ප්‍රෝටීන්, මේදය, සෝඩියම්, යකඩ, පෝටෑසියම් වගේ ශරීරයට අත්‍යවශ්‍ය පෝෂක කොටස් අඩංගු මස්වලින් පිසගත්ත ආහාර වලට බොහෝ දෙනෙක් ප්‍රිය කරනවා. සමහරු මසක් මාළුවක් නැතුව කෑම කන්න කැමතිත් නෑ. මේ ඒ වගේ අයට මස්වලින් හදාගන්න පුළුවන් ස්නැක්ස් වර්ග කිහිපයක් ගැනයි. 

හැම් පීසා 

• බිස්කට් ඩෝ ග්‍රෑම් 200
• සෝස් අවශ්‍ය පමණට 
• කුඩා කොටු කපාගත් හැම් අවශ්‍ය පමණට 
• මොසරල්ලා චීස් 

පිටි ග්‍රෑම් 180, බේකින් සෝඩා තේ හැන්දක්, ලුණු ස්වල්පයක් ඉතා හොදින් මිශ්‍ර කරගන්න. බ්ලෙන්ඩරය, හෑන්ඩ් මික්ස්චරය එහෙමත් නැත්තන් ෆුඩ් ප්‍රොසෙසරය මේකට පාවිච්චි කරන්න පුළුවන්. මේ මිශ්‍රණයට බටර් මේස හැදී දෙකක් විතර එකතු කර ගනිමින් නැවතත් හොදින් මිශ්‍ර කරන්න. බිත්තර දෙකක්, ඔලිව් ඔයිල් මේස හැන්දක් සහ කිරි මිලි ලීටර් 20ක් පමණ වෙනම බදුනක හොදින් මිශ්‍ර කර පිටි මිශ්‍රණයට ටිකින් ටික එකතු කරන්න. මෙය මෘදු පිටි ගුලියක් ලෙස සකස් කරගෙන පැය දෙකක් පමණ ශීතකරණයේ තියන්න.

ඒ විදියට හදාගත්ත බිස්කට් ඩෝ එකෙන් සිහින් පැතලි කුඩා රවුම් හදාගෙන පරතරයක් ඇතුව අවන් ට්‍රේ එකේ තියන්න. ඒ උඩින් සෝස් තවරන්න. ඊටත් උඩින් හැම් සහ ග්‍රේට් කරගත්ත චීස් අතුරලා ෆැරන්හයිඩ් අංශක 400ට විනාඩි 8-10ක් බේක් කරගන්න. 

චිකන් වලින් බයිට් එකක්

• කුඩාවට කපාගත්ත කුකුළු මස් කැබලි ග්‍රෑම් 500 
• තෙල් අවශ්‍ය පමණට 
• පාන් පිටි කප් එකක්
• බිස්කට් කුඩු 
• බිත්තර දෙකක් 
• ලුණු, ගම්මිරිස්, සුදු ලුණු පේස්ට් 

ගම්මිරිස්, පිටි, සුදු ළූණු පේස්ට් සහ ලුණු බදුනකට දමා හොදින් මිශ්‍ර කරන්න. වෙනත් බදුනක් ගෙන බිත්තර දෙක වික්ස් කරගන්න. ඒ මිශ්‍රණ දෙක හොදින් එකතු කර මස් කැබලිවල තවරා ගන්න. මස් කැබලි බිස්කට් කුඩුවල දවටාගන්න. නවහත් පිටි මිශ්‍රණයේ සහබිස්කට් කුඩුවල තවරා හොදින් රත්කරගත් ගැඹුරු තෙලේ මද ගින්නේ බැදගන්න.

කටට සැරට මීට් බෝල්ස්

• කැමති වර්ගයකින් මස් ග්‍රෑම් 250 (හොදින් අඹරාගන්න)
• කුඩාවට කපාගත් ලොකු ළූණු මේස හැන්දක් 
• අවශ්‍ය නම් කුඩාවට කපාගත් බෙල් පේපර් මේස හැන්දක් 
• කුඩාවට කපාගත් මිංචි කොළ මේස හැන්දක් 
• මිරිස් කුඩු මේස හැදි 1 ½
• සුදුරු කුඩු ස්වල්පයක්
• ඉගුරු පේස්ට් තේ හැන්දක් 
• කොත්තමල්ලි කොළ ස්වල්පයක් 
• ලුණු අවශ්‍ය පමණට 
• ගම්මිරිස් කුඩු තේ හැන්දක් 

මේ අමුද්‍රව්‍ය සියල්ලම හොදින් මිශ්‍ර කරන්න. කුඩා බෝල සදා පැතලි මතුපිටක තියා විනාඩි 20ක් ස්ටීම් කරගන්න. ඉන් පසු ගැඹුරු තෙලේ බැදගන්න.

චිකන් ෆින්ගර්ස් 

• මයෝනිස් සෝස් මේස හැදි 4
• මී පැණි මේස හැදි 1
• මස්ටර්ඩ් පේස්ට් මේස හැදි 1
• විනාකිරි මේස හැන්දක් 
• ම්රිස් කුඩු මේස හැදි  1
• චිකන් බ්‍රෙස්ට් ග්‍රෑම්  450 (සිහින් පෙතිකපාගන්න)
• කුඩු කරගත් කොන් ෆ්ලෙක්ස් කප් 1 ½
• ග්‍රේට් කරගත් පාමේසන් චීස් මේස හැදි 3

මයෝනිස් සෝස්, මී පැණි, මස්ටර්ඩ් පේස්ට්, විනාකිරි සහ මිරිස් කුඩු හොදින් මිශ්‍රකර එයින් බාගයක් වෙනම බදුනකට දමා අයින් කරන්න (ඩිප් එක සදහා). චිකන් පෙති ඉතිරි මයෝනිස් මිශ්‍රණයේ දවටා කොන් ෆ්ලෙක්ස් සහ චීස් තවරා ගන්න. සෙල්සියස් අංශක 425 ට කලින් රත් කරගත් අවන් එකේ දමා විනාඩි 10-15 ක් බේක්‌ කරගන්න.

Chef Ramsay’s Hamburger and Sweet potato

• අඹරාගත් හරක් මස් ග්‍රෑම් 500
• ලුණු 
• ගම්මිරිස් කුඩු 
• අබ පේස්ට් තේ හැදි ½
• වොක්ෂයර් සෝස් (මේ කුකින් සෝස් එක සුපිරි වෙළද සැල් වලින් ගන්න පුළුවන්)
• බිත්තර කහ මද 2
• කෙචප් මේස හැදි 3
• කුඩාවට කපාගත් ළූණු ගෙඩි ½
• ලොකු බතල ගෙඩි 1
• ඔලිව් තෙල් 

සෙල්සියස් අංශක 200ට අවන් එක රත් කරගන්න. බතල ගෙඩිය පොතු හැර තීරු ලෙස කපාගන්න. ඔලිව් තෙල් සහ ලුණු යන්තමට තවරා රන් පැහැ වනතුරු සම්පුර්ණයෙන්ම බේක් ක‍රගන්න.  

අඹරාගත් මස් ලුණු සහ ගම්මිරිස් එකතුකර පදම් වෙන්න තියන්න. එයට අබ පේස්ට්, කෙචප්, බිත්තර කහ මද සහ සිහින්ව කපාගත් ළූණු එකතු කර හොදින් මිශ්‍ර කර අවශ්‍ය හැඩයට හැම්බර්ගර්ස් හදාගෙන ග්‍රිල් කරගන්න. නිතරම දෙපැත්ත පෙරළීම හෝ තද කිරීම නොකරන්න. මෙය පාන්, සැලඩ් සහ බේක් කරගත් බතල සමග ආහාරයට ගන්න පුළුවන්.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ස්නැක් රෙසිපි – මස් වර්ග භාවිතයෙන් හදන රසම රස කෑම appeared first on familylife.

• මෙම ප්‍රමාණය 8 දෙනෙකුට සෑහේ.
• Calories – 542kcal
• Fat – 39.3g
• Carbohydrates – 29.7g
• Protein – 18.4g
• Cholesterol – 60mg
• Sodium – 66mg

කේරළ චිකන් කරිය සඳහා අවශ්‍ය දෑ

• කුකුළු මස් 1.5 Kg
• එළවළු තෙල් කෝප්ප 1/4
• හීනියට කපාගත් ළුනු ගෙඩි දෙකක්
• කරාබු නැටි 4
• අඹරා ගත් සුදුළුනු ගෙඩි දෙකක්
• තුනපහ කුඩු කෝප්ප 1/4
• මිරිස් කුඩු තේ හැදි දෙකක්
• අඹරාගත් ගම්මිරිස් කුඩු තේ හැඳි 01
• ලුණු ඇති පදමට
• අඟලක කෑලි වලට කපා ගත් පොතු ඇරගත් අර්තාපල් ගෙඩි පහක්

කේරළ චිකන් කරිය සාදා ගන්නා ක්‍රමය

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

The post කේරළ චිකන් කරිය – නිවාඩු ඉරිදාවේ කෑම මේසය රස ගන්වන්න. appeared first on familylife.

ගෙවතු වගාවක් පවත්වාගෙන යාමෙන් ආහාර පිසගන්නා වෙලාවට එළවලු කඩා ගන්න පුළුවන් නම් ඒ තමයි හොදම ක්‍රමය. ඒ වගේම කලින් කපාගත් එළවලු පලා වගේ දේවල් කල් තියලා උයාගන්න එකෙන් පෝෂක කොටස් විනාශ වෙනවා. එළවලු ශීතකරණයේ ඇසිරීමට කලින් ඒවා අස් කොන් කැපීමෙන් වැළකීම වගේම වාතයට නිරාවරණ නොවෙන විදියට අසුරා ගැනීමත් වඩාත් සුදුසු වෙනවා.

පොතු ඉවත් කර තබා පසුව පිසීම, පිස ගත් එළවලු නැවත නැවත රත් කිරීම, ජලය විශාල ප්‍රමාණයක් එක් කර පිස ගැනීම, එළවලු තම්බා ගත් ජලය ඉවත් කිරීම (කාබනික එළවළුවල), පැහැය රදවා ගැනීමට බේකින් සෝඩා එක කිරීම වගේ දෙවලිනුත් එළවළුවල තියෙන පෝෂණය විනාශ වෙනවා. හැකි අවස්ථාවල ප්‍රෙෂර් කුකරය භාවිතා කර එළවලු පිස ගැනීමට උත්සහ කරනවානම් එයින් පෝෂක කොටස් විනාශ නොවෙන විදියට පිස ගැනීම පහසු වෙනවා.

