අපේ කට්ටිය බනිනවා අනේ මොන මිනිස්සුද? එහෙම කරන්න පුලුවන්ද තමන්ගෙ ළමයින්ට කියලා. කොච්චර අසීරැ උනත් ඒ ව්‍යවසනයෙන් පීඩා විදින මිනිස්සුම තමයි ඒ අත්දැකීමෙ ස්වභාවය දන්නෙ.

අනිත් කාරනේ තමයි FB එක පුරාම චීන කෑම සංස්කෘතිය විවේචනය කරමින් හූනෝ, ගෙම්බන්, නයි, බල්ලො, වව්ල්ලු රස කර කර කන videos share වෙනවා. අපි කොච්චර විවේචනය කරත් ආහාර කියන්නෙ සංස්කෘතියෙම කොටසක්. චීනය කියන්නෙ පළාතෙන් පළාතට food culture එක වෙනස් වෙන රටක්. අපේ සංස්කෘතිය ඇතුලෙ කුකුල් මස්, ඉස්සො, දැල්ලො, මාලු කන එක සාමාන්‍ය දෙයක් වගේ තමයි චීන සංස්කෘතිය ඇතුලෙ හුනෝ, මීයෝ, ගෙම්බො කන එක සාමාන්‍ය දෙයක්. අපේ සංස්කෘතියෙන් පිට කෙනෙක්ට හාල්මැස්සො කන එක අප්පිරියා සහගත වෙන්න පුලුවන්.

කොහොම සංස්කෘතිය ගොඩ නැගුනත් මිනිස්සු මිලේච්ඡ යුගය පහුකරලා සෑහෙන කල් ගත වෙලා නිසා සමහර දේවල් කෑම රටාවන් වගේ දෙවල් නිසා පැවැත්මට තර්ජනයක් වෙන දේවල් වෙනස් කරගත යුතු වෙනවා. ඒ වගේම විවධ ගෝලීය දේශපාලන ක්‍රියාත්මක වීම් වල ප්‍රතිඵල නිසා ජීව විද්‍යාත්මක අවි වල ඵලයක් ලෙසත් මෙම වෛරසය පිලිබඳ මත ඵල උනා.

කොහොම උනත් අපි කියවලා තියෙන දැකලා තියෙන විද්‍යා ප්‍රබන්ධ වල දැකපු සමහර මනංකල්පිත දේවල් මේ මොහොතේ පෘතුවිය තුල සිදුවෙමින් පවතිනවා. මරණය ඕනෑම මොහොතක අප කරා පැමිනෙනවා. එය වෛරසයක් ලෙසින්, බෝම්බයක්, වෙඩි උන්ඩයක් ලෙසින් වගේම හදිසි අනතුරන් ලෙසින් අප වෙත එන්න පුලුවන්.

ලංකාවෙ සමාජ ජාල කොයි තරන් දුරට ප්‍රබල වෙලා ද කියනවනම් එක රෑයින් වෙළද පොලේ තිබුණු මුඛ ආවරන සියල්ල අවසන් කලා. සිංහල බහෙත් බඩු කඩේක දැන් බේතකට හොයා ගන්න පෙරැම්කායන් කෑල්ලක් නෑ. තිබුනත් අස්ප ගනන් වලට විකිනෙවා. ලෝකෙම ප්‍රතම වතාවට වෙන්න ඇති face mask වලට පාලන මිලක් දාන්න උන එකම රට ලංකාව බවට පත්වෙනවා.

කොහොමත් මම දැකලා තියෙනවා ” ලංකාවෙ අපි වෙනස් “කියලා ආඩම්බරෙන් post share කරන අය. ඇත්තටම වෙන දේවල් දැක්කම මේ වගේ කට්ටියක් හොයා ගන්න නෑ ලෝකෙ කොහෙන්වත්. එක කොරෝනා රෝගීයයි වාර්තා උනේ doctors ලට පඩි වැඩි කරන්නලු කොරේානා වලට මූන දෙන්න. හැබැයි ඉතින් මේවා පිටි පස්සෙ විවිධ සංගම් දේශපාලන බලවේග ඇති. හැම මනුස්සයෙක්ම අවස්ථාවාදීන් ගොඩට දාන්න බෑ. දැන් අර වූහාන් වල අතරමං වුණු අපේ රටේ ළමයි එක්ක එන්න ගිය ශ්‍රී ලංකන් එයාර් ලයින් එකේ සේවක මඩුල්ල FB එක ඇතුලේ ජාතික වීරයන් බවට පත් කරාට ඔවුන් තමන්ගේ වෘත්තීමය වගකීම හරියාකාරව ඉටු කිරීමක් සිදු කළේ.

එහෙම කරාට ඒ අයගෙ ළමයි පාසැල් එවන්න එපා කියලා විදුහල්පති ගොල්ලො කට්ටියක් කියලා තිබුනා. මේ විදිහට කො⁣රෝනා අස්සෙ විවිධ සිද්ධීන් online ඇතුලේ විවේචනයට ලක් උනා. කොහොම උනත් කෙනෙක්ගෙ හරි වෙනත් ජාතියකගෙ හරි ව්‍යවසනයකදි තොපිලට යස වැඩේ කියන්න බෑ. අපි හැම වෙලේම තව කෙනෙක්ගෙ කරදරේකදි උදව් නොකලත් එයින් හිත හරි පොඩ්ඩක් සසල වෙනවනම් ඒක තමයි මනුස්සකම. මම ළගදි දැකපු post එකක් මතන් උනා. ඒකෙ තිබුනා,

“කාලා බීලා මිනිහෙකුට උදව්වක් කරගෙන හිටපන්.. සල්ලි මත්තෙම නැහුනට සොහොනේ ATM නෑ” කියලා. ඇත්ත තමයි බොලේ…

දැනෙනව නම් ශෙයා කරන්න

The post සල්ලි මත්තෙම නැහුනට සොහොනේ ATM නෑ – ඔන්ලයින් අහස යට 7 appeared first on familylife.

FB එක නිසා හුදකලා වෙලා තිබුණු ජීවිත වලට අලුත් online ජීවිතයක් ලැබිලා තියෙනවා. මේ අතරෙ විවිද තරාතිරමෙ විවිධ අධ්‍යාපනික මට්ටම්වල, විවිධ රැකියාවල නිරත ⁣වන අය ඉන්නවා. ඒ වගේම ගෙදරට වෙලා ළමයි එක්ක කුස්සියේ වැඩ ටිකත් කරගෙන හුදකලා ජීවිත ගත කරන අයත් ඉන්නවා. ⁣ගෙදර ළමයි බලා ගෙන ඉන්න ගෑණු නුගත් ගෑණු, රස්සාවල් කරන අය මාර වැදගත් උගත් කියලා එක එක මිනුම් දඩු හදාගෙන අනෙකාව පහත් කිරීම නිසා මේ group ඇතුලෙ බුකි වලි වලට හේතු වෙනවා.

තමන් කරන කියන දේ සහ තමන්ගේ මතය පමණක් නිවරදි කියන පදනම වැරැදී කියන දේ ගොඩක් අය දන්නෙ නෑ. උගත්කම්, දැනුම තියාගෙන ගෙවල් වල ළමයි බලාගෙන ඉන්න අය කොච්චර නම් ඉන්නවද. අනික හැම ගෑණියෙක්ටම කතාවක් තියෙනවා. ඒ කතාව එකිනෙකාගෙන් එකිනෙකාට වෙනස් වෙනවා. ඒ වෙනස කෙනෙක් හරි වෙන්නවත් වැරදි වෙන්නවත්, පොෂ් වෙන්නවත් ගොඩේ වෙන්නවත් හේතුවක් නෙමෙයි.

අනික ගොඩක් ගෙදර හුදකලා ජීවිත ගත කරන අයට පොඩි බිස්නස් එකක් කරගන්නත් දැන් ඉඩකඩ ලැබිලා තියෙනවා. ඒ ගොල්ලො තමන්ගෙ මාකට් එක හදාගෙන මාර තරඟයක් (startup competition) එකකුත් ගොඩ නගාගෙන යනවා. likes පොරය පටන් ගන්නෙ ඔතෙන්දි තමයි. මේ අතරෙ කිසිම තරඟයකට සුදානමක් නැති හුදෙක් විනෝදාංශය තකා page maintain කරගෙන අනිත් අයගේ දුක සතුට බෙදාගෙන online සැරිසරණ ජීවිතත් තියෙනවා.

ඉතින් ඔය group ඇතුලෙ page ඇතුලෙ කෙහෙවලු පටලව ගන්න එන්නෙ තව කෙනෙක්ගෙ දියුණුව දක්ෂකමක් බලා ඉන්න බැරි උනාම. ඒ වට මැදි උනාම අර කිසිම ආර්තික වාසියක් බලාගෙන මේවයෙ සැරි සරණ ජීවිතවල හිත රිදෙනවා, කනස්සල්ලට පත් වෙනවා. online කියලා ඉතින් වෙනසක් නෑ, ගමක, office එකක කොහේ උනත් තව කෙනෙක්ගෙ දියුණුවක් දක්ෂකමක් බලන් ඉන්න බැරි ගෑණු කොච්චර නම් ඉන්නවද?

අනිත් කාරනේ තමයි online යාළුකම් හරි ඉක්මනට ගොඩනැගෙනවා. කවදාවත් අහලවත්, දැකලවත් නැති අය group හරහා අලුත් යාළුවො විදිහට FB එකෙන් රින්ගනවා. FB එකට රිංගුවා කියන්නෙ තමන්ගෙ ජීවිත වලටත් ඇතුලු වෙනවා. එතනදි නම් ටිකක් පරිස්සන් වෙන්න ඔනි. මොකද ගොඩක් අය තමන්ගෙ ජීවිතේ wall එකේ දානවනේ. දුක බෙදා ගන්න, උපදෙස් දෙන්න ගොඩක් අය ඉදිරිපත් වෙනවා. එතනදි ගෑණු පිරිමි දෙගොල්ලොම මේ විදිහට ජීවිත ඇතුලට එන්න පුලුවන්.

