“Family Trip – යන්න රට වටේ” ලිපි මාලාවේ මුල්ම ලිපියෙන් අපි අරන් එන්නේ මහනුවර දිස්ත්‍රික්කය තුළ ඔබට සංචාරය කරන්න පුළුවන් ස්ථාන ගැනයි. ඉතාම සුන්දර වගේම සුවපහසු දේශගුණයක් තියෙන මහනුවර කියන්නේ විනෝද ගමනක් යන්න, නිවාඩුවක් ගත කරන්න සුදුසුම ප්‍රදේශයක් විදියට හදුන්වන්න පුළුවන්.

මහනුවර ලෝක උරුම නගරයක් බව ඔබ දන්නවා ඇති. සාමාන්‍යයෙන් මහනුවර සංචාරයට එන කෙනෙක් නොවරදවාම දළදා මාළිගාව, සතර මහා දේවාල, වැව රවුම, කෞතුකාගාර, පේරාදෙණිය උද්භිද උද්‍යානය, ගම්පොළ පිහිටලා තියෙන අම්බුළුවා​ව වගේ ස්ථානවල සංචාරය කළත් අපි පහතින් සදහන් කරන සමහර ස්ථාන ඔබට මගහැරෙන්නට ඉඩ තියෙනවා.

1. උඩවත්ත කැලේ

ත්‍රිත්​ව විද්‍යාලය පහු කරලා මීටර් 100 ක් වගේ මාළිගාව පැත්තට එනකොට හමුවෙන තපෝවන විහාර මාවතේ මීටර් 500ක් ගියාම උඩවත්ත කැළේට පිවිසෙන්න පුළුවන්කම තියෙනවා. භික්ෂූන් වහන්සේලා භාවනායෝගීව වැඩ සිටින තපෝවන විහාරයටත් මෙතනින් ම යෑමේ හැකියාව තියෙනවා. ලංකාවේ පළමු රක්ෂිත වනෝද්‍යානයක් විදියට සැළකෙන උඩවත්තකැළේ වනයට පිවිසෙන්න ඔබට සුළු මුදලක් ගෙවා ප්‍රවේශපත්‍රයක් ගන්න්න වෙනවා.

විශාල ප්‍රදේශයක් පුරා පැතිරුණු පුස්වැලක්, නා වනයක් වගේම කොස්, අංකෙන්ද, වල්දෙල්, පිහිඹිය, මහෝගනී, කිතුල්, මී, නා, මදටිය, වන සපු, සපු, දූරියන්, කුරුඳු, මොර, නුග ඇතුළු ශාක විශේෂ 405 ට වැඩි ප්‍රමාණයක් මෙහි තියෙනවා. ඒ වගේම පක්ෂී විශේෂ 81 ක්, සර්ප විශේෂ 21 ක් සහ සමනල් විශේෂ 75ක් පමණත් මේ වනයේ ජීවත්වන බව පැවසෙනවා. මේ අතර ශ්‍රී ලංකාවට වගේම උඩරටත් ආවේනික සත්ත්ව ශාක සහ සත්ත්ව විශේෂ දකින්නට පුළුවන්. කොඩිමලේ කන්ද, ගැරිසන් සොහොන් බිම් වගේම ජල පොකුණුද මේ වනය ඇතුළෙදි දැකගන්න පුළුවන්කම ලැබෙනවා. වනය ඇතුළතට හිරු එළිය වැටීම ඉතා අඩුවෙන් සිදු වන නිසා දැඩි සිසිලසක් මෙහිදී අත්විදින්න පුළුවන් වෙනවා.

2. ආතර් සීට්

වේල්ස් පාක් හන්දියේ සිට අම්පිටිය හන්දියේ වැව රවුම පාර දක්වා රජපිහිල්ල මාවතේ මීටර් 200 ක් ගියාම හමුවෙන ආතර්ස් සීට් කියන්නේ මුහුදු මට්ටමින් අඩි 1790ක් උසින් පිහිටලා තියෙන නැරඹුම් ස්ථානයක්. මෙතනට ගියාම දළදා මාළිගාව, කිරි මුහුද වැව, ත්‍රීකුණාමල වීදිය ඇතුළුව මහනුවර නගරය දර්ශනීය විදියට නැරඹීමේ හැකියාව තියෙනවා.

