවීමට නොහැකි වීමෙන් සිඟිත්තා අඩු බරක් සහිත නොමේරූ දරුවකු වීමේ අවදානමක් ඇත.

අධි බරක් ඇති මවක් නම් ගර්භණී සමයේ අධි රුධිර පීඩනය, දියවැඩියාව වැනි රෝගී තත්ත්වයන්ට ගොදුරු වීමේ අවදානමක් සහ ඒ හේතුවෙන් කුසෙහි වැඩෙන සිඟිත්තාද විවිධ සංකූලතාවයන්ට ගොදුරු විය හැකිය. නමුත් මේ බර අඩු කර ගැනීමට සුදුසු කාලයක් නොවේ.

බර අඩු කර ගන්නට ආහාර අඩු කිරීම සහ අධික ව්‍යායාම කිරීම ගර්භණී මවකට සුදුසු නොවන බවත් මතක තබාගන්න. ගැබිණියක් වන්නට පෙර සූදානමක් අවශ්‍ය බව කිරි සිහිනයක පෙළ ගැස්ම – පළමු දිගහැරුම (ලිපියට මෙතනින් පිවිසෙන්න ක්ලික්/ටැප් කරන්න) ලිපියෙන් අවධාරණය කරන ලද්දේ එනිසාවෙන්ය.

ගර්භණී සමයේ ආහාර රටාව

ඔබේ කුස තුල වැඩෙන කිරි කැටියාගේත් ඔබගේත් නීරෝගී බව පවත්වා ගැනීමට පෝෂණය පිළිබඳ ඔබ විශේෂයෙන්ම සිතිය යුතුය.

“දැන් ඉතින් දෙන්නෙක්ටම කන්න ඕනී ” කියන මතයෙන් නම් ඔබ මිදෙන්න. ගර්භණී මවක් සාමාන්‍ය පරිදි සමබල ආහාර වේලක් ලබා ගැනීම ප්‍රමාණවත්ය.

සාමාන්‍යයෙන් කලලයට වැඩි පෝෂණයක් අවශ්‍ය වන්නේ සති 20න් පසුය. එය දිනකට කැලරි 200ක් තරම් සුළු ප්‍රමාණයක් බැවින් විශේෂයෙන් අමතර ආහාර ගැනීමක් අවශ්‍ය නොවේ. මවට කුස ගිනි දැනෙන විට අවශ්‍ය පමණට ආහාර ගැනීම සිදු කරන්න.

ප්‍රධාන ආහාරය ලෙස හැකිතාක් නිවුඩු බත් හෝ ඇට වර්ගයක් හැකි සෑම විටම තෝරා ගන්න.
නැවුම් පලතුරු හා එළවළු හැකි තරම් ආහාරයට එක් කර ගන්න.
පලා වර්ග සහ ප්‍රෝටීන් බහුල ආහාර වැඩිපුර එක් කර ගන්න. මස්, බිත්තර, මාළු, කරවල, වැනි ආහාර මෙන්ම පරිප්පු, බෝංචි, සෝයා වැනි ආහාර මඟින් ඔබේ ප්‍රෝටීන් අවශ්‍යතාවය සපුරා ගත හැකිය.
තන්තු බහුල ආහාර නිතරම ගැනීම සුදුසුයි. එමඟින් ගර්භණී සමයේ ඇති විය හැකි මලබද්ධය තත්ත්වය මග හරවා ගත හැකිය.
මුදවපු කිරි, යෝගට්, නැවුම් එළකිරි වැනි කිරි ආහාර මගින් කැල්සියම් අවශ්‍යතාවය සපුරා ගත හැකිය.
ප්‍රධාන ආහාර වේල් තුනට අමතරව උදය වරුවේ සහ හවස් වරුවේ අමතර පෝෂ්‍යදායී සුළු ආහාර වේල් දෙකක් ගැනීම සුදුසුයි. නමුත් මෙමගින් දවස තුල ගන්නා සම්පූර්ණ කැලරි ප්‍රමාණය වැඩි නොවිය යුතුයි.
උදෑසන ආහාරය නොවරදවාම ලබාගන්න.

අතිරේක විටමින්

ෆෝලික් අම්ලය

මින් ප්‍රධානතම විටමිනය වන්නේ ෆෝලික් අම්ලයයි. කිරි සිහිනයක පෙළ ගැස්ම – දෙවන දිගහැරුම ලිපියෙහි (ලිපියට මෙතනින් පිවිසෙන්න ක්ලික්/ටැප් කරන්න) ෆෝලික් අම්ලය පිළිබඳ අප ඔබව දැනුවත් කළෙමු.