ඒක නිසා හොදට නරකට දෙකටම මේක බලපාන්න පුලුවන් කියන අවබෝධයෙන් online සැරි සරනවානම් මේ බුකියෙ ඉහ ගහගෙන ඉන්න පුලුවන්. ගෑහැණුන්ට එරෙහිව ගැහැණුන් වගේම, ගෑණු වෙනුවෙන් පිරිමි එක්ක වලියට යන නෝනලත් ඔනි තරන් හම්බ වෙනවා. පහු ගිය දවසක යකඩ ගැහැණුන් සහ බොලඳ ගැහැණුන් ගැන සමන් එදිරිමුණි කියන රචකයගේ ලියවිල්ලක් නිසා ලොකු ආන්දෝලනයක් බුකිය ඇතුලෙ ඇති උනා. ලෝකෙ යකඩ ගැහැණුන් බිහිවෙලා තියෙනවා. ඒවට බලපාන සමාජ ආර්ථික ආගමික දේශපාලනික හේතු තිනෙවා. ඒ ගැන හැදෑරීමක් නැතුව ඒ මහත්තයා යකඩ ගැහැණුන් කියලා කෙනෙක් නෑ කියලා, ගැහැණුන් බොලද වන විට පිරිමියාගේ ගෞරවය ඔවුන්ට ලැබෙනවා කියන පදනමින් තමයි ඒක ලියලා තිබුනෙ. අන්න එතෙන්දිනම් අපේ කාන්තාවො ටිකට හොදටම තරහා ගිහින් තිබුනා.

ඔහුගේ ලියවිල්ලෙන් කොටසක් මම මෙහි උපුටා දක්වන්නම්….

“විප්ලව මෙහෙයවන ගැහැණු දරුවනි, මුලින්ම ගවුම හදාගෙන වාඩි වෙන්න.

ගැහැණු උපතින්ම ළඳබොළඳය. සියුමැලිය. මෘදුය. සුන්ඳරය. ලාලිත්‍යානුකූලය. ඔවුහු ගස් ගල් වගේ නොවෙති. ඔවුන් ලතාවෝ වෙති. රළු සුලං නොවෙති. මල් සුවඳ රැගත් මදපවනම වෙති. ශක්ති සම්පන්න භාවය අතින් පවා ඉතාම ඉතාම ඉතාම අල්පමාත්‍රීය අවස්ථාවකදී හැරුණු කල අන් සෑම අතින්ම ගැහැණිය පිරිමියාට වඩා ළපටිය. ඔවුන්ට ගැහැණුන් කියන්නෙ ඒ නිසාය. “

– සමන් එදිරිමුණී –

ඔහුගේ මතය විවේචනය කරමින් කාන්තාවො රැසක් ඔහුට එරෙහිව රචනා පිට රචනා බුකිය පුරාම ලියල තියනවා දුටුවා. බුකිය තුල අරගල කරන කාන්තාවනි. ගැහැණුන් ලෙස අරගල කල යුතුව ඇත්තේ මෙවන් ලියවිලි වලට බැණ වැදීමටවත්. පිළිතුරැ දීමටවත් නොව තමන් තුලම අරගලය දියත් කිරීමටයි. ජිවිතය දිනා ගත යුත්තේ තමන් සමග සටන් කිරීමෙන්ම පමණි.

ජීවන අරගලය හමුවේ වේගයෙන් වෙනස් වෙන සමාජ හැලහැප්පීම් හමුවෙ අපේ ළමයි රැක ගත යුතුව තියෙනවා. මේ උඩු දුවන තරගකාරීත්වය හමුවේ ඔබේ අපේ දරැවන් සංවේදී මිනිසුන් ලෙස ගොඩනගන්න අරගල කරන්න. ඔබේ ළමයි හැම අතින්ම හොද නිෂ්පාදනයක් ලෙස ගොඩ නගන්න. කකුල් දෙක ලන් කරගෙන ගවුම හදාගෙන වාඩි වෙලා ඉන්න වෙලාවක් නැති වෙයි. මෙවන් ලියවිලි වලට පිලිතුරැ බැදිය යුත්තේ කිුයාවෙන්මය. යකඩ ගැහැණුන්ට බය වෙන එක පිරිමි ස්වාභාවයක්. හැබැයි කකුල් ලං කරගෙන දෙවෙනි ඉනිම බලන අක්කලා නංගිලාට නම් මේ කියපු එක වැටහෙයිද දන්නෙ නෑ.

දැනෙනව නම් ශෙයා කරන්න

The post යකඩ ගැහැණුන් සහ බොලඳ ගැහැණුන් – ඔන්ලයින් අහස යට 6 appeared first on familylife.

Social Media වල මුණ ඔබා ගත්තට පස්සෙ ඔය කෝකටත් වඩා ක්ෂණිකයකින් මිනිස්සු අතරෙ ඕන එකයි එපා එකයි හැම එකම බෙදා ගන්න පටන් ගත්තා. ඒක ඉතින් medium එකේ වරද නෙමෙයි.

ඒකට තමයි සන්නිවේදනයේ ප්‍රගමනය කියලා කියන්නෙ. එන්න එන්න මාධ්‍යයක තියෙන හැකියාවන් වැඩිවෙනවා. මාධ්‍ය එකිනෙක සම්මිශ්‍ර වෙනවා. ඉතින් මෙච්චර රෑපය ප්‍රබල කාලෙක හඩ පට වලට තියෙන ඉල්ලුම දැක්කම පුදුමත් හිතෙනවා.

ඒකට හේතුව ඉතින් අපි කොහොමත් උපතින්ම අනුන්ගෙ කුණු අවුස්සන ඕපදූප වලට ලොල් ජාතියක්නෙ. Online හැම තැනම share වෙන මේ හඩ පට විතරක් නෙමෙයි, ගොඩක් දේවල් දිහාබැලුවම තමයි හිතෙන්නෙ මිනිස්සු වැඩියෙන්ම share කරන්නෙ ජුගුප්සාජනක දේවල් නේද කියලා. ඒක ඉතින් මිනිස්සුනගෙ මනසෙ ඇතුලාන්තයෙන්ම එන අවිඥාණික ආශාවක්. කොහොම උනත් ඉතින් online සැරිසරන කොට අපිට හැම තැනම share button එකක් දීලා තියෙන නිසා හැම වෙලේම ඔහේ share කරලා දානවා.

Share කරන්න කලින් පොඩ්ඩක් හරි හිතනවනම් මේ කරන දෙයින් තව කෙනෙක්ගෙ ආත්ම ගෞරවයට කොහොම බලපායිද. ඒ මනුස්සයා සමාජය ඉදිරියෙ, දෙමව්පියො ඉදිරියෙ කොහොම අසරණ වෙයිද, කියලා මීට වඩා ලෝකෙම වෙනස්වෙනවා. පොඩ්ඩක්වත් එහෙම හිතන්නෙ නෑනෙ.

තාක්ෂණය ලැබිලා තියෙනව, ඒත් ඒක භාවිත කරන කොට පොඩ්ඩක් හරි වගකීම් සහගත වෙන්න ඔනි කියලා මටත් හිතුනෙ share කිරීම සම්බන්ධව හදපු advertistment එකක් දැක්කට පස්සෙ. Online සැරි සරන කොට අබ්බගොබ්බයො වගේ නැතුව මේ වගේ දේවල් ගැන සන්වේදී වෙන්න ඕනි කියලා හිතුන නිසා මේ video එක හැමෝමත් එක්ක share කරන්න හිතුනෙ.

Share කිරීම විතරක් නෙවෙයි, දෙන්නෙක් අතරට කැමරා කාචයක්, පටිගත කිරීමක් සිදුවෙනවා කියන්නෙම තුන් වෙන්නෙක් ඒ දිහා බලනවා, අහගෙන ඉන්නවා කියන එක තේරැම් ගන්න ඕනෙ. පස්සෙ රට දාලා යන්නවත් සිය දිවි හානි කර ගන්නවත් නැත්තන් පාරෙ බැහැලා යන්න බැරි වෙන්නෙවත් නෑ එතකොට.

කෙනෙක් ගෙ පුද්ගලිකත්වය විතරක් නෙමෙයි පරිසරය, ස්වාභාව ධර්මය සතා සිව්පාවාගේ පැවැත්මත් පවා අපේ share button එක මත තීරණය වෙන කාලයක් මේක. SHARE RESPONSIBILITY අලුත් මතවාදයක්. Online රැල්ලක් හදන්න කියාපු වචනයක්. #shareresponsibility

ඔන්න මේ ලිපිය නම් ඔබ අතින් ෂෙයා වෙන්නම ඕනෙ ලිපියක්. හා නැද්ද මං අහන්නෙ?

දැනෙනව නම් ශෙයා කරන්න

The post Share Responsibility – ඔන්ලයින් අහස යට 5 appeared first on familylife.

ඒත් ඉතින් online ජීවිතේට හුරැ උනාට පස්සෙ මේ දේවල් මගහරින්න බෑ. 2020 January 01st selfy එකක් නොදා ඉන්නෙ කොහොමද FB එකේ කොන් වෙන්න බෑනෙ. හැබැයි ඉතින් ඒවා දිහා බලනකොට හි⁣තෙනවා. මිනිස්සු අවුරැද්දෙ පලවෙනි දවසෙ ලස්සනට ඇදලා හිනාවෙලා ඉන්නෙ අලුත් අවුරැද්ද ගැන කොච්චර බලාපොරොත්තු සහගතවද.

තමන්ගෙ තියෙන බලාපොරොත්තු හීන හැමදෙයක්ම මේ අවුරැද්දෙ නම් හරියයි කියන සුබවාදී හැගීම හැම මූණකම තියෙනවා. ඒත් ඉතින් 01වෙනිදා කියන්තේ මෙච්චර දවස් ගෙවුනා වගේම ගතවුනු එක දවසක් විතරයි කියලා හිතෙන කොට මාද ඇතුලුව හැමෝම ගැන මාර දුකක් ඇතිවෙනවා.

එක එක්කෙනා එවන සුබ පැතුම් ටික එහෙට මෙහෙට කර කර ඉදලා 31Night අවුටින් එකක් ගිහින් පහුවදාට කිරි බත් කෑල්ලක් කාලා selfy යක් දෙකක් ගහලා, පොඩි share පාරක් දැම්මනම් අවුරැද්ද shape එකේ ගියා කියලා හිතන එකත් වෙනමම ආතල් එකක්. හැම දෙයක් ගැනම serious වෙන්න ගියාම තමයි හිත බිදෙන්නෙ.