අමුවෙන් ආහාරයට ගැනීම (Raw)

පොල් කිරි හෝ තෙල් එකතු කරලා හොද හැටි උයාගන්නවට වඩා අමුවෙන් කන්න පුළුවන් එළවලු අමුවෙන්ම කන්න උත්සහ කලොත් කොහොමද? මේ ක්‍රමයට නම් කිසිම විදියකින් පෝෂක කොටස් විනාශ වෙන්නේ නෑ. සලාද විදියට පිළියෙළ කරගැනීම තමයි ජනප්‍රියම ක්‍රමය වෙන්නේ. හැබැයි පිසගන්නකොට සමහර පෝෂක කොටස් විනාශ වුනත් සමහර පෝෂක  කොටස් එකතුවෙන බවත් නොකියාම බෑ. මේ නිසා මේ දෙවිදියටම පිළියෙළ කරගත්ත එළවලු ආහාරයට එකතු කරගැනීම හමයි වඩාත්ම සුදුසු වෙන්නේ.

තැම්බීම (Boil)

තැම්බීම නිසා පෝෂක කොටස් ඉවත් වුනත් මෙය එතරම් ම හානිකර වන්නේත් නැත්තේ තැම්බීම නිසා විෂ සහිත දේවල් ඉවත් වෙන නිසයි. ඒ වෙනකොට අපි ආහාරයට ගන්න එළවළුවල විශාල වශයෙන් රසායනික ද්‍රව්‍ය අඩංගු වෙලා තියෙන නිසා තම්බා ආහාරයට ගැනීමෙන් මේ විෂ ද්‍රව්‍ය ඉවත් කරගන්න පුළුවන්කමක් තියෙනවා. මේ විදියට පිළියෙළ කරගන්න ආහාර අතරින් ජනප්‍රියම ක්‍රමය විදියට එළවලු සුප් වර්ග පෙන්වන්න පුළුවන්.   

බැදීම් (Fry)

ශරීරයට මේදය එකතුවෙන විදියට එළවලු කෑමට ගන්න වඩාත්ම සුදුසු ක්‍රමය තමයි තෙල් වර්ග, බටර්, මාජරීන් වැනි බැදුම් කාරක වලින් එළවලු බැද ආහාරයට ගැනීම. හැබැයි මේ තෙල් නැවත නැවත භාවිතයට ගැනීම නම් කොහෙත්ම සුදුසු වන්නේ නෑ. 

Roast/ Bake 

මෙහිදී අමතර ජලය භාවිතා නොවෙන අතරම එළවළුවල අඩංගු ජලයත් මේ ක්‍රමය හරහා හානි වෙන්නේ නෑ. පරීක්ෂණවලින් හෙළිවෙලා තියෙන විදියට මේ ක්‍රමය හරහා සකස් කරගැනීමෙන් එළවළුවල අඩංගු බී විටමින් හොදින් ආරක්ෂා වෙනවා. 

මද ගින්නේ පිසගැනීම 

බැදීමට හා තැම්බීමට සාපේක්ෂව මද ගින්නේ එළවලු පිස ගැනීම වඩාත් සුදුසු ක්‍රියාවලියක් විදියට හදුන්වන්න පුළුවන්කම තියෙනවා. හැබැයි මේ ක්‍රමයේදී එළවලු වර්ග විශාල කාල සීමාවක් උණුසුමට ලක් වෙනවා. සුප් වර්ග පිළියෙළ කරගැනීමේදී එළවලු වර්ග අවසානයට එක කර මද වෙලාවක් පිස ගැනීමෙන් මේ ගැටලුව මගහරවා ගන්න පුළුවන් වෙනවා.

වාෂ්පයෙන් තැම්බීම 

එළවළුවල ඇති ජල ප්‍රමාණය සහ පෝශක කොටස් මේ ක්‍රමය නිසා හානි වෙන්නේ අවම අයුරින් වෙන අතරම වාෂ්පයෙන් තම්බා එළවලු ආහාරයට ගැනීම ආහාරපාලනය කරන්නන් අතර වඩා ජනප්‍රිය ක්‍රමයක් වෙලා තියෙනවා. මේ හරහා ශරීරයට කැලරි එකතු වීම අවම වීම තමයි මෙයට හේතුව වෙලා තියන්නේ.

මයික්‍රෝවේව් උදුනේ පිස ගැනීම 

පෝෂණය වඩාත් හොදින් රැකෙන අතරම කෙටි කලකින් සහ අඩු ජල ප්‍රමාණයක් භාවිත කරගනිමින් එළවලු පිස ගැනීම මේ හරහා සිදු වෙනවා. 

පැසවීම (Ferment)

ගොඩක් වෙලාවට විනාකිරි භාවිත කිරීමෙන් පිළියෙළ කරගන්න අච්චාරු වර්ග මෙයට අයත් වෙනවා. සෞඛ්‍යමය හේතු මත සමහර පුද්ගලයින්ට මේ ක්‍රමය එතරම් සුදුසු නොවෙන බවත් සිහිපත් කරන්න වෙනවා.

හිරු එළියේ වියළීම 

අඹ, බිලින් වගේ දේවල් ලුණු දමා මේ විදියට වියලා තියාගන්න පුළුවන්කම තියෙනවා. 

එළවළු පිසීමේදී පෝෂණය රැකගන්න මේ ක්‍රම කිහිපය ගැනම සලකා බැලුවොත් හැම ක්‍රමයේම වාසි අවාසි තියෙන බව ඔබට පැහැදිලි වෙන්නට ඇති. ඒ කියන්නේ වඩාත්ම සෞඛ්‍යදායක විදියට එළවලු පිස ගැනීමට එකම ආකාරයක් පමණක් තියෙනවා කියලා අපිට කියන්න පුළුවන්කමක් නෑ.

හැබැයි ශරීරයට අත්‍යවශ්‍යම දෙයක් වෙන එළවලු, නොකා ඉන්නවට වඩා කුමන ක්‍රමයකට හරි ආහාරයට එක්කර ගැනීම තමයි වටින්නේ. ඒ නිසා වඩාත්ම සුදුසු වන්නේ එකම ක්‍රමයකට ආහාර පිළියෙළ කර නොගෙන මේ ක්‍රම කිහිපයටම එළවලු පිස ගැනීම කියලයි අපිට නම් හිතෙන්නේ.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

ෆැමිලි චෙෆ් සියළු ලිපි නරඹන්න මෙතන ක්ලික්/ටැප් කරන්න.

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post එළවළු පිසීමේදී පෝෂණය රැකගන්න මේ ක්‍රම අත්හදා බලන්න appeared first on familylife.

පුංචි පැටියාගේ බණ්ඩි ගෙඩිය පිරුණේ නැති වුණාම අම්මලාගේ උගුරෙන් පහළට හරි හැටි කෑම ටිකක් වැටෙන්නෙත් නෑ කියන කාරණේ පොඩි දරුවෝ ඉන්න අම්මලා නම් හොඳට දන්නවා. සාමාන්‍යයෙන් පවුල් සෞඛ්‍ය සේවිකාවෝ උපදෙස් ලබාදෙන්නේ දවසට ප්‍රධාන වේල් තුනක් සහ අමතර වේල් දෙකක් හැකි උපරිම පෝෂ්‍යදායි ආකාරයට ලබාදෙන්න කියලයි. හැබැයි මේ විදියට කෑම ටික කවාගන්න පුළුවන් වෙන්නේ එහෙමත් දරුවෙකුට තමයි.

කෑම වර්ජනය කරන බබාලා ඉන්න අම්මලාට, “බබා කැමති වෙලාවක කයිනේ, බබාට බඩගිණි වුණාම කයිනේ, එයාට තනියම කන්න දෙන්නකෝ” වගේ උපදෙස් නිතරම ලැබුණත් පැටියට කවන වැඩේ අතහැරලා දැම්මොත් එයාල දවස් ගාණක් උනත් කන්නේ බොන්නේ නැතුව ඔටුවෝ වගේ ඉඳීවී කියලා අපේ අම්මලා හොඳට දන්නවා ඇති.

මේ කියන උපදෙස්වල ඇත්තක් නැත්තේ නැති වුණත් ප්‍රධාන වේලක් හරියට නොකෑව පැන්චෙකුට බඩ පිරෙන්න වගේම පොඩි බඩගින්නට හප හප ඉන්නත් හදලා දෙන්න පුළුවන් ස්නැක්ස් කීපයක් අරන් එන්න ෆැමිලි ලයිෆ් අපි හිතුවා. බලන්න මේ කෑමවලට ඔයාගේ පොඩ්ඩත් ආසා වෙයිද කියලා. අවුරුද්දට වැඩි දරුවන්ට තමයි අපි මේ කියන ආහාර සුදුසු වෙන්නේ.

පාන්

• ෆ්‍රෙන්ච් ටෝස්ට්

බිත්තරයක්, ෆ්‍රෙෂ් මිල්ක් මේස හැඳි 5ක්, ලුණු ස්වල්පයක්, කුරුඳු කුඩු ස්වල්පයක්, වැනිලා බිඳක් හොඳින් මිශ්‍ර කරගන්න. පාන් පෙති දෙකක් එම මිශ්‍රණයේ දමා පොඟවා ගන්න. පෑන් එකක්  රත්කරගෙන එහි බටර් තවරා පොඟවා ගත් පාන් පෙති දෙක පෑන් එකේ දමා දෙපැත්තම මදක් පුළුස්සා ගන්න. මී පැණි සමඟ ආහාරයට ලබා දෙන්න.

