Coco (2017)

සම්මාන ගණනාවක් දිනාගත්ත ඇමෙරිකන් ඇනිමේෂන් චිත්‍රපටයක් වෙන මෙයින් කියවෙන්නේ අවුරුදු 12ක් වයසැති මිගෙල් කියන පිරිමි ළමයෙක් සහ එයාගෙ පවුල ගැන කතාවක්. වැරදීමකින් මළවුන්ගේ ලෝකයට යන මිගෙල්ට සංගීතඥයෙක් වෙන එයාගේ මී මුත්තව මුණ ගැහෙනවා. ලොකු වැරදි වැටහීමක් නිසා මිගෙල්ගේ හත්මුතු පරම්පරාවම සංගීතයට වෛර කරන අතරේ ගායකයෙක් වාදකයෙක් වෙන්න ආසාවෙන් ඉන්න මිගෙල් පවුලේ අය එක්ක තරහවෙනවා. ජරමර ගොඩකින් පස්සේ අවසානයේ මේ ප්‍රශ්න ඔක්කොම විසදෙන විදිය හරිම අපූරු විදියට නිර්මාණය වෙලා තියෙනවා. ඒ විතරක් නෙවෙයි ලස්සන සිංදු කිහිපයකුත් මේ චිත්‍රපටයේ අඩංගුවෙනවා. 

The Croods (2013)

දවල් කාලයේ කෑම ටිකක් හොයාගන්න පුදුමාකාර විදියට උත්සහ කරන ගල් යුගයේ පවුලක් රාත්‍රියට ගල් ගුහාවක ගුලිවෙලා නිදා ගන්නවා. මොකද ගින්දර ගැන දන්නෙවත් නැති එයාලා රාත්‍රී කාලයට බයයි. මෙහෙම ජීවත්වෙන අතරවාරයේ මෙයාලගෙ නිවහන විනාශ වෙලා මේ පවුලට අලුත් පළාතකට යන්න වෙනවා. වෙනස්ම විදියේ පරිසරයකට යන මෙයාලට තවත් අමුත්තෙකුත් මුණ ගැහෙනවා. අලුත් පරිසරයේදි මුහුණ දෙන්න වෙන සිදුවීම් ගැන තමයි චිත්‍රපටයෙන් කියවෙන්නේ. හාස්‍යජනක සිදුවීම්වලින් පිරුණු මේ ඇනිමේෂන් චිත්‍රපට නිර්මාණයේ දෙවන කොටසත් 2015 නිකුත්වෙලා තියෙනවා.

Up (2009)

කාල් ෆ්‍රෙඩ්‍රික්සන් කියන වැන්දඹු සීයා කෙනෙක් සහ රසල් කියන බෝල ගෙඩියක් වගේ දගකාර කොලු පැංචෙක් බැලුම් බෝල ගැටගහපු ගෙදරක නැගලා පියාඹගෙන ගිහින් කරපු හපන්කමක් ගැන තමයි මේ චිත්‍රපටයෙන් පෙන්වන්නේ. කාල්ගේ මියගිය බිරිඳගේ බලාපොරොත්තුවක්, එහෙමත් නැත්තන් හීනයක් හැබෑ කරන්න තියෙන උවමනාව නිසා දකුණු ඇමෙරිකාවට තමයි මෙයාලා පියාඹන්නේ. ඉතාම විනෝදජනක සහ සංවේදී සිදුවීම් සහිත චිත්‍රපටයක් විදියට හදුන්වන්න පුළුවන් මේ චිත්‍රපටය සම්මාන රාශියකටත් නිර්දේශ වෙලා තියෙනවා.

Ratatouille (2007)

රැටටුලි කියන්නේ ප්‍රංශයේ බොහොම ජනප්‍රිය කෑම වර්ගයක්. ඒ වගේම මේ චිත්‍රපටයෙන් කියවෙන්නේ රැටටුලි වගේම තවත් කෑම ජාති ගොඩක් රසට හදන්න දක්ෂ, කවදා හරි චෙෆ් කෙනෙක් වෙන්න හීන මවන රෙමි කියන මී පැංචෙක් ගැන. එයාගේ හීනේ හැබෑ කරගන්න උදව් කරන්නේ පැරීසියේ අවන්හලක වැඩ කරන ඇල්ෆ්‍රෙඩො කියන තරුණ කුණු කසළ ඉවත්කරන තරුණයා. ඒ වසරේ නිමැවුනු ඇනිමේෂන් චිත්‍රපට අතරින් සම්මාන කිහිපයක්ම දිනා ගත්ත මේ චිත්‍රපටය බලන්න කිසිම කෙනෙක් අකමැති වෙයි කියලා නම් හිතන්න අමාරුයි.

Chicken run (2000)

ට්වීඩි කියන නපුරු අයිතිකාර යුවළක් පාලනය කරන ගොවිපොළක ජීවත්වෙන කුකුළු රංචුවක් ගැන තමයි මේ චිත්‍රපටය ගොඩ නැගිලා තියෙන්නේ. මේ අයිතිකාර ජෝඩුව තීරණය කරනවා වැඩි ලාබ ලබාගන්න කුකුළොන්ව මස් කරලා විකුණන්න. භීතියට පත්වෙන කුකුළු රංචුව ගොවිපොළෙන් පැනලා යන්න තීරණය කරනවා. හැමදාම අසාර්ථකත්වයට පත්වෙන මෙයාලට අන්තිමේ තියෙන එකම බලාපොරොත්තුව තමයි රොකී කියන කුකුල් තරුණයා. කුකුල් රංචුව පැනලා දරන උත්සහයත්, ඒ උත්සහය සාර්ථක වෙනවද කියන එකත් දැනගන්න නම් මේ ලස්සන චිත්‍රපටය බලන්නම වෙනවා. 

Tangled (2010)

ජර්මානු සුරංගනා කතාවක චරිතයක් වෙන රපුන්සල් කියන කුමාරිකාව ප්‍රධාන කරගෙන තමයි මේ චිත්‍රපටය නිර්මාණය වෙන්නේ. කුඩා කාලයේම රාජ මාළිගාවෙන් පැහරගෙන රපුන්සල්ව එක්ටැම්ගෙයක හිරකරගන්න නපුරු මායාකාරියක් රපුන්සල්ගේ ලස්සන දිග මැජික් කොණ්ඩය තරුණබව ලබා ලබාගන්න පාවිච්චි කරනවා. මේ ලස්සන කුමාරිකාවගේ අවාසනාවන්ත ඉරණම සම්පූර්ණයෙන් ම වෙනස් වෙන්නේ ෆ්ලින් කියන කඩවසම් තරුණ හොරා මුණගැහීමෙන් පස්සේ. මේ චිත්‍රපටයට කාන්තා පාර්ශවය නම් වැඩිපුර කැමතිවෙයි කියලා අපි හිතනවා.

Zootopia (2016)

සූටොපියා නගරයේ පොලිසියට එකතුවෙන පළමු හා නිළධාරිනිය වෙන නිර්භීත ජුඩි සහ, වංචාවෙන් ජීවත්වෙන නරියෙක් වෙන නික් කියන දෙන්නා එකතුවෙලා අතුරුදහන් වූ විලෝපික සත්තු 14 දෙනෙක් සොයාගැනීම පිළිබද අපරාධය පරීක්ෂණයක් විසදන විදිය තමයි මේ චිත්‍රපටයේ කතාව වෙලා තියෙන්නේ. හිනාවෙන්න කැමති අයට කියාපු චිත්‍රපටයක් විදියට සූටොපියා පෙන්වන්න පුළුවන්. ඒ වගේම මේකේ දෙවන කොටසත් නිෂ්පදනය කරනවා කියලා තමයි ආරංචිය තියෙන්නේ. 

Shaun the sheep (2015)

 2007 ටීවී සීරිස් එකක් විදියටත් 2015 දි චිත්‍රපටයක් විදියටත් නිර්මාණය වුණු මෙයින් කියවෙන්නේ ගොවිපොළක ජීවත්වෙන බැටළු රංචුවක්, එයාලව බලාගන්න බල්ලෙක් (බිට්සර්‍ර්), අයිතිකාරයා සහ ඌරන් කිහිපදෙනෙක් ගැනයි. පුදුමාකාර කරදරකාරයෝ වුණු මෙයාලගේ දගකාරකම හන්දම සිහි විකල් බවට පත්වුණු මෙයාලගේ අයිතිකාරයා නගරයක අතරමං වෙනවා. අතුරුදහන් වුණු තමන්ගේ අයිතිකාර ගොවියාව හොයගෙන ශෝන්, බිට්සර් ඇතුළු බැටළු රංචුව නගරයට යෑමේ කතාව තමයි මේ චිත්‍රපටයට පාදක වෙලා තියෙන්නේ. 2019 දි මෙහි දෙවන කොටසත් නිර්මාණය කරලා තියෙනවා.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ඇනිමේෂන් චිත්‍රපට බලන්න කැමති සැමට මෙන්න හොඳම එකතුවක් appeared first on familylife.

දරුවන් පොත් පත් කියවන්න දක්වන උදාසීනතාවය නිසාම කාලය සමග ඔවුන්ගේ අධ්‍යාපන කටයුතුවලටත් යම් යම් බලපෑම් ඇති වෙනවා. ඒ වගේම දරුවන්ගේ කියවීමේ ආශාව එක රාත්‍රියකින් ගොඩ නගන්නත් බැහැ. දරුවෙක් පොත් පත් කියවීමට දක්වන ඇල්ම බැල්ම සමග තවත් බොහෝ වාසිදායක පරිසරයක් නිර්මානය වෙනවා. ඒ පරිසරය අප හිතනවාට වඩා දරුවාගේ අධ්‍යාපනයට ඉතාම හිතකාමී විදිහට අනාගතයේදී බලපෑම් ඇති කරනවා.

ඒ වුනත් අපේ බොහොම දෙමව්පියන් දරුවන්ට පාසලේ පොත පත හැරුනාම වෙන කිසිම කතා පොතක්, කවි පොතක් ඇහට පේන්නවත් දෙන්නේ නැහැ. සමහර දෙමව්පියන්ගේ මතයක් තියෙන්නේ ඉස්කෝලේ පොත් පත් ටික බලා ගත්තාම හොදටෝම ඇති, ඒකටත් වෙලාවක් නැති කාලයේ තවත් පොත් කියවන්න පටන් ගත්තොත් හොදට හිටිවී, වගේ මතයක්. ඒ වුනත් දරුවෙක් වෙතින් කිවන පුරුදු වගා වුනොත් ඔබ නොදන්නා වාසි බොහොමයක් ලබා ගැනීමට පුලුවනි.

එහෙම නම් දරුවන්ගේ කියවීමේ ආශාව වැඩිදියුණු කිරීමෙන් දරුවාට ලැබෙන වාසි මොනවාද?

දරුවාගේ කියවන ඇල්ම නිසා ඔහු බොහෝ දේ තනියම ඉගෙන ගැනීමට උනන්දුවක් දක්වනවා. වැඩිහිටියන් මත යැපෙනවා වෙනුවට තමන්ට අවශ්‍ය දැණුම පොත පත වෙතින් තනියෙන්ම කියවා දැන ගැනීමේ හැකියාව දරුවා උපයා ගන්නවා.

සවන්දීමේ කුසලතාවය ඇති වෙනවා.

සිංහල ජන සමාජය අතීතයේ පටන්ම පොත් පත් කියවන විට ඒ වෙනුවෙන් සවන්දීමට වැඩි කැමැත්තක් දැක්වූ ජන සමාජයක්. විශේෂයෙන් බණ කතා අහන්න තවමත් පොඩිත්තන් අත්තම්මා, සීයාට සමීප වෙනවා. අකුරු නොදන්නා යුගයේ පවා අකුරු දන්නා කෙනෙක් කියන කථාන්දර බොහොම කැමැත්තෙන් අසා සිටියා. ඒ නිසාම සවන්දීමේ හැකියාව දියුණු වුණා. අදටත් පොත් පත් කියවන දරුවා වෙතින් සවන්දීමේ හැකියාව නොදැනීම සංවර්ධනය වීමේ පරිසරයක් ගොඩ නැගෙනවා. ඒ නිසා දෙමව්පියන් නොදකින අන්දමට දරුවාගේ සවන්දීමේ කුසලතාවය පොත් පත් කියවීම නිසා සංවර්ධනය වෙන බවත් තරයේම මතක තබා ගන්නවා නම් අගෙයි.