“අපි මේ ගෙවන ජිවිතේ මොකක්ද ඇත්තටම ” කියලා හිතන හිතීම නතරකරගන්න පුලුවන්නම් අවුලක් නෑ. යාලුකන් නෑදෑකම් ඔක්කොම online එකට සීමා වෙලා. අම්මා තාත්තටත් සුබ පතන්නෙ ආශිර්වාද ගන්නෙ video call එකකින්.එක අතකට ඒකත් තියෙන එක කොච්චර දෙයක්ද සම්බන්ධකම් රැකගන්න.

කොහොම උනත් ඉතින් පලවෙනිදට පොඩි ගැම්මක් ගන්න එක හොදයි. සුබවාදී හිතීම්, ක්‍රියාත්මක වීම් තුලින් අලුත්ම ගමනක් යන්න පටන් ගන්න පුලුවන්. තමන්ගෙ ජයග්‍රහණයන් තියෙන්නෙ තමන් තුලමයි කියනවනෙ.

දශකයක හීන අරං ආපු අලුත් අවුරැද්දෙ මම කියවපු හොදම සුබ පැතුම දැක්කෙ සුනිල් විජේසිරිවර්ධන කියන ආචාර්ය වරයාගේ FB ලියවිල්ලකින්. එයින් කොටසක් මම උපුටලා දාන්නම්. ඒක හදවතට දැනනෙන නිසා.

“කෙනෙකුට ඔබ සිපගන්නට, වැලඳ ගන්නට ඔබට තේ කෝප්පයක් සාදා දෙන්නට උවමනාය. කෙනෙක් ඔබ කැටිව සිනමා දර්ශනයකට, සංගීත ප්‍රසංගයකට යන්නට සිතමින් සිටී. ඔබ ඇසුරේ සිටින කෙනෙක් ඔබට සිතා ගත නොහැකි තරම් වටිනා යමක් නිකම්ම දෙන්නට සිතා හමාරය.

මේ වසරේදී සොයා ගන්නා නව දැනුම නිසා ඔබේ පරම්පරාව ජීවත්වන, එකිනෙකා සමග සම්බන්ධවන, සුවපත් වන ආකාරයේ මහත් ධනාත්මක වෙනස් කම් සිදුවනු ඇත. කෙනෙක් මේ මොහොතේ මහත් සේ මානසික, කායික වේදනාවක් අත් දකියි; තව දින කිහිපයකින්, මාස කිහිපයකින් ඔව්හු කිසිදා නොවූ තරම ට සුපුෂ්පිත වන්නෝය; දැනට ඔව්හු ඒ බවක් නොදනිති.

කෙනෙකුට තමා දුටු යහපත් සිහිනයක් සැබෑවෙමින් පැතූ දේ හෝ ඊටත් වඩා යමක් අද හෝ හෙට ලැබෙයි, එය කෙතරම් ආශ්චර්යජනක ද යත් එහි බලපෑමෙන් ඔහු හෝ ඇය ජීවිතය කෙරෙහි වඩාත් මෛත්‍රීසහගත වෙයි.

කෙනෙක් මේ මොහොතේ ලෝකයේ සාමය ගැන අවංකවම ප්‍රාර්ථනා කරයි. කෙනෙක් මහා අභ්‍යන්තර අර්බුදයකින් පසු හොඳ සිහිය නැවත අත්පත් කරගනී. කෙනෙක් මළවුන් අතර ට යන්නටම ගොස් ආපසු පැමිණේ. සුව කළ නොහැකි ලෙඩකින් කෙනෙක් මේ දැන් සුවය ලබමින් සිටී

” නව වසරට හා නව දශකයට සුභාසිරි ! “

ඒ ඔහුගේ පැතුමයි.

නැවත ගොඩ නැගීම. නැවත සිතීම. 2020 ආරම්භයට නව ගැම්මක් එයින් ලැබුනා. අවුරැදු සුබ පැතුමක් මගින්. කෙනෙක්ට අලුත් අවුරැදට සුබදායි හැගීමක්. නව මතවාදයක් බෙදා හරින්න පුලුවන්නම් එයින් කෙනෙක්ගෙ හදවත උද්දීපනයක් කරන්න පුලුවන්නම් Online සැරි සරණ අපේ ජිවිත දැනට වඩා චුට්ටක් හරි ලස්සන වෙයි කියලා හිතුනෙ ඒ FB සුබ පැතුම කියෙව්වයින් පස්සෙයි.

දශකයක හීන අරං ආපු මේ නව වසර කාගෙත් පැතුම් ඉටුවෙන ලස්සන, හිතවත්, සුබ නව වසරක් වෙන්න කියල මමත් ප්‍රාර්ථනා කරන්නම් familylife.lk Online අහස යට 04 වෙනුවෙන්

දැනෙනව නම් ශෙයා කරන්න

The post දශකයක හීන අරං ආ නව වසරට ආයුබෝවං – Online අහස යට 04 appeared first on familylife.

තාප්ප, සහ තාප්පවල චිත්‍ර අදින (wall Paining) අය තමයි FB එකේ ඉහල පහළ යන අයට මේ දවස්වල වැඩිපුරම නෙත ගැටෙන්නෙ. ඒවා අතරෙ ලස්සන නිර්මාණ වගේම මෙලො රහක් නැති ඒවත් එමටයි. හැබැයි ඉතින් මෙලෝ රහක් නැතුව ජීවත් වෙනකොට ඔහොම හරි ආතල් එකක් ගන්න එකත් හොදයි.

මට හිතුනෙ ලංකාවෙ මිනිස්සු තරන් රැල්ලට යන කට්ටියක් කොහෙවත් නැතුව ඇති. හැමවෙලේම අනුන් කරන දේමයි කරන්න බලන්නෙ. දැන් ඉතින් Facebook එක තියන නිසා වැඩේ තවත් ලේසියි. රැලි හදන්න කියාපු ජාතියක්. රැල්ල කොච්චර සැරට ගියාද කියනවනම් පාරෙ තියෙන්න ඔනි Board ලෑලි වලත් චිත්‍ර ඇදලා. නුවර වැව් බැම්මෙත් ඇදලයි නතරවුනේ..

කොහොම උනත් ලන්කාවෙ මිනිස්සු රැලි වැලදගෙන මෙලෝ විචාරයක් නැතුව දගලන එක එයාලගෙ වරදක් නෙමෙයි. දවසක් අපේ lecturer කෙනෙක් දේශනයකදී මතුකරපු අදහසක් මතක් උනා. ඒකට කියන්නේ Human Material කියලා. පෙර දිග මනුස්සයාගෙයි අපරදිග මනුස්සයාගෙයි Human Material එක හැදිලා තියන විදිහ වෙනස්. කොටින්ම කිව්වොත් ලංකාවෙ අපේ Human Material එකේ හැටියට තමයි අපේ හැසීරීම, ආකල්ප හැමදෙයක්ම නිර්මාණය වෙලා තියෙන්නෙ. ඒකට ඉතින් සන්ස්කෘතිය, ආගම, දර්ශණය විතරක් නෙමෙයි පරිසරය, දේශගුණය පවා බලපානව කියලයි කීවෙ. අපේ මානව ද්‍රව්‍ය හැදිලා තියෙන්නෙ ඉතින් මෙහෙම තමයි. ඒකට මක් කරන්නද?

හැබැයි ඉතින් රැල්ලක් උනත් හොද දේකට හැරෙනවනම් කොච්චර හොදද? නත්තල කියන්නෙ අපි කාටත් ආගම් බේදයකින් තොරව හැමෝටම සතුට ගේන කාලයක්. හැබැයි නත්තල් කියන්නෙ සේල් පස්සෙ ගිහින් ෂොපිං කරන එකමත් නෙමෙයි.

පහුගිය දවසක FB එකේ දාලා තිබුනා ෂොපින් කරන අතරෙ එක අම්මෙකුයි දුවෙකුයි හදුන්කුරැ විකුනපු පොඩි ළමයෙකුට තෑගි අරන් දීපු photos වගයක්. ඕක FB එකේ දැම්ම කියලා විවේචනත් එල්ල වෙලා තිබුනා සෑහෙන්න. ඒ උනාට මමනම් ඒක වරදක් විදිහට දකින්නෙ නෑ. රැලි හදනවනම් හදන්න ඔනි ඒ වගේ දේවල්වලට. ඒක දකින තව කෙනෙක් එහෙම කරනවා. තවත් කෙනෙක්ට එහෙම කරන්න හිතෙනවා. කොහොමත් සංවේදීවීම අපේ ලාංකික මානව ද්‍රව්‍යයේ ලක්ෂණයක්.

හොද දේකට සංවේදී වීම වටිනවා. මේ නත්තලේ අලුත් පාසැල් වාරයට පොත් ටික ගන්න බැරි ළමයි කීදනෙක් අපි අතර ඇතිද. ඒ ගැන දුක් වෙන අම්මලා තාත්තලා කීදෙනෙක් අපි අතරෙ ඉන්නවද? අම්මලා තාත්තල නැති ළමයි කීදෙනෙක් ඇතිද. අනික දුප්පත් වෙන⁣නෙම ඔනි නෑ. ළමයි තුන් හතර දෙනෙක් ඉන්න පවුලක පොත් list ටික අරන් දෙන එක කොච්චර අසීරැ දෙයක්ද. නත්තලේ තව කෙනෙක්ට පොතක් හරි දෙන්න හිතෙන රැල්ලක් හදන්න පුලුවන්නම්. එහෙම රැල්ලක් හැදෙනවනම් කොච්චර හොදයිද. එක ළමයෙක්ට හරි හිනාවක් ගේන්න පුලුවන්නම් තාප්ප සීයක චිත්‍ර අදිනවට වඩා සතුටක් ලබන්න පුලුවන්.

තාප්ප වල චිත්‍ර අදිනවට මම මුකුත් කියනවා නෙමෙයි. රට ලස්සන කරන්නත් ඔනි. ඒ වගේම මිනිස්සුන්ගෙ හිත් ලස්සන වෙන්නත් ඔනි. හැමෝම ආර්ථික ප්‍රශ්න තියෙනවා අඩු වැඩි විදිහට. හැබැයි අපිට වඩා ප්‍රශ්න තියෙන කෙනෙක් ගැන සංවේදී වෙන්න පුලුවන්නම් මේ නත්තල තවත් ලස්සන වෙයි කියලා හිතුන නිසයි මෙහෙම ලීවෙ. හැබැයි ඉතින් රැලි හදන්න කීවට අපි කෙනෙක්ට උදව්වක් කරලා ඒක ප්‍රචාරය කරද්දි ඒ ළමයින්ගෙයි එයාලගෙ දෙමව්පියන්ගෙයි ආත්ම ගෞරවයට නම් හානියක් කරන්න එපා. එයාලත් මේ සමාජයෙ ලස්සනට ජීවත් වෙන්න ඕනි. ඉතිං in advanced Happy Christmas..!