• ෆ්‍රෙන්ච් ටෝස්ට් වෙනස් විදියකට

ෆ්‍රෙෂ් මිල්ක් මේස හැඳි 5ක්, බිත්තරයක්, ගම්ම්මිරිස් කුඩු ස්වල්පයක්, ලුණු කුඩු ස්වල්පයක්, ගාලික් බටර් හෝ අඹරාගත් සුදු ළූණු ස්වල්පයක් හොඳින් මිශ්‍ර කරලා පාන් පෙති දෙකක් මෙහි පොඟවා ගන්න. තම්බාගත් හෝ තෙම්පරාදු කරගත් එළවලු, බිත්තර, මාළු හෝ මස් පොඩි කරගන්න. රත්කර බටර් තවරාගත් පෑන් එකකට බටර් ස්වල්පයක් දමා එක් පාන් පෙත්තක් දමා සාදාගත් පිරවුම සහ ගාගත් හෝ කුඩාවට කපාගත් චීස් ඊට ඉහළින් දමා අනිත් පාන් පෙත්තෙන් වහන්න. පාන් පෙති දෙක දෙපැත්ත දමා හැන්දකින් මඳක් තද කරමින් පුළුස්සාගන්න.

එළවලු

• තැම්බූ එළවලු

කැරට්, බෝංචි, ගෝවා, බ්‍රොකොලි, වට්ටක්කා, බීට් රූට් කැමති හැඩයකට කපාගන්න. භාජනයකට වතුර දමා ලුණු ස්වල්පයක් එකතු කර උතුරවා ගන්න. වට්ටක්කා කැබලි ටික උතුරන වතුරට දමා විනාඩි 3-4ක් තම්බා ගන්න. එයට කැරට් එකතු කර විනාඩි 2ක් පමණ තම්බාගන්න. බෝංචි කැබලි දමා තව විනාඩියක් පමණ තම්බා ලිප නිවා ගෝවා සහ බ්‍රොකොලි එකතු කර විනාඩියක් පමණ තියා එම එළවලු වෙනත් බඳුනකට ඉවත්කර වතුර පෙරාගන්න. උතුරවාගත් වතුර බඳුනටම බීට් රූට් කැබලි දමා විනාඩි කිහිපයක් තම්බාගෙන වතුර පෙරාගන්න. මෙම එළවළුවලට ගම්මිරිස් කුඩු ස්වල්පයක් සහ බටර් එකතුකර වැඩිහිටියෙකුගේ අධීක්ෂණය යටතේ බබාට තනියම කන්න දෙන්න.

• බැදපු එළවලු

කැබලි කපා ගත් එළවලු බාගෙට තම්බාගන්න. කොර්න් පිටි සහ පාන් පිටි සම සමව අරන් වතුර සහ ලුණු ගම්මිරිස් ස්වල්පයක් එකතු කර බැටර් එකක් හදාගන්න. පාන් පිටි වෙනුවට කඩල පිටි ගන්නත් පුළුවන්. බැටර් එකේ තවරාගත් එළවලු කැබලි බිස්කට් කුඩුවල දවටා ගැඹුරු තෙලේ බැදගන්න.

ඇට වර්ග

• තැම්බූ ඇට වර්ග

කඩල, රතු කව්පි, සුදු කව්පි, කොල්ලු කඩල, මුං ඇට, ග්‍රීන් පීස්, බඩ ඉරිඟු වගේ වර්ග කිහිපයකින් ඇට ස්වල්පය බැගින් අරන් තම්බලා බටර් ස්වල්පයක්, රටකජු සහ වියළි මිදී  සහ ආමන්ඩ් එකතු කරලා බබාට කන්න දෙන්න. විවිධ වර්ණ සහ රස නිසා බබාලා මේ විදියට කන්න ආසා වෙනවා. අවශ්‍ය නම් තම්බාගත් එළවලු සහ පැස්ටා ස්වල්පයකුත් එකතු කරන්න.

• කඩල, කඩල පරිප්පු හෝ කැමති ඇට වර්ගයක් තම්බා ගැඹුරු තෙලේ බැද ලුණු, මිරිස්කුඩු ස්වල්පයක් දවටා කෑමට ගන්න පුළුවන්. 

පළතුරු පොප්සිකල්

මේ ගිනියම් දවස්වල අයිස් ක්‍රීම් පොප්සිකල් එකක් දුන්නොත් මොන පොඩ්ඩා ද එපා කියන්නේ? අඹ, දොඩම්, පැපොල්, ස්ට්‍රෝබෙරි, මිදී, කිවි, කොමඩු වගේ පාට කිහිපයක පළතුරු අරන් කැබලි කපාගන්න. ඩ්‍රින්කින් යෝගට් සමග මේ පලතුරු කැබලි මිශ්‍ර කරලා පොප්සිකල් මෝල්ඩ් වල දාලා අධි ශීතකරණයේ තියන්න.

එහෙමත් නැත්තන් පළතුරු වෙන වෙනම බ්ලෙන්ඩ් කරගෙන තට්ටුව බැගින් පොප්සිකල් මෝල්ඩ් එකට පුරවන්න. හැබැයි මේ ක්‍රමයේදී ටිකක් වෙලා යනවා. මොකද එක පළතුරු තට්ටුවක් හයි වෙනකන් ඉදලා තමයි අනිත් පළතුරු තට්ටුව දාන්නේ. අතර මැදට යෝගට් දාන්නත් පුළුවන්.

අලවර්ග වලින්

• අර්තාපල්/ බතල චිප්ස්

අල වර්ගය බාගෙට තම්බලා තෙත මාත්තු කරලා පෙති හෝ තීරු කපාගන්න. ගැඹුරු තෙලේ මඳ ගින්නේ බැදගෙන ලුණු ගම්මිරිස් ස්වල්පයක් දවටාගන්න.

• බැදපු අල

ඉහතින් දක්වලා තියෙන එළවලු බැදපු විදියටම තම්බාගත් අල වර්ගත් බදින්න පුළුවන්. හැබැයි අල වර්ග මුලින්ම හොඳින් තම්බගන්න.

• අල රොටි

කැරට්, බෝංචි, ළූණු, පලා වගේ දාලා හදන පෝෂණ  රොටියට තම්බලා පොඩි කරගත්ත අල ගෙඩියකුත් එකතු කරලා සාමාන්‍ය විදියටම රොටිය හදාගන්න.

නුඩ්ල්ස්, පැස්ටා

• චීස් පැස්ටා

මේක නම් ප්‍රධාන වේලකට වුණත් දෙන පුළුවන්. පැස්ටා තම්බගන්න වෙලා යන නිසා පැස්ටා ටික විනාඩි 20ක් විතර වතුරේ පොඟවා ගන්න. වතුර බඳුනකට ලුණු ස්වල්පයක් එක කර උතුරවාගෙන් පැස්ටා ටික දමා අවශ්‍ය තරමට තම්බා ගන්න. සීතල වතුරින් සෝදා ගත් පැස්ටා ෆ්‍රෙෂ් මිල්ක් එකතුකර කිරි ටික හිඳෙන තුරු තම්බන්න.

කිරි හිඳෙන්නට පෙර පොඩි කරගත් චීස් කෑල්ලක්, ගම්මිරිස් කුඩු ස්වල්පයක් හා අවශ්‍යනම් ලුණු බිඳක් එකතු කරගන්න. මෙයටම අවශ්‍ය නම් මස් හෝ මාළු හෝ බිත්තර දමා රස කරගන්නටත් පුළුවන්.

• නුඩ්ල්ස් මුරුක්කු

සහල් නුඩ්ල්ස් වර්ගයක් තෝරාගෙන තරමක කැබලිවලට කඩාගන්න (අඟල් 2ක් පමණ ). තාච්චියක් ලිපේ තියා තෙල් හොඳින් රත්කරගෙන ලිපේ ගින්දර අඩු කරගන්න. නුඩ්ල්ස් ස්වල්පය බැගින් වරින් වර තෙලට දමා බැදුණු පසු තෙල් බේරෙන්න තියන්න. හරි විදියට බැදෙනවා නම් නුඩ්ල්ස් තෙලට වැටෙනකොට පපඩම් වගේ හීනියට පිපෙනවා.

කර වෙලා දුඹුරු පාට වෙනවා නම් ඒ හරි විදියට බැදිලා නෙවෙයි. තෙල් බේරාගත්ත නුඩ්ල්ස් මුරුක්කුවලට ලුණු මිරිස් කුඩු ස්වල්පයක් එකතුකරගන්න.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post පොඩි බඩගින්න නිවන්න පොඩ්ඩන්ට පොඩි පොඩි ස්නැක්ස් appeared first on familylife.

MSG වශයෙන් ඇත්තෙන්ම හඳුන්වන්නේ මොනෝ සෝඩ්යම් ග්ලුටමේට් Monosodium glutamate කියන රසායනික සංයෝගයටයි. මෙය සෝඩියම් හා ග්ලුටමේට් කියන සංකීර්ණ දෙකේ එකතුවක්. සෝඩියම් ගැන නම් අපි අහල තිබුණට ග්ලුටමේට් ගැන නම් එතරම්ම අහල නැතුව ඇති. ග්ලුටමේට් කියන්නෙ සාමාන්‍යයෙන් ස්වාභාවිකව තක්කාලි, සෝයාසේස්, කල් ගත වුනූ චීස් අදියෙහි අඩංගු වන ඇමයිනෝ අම්ල විශේෂයක්.

ග්ලුටමෙට් පළමු වරට ආහාර සඳහා භාවිතයට ගන්නෙ ජපන් මාහාචාර්යවරයෙක් වන කිකුනායී ඉකේඩා. වර්ෂ 1907 – 08 වගේ කාලෙ මොහු විසින් මුහුදු පැළෑටි මගින් සාදාගත් සුප් වර්ගයක ප්‍රණීත බව වැඩි කරගන්න ග්ලුටමේට් භාවිත කළා. මෙය ආහාර සඳහා සුවිශේෂි වන්නේ ජපන් බසින් ඉමහත් රසය හැඳින්වීමට යොදන යුමාමි යන පස්වන රසය ලෙස සුප්‍රසිද්ධ සුවිශේෂී රසය පනගන්නට එයට ඇති හැකියාව නිසයි. ඔහු මේ සඳහා පේටන්ට් බලපත්‍රයක් ලබා ගෙන ආහාර සැකසීම සඳහා ලොව පුරා බෙදාහරිනු ලැබු අතර නොබෝ කළකින් එය ලෝකයේ වඩාත් ජනප්‍රිය සීසනින් එක බවට පත්වුනා.