3. දුණුමඩලාව රක්ෂිතය

මුහුදු මට්ටමේ සිට අඩි 1800- 3200 උසින් පිහිටලා තියෙන දුණුමඩලාව රක්ෂිතය මහ නගර සභාවක් විසින් පාලනය කරනු ලබන එකම රක්ෂිතය විදියට සැළකෙනවා. මෙයට ඇතුල් වෙන්න නම් මහනගර සභාවෙන් අවසර ගන්න සිදු වෙනවා. ආතර් සීට් අසළින් ඇති සරණංකර මාවතේ ගියාම මේ වනයට ඇතුල් වෙන්න පුළුවන්කම තියෙනවා.

4. නෙල්ලිගල විහාරය

කොළඹ සිට මහනුවර පිලිමතලාව මාර්ගයේ පොල්ගහමුල හන්දියයෙන් ගිහින්  මුරුතලාව, කොබ්බෑකඩුව පසුකරමින් කිලෝමීටර් 2 ක් පමණ ඉහළට නගිනකොට නෙල්ලිගල ජාත්‍යන්තර බෞද්ධ මධ්‍යස්ථානය හමු වෙනවා. ඉතාම සුන්දර වටපිටාවක පිහිටලා තියෙන මේ විහාරස්ථානයේ ශ්‍රී ශාඛ්‍යසිංහ මහ සෑය නමින් අලංකාර චෛත්‍යක්ද පිහිටලා තියෙනවා. ඒ වගේම අම්බුළුවාව, අරණායක, අලගල්ල කන්ද, හන්තාන, හුන්නස්ගිරිය වගේ ඉසව්වල සුන්දර දර්ශනයන් මේ ස්ථානයේ ඉදලා දැක බලා ගන්න හැකියාව තියෙනවා.

5. පේරාදෙණිය විශ්ව විද්‍යාලය

ලංකාවේ සුන්දරතම විශ්ව විද්‍යාලයට විදියට හදුන්වන්න පුළුවන් පේරාදෙණිය සරසවියට, කොළඹ මහනුවර මාර්ගයේදී මුණගැහෙන ගලහා පාරෙන් ගිහින් පිවිසෙන්න හැකියාව තියෙනවා. මුලින්ම හමුවෙන්නේ වෛද්‍ය පීඨය. ඉන්පසු විජේවර්ධන ශාලාව, ජයතිලක ශාලාව, විද්‍යා පීඨය, කලා පීඨය, WUS පරිශ්‍රය, විශ්ව විද්‍යාලයේ පරිපාලන කටයුතු සිදු කෙරෙන සනාතන මන්දිරය සහ  අක්බාර් පාලමෙන් එපිට ගම්පොළ නුවර පාරේ පිහිටා ඇති ඉංජිනේරු පීඨය වශයෙන් දැකිය හැකි බොහෝ ස්ථාන තියෙනවා. කලා පීඨය පහු කරමින් ගලහා පැත්තට යනකොට තියෙන්නේ නේවාසිකාර සහ සරසවියට ආඩම්බරයක් වුණු සරත්චන්ද්‍ර එළිමහන් රංග පීඨය. මෙහි තියෙන විශේෂ පිහිටීම නිසා මෙය හදුන්වනේ “වල” යන අන්වර්ත නමින්. පැමිනෙණ සියළුම සංචාරකයන්ට විශ්ව විද්‍යාලය තුළ තියෙන සමහර ස්ථන වලට යෑමට අවසර නැති නිසා ඒ පිළිඹදවත් දැනුවත් වීම අත්‍යවශ්‍යයි. ආපන ශාලා සහ සනීපාරක්ෂක පහසුකමුත් ලබාගන්න පුළුවන්කම තියෙනවා.  කදු නගින්න ප්‍රිය කරන පිරිසක් නම් නිසි උපදෙස් ලබාගෙන සුන්දර හන්තාන කදු වැටිය තරණය කරන්නත් පුළුවන්.