Online අහස යට අනෙකුත් ආටිකල් වෙත පිවිසෙන්න

දැනෙනව නම් ශෙයා කරන්න

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post Happy Christmas with wall painting – Online අහස යට 03 appeared first on familylife.

online සරන්නිය… මේ ඇගේ අවකාශයයි – ” මා වැස්සේ ඇවිද යාමට කැමතී. මන්ද එවිට කිසිවෙකුටත් මා හඩනා බව නොපෙනෙයි”

මගේ යාලුවෙක් FB එකේ status එකක් දාල තිබුන “තමන්ගෙ පෙනුම විවිද ස්වරෑපයෙන් දකින්න ලැබෙන එක මේ කාලෙ මිනිස්සුන්ට තියෙන සතුටක් කියලා..” උදේ ඉදන් රෑ වෙනකන් FB wall එකේ ඉහල පහල යනකොට දකින selfie කන්දරාව දැක්කම මට හිතුනා යාලුවා කියපු කතාව ඇත්ත නේද කියලා. හැබැයි ඉතින් ඔය අවුැදු 18, 20 පොඩි කෙල්ලො කොල්ලො නම් ඉතින් තමන්ගෙ හුරැ බුහුටි ඉරියව් අනිත් අයගෙ ආකර්ෂණය තකා wall එකේ publish කරනවා.

ඒත් ඉතින් මේ 40ත් පැනපු අපේ පරම්පරාවෙ ඈයොත් ඒ පැත්තෙන් මේ පැත්තෙන් බල බල selfie දාන එකේ තේරැම මොකක්ද කියලා මාත් කල්පනා කළා. කිව්වට මොකද ඉතින් මාත් share නොකරට දවසට selfie දෙක තුනක් අරගෙන face makeup එකක් එහෙම දාලා මුනෙ තියෙන ආවාට ටිකයි, මෝදු වේගෙන එන රැලි ටිකයි මැකිල යන හැටි බලලා පොඩි ස්වයං වින්දනයක් ලබනවා. ඒකට ඉතින් මොකද නේද?

දවසක් මට යාලුවෙක් තමයි ඔය midlife crisis එක ගැන කීවෙ. පස්සෙ google කරලා බැලුව අපි දන්න කියන අයටත් ඕක තියෙනවද දන්නෙ නෑනෙ.

Midlife අර්බුධය කියන්නෙ ගෑණු පිරිමි දෙගොල්ලන්ටම මූන දෙන්න වෙන තත්ත්වයක් කියලා තමයි කියන්නෙ. හැබැයි ගොඩක් අය midlife crisis කියන සංකල්පය පිළිගන්න කැමති නැතිලු. නමුත් අවුරැදු 40 පස්සෙ බොහෝ දෙනෙක් ඊට සමාන දෙයක් හෝ අත්විදිනවා කියලා තමයි අධ්‍යයන වල සඳහන් වෙන්නෙ.

මැදි වයසට ආවාම ගොඩක් දෙනා තරැණ කාලෙ හිතේ තිබුන targets වගේ දේවල් වර්තමාන තමන්⁣ගෙ තත්ත්වයත් එක්ක ඇගයීමට ලක්කරනවාලු. අන්න එතකොට ගොඩක් අය අර්බුධයට යන්න තියෙන ඉඩකඩ වැඩිලු. පිරිමි මේ midlife crisis තත්ත්වයට මුනදෙනකොට තමන්ගෙ ජයග්‍රහණයන් පිළිබඳව, පන්ඩිත බව විදහාපෑම, මුහුකුරා ගිය බව පෙන්වීම වගේ දෙවල් මෙන්ම status පිළිබඳව කෙලින්ම අවධානය යොමු කරනවා කියලයි තියෙන්නෙ.

වෙලාවකට හිතෙනවා මේ අධ්‍යයන ඇත්තනම් FB එක මේ crisis තත්ත්වයන් සමනය කරන්න දිව ඔසුවක් නේද කියලා. status එකයි පම්පෝරි ටිකයි පෙන්න ගන්න මේවගේ තැනක් කොහිද ලෝකෙ. හැබැයි ඉතින් කාපු බීපු තැනයි, කාපුවයි post ekak දාගත්තෙ නැත්තන් කාපු ටික දිරවන්නෙත් නැති තරන් සමහරැන්ට. ඒකෙ වරදකුත් නෑ අප්පා සල්ලි වියදන් කරලා අමාරැවෙන් ගත්ත photos ටික නිකන් තියෙන wall එකේ දැම්මම මොකද වෙන්නෙ.

ඒවගේ පම්පෝරි පෙන්නන්නෙ නැතුව මතවාදයක් මිනිස්සු අතරට ගෙනියන්න හදන Face Book ලියන්නොත් කොච්චර ඉන්නවද?. ඒ හැම කෙනාටම Midlife crisis හැදිලද නෑනෙ. කොහොම උනත් පිරිම කට්ටිය මේ තත්ත්වයට මූන දුන්නාම තමන්ගෙ ජයග්‍රහණයන්, Status ගැන කෙලින්ම අවධානය යොමු කරන අතරෙ ඒවා අනිත් අයට පෙන්වන්න උත්සාහ කරනවලු. ගැහැණු වැඩිපුරම අර්බුධයට යන්නෙ පෙනුම, ලිංගික ආකර්ෂනය ආදිය පදනම් කරගෙන කියලා තමයි කියන්නෙ.

මේ තත්ත්වයන් සායනිකව ප්‍රතිකාර ගන්න තත්ත්වයට ම යන බව තමයි බටහිර රටවල පර්යේෂන වල තියෙන්නෙ. හැබැයි තමන්ගෙ අරමුණු වෙනුවෙන් කැපවී කටයුතු කරන අයට දැනටමත්, ඉතා අඩු වයසින් සාර්ථකත්වයට පත් වුනු අයට මෙ⁣ම අර්බුධයට මූන දීම අඩුයිලු. වයසට යාම ඔවුන්ට පහසුයි.

තවත් පිරිසක් ඉන්නවා හදිස්සියේම තමන් වයසට යනවා කියලා වටහාගෙන කාලය ගෙවී ගියත් තාම බොහෝ දේවල් කරගෙන නෑ කියන පසු තැවීමත් එක්ක midlife crisis තත්ත්වයට මුනදෙනව.

ඔන්න රෝග ලක්ෂණ ටිකකුත් හොයා ගත්තා. තමන් ලග ඉන්න අයටත් තියෙනවද බලන්න මේ ලක්ෂණ.

• හිටපු ගමන් තමන් පාවිච්චි කරපු car එක විකුණලා අලුත් sport car එකක් ගන්න හිතන එක..
• සමහර අය එක පාරටමඇදුම් විලාසිතා වෙනස්කරලා makeup එක වෙනස්කරලා අමුතුම පෙනුමක් ගන්න හදනවා
• සාධාරණ හේතු නැතුව අධික කෝපයට පත් වෙනවා
• පරණ මිතුරන් disconnect කරලා අලුත් තරැණ මිතුරන් සොයා ගැනීම
• අනාගතය ගැන විකල්පයක් නෑ කියලා සිතීම
• මරණය හා මිය යාම ගැන සිතිවිලි වැඩි වෙනවා
• රැකියාව වෙනස් කරන්න, divorce වෙන්න හිතනවා
• නිදි පුරැදු වෙනස් නෙවා. නින්ද යන්නෙ නෑ..

ඔය වගේ තව ගොඩක් මානසික තත්ත්වයන් ගැන කියලා තියනව. දැන් ඉතින් මේක කියවල අනුන්ගෙ wall වලට ගිහින් මූට නම් midlife crisis තමයි කියලා නිගමන වලට එන්න එපා. අඩු වැඩි විදිහට ඔන කෙනෙක්ට මේ වගේ ලක්ෂණ තියෙන්න පුලුවන්.
හැබැයි මේ ගැනත් විවිධ අදහස් තියෙනව. “වයසින් මුහුකුරා යනකොට සිත ඉතා සංවේදී වීමත් සමහරැ තියුණු කාර්කික චින්තනයට යොමු වීමත් නිසා ගැඔුරැ සිතිවිලි වල යෙදෙන අය, දෙයක් දිහා විවිධ පැතිකඩ වලින් බලන එක මේ වගේ crisis තත්ත්වයක් නෙවෙයි” කියන එක .

අනික මටනම් හිතෙන්නෙ අපේ කාලේ මිනිස්සුන්ගෙ ආර්ථික ප්‍රශ්න, ළමයින්ගෙ ප්‍රශ්න, love ප්‍රශ්න, පවුල් ප්‍රශ්න දිහා බැලුවම ජීවිතේ midlife එකට එනකන් ඉන්න ඔනි නෑ. කොයි මොහොතෙත් ජිවිතේ අර්බුදයට යන්න පුලුවන්.

හැබැයි ඉතින් ඔය midlife crisis එකට ආවම විරැද්ධ ලිංගික ආකර්ෂනය පොඩ්ඩක් මදි කියලා හිතුනාම කට උල් කරලා face makeup එකක් දාලා selfie එකක් දෙකක් දැම්මා කියලා සායනික ප්‍රතිකාර නම් ඕනි නෑ. එතනින් crisis එකෙන් ගොඩ ආවට වෙන වෙන crisis පටන් ගන්න පුලුවන්.

හැබැයි ඉතින් ඔය අධ්‍යයන වල කියලා ති⁣යෙන්නෙ midlife crisis එක නරක දේකුත් නෙමෙයිලු .ඒක ධනාත්මකව වැලද ගන්න මිනිස්සුත් ලෝකෙ ඉන්නවලු.

අර්බුදය ගැන වැටහීමක් තියෙන කොට තමන්ගෙ ආදරණීයන් එක්ක කතා කරන්න පුලුවන්. එතකදි අලුත්ම targets හදාගන්න පුලුවන්. ඉදිරි වසර 05ට හෝ 10 සැලසුම් හදාගෙන ඒ වෙනුවෙන් වැඩකරන්න පුලුවන්. Comfortable zone එකෙන් එලියට එන්න පුලුවන් වෙනවා. තමන්ගෙ සෞඛ්‍යය ගැන නැවත හිතන්න පුලුවන්. සමහරු ස්වේච්ඡාවෙන්ම සමාජ සේවයට යොමු වෙන්න පුලුවන්. කොහොම උනත් මෙලෝ සිහියකින් තොරව ගත කරන ජීවිතේට වඩා තමන් ගත කරන ජිවිතේ අවබෝධයෙන් ගතකරනවා නම් මේ ගොඩක් crisis වලින් ගොඩ එන්න පුලුවන්. කොහොම උනත් අතේ සතේ නැති වෙන කොටනම් ඔය කොයි crisis එකටත් මූන දෙන්න වෙනවා.

