කොරෝනා වෛරසයක් යනු කුමක්ද?

කොරෝනා වෛරසයක් වශයෙන් හඳුන්වනු ලබන්නේ සුවිශේෂ වශයෙන් මිනිසාගේ ශ්වසන පද්ධතිය වෙත බලපෑම් ඇති කරන තනි දාමයක් සහිත RNA ( RiboNucleic Acid) වෛරස් තත්ත්වයකි. මෙම කොරෝනා වෛරස් බහුලව දක්නට ලැබෙන්නේ වවුලන් අතරය.මේ වන විට හඳුනාගත් කොරෝනා වෛරස විශේෂ රාශියක් වවුලන් අතර සුලභව දක්නට ලැබෙන අතර නව කොරෝනා වෛරසයද වවුලන් මගින් මිනිසුන්ට සම්ප්‍රේෂණය වී ඇති බව මේ වන විට අනුමාන කරයි.

මීට පෙර ආසන්නතම කොරෝනා වෛරස් උවදුර ලෙස පැතිර ගිය මර්ස් (Middle East respiratory syndrome – MERS) වෛරස් තත්ත්වයද වවුලන් හරහා ඔටුවන්ටද, ඔටුවන් මගින් මිනිසුන්ටද සමිප්‍රේෂණය වී ඇති බව සොයාගෙන ඇත. මේ වෛරස් තත්ත්වයන්ට කොරෝනා නමින් නම් ලැබීමට ප්‍රධාන හේතුව වෛරස් ස්වභාවය දැකගත හැකි ඉලෙක්ට්‍රොනික් අන්වීක්‍ෂයන් තුලදී මෙය ඔටුන්නක හැඩය ගැනීමයි. 

කොරෝනා වෛරස් අලුත් දෙයක්ද?

නැත. කාලානුරූපව ඉතිහාසයේ පටන් කොරෝනා වෛරස් තත්ත්වයන්ට මිනිස් සංහතිය මුහුණ දී ඇති අතර පරිණාමයත් සමගම දැන් ප්‍රධාන කොරෝනා වෛරස් වර්ග හතරක් මිනිස් ශරීරය තුලද පවතින බව විද්‍යාඥයින් සොයාගෙන තිබෙනවා. ඒවා නම්

• HCoV-HKUI
• HCoV-OC43
• HCoV-NL 63
• HCoV-229E

වන අතර මෙම වෛරස මගින් සෙම්ප්‍රතිශ්‍යාව වැනි සුළු රෝගී තත්ත්වයන් පමණක් ඇති කරනු ලබයි. මෙම කොරොනා වෛරස් තත්ත්වයන් හඳුනාගැනීම සඳහා ශ්‍රේෂ්ඨ ශ්‍රී ලාංකික විද්‍යාඥයෙක් වන මහාචාර්ය ජෝසප් ශ්‍රියාල් මලික් පීර්ස් මහතා දක්වා ඇති ඉමහත් දායකත්වය පිළිබඳවද මතක් කළ යුතු වනවා. 

මීට අමතරව ලෝකයේ මිනිස් සංහතියට ඉතා දරුණු බලපෑමක් එල්ල කරන ලද 2002 – 2003 වසර වල මිනිසුන් 650කට අධික පිරිසකට මරු කැඳවමින් චීනය හා හොංකොං ආශ්‍රීතව පැතිර ගිය සාස් (Severe Acute Respiratory Syndrome – SARS) සහ 2012 – 2015 අතර කාලයේ රෝගීන් 800 ක් පමණ මරණයට පත් කරමින් සවුදි අරාබියේ ද පසුව මැද පෙරදිග, අප්‍රිකාව, ආසියාව සහ යුරෝපයේ වෙනත් රටවල ද පැතිර ගිය මර්ස් (Middle East Respiratory Syndrome – MERS) වෛරස් තත්ත්වයන් දෙක මෑත කාලයේ ඇතිවූ දරුණු කොරෝනා වෛරස් උවදුරු දෙක ලෙස හඳුන්වන්නට පුළුවන්. 

රෝගය මිනිසුන් අතර පැතිරෙන්නේ කෙසේද?

මෙම වෛරසය ප්‍රධාන වශයෙන් පැතිර යන්නේ බිඳිති වශයෙන් ආසාදිතයන්ගෙන් පිටවන සෙම, කෙල, කිවිසුම් යැවීමේදී පිටවන සොටු යන මාර්ග වලිනි. යමෙකු කිවිසුම් යවන විට, කහින විට, මෙන්ම මෙම ශ්‍රාවයන් ස්පර්ශ කර වෙනත් ස්ථාන ඇල්ලීම, වැනි ක්‍රියා මගින් මෙම වෛරසය පැතිරේ.

ඔබට කැස්සක් හෝ කිවිසුමක් ඇති වන්නේ ශරීරයට අනවශ්‍ය යමක් පිටකිරීම වෙනුවෙන් වුවද මෙම වෛරසය ඒ පිටවන දේ වාහකයන් ලෙසින් යොදාගෙන පැතිරීම සිදු කරයි. ඒ අනුව වෛරසය ඇතුල් වීම,

ඝෘජුවම – ශ්වසන බිඳිති හරහා

වක්‍රව – ආසාදිත දෑ ඇල්ලීමෙන් පසුව නාසය, මුඛය ස්පර්ශ කළ විට (ස්පර්ශය හරහා) සිදුවේ.

නව කොරෝනා වෛරසය ආසාදිතයෙකුගේ රෝග ලක්‍ෂණ මොනවාද?

• ඇඟපතෙහි ඇතිවන කැක්කුම
• හොටු ගැලීම ඇතුළු සුළු සෙම්ප්‍රතිශ්‍යා තත්ත්වයන්
• කැස්ස සහ උගුරේ ආමාරුව
• උණ ගතිය (මෙහිදී සමහරුන්ට තද උණ හටගන්නා නමුත් සමහරෙකුට සාමාන්‍ය උණ ගතියක් වුවු ද පැවතිය හැක.)
• දරුණු නිවුමෝනියා තත්ත්වයද ඇතිවිය හැකිය

මෙහිදී ප්‍රධාන ආසාදිත කාන්ඩ දෙකක් හඳුනාගත හැක.

• රෝගයේ මූලික අවස්ථාවේදීම රෝග ලක්‍ෂණ පෙන්නුම් කරන රෝගීන්
• රෝගය ආසාදිත මුත් රෝග ලක්‍ෂණ පෙන්නුම් නොකරන රෝගීන් 

වෛරසයෙන් ආරක්‍ෂාව වීම සඳහා ගත හැකි ක්‍රියාමාර්ග මොනවාද?