දෛනිකව මවක් ෆෝලික් අම්ලය (1mg) පෙත්තක් ලබා ගැනීම ප්‍රමාණවත්ය. ගර්භණී මවකගේ ඇතැම් රෝග තත්ත්වයන් හා පවුලේ ඉතිහාසයේ ඇතැම් රෝග තත්ත්වයන් වලදී ෆෝලික් අම්ලය වැඩි මාත්‍රාවක් වෛද්‍යවරු නිර්දේශ කරයි.

රනිල කුලයේ මුං ඇට, කඩල, කවුපි වැනි ධාන්‍ය වර්ග වලින් මෙන්ම එළවළු පළතුරු වලින්ද ස්වභාවිකව ශරීරයට අවශ්‍ය ෆෝලික් ඇසිඞ් ලබා ගතහැකිය.

යකඩ

කුස තුල වැඩෙන දරුවාට අවශ්‍ය පෝෂණය ප්‍රවාහනය කරන්නේ මවගේ රුධිරය හරහාය. ඒ සඳහා මවගේ රුධිර පරිමාව වැඩිවිය යුතුය. රුධිරයේ ප්‍රධානම සංඝටකය යකඩය. යම් හෙයකින් රුධිරයේ යකඩ ප්‍රමාණය අඩු වුවහොත් දරුවාගේ වර්ධනයට තර්ජනයකි. විශේෂයෙන් පළමු මාස තුනෙන් පසු යකඩ අවශ්‍යතාවය වැඩිය.

බොහොමයක් ලාංකික කාන්තාවන් යකඩ ඌනතාවයෙන් පෙලේ. එනිසා ගර්භණී සමයේ යකඩ පෙති ලෙස ලබා ගැනීම නිර්දේශ කරයි. ගර්භණී මවක් යකඩ පෙති ලබා ගත යුත්තේ පළමු මාස තුනෙන් පසුය. රනිල කුලයේ මුං ඇට, කඩල, කවුපි වැනි ධාන්‍ය වර්ග වලින් තද කොළ පැහැති පලා වර්ග මස්, මාළු වලින් ස්වභාවිකව යකඩ ලබා ගත හැකිය. මුං ඇට මුල් අද්දවා ආහාරයට ගැනීමෙන් වැඩි යකඩ ප්‍රමාණයක් ලබා ගත හැකිය.

විටමින් C

ප්‍රතිඔක්සිකාරකයක් වන විටමින් ක්‍ ශරීරයේ ප්‍රතිශක්තකීරණයට අත්වැලක් සපයයි. යකඩ අවශෝෂණය කිරීමට විටමින් ක්‍ උපකාරී වන බැවින් යකඩ පෙත්ත සමග විටමින් ක්‍ පෙත්ත රාත්‍රී ආහාරයෙන් පසු ලබා ගන්න.

කැල්සියම්

කුසෙහි වැඩෙන සිඟිත්තාගේ අස්ථි වර්ධනයට කැල්සියම් අත්‍යවශ්‍යවේ. සිඟිත්තාගේ වැඩීමට අවශ්‍ය ප්‍රමාණයට කැල්සියම් නොලැබුනහොත් මවගේ අස්ථි වල තැන්පත්ව ඇති කැල්සියම් ලබාගෙන සිඟිත්තාගේ අස්ථි වර්ධනය සිදු වේ. ඒ අනුව බලපෑම එල්ල වන්නනේ පසු කාලීනව මවටය. එවැනි මව්වරු ඔස්ටියෝපොරෝසිස් වැනි රෝග තත්ත්වයන්ට ගොදුරු විය හැකිය. එනිසා කැල්සියම් අඩංගු ආහාර පාන ලබා ගැනීම වැදගත්ය. සාමන්‍යයෙන් කැල්සියම් පෙත්ත ලබා ගත යුත්තේ උදෑසන දහයට පමණ අමතර ආහාරයක් ගැනීමෙන් පසුය.

ස්වභාවිකව කිරි, පළතුරු, කතුරු මුරුංගා කොළ, මුරුංගා කොළ ,තක්කාලි, රනිල කුලයේ ධාන්‍ය වර්ග ආහාරයට එක් කර ගැනීමෙන් ස්වභාවිකව කැල්සියම් අවශ්‍යතාවය සපුරා ගත හැකිය.