ඒ වගේම දරුවාගේ චරිත සංවර්ධනය ගොඩ නගා ගැනීමටත් දරුවන්ගේ කියවීමේ ආශාව වැඩිදියුණු කිරීම උපකාරී වෙනවා. වචන දහස් ගණනකින් ලබා දෙන අවවාද වලට වඩා කතා පොතකින් ලබා දෙන ආදර්ශය ඉතා ප්‍රබල ලෙසින් දරුවාගේ හදවතට ආමන්ත්‍රනය කරනු ඇත.
පොත් පත් කියවන විට දරුවාගේ වාග් කෝෂය පුළුල් වෙනු ඇත. පොත පතින් දරුවා බොහෝ දේ ඉගෙන ගන්නා අතර ඒ දැණුම තමාගේ ජීවිතයට සම්බන්ධ කර ගැනීමේ හැකියාව පොත පතින් උපයා ගත හැකියි.

ඒ වගේම දරුවාගේ අධ්‍යාපනයට අවශ්‍ය අතිරේක දැණුම කියවන පොත් පතින් තමා විසින්ම සොයා දැන ගැනීමටත් හැකියාව ලැබෙනවා. ඒ අන්දමින් තමා විසින් සොයා ගන්නා දැනුම ඉතාම හොඳින් ධාරණය වෙනවා විතරක් නොවෙයි, එය අවශ්‍ය අන්දමින් ගලපා ගැනීමේ හැකියාවත් දරුවන් බාල කාලයේ පටන්ම ලබා ගන්නවා.

කියවන පුරුදු ගොඩ නගන්නේ කොහොමද?

ඔබ දරුවාට ඇති අසීමිත ආදරය නිසාම බාල කාලයේ පටන්ම ඔහු විසින් ඉල්ලන හැම දෙයක්ම ලබා දෙන්නනට උනන්දුවක් දක්වනවා. ඒ වගේම ඉගෙනුම් පරිසරයට අවශ්‍ය හැම දෙයම වුනත් ලබා දීම කිසිම විදිහකට මග ඇරෙන්නේ නැහැ. ඒ නිසා පොත් පත් වුනත් දරුවාගේ අතට ලබා දෙන්න. මුලින්ම ඔබ කියවන දේ දරුවාට අසන්න ඉඩ දෙන්න. එයින් පසුව ඒ කතාවේ දරුවාගේ හිත ගිය තැන් විමසා සිටින්න. එහෙම වුනාම දරුවාගේ හිතේ තවත් අලුත්ම කතාවක් ගොඩ නැගෙන තරමටම නිර්මාණශීලීත්වයක් අවදි වෙන්න පුලුවන්.

පොත් ඉරයි. අහුවෙන්න දෙන්න එපා.

පුංචි කමට දරුවා පොත් පත් ඉරීම වලක්වන්නත් බැරි දෙයක් වේවි. ඒත් දරුවාට පොත් නොදී සිටිම නොව පොත් පත් පරිස්සමින් ආරක්ෂා කර ගැනීමේ හුරුව ගොඩ නගන්න. අතීතයේදී පොතක් පතක් බිම වැටුනොත් එය නැවත අතට දුන්නේ පොතට වැද සමාව ඉල්ලන තරම් අහිංසක හැසිරීමකින්ය. අකුරු ඒ තරමටම පූජණීයත්වයෙන් එදා සලකන ලදී.

දරුවන්ගේ කියවීමේ ආශාව ඇති වෙන දේ කියවන්න දෙන්න.

පුංචි කාලයේ පටන්ම දරුවන්ට කුතුහලය ඇති වෙන කතාන්දර කියා දෙන අතරවාරයේම යම් යම් කුතුහලයක් දැනෙන අන්දමින් දරුවාගෙන් අදහස් විමසා සිටින්න. මේ අතර දරුවාගෙන් කතාව අවසානය ගැන විමසා සිටින්න. එවිට දරුවා යම් නිර්මානශීලී අදහසක් ගොඩ නැගීමටත් ඉඩ තිබේ.

දරුවන්ට කියවන දේ විවිධ අන්දමින් ලබා දීම වැදගත්. සමහර විට ඔබ කැමැති දෙයම දරුවාට ලබා දීම වෙනුවට විවිධ කියවන දේ ලබා දීම නිසා දරුවාගේ කියවන ඇල්ම වැඩිදියුණු වෙනු ඇත. එකම රාමුවකට දරුවා කොටු කිරීම වෙනුවට විවිධ දේ ලබා දෙන විට දරුවාගේ හිතේ ඇසූ පිරූ තැන් තව තවත් වැඩිදියුණු වෙනු ඇත.

දරුවන්ට පොත් කියවීම මෙතරම්ම වැදගත් ඇයි කියල අපි මීට පෙර ලිපියකිනුත් කතා කළා. පහතින් එම ලිපියට පිවිසෙන්න.

දරුවෙකුට පොත් කියවන්න හුරු කිරීම මෙච්චරම වැදගත් ඇයි කියල දන්නවද?

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post දරුවන්ගේ කියවීමේ ආශාව වැඩි දියුණු කිරීමට කළ හැකි දේවල්… appeared first on familylife.

පරිවර්ථන පොත් ඇතුළුව පොත් මිටියක් ඔක්තෝම්බරයේ මිලට ගත්ත අය, සාහිත්‍ය මාසය නිමාවෙලා දෙමසකට වඩා ගෙවුනත් තමන් මිලදී ගත් සියල්ල තවම කියවලා ඉවර නැතුව ඇති. සමහර විට කියවලා ඉවර වුනත් ඒ ගැන සගයන් එක්ක තියෙන සංවාද ඉවර වෙලා නැතුව ඇති. විශේෂයෙන් ම මේ වසරේ පරිවර්තන පොත් සම්බන්ධව ටිකක් වැඩිපුර කතා බහ කෙරුණු නිසා familylife.lk අපි හිතුවා ෆැමිලි රීඩ් තීරයෙන් පරිවර්තන කෘතියක් මිලට ගැනීමේදී සැලකිලිමත් විය යුතු කරුණු කිහිපයක් ගැන කතා කරන්න.

පරිවර්තන පොත් ලියවෙන්නේ ඇයි?

ඉංග්‍රීසි ඇතුළු විදේශ භාෂා ගැන ප්‍රමාණවත් දැනුමක් නැති නිසා පරිවර්තන පොත් කියවනවා කියන අදහස සමහර පුද්ගලයන් තුළ තියෙනවා. හැබැයි මේක නිවැරදි සිතිවිල්ලක් නම් නෙවෙයි. ඉංග්‍රීසි භාෂාවේ ප්‍රවීණයෝ පවා තමන්ගේ භාෂාවෙන් ලියවුනු පොත් කියවන්න ප්‍රිය කරනවා.

මව් හාෂාව තරම් වෙන කිසිම භාෂාවක් එතරම් හිතට අල්ලන්නේ නැති එක තමයි මේකට හේතුව වෙන්නේ. මේ හේතුව හන්දා තමයි රටක පරිවර්තන සාහිත්‍යක් තියෙන්නේ. වෙනත් විදියකින් කිව්වොත් පරිවර්තන සාහිත්‍ය කියන්නේ එක්තරා විදියක කලාවක් විදියට හදුන්වන්න පුළුවන් වෙනවා. 

පාඨකයින්ට සිදු වන අසාධාරණය 

නමුත් මේ වෙනකොට හතු පිපෙනවා වගේ පරිවර්තන පොත් බිහිවෙනවා වගේම මේ පොත්වල ගුණාත්මක භාවයත් එන්න එන්නම අඩුවෙනවා කියන චෝදනාව පාඨකයොන්ගෙන් එල්ලවෙනවා. මේ හේතුව නිසාම බොහෝ දෙනෙක් මුල් කෘතිය කියවන්න පෙළඹෙන බව දකින්න ලැබෙනවා. හැබැයි ගුණාත්මක පරිවර්තන පොත් බිහි නොවෙන එක මව් භාෂාවෙන් පමණක් පොත් කියවන පාඨකයොන්ට කරන විශාල අසාධාරණයක් බවත් කියන්න ම වෙනවා.

අනෙක් අතට මහන්සියෙන් හරි හම්බ කරගන්න සල්ලි ටිකක් අමාරුවෙන් ඉතිරි කරගෙන, පොත් කඩවලට හරි පොත් ප්‍රදර්ශනයට හරි ගිහින්, ආව පොත කියවලා ඉවර වුනාම “මේක ගත්ත සල්ලි අපරාදේ” කියලා පාඨකයොන්ට හිතෙනවනම් එක හරිම කණගාටුදායක තත්ත්වයක් විදියට තමයි අපි නම් දකින්නේ.

නිවැරදිම පරිවර්තකයා තෝරාගන්න

මේ හේතුව හන්දම, වර්ණවත් පිටකවරත්, සුපිරි මිල ගණනුත් එක්ක පරිවර්තන පොත් පිරිලා ඉතිරිලා තිබ්බත් පරිවර්තන කෘතියක් මිලට ගන්න කලින් දැන් ටිකක් වැඩිපුර හිතන්න වෙලා තියෙනවා. පරිවර්තන පොත්වලට පෙම් බදින බොහෝ දෙනෙක් තමන් කැමතිම රචකයාගේ එහෙමත් නැත්තන් පරිවර්තකයාගේ පොත් හෙවිල්ලක් බැලිල්ලක් නැතුව මිලට ගන්න පෙළඹිලා ඉන්නවා.

එහෙමත් නැත්තන් මේ කාල වකවානුව වෙනකොට ලෝකේ ජනප්‍රිය පොත් පරිවර්තනය කරලා ජනප්‍රිය වුනු “සෙලිබ්‍රිටි පරිවර්තකයොන්ගේ” පොත් මිලට ගන්නවා. හැබැයි පොත කියවනකොට දැනෙන්නේ පුදුමාකාර ව්‍යාකූල බවක්. පරිවර්තකයා පවා තේරුමක් ඇතුව පරිවර්තනය කරලා තියෙන බවක් මේ පොත්වලින් පෙනෙන්නේ නෑ. 

ඒ නිසා මුලින්ම කරන්න වෙන්නේ හොද පරිවර්තකයෙක් හොයාගන්න එක. පොත් කියවන්න ඇබ්බැහි වුනු, පොත් ගැන හොදට දැනුම් තේරුම් ඇති අයගෙන් රසවත් විදියට පරිවර්තන කටයුත්ත සිදු කරන පරිවර්තකයො ගැන අදහසක් ලබා ගන්න පුළුවන්කම තියෙනවා.

අවාසනාවකට ගාමිණි  වියන්ගොඩ, කේ. ජී කරුණාතිලක, දැදිගම වී රොද්‍රිගෝ වගේ පරිවර්තකයෝ බොහොම අඩුවෙන් තමයි අලුත් නිර්මාණ කරනව දකින්න ලැබෙන්නේ. අවුරුද්දකට විශාල ප්‍රමාණයේ පොත් 10-15ක් විතර පරිවර්තනය කරන පරිවර්තකයෙක්ගෙන් නිවැරදිම සහ රසවත්ම පරිවර්තනයක් බලොපොරොත්තු වෙන්න පුලුවන්ද කියන කාරණය ඇත්තටම සැක සහිත වෙනවා. 

ඒ වගේම පොත පරිවර්තනය වෙලා තියෙන වාර ගණන ගැනත් පොඩ්ඩක් හොයලා බලන්න. උදාහරණයක් ව්දියට ගත්තොත් “හරි පුදුම ඉස්කෝලේ” නමින් ලීලානන්ද ගමාච්චි මහත්මයා පරිවර්තනය කරලා තියෙන්නේ ඩොරති බ්‍රිටන් විසින් ඉංග්‍රීසියට පරිවර්තනය කරපු “ටෝට්ටෝ චාන්” කියන ජපන් බසින් ලියැවුණු කෘතියක්. ඒ වගේ කරුණු ගැනත් පොඩ්ඩක් හොයලා බලලම පොත් ගන්න එක තමයි වඩා හොද.

ප්‍රකාශකයා කවුද?