කොරෝනා වෛරසය සඳහා සාමාන්‍ය සෙම්ප්‍රතිශ්‍යාවකට ප්‍රතිකාර කරන ආකාරයට අමතරව විශේෂ කිසිදු සාර්ථක ඖෂධයක් මේ වන තෙක් සොයාගෙන නොමැත. එබැවින් වෛරසය ආසාදනය වීම වළවක්වා ගැනීමට කටයුතු කිරීම ඉතා වැදගත් වේ. මේ සඳහා ප්‍රධාන වශයෙන් සිදුකළ යුතු වන්නේ එදිනෙදා යහ පැවැත්ම රැක ගැනීමයි.

• කහින විට හෝ කිවිසුම් යවන විට නිතර ලේන්සුවක් භාවිතා කරන්න. ලේන්සුවක් ළඟ නැත්නම් අතෙහි වැලිමිට මුවට තබා කිවිසුම් පිටකිරීම සිදුකරන්න

• හැකි සෑම විටම හොඳින් සබන් හෝ විෂබීජ නාශක භාවිතයෙන් අත් සෝදන්න 

මෙම කාරනය ඉතාමත් වැදගත් වේ. විශේෂයෙන් නිසිපරිදි විෂබීජ නොරැදෙන්නට අත් සේදීමට බොහෝ දෙනා නොදනිති. හොඳින් සබන් හෝ විෂබීජ නාශක දියරයක් යොදා අතෙහි අත්ල මෙන්ම ඇඟිලි අතර මෙන්ම පිටි අල්ලද සේදිය යුතුය. සමහරුන් ඉතා ඉක්මනින් අත් සේදීමෙන් විෂබීජ ඉවත් වීම සිදු නොවේ. මේ නිසා කිහිප විටක් ඒ ගැන සැලකිල්ලෙන් අවම වශයෙන් තප්පර 40ක් හෝ 60ක් අතර කාලයක් හොඳින් අත් සේදිය යුතුය. විශේෂයෙන් පාසැල් යන ඔබේ දුවාදරුවන් මේ පිළිබඳව දැනුවත් කරන්න. 

• නිතර නාසය ඇල්ලීම, තැන තැන කෙළ ගැසීම ආදිය නොකරන්න

• මෙම වෛරසය ආසාදනය වූවන්ට ඇතිවන කුමන හෝ රෝග ලක්‍ෂණ පවතින්නේ නම් ඉක්මනින් වෛද්‍යවරයෙකු වෙත යොමුවන්න.

• ඔබට වෛරසය වැළඳී ඇති බවට තහවුරු වුවහොත් ජනාධික ප්‍රදේශ වල ගැවසීමෙන් වැලකී අන් පුද්ගලයන්ගේ ආරක්‍ෂාව වෙනුවෙන් ඔවුන්ගෙන් ඈත්වී අවශ්‍ය ප්‍රතිකාර සඳහා අදාල සෞඛ්‍ය අංශ වෙත යොමුවන්න.

මේ වන විට ශ්‍රී ලාංකිකයන් දෙදෙනෙක් අසාදනයට ලක් වීමත් සමග රට තුළ නොසන්සුන් තත්ත්වයක් හටගෙන තිබෙනවා. නමුත් නිකරුනේ කලබල වී අනවශ්‍ය බියක් ඇතිකර නොගත යුතුය. විමසිල්ලෙන් මෙන්ම පුරවැසියන් ලෙස මනා සෞඛ්‍ය පුරුදු අනුගමනය කරමින් තමාගේ මෙන්ම අනොකාගේ සෞඛ්‍යටද හානි නොපැමිණෙන ලෙස වගකීමෙන් කටයුතු කිරීම මෙවැනි උවදුරු අවස්ථාවක අප සැමගේ වගකීමයි. 

මෙම ලිපිය සැකසීමේදී සිය දැනුම නොමසුරුව ලබා දෙමින් අනුරාධපුර ශික්ෂණ රෝහලේ වෛරස වේදය පිළිබඳ විශේෂඥ වෛද්‍ය සාරංග සුමතිපාල මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

අවධානමට පෙර සූදානම සඳහා පහත මාධ්‍ය ඔස්සේ හැකිතාක් ෂෙයාකරන්න.

The post කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න appeared first on familylife.

මේ වන විට ලොව විවිධ රටවලින් මෙම රෝගීන් වාර්ථා වී ඇති අතර විදේශ මාධ්‍ය වාර්තා කරන අන්දමට දකුණු කොරියාව, හොංකොං, තායිවානය, තායිලන්ත, ජපානය වැනි චීනය ආශ්‍රීත රටවල් මෙන්ම ඇමරිකාවේ වොෂින්ටන් නගරයෙනුත් රෝගීන් වාර්ථා වී තිබෙනවා.
විශේෂයෙන් සාස් (Severe Acute Respiratory Syndrome – SARS), හා මර්ස් (Middle East respiratory syndrome – MERS) මෙන්ම පහසුවෙන් මිනිසෙකුගේ ශ්වසන පද්ධතියට හානි කළ හැකි මෙම වෛරසය මිනිසෙකුගෙන් මිනිසෙකුට පහසුවෙන් පැතිර යාමේ හැකියාව පවතිනවා.

මේ පිළිබඳ familylife.lk සම්පත් දායකයෙකු වන වෛද්‍ය හසින්ද උඩලගම මහතා සිය facebook පිටුවේ පළ කළ අදහසක් ඔහුගේ අවසරය ඇතිව අප පහතින් පළ කරන්නේ මේ පිළිබඳව ඉක්මනින් ඔබව දැනුවත් කිරීමට ඇති අවශ්‍යතාවය සලකා බලා. චීන වෛරසය නැතහොත් වූහැන් වෛරසය පිළිබඳ සවිස්තර ලිපියක් නුදුරේදීම ඔබ වෙත ගෙන ඒමට අප බලාපොරොත්තු වනවා.

වෛද්‍ය හසින්ද උඩලගම විසින් පළකළ සටහන –

චීන වෛරසය ගැන නිව්ස් ගොඩක් අය ශෙයාකරගෙන තියනව දැක්කා. ඒ සම්බන්ධව ලංකාවෙ තත්වය ගැන තවම හරියට දන්නෙ නෑ. තාම එහෙම ඒ වර්ගයේ වයිරස් සහිත ලෙඩ්ඩු නම් වාර්තා වෙලා නෑ. ඇඟේ හැප්පෙන ගානට දැන් චීන්නු ඉන්න නිසා අවදානමක් නෑමයි කියන්න බෑ.