6. ලෝක බෞද්ධ කෞතුකාගාරය/  මහනුවර ජාතික කෞතුකාගාරය

2011  මහනුවරදි පිහිටවපු  ලෝක බෞද්ධ කෞතුකාගාරය ලොව පළමු ජාත්‍යන්තර බෞද්ධ කෞතුකාගාරය විදියට සැලකෙනවා. එය මහනුවර ජාතික කෞතුකාගාරය‎ සහ ශ්‍රී දළදා මාළිගාව ආසන්නයේ තමයි පිහිටුවලා තියෙන්නේ

කෞතුකාගාරය තුළ ශ්‍රී ලංකාව, ඉන්දියාව, බංග්ලාදේශය, නේපාලය, පකිස්තා​නය, ජපානය, චීනය, කොරියාව, ඉනිදුනීසියාව, තායිලන්තය,. මියන්මාරය, ලාඕසය, වියට්නාමය, කාම්බෝජය, මලයාසියාව, භූතානය සහ ඇෆ්ගනිස්ථානය යන රටවල් වලට අදාළ කෞතුක වස්තූන් දැකගන්න පුළුවන් වෙනවා.

1942 දී මහජන ප්‍රදර්ශනය සඳහා විවෘත කළ මහනුවර ජාතික කෞතුකාගාරය කෞතුකාගාරය නඩත්තු කරන්නේ, ජාතික කෞතුකාගාර දෙපාර්තමේන්තුව මගින්. ප්‍රදර්ශනයට තබා ඇති දේවල් අතර මහනුවර යුගයට හා මෙරට බ්‍රිතාන්‍ය යටත් විජිත සමයට අයත් ආයුධ, ​ආභරණ, මෙවලම් හා අනෙකුත් විවිධ වස්තූන් දැකගන්න පුළුවන්කම තියෙනවා. මෙය පිහිටලා තියෙන්නේ දළදා මාළිගාව ආසන්නයේම යි. මේ විෂය පිළිබ​ඳව ඇල්මක් දක්වන කෙනෙක්ට සම්පූර්ණ දිනයක් හෝ ගත​කරමින් අධ්‍යනය කළ හැකි තරම් දේවල් මේ ස්ථානවලදි දක්නට ලැබෙනවා.

7. වේල්ස් උද්‍යානය

රාජකීය මාලිගා උද්‍යානය, එහෙමත් නැත්තන් වේල්ස් පාර්ක් කියන්නේ පෙම්වතුන්ගේ පරාදීසයක් විදියට හදුන්වන්න පුළුවන්. ප්‍රවේශ පත් අරන් ඇතුල් වෙලා දවසම වුණත් මෙතන කල් ගත කරන්න පුළුවන්කම තියෙනවා.

මහනුවර දිස්ත්‍රික්කය තුළ පහසුවෙන් සංචාරය කරන්න පුළුවන් ස්ථාන කීපයක් තමයි අපි මේ ලිපියෙන් අරන් ආවේ. කොහොම වුණත් ඔබ සංචාරය අතරතුර පාසටහන් පමණක් ඉතිරි කර එන ලෙසත් මතකය පමණක් රැගෙන එන ලෙසත් සිහිපත් කරනවා. එසේ​ම ඒ ඒ ස්ථානවල ඇති ස්වභාවික සුන්දරත්වය නොනසා රසවිදින ලෙසටත් අපි ඔබෙන් අවසන් වශයෙන් ඉල්ලා සිටිනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post යන්න රට වටේ – මහනුවර නිතර නොයන තැන් වල ඇවිදිමු appeared first on familylife.

පොඩි දරුවෝ ඉන්න මව්පියෝ උනාට පස්සේ හිතුනු හිතුනු විදියට ගමන් බිමන් යන එක නම් ලේසි පහසු දෙයක් නෙවෙයි. වෙහෙසකර ජීවිතෙන් දවසකට හරි මිදිලා ගමනක් යන්න සූදානම් උනත් යන්න කලින්  කරුණු  ගණනාවක් ගැන සළකලා තමයි ගමන සැලසුම් කරන්න වෙන්නේ.

මේ ලිපියෙන් අපි කතා කරන්න යන්නේ, බස්නාහිර පළාතට අයිතිවන එක් දවසකින් ගිහින් එන්න පුළුවන් ස්ථාන 6ක් ගැන. පොඩ්ඩෝ එක්ක ට්‍රිප් එකක් යන්න හිතන් ඉන්නවනම් අපි මේ කියන තැන් ගැනත් ටිකක් හොයලා යන්න උත්සාහ කරන්නකෝ.