යාලුවෙක්⁣ share කරලා තිබුනා දාහක් ප්‍රශ්න තියෙද්දිත් කිසි ප්‍රශ්නයක් නෑ වගේ හිනා වෙලා ඉන්න පුදුම ශක්තියක් තියෙන්න ඔනි කියලා. ඇත්ත තමයි තමන්ගෙ crisis ටික ලෝකෙට පෙන්නන්නෙ නැතුව උදේ ඉදන් රෑවෙනකන් හිනා වෙලා ඉන්න එකත් ලේසි නෑ තමයි. මේකත් post එකක දැක්ක එකක් තමයි. ලෝක ඉතිහාසයේ වඩාත් දුක්බර වැකිය ලියලා තියෙන්නෙත් ලෝකය උපරිමයෙන් සතුටෙන් තියන්න උත්සාහ කල මිනිසාමයි.

“මා වැස්සේ ඇවිද යාමට කැමතී. මන්ද එවිට කිසිවෙකුටත් මා හඩනා බව නොපෙනෙයි.
– චාලි චැප්ලින්.”

හ්ම්ම් ….

දැනෙනව නම් ශෙයා කරන්න

The post Midlife Crisis එකට ඔයත් love ද? – Online අහස යට 02 appeared first on familylife.

online සරන්නිය… මේ ඇගේ අවකාශයයි – “මග අරින එක උබේ පුරැද්දක් වෙනකොට අත් අරින එක මගේ වැරැද්දක් නෙමෙයි”

“නොපිරැණු කුසත්, හිස්වුණු පසුම්බියත්, බිදුණු හදවතත් ඔබට ජීවිතය කියාදෙනු ඇත.”

රොබින් විලියම්ස් කියල කෙනෙක්ගෙ අදහසක් FB wall එකෙ ඉහල පහල යද්දි දැක්කා. නොපිරැණු කුස කෙසේ වෙතත් හිස් උණු පසුම්බිය නිසානම් මිනිස්සුන්ගෙ ජීවිත හැබෑම අවුලකට යනවා කියලා මට හිතුනා. love කරනකොට දාහක් සුරංගනා කතා කීවත් ආර්ථික ප්‍රශ්න හමුවෙ මිනිස්සුන්ගෙ ජිවිත වල සතුට කොච්චර ඈතට යනවද? ඒකෙන් අදහස් වෙන්නෙ නෑ සල්ලි තියෙන අය මාරම සතුටින් පවුල් කනව කියන එක. ඒත් ගොඩක් වෙලාවට හදවත් බිදීම් වලට ආර්ථික ප්‍රශ්න බලපානවා.
උදේ ඉදන් job එකේ ප්‍රශ්න වලින් මිරිකිල හවසට ගෙදර ආවම පොඩි උන්ගෙ දැගලිලි යුද්දෙ ඉවර කරලා නින්දට යන පැයේදි ,

“අද ලයිට් බිල red notice එක ආවා .මොකද කරන්නෙ …ඔන්න මං ලග තියෙන්නෙ ලොකු බබාගෙ term fees දෙන්න තියපු සල්ලි ටික විතරයි. ආ මේ week end එකේ චුටි බබාගෙ vaccine දෙන්න යන්නත් තියනව.”
List එකේ තව කියන්න දේවල් තියෙදිත් ….”අයියෝ ඇති අනේ කියවිල්ල…හැමදාම නිදාගන්න හදනකොට ඔය list එක අහල ඇතිවෙලා… හරි හරි මොනවා හරි කරමු… ඉතින් ” කියලා එයා අනිත් පැත්තට හැරෙනවා..credit card එකෙන් ගෙවන්නම් කියලා එයා හිතාගෙන ඇති, ඒත් …credit limit එක ඉවරයි කියන්නත් කලින් එයා නින්දට වැටිල .කොහෙද ඉතින් බැච් පාටි එකට ඇදුමක් ගන්නව කියල හිතන එකත් අපරාදෙ…

නිදා ගන්න කලින් ඉස්සර වගේ මුමුන මුමුන ඉන්න තිබ්බනම් මටත් ආසයි…මහරෑ වෙනකන් කියව කියව ඉදල නලලට ලැබෙන දිගු හාද්දටත් පස්සෙ නිදා ගන්න පුරැදු වෙලා හිටපු මං නොනිදා කල්පනා කරනව කොතනද අපිට වැරදුනේ කියලා…
ලෝ සිරිතට ළමයි හදන්න ගිහින් වැරදුනාද? හම්බවෙන දෙයින් ජිවත් වෙන්නෙ නැතුව ගෙවල් දොරවල්, යාන වාහන පස්සෙ ගිය එකද ,නැත්තන් දෙකට තුනට නැමිලා මිනිස්සු පාවාදීගෙන රස්සාවලින් ඉහලට යන්න බැරි උන එකද? අ⁣⁣පේ වරද කියල හිතා ගන්න බෑ…

කව්රැ හරි කියනවනම් “ඕකට තමයි ජීවිතේ කියන්නෙ…දුක් කරදර හමුවෙ නොසැලෙන්න” කියලා කියපු එකාගෙ කනට එකක් දෙන්න ඕනි.

“මොනවා උනත් අපි තියෙන දෙයක් කාලා අපි සතුටින් ඉන්නවනෙ ….” කියන එක අමූලික බොරැවක්. ගොඩක් අය සතුටින් නෙමෙයි ඉන්නෙ. හිත රවට්ට ගැනීමක් විතරයි. ජීවිතේට පාඩම් නම් ඕනිම නෑ. අපි හොදට පාඩම් ඉ⁣ගෙන ගත්ත ජාතියකනේ. එත් අපි අතරින් නොදැනිම මග ඇරිලා යන සතුට. හෙමිහිට නැතිවෙලා යන ආදරේ ගැන හිතෙනකොට නම් මාරම ලෝබයි..
ඇත්ත තමයි ඉතින් එක පඩියකින් තියා පඩි දෙකකින් වත් ජීවිතෙ ගොඩ දා ගන්න බැරි වෙනකොට ආදරයක් ඉතුරැවෙයිද.

උදේ ඉදන් දෙන්නට දෙන්න online චෝදනා කර ගැනිල්ල . call වලින් whatsapp එකෙන් viber එකෙන් රෑ වෙනකන් ප්‍රශ්න ගැන කතාව. භයානකම දේ ඒක නෙමෙයි. ඔය දෙන්නා අතරට, හිත හදන්න කියාගෙන ස්වේච්ඡාවෙන්ම තුන්වෙන්නෙක් අවොත් බුදු සරණයි… දෙවි පිහිටයි. හැබැයි ගොඩක් අයට අද වෙන්නෙත් ඒකමයි. තුන්වෙන්නෙක්ට දුක කියන්න පටන් ගත්තොත් නතර වෙන්නෙ උසාවියෙන්. වැඩේ කියන්නෙ ගෙදර දුක අහන් ඉන්න බැරි ගොඩක් ගෑණු පිරිමි දෙගොල්ලොම අනුනගෙ දුක අහන් ඉන්න ආසයි. බස් එකේදිද, office එකේද ,කෝච්චියෙද නැත්තන් online ද කියලා වෙනසක් නෑ. දුක අහගෙන ඉන්න අය ඕන තරම්. අන්තිමට ඉතින් ගොඩක් අය ලෝක චාරිත්‍රය ට පවුල් කනවා. “ළමයි නිසා ඉවසනවා..නැත්තන් මම දාලා ගිහින් ” කිය කිය feeling happy with hubby කියලා සතියට දෙක තුනක් දෙන්නගෙ selfie share කරනවා අනිත් උන්ට පේන්න. අපි නොදන්න online ජීවිත.
බැරිම තැන දාලා ගිය අය “මග අරින එක උබේ පුරැද්දක් වෙනකොට අත් අරින එක මගේ වැරැද්දක් නෙමෙයි ” කියලා post share කරනවා…

ඇත්තටම වරදින තැන කොතනද? පසුම්බිය හිස්වෙනකොට හදවත බිදගන්නෙ නැතුව ඉන්න පුලුවන්නම්. හොදයි නේද? මගෙ යාලුවෙක් දවසක් කීවා ඔකට කියන්නෙ , midlife crisis කියලලු. ඒක ගැන වෙන දවසක chat එකක් දාමු.

දැනෙනව නම් ශෙයා කරන්න

The post Online අහස යට 01 – ළමයි නිසා ඉවසනවා. නැත්තන් මම දාලා ගිහින්… appeared first on familylife.

උතුම් මව් පදවිය ලැබීම යනු කාන්තාවකට ජිවිතයේ ලැබිය හැකි සුන්දරම අත්දැකීමක් බව සැබෑවකි. නමුත් එහි සුන්දරත්වය නියමාකාරයෙන් අත්විඳීමට අවස්ථාව ලැබෙන්නේ දෙමව්පියන් තම දරුවන් වෙනුවෙන් වූ වගකීම් නිසි ආකාරව ඉටු කරන්නට වූ විට පමණි. විශේෂයෙන්ම දරුවෙකු පිළිසිඳගත් බව දැනගත් දින සිටම ඒ සඳහා අවශ්‍ය වගකීම් දෙමව්පියන් ලෙස ඔබ කරට ගත යුතු වෙයි. එහිදී මවගේ වගකීම් සහගත බව අන් කවරටත් වඩා වැදගත් වෙයි.

ගර්භනී මව්වරුන් හෝ වේවා වෙනත් සාමාන්‍ය පුද්ගලයෙකු හෝ වේවා තමන්ගේ දත් සම්බන්ධව නිරන්තර අවධානයකින් සිටීම වැදගත්. එලෙසම එය නිවැරදි ලෙස ආරක්ෂා කර ගැනීමද වැදගත්. දිනපතා දවසට දෙවරක් කෑමට පසු දත් මැදීම, ඔබ ලබාගන්නා සෑම සුළු හෝ ප්‍රධාන ආහාර වේලකට පසුවම කට සේදීම සහ ජලය පානය කිරීම සම්බන්ධව නිරන්තර අවධානයෙන් සිටීම, ප්‍රධාන වශයෙන් යහපත් මුඛ සෞඛ්‍යයක් වෙනුවෙන් ඔබට උපකාරී වේ.