එහෙම ලෙඩක් ආවත් ඉතින් කරන්න කියල විශේෂ දෙයක් නෑ. පැතිරෙන එක වලක්වන්න ක්‍රියාමාර්ග ගන්නයිතියෙන්නෙ. මේකත් ස්වසන මාර්ගය ආශ්‍රිත ලෙඩක්. ඒ නිසා වැඩිපුරම බෝවෙන්නෙ “බිඳිති” මාර්ගයෙන්. බිඳිති කියන්නෙ කෙල, සොටු, සෙම වගේ ස්වසන මාර්ගයෙන් නිපදවෙන දේවල්. මේ නිසා වෙනදා සාර්ස්, ඉන්ෆ්ලුවෙන්සා වගේ ලෙඩ වලදි කරපු ටිකම තමා කරන්න තියෙන්නෙ. නමුත් අපේ රටේ මිනිස්සු නොකරන එකම දේත් ඒක. මෙහෙම මොකක් හරි ලෙඩක් ගැන ආරංචියක් ආවම ගොඩක් අය කරන්නෙ පලවෙනි කිවිසුම ගියපු ගමන් ඩොක්ටර් කෙනෙක් ගාවට යන එක. ඒකෙ වැරැද්දක් කියන්නෙ නෑ. නමුත් ඒ අතරෙ වැදගත්ම කොටස ගොඩක් අය අතින් කෙරෙන්නෙ නෑ. ඒ කොටස තියෙන්නෙ ලෙඩාගෙ අතේ.

මෙහෙම මරණීය ලෙඩක් පැතිරෙන්න ඕනෙම නෑ. තමන්ට සෙම සෙම්ප්‍රතිශ්‍යා අසනීප තත්වයක් තියනව නම් අනේ අනිත් අයට බෝ නොකර ඉන්න බලන්න. මම දැකල තියනවා ගොඩක් අය ලේන්සු පාවිච්චි කරන්නෙ නෑ. “හා…ච්චෝ..!” ගාලා මුළු පලාතම හෙල්ලිලා යන්න තමා කිවිසුම් අරින්නෙ. අහල පහල ගෙවල් වල මිනිස්සුත් දන්නවා මේ මනුස්සයට හෙම්බිරිස්සාව හැදිලා කියලා. එච්චරට සද්දෙ. සද්දෙ වැඩියි කියන්නෙ “බිඳිති” පැතිරෙනවා වැඩියි. ඇත්තටම බිඳිති නෙමේ පැතිරෙන්නෙ සෙම බෝල බෝල.

කැස්ස නම් හෙම්බිරිස්සාව නම් ලේන්සුවක් පාවිච්චි කරන්න. හදිසියට ලේන්සුවක් නැත්නම් අතේ වැලමිටෙන් උඩ කොටසෙන් ආවරණය කරන්න. අත පාවිච්චි කරන්න එපා කියන්නෙ අතේ ගෑවෙන වයිරස් ඔයා අල්ලන අල්ලන තැන් වල තැවරෙන නිසා. ඒ තැන් අල්ලන අනිත් අයටත් ඒවා බෝවෙන්න පුලුවන්. හෙම්බා තියනවා නම් පුරුද්දක් විදියට නිතර නිතර අත සෝදන්න. මොකද ඔයා නොදැනුවත්ව කොහොමත් නහය අවට අල්ලන නිසා අත්වල විෂබීජ තියනවා. අසනීපයක් නැතත් මගතොටේ – බස්වල, පොලේ, කඩේ ගිහින් ආවම අත සෝදන එක පුරුද්දක් කරගන්න. දැන් කොහොමත් එක එක වයිරස් වැඩි නිසා නිකම් ලෙඩ වෙන එක අඩු කරගන්න ඒක උදව් වෙයි. පොඩි අයටත් මේවා පුරුදු කරන්න. පුලුවන් නම් හෙම්බා එක්ක ජොබ් එකට යද්දි මාස්ක් පාවිච්චි කරන්න.

මේ වගේ වසංගතයක් පැතිරෙනකොට සෙනග අතරෙ ගැවසෙන එක අඩු කරන්න ඕනෙ. මේ චීන වෛරසය වැඩිපුරම පැතිරිලා තියෙන්නෙ වෙලඳ සැල් හරහා. ෂොපින් කරන්න ගියාම රෝගීන් සහ නිරෝගී අය මුහු වෙනවා. චීනයෙ කට්ටිය මේ අවුරුද්දෙ මුල ලක්ෂ ගණනින් පිටරටවල් වල සංචාරය කරන්න නියමිතයි. මේ එයාගෙ නිවාඩු කාලයක්. ඒ නිසා තමා මේකෙ අවදානම වැඩි. ලංකාවටත් සෑහෙන පිරිසක් ඒවි. ලංකාවෙ පලවෙනි ලෙඩා වාර්තාවුණ දවසෙ ඉඳලා ශොපින් මෝල් වගේ විදේශිකයො වැඩිපුර ඉන්න තැන් වලට යන එක අඩු කරන්න වෙයි.

අනිත් කාරණය ඉතින් අහිංසක අපි (සෞඛ්‍ය සේවයේ අය) ගැනත් ඩිංගක් හිතන්න. ඇත්තටම කැස්ස තියනවා කියල කටින් කිව්වම ඇති. කැහැලා පෙන්වන්න ඕනෙ නෑ. කැහැලා පෙන්වන්නම ඕනෙ කියල හිතෙනවා නම් ලේන්සුවක් තියල කහින්න. අපි මාස්ක් දාගෙන ඉන්න එක ගැන මොනවත් හිතන්න එපා. වසංගතයක් ආවම ඒකෙන් ගොඩක්ම බැට කන කට්ටියක් තමා අපි. දොස්තරලා නර්ස්ලා ලෙඩ වෙලා නිවාඩු අරන් හොස්පිටල් එක අඩු ස්ටාෆ් එකකින් අමාරුවෙන් දුවලා රෝගී සත්කාරය ගැටළුවක් වෙනවට වඩා ස්ටාෆ් එක පරිස්සම් කරන එක වටිනවා. අපි මාස්ක් එකක් දාගෙන ඉන්න එක ගැනත් මොනවත් හිතන්න එපා. දෙගොල්ලන්ගෙම ආරක්ෂාවට තමා එහෙම මාස්ක් දාගෙන ඉන්නෙ. නැතුව ලෙඩ්ඩු ගැන අප්‍රියාවකට නෙමේ.

තමන්ගෙ ස්වසන – සනීපාරක්ෂාව ගැන මීට වඩා ටිකක් කල්පනා කරන්න. ගෝලීය උෂ්ණත්වය ඉහල යාමත් එක්ක ලොකු පොඩි වයිරස් ගොඩයි දැන්. ගොඩක් ඒවා ස්වසන මාර්ගය ආශ්‍රිත ඒවා. අවුරුද්දකට සැරයක් අලුත් වයිරස් එකක් අනිවාර්යයෙන් ජාත්‍යන්තර මට්ටමෙන් ව්‍යාප්ත වෙනවා. ලංකාවෙත් අවුරුද්දකට සැරයක් දැන් ඉන්ෆ්ලුවෙන්සා වසංගතයක් යනවාමයි. ඉතින් කෝකටත් කියල ඒ පැත්තෙ සනීපාරක්ෂාව ප්‍රැක්ටිස් කරන්න පටන් ගන්න.