1. නාච්චිමලේ/ පරෙයිතොට

ඉංගිරිය ප්‍රදේශයේ ඇති ප්‍රසිද්ධම ස්ථනයක් වන නාච්චිමලේ කියන්නේ නාච්චිමලේ දොළ ආශ්‍රිතව පිහිටා තියෙන සුන්දර නාන තොටුපොලකට. මේ දොළට නම්බපාන දොළ කියලත් කියනවා. ඉංගිරිය නගරයේ සිට පාදුක්ක කොළඹ පාරේ සැතැප්ම 1ක් විතර ගිහින් මහ ඉංගිරිය මංසන්ධියෙන් දකුණු පසට තියෙන කීනගහවිල පාරේ සැතැප්ම 1 ½  ගියාම තියෙන මඩකඩ ආරණ්‍ය  සේනාසනය පාර පහු කළාම මෙතනට යන්න පුළුවන්. මෙතන දිය ඇලි සහ ස්වභාවිකව සෑදුනු දිය තටාක පිරුණු සුන්දර ස්ථානයක්.

මෙරටට  ආවේනික මසුන් වර්ග ගණනාවකුත් මෙතනදි දැක බලා ගන්න පුළුවන්කම තියෙනවා. මඩකඩ ආරණ්‍ය සේනාසනය ආශ්‍රිත මඩකඩ වනාන්තරයත්, පරෙයිතොටත් මේ අතරෙම බලාගන්න පුළුවන්.  ඉංගිරිය නගරයේ සිට රත්නපුර පාරේ සැතැප්ම 1ක් ගිහින් වමට ඇති නම්බපාන පාසැල් මාවතේ සැතප්ම ½ක් ගියාම පරෙයිතොට තොටුපොළ හමු වෙනවා.  බොහොම නිස්කලංක සහ සුන්දර ස්ථාන උනත් මේ වෙනකොට සංචාරකයින් වැඩියෙන් පැමිණෙන ස්ථාන නිසා සති අන්තය නම් බොහොම කාර්‍යබහුල ස්ථාන බවට පත්වෙනවා. අවන්හල් කීපයකුත් තිබුණත් පොඩ්ඩොත් එක්ක එන නිසා කෑම බීම ටිකක් හදාගෙන ඇවිත් නාලා, කාලා බීලා යන්න පුළුවන්.

Google Map

2. පුවක්පිටිය දිය ඇලි

ආයෙත් කියන්නේ දිය ඇලි කීපයක් ගැනම තමයි. කොළඹ අවට දිය ඇලි තියෙනවා කීයන එක අරුමයක් වගේ උනත් මේ දිය ඇලි 4 ම පිහිටලා තියෙන්නේ අවිස්සාවේල්ලේ පුවක්පිටිය ප්‍රදේශයේ.  කොළඹ ඉඳලා ඇවිත් පුවක්පිටිය දුම්රිය ස්ථානය පහුකරලා ටික දුරක් ගියාම හම්බවෙන තුම්මෝදර පාරේ ආයෙත් කිලෝමීටර් 2ක් විතර ගියාම හම්බවෙන පළවෙනි දිය ඇල්ල “කුමාරි ඇල්ල” කියලා හඳුන්වනවා. සීතාවක රාජසිංහ රජුගේ දියණිය වුන කුමාරි මේ දිය ඇල්ල අසල දියේ ගිලී මිය ගිය නිසා මේ ඇල්ල කුමාරි ඇල්ල වුණා කියලා තමයි කතාව තියෙන්නේ. බලන්න ලස්සන උනත් නාන්න නම් මෙතන එතරම් සුදුසු නෑ කියලා තමයි කියන්නේ. 