එලෙසම තම මුඛ සෞඛ්‍ය සම්බන්ධව සැකයක් හෝ ප්‍රශ්නයක් ඇති වූ විට හැකි ඉක්මනින් දන්ත වෛද්‍යවරයෙකු වෙත යාමටද වගබලා ගත යුතුය. අඩුම තරමේ මාස 6කට වරක්වත් දන්ත වෛද්‍යවරයෙකු වෙත ගොස් දත් පරීක්ෂාවක් සිදුකර ගැනීම වැදගත්.

ගර්භණී සමයේදී මව්වරුන්ගේ ඇතිවන දත් දිරීමක්, විදුරුමස්වල ඇතිවන රෝගී තත්ත්වයක් හෝ වෙනත් ඕනෑම ආකාරයක මුඛ සෞඛ්‍ය සම්බන්ධ ප්‍රශ්නයකදී ගර්භණී සමයේ මුල් මාස තුන හැර මැද මාස තුන ඇතුළතදී අවශ්‍ය ප්‍රතිකාර ලබා ගැනීමට යොමුවීම අනිවාර්යයි. එසේ නොමැති වූ විට ඉතා බරපතල තත්ත්වයන්ට මුහුණ දීමට සිදුවන අවස්ථාද අද වනවිට විරල නොවේ.

ගැබිනි සමයේ මුඛ සෞඛ්‍ය සම්බන්ධ වැරදි මත රාශියක් අප අතර පවතී.

මව අවැසි තරමින් කැල්සියම් නොගත්විට ඇයගේ දත්වල කැල්සියම් දිය වී ඒවා දරුවාට ලැබෙන බව පැවසීම ඉන් එකකි. එලෙසම වමනය යන කාලයට දත් මැදීම සිදු නොකළ යුතු බවද ගැබිනි සමයේ දන්ත ප්‍රතිකාර කිරීමෙන් වැලකි සිටිය යුතු බවටද තවත් මත රාශියකි. නමුත් මතක තබා ගත යුතුම කාරණය වන්නේ මේවා සියල්ල අසත්‍ය මතයන් බවයි.

මෙවැනි අසත්‍ය මතයන් පිළිගෙන තම මුඛ සෞඛ්‍ය පිළිබඳ අවධානය නොදෙන, නොඑසේ නම් වැරදි පුරුදුවල යෙදෙන මව්වරුන්ට සැබවින්ම ඉදිරියේදී ගැටලු ගණනාවකට මුහුණ දීමට සිදුවන බව නම් නොරහසකි.

ගැබිනි සමයේ ඔබගේ දත්වල කිසියම් හෝ ගැටලුකාරී තත්ත්වයක් පැනනැගී ඇත්නම් මෙවැනි කාලයක ඒ සඳහා ප්‍රතිකාර ගැනීම නුසුදුසු යැයි සිතා එය සඟවාගෙන සිටීම වෙනුවට සිදුවිය යුත්තේ දන්ත වෛද්‍යවරයෙකු වෙත ගොස් පරීක්ෂාවක් කරගැනීමයි.

එලෙස වෛද්‍ය උපදෙස් නොගෙන සිටීමෙන් තත්ත්වය තවත් බරපතල වියහැකි අතර ඉතා අවම මට්ටමේ ඇති ගැටලුවක් අනවශ්‍ය බිය හෝ මිත්‍යා මතවල එල්බගෙන සිටීම හේතුවෙන් බරපතල තත්ත්වයන් දක්වා පත්වීමට බොහෝවිට ඉඩකඩ ඇත. එනිසා වඩාත්ම සුදුසු වන්නේ ගර්භනී ඔබගේ මුඛ සෞඛ්‍ය සම්බන්ධ කිසියම් වෙනසක් දැනුනු වහාම දන්ත වෛද්‍යවරයෙක් වෙත ගොස් උපදෙස් ලබා ගැනීමයි.

වමනය යන කාලයට දත් මැදීමේ තරමක අපහසුවක් ඇති වීම සාමාන්‍ය කරුණකි. නමුත් එසේ සිතා දත් මැදීමෙන් වැළකී සිටීම වෙනුවට ඒ වෙනුවෙන් තමන්ට ගැලපෙන නිවැරදි ක්‍රමයක් තෝරාගැනීම වැදගත්ය. උදාහරණයක් ලෙස දන්තාලේපය මාරු කිරීම වැනි ක්‍රමයක් උත්සහ කළ හැක.

මෙහිදී විශේෂයෙන්ම සඳහන් කළ යුතු කරුණු කිහිපයක්ද වෙයි. යම් අවස්ථාවන්වලදී දත් නරක් වීමෙන් සැරවා එකතු වීමක් සිදුවිය හැකි අතර එමගින් ඇතිවන තුවාලයන් ඉතා වේදනාකාරී විය හැක. එවැනි අවස්ථාවල දන්ත වෛද්‍ය උපදෙස් වෙත ගැබිනි මව යොමු කිරීම අතිශය වැදගත් කාරණයකි. එලෙසම ගර්භනී මවකගේ මුඛයේ විදුරුමස් හා ඊට යටින් පවතින අස්ථි කොටස් දියවීම වැනි රෝග තත්ත්වයන්ද ඇතිවිය හැකි අතර එය කුස තුළ සිටින දරුවාටද ඉතා අහිතකර ලෙස බලපෑම් කිරීමට සමත්ය.

සාමාන්‍යයෙන් ගර්භනී මවකට විදුරුමස් රෝගයක් පවතින අවස්ථාවන්හිදී සෑමවිටම බැක්ටීරියා මුදා හැරීමක් ඒ හරහා සිදුවේ. මෙහි ප්‍රතිපලයක් ලෙස උපත් බර අඩු දරුවන්, නොමේරූ දරුවන් මෙන්ම මළ දරු උපත් ඇතිවීමේ අවධානමක්ද පවතී.

දරු ප්‍රසූතියකින් අනතුරුව දත් දුර්වල වීම, කැඩී යාම, දිරා යාම වැනි තත්ත්වයන් ඇතිවීම කෙරෙහි දරු ප්‍රසූතිය සෘජුවම බලපෑම් නොකරයි. එය හඳුන්වාදිය හැක්කේ ගර්භනී සමයේ සිදුවන යම් යම් වෙනස්කම්වලට මව අනුගත නොවීම නිසා ඇතිවන තත්ත්වයක් ලෙසයි.

සාමාන්‍යයෙන් ගර්භනී සමයේදී මවගේ ආහාර රටාව වෙනදාට වඩා යම් වෙනස්වීමකට ලක් වෙයි. වෙනදා ලබාගත් ප්‍රධාන ආහාර වේල් තුනට අමතරව කෙටි ආහාර වේලක් හෝ ආහාර වේල් කිහිපයක් ලබාගැනීමට මව්වරුන්ට සිදුවීම සාමාන්‍ය දෙයකි. නමුත් ඒ සෑම කෙටි ආහාර වේලකින් පසුවද හොඳින් කට සෝදා ජලය පානය කිරීමට ඔබ තුළ පුරුද්දක් ඇති කරගැනීම මෙහිදී වඩා වැදගත්ය.

එසේ නොවුනහොත් දත් දිරා යාමට ඇති ප්‍රවනතාවය ඒ හරහා තව තවත් වැඩි වීමට ඉඩකඩ පවතී. නමුත් ඒ දත් දිරායාමට හේතුවිය හැකි එක් අවස්ථාවක් පමණයි. මීට බලපෑ හැකි තවත් හේතු තිබිය හැකිය. සමහර මව්වරුන්ට ගැබිනි සමයේ මුල් මාස තුන ඇතුළතදී තදබල ලෙස වමනය ඇතිවීමට ඉඩකඩ පවතින අතර එමගින් මුඛයේ ආම්ලිකතාවය වැඩි වී දත් ක්ෂය වීමකට ලක්වීමෙන් එනමලය දියවී යාමක් සිදුවිය හැකිය.

මෙලෙස ඇතිවන දන්ත රෝගී තත්ත්වය ඉරෝෂන් ( Erosion ) ලෙස හඳුන්වන අතර ඒ නිසා දත් හිරි වැටීමකටද ලක්විය හැක. මෙවැනි තත්ත්වයකදී දත් නොමැද සිටීම නොකළ යුතු අතර ඒ හරහා සිදුවන්නේ තත්ත්වය තවත් උත්සන්න වීම පමණයි. එනිසා මෙවැනි තත්ත්වයකදී ඔබගේ ප්‍රසව හා නාරි වෛද්‍යවරයාගෙන් අවශ්‍ය උපදෙස් ලබා ගැනීම අනිවාර්ය කරුණක්.

දත් නොමැද සිටීමෙන් බැක්ටීරියා තැම්පත් වීම චක්‍රයක් සේ සිදුවන නිසා උදැසන දත් මැදීම කළ නොහැකි කෙනෙකුට කෙසේ හෝ පැය 24කට දෙවරක් දත් මැදීම කලයුතු බවට වෛද්‍යවරුන් උපදෙස් ලබාදෙයි. එවැනි තත්ත්වයකදී විසඳුම් ලෙස භාෂ්මික ද්‍රාවණ මගින් මුඛය සේදීම, වෛද්‍ය උපදෙස් සහිතව ෆ්ලෝරයිඩ් අඩංගු කට සෝදන දියර වර්ගයක් භාවිත කිරීම සිදුකල හැකියග\.

ගර්භනී සමයේදී ශරීරයේ සිදුවන හෝමෝන සාන්ද්‍රනයේ වෙනස්වීමද, මුඛයේ විදුරුමස් දියවීම කෙරෙහි බෙහෙවින් බලපෑම් ඇති කරයි. එමගින් විදුරුමස් ඉදිමීමකට ලක්වන අතර දත් මැදීමේදී විදුරුමස්වලින් රුධිරය ගැලීමක්ද සිදුවිය හැකිය.

මෙවැනි තත්ත්වයකදී බොහෝ මව්වරුන් දත් මැදීම අඩු කිරීමට හෝ දත් නොමැද සිටීමට කටයුතු කරන අතර එය කිසිසේත් නොකළ යුත්තකි. කෙසේ හෝ දිනපතා දවසට දෙවරක් දත් මැදීම අනිවාර්යෙන්ම කළ යුත්තක් බව මතක තබා ගත යුතුය.