විටමින් K

ලේ කැටි ගැසීම නිසි ලෙස පවත්වා ගැනීමට විටමින් K වැදගත් වේ. විටමින් ණ අඩු වීමෙන් සිඟිත්තා ඉපදුනු පසු පෙකණිවැලෙන් වෙන්කල පසු අධිකව රුධිරවහනය වීමේ අවදානමක් ඇත. අපස්මාරයට ඖෂධ ගන්නේ නම් හෝ අක්මාවේ රෝග තත්වයක් ඇති මව්වරුන්ට මෙම විටමිනය අමතරව ලබා ගැනීමට නිර්දේශ කරයි.

විටමින් A

විටමින් A අතිරික්ත ලෙස ලබා ගැනීම වැඩෙන දරුවාට හානිකර විය හැකිය.

ගර්භණී සමයේ මවක නොගතයුතු ආහාර වර්ග

මේදය අධික ආහාර

කැලරි බහුලය. ශක්තිජනක ආහාර පමණට වඩා ගත් විට ශරීරයේ එදිනෙදා කටයුතු සඳහා එය භාවිතා නොවේ නම් එම ශක්තිය මේද බවට පත්ව ශරීරයේ තැන්පත්වේ. එය අධි රුධිර පීඩනය හා ස්ථුලතාවයට අත වැනීමකි. මේදය අධික ආහාර වන බටර්,චොක්ලට්, බදින ආහාර වර්ග, බිස්කට්, අයිස් ක්‍රීම්, පුඩිම්, කේක් වැනි දෑ ආහාර ඉතා සුළු ප්‍රමාණ වලින් පරිභෝජනය කරන්න.

සීනි සහිත ආහාර

සීනි සහිත ආහාර අධික සීනි භාවිතය නිසා ගර්භණී සමයේ දියවැඩියාව තත්ත්වයක් ඇති විය හැකිය. මෙම අවධියේ දියවැඩියාවට ගොදුරු වීමෙන් මව හා දරුවා විවිධ සංකූලතාවයන්ට ගොදුරු විය හැකිය. එනිසා සීනි සහිත ආහාර පාන අඩුවෙන් ගන්න.

පීකුදු

විටමින් A යනු අත්‍යවශ්‍ය පෝෂ්‍ය පදාර්ථයක්. පීකදුු වල විටමින් A ඉතා බහුල වේ. විටමින් A අවශ්‍ය ප්‍රමාණයට වඩා ශරීරගත වීම ගැබිණි මවකට නුසුදුසුය.

සකස් කරන ලද මස් වර්ග

බොහෝ සකස් කල ආහාර සඳහා කෘතීම රසකාරක, කල්තබා ගැනීමේ ද්‍රව්‍ය ආදිය යොදන නිසා මීට් බෝල්ස්, සොසේජස් වැනි සකස් කරන ලද මස් වර්ග භාවිතය අවම කිරීම හෝ අත්හරින්න. ඒවා කල් තබා ගැනීමට යොදා ගන්නා රසායනික ද්‍රව්‍ය දරුවාගේ වර්ධනයට හා හෝමෝන ක්‍රියාකාරීත්වයට බලපෑම් ඇති කළ හැකිය.

නොපිසන ලද බිත්තර සහ එළවළු

නොපිසින ලද බිත්තර සහ එළවළු පහසුවෙන් බැක්ටීරියා අසාදන වලට ලක් විය හැකිය. එමගින් මවට ආහාර අජීර්ණ තත්ත්වයන්, බඬේ අමාරු හා වමනය වැනි තත්ත්වයන් ඇති විය හැකිය.

කැෆෙන්

කෝපි සහ තේ ඇතුළුව කැෆෙන් සහිත ආහාර ලබා ගැනීම සිමා කල යුතු වේ. ඔබට අවශ්‍ය නම් කෝපි වෙනුවට ග්‍රීන් ටි හෝ ඉගුරු සහිත තේ පානය කළ හැක. වැඩිපුර කැෆෙන් භාවිතය ගබ්සා වීම් සඳහා හේතු විය හැක.