අනිත් කරුණ තමයි වගකීමක් සහිත ප්‍රකාශන ආයතනයකින් පොතේ පරිවර්තනයට වගකියනවද කියන කාරණය. සමහර පොත් ප්‍රකාශන ආයතන එකිනෙකා අතර ගැටුම් පවා ඇතිකරගනිමින් පොත් ප්‍රකාශන අයිතිය ලබා ගන්නවා. පිවර්තන සාහිත්‍ය ගැන ඇල්මෙන් පාඨකයා එන සද්භාවයෙන් පරිවර්තන ප්‍රකාශයට පත් කරනවාට වඩා  වානිජමය වාසි මුදුන් පමුණුවා ගැනීමක් තමයි එයින් දැක ගන්න පුළුවන්කම තියෙන්නේ.

බිස්නස් එකකින් එහා ගිය අරමුණක් හෝ පත පොතට ආදරය කරන, පොත් කියවන බවක් නම් මේ අයගෙන් දකින්න අමාරුයි. ඒ වගේම මුල් කෘතිය ප්‍රකාශනයට පත් කරපු ආයතනයෙන් අවසර අරගෙන නිත්‍යානුකූලව පොත පරිවර්තනය කරලද කියන කාරණය ගැනත් පොඩ්ඩක් හොයලා බලලම පොත් ගන්න.

මිලට ගන්න කලින් පොතේ අන්තර්ගතය ගැන හොයන්න

පරිවර්තනයක් මිලට ගන්න කලින් ඒ පොතේ මුල් කෘතිය ගැන අන්තර්ජාලය හරහා හොයලා බලන්න. පොත් සම්බන්ධ ෆෙස්බුක් සමුහ ඕනෑ තරම් මේ වෙනකොට දකින්න ලැබෙනවා. එවැනි තැන හරහා මුල් කෘතිය ගැනත් පරිවර්තනය ගැනත් විමසලා බලනවානම් විස්තර හොයාගන්න පුලුවාන්කම තියෙනවා.  විශේෂයෙන් ම තමන් ප්‍රිය කරන වර්ගයේ පරිවර්තන ගැන සමාන රුචියක් තියෙන පුද්ගලයින්ගෙන් වැඩි දුරටත් විස්තර හොයාගන්න හැකි වෙනවා.

මුල් කෘතිය මදක් හෝ කියවලා සංසන්දනයක් කරන්න පුළුවන් නම් වඩාත් සුදුසුයි. උදාහරණයක් විදියට great කියන ඉංග්‍රීසි වචනය සිංහලයට පරිවර්තනය කලාම ප්‍රධාන, උදාර, මහා වගේ අර්ථ කිහිපයක් එනවා. මුල් කෘතියේ මේ වචනය යොදාගෙන තියෙන අදහස හරි හැටි වටහාගෙන පරිවර්තන කලේ නැත්නම් සම්පූර්ණයෙන්ම වෙනස් අර්ථයක් තමයි එන්නේ.

ඒ වගේම මුල් කෘතිය ලියවුනු භාෂාවටම අනන්‍ය වුනු (උපමා පිරුළු වගේ දේවල්) යෙදුම් එහෙමත් නිවැරදිවම පරිවර්තනය වුනේ නැත්තන් තේරුමක්, රසයක් නැති පරිවර්තනයක් තමයි සිදු කෙරෙන්නේ.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post පරිවර්තන පොත් මිලට ගන්න කලින් මේ දේවල් ගැනත් හිතන්න appeared first on familylife.

විවිධ ජාතීන්, ආගම් සහ සංස්කෘතීන් වලින් සැකසුනු ඉන්දියාවේ සෑම ප්‍රාන්තයක් පුරාම පොදු වූ එක් සාධකයක් තිබෙනවා. කෙනෙකුගේ ජීවිතයක් සාහසික ලෙස උදුරා ගන්නට තරම් ප්‍රබල එම එකම සාධකය නිසාම දිනෙන් දින දියුණුවට පත් වන සමාජ තළයට අයත් මිනිසුන්ගේ නොදියුණු බව ඉස්මතු කරනවා. ජාති ආගම් කුල භේදය නිසාම බොහෝ ජිවිත අහිමි වීම් නිරපරාදේ සිදුවන්නේත් බොහොම සාමාන්‍ය දෙයක් බවට පත්වෙමින්. Honor killings ලෙසින් වෙනමම වර්ගීකරණයකට පවා අයත් වෙන මෙම අපරාධයන් හි නිරර්ථක බව පෙන්වා දීම සඳහාම මහාරාෂ්ට්‍රයේ මරාති සිනමාවෙන් ලොවට පිදෙන විශිෂ්ටතම සිනමා කාව්‍යයක් විදිහට Sairat වැදගත් වනවා.

Sairat හි සැකැස්ම මුලින්ම සොබහවිකයි. චිත්‍රපටයේ සෑම රංගනයක්ම, සෑම සිදුවීමක්ම, සෑම රූපරාමුවක්ම අතිශය සොබහවික බවකින් යුක්තයි. අධ්‍යක්ෂකවරයා සහ රචකයා වන Nagraj Manjule ගේ පෞද්ගලික අත්දැකීම ආශ්‍රයෙන් නිර්මාණය කරන ලද්දක් නිසාම ඔහු උපන් ගම්මානයම රූගත කිරීම් කටයුතු සඳහා යොදාගෙන තිබෙනවා. සොබහ සෞන්දර්යයේ අපූරු දර්ශනයන් සමඟින් මහාරාෂ්ට්‍රයේ චාරිකාවකට සමාන රූපමය ආකර්ශනීයත්වයක් චිත්‍රපටය සතුයි. එතනටම ඈඳෙන නවයෞවනයේ පොපියන චමත්කාරජනක ආදර කතන්දරයක් නිසාම සියල්ලම ආදරණීය බවකින් යුක්තයි.

නමුත් මේ Star crossed ආදරවන්තයින් පැටලෙන්නේ ජීවිතයත් මරණයත් අතරේ කෙරෙන සෙල්ලමක බව විසේකාර තාරුණ්‍යයේ ආලයෙන් මුසපත් වන ඔවුන්ට මොහොතකට අමතක වෙනවා. ඉහළම පැළන්තියේ දේශපාලනික පවුලක දියණියක සහ පහළම තළයේ ධීවරයෙකුගේ පුතෙක් අතර සිදුවන ආදර හුටපටයක අවසානය කුමක්ද ‍යන්න ඉතාමත්ම පැහැදිලියි. නමුත් තරුණයා Parshya සහ තරුණිය Aarchi විසින් තම කුහක සමාජ ක්‍රමය අභියෝගයට ලක් කරමින් ඔවුන් දෙදෙනා හරි හෝ වැරදි තීරණයක් ගන්නවා. චිත්‍රපටය නිකුත් වූවායින් පසුව ප්‍රත්‍යක්ෂ වශයෙන්ම යම් බලපෑමක් සිදුවූ බවත් වාර්තා වනවා.

මරාති සිනමාවේ ඉහළම සාර්ථකත්වයක් ලැබූ නිර්මාණයක් විදිහට Sairat හි වඩාත්ම කතාබහට ලක් වෙන්නේ තරුණ යුවලගේ රංගනයයි. 90% ක්ම වූ රංගන ශිල්පීන් ආධුනිකයින් විදිහට ප්‍රධාන රංගනය වෙනුවෙන් Rinku Rajguru සහ Akash Thosar විසින් විදහා පානා රංගන වින්‍යාසය සහ ප්‍රතිවාදී පාර්ශවය ඇතුළු සියලුම සහය රංගනයන් වල ලොකු ප්‍රබලත්වයක් දකින්නට ලැබෙනවා. මාතෘකාවට අදාළ වන සියලුම සංසිද්දීන් වෙනුවෙන් සැපයෙන පූර්ණ ‍යතාර්ථවාදී රංගනය නිසාම නරඹන්නාගේ සිතැඟි වෙනස් කරවන්නට පවා සමත් වන ස්වරූපයකින් සමන්විත වනවා.

Archi චරිතය වෙනුවෙන් Rinku Rajguru හට විශේෂ ගෞරව බුහුමන් හිමිවීමත් විශේෂයක්. 2001 දී උපත ලැබූ ඇයට චිත්‍රපටය සඳහා ආරාධනය හිමිවෙන්නේ 2013 දී යි. වයස අවුරුදු 14 වැනි ලාබාල වියේදීම ඈ 63 වන ජාතික චිත්‍රපට උළෙලේදී ඉන්දියානු ජාතික සම්මානයෙන් පිදුම් ලබනවා. ජූරියේ විශේෂ ඇගයීමට ලක් වනවා. හොඳම රංගන ශිල්පිනිය ලෙසින් මරාති ෆිල්ම්ෆෙයා උළෙලේදීත් සම්මාන ලබනවා. තම ප්‍රථම රංගනය වෙනුවෙන්ම ලැබිය හැකි ඉහළම සම්මාන දිනූ ඇය විසින් චිත්‍රපටයේ ජීවය රක්ෂා කරන අපූරුව අතිවිශිෂ්ටයි.

ඒ අනුව 66 වන බර්ලින් සිනමා උළෙල නියෝජනය කරන්නටත් අවස්ථාව හිමි කරගන්නා Sairat හට එහිදීත් හොඳ ප්‍රසාදයක් හිමි වෙනවා. කුලමල වාද භේදයන් නිසා සිදුවන සමාජ අසාධාරණයන් ගැන නිපැයුනු “Satyamev Jayate” රූපවාහිනී සංවාද මණ්ඩප වැඩසටහන නිර්මාණය කළ ප්‍රවීන රංගන ශිල්පී ආමීර් ඛාන් විසින් තම ට්විටර් ගිණුම ඔස්සේ “අනිවාර්යයෙන්ම නැරඹිය යුත්තක්” ලෙසින් විශේෂ සඳහනක් ද සිදුකර තිබෙනවා.

Sairat හි සංගීතයත් සුවිශේෂීයි. මේ වන විට බොලිවුඩයේත් ඉහළම නමක් දිනූ Ajey-atul සුසංයෝගය විසින් සම්පාදනය කරනු ලබන සංගීතය විසින් සමස්ත ඉන්දීය සිනමා ක්ෂේත්‍රයටම එක් කරනු ලබන්නේ විශාල වටිනාකමක්. ඇමරිකා එක්සත් ජනපදයේ ලොස් ඇන්ජලීස් නුවර Sony Symphony Studio හි දී, සංගිතඥයින් 60 දෙනෙකුගේ සහභාගීත්වයෙන් පටිගත කෙරුනු පළමු ඉන්දීය චිත්‍රපටය බවට පත්වෙන්නේත් Sairat මයි.

බොලිවුඩ්, කොලිවුඩ්, ටොලිවුඩ් සහ මොලිවුඩ් සිනමා ක්ෂේත්‍රයන්ට සාපේක්ෂව තවමත් පසුගාමී ව හිඳිනා මරාති සිනමාවේ විශිෂ්ටත්වය කියා පාන්නක් විදිහට මරාති සිනමා ඉතිහාසයේ වැඩිම ආදායමක් ලැබූ චිත්‍රපටය වන්නටත් Sairat ට හැකියාව ලැබුනේ කෝටි 4 ක වියදමින් තනා තිරගත කළ පළමු මාසය තුළදීම ලොව පුරා කෝටි 100 ක ආදායම් කඩ ඉමක් සනිටුහන් කරමින් දින මහාරාෂ්ට්‍රයේ සිනමාහල් වල සාර්ථක දින 100 ත් පසුකරමිනි.

ජාති ආගම් කුල භේද නොතකා ආදරයෙන්ම විතරක් බැඳෙමින් අරගල කරනා පෙම්වතුන් දැක ඇති. ආදරය වෙනුවෙන්ම සියල හැරදා අහසින් පොළවට බට රාජ කුමාරිකාවන් ද ඔබ දැක ඇති. අහස් මාළිඟා නොපතමින් තමන්ගේම නිදහස් අහසක තම විමන් සාදාගන්නා අහිංසක පෙම්වතුන්ගේ කතන්දරත් දැක ඇති නමුත් නරඹා අවසානයේ “අහසින් පොළවට” කඩන් වැටෙනා මෙතරම් සංවේදී හැඟීමක් නම් ඔබ කිසිදා අත්නොවිඳ ඇති.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post Sairat – අහසෙන් පොළවට – මරාතියෙන් ලොවට… appeared first on familylife.