කෙසේ නමුත් මව්වරුන්ගේ නොසැලකිලිමත්කම බොහෝවිට ඔවුන්ගේ මුඛ සෞඛ්‍ය සම්බන්ධ ගැටලුවලට හේතුවන අතර යහපත් මුඛ සෞඛ්‍යයක් පවත්වාගැනීම කුස තුළ වැඩෙන දරුවා තුළද යහපත් මුඛ සෞඛ්‍ය තත්ත්වයක් නිරායාසයෙන්ම ඇති කිරීමට හේතු වනු ඇති බවද මතක තබා ගත යුතුය.

මෙම ලිපිය සැකසීමේදී සිය දැනුම නොමසුරුව ලබා දෙමින් අම්බලන්ගොඩ මෙඩිප්ලස් දන්ත ශල්‍යාගාරයේ දන්ත ශල්‍ය වෛද්‍ය එස්. ඒ. එල්. ආලංක මහාතා දැක්වූ සහයෝගයට Familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post අම්මාගේ දන්ත සෞඛ්‍යය දරුවාගේ දත් රැකෙන්න බලපාන බව දන්නවද? appeared first on familylife.

බොහෝවිට දරුවන්ට ශක්තිමත් වාග් මාලාවක් ගොඩනගා ගැනීමට මෙන්ම ඔවුන්ගේ මූලික අධ්‍යාපනයෙන් වැඩි කොටසක් ලබා ගැනීමට අවස්ථාව සැලසෙන්නේ දරුවන් සහ දෙමව්පියන් අතර පවතින අන්තර් සබඳතා හරහායි.

ඔවුන් තම සිඟිති මුවින් පළමු වරට අම්මා තාත්තා යැයි පැවසීම තරම් සතුටක් දෙමව්පියන්ට තවත් නැති තරම්මය. බොහෝවිට දරුවන්ට ශක්තිමත් වාග් මාලාවක් ගොඩනගා ගැනීමට මෙන්ම ඔවුන්ගේ මූලික අධ්‍යාපනයෙන් වැඩි කොටසක් ලබා ගැනීමට අවස්ථාව සැලසෙන්නේ දරුවන් සහ දෙමව්පියන් අතර පවතින අන්තර් සබඳතා හරහායි.

බහතෝරන වයසේ දරුවෙකුට ශක්තිමත් වාග් මාලාවක් ගොඩනගා ගැනීමට මෙන්ම වචන කතා කිරීමට හැඩගැස්සවීම සඳහා දෙමව්පියන්ගේ නිරන්තර සහයෝගය ලැබිය යුතුය. බහ තෝරන වයසේ සිටින නමුත් හරියාකාරව වචන හැසිරවීම අපහසු දරුවන් බොහෝවිට නිර්මාණය වන්නේ එලෙස දෙමව්පියන් තමන්ගේ වගකීම් සහගත බවින් මිදුණු විටය. ඔවුන්ගේ කාර්යබහුල ජිවිතයේ දරුවන් වෙනුවෙන් වෙන්කිරීමට තරම් ප්‍රමාණවත් කාලයක් නොමැති වීම ප්‍රධාන වශයෙන් මෙම ගැටලුවට හේතුවේ. 

සාමාන්‍යයෙන් දරුවෙකු උපතේ සිට අවුරුදු හතරත් පහත් දක්වා කාලය ඔවුන්ගේ කථන හා භාෂා කුසලතා වර්ධනය සඳහා උයෝගී කරගනියි. එයට දරුවා ජීවත්වන වටපිටාව සහ ඒ හරහා ලැබෙන උත්තේජනයන් මෙන්ම තම දෙමව්පියන් අතර පවතින සම්බන්ධතාවයද ප්‍රධාන වශයෙන් හේතුවේ.

කුඩා දරුවෙකු ඉපදීමටත් පෙර සිටම සන්නිවේදනය වෙනුවෙන් හොඳ සූදානමක් ලබා ගන්නා අතර එය මව ගැබ් ගෙන සති පහළොවක් ගතවන තැන, දරුවාට ශබ්ද ඇසීමට පටන් ගැනීමත් සමග ආරම්භ වේ. එය ආරම්භයේදී මවගේ හද ගැස්ම පමණක් වන අතර කල්යත්ම බාහිරින් අප පවසන දේවල් ද දරුවාට ඇසීමට පටන් ගනියි.

එසේම කලලයට සති විසි පහ සම්පුර්ණවීමත් සමග බාහිරින් කුස මත ලබා දෙන චලන වෙත දරුවාද සංවේදී වෙමින් චලන දැක්වීමට පටන් ගනියි. ඒ අනුව දරුවා කුස තුළ සිටින සමයේ සිටම ඔවුන්ගේ සන්නිවේදන කුසලතා වර්ධනය වෙනුවෙන් අප සැලකිලිමත් විය යුතුය.

සාමාන්‍යයෙන් දරුවන් මෙලොව එලිය දකින මොහොතේ සිට තම හැඟීම් ප්‍රකාශනය සඳහා බොහෝවිට තෝරාගන්නේ හැඩිමයි. උපතේ සිට මාස තුනක් පමණ යනතුරු දරුවන් නිදිමත, බඩගින්න සහ වේදනාව වැනි කරුණු ප්‍රධාන වශයෙන් හැඩිමමගින් සන්නිවේදනය කරයි.

මාස දෙකක් පමණ ගතවන තැන කෙටි ශබ්ද පිට කිරීම අරඹන අතර මව දෙස බලමින් සිනාසීමට ද උත්සහ කරයි. මෙම කාල සීමාව දරුවා සමග නිතර කතා බහ කිරීමට පෙළඹිය යුතු අතර අප පවසන දේවල්වලට වාචිකව නැවත ප්‍රතිචාර දැක්වීමේ හැකියාවක් නැති නමුත් එම කතා බහට ඇහුම්කන් දීම ඉදිරියේදී දරුවාට විවිධ ශබ්ද සෑදීමේ පහසුවක් නිර්මාණය කරදෙයි. එනිසා උපතේ සිට මාස තුනක් දක්වා කාලය තම දරුවා වෙනුවෙන් වැඩි කාලයක් වෙන්කරමින් විවිධ ශබ්ද සාදමින් ඔවුන් සමග  සෙල්ලම් කිරීම අනිවාර්යයෙන් කල යුත්තකි.

මාස තුන සිට හය දක්වා කාලයද දරුවාගේ සන්නිවේදනයන වර්ධනය වෙනුවෙන් අතිශය වැදගත් කාල සීමාවක් වන අතර විවිධ ශබ්දවලට හිස හරවමින් ඒවාට ප්‍රතිචාර ලෙස නැවත ශබ්දයක් පිටකිරීමට දරුවන් මෙම වයසේදී උත්සහ දරයි.

මාස හයත් අවුරුද්දත් අතර කාලය දරුවෙකුගේ බහ තෝරන අවධියේ වැදගත්ම කොටසකි. මෙහිදී ඔවුන් එකම ශබ්දය නැවත නැවත පිටකිරීමට උත්සහ දරන අතර ඔවුන්ට ඇසෙන වචන අනුකරණයට උත්සහ දරයි. තමන්ගේ නමට ප්‍රතිචාර දැක්වීමේ හැකියාවක්ද පවතින අතර මව පිය ලබාදෙන සරල උපදෙස් පිළිපැදීමේ හැකියාවක්ද ඇත.

දරුවෙකුට අවුරුද්දක් සම්පුර්ණ වන තැන අලුත් වචන පැවසීමට පටන් ගැනීමක් සාමාන්‍යයෙන් සිදුවේ. සරල විධානයන්ට ප්‍රතිචාර දැක්වීමට පටන් ගන්නා අතර පවසන යමක් අත දිගුකර පෙන්වීමට උත්සහ ගනියි. මෙම කාලය තුළ තනි වචනයෙන් හෝ වචන දෙක තුනක කුඩා වාක්‍ය වලින් දරුවා සමග කතා බහේ යෙදීම වැදගත්ය.

දරුවා සමග අඩු වේගයෙන් රිද්මයක් සහිතව කතා කිරීම තුලින් ඔවුන්ගේ මොළයේ භාෂා උත්තේජනය වැඩිවීමට හේතුවේ. සාමාන්‍යයෙන් වයස අවුරුදු 2ක් 3ක් පමණ වනවිට දරුවන්ට වචන දහයක් හෝ ඊට වැඩි ප්‍රමාණයක් කතා කිරීමේ හැකියාව පවතියි. එලෙසම වචන කිහිපයක් එකතු කරමින් කෙටි වාක්‍ය සෑදීමට මෙන්ම එපා කියන සියලු දේවල් කිරීමට පෙළඹීම මෙවැනි බහ තෝරන වයසේ දරුවෙකුගේ සාමාන්‍ය සිරිත වේ.

අවුරුදු 3ක් සම්පුර්ණ වන දරුවෙකු බොහෝ විට පැහැදිලිව සම්පුර්ණ වාක්‍ය කතා කරන අතර සරල සිද්ධීන් විස්තර කිරීමේ හැකියාවක්ද පවතියි. වයස අවුරුදු හතරක් පමණ වනවිට දරුවන්ගේ වාග් මාලාවේ වචන 1000ක් පමණ ඇතුලත් වන අතර විධාන තේරම් ගැනීම මෙන්ම ඒවාට නිවැරදිව ප්‍රතිචාර දැක්වීමේ හැකියාවක්ද ඇත.

නිපාත පද, බහු වචන තේරුම් ගැනීම මෙන්ම කොහේද, මොකක්ද, කවදාද වැනි ප්‍රශ්නවලට නිවැරදිව ප්‍රතිචාර දැක්වීමේ හැකියාව සාමාන්‍යයෙන් දරුවෙකුට ලැබෙනුයේ වයස අවුරුදු හතරත් පහත් අතර කාලය තුලය. එනිසා එම කාලය තමන් හා සම වයසේ දරුවන් හා ගැටෙමින් නිර්මාණාත්මක සෙල්ලම් කිරීමට යොමුවන කාල සීමාවක් වන අතර දරුවාගේ වයසට සහ කැමැත්තට ගැලපෙන අයුරේ ක්‍රීඩාවලට ඔවුන් යොමු කිරීමද වැදගත්ය.