මෙම ලිපියේ සවිස්තර ලිපිය පළ කර ඇත. ඒ සඳහා පිවිසීමට පහත මාතෘකාව ක්ලික්/ටැප් කරන්න

කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න

අවධානමට පෙර සූදානම සඳහා හැකිතාක් ෂෙයාකරන්න.

The post චීන වෛරසය ලංකාවට එන්න කලින් ඒ ගැන දැනුවත් වෙන්න… appeared first on familylife.

කෑම පාලනය කියන්නෙ වසරක් ගෙවිල තවත් වසරක් උදාවෙන කොට බොහෝ දෙනෙක් තමන්ටම වෙන පොරොන්දුවක්. ඒත් හැමදාම වුනා වගේ සති දෙක තුනත් යනකොට මේ පොරොන්දුව අමතක කරල දාන්න බොහෝ දෙනෙකුට සිද්ද වෙනව.

කෑම පාලනය නැත්නම් ආහාර සීමා සහිතව ගැනීම මේ තරම් අමාරු රාජකාරියක් වෙලා තියෙන්නෙ කාලයත් එක්ක අපේ ආහාර රටාව ශරීරයට පුරුදු වෙලා තිබීමයි. මානසිකව අපි ආහාර වැඩියෙන් ලබාගැනීමට පුරුදු වෙලා තිබෙනවා. එම නිසා මෙම පුරුද්ද ආපසු හරවන්න දැවැන්ත ස්වයං විනයක්, පාලනයක් අපිට අවශ්‍යය වෙනව. අතලොස්සකට මේ දේ කරන්න හැකි වුනත් ප්‍රායෝගිකව බොහෝ දෙනා මෙහිදී අසමත් වෙනව. අද familylife.lk අපි කතා කරන්න යන්නෙ මේ පුරුද්ද පාලනය කරගන්න අපිට ගන්න පුළුවන්, ලෝකයේ බොහෝ දෙනා අනුගමනය කරල ප්‍රථිපළ සාක්ෂාත් කර ගත්ත සරල ක්‍රම කීපයක් ගැනයි.

කෑම ගැනීමේදී ආහාර හපමින් එයට සවන් දෙන්න

තමන් කෑම ගන්නා අතර එයට සවන් දෙමින් ආහාර ගන්නා පුද්ගලයන් සාපේක්‍ෂව අඩුවෙන් ආහාර ගන්නා බව සමීක්ෂන මගින් හෙලිවී තිබෙනවා. මෙම සමීක්‍ෂණයේදී හෙඩ් ෆෝන් පැළඳ වැඩි ඝෝෂාවක් සහිත සංගීතයට සවන් දෙන්නන් වැඩි ආහාර ප්‍රමානයක් ලබා ගන්නා බව හෙළි වී තිබෙනවා. තමන් ආහාර ගන්නා බවත් ඒ වෙනුවෙන් අවධානය යොමු කරමින් ආහාර ගැනීමේදී ලබගන්නා ආහාර ප්‍රමාණයේ අඩු වීමක් වාර්ථා වනවා.

නිතර දියර වර්ග පානය කරන්න

නිතර ජලය හෝ වෙනත් දියර වර්ග පානය කිරීමෙන් නිතර නිතර අමතර ආහාර ගැනීම වලක්වා ගත හැකියි. ඒ ඔබේ උදරය දියර වලින් පිරීයාම නිසා පමණක් නොවේ. අපගේ මොළයට බඩගින්න හා පිපාසය වෙන වෙනම හඳුනා ගැනීමට යම් අපහසුවක් තිබෙන බව පර්යේෂණ වලින් හෙලි වී තිබෙනවා. ඒ නිසා දියර පානයෙන් මොළය යම් කාල පරාසයකට රවටා තබා ගැනීමට හැකි බව පර්යේෂකයන් පවසනවා.

උදෑසන ආහාරය සැමදා එකම ප්‍රමාණයකින් ලබා ගන්න

අද උදේට නම් හරියට කෑවෙ නෑ. ඒ හින්ද දවල්ට හොඳට කන්න ඕනෙ කියල සමහර දවස් වලට ඔබටත් හිතිල ඇති. කෑම පාලනය කරන්න හිතන අයට මෙය එතරම් හොඳ සිතුවිල්ලක් නම් නොවෙයි. සෑම දිනකදීම උදේ ආහාරයේ ප්‍රමාණය සම මට්ටමක පවත්වා ගැනීමට සිතා ගන්න. එවිට දවසේ ඉතිරි කෑම වේල් සඳහා ගත යුතු ප්‍රමාණයද සමාන වෙනවා. එම වේලකට වැඩියෙන් ආහාර ගැනීමේ අවශ්‍යතාවයක් ඇතිවෙන්නෙ නෑ.

ආහාර ගැනීමේදී කුඩා කටවල් (ප්‍රමාණයන්) ආහාරයට ගන්න

විශේෂයෙන් බත් ආහාරයට ගැනීමේදී කුඩා ප්‍රමාණයේ බත් කටවල් ආහාරයට ගන්න. පසුව එය හොඳින් හපන්න. වැඩි කාලයක් මුවේ රඳවා හොඳින් හපා ගිලින්න. මෙමගින් ලබාගන්නා සමස්ථ ආහාර ප්‍රමාණය අඩුවෙන බව පර්යේෂකයන් විසින් අනාවරණය කරගෙන තිබෙනවා. අනෙක් කාරනය නම් එය හොඳින් ආහාර රසවිඳින්නත් හොඳ ක්‍රමයක්.

දිනකට වතාවක් වත් ප්‍රෝටීන් බහුල ශාඛාහාර ගන්න

ප්‍රෝටීන් බහුල ධාන්‍ය වර්ග, ඇට සහිත එළවළු වර්ග දිනකට එක්වතාවක් ආහාරයට ගැනීමෙන් ශරීරයට අවශ්‍ය ප්‍රෝටීන් ප්‍රමාණය මෙන්ම තන්තු සාරවත් ආහාර වේලක් ලබා ගන්න පුළුවන්. එමගින් දිගු වේලාවක් යළිත් කුසගින්න ඇති වීම නතර වෙනවා. එමගින් අවම ආහාර වේල් ප්‍රමාණයක් දිනකට ලබා ගැනීමට ඔබට මග පෑදෙනවා.

සරල ආහාර තෝරාගන්න

විශේෂයෙන් විවිධ ටොපින්ස් හා වෙනත් අමතර ද්‍රව්‍ය යොදා හැඩගන්වන ආහාර ලබා ගැනීමෙන් ප්‍රධාන ආහාරයට අමතරව මෙම අනෙකුත් අමතර දේවල්ද ඔබේ ආහාර වේලට එකතු වෙනවා. මෙමගින් ප්‍රමාණය වැඩි වනවා පමණක් නොව අනවශ්‍ය කැලරි ප්‍රමාණයක් නොදැනුවත්වම ඔබ ලබාගන්නවා. එම නිසා ආහාර වේල ඉතා සරලව සකසා ගැනීම ඉතා වැදගත්.