සියළුම කිරි සිහිනයක පෙළ ගැස්ම ලිපි සඳහා පිවිසීමට මෙතැන ක්ලික්/ටැප් කරන්න

මෙම ලිපිය සැකසීමේදී සිය දැනුම නොමසුරුව ලබා දෙමින් රාගම උතුරු කොළඹ ශික්ෂණ රෝහලේ ප්‍රසව හා නාරිවේද විශේෂඥ වෛද්‍ය චාමින්ද මාතොට මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කිරි සිහිනයක පෙළ ගැස්ම ~ පස්වන දිගහැරුම – ගර්භණී සමයේ ආහාර රටාව appeared first on familylife.

දරුවන්ට වින කරන උණ හා සෙම්ප්‍රතිශ්‍යාව ගැන දැනගනිමු

දිශාන්ති වෙදගේ — Wed, 09 Jan 2019 12:30:22 +0000

දෙමාපියන්ට දරුවන්ගේ නීරෝගීකම පවත්වාගෙන යාම තරම් සතුටක් තවත් නැත. එහෙත් පුංචි පැටවුන්ට නිතරම වින කරන්නෙ උණ හා සෙම්ප්‍රතිශ්‍යාව කියන තත්ත්වයයි. දරුවන් අසනීප වෙනවා කියන්නෙ මව්වරුන්ට ඇතිවන බරපතලම හිසරදයයි. එනිසාවෙන්ම familylife.lk අපි මෙවර දරු සෙනෙහස තුළින් දරුවන්ට වැළඳෙන උණ හා සෙම්ප්‍රතිශ්‍යාව ගැන ඔබව දැනුවත් කරන්න සිතුවා.

දරුවන්ට උණ හා සෙම්ප්‍රතිශ්‍යාව වැළඳිමට හේතූ සලකා බලමු

සෙම්ප්‍රතිශ්‍යාව හා උණ වැළඳෙන්න ප්‍රධානම හේතුව වෛරස්. කුඩා දරුවන්ට පරිසරයේ පවතින වෛරස් ආගන්තුකය. එම නිසා තවත් කෙනෙකුගෙන් ඉක්මණින්ම වෛරස් රෝග කුඩා දරුවන්ට බෝවීමේ සුලබතාවයක් තිබෙනවා. සෙම්ප්‍රතිශ්‍යාව පෙර පාසලේදී හා පාසලේදී දරුවන්ට ඉතාම පහසුවෙන් බෝ විය හැකිය.

එසේම වැඩි දෙනෙක් ගැවසෙන ස්ථාන වලදි අසාදිතයන්ගෙන් දරුවන්ට බෝවිය හැකිය. සෙම්ප්‍රතිශ්‍යාව වැළඳී ඇති කෙනෙකුගේ නාසයෙන් ගලන සොටු දියර හා කිවිසන විට බිඳිති ලෙස වාතයට මුසු වූ විට එම විෂබීජ වලින් දරුවන් අසාදනයට ලක් වෙනවා.

දරුවාට උණ ඇත්දැයි නිවැරදිව හඳුනාගන්න

දරුවාගේ නළලට අත තබා, මුහුණට මුහුණ තබා ආදී බැලීම සිදු නොකරන්න. උණ බැලිය යුතු විශ්වාසදායී ක්‍රමය උණකටුවකින් ශරීරයේ උෂ්නත්වය බැලීමයි. එනිසා නිවසේ උණ කටුවක් තබා ගන්න.

උණ ඇතිවන්නේ ඇයි?

උණ ගැනීම ස්වාභාවික ප්‍රතිශක්තිය ක්‍රියාත්මක වන ක්‍රමයකි. වෛරසයක් ශරීරගත වූ විට අපගේ ශරීරය උෂ්ණත්වය ඉහළ දමාගන්නේ ප්‍රතිශක්තීකරණ පද්ධතියේ ක්‍රියාකාරීත්වය කාර්යක්ෂම කරගැනීමටයි.

උණ හා සෙම්ප්‍රතිශ්‍යාව ඇති විට මේ රෝග ලක්‍ෂණ ඇත්නම් නොපමාව දරුවා වෛද්‍යවරයෙකුට යොමු කරන්න

දින තුනකට වඩා උණ පැවතීම
වමනය හෝ උදරයේ ඇතිවන වේදනාව
ප්‍රමාණවත් තරම් දියර වර්ග පානය නොකිරීම
විජලනයේ රෝග ලක්ෂණ ලෙෂ පෙන්නුම් කිරීම.එනම් වෙනදාට වඩා අඩුවෙන් මුත්‍රා පහවීම
අලසකම සහ නුරුස්නා ගති පැවතීම
අසාමාන්‍ය නිදිමත
දැඩි හිසරදය
බෙල්ලේ ඇති වන දැඩි අපහසුතාවය
ශ්වසන අපහසුතා
නොනවත්වා හැඬිම
කනෙහි ඇති වන වේදනාව
දිගුකල් කැස්ස පැවතීම
හිර වු නාසය හා සෙම්ප්‍රතිශ්‍ය ලක්ෂණ දින 10 කට වඩා වැඩි කාලයක් පවතී නම්.
ප්‍රතිකාර ලබා දී දින දෙකක්, හෝ හතරක් ගත වනවිට නාසයේ මාර්ගයේ වේදනාවක් ඇතිබව පවසයි නම්.