අරගලකාරයෙක් විප්ලවවාදියෙක් පණට පණ පුදනා සහෝදරයෙක් කියනා කාරණය තෙළිඟු සිනමාවට නැඟෙනකොට එතනදී නිරායාසයෙන්ම මතුවෙන්නේ අධිබලැති ජවසම්පන්න බවක්. සාමාන්‍යයෙන් ගුරුත්වාකර්ෂණ රීතීන් සියල්ල උල්ලංඝනය කරනා දැවැන්ත සටන් පෙළහරපෑම් වල තෝතැන්නක් වන තෙළිඟු සිනමාව නිතරම වීරත්වය වෑහෙන මාධ්‍යයක්. ඒ අතරෙදී කලකට කලින් පෑයූ තාරකාවක් විසින් මේ සිනමා ප්‍රකාශනයට අපූරුවත්වයක් එක් කළා. චිත්‍රපටයේ නමත් තම නාමයත් අමරණීය එකක් බවට පත් කරවන්නට ඒ තාරකාවට හැකි වුණා. අර්ජුන් රෙඩ්ඩි හෙවත් විජේ දෙවරකොණ්ඩා නම් තාරකාව තෙළිඟු සිනමා අඹරේ සුවිශේෂී ආලෝක සටහනක් තැබුවා. එහි දෙවැනි අදියරක් වශයෙන් හඳුන්වන්නට හැකි තවත් අපූරු තෙළිඟු සිනමා නිර්මාණයක් විදිහට Dear Comrade තුළත් දෙවරකොණ්ඩා ගේ අනන්‍යතාවය අඩංගුයි.

බොබී නම් වන ඔහු, අර්ජුන් රෙඩ්ඩි තරමටම හොස්ස ලඟින් මැස්සෙක් ගියත් ලේ රත් කරගන්නා අයෙක් නොවුණත්, අයුක්තියට, අසාධාරණයට එරෙහිව ඕනෑම අවස්ථාවක තැනක් නොතැනක් තරාතිරමක් නොබලා තම දිවි දෙවෙනි කොට සටන් කරන්නට සූදානම් අයෙක්. කැම්පස් බිමේ දඩබ්බරයා විසින් හැමදාමත් ඇති කරනු ලබන අරගල විප්ලව නිසාම ඕනෑම සටනක මුල් පෙළ ඔහුටම හිමියි. කිසිවිටෙකත් කිසි අයෙකුටවත් මෙල්ල කළ නොහැකි ඔහුගේ ජන්ම ගතිය හුරුබුහුටි සුන්දරාවියක් ඉදිරියේවත් දමනය වෙයිද? ඇත්තටම එවැන්නියක් හමුවුවහොත් රළු පැවතුම් ඇති නමුත් කඩවසම් තරුණයාගේ හිත ආදරයකින් වෙළෙයිද? අරගල විප්ලව වලින් මිදුනා වූ සොඳුරු ප්‍රේම පාරාදීසයක ඔහුගේ හදවත නතර වෙයිද? මේ කියනා කාරණාවන් කොහොමින් කොහොම සිදුවෙයිද කියන සැක සාංකාව ඇවිළෙන්නේ “ලිලී” ගේ ආගමනයෙන්.

බොබී හටම පෑහෙන ලිලී ත් එතරම්ම දඟකාරියක්. වචනයේ පරිසමාප්ත අර්ථයෙන්ම සුන්දර, හැඩකාර, ක්‍රියාශීලී සහ විශේෂයෙන්ම ක්‍රීඩාශීලී ඇය වැනි චරිතයකට බොබී වැනි දැඩි පිරිමි පහසක් තමයි වඩාත්ම ගැළපෙන්නේ. නමුත් මෙතන තිබෙනා ගැටළුව වෙන්නේ අරගලයට විප්ලවයට නිතරම මුල් තැන දෙන ඔහුගේ දිවිය තුළ ලිලී වැනි ආදරවන්තියක් හට දෙවෙනි තැන ලැබීම අනිවාර්යයෙන්ම සිදු වන්නක් වීමයි. ප්‍රතිවිරුද්ධ කාන්තා පාර්ශ්වයට එය නම් කොහෙත්ම ඉවසුම් ඉහිලුම් නොදෙනා කාරණාවක් නිසා දෙදෙනා අතර පරස්පරයක් ඇතිවීමටත් ඉඩකඩ බොහෝයි. ඒ අතරෙදී දෙදෙනා අතර සිදුවනා බොහෝ ක්‍රියාවලීන් නිසා මේ කතන්දරය නරඹන්නාව විවිධාකාර ඉසව් ඔස්සේ එහා මෙහා අතරමං කරනු ලබනවා.

ප්‍රථම භාගය සහ දෙවන භාගය යනුවෙන් වෙන් කොට දැක්වුවහොත් සමස්ත කතන්දරය දීර්ඝ චාරිකාවක්. බොබීගේ ජීවන චාරිකාවේ කොටස් කරුවන් වන අපිට ඒ වෙහෙස වඩාත්ම තදින් දැනෙනවා. අරමුණක් සාක්ෂාත් කරගැනීම උදෙස ඔහු අරමුණක් හඹා ගියාද, එසේත් නැතිනම් තම අරමුණ ඔහුගෙන් දුරස් වූ නිසා ඉන් තව තවත් ඈතටම යන්නට ඔහු උත්සාහ කළාද ? දීර්ඝ වෙහෙසකාරී චාරිකාව අවසානයේදී යාන්තමින් ලබන අස්වැසිල්ලක් සමඟිනුයි නරඹන්නාව ඒ ක්ෂණයකින්ම ලිලී ගේ ජීවන චාරිකාවට එක් කරනු ලබන්නේ. එතනින් එහාට දිවෙනා බොහෝමයක් සංවේදී කාරණාවන් ඔස්සේ දෙදෙනාම විඳි අනේක වේදනාවන් ක්‍රමයෙන් සමනය වෙමින් පවතින අතරේදී වසර කීපයකට පෙරාතුව තම දිවියෙන් අතහැරී ගිය අරගලකාරී විප්ලවවාදී ඉරණමට යළි පණ පොවන්නට සිදුවන්නේ පිළිකුල් සහගත ලෙස තාඩන පීඩනයට ලක් වන්නා වූ සුවහසක් කාන්තා ප්‍රජාව නිසායි.

ලිලී ඔස්සේ විවර කෙරෙනා නවතම අරගලයට විප්ලවයට මෙතෙක් හමු නොවූ නායකත්වයක් ලැබෙන්නේ බොබී ගේ මාරාවේශය උපරිම තළයට නංවාලමින්. නමුත් ගැටළුවක් පවතියි. අරගලයා කා උදෙසාද? කා වෙනුවෙන් ද? ජීවිතයම
කඳුලු උල්පතක් කරගෙන සටන් වදිනවාද නැතිනම් හිතේ සැනසුම කෙසේ හෝ උත්පාදනය කරගනිමින් සිදු වූ සියලුම අපචාරයන් හදවතේම ගුලි කරගෙන නිහඬව ඉන්නවාද? ඇත්තටම ප්‍රායෝගිකව හිතල බැලුවොත් කොයිකද වඩාත් පහසු? ප්‍රශ්න වලට මුහුණට මුහුණ දී සටන් කරන්නට පිරිමියෙක්ට තරම් ගෑණියෙක්ට හයියක් තියෙනවාද? කාන්තාවක් නිහඬව සැඟවී සිටීමෙන් උහුලනා අසරණභාවය පිරිමියා කෙසේ නම තේරුම් ගනියිද?

බොබී – ලිලී මුහුණ දුන් මේ අනුපමේය ජීවන අත්දැකීම් තුළින් පැවසෙනා කතන්දරය තුළ සැබැවින්ම අසරණ වෙන්නේ නරඹන්නායි. කතන්දරය තුළ පසුකරනා විවිධාකාර අවධීන් හා ගැටෙනා නරඹන්නාට අවසන් භාගයට එනවිට එකම චිත්‍රපටයකින් චිත්‍රපට කීපයක්ම නැරඹූ බවක්ද දැනෙනු ඇති. විජේ දෙවරකොණ්ඩා ට අභියෝගයක් නැති චරිතයට කිසිසේත්ම නොදෙවෙනි ඉදිරිපත් කිරීමක් ලිලී ලෙසින් Rashmika Mandana විසින් අති ආකර්ශනීයව විදහා දැක්වීම නිර්මාණයේ වඩාත්ම සාර්ථකම කොටසයි. චිත්‍රපටයේ අධ්‍යක්ෂකවරයා සහ රචකයා විදිහට Bharat Kamma විසින් සියල්ල ආකර්ශනීයව තම කෝණයට නතුකර තිබෙනවා. අරගලයට ආලය කරන්න නම් විප්ලවවාදීයාව පූර්ණ වශයෙන් අවබෝධ කරගත යුතුමයි. Dear Comrade සමඟින් විප්ලවයට ජය වේවායි පතමින් අපි අරගලයට ආදරය කරමු.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post Dear Comrade – අරගලයට ආලය කරන තෙළිඟු විප්ලවය appeared first on familylife.

Gully Boy යනු හින්දි සිනමාවෙන් පෙර හමු නොවූ විරූ උණුසුම් මාතෘකාවක්. මුලින්ම මෙය අතිශය නැවුම් තේමාවක් විදිහට තාරුණ්‍යයේ අවධානය තදින්ම පැහැර ගන්නා එකක්. වීදි Rap සංස්කෘතිය බටහිර වගේම ආසියාවෙත් තදින්ම මුල් බැසගත් එකක් නිසාම මේ නවමු ඉන්දීය සිනමා අත්දැකීම සුවිශේෂී එකක් වන්නේ බොලිවුඩයේ ආකර්ශනීයම චිත්‍රපට අධ්‍යක්ෂිකාවක් වන Zoya Akhtar විසින් මෙහි අධ්‍යක්ෂක කටයුත්තෙහි නිරත වන නිසායි.

පූර්ව ප්‍රචාරක පටයෙන් ලැබුන ඉඟි වලින් සනාථ කෙරුනේම ලොව සුපිරිතම රැප් තරුව වන Eminem විසින් රංගනයෙන් දායක වූ ‘8 Mile‘ හි ප්‍රතිනිර්මාණයක් ලෙසින් නමුත් Gully Boy කියන නමත් එක්ක අනාවරණය වුණා සැබෑම Street Rap ශිල්පීන් යුගලයකගේ නාමයනුත්. මුඩුක්කුවක හැදුණු වැඩුණු, ජීවිතේ හැම අත්දැකීමක්ම පීඩිත පංතියේ සාමාජිකයින් ලෙසින්ම විඳපු, Underground rappers ලා විදිහටම විතරක් සීමිත ජනප්‍රියතාවයක් ඉසිලූ ඔවුන් දෙදෙනාම අද Divine සහ Naezy ලෙසින් ඉන්දීය රැප් සංගීත ක්ෂේත්‍රය තුළ ඉහළම ජනප්‍රියතාවයකට හිමිකම් කියනවා. Zoya Akhtar විසින් මේ නිර්මාණය කරන්නේ Divine ගේ Naezy චරිතාපදානයක් නම් නෙමේ. නමුත් Gully Boy ගේ චරිත විස්තරයට පාදක වෙන්නේ මුඩුක්කු පරිසරයකින් උපන් නිර්මාණශීලී පරපුරක සැබෑම කතන්දරයකුයි.

Murad කියන්නේ සටන්කරුවෙක්. ඔහුට සටන් කරන්නට තිබුනා දහසකුත් එකක් අභියෝගයන්. ගිනි පෙට්ටි ප්‍රමාණයේ මුඩුක්කු පැල්පතක දිවි ගෙවන්නට සිදු වීම ඇත්තටම ඔවුන් කිසිම අයෙක්ට මහා ගැටලුවක් නම් නෙමෙයි. එම ජීවන රටාව තමන්ගෙ උරුමය විදිහට භාරගෙන ඔවුන් සියල්ලන්ම ඉන් ගොඩනගාගත් තමන්ගේම සංස්කෘතියකට හැඩ ගැහෙනවා. ඒ අතරින් Murad ට ඕන වෙන්නෙත් ජීවිතේ දිනන්නට විතරයි. උපාධිය සම්පූර්ණ කරන ගමන්, තම ආදරවන්තිය Zafeena ගේ තුරුලේ සැනසෙන අතරෙදී, විනෝදාස්වාදයට නිතරම අහන මුමුණන රැප් සංගීතය විසින් ඔහුට නව සිහිනයකට පාර කියනවා.