කෙසේවෙතත් වයස අවුරුදු පහක් පමණ වනවිට භාෂාව තේරුම් ගැනීම හා වචන භාවිතය සම්බන්ධව දරුවන් තුළ ඉතා හොඳ මට්ටමේ හැකියාවක් පවතින අතර තමන්ගේ සම්පුර්ණ නම, වයස ආදිය පැවසීමේ හැකියාවක්ද ඇත. දරුවාගේ භාෂා කුසලතා තවදුරටත් වර්ධනය කිරීම උදෙසා නිවසේ සහ පෙර පාසලේදී සිදු කරන ක්‍රියාකාරකම් සම්බන්ධව කතා බහ කිරීම සහ ඒ හරහා දරුවාට කතාන්දර ගොඩනැගීමට අවස්ථාව සලසාදීම සිදුකල යුතුය.

සාමාන්‍යයෙන් වයස අවුරුදු හයක් පමණ වනවිට දරුවෙකු තමන්ට එදිනෙදා අසන්නට දකින්නට ලැබෙන දේවල් මත තම වාග් මාලාව සහ භාෂා රටාව වැඩිදියුණු කරගැනීමට උත්සහ දරණ අතර වැඩිහිටියන් කතා කරන භාෂා රටාවටම සමානව භාෂාව භාවිතා කිරීමට හැකියාව ලබා ගනියි.

මේ අනුව බහ තෝරන වයසේ ඔබේ දරුවාට ඒ වෙනුවෙන් දෙමව්පියන්ගේ නිරන්තර සහයෝගය ලබා දීම වැදගත්වන අතර එය ශක්තිමත් වාග් මාලාවක් මෙන්ම සාර්ථක භාෂා භාවිතයක් ගොඩනගා ගැනීමට උදව් වේ. එලෙසම අදාළ වයස් මට්ටම්වලදී පෙන්විය යුතු කුසලතාවයන් ඔබේ දරුවා නොපෙන්වන අවස්ථාවක් වේ නම් ඒ පිලිබඳ සැලකිලිමත් වීම දෙමව්පියන්ගේ වගකීමක් වන අතර වාග් ව්‍යාධිවේදීවරයෙකු හමුවී උපදෙස් ලබා ගැනීමට කටයුතු කල යුතුය.                 

මෙම ලිපිය සැකසීමේදී සිය දැනුම නොමසුරුව ලබා දෙමින් කතන හා භාෂා ව්‍යාධිවේදී නිමීර චතුරංග වීරරත්න මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post බහ තෝරන දරුවෙකු සිටින ඔබට ඇති වගකීම හඳුනාගන්න appeared first on familylife.

කිව්වත් වගේ පුංචි පැටියෙක් කියන්නේ ගෙදරකට වාසනාවක්. ඉතිං සැමියාගේ උපරිම සහයෝගයත් එක්ක බිරිඳ මේ වෙනුවෙන් සුදානම් වෙන්න ඕනේ. ඒ කියන්නේ කාන්තාවක් අම්මා කෙනෙක් වෙන්න ශාරීරිකවත් මානසිකවත් සැරසෙන්න ඕනේ. ඒ වගේම ඔබ දෙපල ආර්ථික පැත්තෙනුත් සූදානම් වෙනවා නම් හොඳයි.

මුලින්ම කිව්වොත් කාන්තාවක් වයස අවුරුදු 21 – 35 අතර නම් ඔන්න දරු පැටියෙක් හදන්න හොඳම වයස කියලයි වෛද්‍යවරු කියන්නේ. ඒත් ඔබ වයස 35ට වැඩි කෙනෙක් නම් ඒ ගැන දුක් වෙන්න එපා, ඔබට දරුවෙකු පිළිසිඳ ගැනීමේ හැකියාව තියෙනවා. අපි මෙතන කිව්වේ වඩාත් සුදුසුම වයස් සීමාව ගැන. මොකද මේ වයස් පරාසය ඇතුලේ සංකුලතාවයන් ඇති වීමේ ප්‍රවනතාවය අවම නිසා. ඒ වගේම අවුරුදු 21 – 35 අතර කාන්තාවකට දරු පිළිසිඳ ගැනීමක් වෙනුවෙන් වෛද්‍ය උපදෙස්වලට යොමු වෙන්න අවුරුද්දක කාලයක් උත්සාහ කරන්න පුළුවන් වුනත් වයස 35ට වැඩි කාන්තාවකට උත්සාහ කිරීමට ලබාදෙන කාලය මාස හයක් කියලා තමයි වෛද්‍යවරු කියන්නේ.

විවාහ වුණු ගමන් දරුවෙක් හදනවා හෝ ටික කාලෙකට දරුවෙක් ලැබීම ප්‍රමාද කරනවා වුනත් මේ කාරණා දෙකේදීම අපි මේ කියන්න යන හැම කරුණක්ම ඔබට වැදගත් වේවි. අන්න ඒ නිසයි විවාහයෙන් පසු හැකි ඉක්මනින් ඔබ ප්‍රදේශයේ පවුල් සෞඛ්‍ය සේවා නිලධාරිනිය හමු වී ලියාපදිංචි විය යුත්තේ. ඒ ලියාපදිංචි වීමත් එක්ක ඔබව නව දිවි සුව සත්කාරක වැඩ සටහනට යොමු කෙරෙන නිසා ඒ හරහා  බොහෝ වැදගත් කරුණු කාරණා වගේම උපදෙසුත් ලැබෙනවා. 

එහිදී,

• ගැබ් ගැනීමට මාස තුනකට පෙර සිටම ෆෝලික් ඇසිඩ් විටමිනය ලබාගැනීම

• ශරීරයේ බර (BMI අගය) නියමිත අගයේ පවත්වා ගැනීමට උපදෙස් ලබාදීම

• මානසික සුවතාවය පවත්වා ගැනීම පිළිබඳව උපදෙස් ලබාදීම

• පූර්ව ගර්භණි සායන මගින් රුබෙල්ලා ලබා නොගත් අයට එන්නත ලබාදීම (දරු පිළිසිඳ ගැනීමකට මාස තුනකට පෙර)

• මුඛ සෞඛ්‍ය පරික්ෂාව සඳහා සායනවලට යොමු කිරීම

• දියවැඩියාව, අධි රුධිර පීඩනය, අධි බර, රූමැටික හෝ සංජානනීය හෘදයාබාධ, වකුගඩු හා සම්බන්ධ රෝග හා අපස්මාරය වැනි රෝග යන හඳුනා නොගත් රෝග හඳුනා ප්‍රතිකාර වෙත ඔබව යොමු කිරීම

• ජානමය සංකූලතා පරීක්‍ෂණවලට යොමු විය යුතු කාන්තාවන් ඒ සඳහා යොමු කිරීම

යන කාරණා වලට වෛද්‍යවරුන් විසින් පියවර ගනු ලබනවා.

මෙතැනදී වැදගත් වෙන තවත් කාරණයක් කිව්වොත්, අපි අතරේ ඇතැම් කාන්තාවන් ඉන්නවා ගැබ් ගැනීමට නුසුදුසු තත්ත්වයේ සිටින. සමහර විට අධි රුධිර පීඩනය, දියවැඩියාව නිසා වෙන්න පුළුවන්. එහෙමත් නැත්නම් වෙනත් රෝග තත්ත්වයක් නිසා වෙන්නත් පුළුවන්. අන්න ඒ නිසාත් මේ සායනයක ලියාපදිංචි වෙලා දැනුවත් වීම වගේම පරීක්ෂණවලට යොමු වීමත් බොහොම වටිනවා. මොකද දරුවෙක් පිළිසිඳ ගන්න නුසුදුසු තත්ත්වයේ කාන්තාවකට ඒ තත්ත්වය පාලනය වෙලා පිළිසිඳ ගැනීමකට සුදුසු තත්ත්වයට පත් වෙනතුරු අවශ්‍ය උපත් පාලන ක්‍රම ගැනත් මේ සායන හරහා දැනුවත් කිරීම සිදු කෙරෙනවා. ඒ වගේම පිළිසිඳ ගැනීමකට සුදුසු තත්ත්වයේ සිටින කාන්තාවකට වුනත් දරුවෙක් ප්‍රමාද කරන්න අවශ්‍ය නම් ඒ සඳහා සුදුසු උපත් පාලන ක්‍රම ගැන දැනුවත් කිරීමත් මෙහිදී සිදු වෙනවා.

මෙන්න මේ කරුණු නිසාම දරුවෙක් ගැන හීන දකින ඔබත් සායනයේ ලියාපදිංචි වීම හරිම වැදගත්. ඔබ පෞද්ගලික අංශයේ ප්‍රසූතියට සැලසුම් කලත් මෙම සායනයක් තුළින් ඔබට ලැබෙන දැනුම හැම මොහොතකම ඔබට වැදගත් වේවි. අන්න ඒ නිසා පෞද්ගලික අංශයට යොමු වුනත් ගමේ ක්ලිනික් එක අතපසු කරගන්න එපා.

ඉතිං අපේ රටේ මව්වරුන් වෙනුවෙන් වූ සෞඛ්‍ය සේවාව ගත්තොත් ඇත්තටම ලොකු වටිනාකමක් තියෙනවා. සායනයක් හරහා කාන්තාවකට සැලසෙන සේවාවන් ගැන හිතද්දී ඒ දේ ඔබටත් වැටහේවි. ඔබත් දරුවෙක් ගැන හීන දකිනවා නම් මුලින්ම කරන්න ඕනේ මොකද්ද කියලා දැන් තේරෙනවා නේද? අපි ඊලග ලිපියෙන් ඔබ ගැබ් ගෙන ඇති බව ගෙදරදීම දැනගන්න පුළුවන් පුංචි පරීක්ෂණය ගැන කතා කරමු.

මෙම ලිපිය සම්පාදනය කිරීමේදී කරාපිටිය ශික්ෂණ රෝහලේ වෛද්‍ය නිළධාරී W.K මහේෂ් මහතා දැක්වූ සහයෝගය වෙනුවෙන් විශේෂ ස්තුතිය හිමිවේ.

මවු සිහිනය ( ගර්භණි සමය ) ගැන තවත් ලිපි කියවන්න

තවත් ලිපි කියවන්න මුල් පිටුවට පිවිසෙන්න

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post අලුත යුග දිවියට එළැඹි ඔබත් දරුවෙක් ගැන හීන දකිනවද? appeared first on familylife.