The New England Journal of Medicine නැමැති සඟරාවට 1968 දී වෛද්‍යවරයෙක් පළමු වරට මෙම MSG වලට විරුද්ධව ලිපියක් පළ කරමින් කියා සිටියේ MSG භාවිත කරන ලද චීන කෑම අනුභවයෙන් පසු තමන්ට ඉතා තද බල හදවතේ ගැසීමක් ඇතිවූ බවයි. එය චීන අවන්හල් සින්ඩ්‍රොමය ලෙසද එම සඟරාව මගින් හඳුන්වාදී තිබුණා.

ඒ සමගම ලොව පුරා විවිධ පුද්ගලයන් MSG වලට එරෙහිව ලිපි පළ කරන්නට වුනා. එම බොහෝ ලිපි සඳහා කාරනා සපයා තිබුනේ විවිධ පුද්ගලයන්ට චීන ආහාර ගැනීමෙන් පසුව ඇතිව තිබූ රෝග ලක්‍ෂණ පදනම් කරගනිමින්. මෙම ලිපිවල විද්‍යාත්මක පදනම ගැන ඇතිවූ කුකුස නිසාම 1990 දී ඇමරිකානු ආහාර හා ඖෂධ අධිකාරිය (FDA) MSG පිළිබඳව විධිමත් විද්‍යාත්මක පරීක්‍ෂණයක් සිදු කිරීමට ස්වාධීන ආතනයකට භාර දෙනු ලැබුවා.

එම පරීක්‍ෂණය මගින් සනාත වූයේ MSG භාවිතය අහිතකර නොවන නමුත් විවිධ පුද්ගලයන්ගේ සංවේදීතාවය අනුව වරකට ග්‍රෑම් 3කට වඩා භාවිත කිරීමෙන් සමහර පුද්ගලයන්ට හිසේ රුදාව, දැඩි නිදිමත, දරාගත නොහැකි පිපාසාව, වැනි කෙටි කාලීන රෝග ලක්‍ෂණ ඇති විය හැකි බවයි.

මෙම පරීක්‍ෂණයත් සමග ඇමරිකානු ආහාර හා ඖෂධ අධිකාරිය MSG යනු ආරක්‍ෂිත ආහාර රසගන්වනයක් ලෙස නම් කරනු ලැබූ අතර අන්තර්ජාතික හිසරුදාව පිළිබඳ සමාජය විසින් හිදරුදාව ඇතිකරන සුභකාරක ලැයිස්තුවෙන් MSG ඉවත් කරනු ලැබුවා.

සාමාන්‍යයෙන් සීනි හා බේකින් සෝඩා ආහාර ජීර්ණ පද්ධතිය තුල ජීර්ණය වන ආකාරයටම MSG ජීර්ණය වන බවත් අප ලබාගන්නා බොහෝ ආහාර වල අඩංගුවන ස්වාභාවික ග්ලුටමේට් ජීර්ණය වන ආකාරයටම MSG ජීර්ණය වන බවත් වැඩි දුරටත් මෙම පරීක්‍ෂණය මගින් තහවරු කරනු ලැබුවා.

නමුත් මෑත කාලීනව නැවතත් මෙම MSG කථිකාව කරළියට පැමිණි අතර වෙළඳපළේ බොහෝ නිෂ්පාදන තමන් MSG භාවිත නොකරන බවට සහතික කර සිය ඇසුරුම් වල ප්‍රදර්ශනය කරන්නට තරම් එය බලවත් වුනා. ඕනෑම දෙයක් ඕනෑවට වඩා ඕනෙම නෑ කියන සාමාන්‍ය භාවිතය මෙම ගැටලුවේදී අදාල බවයි බොහෝ දෙනාගේ මතය වී තිබෙන්නේ.

බොහෝ විට ශ්‍රී ලංකාව වැනි ආහාර සැකසීම පිළිබඳ කිසිදු තත්ත්ව පාලන ක්‍රමවේදයන් අනුගමනය නොකරන ආහාර නිෂ්පාදකයින් සිටින රටක මෙම ගැටළුව උග්‍රවීම පුදුමයට කරුනක් නොවෙයි. විශේෂයෙන් කිසිදු ප්‍රමිතියකින් තොරව රට පුරා පැතිරෙන චීන කෑම අවන්හල් ජාලය මෙයට ඍජුව වගකිව යුතුයි. ඔවුන් මෙම MSG පමණට වඩා අධික මාත්‍රාවලින් භාවිත කිරීම මගින් මෙම තත්ත්වය උදාවී තිබෙනවා.

නමුත් නිවසේ ඔබ විසින් කෑම පිසින අවස්ථාවක MSG නියම්ත පමණට භාවිත කිරීම මගින් ඔබට වන අවැඩක් නෑ. ඇත්ත ඇති සැටියෙන් දැන තමන්ගේ ආහාර රසවත් කරගන්න දැන් ඔබට අවස්ථාව තිබෙනවා. ක්‍ෂණික ආහාර භාවිත කිරීමේදි නම් මේ ගැන වඩා අවාධානයෙන් පසුවීම වඩා නුවණට හුරුයි. ජීවිතයේ ඔබ විදිය යුතු රසයක් බොරු ප්‍රචාර නිසා අනිසි බියට පත් වී නැති කරගන්න දැන් අවශ්‍යතාවයක් නෑ.

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

The post MSG (Monosodium Glutamate) යකා ඔය කියන තරම් කළුද? appeared first on familylife.

හැබැයි අපි කියන්නේ නම් බත් පමණක් ලබා නොදී පෝෂණීය ආකාරයට සකසාගත් සුප්, කැඳ, නුඩ්ල්ස්, පැස්ටා, රොටී, කට්ලට් වගේ ඕනෑම ආහාරයක් ප්‍රධාන වේලකට පවා දරුවාට ලබා දීම සුදුසුයි කියලයි.

චිකන් ෆ්‍රයිඩ් රයිස්

භාජනයක් ලිපේ තබා පොල් තෙල්, ගිතෙල් හෝ බටර්  දමා රත් කරගන්න. එයට ඉඟුරු සහ සුදු ළූණු දමා තෙම්පරාදු කරගන්න. එයට රතු ළූණු, රම්පෙ කරපිංචා එකතු කරගන්න. සිහින්ව ඉරාගත් කුකුළු මස් එකතු කර බැදෙන්නට ඉඩ හරින්න. එළවලු ටික එකතු කරලා විනාඩියක් විතර තෙම්පරාදු කරගන්න. අවසානයට බිත්තරය එකතු කරගන්න. මේ තෙම්පරාදුවටම බත් ටිකත් එකතු කරලා විනාඩියක් විතර තෙම්පරාදු කරගන්න.  ආහාරයට ගන්න වෙලාවට ගොටුකොළ ටිකත් දෙහි හෝ තක්කාලිත් එකතු කර ගන්න.

චීස් කට්ලට්

රතු ළූණු, කරපිංචා තෙම්පරාදු කරගන්න.තම්බා පොඩි කරගත් අල ගෙඩිය, ගම්මිරිස් කුඩු සහ ලුණු කුඩු එයට එකතු කරගන්න. මේ මිශ්‍රණය තෙම්පරාදු කර ලිපෙන් බාගෙන තබා පොඩි කරගත් බිත්තරය/ මාළු සමග මිශ්‍ර කරන්න. කෝර්න් පිටි සහ කඩල පිටි/ ආටා පිටි වතුර සමග එකතු කර උකු මිශ්‍රණයක් හදා ගන්න. මැදට චීස් එකතු කරගනිමින් අල මිශ්‍රණයෙන්  කුඩා බෝල හදාගෙන කොර්න් පිටි බැටර් එකේ තවරා බිස්කට් කුඩුවල දවටාගන්න. නැවත වාරයක් පිටි මිශ්‍රනයේත් බිස්කට් කුඩුවලත් දවටාගෙන හොඳින් රත් කරගත් ගැඹුරු තෙලේ  බැදගන්න.

එළවලු මිශ්‍ර චිකන් සුප්

ලුණු ගම්මිරිස් එකතු කර තම්බාගත් කුකුළු මස් කුඩාවට කපාගන්න. කුකුළු මස් තැම්බූ වතුර භාජනයක දමා තියාගන්න. ඉඟුරු, සුදු ළූණු සහ කරපිංචා බටර් වලින් තෙම්පරාදු කරගන්න. කුඩාවට කපාගත් එළවළු සහ තක්කාලි මේ තෙම්පරාදුවට එකතු කර කුකුළු මස් තැම්බූ වතුරින් එළවලු ටික තම්බාගන්න. විනාඩි 5කින් පමණ පොඩි කරගත් අල, චීස් සහ නැවුම් කිරි එකතු කරන්න.රස අනුව ලුණු ගම්මිරිස් එකතු කර විනාඩි කිහිපයක් පිසගන්න. 

පෝෂණ කැඳ

මේ කැඳ එක හදන්න භාවිතා කරන්න පුළුවන්.

රැයක් පොඟවාගත් කඩල, කව්පි, සහ මුං ඇට සෝදාගත් රතු කැකුළු හාල් සමග එකතු කර ලුණු ස්වල්පයක් සහ වතුර ටිකක් වැඩිපුර දමා තම්බාගන්න. හොඳින් තැම්බුණු පසු තල ඇට, කුරහන් පිටි, වියලි මිදි, රටකජු සහ පොල්කිරි එකතු කර විනාඩි කිහිපයක් කැටි නොගැසෙන විදියට හැඳි ගාමින්  පිසගන්න. රස අනුව ලුණු එකතු කරන්න. උතුරවාගත් මිශ්‍රණය හැන්දෙන් පොඩි කර හෝ අවශ්‍යනම් බ්ලෙන්ඩ් කර ආහාරයට ලබාදෙන්න පුළුවන්.

පෝෂණ රොටී

තම්බාගත් කඩල සහ අල ගෙඩිය හොඳින් පොඩි කරගන්න. හීනියට ලියාගත් එළවලු සහ රතු ළූණු බටර් හෝ පොල් තෙලෙන් තෙම්පරාදු කරගන්න.  තෙම්පරාදු කරගත් භාජනයටම පිටි, පොල්, බිත්තරය, ලුණු සහ ගම්මිරිස් දමා හොඳින් අනන්න. අවශ්‍ය නම් පමණක් වතුර එකතු කරන්න. ලියාගත් පලා වර්ගයද එකතු කර සාමාන්‍ය රොටි විදියටම තැටියක දමා පෝෂණ රොටිය හදාගන්න.