ගත කරන කටුක ජීවිතය ඇතුලෙදි පවුල් පසුබිම තුළත් සහ බාහිර සමාජය එක්ක ගැටෙන මුඩුක්කු කාරණා එක්කත් ඔහුට අත්විඳින්නට සිදුවන කඨෝර අත්දැකීම් නිසාවෙන්ම උපදින උද්වේගකාරී රැප් වදන් ප්‍රථම වරට ඔහු අතින් ලියැවෙන්නට ගන්නවා. නමුත් ජනප්‍රිය තළයේ රැප් තාරකාවක් කියන්නේ මුඩුක්කු තරුණයෙක්ට ඈත අහසේ දිලෙන තරුවක් හා සමානම අත පෙවිය නොහැකි මානයේ රැඳෙන සදාකාලික හීනයක්ම පමණයි. අනපේක්ෂිතව ලැබෙන අවස්ථාවක් නිසාවෙන් වෙහෙසකර කැපකිරීම් හේතුවෙන්ම ඔහු විසින් මුඩුක්කුවෙන් එළියට තමන්ගෙ නම රැඟෙන යනවා “Gully Boy” විදිහට.

Ranveer Singh නම් සුපිරි බොලිවුඩ් තරුවට ලැබුනු අසමසම අවස්ථාවක් විදිහට ඔහු මින් උපරිම ඵල නෙලාගන්නා අයුරු චිත්‍රපටය පුරාවටම දකින්නට හැකියි. කාලයක් තිස්සේම විවිධාකාර චරිත නිරූපණයන් ඉදිරිපත් කළත් මෑත වකවානුවේදී සිදුකළ ඔහුගේ ආකර්ශනීයම රංගන වින්‍යාසය මෙතුළින් දකින්නට ලැබෙනවා. Gully Boy වෙනුවෙන් වූ හොඳම තෝරාගනීම අනිවාර්යයෙන්ම Ranveer Singh ම පමණක්මයි ලෙසින් හැඳින්විය හැකි මට්ටමේ විශිෂ්ටතම සහායක් චරිතය තුළට ඔහු විසින් ලබා දෙනවා.

Alia Bhatt ගැනත් එම තක්සේරුව එලෙසින්ම පුද කරන්නට හැකියි. හුරුබුහුටි නමුත් කට සැර සහ රණ්ඩු කෙක්කක් විදිහට ඇය විසින් නිරූපණය කරන්නේ Murad තරමටම ආකර්ශනීය භූමිකාවක්. කරටකර සහායක් සහ ආදරණීය ආදර අන්දරයක විසේකාර පෙම්වතියක් විදිහට Alia Bhatt විසින් තවත් කැපීපෙනෙන රංගන කුසලතාවයක් විදහා දක්වනු ලබනවා. ඒ වගේම ප්‍රථම වරටයි ඔවුන් දෙදෙනාම එකම චිත්‍රපටයකදී දකින්නට ලැබෙන්නේත්. ඉතා සුන්දර ගැළපීමක් විදිහට ඔවුන් දෙදෙනාගේ සුසංයෝගය නිසාම චිත්‍රපටයේ අගය තව තවත් ඔප් නැංවී තිබෙනවා.

ආධුනික රැප් ශිල්පී Murad හට Gully Boy අභිෂේකය ලබන්නට අවස්ථාව සලසා දෙන දැවැන්ත සහය ලැබෙන්නේ පරිණත රැප් ශිල්පියා MC Sher හෙවත් Shrikant විසින්. පාසැල් ප්‍රසංගයකදී අහම්බයෙන් දකිනා MC Sher ගේ උද්වේගකාරී රැප් ගායනා ඉදිරිපත් කිරීමක් නිසාවෙන් Murad ට මෙතෙක් කලක් තමන් ඇසූ රැප් සංගීතය වෙනුවට රැප් සංගීත ශිල්පියෙක් වීමේ ආශාවක් හට ගන්නවා. MC Sher හමුවී ඔහුගේ සිත් දිනාගැනීමෙන් හටගන්නා සහෝදරත්වයෙන් බැඳුනු ශක්තිමත් මිතු දමක් ඔස්සේ සාමාන්‍ය මුඩුක්කු තරුණයා Murad හට “Gully Boy” නම් විරුදාවලිය ලබන්නට හැකි වනවා.

චිත්‍රපටය තුළ අතිශය ආකර්ශනයකට නිතැතින්ම ලක් වන චරිතයක් විදිහට MC Sher ගේ භූමිකාව නිරූපණය කරනු ලබන Siddhant Chaturvedi ගේ කුළුඳුල් සිනමා රංගනයයි මේ. නමුත් ඇගයීමකට ලක් කළ හැකි මට්ටමේ විශිෂ්ට සහායක් ඔහුගෙන් ලැබෙන අතර, Street Rapper ගුණාංගය අතින් Ranveer Singh ට වඩා Chathurvedi සෑහෙන ඉහළ මට්ටමකින් ඉදිරිපත් කරන තම රංගන කුසලතාවය 100% ක්ම වෘත්තීමය මට්ටමේ රැප් ශිල්පියෙකුගේම එකක්. Siddhant Chaturved හා කරටකර ගැටෙන තරමේම සහාය රංගනයක් Murad ගේ ප්‍රධානතම එදිරිවාදියා වන ඔහුගේ පියාගේ චරිතය වෙනුවෙන් රංගන් ශිල්පී Vijay Raaz ගෙන් දකින්නට හැකියි. කතන්දරයට අමතර අලංකාරයක් රැගෙන එන Kalki Koechlin විසින් හැමදාමත් වගේ අපූරු වෙනසක් එක කරවනු ලබනවා.

චිත්‍රපටයේ පසුතලය වෙන්නේ රැප් සංස්කෘතිය නිසාවෙන්ම ඒ වෙනුවෙන්ම සිදුකර තිබෙන නිර්මාණාත්මක වෙනසත් පැහැදිලිවම කැපී පෙනෙන එකක්. චිත්‍රපටය වෙනුවෙන්ම සැබෑම රැප් ශිල්පීන්ම යොදාගැනීමත් අතිශය ගුණාත්මක සාර්ථකත්වයක්. විශේෂයෙන්ම Rap Battle දර්ශන වලදී දක්නට ලැබෙන ස්වභාවිකත්වයත්, පද මාලාවනුත් චිත්‍රපටය වෙනුවෙන් සම්පාදනය වූ ගීතයනුත් Hollywood මට්ට්මින්ම සම්පාදනය කොට තිබෙනවා. Murad ගේ චරිතයට පාදක කරගත් Divine සහ Naezy ඇතුළුව Sez on the beat, Rishi Rich, Dub Sharma, Jasleen Royal , Ace, Ishq Bector, MC Altaf, MC TodFod, 100 RBH, Maharya, Noxious D, Viveick Rajagopalan ආදී වශයෙන් වූ ඉන්දීය රැප් ශිල්පීන් රැසකගේ දායකත්වය Gully Boy වෙනුවෙන් ලැබී තිබෙන්නේ නූතන බොලිවුඩ් සිනමාවේ නවමු සළකුණක් සටහන් කරමිනුයි.

දුප්පත්කමින් මිරිකෙන තාරුණ්‍යයට මුඩුක්කු පරිසරයන්හිදී නිරන්තරයෙන්ම නොමඟ යන්නට ඇති අවස්ථාව වැඩි බවත්, ඒ අතරින් ජීවිතයේ නිවැරදි සිහිනය දකින සැබෑම සටන් කරුවන් විසින් තම වේදනාවන්ම තමන්ගේ හොඳම අවිය කරගන්නා බවත් කියාපාන ශක්තිමත් කතන්දරයක් විදිහට Gully Boy යනු වසරේ වඩාත්ම මතකයේ රැඳෙන හින්දි චිත්‍රපටයක් වනු නොඅනුමානයි.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post Gully Boy – නොසැලෙන ආත්ම විශ්වාසයේ ජයග්‍රහණය appeared first on familylife.

සුපර් මෑන්, බැට් මෑන්, ස්පයිඩර් මෑන් ආදී සුපිරි වීරයන් බිහිකරපු හොලිවුඩය ඉදිරියේ ඉන්දියාවෙන් ලොවට පිදෙන සැබෑම සුපිරි වීරයා වෙන්නෙ පෑඩ් මෑන්. 2018 වසරේ විශිෂ්ටතම බොලිවුඩ් චිත්‍රපටය වශයෙන් සම්මානයෙන් පිදුම් ලබන්නට සියලුම කාරණා සම්පූර්ණ කර තිබියදීත් පසුගිය Filmfare සම්මාන උළෙලේදී කිසිදු ජයග්‍රහණයක් ලබන්නට Pad Man හට අවස්ථාවක් ලැබුනේ නැහැ.

හොඳම නළුවා ඛාණ්ඩයට පමණක් රංගන ශිල්පී Akshey Kumar හට නිර්දේශිත නාමයන් අතරට එක් වෙන්නට හැකි වුවත් ජයග්‍රහණයක් ලබන්නට හැකි වූයේත් නැහැ. නමුත් සමස්තයක් වශයෙන් 2018 වසරේදී තිරගත වූ සියලුම චිත්‍රපට අතරේ වැදගත්ම සිනමා නිර්මාණයක් විදිහට Pad Man ගැන කතා කරන්නටම ඕන.

මුලින්ම මේක R. Balki නිර්මාණයක්. එතනදි මතුවෙන නිර්මාණාත්මක ගුණාත්මක භාවය පිළිබඳව සැකයක් නැහැ. Paa, English Vinglish සහ Dear Zindagi වැනි ගුණාත්මක බව අතින් බොලිවුඩයෙන් බිහි වූ හොඳම සිනමා නිර්මාණයන් අතර ඔහුගේ නාමයට තිබෙන්නෙ ඉහළම වටිනාකමක්.

එවන් වූ විශිෂ්ට අධ්‍යක්ෂකවරයෙකුගේ මෙහෙයවීම යටතේ Pad Man හි ප්‍රධාන රංගන ශිල්පියා Akshey Kumar සතුවත් වර්තමානයේදී පවතින්නේ එවැනිම වූ අනන්‍යතාවයක්. 90 දශකයේදී ආක්ෂේ කුමාර් කිව්වම මනසේ ඇඳෙන රූපය නෙමෙයි අද අපි ඔහුගේ ප්‍රතිභාවෙන් දකින්නේ. ඇත්තෙන්ම බොලිවුඩයේ සෑම පරාසකයම සැරිසරා දැන් ඔහු එක්තරා කඩ ඉමක නැවතී සිටින අයුරු තමා මේ දකින්නේ.

කතන්දරය එක අතකින් ඇදහිය නොහැකි චරිතාපදානයක්. මීන් පෙරදී සිනමාත්මකව නොඇසූ විරූ පුවතක්. ලොවට නව නිර්මාණයන් උත්පාදනය කරවූවන් බොහෝ අවස්ථාවන්හිදී ඒවා මුදුන්පත් කරගත්තේ තමා සතු බොහෝ දෑ කැපකරමින්. පසු කලෙකදී සුපිරි වීර නාමයකට ඈඳමින් Pad Man නමින් විරුදාවලිය ලබන Lakshmi Kant නම් වන ඔහු, භාරත පුරවැසියෙකුට ලද හැකි ඉහළම ගෞරව බුහුමානයෙන් පිදුම් ලැබුවේත් තමා සතු සියල්ල අහිමි කරගනිමින්.

තම ආත්ම ගෞරවයත් ඊට අයත්. එකම අරමුණක් වෙනුවෙන් ඔහු මේ සා කැප කිරීමක් කළේ, අනේක දුක් වින්දේ, නින්දිත ගැරහුම් අපහාසයන් විඳ දරාගත්තෙ කොහොමද කියල හිතෙන තරමටම මේ කතාන්දරය අතිශය සංවේදී තලයකට ප්‍රේක්ෂකයාව රැගෙන යනවා. ආක්ෂේගේ අව්‍යාජ විශිෂ්ට රංගනය ඇතුලුව නරඹන්නට බොහෝ දේ සතුයි.