හොඳ සිහියෙන් යුතුව ආහාර ගන්න

බොහෝ විට අපි ආහාර ගන්නෙ කුසගින්න නිවා දැමීම සඳහා පමණක් නොවේ. තමනට ඇතිවන පාළුව, කාන්සිය, තෙහෙට්ටුව, සාංකාව මෙන්ම අධික සතුටකදීත් අපි විවිධ වර්ගයේ ආහාර සඳහා යොමු වෙනවා. විශේෂයන් පැණිරසැති ආහාර මින් ප්‍රධානයි. මෙවැනි අවස්ථා වල මම ඇත්තටම ආහාර ගන්නෙ කුසගිනි නිසාද යන කාරනය තමන්ගෙන්ම විමසා එය අනෙක් ප්‍රධාන වේල දක්වා කල් දමා ගැනීමට සිහියෙන් කටයුතු කළ හැකිනම් ඔබ ගන්නා ආහාර ප්‍රමාණය සැලකිය යුතු ප්‍රමාණයකින් පහළ දමා ගන්නට ඔබට හැකියාව ලැබෙනවා.
එමෙන්ම ආහාර ගැනීමේදී ඩිජිටල් තිර භාවිතය (mobile phone, Tab, TV), පොත් පත් කියවීම ආදිය නොකොට ඒ සඳහාම අවධානය යොමු කිරීම මගින් අවම ආහාර ප්‍රමාණයක් ලබාගැනීමට ඔබට හැකිවනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කෑම පාලනය කරන්න හිතන අය දැනගත යුතුම දේවල්… appeared first on familylife.

• මෙම ප්‍රමාණය 8 දෙනෙකුට සෑහේ.
• Calories – 542kcal
• Fat – 39.3g
• Carbohydrates – 29.7g
• Protein – 18.4g
• Cholesterol – 60mg
• Sodium – 66mg

කේරළ චිකන් කරිය සඳහා අවශ්‍ය දෑ

• කුකුළු මස් 1.5 Kg
• එළවළු තෙල් කෝප්ප 1/4
• හීනියට කපාගත් ළුනු ගෙඩි දෙකක්
• කරාබු නැටි 4
• අඹරා ගත් සුදුළුනු ගෙඩි දෙකක්
• තුනපහ කුඩු කෝප්ප 1/4
• මිරිස් කුඩු තේ හැදි දෙකක්
• අඹරාගත් ගම්මිරිස් කුඩු තේ හැඳි 01
• ලුණු ඇති පදමට
• අඟලක කෑලි වලට කපා ගත් පොතු ඇරගත් අර්තාපල් ගෙඩි පහක්

කේරළ චිකන් කරිය සාදා ගන්නා ක්‍රමය

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

The post කේරළ චිකන් කරිය – නිවාඩු ඉරිදාවේ කෑම මේසය රස ගන්වන්න. appeared first on familylife.

MSG වශයෙන් ඇත්තෙන්ම හඳුන්වන්නේ මොනෝ සෝඩ්යම් ග්ලුටමේට් Monosodium glutamate කියන රසායනික සංයෝගයටයි. මෙය සෝඩියම් හා ග්ලුටමේට් කියන සංකීර්ණ දෙකේ එකතුවක්. සෝඩියම් ගැන නම් අපි අහල තිබුණට ග්ලුටමේට් ගැන නම් එතරම්ම අහල නැතුව ඇති. ග්ලුටමේට් කියන්නෙ සාමාන්‍යයෙන් ස්වාභාවිකව තක්කාලි, සෝයාසේස්, කල් ගත වුනූ චීස් අදියෙහි අඩංගු වන ඇමයිනෝ අම්ල විශේෂයක්.

ග්ලුටමෙට් පළමු වරට ආහාර සඳහා භාවිතයට ගන්නෙ ජපන් මාහාචාර්යවරයෙක් වන කිකුනායී ඉකේඩා. වර්ෂ 1907 – 08 වගේ කාලෙ මොහු විසින් මුහුදු පැළෑටි මගින් සාදාගත් සුප් වර්ගයක ප්‍රණීත බව වැඩි කරගන්න ග්ලුටමේට් භාවිත කළා. මෙය ආහාර සඳහා සුවිශේෂි වන්නේ ජපන් බසින් ඉමහත් රසය හැඳින්වීමට යොදන යුමාමි යන පස්වන රසය ලෙස සුප්‍රසිද්ධ සුවිශේෂී රසය පනගන්නට එයට ඇති හැකියාව නිසයි. ඔහු මේ සඳහා පේටන්ට් බලපත්‍රයක් ලබා ගෙන ආහාර සැකසීම සඳහා ලොව පුරා බෙදාහරිනු ලැබු අතර නොබෝ කළකින් එය ලෝකයේ වඩාත් ජනප්‍රිය සීසනින් එක බවට පත්වුනා.

The New England Journal of Medicine නැමැති සඟරාවට 1968 දී වෛද්‍යවරයෙක් පළමු වරට මෙම MSG වලට විරුද්ධව ලිපියක් පළ කරමින් කියා සිටියේ MSG භාවිත කරන ලද චීන කෑම අනුභවයෙන් පසු තමන්ට ඉතා තද බල හදවතේ ගැසීමක් ඇතිවූ බවයි. එය චීන අවන්හල් සින්ඩ්‍රොමය ලෙසද එම සඟරාව මගින් හඳුන්වාදී තිබුණා.

ඒ සමගම ලොව පුරා විවිධ පුද්ගලයන් MSG වලට එරෙහිව ලිපි පළ කරන්නට වුනා. එම බොහෝ ලිපි සඳහා කාරනා සපයා තිබුනේ විවිධ පුද්ගලයන්ට චීන ආහාර ගැනීමෙන් පසුව ඇතිව තිබූ රෝග ලක්‍ෂණ පදනම් කරගනිමින්. මෙම ලිපිවල විද්‍යාත්මක පදනම ගැන ඇතිවූ කුකුස නිසාම 1990 දී ඇමරිකානු ආහාර හා ඖෂධ අධිකාරිය (FDA) MSG පිළිබඳව විධිමත් විද්‍යාත්මක පරීක්‍ෂණයක් සිදු කිරීමට ස්වාධීන ආතනයකට භාර දෙනු ලැබුවා.

එම පරීක්‍ෂණය මගින් සනාත වූයේ MSG භාවිතය අහිතකර නොවන නමුත් විවිධ පුද්ගලයන්ගේ සංවේදීතාවය අනුව වරකට ග්‍රෑම් 3කට වඩා භාවිත කිරීමෙන් සමහර පුද්ගලයන්ට හිසේ රුදාව, දැඩි නිදිමත, දරාගත නොහැකි පිපාසාව, වැනි කෙටි කාලීන රෝග ලක්‍ෂණ ඇති විය හැකි බවයි.