බනානා කේක්

බටර් සහ සීනි ක්‍රීම් බවට පත්වෙන තෙක් බීට් කරගන්න. හැන්දක්  භාවිතයෙන් හොඳින් ගසාගත්තත් කමක් නැහැ. ඉන්පසු බිත්තර 02 එකතු කර විනාඩි 5ක් පමණ බීට්  කරගන්න.  පිළිවෙළින් වැනිලා, බේකින් පවුඩර් සහ පිටි එකතු කර නැවතත් හොඳින් බීට් කරගන්න. බේකින් පවුඩර් සහ පිටි එකතු කර පෙනේරයකින් හලාගන්නට හැකියි නම් වඩාත් හොදයි. හොඳින් පොඩි කරගත් කෙසෙල් ගෙඩි එකතු කර නැවතත් බීට්  කරගන්න. අවශ්‍ය නම් නැවුම් කිරි ස්වල්පයක් එකතු කරගන්න. බටර් ගාගත් තැටියක දමා සෙල්සියස් අංශක 180ට කලින් රත්කරගත් අවන් එකේ විනාඩි 25-30 ක් පමණ බේක් කරගන්න. 

චීස් පැස්ටා

පැස්ටා හොඳින් තම්බාගෙන සෝදා වතුර බේරෙන්නට තියන්න. හීනියට ලියාගත් සුදු ළූණු සහ රතු ළූණු,  බටර්වලින් තෙම්පරාදු කරගන්න. ගාගත් කැරට් සහ වට්ටක්කා මේ තෙම්පරාදුවට එකතු කරන්න. ලුණු සහ ගම්මිරිස් එකතු කරලා විනාඩි 10ක් පමණ තම්බාගන්න. මෙයට කුඩාවට කපාගත් තක්කාලි එකතු කරලා මිශ්‍රණය හැන්දකින් පොඩි කරගන්න. අවසානයට නැවුම් කිරි එකතු කරලා විනාඩි 5ක් පමණ හැඳි ගාමින් මදක් උකු වෙනතුරු පිසගන්න. චීස් කෑල්ලත් තම්බාගත් පැස්ටාත් එකතුකර විනාඩියක් පමණ පිසගන්න. මාළු හෝ බිත්තර එකතුකරලා බබාට කවන්න පුළුවන්.

පසුගිය ලිපිය – වෙනස් විදියට පොඩ්ඩෙකුට ගුණ දේවල් කවන්න පුළුවන් විදි කිහිපයක්

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post පොඩ්ඩන්ට කෑම කවාගන්න රසට ගුණට හදන්න පුළුවන් හොඳම රෙසිපි මෙන්න appeared first on familylife.

මස් මාළු නැතුව වේලක් ගෙවාගන්න බැරි උදවියත් මේ කෑම කාලා බැලුවොත් හිත වෙනස් කරගන්න ඉඩ තියෙනවා.

පොළොස් කට්ලට්

පොළොස් කැබලි ලුණු සහ ගොරකා එකතු කර හොඳින් තම්බා පොඩි කරගන්න. තම්බාගත් අර්තාපල් පොඩි කරගන්න. තෙල් රත්කර මුලින්ම අබ ටික පිපිරෙන්න හරින්න. කරපිංචා, රතු ළූණු, සුදු ළූණු, කුඩාවට කපාගත් අමු මිරිස් එකතුකර තෙම්පරාදු කරගන්න.

මේ තෙම්පරාදුවට කෑලි මිරිස්, මිරිස් කුඩු, ගම්මිරිස් කුඩු, පොඩි කරගත් අර්තාපල් අල, පොඩි කරගත් පොළොස් සහ රස අනුව ලුණු එකතු කර විනාඩි 2-3කින් පමණ පසු ලිපෙන් බාගන්න. පාන් පිටි සහ කෝර්න්  පිටි සමාන ප්‍රමාණයන්ගෙන් ගෙන වතුර එකතු කර උකු මිශ්‍රණයක් සාදා ගන්න.

තෙම්පරාදු කරගත් අල සහ පොලොස් මිශ්‍රණය බෝල ආකාරයට සාදාගෙන පිටි මිශ්‍රණයේ දමා බිස්කට් කුඩු තවරගන්න. නැවතත් පිටි මිශ්‍රනය සහ බිස්කට් කුඩුවල තවරන්න. හොඳින් රත්කරගත් තෙලට දමා මද ගින්නේ රන්වත් පාට වනතෙක් බැදගන්න.

ටෝෆු ව්‍යංජ​නය

කෑලි කපාගත් ටෝෆු ලුණු ගම්මිරිස් දමා තම්බා වතුර හැර තෙම්පරාදු කරගන්න. ටෝෆු ටික භාජනයකට අයින් කරගෙන රත්වූ තෙලට අබ ඇට ටිකක් දමා පිපිරෙන්න ඉඩ හරින්න. ඉඟුරු සුදු ළූණු එක්කර තෙම්පරාදු කරගන්න. එනසාල්, කරාඹු නැටි, රම්පෙ, කරපිංචා, රතු ළූණු, අමු මිරිස් මේ තෙම්පරාදුවට එකතුකරන්න.

විනාඩි 2-3 පමණ බැදගත් පසු ටෝෆු මෙයට එකතු කරන්න. ඉන්පසු මිරිස් කුඩු, තුනපහ කුඩු, කහ කුඩු සහ යෝගට් එකතු කරන්න. අවසානයට කුඩාවට කපාගත් තක්කාලි, පොල් කිරි සහ රස අනුව ලුණු එකතු කර පොල්කිරි හිඳීගෙන එනවිට ලිපෙන් බාන්න.

කෝල්ස්ලෝ සලාදය

ගෝවා, කැරට්, ලොකු ළූණු සිහින්ව දික් අතට කපාගන්න. මයෝනිස් සෝස්, විනාකිරි, සීනි, ලුණු, ගම්මිරිස් කුඩු සහ දෙහි යුෂ භාජනයකට දමා හොඳින් මිශ්‍ර කරන්න. මේ මිශ්‍රණයට කපාගත් ළූණු, කැරට්, ගෝවා එකතුකර ප්‍රවේශමෙන් කලවම් කරන්න. ආහාරයට ගැනීමට පෙර පැය 02ක් පමණ ශීතකරණයේ තබන්න.

තෝසේ

සෝදා පිරිසිදු කරගත් උඳු රැයක් පෙඟෙන්නට හරින්න. වතුර බේරා හැරලා පොල් කිරි එකතු කර බ්ලෙන්ඩරයෙන් අඹරා ගන්න. පොල්කිරි උඳු මිශ්‍රණයට හාල් පිටි එකතු කරලා උකු මිශ්‍රණයක් හැදෙන තෙක් වතුර හෝ පොල් කිරි එකතුකර භාජනය පියනකින් වසා පැය 3-4ක් තියන්න.

අවශ්‍යනම් පසුව පොල්කිරි හෝ වතුර එකතු කරන්නත් පුළුවන්. රත්කරගත් තෙල් ස්වල්පයකින් අබ, කරපිංචා, කඩාගත් වියලි මිරිස් කරල්, ළූණු තෙම්පරාදු කරලා උඳු මිශ්‍රණයට එකතු කරන්න. රස අනුව ලුණුත් එකතු කරන්න. රත්කරගත් තැටියේ තෙල් ආලේප කරලා, මිශ්‍රණය වත්කරලා තොසේ හදාගන්න.

සාම්බාරුව හදන ක්‍රමය (අවශ්‍ය ප්‍රමාණයන්ගෙන් ද්‍රව්‍ය අරගන්න )

අබ, උළුහාල්, වියළි මිරිස්, සූදුරු, කරපිංචා, ලොකු ළූණු, කුරුඳු පොතු තෙම්පරාදු කරගන්න. වතුර කෝප්ප 03ක් ලිපේ තියලා, අමු මිරිස්, ඉඟුරු සුදු ළූණු, වට්ටක්කා, මුරුංගා, වම්බටු, පරිප්පු, මෑකරල්, තක්කාලි, ලුණු, කොත්තමල්ලි, ගම්මිරිස් යන ද්‍රව්‍ය එකතුකරලා තම්බාගන්න. සියඹලා යුෂ සහ තෙම්පරාදුව එකතු කරලා ලිපෙන් බාගන්න.

පොල් චට්නිය හදන ක්‍රමය (අවශ්‍ය ප්‍රමාණයන්ගෙන් ද්‍රව්‍ය අරගන්න)

අමු මිරිස්, කරපිංචා,ඉඟුරු ස්වල්පයක්, සුදු ළූණු සහ ලොකු ළූණු වතුර ස්වල්පයක් දමා අඹරා ගන්න. එයට ගාගත් පොල් එකතුකර නැවත අඹරා ගන්න. රස අනුව සියඹලා ඉස්​ම සහ ලුණු එකතු කරන්න.

කැරමල් පුඩින් 

එකම භාජනයකින් මේ සදහන් කරන සියලුම ද්‍රව්‍ය මැනගන්න. 

• දියකරගත් පිටිකිරි/ නැවුම් කිරි කොප්ප 02
• යෝගට් කෝප්ප 02
• මිල්ක්මේඩ් කෝප්ප 02
• කෝර්න් පිටි තේ හැඳි 05
• වැනිලා ස්වල්පයක්
• සීනි  කෝප්ප බාගයක්

සීනි කැරමල් කරගන්න ක්‍රමය 

සීනිවලට වතුර මේස හැඳි 02ක් දාලා හො​ඳට කලවම් කරන්න. භාජනයකට සීනි දාලා අඩු ගින්දරේ පෙන ගතිය මතු වෙනකන් රත් කරන්න.පෙන මතු වුනාට පස්සේ ගින්දර ටිකක් වැඩි කරන්න. බුබුළු මතුවෙලා සීනි ටික දුඹුරු පාට වෙනකොට ලිපෙන් බාගන්න.

භාජනෙකට යෝගට් කෝප්ප 02 දාලා කැට ගතිය නැතිවෙනකන් බීටරයකින් හෝ හැන්දකින් ගසාගන්න. එයට මිල්ක්​මේඩ් එකතු කරලා නැවතත් බීට් කරගන්න. පිටිකිරි/ ෆ්‍රෙෂ් මිල්ක් වලට කෝර්න් පිටි ටික ටික එකතු කරගන්න. කෝර්න් පිටි කැටි ගැහෙන්න ඉඩ දෙන්න එපා.