තුන්මෝදර පාරෙන්ම ඉලුක්ඕවිට හන්දියෙන් වමට ගියාම “ඇල්ල උඩ ඇල්ල“ට යන්න පුළුවන්. ඉලුක්ඕවිට හන්දියේ ඉඳලා මීටර් 800 ක තරම් දුරක් තමයි තමයි මේක තියෙන්නේ. මේ දිය ඇල්ල පිහිටලා තියෙන ස්වභාවය නිසා තමයි මේ නම ලැබෙන්නේ. මේ දිය ඇලි දෙකම මීටර් 4-5ක්පමණ තමයි උස .  ඇල්ල උඩ ඇල්ලේ ඉඳලා තුම්මොදර පාරේ තවත් කිලෝමීටර් 3ක් විතර ගියාම  මීටර් 15ක් විතර උස “රන්මුදු ඇල්ල” මුණ ගැහෙනවා. රන්මුදු ඇල්ලේ ඉඳලා කිලෝමීටර් 3ක් විතර තුම්මෝදර හංදියට ඇවිල්ලා ලබුගම පැත්තට තව කිලෝමීටර් 2ක් ගියාම උස මීටර් 10ක් විතර වෙන “දම්බොර ඇල්ල” තියෙනවා. කොළඹ ඉදලා පැයක විතර ගමනකින් පස්සේ මේ දිය ඇලි වලට ළගාවෙන්න පුළුවන්කම තියෙනවා.

Google Map

3. සීතාවක තෙත්කලාපීය උද්භිද උද්‍යානය

බස්නාහිර පළාතේ අවිස්සාවේල්ල, ඉළුක්ඕවිට ප්‍රදේශයේ පිහිටා තියෙන මේ උද්‍යානය වසරේ දින 365 ම පෙ.ව.7.30 සිට ප.ව.5.00 දක්වා  විවෘතව තියෙනවා. ඉතාම සුළු මුදලක් ගෙවලා ඇතුල් වෙලා දවස පුරාම ‍රැදෙමින් පුෂ්ප, ශාක, ඔසු උයන්, පක්ෂීන් වගේම සමනළුන් බලන්නත් පුළුවන්. අවට  පරිසරය නැරඹීම  සඳහා ස්ථානයක් ද (වීව් පොයින්ට් එකක්), අංගසම්පූර්ණ ගිමන්හලක්, අවන්හලක් වගේම සනීපාරක්ෂක පහසුකම් ද මෙහි තියෙනවා . ඒ විතරක් නෙවෙයි අවශ්‍යනම් උද්‍යානය වටේට බෝට්ටු සවාරියකුත් යන්න හැකියාව තියෙනවා.

Google Map

4. මීගමු කලපුවේ බෝට්ටු සවාරි

මුහුදු තෘණ බිම්, කඩොලාන, මසුන්, කකුළුවන් සහ ඉස්සන් බහුල ඉතා වැදගත් ජෛව විවිධත්වයක් ඇති,  හෙක්ටයාර 3328 ක් පුරා පැතිර පවතින මීගමු කලපුවෙ කලපු ඉවුර සෙත්තප්පාඩුව සිට කුරණ දක්වා 22ක්  පුරා පැතිරිලා තියෙනවා. මේ කලපුව ආශ්‍රිතව මසුන් වර්ග 133 ක් පමණ ගැවසෙනවා. සුන්දර වටපිටාව සහ මසුන් නරඹනවට අමතරව බෝට්ටු සවාරි යන්නත් පුළුවන්. මෝටර් බෝට්ටුවක රවුමක් යන්න උපරිම රු. 1500 ක් වගේ වැයවේවී. මීගමුවෙ වගේම බොල්ගොඩ ගඟේත් මේ විදියෙම බෝට්ටු සවාරියක් යන්න පුළුවන් වුනත් මීගමු කළපුව වඩා සුන්දරයි කියලයි අපේ අදහස.

Google Map

5. අත්තිඩිය කුරුලු අභය භූමිය

1990 ආරම්භ කරපු මේ අභය භූමිය මේ වෙනකොට වැඩි සන්චාරක අවදානයක් ලබා නොගන්න තැනක් බවට පත්වෙලා. වැඩිපුරම මේ ස්ථානය ගැන තියෙන නොදැනුවත්කම තමයි මේකට හේතුව. දෙහිවල සත්වෝද්‍යානයේ ඉදලා වැඩි දුරක් නොවෙන නිසා සත්තු වත්තත් බලාගෙන, මේ කුරුලු අභය භූමියටත් ගිහිල්ලම යන්න පුළුවන්. අභය භූමියට පැමිණෙන සංචාරක පක්‌ෂීන් අතර වනවටුවා, පිලිපීන සබරිත්තා, දාර පෙඳැති මහවටුවා ප්‍රධාන වෙනවා. ශ්‍රී ලංකාවෙන් වඳවී යැමේ තර්ජනයට මුහුණපා සිටින කලු කොකා හෙවත් දම් සිලුටු දැතුඩුවා, පුංචි බස්‌සා, මැටි කොරවක්‌කා වගේම  හොටය මැද සිදුරක්‌ තිබෙන එකම පක්‌ෂියා වන බෙල්ලන් කොකුන් ද මෙහි වාසය කරනවා . සත්තු බලන්න ආස කරන පොඩ්ඩෝ ඉන්නවනම්  මේ ස්ථානවලට ගියොත් ඔවුන් ලොකු විනෝදයක් ලබයි.