©parents.com

උණ පාලනය කරන්නට පැරසිටමෝල් ලබා දිය හැකියි

දරුවාට උණ ඇති වූ විට පැරසිටමෝල් සිරප් හෝ පෙති ලබාදිය යුත්තේ දරුවාගේ වයසට අනුව නොව දරුවාගේ ශරීර බර අනුවයි.
පැරසිටමෝල් ලබා දිය යුත්තේ අවම වශයෙන් පැය හයක් ගත වූ පසුවයි.
නියමිත වාර ගණනට වඩා වැඩි වාරයක් පැරසිටමෝල් ලබා දීමෙන් දරුවාට දැඩි හානියක් සිදුවිය හැකියි.
මව්වරුන් බිය විය යුත්තේ දරුවාගේ උණ ගැන නොව උණ පාලනය කිරීමට පැරසිටමෝල් අධික මාත්‍රාවක්ලබා දීම පිළිබඳවයි.

උණ පාලනය කිරීමට වෙනත් ඖෂධ දෙන්නට පෙර මේ ගැනත් සිතන්න

උණ පාලනය කිරීමට වෙළෙඳ පොළේ විවිධ ඖෂධ ඇත. එහෙත් ඒවා භාවිතයෙන් අතුරු ආබාධ රැසක් ඇතිවිය හැකි බව මතක තබා ගන්න.
මෙම ඖෂධ දරුවන්ගෙ වකුගඩු වලට බරපතල බලපෑම් කරයි.
ඩෙංගු වැනි රෝගී තත්ත්වයන් වලදී මෙවැනි ඖෂධ පරිහරණය කළහොත් ශරීරයේ අභ්‍යන්තර ලේ ගැලීම් ඇතිවිය හැකිය.
දරුවාට එක දිගටම උණ පවතින විට
දරුවාගේ ඇඳුම් ලිහිල් හෝ ඉවත් කරන්න.
පිරිසිඳු රෙදි කඩක් ඇල් මැරුණු ජලයෙන් තෙමා දරුවගේ ඉකිලි කිහිළි තෙතමාත්තු කරන්න
විදුලි පංකාවක් ක්‍රියාත්මක කර තබන්න.
උණ ඇති අවස්ථා වලදී දරුවාට හැකිතාක් දියර වර්ග ලබා දෙන්න. එමගින් ශරීරයේ උෂ්නත්වය පාලනය කර ගැනීමටත් දරුවා විජලනයට පත්වීමත් වලක්වා ගත හැකිය.

සෙම්ප්‍රතිශ්‍යාවේදී කුඩා දරුවාන්ට පීඩාකාරී නාසය සිරවීම

සෙම්ප්‍රතිශ්‍යාව ඇතිවිට ආසාදනයන්ට එරෙහිව සටන් කිරීමට උපකාර කිරීම සඳහා ශේෂ්මල වැඩි වෙන බැවින් නාසය සිරවීමට ලක්වේ. වයස අවුරුදු 3 ක් පමණ වන තෙක් දරුවන්ට නාසයෙන් සොටු සූරා ඉවත් කිරීම කල නොහැකිය. එනිසා සොටු දියර සිරවී තිබීමෙන් දැඩි අපහසුතාවයකට ලක්වේ. මෙම තත්ත්වයන්ට පහත ආකාරයට කටයුතු කල හැකිය.