මේ මිශ්‍රනයත් යෝගට් මිල්ක්මෙඩ් මිශ්‍රණයට එකතු කරලා නැවතත් බීට් කරගන්න. අන්තිමට වැනිලා එකතු කරන්න. පුඩිම හදන භාජනයේ පතුලට කැරමල් කරගත්ත සීනි ටික දාලා පුඩින් මිශ්‍රණය ඊට උඩින් දමාගන්න. විනාඩි 20-25ක් පම​ණ ස්ටීම් කරගන්න.

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

---

 

The post කටට රසට කන්න වෙජිටේරියන් ( Vegetarian ) කෑම වට්ටෝරු කිහිපයක් appeared first on familylife.

බලන්න, ඔයාගේ පොඩ්ඩත් මේ කෑම වලට කැමති වෙයිද කියලා. වයස අවුරුද්දට වඩා වැඩි බබාලාට මේ කෑම  වර්ග හොඳින්ම ගැළපෙනවා.

පාන් පීසා

කැරට්, බෝංචි, ගෝවා, ලොකු ළුණු, තක්කාලි, බෙල්පෙපර් සිහින්ව ලියාගන්න. ලියාගත් එළවලු වලට, ගම්මිරිස් කුඩු, ලුණු කුඩු සහ බිත්තර මිශ්‍ර කරගන්න (බිත්තර ඔම්ලට් එකක් හදන විදියට). පෑන් එකකට මිශ්‍රණය වත්කරගන්න පුළුවන් තරමට උකු වෙනකන් නැවුම් කිරි එකතු කරගන්න. මස්/ මාළු/ සොසේජස් පොඩියට කපලා තෙම්පරාදු කරගන්න.

පාන් පෙතිවල වාටිය ඉවත්කරගෙන කුඩා කැබලිවලට කපාගන්න. රත්කරගත් පෑන් එකක බටර් තවරා බිත්තර මිශ්‍රණයෙන් කොටසක්  දමා තුනී කරගන්න. ඊට උඩින් තක්කාලි සෝස් තවරන්න. ඉන් පසු පාන් කැබලි අතුරන්න.

නැවත තක්කාලි සෝස් තවරා ඉතිරි බිත්තර මිශ්‍රනයත් අතුරගන්න. තෙම්පරාදු කරගත් මස්/ මාළු හෝ සොසේජස් කැබලි උඩින් ඉසින ලෙස තබාගන්න. අවසන් වශයෙන් ග්‍රේට් කරගත් චීස් අතුරාගන්න. පියනකින් වසා මද ගින්නේ බේක් කරගන්න. අනිත් පැත්ත දමාගත් පීසා එක නැවත මදගින්නේ බේක් කර හැඩයට කපාගන්න.

සොසේජස්

පොඩි දරුවෝ සොසේජස් කන්න කොයි තරම් ආසා වුනත් කඩෙන් ගන්න සොසේජස් දෙන්න මව්පියන් එතරම් කැමැත්තක් දක්වන්නේ නෑ. මේ විදියට රසවත් සහ පෝෂදායි විදියට සොසේජස් ගෙදරදී ම හදාගත්තොත් නම් බය නැතුව පොඩ්ඩට කන්න දෙන්න පුළුවන්කම තියෙනවා.

• කැමති මස් වර්ගයකින් ග්‍රෑම් 200
• ඉඟුරු
• සුදු ළුණු, ලුණු
• ගම්මිරිස් කුඩු
• කරපිංචා
• ළූණු
• තෙල්

මස් ටික බ්ලෙන්ඩර් එකකින් හොඳින් අඹරගන්න. ඉගුරු, සුදු ළූණු , ලුණු, ගම්මිරිස් කුඩු, කරපිංචා, ළූණු සහ තෙල් වෙනම යොදා අඹරාගන්න. මේ කුළුබඩු මිශ්‍රණය අඹරා ගත් මස් සමග එකතුකර හොඳින් අනාගන්න. අනාගත් මස් සහ කුළුබඩු මිශ්‍රණය ෆොයිල්, ක්ලීන් රැප් හෝ ලන්ච් ෂීට් වල ටොෆියක හැඩයට ඔතාගෙන දෙපැත්තෙන් තදින් ගැටගසා මිනිත්තු 20ක් පමණ ස්ටීම් කරගන්න.

එහෙමත් නැත්නම් උතුරන වතුර භාජනයකට (ලිප ඔෆ් කරලා) සොසේජස් ටික දාලා පියනකින් වහලා විනාඩි 20ක් විතර තම්බගන්න පුළුවන්. ඉන්පසු ඉටිකොළය ගලවාගන්න. ඉටි කොලය ගැලවූ සොසේජස් සති තුනක පමණ කාලයක් අධි ශීතකරණයක කල් තබාගැනීමේ හැකියාවද ඇත. කෑමට පෙ​ර සාමාන්‍ය ආකාරයට තෙලේ බැදගන්න. මස් වෙනුවට මාළු, පොළොස් වගේ දේවල් වලිනුත් මේ ක්‍රමේටම සොසේජස් හදාගන්න පුළුවන්.

චීස් කට්ලට්

අල, පොළොස්, මාළු, ඉඟුරු, සුදුළූණු, ලුණු, ගම්මිරිස් කුඩු, කෑලි මිරිස්, කරපිංචා, ළූණු සියල්ලම හොඳින් තෙම්පරාදු කරගන්න. මේ මිශ්‍රණය නිවාගෙන අවශ්‍ය ප්‍රමාණයේ චීස් කැබලි මැදට හිටින විදියට කට්ලට් බෝල සාදාගන්න. ​කෝර්න් පිටි සහ පාන් පිටි සම ප්‍රමාණයන්ගෙන් අරන් මේ බෝලවල දවටා ගන්න.

බිත්තර සාරු තවරාගත් කට්ලට් බෝල පාන් කුඩු වල දවටාගන්න. නැවත වරක් බිත්තර සාරු තවරාගෙන බිස්කට් කුඩුවල දවටන්න. හොඳින් රත්කරගත් ගැඹුරු තෙලේ රන්වන් පාට වනතුරු  බැදගන්න.

කුකුළු මස් සහ වට්ටක්කා මිශ්‍ර සුප්

කුකුළු මස් සෝදා කුඩා කැබලිවලට කපා තම්බගන්න. පොතු හැර කුඩාවට කපාගත් වට්ටක්කා, මස් තැම්බූ වතුරින්ම තම්බා පොඩි කරගන්න. මස් සහ වට්ටක්කා තැම්බූ වතුර භාජනයකට දමා ඉවත්කර තබාගන්න. භාජනයක් ලිප තියා සූදුරු, කරපිංචා සහ ළූණු තෙම්පරාදු කරගන්න. මෙයටම පරිප්පු සහ තුනපහ එකතුකර මස් සහ වට්ටක්කා තැම්බූ වතුර ස්වල්පයක් එක කර තම්බාගන්න. පරිප්පු තැම්බුනු පසු හැන්දකින් පොඩි කරගන්න.

කෝර්න් පිටි එක්කර ගැනීමෙන් මේ තැම්බුම උකු කරගන්න පුළුවන්කම තියෙනවා. මස්, වට්ටක්කා සහ ඒවා තැම්බූ වතුර මෙයටම එකතු කරගන්න. ලුණු, ගම්මිරිස් රස අනුව එක් කර පිසගන්න. අවශ්‍ය නම් නිවුණු පසු බ්ලෙන්ඩ් කරගන්න පුළුවන්.

ස්ටීම් කේක්

බිත්තර 2 හොඳින් ගසාගන්න. අනුපිලිවෙලට සිනි, කිරි, තෙල්, බේකින් පවුඩර් දමමින් හොඳින් කලවම් කරගන්න. මෙයට පාන්පිටි ටිකින් ටික  එකතුකර කැටි නොගැසෙන ආකාරයට නැවත මිශ්‍ර කරගන්න. වැනිලා බිඳුවක් ද එකතු කරන්න. සුදුසු භාජනයක ¾ ක් වැහෙන තරමට මේ මිශ්‍රණය වත්කර උඩින් වියළි මිදි දමා හොඳින් වසා වාෂ්පයෙන් විනාඩි 20ක් තම්බාගන්න.

පොටැටෝ වෙජස්

• තරමක් විශාල අර්තාපල් අල අවශ්‍ය පමණට
• තෙල්
• කහ කුඩු
• ගම්මිරිස් කුඩු
• කෝර්න් පිටි

පොතු අයින් කරගත් අල දිග අතට කපාගෙන බාගෙට තම්බාගන්න. තෙත මාත්තු කරලා වතුර අයින් කරගන්න. කෝර්න් පිටි, ලුණු, ගම්මිරිස්, කහ සහ තෙල්  අල කැබලිවල දවටාගන්න. සෙල්සියස් අංශක 180ට රත්කරගත් අවන් එකේ විනාඩි 25ක්  බේක් කරගන්න. එහෙමත් නැත්නම් රන්වන් පාට වෙනකන් ගැඹුරු තෙලේ බැදගන්න.

මේ වගේම තවත් රෙසිපි පහක් බලන්න මෙතනින් පිවිසෙන්න –  කෑමට හොර පොඩ්ඩන්ට ගුණදායක කෑම කවාගන්න පුළුවන් කෑම රෙසිපි පහක්

බලන්න මේ ලිපියත් මේ යුද්ධය ජය ගන්න ඔබට උපකාරී වෙනවා නේද කියල – පොඩ්ඩන්ට කවන්න අම්මලාට පාවිච්චි කරන්න පුළුවන් උපක්‍රම ටිකක්

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post වෙනස් විදියට පොඩ්ඩෙකුට ගුණ දේවල් කවන්න පුළුවන් විදි කිහිපයක් appeared first on familylife.

මේ උත්සව සමය නිසා ගෙදරට එන අයට සංග්‍රහ කරන්නත් මෙම රෙසිපි වල ප්‍රමාණය වැඩි කරල හදාගන්න පුළුවන්. මෙවර නත්තලට අලුත් විදිහට චිකන් හදන්නත් පුළුවන්. වෙනසකටත් එක්ක මේ විදියට චිකන් හදලා ගෙදර අයගේ ප්‍රතිචාර ගැන අපිටත් කියන්නකෝ.