Google Map

6. හොරගොල්ල ජාතික වනෝද්‍යානය

ශ්‍රී ලංකාවේ කුඩාම (අක්කර 33) ,සහ බස්නාහිර පළාතට (උඩහපත්තුවේ  හම්බදළුව ප්‍රදේශයේ ) අයිති එකම ජාතික වනෝද්‍යානය විදියට හදුන්වන්න පුළුවන් හොරගොල්ල වනෝද්‍යානය ගැනත් වැඩි දෙනා දැනුවත් නෑ . කොළඹ – නුවර මාර්ගයේ  නිට්ටඹුව නගරයෙන් කිලෝමීටරයක් වේයන්ගොඩ දෙසට ගමන් කළාම හමුවන පින්නගොල්ල හන්දියෙන් වමට හැරිලා මීටර 600ක්  විතර ගියාම හොරගොල්ල ජාතික උද්‍යාන කාර්‍යාලයට ළගා වෙන්න පුළුවන්. අනතුරුවලට ලක්වුන සතුන් සහ කුරුල්ලන් මෙහි ගෙනැවිත් සුව කර නිදහස් කිරීම කරනවා. වටිනා ශාක, සතුන්, පක්ෂීන්, මසුන් විතරක් නෙවෙයි සර්ප විශේෂත් මෙහි ජීවත් වෙනවා. ඉතාම නිස්කලංක පරිසරයක ඉදලා ටිකක් රිලැක්ස් වෙන්න කැමතිනම් මේ ස්ථානය ඉතාම සුදුසුයි කියලා කියන්න පුළුවන්.

Google Map

ඒවාගේම විශේෂයෙන්ම මේවායින්කුමන තැනකට ගියත් ආරක්ෂාව පිළිබදව ඉතාම සැළකිලිමත් වෙන්න ඕනි කියන කරුණත් ආගිය තැන්වල ඔබේ පියසටහන් පමණක්ම ඉතිරි කරලා මතකයන් පමණක් රැගෙන එන්න කියන කරුණත් අවසන් වශයෙන් අපි ඔබට මතක් කරනවා.

ඔබ මේ ලිපියත් කියවලම ගමනට සූදානම් වෙනව නම් ගමනේ පහසුව තවත් වැඩි වේවි – පොඩි දරුවන් සමග චාරිකා යන්නට පෙර මේ ගැනත් සිතන්න

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post සති අග පවුලේ චාරිකාවට කොළඹට නුදුරින් සුන්දර තැන් 6ක් appeared first on familylife.

බොහෝවිට මෙහෙම ගමනක් යන්න කලින් දරුවා ගැන හිතුවම මෙච්චර වද විඳගෙන ගමනක් යනවට වඩා ගෙදර ඉන්න එක සැපක් කියල දෙමවුපියන්ට හිතෙනවා. නමුත් එහෙම හිතුවොත් දරුවා ඒ දෙයට හුරුවීම කවදාවත් සිද්ධ වෙන්නේ නැහැ. ඒ නිසා දරුවාට කරදරයක් නැති තැනකට පවුලේ විනෝද චාරිකාවක් යන්නට පෙර මේ ගැනත් හිතලාම ඒ ගමන සැළසුම් කරන්න

කදිම ගමනාන්තයක්

දරුවාට අනතුරුදායක නැති, දරුවා අරගෙන යන්නට(හදිසියේ හෝ වඩාගන්නට සිදුවුවහොත්) අපහසු නැති, නීති රීති නොදා ළමයට නිදහසේ ගැවසෙන්නට ඉඩ හැරිය හැකි(හොටෙල් එකක්, බීච් එකක්, පාර්ක් එකක්) වගේ තැනක් ගමනට තෝරාගන්න. ඒ වගේම ගමන වාහනයක ගත කරන කාලය හැකි තරම් අඩු වෙනවානම් එය දරුවාට සිදුවන අපහසුතාවය අඩු කරාවි. ළමයා චාරිකාවකට සහභාගි වෙන මුල් කාලයේදී හැකි තරම් දරුවාගේ පාර්ශවයෙන්ම හිතලා මේ දේවල් කරන්න පුළුවන්නම් වටිනවා.