හාස්‍යය, සංවේදීත්වය, ප්‍රමෝදයෙන් පිනා යෑම, ප්‍රේමණීයත්වය ආදී වශයෙන් සෑම දේම ඊට ඇතුළත්. ඒ වගේම ඒ සෑම ගුණාංගයක්ම වඩ වඩාත් තීව්‍ර ව ප්‍රේක්ෂකයාගේ හදවතටම කා වදින්නට මනා පිටිවහලක් ලැබෙනවා Amit Trivedi ගේ සංගීතයෙන්. ඕනෑම චිත්‍රපටයක ස්වභාවික රිද්මය බුද්ධිමත්ව නිවැරදිව අවබෝධ කරගන්නට හැකි බොලිවුඩයේ අසහාය සංගීතඥයෙක් විදිහට Amit Trivedi ගේ දායකත්වය මීට උපරිමයෙන්ම ලැබී තිබුනා.

මේ කතාව අදට වලංගුද කියන තැනට ආවොත්, මේ කතා කරන්නේ සිනමා නිර්මාණයකින් අපි මීට කලින් අහපු දැකපු නැති දෙයක්. අදටත් ළමයින්ට, විශේෂයෙන්ම පිරිමි ළමයින්ට අභිරහසක් වූ දෙයක් ගැනයි වස්තු බීජය වෙන්නේ. “සනීපාරක්ෂක තුවා” සම්බන්ධ වෙළඳ දැන්වීමක් පවුල් පිටින් රූපවාහිනී නරඹන අවස්ථාවක විකාශය වන විටෙකදී සමහර විට දරුවන් ඉදිරියේ වැඩිහිටියන් අසරණ වෙනවා.

විවිධාකාරයේ අනුමාන තිබුනත් හරි තේරුම තෝරගන්නට වෙන්නේ ළමා විය ඉක්මවා ගිය කලෙකදියි. අද ඒ අභිරහස් නිශ්පාදනය ගැන අපි චිත්‍රපට නරඹනවා. සනීපාරක්ෂක තුවා එහෙමත් නැත්නම් සරළව “පෑඩ්” කියන දේ භාවිතයට එනකොට ඒ හා ගොඩනැගෙන අනවශ්‍යාකාරයේ භීතිකාවක්, ලජ්ජාශීලීත්වයක්, පටු මානසිකත්වයක් ආදී වශයෙන් පුලුල් පරාසයක විහිදෙන සමාජ සංසිද්දීන් හා ගැටීමක් ඉදිරිපත් කරවමින් මේ අතරට මැදි වෙන පාර්ශවයන් ගේ භූමිකාව නිර්මාණකරුවා විසින් පුදුමාකාර ප්‍රරිශ්‍රමයකින් හඳුනාගෙන තිබෙනවා.

ප්‍රායෝගිකව බැලුවොත් පිරිමි පාර්ශවයේ කීයෙන් කී දෙනාද තමන්ගෙ අක්කගෙ, නංගිගෙ, පෙම්වතියගෙ, බිරිඳගෙ අවශ්‍යතාවයකට කඩේට ගිහින් සනීපාරක්ෂක තුවා මිලදී ගන්නේ? මොකද ඒ පිරිමි වපසරියට ඒ කාරණේ අයත් නොවන නිසා. කොටින්ම ඒක “ගෑණු” ප්‍රශ්නයක්. හැබැයි මේ කතන්දරය සිද්ද වෙන වකවානුවේදී අපේ වීරයා ලක්ෂ්මීකාන්ත් ට නම් ඒ ඔහුගේ පණ හා සම තම ප්‍රිය බිරිඳගේ සුවපහසුව පිළිබඳව බැරෑරුම් කාරණයක්. ඔසප් වකවානුවේදී නිරපරාදේ ඈ විඳින දුක පිරිමි හිතකින් අවබෝධ කරගැනීමම ඒ සමාජ වාතාවරණය තුල අදහන්නට වටින කාරණයක්.

පිරිමියෙක් විදිහට මේ ප්‍රශ්නයට ඔහු මැදිහත් වෙන්නෙ පිරිමියා කියන සීමාසහිත බලප්‍රදේශයේ සියලුම සීමාවන් ඉක්මවා යමින්. ඒ කාරණය ඔස්සේ ඉදිරිපත් වෙන්නේ සමස්ත ඉන්දීය කාන්තා ජනගහනයෙන් ඉහළම ප්‍රතිශතයක් මුහුණ දෙන දුක්ඛිත තත්ත්වයක් පිළිබඳවයි.

මිල අධික නිසා සනීපාරක්ෂක තුවායක් කියන්නෙ පවුල් සංස්ථාවකට අනවශ්‍ය බරක්. ඒ වෙනුවෙන් අනුගමනය කරන විකල්ප ක්‍රියාමාර්ගයන් නිසා එම කාන්තාවන් මුහුණ දෙන්නේ සෞඛ්‍යමය වශයෙන් බරපතළ තර්ජනයකටයි. රටේ ගැහැණුන් විඳින දුක දකින ලක්ෂ්මීකාන්ත්ට බැහැ තම බිරිඳවත් ඒ ගොඩට ඇදලා දාන්න. තම පිරිමි පෞරුෂය අභියෝගයකට ලක් කරවමින් ඔහු සෘජුවම මැදිහත් වෙනවා මේ ගෑණු ප්‍රශ්නයට. අන්තිමට සිද්ද වෙන්නේ සමාජයක් ඉදිරියේ අන්ත අසරණ ලෙස ගැරහීමකට ලක් වෙන්නට. නමුත් අවසානයේදී මෙන්න ඔහු සුපිරි වීරයෙක්.

කතන්දරය තුළ දකින්නට ලැබෙන ආකර්ශනීයම දෙයක් තමයි අපේ වීරයා ලක්ෂ්මීකාන්ත්ව තිරය මත දෙකට බෙදාගන්නා කුසලතා පූර්ණ රාධිකා ආප්ටේ සහ සුන්දර සෝනම් කපූර් චරිත යුගලය. Pad Man කියන දැවැන්ත භූමිකාව ගොඩනැගෙන්නට මේ කාන්තා පාර්ශවයන් ද්විත්වයම අදාළයි. ප්‍රේක්ෂකයාත් එක්තරා අන්දමකින් අසරණ වෙනවා චරිත දෙක මැද්දේ. ඔහු පෑඩ් නිෂ්පාදන කටයුත්ත අරඹන්නට තීරණය කරන්නේ තම බිරිඳගේ ශාරීරික සුවය වෙනුවෙන්.

එතනදී රාධිකා ආප්ටේ විසින් නිරූපණය කරනු ලබන බිරිඳ ගේ භූමිකාව අභියෝගාත්මක එකක්. සැමියා ගේ ක්‍රියාකලාපය තම සුවය වෙනුවෙන් වුවත් ඔහු හා එකඟ වන්නට, ඔහුට සහයක් වන්නට ඇයට හැකියාවක් නැහැ. පරිවාරයෙන්, සමාජයෙන් ඔහු වෙත එල්ල වන නින්දා ගැරහුම් ඇයටත් භාරගන්නට සිදු වනවා. පසු කලෙකදී පෙරළිකාර සමාජ විප්ලවයක් සිදු වූ මේ ක්‍රියාන්විතයේදී පූර්ණ අවබෝධයකින් යුතුව දුක සේ වෙහෙස වී පියවරෙන් පියවටර ඔහු තම සාර්ථකත්වයට ලඟා වෙනවා.

නමුත් Pari නම් වන අහම්බයෙන් මුණ ගැසෙන ඉෂ්ඨ දේවතාවිය නොමැතිව ඔහුට පරිපූර්ණ වන්නට අවස්ථාවක් ලැබෙන්නේත් නැහැ. තම බිරිඳගෙන් පමණක් ලැබිය යුතු සහය ඔහුට ලැබෙන්නේ නන්නාඳුනන්නියකගෙන්. මේ වෙනුවෙන් සෝනම් කපූර් ගෙන් දකින්නට ලැබෙන සුන්දර රංගන ප්‍රාසාංගිකත්වය තුළින් කතන්දරයේ ආකර්ශනීයත්වය වඩාත් ඔප් නැංවී තිබෙනවා.

අවසාන වශයෙන් අනිවාර්යයෙන්ම සම්මානයට පාත්‍ර විය යුත්තක් නමුත් සම්මාන ලබන්නට නොහැකි වූ හේතුව නම් ගැටලුකාරී එකක්. හොඳම චිත්‍රපටය සඳහා වූ නිර්දේශිත නාමයන් අතරට එක් වූ Stree වැනි චිත්‍රපටයක් තුළ Pad Man වැනි දැවැන්ත චරිතාපදානයක් අභිබවා යන්නට තරම් තිබුනේ කුමක්ද? යන්න නම් සැබැවින්ම ගැටලුවක්.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post Pad Man (පෑඩ් මෑන්) – Filmfare සරදම් ලද සැබෑ වීරයා appeared first on familylife.

• දරුවෙකුට පොත පත හුරු කිරීමේදී හැකි තරම් ඉක්මනින් ඒ දේ ආරම්භ කිරීම ඉතාමත් සුදුසු බවට පර්යේෂණ මගින් කරුණු හෙළි වී ඇති අතර ඒ අනුව දරුවා මවුකුසේ ඉන්න කාලසීමාව තුළදී  මව විසින් ගීත ගායනය සහ කතන්දර පොත් කියවීම මගින් ළදරුවාට ඒවා ශ්‍රවනය කිරීමේ හැකියාව ඇති බවට පැවසෙනවා.

• වයස අවුරුද්දට වඩා අඩු ළදරුවන් විශාල වර්ණවත් පින්තූර සහිත බෝර්ඩ් බුක්ස් සහ රෙදිවලින් නිමාව කරන ලද ගීත අඩංගු පොත්වලටත්, වයස අවුරුද්දට වඩා වැඩි දරුවන් වාහන, සතුන් වැනි දේවල්වල පින්තූර අඩංගු වර්ණවත් පොත් පත් බැලීමටත්, අවරුදු 2-4 වයස් සීමාවේ දරුවන් අකුරු, ඉලක්කම් සහ පින්තූර සහිත කෙටි කතන්දර පොත්වලටත් වඩා ප්‍රියතාවයක් දක්වනවා.
• පොතක් කියවීමට පෙර සූදානමක් විදියට දරුවා ඒ සදහා ප්‍රියතාවයක් දක්වන අවස්ථාවක් සහ නිස්කලංක පරිසරයක් තෝරාගෙන දරුවාට අවශ්‍ය පොත තෝරාගැනීමට ඉඩහරින්න. දරුවන්ගේ රසඥතාවය එකිනෙකාට වෙනස් බව තේරුම්ගෙන ඒ ඒ තෝරා ගැනීම්වලට අනවශ්‍ය ආකාරයට බලපෑම් කිරීමෙන් වැළකීම ඉතාම වැදගත් වෙනවා.
• දරුවන්ට කතන්දර පොත් මිලට ගැනීමේදී දරුවා ප්‍රිය කරන ආකාරයේ පොත්වලට අමතරව දරුවාගේ ජීවන සංසිද්ධි සිහිපත් වන ආකාරය​ට පොත්පත් මිලට ගැනීමත් සිදු කිරීම මගින් දරුවාගේ අවධානය ලබාගැනීමේ හැකියාව වැඩි වෙනවා. එයට උදාහරණයක් ලෙසින් දරුවා පාසල් යන මුල්ම දිනය, ලෙඩකට බෙහෙත් ගැනීමට දොස්තර ළගට යෑම, පවුලට අලුතින් තවත් පොඩ්ඩෙක් එකතු වීම, උපන්දින, නිවසින් පිටතට ගිය දිනෙක වැනි අවස්ථා දක්වන්නට පුළුවන්.
• දරුවා තමන් සමීපයට අරගෙන පහසු ඉරියව්වකින් වාඩිවී පොත අල්ලාගැනීමට සහ පිටු පෙරළීමේ අවස්ථාව දරුවාට ලබාදෙන්න. එක් පිටුවක් නිදහසේ අධ්‍යනය කිරීමෙන් පසුව ඊළග පිටුවට පෙරළීමේ අවස්ථාව දරුවාට ලැබෙනවා.
• මුලින්ම තෝරාගත් පොතේ කවරය දරුවාට පෙන්වමින් කතුවරයා, කතාවේ ස්වභාවය සහ චරිත පිළිබඳව කෙටි හැඳින්වීමක් කරන්න. කුඩාම වයසේදී කතුවරයා හඳුන්වාදීම අවශ්‍ය නොවුනත් අවුරුදු 3 – 4 කාලයේදී දරුවාට පොත හඳුන්වන්නටත් (උදා – සිබිල් නැන්දගෙ පොතක්) එය උදවුවක් වේවි.