නින්දේදී දරුවාගේ හිස ඉහල සිටින සේ නිදි කරවන්න.
ඒ සඳහා කොට්ට තැබීම හෝ මෙට්ටය හිස තිබෙන පැත්තෙන් ඔසවා තැබිය හැකිය. එමගින් දරුවාට ශ්වසනය පහසු කරවයි.
සේලයින් විසඳුම – සේලයින් දරුවන් සඳහා විශේෂයෙන් සාදන ලද විසඳුමක් වන අතර ඔබගේ දරුවාගේ නාසයේ ශේෂ්මල තුනි කිරීමක් සිදු කරයි.
නාස් කුහර පිරිසිදු කරන උපකරණයක් භාවිතා කරන්න.
ඔබේ දරුවා සජලනය කර තබන්න
දියර භාවිතය ඔබේ දරුවා සජලනය කර තබන බවට සහතික වනවා පමණක් නොව නාසයේ වු ශේෂ්මල තුනී කර තදබදය අඩු කර ගැනීමට එය උපකාර කරයි. ජලය, කිරි සහ යුෂ සුදුසුයි. චිකන් සුප් ඉතා සුදුසුයි.

උණ හා සෙම් ප්‍රතිශ්‍යව වැළඳීමෙන් දරුවා ආරක්ෂා කරගමු

පළතුරු සහ එළවළු සමග සමබල ආහාර වේලක් ලබාදෙන්න.
නිවසේ අයෙකුට වෛරසය ආසාදනය වූ විට කිවිසුම් යන විට බිඳිති විසිරීම වැළැක්වීම සඳහා මුඛ ආවරණයක් භාවිත කිරීම.
මව්කිරි දෙන මවකට ආසාදනය ඇති වූ විට අනිවාර්යයෙන්ම මව්කිරි දෙන අවස්ථාවේදී මුඛ ආවරණයක් භාවිත කිරීම.

උණ හා සෙම්ප්‍රතිශ්‍යව ඇති විට දරුවාගේ පිරිසිඳු බව

වෛරස් උණ හා සෙම්ප්‍රතිශ්‍යාව ප්‍රතිශක්තිකරණ පද්ධතිය කෙරෙහි යම් බලපෑමක් ඇති කරන අතර, දරුවා වෙනත් ආසාදන තත්වයන්ටද ගොදුරු කරන්නට හැකියි. එනිසා දරුවාගේ පිරිසිඳුව තබා ගැනීම ඉතා වැදගත්. ඇතැම් මව්වරුන් රෝගී තත්ත්වය සමනව වූ පසුවද දරුවන් නෑවීම පමා කරයි. නැවත මෙම දරුවන්ව රෝගී විය හැක්කේ අපිරිසිදුකම නිසා ඇති වන බරපතල ආසාදන තත්ත්වයන් හේතුවෙන් විය හැකිය. එනිසා රෝගය සමහනය වූ පසු දරුවා නහවා පිරිසිඳුව තැබීම ඉතා වැදගත්ය.

මෙම ලිපිය සැකසීමේදී සිය දැනුම නොමසුරුව ලබා දෙමින් ශ්‍රීමත් ජෝන් කොතලාවල විශ්ව විද්‍යාලයේ වෛද්‍ය පීඨ ජ්‍යෙෂ්ඨ කථිකාචාර්ය, ළමා රෝග විශේෂඥ වෛද්‍ය සේනක ගුණතිලක මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවන්ට වින කරන උණ හා සෙම්ප්‍රතිශ්‍යාව ගැන දැනගනිමු appeared first on familylife.

කිරි සිහිනයක පෙළගැස්ම – සිව්වන දිගහැරුම

දිශාන්ති වෙදගේ — Thu, 03 Jan 2019 05:15:33 +0000

ස්වභාව ධර්මය විශ්මයජනකය. ජීවයේ රඳා පැවැත්ම සඳහා අපුරූ පුද්ගල සම්බන්ධතාවයන් ගොඩ නංවා ඇත. ආදරය හා ආකර්ෂණය මූලික කරගත් බැඳීමක් තුලින් නව ජීවියකුගේ උපතට මංපෙත් විවිර කර ඇත. විවාහක යුවලකගේ ඊළඟ පැතුම කිරි සිහිනය මල්ඵල ගන්වා ගැනීමය. familylife.lk කිරි සිහිනයක පෙළගැස්ම (පසුගිය ලිපි සඳහා මෙතැන ක්ලික්/ටැප් කරන්න) තුළින් මෙවර දිගහැරෙන්නේ ඒ සොඳුරුතම පැතුම ඉටු වීම පිළිබඳවයි.

සිව්වන දිගහැරුම

ඔබ අපේක්ෂා කරන ඒ සොඳුරුතම පැතුම ඉටු වී ඇත්දැයි දැන ගන්නෙ කෙසේද?