යන පිරිස

පවුලේ චාරිකාවකට පවුලේ අම්මා තාත්තා සහ දරුවන් හැරෙන්නට වෙනත් හිතවතුන් හෝ නෑදෑයින් සම්බන්ධ වෙනවානම් අනිවාර්යයෙන්ම ඒ අය ගැන හොඳ අවබෝධයක් ලබාගන්න. සමහරුන් ළමයෙකුගේ ඇඬුම් ඉවසන්නට පුරුද්දක් දක්වන්නේ නැහැ, ඇතැම් අය දරුවාට පහසුවෙන් කන දෙයක් ලබාදී නිදි කරවීමට හුරුවී සිටින නිසා එවන් අය සමග දරුවා චාරිකාවක් ගෙන යාම දරුවාට අපහසුවක් වගේම දෙමවුපියන්ටත් තරමක අපහසුතාවක් ගෙනේවි. ඒ නිසා දරුවා සමග චාරිකාවක් යනවානම් ‌චාරිකාවට එක්වන අනෙකුත් පිරිස ගැන නිසි අවධානයක් දෙන්න. හැකිතරම් දරුවාගේ පළමු චාරිකා කිහිපය පවුලක් ලෙසින් තනිව යන්නට හැකිනම් අගෙයි.

අවශ්‍යම දේවල් වැඩිපුර ගෙනියන්න

දරුවාට සාමාන්‍යයෙන් දවස් දෙකකට පැම්පර්ස් 8ක් මාරු කරනවා නම් දින දෙකේ ගමනක් අතරතුර පැම්පස් 12ක්වත් රැගෙනයන්න. දරුවා විසින්ම ගලවාගත්තොත්, වතුර හැලුනොත් වගේ තත්ත්වයකදී ඔබට එය ප්‍රයෝජනවත් වේවි. දරුවාට සාමාන්‍යයෙන් අවශ්‍ය කරන ආහාර පවා තරමක් වැඩිපුර ගෙනයාම හිතට සැහැල්ලුවක්. ගෙදරදි දරුවාට බඩගිනි දැනුනොත් දෙන්න දේවල් අතපොවන මානයේ තිබුනත් චාරිකාවකදී එය පහසු නැහැ. එනිසා පෙර සූදානම වැදගත්. ඇඳුම් පවා කිහිපයක් වැඩිපුර ගෙනියන්න.

ආහාරපාන

ගමන පිටත්වෙන දවසේ උදෑසන ආහාරය, දිවා ආහාරය ගෙදරින්ම හදාගෙන යන්න. පලතුරු, යෝගට් අරගන්න. ගෙදරිදී හදාගත්තු සීරියල් වගේ දේවල් ගෙනියන එක පහසුවක්. අවුරුද්දට අඩු දරුවෙක් නම් වැඩිහිටියන්ගෙ කෑම දෙන්න බැරි නිසා විශේෂයෙන් සැලකිලිමත්ව කෑම ටික ගෙදරින් හදාගෙන හෝ පෙරසූදානමක් ඇතුව යන්න. අවුරුද්දට වැඩි දරුවෙක් නම් පලතුරු, බිස්කට්, ඕට්ස්, රුලන්, හබලපෙති, ෆ්‍රෙශ් මිල්ක්, සැන්විචස් වගේ දරුවා කන්න කැමති දෙයක් අරන් යන්න සැළසුම් කරන්න. අවුරුද්දට වැඩි උනත් ඇතැම් විට වැඩිහිටියන්ගේ කෑම  කන්න අකමැති දරුවෙක් නම් එයාගේ විදියට කෑම ටික හදාගෙන ගිහින් බඩ පිරෙව්වොත් දරුවත් සතුටෙන්. දෙමවුපියනුත් සතුටෙන්. දරුවගෙ කෑම ගැන නම් අනිවාර්යෙන්ම හිතන්න ඕන.එක දවසකට වඩා වැඩි ට්‍රිප් එකක් නම් කෑම හදාගන්න ඕනකරන එලවලු, පරිප්පු, හාල් ගෙනියන්න ඕනි. පොඩි රයිස් කුකර් එකක්, ෆුඩ් වෝමර්, උනු වතුර බෝතල් වගේ හැමදෙයක්ම ගෙනියන්න ඕන. ගමන යන අනිත් අය හිතන හිතන විදියට කන බොන දේවල් දරුවට කවන්න පොවන්න දෙන්නත් එපා.