කුකුළු මස් කලුපොල් මාළුව

• සාමාන්‍ය ප්‍රමාණයට කපාගත් කුකුළු මස්  කිලෝ 01
• කබලේ බැදගත් පොල් මේස හැඳි 02
• බැදගත් තුනපහ තේ හැඳි 03
• බැදගත් මිරිස් කුඩු තේ හැඳි 02
• ගම්මිරිස් කුඩු තේ හැඳි 02
• කහ කුඩු තේ හැඳි ½
• ඉඟුරු සුදුළුණු පේස්ට් මේස හැඳි 1 ½
• සිහින්ව ලියාගත් රතු ළුණු මේස හැඳි 6-7
• කරාඹු නැටි 3-4
• රම්පෙ
• කරපිංචා
• එනසල්
• තෙල් මේස හැඳි 2-3
• සාමාන්‍ය ප්‍රමාණයේ තක්කාලි ගෙඩි 3ක්
• අබ තේ හැන්දක්
• අමු මිරිස් කරල් 2-3
• ලුණු අවශ්‍ය පමණට.

කපාගත් මස් කැබලිවලට තුනපහ, මිරිස්, ගම්මිරිස් සහ කහ එකතුකරලා පැයක් විතර පදම් වෙන්න තියන්න. රන්වන් පාට වෙනකන් කබලේ බැදගත්ත පොල් ටික බ්ලෙන්ඩරයකින් හෝ වංගෙඩියකින් කුඩාවට අඹරා ගන්න. මැටි හට්ටියක් ලිපේ  තියලා තෙල් දමා රත්වෙන්න තියන්න. මුලින්ම අබ ටික දමා පිපිරුණු පසු ඉඟුරු සුදු ළුණු පේස්ට් එ​ක තෙම්පරාදු කරගන්න. රතු ළුණු, අමු මිරිස්, රම්පෙ, කරපිංචා, කරාඹු නැටි සහ එනසාල් සියල්ලම දමා තෙම්පරාදු කරගන්න. දැන් පදම් කරගත්ත චිකන් සහ තක්කාලි කෑලි ටිකත් එයට එකතු කරන්න. අඹරා ගත් පොල් ටික එකතු කරලා අවසන් වශයෙන් වතුර අඬු කෝප්ප එකක් එකතු කරගන්න. වතුර හි​ඳෙනතුරු මද ගින්නේ පිසගන්න.

බටර් චිකන්

• සාමාන්‍ය ප්‍රමාණයට කපාගත් කුකුළු මස් ග්‍රෑම් 500 (කටු රහිත)
• යෝගට් හෝ මුදවපු කිරි මේස හැඳි 03
• කුඩාවට කපාගත් සාමාන්‍ය ප්‍රමාණයේ තක්කාලි ගෙඩි 8-9
• එළවළු තෙල් මේස හැඳි 3-4
• සිහින්ව ලියාගත් ලොකු ළුණු ගෙඩි 1 ½
• සිහින්ව ලියාගත් සුදු ළුණු බික් 3-4
• වතුර මේස හැඳි  02
• තුනපහ හෝ ගරම් මසාලා තේ හැඳි 02
• මිරිස් කුඩු තේ හැඳි 01
• නැවුම් කිරි අඬු කෝප්ප ½
• බටර් අඬු කෝප්ප ¼
• ලුණු අවශ්‍ය ප්‍රමාණයට

මුදවපු කිරි හෝ යෝගට්, තුනපහ හෝ ගරම් මසාලා, මිරිස්, ලුණු, මස් සමග මිශ්‍ර කර පැයක් පමණ පදම් කරගන්න. රත් කරගත් මැටි හට්ටියකට තෙල් දමා තෙල් රත්වීමෙන් පස්සේ සුදු ළුණු, ළුණු තෙම්පරාදු කරගන්න. එයටම තක්කාලි එකතු කරන්න.පාඩම් කරගත්ත කුකුළු මස් මිශ්‍රණය එකතු කර විනාඩියක් පමණ තෙම්පරාදු කරගන්න. වතුර මිශ්‍ර කර විනාඩි 15ක් පමණ මද ගින්නේ පිසගන්න (පියනකින් හට්ටිය වහන්න). අවසානයට නැවුම් කිරි එකතු කර විනාඩි 5ක් පමණ පිසගන්න. රස අනුව ලුණු එක් කරන්න.

චිකන් ස්ටූ

• සාමාන්‍ය ප්‍රමාණයට කපාගත් චිකන් ග්‍රෑම් 500
• මිරිස් තේ හැඳි 2-3, කහ තේ හැඳි 1/2
• ගම්මිරිස් තේ හැඳි 2-3, දෙහි ගෙඩි බාගයක යුෂ
• සාමාන්‍ය ප්‍රමාණයේ ලොකු ලූණු ගෙඩියක්
• රම්පෙ, කරපිංචා
• සුදු ලූණු බික් 3-4
• අබ ඇට
• කුරුඳු කැබැල්ලක් හෝ කුරුඳු කුඩු ස්වල්පයක්
• කරාඹු නැටි 2-3
• එනසාල් ස්වල්පයක්
• තෙල් මේස හැඳි 02
• ලුණු අවශ්‍ය පමණට

ලුණු, මිරිස් කුඩු, කහ, ගම්මිරිස්, දෙහි මස් සමග මිශ්‍ර කරලා පැයක් විතර පදම් වෙන්න තියන්න. නන්ස්ටික් භාජනයකට මේ මස් ටික දාලා වෙන කිසිම දෙයක් නොදා දෙපැත්ත පෙරළමින් විනාඩි 15 ක් විතර මද ගින්නේ තම්බගන්න. භාජනය පියනකින් වහලා මස් ටික පිළිස්සෙන්නේ නැති වෙන්න තම්බාගන්න වගබලා ගන්න. තැම්බුණු මස් ටික වෙනත් භාජනයකට අයින් කරගන්න. නන්ස්ටික් බදුන ලිපේ තියලාතෙල් ටික රත්කරන්න. අබ ටික දාලා අබ පිපිරුණාට පස්සේ, තලාගත් සුදු ලූණු, රම්පෙ, කරපිංචා, ලොකු ලූණු,  රස අනුව ලුණු එකතුකරලා තෙම්පරාදු කරගන්න. තම්බාගත් මස් සහ ඉස්ම ටික මේ තෙම්පරාදුවටම එකතු කරලා ආයෙත් මද ගින්නේ විනාඩි 10ක් විතර තම්බාගන්න.

මසාලා චිකන්

• සාමාන්‍ය ප්‍රමාණයට කපාගත් කුකුළු මස් ග්‍රෑම් 500
• ගරම් මසාලා කුඩු තේ හැඳි 2-3
• කහ කුඩු තේ හැඳි 1/2
• මිරිස් කුඩු තේ හැඳි 2-3
• පොඩියට කපාගත් ලොකු ලූණු ගෙඩි 1-2
• පොඩියට කපාගත් තක්කාලි ගෙඩි 2-3
• මීකිරි මේස හැඳි 6ක් පමණ
• ඉඟුරු සුදු ලූණු පේස්ට් තේ හැඳි 02
• අමු මිරිස් කරල් 1-2
• කුරුඳු පොතු කැබැල්ලක් හෝ කුඩු
• අබ
• එනසාල්
• ගිතෙල් මේස හැඳි 02
• මිංචි කොළ  ස්වල්පයක්
• කොත්තමල්ලි කොළ මේස හැඳි 03 කොළ
• සූදුරු ස්වල්පයක්
• වතුර සහ නැවුම් කිරි අඬු කෝප්ප 1/2
• ලුණු අවශ්‍ය තරමට

ලුණු, කහකුඩු, මිරිස්කුඩු, ගරම් මසාලා කුඩු, ඉඟුරු සුදු ලූණු පේස්ට්, මී කිරි සහ මස් ටික එකට මිශ්‍ර කරලා පැය 2ක් පමණ පදම් කරගන්න. මැටි හට්ටියකට ගිතෙල් දාලා රත් වුණාම අබ ටික දාලා පිපිරෙන්න අරින්න. එයට සූදුරු, කුරුඳු, එනසාල්, ලොකු ලූණු එකතුකරලා හොදින් තෙම්පරාදු කරගන්න. පදම් කරගත් කුකුළු මස්, අමු මිරිස් සහ තක්කාලි මේ තෙම්පරාදුවට එකතු කරලා මද ගින්නේ තම්බාගන්න. මේ මිශ්‍රණය හිඳුනාට පස්සේ, මස් ටික වැහෙන තරමට වතුර එකතු කරලා උකු වෙනතුරු මද ගින්නේ තම්බා අවසානයට නැවුම් කිරි සහ රස අනුව ලුණු එකතු කරලා විනාඩි 5ක් පමණ වෙලා පිසගන්න.

චිකන් නගට්ස්

• කුකුළු මස් ග්‍රෑම් 500,
• නැවුම් කිරි අඬු කෝප්ප 1/2
• ලුණු කුඩු
• ගම්මිරිස් කුඩු
• කරපිංචා පේස්ට්
• සුදු ලූණු පේස්ට්
• බිත්තර සාරු
• බිස්කට් කුඩු
• තෙල්
• පාන් පිටි හෝ කොර්න් පිටි

චිකන් ටික පැතලි හැඩයකට කුඩාවට කපාගන්න. ලුණු කුඩු, ගම්මිරිස් කුඩු, කරපිංචා පේස්ට්, සුදු ලූණු පේස්ට් අවශ්‍ය පමණට අරගෙන නැවුම් කිරි එකතු කරලා මිශ්‍රණයක් හදාගන්න. මිශ්‍රණය උකු වෙන්න පාන් පිටි/ කෝර්න් පිටි එකතු කරගන්න. චිකන් කැබලිවල මේ මිශ්‍රණය තවරලා බිත්තර සාරුවලත් බිස්කට් කුඩුවලත් තවරලා ගැඹුරු තෙලේ බැ​ඳගන්න.

කවරයේ ඡායාරූපය – someecards.com

---

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

---

The post මෙදා පාර නත්තල් කෑම මේසයට වෙනස්ම චිකන් කරියක්… appeared first on familylife.