ඔබේ මාස් ශුද්ධිය අපේක්ෂා කරන දිනය පසු වන විට ඔබ තුල බලාපොරොත්තුවක් සමග මුසු වූ චකිතයක් ඇතිවන බවට සැකයක් නැත. මාසිකව සිදුවන ශුද්ධවීම බලාපොරොත්තු වන දිනයේ සිට සති 2 කට (එනම් දින 14 කට) පෙර සංසේචන වූ කළලය ඔබගේ ගර්භාෂයේ තැනපත් වේ. ඒ අනුව මාස් ශුද්ධිය අපේක්ෂා කරන දින සිට ඉදිරියට දින හතරක් දක්වා කාලය තුල ඔබේ ගර්භණීත්වය පරික්ෂා කළ හැකිය.

දරුවකු කුස තුල පිළිසිඳ ගත් පසු සති දෙකක් පමණ ගත වූ විට ගැබ් ගෙන ඇත්දැයි දැන ගත හැකිය. ඔබේ කුසෙහි සිටින කළලය නිකුත් කරන BhCG නැමැති හෝර්මෝනය මවගේ රුධිරයට මිශ්‍ර වේ. එම හෝමෝනය මවගේ මුලුමහත් ශරීරයේම ක්‍රියාකාරීත්වයට බලපෑමක් ඇති කරවයි. ඒ අනුව ඔබට මුත්‍රා සාම්පලයක් පරික්ෂා කිරීම තුලින් ගැබ් ගෙන ඇත්දැයි නිශ්චිතවම දැනගත හැකිය.

©firstvue.eu

උදෑසන හිස්බඩ පිටකරන මුත්‍රා සාම්පලයක සාන්ද්‍රණය උපරිමව ඇති හෙයින් ඔබේ ගර්භණීත්ව පරික්ෂාවට ලබා ගත යුත්තේ උදෑසන හිස්බඩ පිටකරන මුත්‍රා සාම්පලයකි.
මෙසේ ලබා ගත් මුත්‍රා සාම්පලය වෛද්‍ය රසායනාගාරයකට ලබා දී පරික්ෂා කරවා ගන්න.
එසේම වෙළෙඳ පොලේ ගර්භණීත්වය පරික්ෂා කර ගත හැකි අයුරින් සකස් කර ඇති (Pregnancy Checking Slip) පටියක් භාවිත කර නිවසේ සිටම ඔබේ ගර්භණීත්වය තහවුරු කර ගන්නට හැකිය.
මෙම පටියෙහි සටහන් කර ඇති ප්‍රමාණයට මුත්‍රා සාම්පලයෙහි ගිල්වා ටික වේලාවක් සිටින විට එහි දක්වා ඇති ඉරි දෙකම රතු පැහැ ගනී නම් ඔබගේ කුසෙහි දරු පිළිසිඳ ගැනීමක් සිදුව ඇති බව තහවුරු කරගත හැකිය.

ඔබගේ මාස් ශුද්ධියද නතරව වී ඇතත් මුත්‍රා පරික්ෂණය අසමත්ද?

ඔව්, මෙවැනි අවස්ථාවක කිරි සිහිනයකට ඇඟිලි ගණින ඔබ කලබලයට පත් වීම පුදුමයක් නොවේ. ඔබගේ මාස් ශුද්ධියද නතරව මුත්‍රා පරික්ෂණයත් අසමත් වීමට ප්‍රධාන සාධකයක් වන්නේ කළලය විසින් මවගේ රුධිරයට ප්‍රමාණවත් පරිදි හෝමෝන නිකුත් නොකිරීම විය හැකිය.

එනිසා ඉවසීමෙන් තවත් දින දෙකක් තුනක් පමණ ගතවනතුරු සිට නැවත පරික්ෂණය කරන්න. නැතහොත් ඔබට BhCG රුධිර පරික්ෂණයකට යොමු වීමෙන් ගර්භණීත්වය නිවැරදිවම තහවුරු කර ගැනීමට හැකි වන අතරම යම් හෙයකින් කළලයට අවදානම් තත්ත්වයක් ඇත්නම් මුල් අවස්ථාවේදීම ඒ සඳහා අවශ්‍ය කටයුතු කිරීමේ හැකියාව ඇත.