• දරුවන්ට කතන්දර පොත් කියා දීමේ දී එහි අඩංගු කතන්දරය මුළුමනින්ම කියා දීම අත්‍යවශ්‍ය වන්නේ නෑ. දරුවාද හවුල් කරගනිමින් අවශ්‍යනම් පින්තුරය බලාගෙන කතන්දරයක් ගොඩනැංවීමේ හැකියාව ඔබට තියෙනවා. චරිතවලට අදාළ වෙන ආකාරයට හඬ උස් පහත් කිරීම, කටහඬ වෙනස් කිරීම, ශබ්ද නගා කියවීම සහ රඟපාමින් වගේ​ම සින්දු කියමින් කතාව රඟදැක්වීම මගින් කතාන්දරය සජීවී වෙන අතරම දරුවාට අලසකමක් ඇති වීම අවම වෙනවා.
• දරුවාගේ අංග චලන වටහා ගනිමින් ක්‍රියා කිරීම මෙහි දී වැදගත් කරුණක් වෙනවා. පින්තූරය පෙන්වමින් කතාව කියාදෙන විට දරුවා ඊට අදාළ වචනය ඉක්මනින් ඉගෙනගන්නවා වගේම පින්තූරය දිහා බලාගෙන එය අධ්‍යනය කරන්නත්, ඒ ගැන කතා කරන්නත් දරුවාටත් අවස්ථාවක් ලබා දිය යුතු වෙනවා.
• අකුරු හඳුනන වයසක දරුවෙක් නම් අකුරු උඩින් ඇඟිලි  දුවවමින් වචන කියාගෙන යාම, දරුවට තනිවම වචන කියවීමට උපකාරයක් වෙනවා. ඉවසිලිවන්ත වීමත්, කිසිම හේතුවක් මත දරුවාට සැර වැර නොකිරීමත් අත්‍යවශ්‍ය කාරණයක්. ඒ වගේම කතාව කියා දෙන අතරතුර දරුවාගෙන් ප්‍රශ්න ඇසීම අනිවාර්යෙන් සිදු කළයුතු දෙයක් වෙනවා.
• කතාන්දරයේ සිදුවීම් සහ චරිත අතර අන්තර් සම්බන්ධතාවයක් ගොඩනඟා ගැනීමටත්, තමන් කියවන පොත පිළි​බඳ අවබෝධයක් ලබාගැනීමටත් මේ ප්‍රශ්න ඇසීම ඉතා වැදගත් වෙනවා. අවුරුදු 3ට වඩා වැඩි දරුවන්ට පොත් කියා දීමේ දී පොත කියාදීමට පෙර (පොත් කවරය පෙන්වා හිතෙන දේ ගැන උපකල්පනය කිරීම), පොත කියවන අතරතුර (චරිතය ගැන, ඊළගට සිදුවන දේ ගැන නිගමනයක ඒම/ චරිත අත්විඳින හැඟීම් පිළිබඳව දරුවාට දැනෙන දේ ගැන) සහ කතාව අවසානයේදී (අවසානය ගැන දරුවාට  හිතෙන දේවල්, කතාන්දරය පිලිබඳ මතකය සහ සාරාංශය) දරුවාගෙන් ප්‍රශ්න ඇසිය යුතු වෙනවා. ඒ වගේම, දරුවා අසන ප්‍රශ්නවලටත්  ඔබ විසින්  පිළිතුරු ලබා දිය යුතු වෙනවා.

• වචනවල තේරුම, සමාන වචන ගැන වගේම සමාන ශබ්ද රටාවක් ඇති වචන ගැන වගේම යථාර්තවාදී කතා, සුරංගනා කතා සහ සත්‍ය සිදුවීම් හා චරිත ඇති නමුත් සිදුවීමට සම්භාවිතාවයක් පමණක් ඇති කතා පිළිබඳවත් යම් අවබෝධයක් දරුවාට ලබා දිය යුතු වෙනවා.  ඒ වගේම පොතෙහි එන යම් යම් සංකල්ප (උදා:- මිනිස්සු එකිනෙකාගෙන් ඉගෙනගන්න දේවල්) පිළිබඳවත් ඉවසීමෙන් යුතුව දරුවාට පැහැදිලි කළ යුතු වෙනවා.
• කතාන්දරය කියා දීමෙන් පස්සේ දරුවා ප්‍රියතාවයක් දක්වනවානම් තවදුරටත් වෙනත් පොත් මගින් හෝ අන්තර්ජාලය මගින් කරුණු හොයලා කියා දෙන්න පුළුවන්. (උදා:- කතුවරයා ගැන, කතාවෙන් කියවෙන සත්තු ගැන). දරුවා ඉදිරිපත් කළ උපකල්පන පිළිබ​ඳ කතා කරමින් දරුවා ධෛර්යමත් කිරීමත් දරුවට විශාල සතුටක් ගෙන දෙන්නට හේතුවක් වේවී.
• දරුවා සමග පොත් කියවීම විනෝද ක්‍රීඩාවක් බවට පත්කරගන්න. උදාහරණයක් විදියට දරුවා ප්‍රිය කරන ආකාරයේ පොතක් කොහේ හෝ තැනක හංගා දරුවාට එය සොයාගෙන එන්න කියන්න පුළුවන්. දුර ගමනක් බිමනක් යනකොට කතා පොතක් ගෙනයාම, රසකැවිලි තෑගි දෙන ආකාරයට පොත් තෑගි දීම, දරුවා සමග එක්ව පොත් තෝරා මිලට ගැනීම වගේ දේවල් කරන්න පුළුවන්.
• දරුවෙකු කොයි තරම් පොත්පත්වලට ආසා වුවත් නිවසේ වැඩිහිටියන් ඒ දේ කරනවා නොදකිනවා නම් දරුවාගේ රුචිකත්වයත් අඩු වී යන නිසා මව්පියන් පොතපත ඇසුරු කරන්නට වැඩි අවධානයක් යොමු කල යුතු වෙනවා.

අවසන් වශයෙන් ඇමෙරිකානු පර්යේෂණ ආයතනයක් විසින් දරුවන්ට කතන්දර පොත් කියා දීම සම්බන්ධයෙන් සිදුකල පර්යේෂණයක් මගින් හෙළිකරගත් තොරතුරු කිහිපයක් පහතින් දක්වනවා.

• කියවන්නා දරුවා සමග අන්‍යෝන්‍ය සම්බන්ධයක් තබා ගනිමින් කතාව කියා දිය යුතු වෙනවා. දරුවාට වචන කියවන්න නොහැකි වුවත් කතන්දරයක් සාකච්චා කරමින් කියවීම මගින් දරුවාගේ හැඟීම් ප්‍රකාශනයට සහ සිතීමේ හැකියාව දියුණු වීමට එය විශාල රුකුලක් වෙනවා. කතාව දික් ගැස්සවීම, ඒ පිලිබඳව කතිකාවතක් ගොඩ නැගීම, වචවල තේරුම සහ සිද්ධි සම්බන්ධතාවය ගොඩනැගීම මෙහිදී අත්‍යවශ්‍ය වෙනවා.
• එකම කතා පොත කිහිප වතාවක් කියා දීම මගින් මතක ශක්තිය ඉහළ යන බවත් එහි සඳහන්.
• කතන්දයක් කියා දීම මගින් නිසි ප්‍රතිපල ලැබීමට කතාව කියා දෙන්නා (මව්පියන්/ ආච්චි/සීයා…) හෝ දරුවාගේ වයස බලනොපාන අතර  නියමාකාරව කතාව කියා දීම පමණක් ප්‍රමාණවත් වන බවයි ඔවුන් පවසන්​නේ.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවන්ට කතන්දර පොත් කියලා දෙන්නේ මෙහෙමයි appeared first on familylife.

එහෙම හිතන ඔබට අපි කියනවා, දරුවෙකුට පොත් කියවන්න හුරු කිරීමෙන් ඔබ නොහිතන තරම් වාසි ඔබේ ළදරුවාට ලැබෙන බව. එවැනි වාසි පිළිබඳ ලියැවුණු මේ ලිපිය කියවීමෙන් පස්සේ නම් පොඩ්ඩාට පොත් පත් අරන් දෙන්න ඔබ දෙවරක් හිත හිත ඉන්නේ නැතිවෙයි කියලත් අපි විශ්වාස කරනවා.

පොඩ්ඩට පුළුවන්

පොතක් පින්තුරයක් බලන්න හෝ කතන්දරයක් අහන්න තරම් දරුවා චූටි වැඩියි කියලා කවදාවත් හිතන්න එපා. විශාල සහ වර්ණවත් පින්තූර දිහා බැලීම වගේම අම්මාගේ තාත්තගේ කටහඬ දිගින් දිගටම ඇසීම මාස 2-3ක ළදරුවෙකුට පවා ඉතාම වැදගත් බුද්ධි වර්ධක ක්‍රියාකාරකමක් වෙනවා.

පොත් තියෙන්නේ කියවන්න, පින්තුර බලන්න කියන මූලිකම අදහසත් වචන රටාව, රිද්මය, වචන කියවන ස්වරූපය, හඬේ උස්පහත් බව වගේ දේවල්  විතරක් නෙවෙයි පොතක පිටුවක් පෙරළීම, වමේ සිට දකුණට කියවීම වගේ දේවල් පවා කාලයත් එක්ක දරුවා නිවැරදිව ඉගෙනගන්නවා.

මේ සඳහා වචන තියෙන පොත් ම අවශ්‍ය වෙනවා කියලා අපි කියන්නේ නෑ. පින්තූර පමණක් ඇති පොත් අරන් පින්තුර පෙන්වමින් කතන්දර හදලා කියන්න වුණත් පුළුවන්කම තියෙනවා. කාලයක් තිස්සේ මේ දේවල් කරනකොට දරුවා පොත්වලට හුරුවෙන්නත් යම් යම් ධනාත්මක ප්‍රතිචාර දක්වන්නත් පටන් ගන්නවා.

හිතෙන දේවල් කියන්නේ මෙහෙමයි

තමන්ගේ හැඟීම් සන්නිවේදනය කරන්න දරුවට වචන අවශ්‍ය වෙනවා වගේම  දරුවාට දිනපතා ඇහෙන වචන ප්‍රමාණය සහ දරුවාගේ සන්නිවේදන හැකියාව අතර සෘජු සම්බන්ධයක් පවතිනවා. නිසි විදියට කතා කරන්න බැරි වුණත් කතා කරන්න අවශ්‍ය සෑම වචනයක් ම වයස අවුරුද්දක් වෙනකොට දරුවා ඉගෙනගෙන තියෙන බව පර්යේෂණ වලින් හෙළිවෙලා තියෙනවා. දරුවට ඇහෙන්නට පොත් පත් කියවීම මේ කාරණයේ දී විශාල පිටුවහලක් වෙනවා.

ඒ වගේම දරුවෙකුට පොත් පත් කියා දෙන මවුවරුන්ගේ දරුවන්ට අනෙක් දරුවන්ට වඩා සාරවත් වාග් මාලාවක් හිමිවෙන බවත් හොයාගෙන තියෙනවා. තමන්ගේ හැඟී ප්‍රකාශ කරන්න අවශ්‍ය වචන අනුකරණය තුලින් වගේම පින්තුර හඳුනාගැනීම මගිනුත් ඉගෙන ගන්න දරුවා පෙළඹෙනවා.   

අම්මගෙයි තාත්තගෙයි ආදරේ..