මෙම පරීක්‍ෂණයත් සමග ඇමරිකානු ආහාර හා ඖෂධ අධිකාරිය MSG යනු ආරක්‍ෂිත ආහාර රසගන්වනයක් ලෙස නම් කරනු ලැබූ අතර අන්තර්ජාතික හිසරුදාව පිළිබඳ සමාජය විසින් හිදරුදාව ඇතිකරන සුභකාරක ලැයිස්තුවෙන් MSG ඉවත් කරනු ලැබුවා.

සාමාන්‍යයෙන් සීනි හා බේකින් සෝඩා ආහාර ජීර්ණ පද්ධතිය තුල ජීර්ණය වන ආකාරයටම MSG ජීර්ණය වන බවත් අප ලබාගන්නා බොහෝ ආහාර වල අඩංගුවන ස්වාභාවික ග්ලුටමේට් ජීර්ණය වන ආකාරයටම MSG ජීර්ණය වන බවත් වැඩි දුරටත් මෙම පරීක්‍ෂණය මගින් තහවරු කරනු ලැබුවා.

නමුත් මෑත කාලීනව නැවතත් මෙම MSG කථිකාව කරළියට පැමිණි අතර වෙළඳපළේ බොහෝ නිෂ්පාදන තමන් MSG භාවිත නොකරන බවට සහතික කර සිය ඇසුරුම් වල ප්‍රදර්ශනය කරන්නට තරම් එය බලවත් වුනා. ඕනෑම දෙයක් ඕනෑවට වඩා ඕනෙම නෑ කියන සාමාන්‍ය භාවිතය මෙම ගැටලුවේදී අදාල බවයි බොහෝ දෙනාගේ මතය වී තිබෙන්නේ.

බොහෝ විට ශ්‍රී ලංකාව වැනි ආහාර සැකසීම පිළිබඳ කිසිදු තත්ත්ව පාලන ක්‍රමවේදයන් අනුගමනය නොකරන ආහාර නිෂ්පාදකයින් සිටින රටක මෙම ගැටළුව උග්‍රවීම පුදුමයට කරුනක් නොවෙයි. විශේෂයෙන් කිසිදු ප්‍රමිතියකින් තොරව රට පුරා පැතිරෙන චීන කෑම අවන්හල් ජාලය මෙයට ඍජුව වගකිව යුතුයි. ඔවුන් මෙම MSG පමණට වඩා අධික මාත්‍රාවලින් භාවිත කිරීම මගින් මෙම තත්ත්වය උදාවී තිබෙනවා.

නමුත් නිවසේ ඔබ විසින් කෑම පිසින අවස්ථාවක MSG නියම්ත පමණට භාවිත කිරීම මගින් ඔබට වන අවැඩක් නෑ. ඇත්ත ඇති සැටියෙන් දැන තමන්ගේ ආහාර රසවත් කරගන්න දැන් ඔබට අවස්ථාව තිබෙනවා. ක්‍ෂණික ආහාර භාවිත කිරීමේදි නම් මේ ගැන වඩා අවාධානයෙන් පසුවීම වඩා නුවණට හුරුයි. ජීවිතයේ ඔබ විදිය යුතු රසයක් බොරු ප්‍රචාර නිසා අනිසි බියට පත් වී නැති කරගන්න දැන් අවශ්‍යතාවයක් නෑ.

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

The post MSG (Monosodium Glutamate) යකා ඔය කියන තරම් කළුද? appeared first on familylife.

අද වන විට සියලු විනෝදාංශ ජංගම දුරකථනය, රූපවාහිනිය නැතිනම් වීඩියෝ ක්‍රිඩා උපකරණ ආදි මෙවලම් කීපයකට සීමා වී තිබුනත් ඇත්ත වශයෙන්ම ප්‍රායෝගිකව කළ හැකි විනෝදාංශයක දරුවා නිරත වීමෙන් ඔහුගේ පෞර්ෂයට මෙන්ම නිර්මාණශීලිත්වයට එය ඉතා තදින් බලපාන බව පර්යේෂන රැසකින් තහවුරු වී තිබෙනවා. එම නිසා දැනට ඔබේ දැරුවාට එවැනි විනෝදාංශයක් නැත්නම් එවැන්නක් සොයා ගැනීම සඳහා අදම උදවු උපකාර කිරීම ඔබගේ වගකීමක්.

එවැනි විනෝදාංයක් මගින් ඔබේ දරුවාට අත්වන හිතකර බලපෑම් කීපයක් මෙසේ දක්වන්න පුළුවන්.

1. පාලුව කාන්සිය මකමින් විවේකය වඩා අර්ථවත්ව ගෙවා දැමීමට හැකි පරිසරයක් නිර්මාණය කිරීම

වැඩෙන දරුවන්ට විශේෂයෙන් මෙවැනි විනෝදාංශයක් තිබීම ඉතාමත් වැදගත් වන්නේ ඔවුන්ගේ පාසැල් දිවියත් සමග ඇතිවන ඒකාකාරී ජීවන රටාවට වෙනසක් ඇති කරමින් දරුවන් උද්යෝගයෙන් හා නිරෝගීව තබා ගැනීමටයි. ක්‍රිඩාව හා සම්බන්ධ විනෝදාංශයක් තෝරා ගන්නේ නම් එය ශාරීරික හා මානසික සෞඛ්‍ය කෙරෙහි ඉතා ධනාත්මකව බලපානු ලබනවා. මෑතකදී කරන ලද සමීක්‍ෂණයකට අනුව අවුරුදු 5ත් 14ත් අතර පාසැල් යන ළමුන් අතරින් සාමාන්‍යයෙන් සියයට හතකට ආසන්න ප්‍රමාණයක් සාංකාව නැමති රෝගී තත්ත්වයෙන් පෙලෙන බවට සොයා ගෙන තිබෙනවා. ක්‍රීඩාශ්‍රිත විනෝදාංශ මගින් දරුවාගේ කුසලතා හා හැකියාවන් වර්ධනයට රුකුලක් වන අතරම ඔවුන්ගේ මානසික තුලිතභාවය පවත්වා ගැනීමටත් ඉතා වැදගත් මෙහෙවරක් ඉටු කරනු ලබනවා.