අත්‍යවශ්‍ය සියළු දේ

දරුවාට අත්‍යවශ්‍ය සියළු දේ ගෙදර කියලා වෙනසක් නොදැනෙන විදියට අරගෙන යන්න. යන තැන්වලින් හොයාගන්නවා කියලා හිතාගෙන යන්න එපා. ඩයපර්ස්, බෙහෙත්, උන කටුවක්, නැපි, ෆ්ලැනල්, දේශගුනයට ගැලපෙන ඇඳුම්, කෑම හදන භාජන, පොටිය, සෙල්ලම් බඩු වගේ හැම දෙයක්ම පිලිවෙලට අසුරගෙන අරන් යන්න. යන තැන්වල ඩයපර්ස් විසි කරලා නොඑන්නත් වගබලාගන්න.

තවමත් මවුකිරි බොන දරුවෙක්නම්

මව් කිරි බොන බබෙක් නම් අම්මා බබට කිරි දෙන්න පහසු විදියේ ඇදුම්  පමණක් අඳින්න. කිරි දොවලා අරගෙනයනවානම් නියමිත විදියට දොවලා බෝතල්වල අසුරලා ගෙනයෑමට පෝර්ටබල් ෆ්‍රිජ් එකක් පාවිච්චි කරන්න. වාහනයේදී කිරි රත් කිරීමට උනුවතුර ගෙන යන්න. පිටි කිරි බොන දරුවෙක් නම් සෞඛ්‍යාරක්ෂිතව කිරි සදාගැනීමට අවශ්‍ය දේවල් ගෙනයන්න.

දරුවා වෙනුවෙන්

දරුවාට කරදරයක් නොවෙන්නට අපහසුවක් නොවෙන්නට සියළු දේ කැපකරන්නට බළාපොරොත්තුවෙන දෙමවුපියන් සිතිය යුතු තවත් සුළු කාරණා කිහිපයක්ම තියෙනවා. පළමු දේ දරුවාගේ නින්ද. දරුවා ගෙදරදී නිදාගන්නා අයුරින්ම පහසු ලෙස නිදන්නට සළස්වන්න. සෑමවිටකම දරුවා සමග ගමනක් යන විට ජංගම දුරකතන චාජ් කර, බැටරි පැක් චාජ් කර තබාගන්න. එය හදිසි අවස්ථාවකදී ප්‍රයෝජනවත් වේවි. දරුවා වෙනුවෙන් කළ සෑම සැලසුමකටම අමතර සැළසුමක් තියාගන්න. උදාහරණයකට දරුවා කෑම නොකෑවොත් කන්නට දිය හැකි තවත් යමක්. යන තැනට සරිලන ඇඳුම් සහ ආයිත්තම්(සීත පෙදෙසකදීනම් හිසේ සිට දෙපතුළ දක්වා වැහෙන ඇඳුම්, මුහුදුබඩ පළාතක නම් කොට කලිසම් සහ වැලිවලින් සෙල්ලම් කළ හැකි භාන්ඩ) රැගෙන යන්න. දරුවා නිදියන අතරේ කෑගසමින් සින්දු කියන එකෙන් වළකින්න. ඒ සද්දයට දරුවා ඇහැරුනොත් එය දරුවාට අපහසුවක් වගේම දෙමවුපියන්ටත් අපහසුවක් වේවි.

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post පොඩි දරුවන් සමග චාරිකා යන්නට පෙර මේ ගැනත් සිතන්න appeared first on familylife.