1. වම්බටු මෝජු

අවශ්‍ය ද්‍රව්‍ය :- වම්බටු ග්‍රෑම් 500, රතු ලූණු ග්‍රෑම් 250, අමු මිරිස් ග්‍රෑම් 100, සුදු ලූණු පේස්ට් මේස හැදි 2ක්, ඉගුරු පේස්ට් තේ හැන්දක්, අබ පේස්ට් තේ හැදි 3ක්, එනසල් ඇට 1-2, කරාඹු නැටි 1-2,රම්පේ කරපිංචා, කහ තේ හැදි 1/4,  මිරිස් කුඩු මේස හැදි 2ක්, සීනි ලුණු සහ රස අනුව, විනාකිරි මේස හැදි 5ක්, පොල් මිටිකිරි කෝප්ප අඩු කෝප්ප බාගයක්, තෙල් අවශ්‍ය ප්‍රමාණයට, මැටි හට්ටියක්.

සාදන අකාරය :- සෝදාගත් වම්බටු සිහින් තීරුවලට කපාගෙන රන්වන් පාට වෙනකන් ගැඹුරු තෙලේ බැදගන්න. රතු ලූණු එකම ප්‍රමාණයේ ගෙඩිවලින් තෝරාගන්න. රතු ලූණුත් තප්පර 30-45ක් පමණ වෙලාවක් ගැඹුරු තෙලේ බැදගන්න. ගැඹුරු තෙලේ බැදගත්ත ද්‍රව්‍යවල තෙල් පේපර් ටිෂු භාවිතයෙන් ඉවත්කරගන්න. අමු මිරිස් කරල් මැදින් කැපුමක් දමා ඒවාත් තප්පර 30-45ක් පමණ ගැඹුරු තෙලේ බැදගන්න. මැටි හට්ටිය ලිපේ තියලා තෙල් දමා රම්පේ, කරපිංචා, එනසාල්, කරාඹු නැටි සියල්ලම තෙල් මේස හැදි 1/2කින් තෙම්පරාදු කරගන්න. එයට  මිරිස් කුඩු, අබ පේස්ට්, සුදු ලූණු පේස්ට්, ලුණු, සීනි, විනාකිරි සියල්ල මිශ්‍ර කර මිටිකිරි කෝප්ප බාගයද දමා හිඳෙනතුරු පිසගන්න. අවසානයට බැදගත් බටු, රතු ලූණු සහ අමු මිරිසුත් එයටම එකතු කරගන්න.

2. මාළු ඇඹුල් තියල්

කෙලවල්ලා හෝ බලයා මාළු ග්‍රෑම් 750ක්, ගොරකා පේස්ට් මේස හැදි 3ක්, කරපිංචා ටිකක් වැඩිපුර,රම්පේ කොළ 2ක් විතර, ගම්මිරිස් කුඩු මේස හැදි 3ක් පමණ, සුදු ලූණු බික් 4-5ක් හෝ පේස්ට් මේස හැදි 2ක්, මිරිස් කුඩු මේස හැදි 2ක්, රස අනුව ලුණු, මැටි හට්ටියක්.

මාළු ටික සෝදලා තරමක කෑලි වෙන්න කපාගන්න. ගොරකා පේස්ට් නැත්තන් ගොරකා බික් 4-5ක් අරන් තම්බාගන්න. ගොරකා පේස්ට් හෝ තම්බා පොඩියට කපාගත්ත ගොරකා ටික, කරපිංචා ඉත්තක්, ගම්මිරිස්, සුදු ලූණු, මිරිස් කුඩු, ලුණු සියල්ලම බ්ලෙන්ඩර් එකට දාලා වතුර චුට්ටකුත් දාලා පේස්ට් එකක් වෙනකන් අඹරාගන්න. මාළු කෑලි ටික මේ පේස්ට් එකේ හොදට තවරාගන්න. මැටි හට්ටියක් ගෙන රම්පෙත් කරපිංචාත් මුට්ටියේ අඩිය වැහෙනතුරු හොඳින් අතුරගන්න. මේකෙන් ඇඹුල් තියල් එකට හො​ඳ සුවදක් එනවා වගේම මාළු කෑලි හට්ටියේ යට ඇළෙන එකෙනුත් වළකිනවා. මාළු කෑලි ප්‍රවේශමෙන් හට්ටියේ අතුරගන්න. ඒවා වැහෙන තුරු වතුර වත්කරන්න. අඩු ගින්දරේ වතුර හිදෙන තුරු තම්බාගන්න. මාළු කෑලි ටික හැන්ද දමා මිශ්‍ර නොකර තැම්බෙන්න ​ඉඩ හරින්න.

3. ළූණු රටකජු බැදුම

රටකජු ග්‍රෑම් 250- 300, ලොකු ළූණු ග්‍රෑම් 500, වියළි මිරිස් ගෑම් 200, ලුනු අවශ්‍ය තරමට, කරපිංචා, සුදු ලූණු ග්‍රෑම් 250, පොල්තෙල්

සෝදා පිරිසිදු කරගත්ත ලොකු ලූණු සිහින්ව ලියාගන්න. ලියාගත්ත ලූණු වලට ලුණු මිශ්‍ර කරලා යන්තමින් අනාගන්න. මේ ලූණු ටික ගැඹුරු තෙලේ රන්වන් පාට වෙනකන් බැදගෙන තෙල් බේරෙන්න තියන්න. රටකජු ටිකත් ගැඹුරු තෙලේ රන්වන් පැහැය එනකන් බැදලා තෙල් බේරෙන්න තියන්න. මිරිස් කරල් ටිකත් කළු පාට නොවෙන විදියට ප්‍රවේශමෙන් බැදලා තෙල් බේරලා තරමක් කෑලි හිටින විදියට අතින් කුඩු කරගන්න. කරපිංචා කොළ ටික වගේම තීරු කපාගත්ත සුදු ලූණු ටිකත් වෙන වෙනම ගැඹුරු තෙලේ බැදගන්න. සුදු ලූණුත් රන්වන් පාට වෙනකන් බැදගන්නවනම් වඩා හොදයි. අවසානයේ මේ සියළුම දේවල් එකට එකතු කරගෙන රස අනුව ලුණු එකතු කරගන්න තමයි තියෙන්නේ.

4. සීනි සම්බෝල

ලොකු ලූණු හෝ රතු ළූණු ග්‍රෑම් 500, කෑලි මිරිස් මේස හැදි 3ක්, මිරිස් කුඩු මේස හැදි 3ක්, රම්පේ, කරපිංචා, එනසාල් 2-3, කරාඹු නැටි 2-3, කුරුදු කෑල්ලක්,  උම්බලකඩ කෑලි මේස හැදි 3ක්, සියඹලා ඉස්ම  මේස හැදි 2ක්, ඉඟුරු සුදු ලූණු පේස්ට් මේස හැන්ද බැගින්, සීනි මේස හැදි 3ක් , රස අනුව ලුණු. (මේ හැමදෙයක්ම තමන්ගේ කැමැත්තට අනුව වුණත් දාගන්න පුළුවන්)

සිහින්ව ලියාගත් ලූණු වලට ලුණු, සියඹලා, සීනි, මිරිස් කුඩු සහ කෑලි මිරිස් දාලා අනාගන්න.මේවා බෑදෙන්න තරම් අවශ්‍ය තරමට තෙල් ටිකක් ලිපේ තියලා රම්පේ, කරපිංචා, එනසාල්, කරාඹු නැටි, කුරුදු, උම්බලකඩ, ඉඟුරු සහ සුදු ලූණු තෙම්පරාදු කරගන්න.  එයට අනාගත්ත ලූණු ටිකත් දාලා බැදගන්න. පොල් කටු හැන්දේ මිටෙන් සැරින් සැරේ මේ බැදුම පෙරලන්න. රස අනුව අවශ්‍ය නම් තව දේවල් එකතු කරගන්න. මේ විදියට සැරින් සැරේ කූරු ගාමින් සීනි සම්බෝලේ දුඹුරු පාටට හුරු තද මෙරූන් පාටක් එනකන් මලවගන්න.

5. මැලේ අච්චාරු

රතු ලූණු හෝ ලොකු ළූණු ග්‍රෑම් 500, මාලු මිරිස් ග්‍රෑම් 200, කැරට් ග්‍රෑම් 200, රට ඉදි ග්‍රෑම් 450, ලුණු දෙහි ගෙඩි 2යි,  සීනි ග්‍රෑම් 250, ඉගුරු සුදු ලූණු අබ පේස්ට් මේස හැදි 2යි, විනාකිරි අඩු කෝප්ප 4/3, අන්නාසි කැබලි අඩු කෝප්පයක්, රස අනුව මිරිස් කුඩු සහ ලුණු, මැටි හට්ටියක්

ලොකු ලූණු ගෙඩි හතරට කපාගන්න (රතු ලූණු නම් සම්පූර්ණ ගෙඩියම). මාලු මිරිස් කරල තුනට සහ ළූණු, දෙහි ගෙඩි තීරු ලෙස කපාගන්න. කැරට් අල දෙකට කපා නැවත තීරු කපාගන්න. ලුණු, අබ, සුදු ලූණු සහ ඉඟුරු එකතු කරගත් විනාකිරි මැටි හට්ටියකට දමා ලිප තබන්න. සීනි ද දමා හොදින් මිශ්‍ර වෙන විදියට හැදිගාන්න. මිශ්‍රනය උතුරාගෙන එනවිට මෙයට කැරට්, රට ඉදි, මාලු මිරිස්, ලොකු ළූනු දාලා ලිපෙන් බා​ගන්න.

කවරයේ ඡායාරූපය – coolstyle.ba

---

මුළුතැන්ගෙයි කටයුතු පිළිවෙලට පහසුවට කරගන්න වගේම රසට, ගුණට, පදමට ඉවුම් පිහුම් කරන්න කැමති ඔබ වැනි සියලුදෙනාගේ දැනුම හා අවධානය සඳහා මෙම ලිපිය පහත මාධ්‍ය ඔස්සේ ෂෙයා කිරීමට අමතක නොකරන්න

---

The post කාර්යබහුල ඔබට කල් තබාගෙන ආහාරයට ගන්නට සකසා ගත හැකි ආහාර appeared first on familylife.