2. නිර්මාණාත්මක අදහස් ජනිත වීමේ හැකියාව වර්ධනය කිරීම

මේ යටතේ බොහෝවිට කලාත්මක ක්‍රියාකාරකම් විනෝදාංශ ලෙස තෝරාගත හැකිය. කවි හෝ නවකතා, කෙටිකතා රචනය, චිත්‍ර ඇඳීම, මූර්ති කලාවන්, සංගීතය, නැටුම් ආදී සෞන්දර්යාත්මක ක්‍රියාකාරකම් තම විනෝදාංශ වශයෙන් තෝරා ගැනීමෙන් දරුවාගේ නිර්මාණාත්මක කුසලතා වර්ධනයට හේතු වෙයි. විවිධ පරිකල්පන සංකල්ප ගොඩනගමින් ඒවා රූපයට නගමින් නව්‍ය සංකල්පයන් ඉදිරිපත් කිරීමට දරුවාට පෙළඹවීමක් ඇති වෙයි. මෙමගින් තමන්ගේ නිදහස ප්‍රකාශ කිරීමට මෙන්ම තමන්ටම සුවිශේෂී වූ සිතුවිලි ධාරාවන් ජනිත කරන්නට මං පෙත් එළි පෙහෙලි කරනු ලබයි. අද ලෝකයේ බොහෝ සුප්‍රසිද්ධ කලා කරුවන් ඔවුන්ගේ ළමා කාලය තුල විනෝදාංශ වශයෙන් තෝරාගත් මාවත් වල ජය කෙහෙලි නංවමින් සිය අසම සම නිර්මාණ ශත්කියෙන් ප්‍රතිභා දක්වන අයුරු අප කවුරුත් දැක ඇත.

3. බුද්ධි වර්ධනය කිරීම

බොහෝ විනෝදාංශයන් දරුවාගේ බුද්ධිමය හැකියාවන් වර්ධනය සඳහා ඉවහල් වේ. මෙහිදී පොත් කියවීම විනෝදාංශයක් කර ගත් දරුවෙකුගේ බුද්ධි වර්ධනය ඉතා ඉහළ තලයක් වෙත ගෙන එයි. භාෂා හැකියාව වර්ධනය වීමත් දරුවාගේ ශබ්ධ කෝෂය පොහොසත් වීමත් හැරුණු කොට දරුවාට ලෝකය පිළිබඳ ලැබෙන දැනුමත් ඒ ඇසුරින් දරුවා තනාගන්නා සිය ආවේනික ලෝකයත් ඔහුගේ අනාගතය තීරණය කිරීමට බෙහෙවින් ඉවහල් වේ. එමෙන්ම දරුවාගේ ආකල්පමය වර්ධනය මෙන්ම පොතක් සැමවිටම දරුවෙකුගේ ඉවසීම හා මානසික ඒකාග්‍රතාවය ඇති කිරීමටත් ප්‍රබල දායකත්වයක් දක්වයි. පොත් කියවීමට අමතර ඕනෑම විනෝදාංශයක් ගතහොත් අප කළින් පැවසූ පරිදි දරුවාගේ ඒකාකාරී ජීවන රටාව වෙනස් කරමින් ඔහු නැවුම් හැඟීම සමග ජීවත් වීමට අවස්ථාව උදාකර දෙයි. ඉක්මනින් හා කාර්‍යක්‍ෂමව තීරණ ගැනීමේ හැකියාව බොහෝ ක්‍රිඩාවන් විෂය කොට ඇති විනෝදාංශ මගින් දරුවාට ලබා දෙන තවත් සුවිශේෂී හැකියාවකි.

4. කණ්ඩායම් හැඟීම හා පිරිසක් ලෙස ගැටළු විසඳන අකාරය පිළිබඳ දැරුවන්ට ලැබෙන අත්දැකීම්

කණ්ඩායම් ක්‍රිඩා විනෝදාංශ වශයෙන් තෝරාගන්නා දරුවන්ට නිතැතින්ම පිරිසක් සමග එක්ව එක් අරමුණක් වෙනුවෙන් කැපවෙන ආකාරයත් එමගින් අරමුණක් ජය ගන්නා ආකාරයත් පිළිබඳ සුවීශේෂී වූ පුහුණුවක් අනිවාර්යයෙන්ම හිමිවෙයි. ඊට අමතරව තමන්ගේ අනෙකාගේ තීරණ හා හැඟීම් උදෙසා ගරු කරන ආකාරය, ඔවුන් හා සාමුහිකව තීරණ වලට එළැඹෙන ආකාරය ආදිය මෙම ක්‍රිඩා තුළින් දරුවා ග්‍රහණය කර ගනු ඇත. අද වන විට බොහෝ සාර්ථක ආයතන සිය සම්මූඛ පරීක්‍ෂණ වලදී කණ්ඩායම් ක්‍රීඩා කර ඇති අයදුම් කරුවන් වෙනුවෙන් වැඩි බර තැබීමක් සිදු කරන්නේ මෙසේ ලබා ඇති පුහූණුව ආතනයේ දියණුවට දායක කර ගත හැකි අමිල සම්පතක් වන බැවිනි. එවැනි අයදුම්කරුවන් තුළ අන් අයට වඩා පහත ගුණාංග ඉස්මතු වන බව බොහෝ මානව සම්පත් සමීක්‍ෂණ වලින් හෙළි වී ඇත.

• කණ්ඩායම් වශයෙන් ක්‍රියාකිරීමේදී අන් අයගේ හැඟීම් තේරුම් ගෙන කණ්ඩාම් හැඟීමෙන් කටයුතු කරන ආකාරය
• නායකත්ව කුසලතාවයන් හා නායකත්වයක් යටතේ වැඩ කටයුතු කරන ආකාරය පිළිබඳ හැකියාවන්
• ජය පරාජය එකලෙස දරාගැනීමට ඇතිවන හික්මීම
• ක්‍රීඩාවක ජීවන ගුණය වන එකිනෙකා කෙරෙහි ගරු කිරීමට හා තරඟයක් තුල පවා විනය ගරුකව ක්‍රියා කරන්නේ කෙසේද යන පුහුණුව
• ජීවිතය යනු සැමවිමට ජයග්‍රණය නොවන බව සිත්හි ධාරනය වීම.

5. කුසලතා වර්ධනය කර ගැනීමට නිවැරදි මාවතක් විවර වීම

ඕනෑම අයෙකු සිය විනෝදාංශය වශයෙන් තෝරා ගන්නේ තමන් කිරීමට රුචි ක්‍රියාවකි. තමන් ජීවිතයේ කිරීමට කැමති දෙයක් වෙනුවෙන් වූ කුසලතා වර්ධනය කර එය තමන්ගේ ජීවනෝපාය බවට පත් කර ගත හැකි නම් එය ඕනෑම කෙනෙකුගේ ජීවිතයට ආශිර්වාදයකි. නැතැතින්ම එවැනි අවස්ථාවක් තමන්ට ආත්මාභිමානයට කාරනයක් වන අතරම තමන්ගේ ජයග්‍රහන ගැන නිහතමානීව සතුටු වන්නටත් අවස්තාවක් උදා කර දෙයි. නිර්මාණාත්මක රචනයට දක්‍ෂ දරුවෙක් අනාගතයේ ලොවම පිළිගත් ගත්කතුවරයෙක් වීම හෝ සංගීතයට කැමැති දරුවෙක් එවැනිම ලෝ ප්‍රක්‍රට සංගීතඥයෙක් වීමේ ආරම්භය සිය විනෝදාංශය නම් එය කෙනෙකුට ආඩම්බරයක් ගෙන ඒම ස්වභාවිකය.