මාස් ශුද්ධිය සිදු වන දිනය පිළිබඳ අවබෝධයක් නැති නම්

මාස් ශුද්ධිය අක්‍රමවත් කාන්තාවන්ට ගර්භණීත්වය තහවුරු කරගැනීමට මදක් අපහසු වන්නෙ නිශ්චිතවම ඔවුන් මාස් ශුද්ධිය සිදු වන දින වකවානුව නොදන්නා නිසාවෙන්ය. ඔබත් එවැනි අයෙක් නම් ඔබට ශාරීරිකව ඇති වන වෙනස්කම් පිළිබඳ සැලකිලිමත් වන අතරම මාස් ශූද්ධිය සිදු විය හැකි යැයි සිතන කාලය පසු වීමෙන් අනතුරුව මුත්‍රා හා ලේ පරික්ෂාව සිදු කරගත හැකිය.

ඔබේ කුසේ නව ජීවයක්

ඔබගේ ශරීරයේ හෝමෝන වෙනස් වීම නිසා මානසික වශයෙන් ඔබගේ සිතුවිලි වල වෙනස් විමක් ඇති විය හැකිය.

ඇතැම් ගර්භණී මව්වරුන් කාරණයක් නැතිවම සතුටට පත් වීම දුකටපත් වීම වැනි තත්ත්වයන් ඇති විය හැකිය.
ක්‍රියාශීලීව සිටි ඔබට හිටි හැටියේම අධික තෙහෙට්ටුවක් සහමහන්සියක් ඇති වීමත් සිදුවිය හැකිය.
දරුවා කුස තුල වැඩෙන විට ප්‍රසාරණය වන ගර්භාෂය මුත්‍රාශය මතට පීඩනය ඇති කිරීම නිසා ඔබට වෙනදාට වඩා වැඩි වැඩියෙන් මුත්‍රා කිරීමේ අවශ්‍යතාවය ඇතිවේ.
පියයුරු වල බර ගතියක්, ඉදිමිනු තත්ත්වයක් ඇතිවීම.
පියයුරු වල තරමක වර්ධනයක් හා මෘදු මොලොක් බවක් ඇති වේ.
ඔබට විවිධ ආහාර වලට දක්වන ප්‍රතිචාර වෙනසකට ලක් වීම. විවිධ සුවඳ වර්ග පවා ගන්ධයන් සේ දැනීම වැනි දෑ ඇති විය හැකිය. එයට හේතුව ගැබ් ගත් පසු ශරීරයේ හෝමෝන ක්‍රියාකාරීත්වයේ වෙනස්වීමයි.
ඔබට ඇතැම් විශේෂ ආහාර වලට වැඩි රුචියක් ඇති වීමත් මෙතෙක් කලක් ප්‍රිය කල ඇතැම් ආහාර අරුචියක් ඇතිවීමක් සිදු විය හැකිය.
උදා අසනීප තත්ත්වයක් ලෙස හඳුන්වන උදෑසන කරකැවිල්ල හා ඔක්කාරය ඇති වීම ඇතැම් කාන්තාවන්ට ගැබ් ගෙන සතියක් හෝ ඊටත් වඩා අඩු කාලයකින් ඇති විය හැකිය. උදා අසනීප තත්වය ගැබ් ගෙන මාසයක් පමණ යනතුරු ඇතැම් කාන්තාවන්ට දක්නට නොලැබෙන අවස්ථාද ඇත.
කරකැවිල්ල හා ඔක්කාරය වමනය ඇතිව හෝ නොමැතිව උදෑසන පමණක් නොව සවස් කාලයේ හෝ රාත්‍රියේ කාලයේදිද ඇති විය හැකිය.
ඔබගේ ශරීරයේ උෂ්ණත්වය පෙරට වඩා ඉහල යාමක්ද දැකිය හැකිය.

සත්තකින්ම, නිරායාසයෙන්ම ශරීරය ඔබ ගැබ් ගැනීමත් සමගම ඔබේ ශරීරයේ හෝමෝන වල වෙනස් වීම් වලට ශරීරය හුරු කරවන්නට අවශ්‍ය කටයුතු සියල්ලම මැනවින් ඉටු කිරීමේ ප්‍රතිඵලයක් ලෙස ඉහත කාරණා ඔබට අත් දකින්නටත් විඳින්නටත් සිදුවේවී. ඔව් දැන් ඔබ ගැබිණියක්. ලෝකයට නව ජීවයක් එක් කරන්නට සූදානම් වන ආදරණීය මවක්.

සියළුම කිරි සිහිනයක පෙළ ගැස්ම ලිපි සඳහා පිවිසීමට මෙතැන ක්ලික්/ටැප් කරන්න