දරුවන්ට විනෝදාංශයක් තේරීමේදී මේ කරනු ගැන සැලකිළිමත් වන්න

• දරුවාගේ කැමැත්ත හා ඔහුගෙන් දැකිය හැකි කුසලතා – දරුවාට හොඳින් සවන් දී ඔහුගේ යටි හිතේ ඇති කැමැත්ත පිළිබඳ විමිසිලිමත් වන්න
• දරුවා විසින්ම පටන් ගන්නා විනෝදාංශ වලදී ඒ සඳහා ඔහුට උදවු කිරීමට ඇති හැකියාව – උදා – අදාල විනෝදාංශයට උදවු කිරීමට ප්‍රමානවත් මූල්‍යමය සවියත් ඇත්ද යන්න
• මූලික අවධියේදී දරුවාගේ වීරයා වන්නේ දෙමවුපියන් බැවින් දෙමවුපියන් සිදුකරන ලබන විනෝදාංශ පිළිබඳ දරුවා උනන්දු වන බව මතක තබා ගන්න. තම විනෝදාංශ දරුවාට නොගැලපේ යැයි සිතනවා නම් ඔහුගේ කැමැත්ත පරිදි සිදුකළ හැකි විනෝදාංශ කීපයක ඔබත් යම් තරමකට නිරත වීමට ඇති හැකියාව
• අදාල විනෝදාංශයට අදාලව යම් හැදෑරීමක් කළ යුතු අවස්ථාවන් හිදී ඒ සඳහා අවස්ථා සලසා දීම. උදා – සංගීතය, චිත්‍ර කළාව ආදියට අදාල පංති වලට සහභාගී කරවීම

මෙවැනි සරල විනෝදාංශ මගින් දරුවගේ අනාගතය නිසැකයෙන්ම විඳින ජීවිතයක් මිස විඳවන ජීවිතයක් නොවීමට ඇති හැකියාව ඉතා ඉහලයි. ඉතිං ඔබේ දරුවා අනාගතයේ සැහැල්ලුවෙන්, සතුටෙන් කල් ගෙනව පුරුවැසියෙක් කරන්නට ඇවැසි නම් අදම දරුවාට විනෝදාංශයක් තෝරාදීමට ඔබේ කාලය වෙන් කරන්න.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

කවරයේ ඡායරූපය – dancepoise.com

The post විනෝදාංශයක් දරුවෙකුගේ ජීවිතයට කොතරම් වැදගත් දැයි ඔබ දන්නවාද? appeared first on familylife.

යොවුන් වියට එළඹෙමින් සිටින පුතෙකුගේ මවක ලෙස, ඒ වයසේ දරු දැරියන්ගේ සිතු තුළ ඇතිවන සංකීර්ණ මානසික තත්ත්වයන් හැකි පමණින් අවබෝධ කරගන්නටත් ඔවුන්ගේ සිත් නොතලා ඒවා විසදා ගන්නට උපකාර කරන්නේ කෙසේද යන්නත් මා නිතර සිතනවා. (ඒත් මා අසාර්ථක වන අවස්ථා බොහෝයි……මට නැවත නැවත මාවම ප්‍රශ්න කරන්නට, මා ගැනම ලැජ්ජා වෙන්නට සිද්ද වෙනවා…..) අහම්බෙන් අත පත් වූ Louis Sachar ගේ There’s a boy in the girl’s bathroom නමැති මේ අපූරු යොවුන් නවකතාව කියවූ වහාම මා එයට ආසක්ත වන්නට ඇත්තේත්, සිංහලෙන් කියවන දරු දැරියන් සහ වැඩිහිටියන් වෙනුවෙන් එය පරිවර්තනය කළ යුතු යැයි මට සිතෙන්නට ඇත්තේත් ඒ නිසා වෙන්නට ඇති. මෙහි හමුවන ක්ලාරා වැනි අපූරු ගුරුවරියන් ඉද හිට හෝ අපේ දරුවන්ට හමුවෙනවා නම් ගුරුවරුන්ගෙන් සහ සමාජයෙන් කර්කශ ගැරහුම් ලබා, ආත්මයන් තුවාල කරගෙන අධ්‍යාපනය හැර යාමේ අවදානමක් ඇති අහිංසක පොඩි එවුන් කී දෙනෙකුගේ ජිවිත විකසිත කළ හැකි වනු ඇතිද?…

ගුරුවරුන් සහ සිසුන් අතර මහත්අප්‍රසාදයට පත් වී ‘මෙලෝ කමකට නැති‘ ළමයෙකු ලෙස හංවඩු ගැහී කොන් වී සිටින බ්‍රැඩ්ලි චෝකර්ස් නම් දඩබ්බර කොලුවා, තරුණ උද්යෝගිමත් ශිෂ්‍ය උපදේශිකාවකගේ හෘදයංගම ඇසුර ලබමින් , සිය සැබෑ අනන්‍යතාව සොයා ගන්නා අයුරුත්, කෙටි කලක් තුළ ප්‍රබෝධමත්, ආකර්ෂණීය ශිෂ්‍යයෙකු බවට පරිවර්තනය වන අයුරුත් මේ නවකතාවෙන් නිරූපණය වෙනවා. සම්ප්‍රදායික ගුරු ගෝල භූමිකාවෙන් වෙනස් වූ, ඉතා සැහැල්ලු අව්‍යාජ මිත්‍රත්වයක් මේ ශිෂ්‍ය උපදේශිකාව සහ ඇය වෙත පැමිණෙන සිසු සිසුවියන් අතර ගොඩ නැගෙනවා. ගතානුගතික චින්තනයක් සහිත දෙමාපිය සංගමය සහ පාසල් නිලධාරී මඩුල්ල විසින් ප්‍රතික්ෂේප කරනු ලැබ පාසලෙන් පන්නා දමනු ලැබුවත්, ඇගේ කෙටි ඇසුර නිසා බ්‍රැඩ්ලි ඇතුළු කොලු කෙල්ලන් ගණනාවක් තුළ ගැඹුරු, සාධනීය වෙනස්කම් ඇති වෙනවා. පාසල් ජිවිතය තුළ ගැටවර වියේ දරුවන් මුහුණ දෙන අනේකවිධ ආකාරයේ අත්දැකීම් ඉතා රසවත් සහ විනේදාත්මක ආකාරයෙන් කතුවරයා විසින් ඉදිරිපත් කර තිබෙනවා….

ඉතිං අපි ඔබ සැමට ෆැමිලි රීඞ් තුලින් ආරාධනා කරනවා නදී කම්මැලවීරගේ නවතම පරිවර්ථන කෘතිය කියවා විඳගන්න කියල.

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post මෙන්න මෙතන කොල්ලෙක් appeared first on familylife.