ඕනෑම ළදරුවෙක් වඩාත්ම ප්‍රිය කරන්නේ තමන්ගේ අම්මගේ තාත්තගේ ආදරය, සෙනෙහස සහ අවධානය උපරිමයෙන් හිමිවෙනවට. ඒ වගේම අම්මට තාත්තට තුරුළු වෙලා ඉන්නවා තරම් සැනසීමක් වෙන කිසිම දෙයකින් දරුවෙකුට ලබාගන්න පුළුවන් කියලා අපි විශ්වාස කරන්නේ නෑ. ඉතින් දරුවා තමන්ගේ ළයට තුරුළු කරගෙන පොතක් පෙන්වමින් කතන්දරයක්, සින්දුවක් කියාදීම තමන්ගේ හිතේ ඇති දරු සෙනෙහස පෙන්වන්න හොඳම ක්‍රමයක් විදියට හඳුන්වන්නට පුළුවන්කම තියෙනවා.

කියවීම විනෝදයක්

කුඩා දරුවන් ඩිජිටල් තිරවලට ඇබ්බැහි වීම මේ වෙනකොට ලෝකේ පුරාම ඉන්න මව්පියන්ට විශාල ගැටළුවක් බවට පත්වෙලා තියෙනවා. දරුවාගේ බුද්ධි වර්ධනයට ඉතාමත් අහිතකර විදියට බලපාන මේ පුරුද්ද දරුවන් තුළ මුලින්ම රෝපණය  කරන්නෙත් මව්පියන් ම වීම අවාසනාවන්ත තත්ත්වයක් විදියට හඳුන්වන්න පුළුවන්.

හැබැයි පොත පතට ඇබ්බැහි වුණ අම්මලා තාත්තලා නිරායාසයෙන් ම තමන්ගේ දරුවොන්ටත් මේ දායාදය ලබා දෙනවා. පසුකාලීනව මේ දේ දරුවාගේ ප්‍රියතම විනෝදාංශය වීමට ඇති ඉඩකඩ ඉතාමත් වැඩියි. අතට අහුවෙන පත්තර කෑල්ල පවා කියවන්න පෙලඹෙන මේ දරුවන් කාලයත් එක්ක දැනුම් ආකරයක් බවට පත්වෙනවා.

භාෂා විශාරද

දරුවෙකුට තමන්ගේ මව් භාෂාවට අමතරව වෙනත් භාෂා උගන්වන්නත් පොත්පත් කියා දීම විශාල පිටුවහලක් වෙනවා. ලංකාවේ අපි නම් ගොඩක්ම උනන්දු වෙන්නේ සිංහල/දමිළ භාෂාවන්ට අමතරව ඉංග්‍රීසි භාෂාව උගන්වන්න තමයි. මේ ක්‍රමයේ දී ප්‍රයෝජනවත් වෙන වටිනා ඉංග්‍රීසි ළමා කතා පොත් මේ වෙනකොට උවමනා තරම් වෙළද සල්වල දකින්නට ලැබෙනවා.

බබා අවධානෙන්

දරුවාගේ පළමු තුන් වසරේ සංවර්ධනය පිළිබඳව මව්පියන් ඉතාමත් දැනුවත්ව සහ සැලකිල්ලෙන් කටයුතු කිරීම අත්‍යවශ්‍ය වෙන්නේ පුද්ගලයෙක්ගේ මොළයේ 80%ක පමණ ප්‍රමාණයක් ඉපදිලා මුල් අවුරුදු 3 ඇතුළත වර්ධනය වෙන නිසයි. වෙනත් විදියකින් කිවොත් ස්පොන්ජ් එකකට වතුර උරාගන්නවා වගේ මේ කාලයේදී දරුවා තමන් අත්විඳින දේවල් ඔලුවට දාගන්නවා.

මේ කාලය තුලදී පොත් පත් ආශ්‍රය කරන දරුවාට තමාගේ අවධානය එක තැනක රදවා ගැනීමේ හැකියාව සහ මතක ශක්තිය කියන වටිනා හැකියාවන් උරුම වෙනවා. ඉතා කුඩා අවධියේ දීම කතන්දර පොතක් කියල දෙන විනාඩි 10-15 තුළදී එයට නිසි  අවධානය යොමු කිරීමේ හැකියාවත්, සිදුවීම් සහ චරිත මතක තබා ගැනීමේ හැකියාවත් ලබාගන්නවා විතරක් නෙවෙයි,  වයසත් එක්ක දරුවා  මේ හැකියාව දියුණු කරගන්නත් සමත් වෙනවා. 

මේ දේ අධ්‍යාපනය ලබන කාලය වෙනකොට කොයි තරම් අත්‍යවශ්‍ය වෙනවද කියන කාරණය වැඩිහිටි ඔබ අත්දැකීමෙන්ම දන්නවා ඇති කියලා අපි හිතනවා.

ෆැන්ටසිය සහ රියැලිටිය 

සාර්ථක ජිවිතයක් ගතකරන්න නම් යථාර්ථයත් මායාවත් අතර වෙනස හඳුනාගැනීමට හුරු වීම අත්‍යවශ්‍ය වෙනවා. මේ හැකියාව නොමැති වීම නිසා වල්මත් වෙන තරුණ වැඩිහිටි ජිවිත ඕනෑ තරම් සමාජයේ දකින්නට ලැබෙනවා. හැබැයි පොත පත ඇසුරු කරන්න හුරු වෙන දරුවට මේ හැකියාව නිරායාසයෙන්ම ඇතිවෙනවා. තවත් විදියකින් කිවොත් මේ හැකියාව දරුවා තුල ඇති කරවන්න බුද්ධිමත් මව්පියන් සමත්වෙනවා.

IQ මාස්ටර්

දරුවෙකුට පොත් කියවන්න හුරු කිරීමෙන් පසුව කාලයත් එක්ක දරුවා දැනුම පිපාසිතයෙක් බවට පත්වෙනවා. පාසල් අධ්‍යාපනය ලබන වයසට ආවම මේ කාරණය දරුවාට ඉතාම සුබවාදී බලපෑමක් තමයි ඇති කරන්නේ.

එකිනෙකට වෙනස් මාතෘකා පිලිබඳව ඇතිවන කුතුහලය සහ විස්තර සෙවීම, ප්‍රශ්න ඇසීම වගේ කාරණා දරුවෙකුට කවදාවත් අයහපතක් නම් කරන්නේ නෑ. ඒ වගේම වර්ණ, අකුරු, ඉලක්කම්, හැඩතල වගේ දරුවෙක් දැනුවත් විය යුතු අංශ ගැන විනෝදාත්මක විදියට කියලා දෙන්නට පුළුවන් වීමත් විශාල වාසියක් වෙනවා.

සාධාරණ බබා

දරුවෙක් තුල කුඩා අවධියේ සිටම ඇති කල යුතු ඉවසීම, කාරුණික බව, සානුකම්පිත බව, බෙදාහදා ගැනීම, උපකාර කිරීම, සත්තුන්ට සහ පරිසරයට ආදරය කිරීම, සාධාරණත්වය වගේ යහපත් ගුණාංග වගාවට හොදම ක්‍රමයක් විදියට පොත් පත් පෙන්වන්න පුළුවන්කම තියෙනවා.

වටිනාම දේවල් ලැබෙන්නේ පොත පතිනි

පුද්ගලයෙකුට තියෙන වටිනාම හැකියාවක් විදියට පරිකල්පන ශක්තිය සහ නිර්මාණශීලි බව පෙන්වන්න පුළුවන්. කෙනෙක්ට මේ හැකියාව විවිධ ක්‍රමවලින් උරුම වෙන්න පුළුවන්. මේ නිර්මාණශීලිත්වය ඇතිවෙන්න ප්‍රධාන ක්‍රමයක් විදියට කුඩා අවධියේ පොත් පත් පරිශීලනය කිරීම පෙන්වන්න පුළුවන්. 

විශේෂයෙන්ම පින්තුර පොත් ඇසුරෙන් කතන්දර නිර්මාණය කිරීම, ඊලඟ සිදුවීම උපකල්පනය කිරීම, කතාන්දරය ගැන වෙනස් ආකාරයකට සිතීම වගේ දේවල්වලින් මේ හැකියාව දියුණු වෙනවා කියලා කියන්න පුළුවන්.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

The post දරුවෙකුට පොත් කියවන්න හුරු කිරීම මෙච්චරම වැදගත් ඇයි කියල දන්නවද? appeared first on familylife.

නිරන්තරයෙන් ම පොත පත ගැන ඔබව දැනුවත් කරන familylife.lk අපි මේ ලිපියෙන් ඔබට අරන් එන්නේ අවුරුදු 2ත් 5ත් අතරෙ පොඩ්ඩන්ට ගැළපෙන ඉංග්‍රීසි සහ සිංහල පරිවර්තන කතන්දර පොත් කිහිපයක් පිළිබඳ තොරතුරු යි.

අවුරුදු 2ට වැඩි දරුවොන්ට විතරක් නෙවෙයි ඊට වඩා වයසින් අඩු දරුවෙකුට වුණත් අපි මේ කියන පොත් බලන්න කිසිම තහනමක් නෑ. විශේෂයෙන් ම දරුවාගේ පරිකල්පන ශක්තිය දියුණු වීම, බුද්ධි වර්ධනය වීම, භාෂා හැකියාව සහ අවධානය රඳවා තබාගැනීමේ හැකියාව දියුණු වීම ඇතුළු වාසි රැසක් පොත් කියවීම තුළින් ඔබේ දරුවාට හිමි වෙනවා.

පින්තූර කතා

එන්. රැඩිලොව් කියන රුසියානු චිත්‍ර ශිල්පියා විසින් අඳින ලද චිත්‍රවලට පද්‍ය නිර්මාණය කරලා තියෙන්නේ  එන්.ගෙර්නිත් සහ නතාලියා දිලක්තොර්ස්ක්යා කියන රචකයෝ දෙන්නා. රුසියානු බසින් නිමවුනු පො​තේ සිංහල පරිවර්තනය ප්‍රකාශයට පත් කෙරෙන්නේ ප්‍රගති ප්‍රකාශකයෝ විසින්.

මේ පොතේ සිංහල පරිවර්තනය  වගේම ඉංග්‍රීසි පරිවර්තනයත් මිලට ගන්න පුළුවන්කම තියෙනවා. බොහොම අපූරු පින්තුරත්, ඒ පින්තුර ආශ්‍රිතව ලියැවුණු වෙනස්ම ආකාරයේ පුංචි පුංචි කවි/ කතන්දරත් මේ පොතෙහි අඩංගු වෙනවා. ඒ වගේම පින්තුරය බලාගෙන තනියම කතන්දරයක් කියන්න වුණත් පොඩිත්තට අවස්ථාව ලබා දෙන්න​ට  හැකියාව තියෙනවා.

පුංචි පැටවූ සහ උන්ගේ අම්මලා

ජිආං යීමින් කියන චීන ජාතික කතුවරයා විසින් රචනා කෙරුණු මේ පොතේ ඇති හුරුබුහුටි පින්තුර ඇදලා තියෙන්නෙත් ඔහු විසින්මයි. සිංහල පරිවර්තනය සවිමන් උරුගොඩවත්ත විසිනුත්, බෙදාහැරීම අරුණ ප්‍රකාශකයෝ විසිනුත් සිදු කරනවා. මේ කතා පොත “සිගිති විද්‍යා කතා පෙළ” කියන ඉතාම අපූරු පොත් පෙළෙන් එක පොතක් පමණයි.

පොඩි දරුවොන්ට ගැළපෙන සරල විදියට, බොහෝ අවස්ථාවල සතුන් ආශ්‍රිතව යම් යම් විද්‍යාත්මක කරුණු පැහැදිලි කිරීමක් තමයි මේ පොත් පෙළෙන් සිදු කෙරෙන්නේ.

  පුංචි රවුම් බනිස් ගෙඩිය

මේ පොතේ කතුවරයෙක් පිළිබදව සටහනක් ඇතුළත් වෙලා නම් නැති වුනත් සිංහල පරිවර්තනය කැනොල් ප්‍රකාශකයන් විසින් සිදුකෙරිලා තියෙන බව සඳහන් වෙලා තියෙනවා. වයසක ආච්චි කෙනෙක් හදන පුංචි බනිස් ගෙඩියක්, පෝරණුවෙනුයි ගෙදරිනුයි එළියට පැනලා යනකොට මුණගැහෙන අය ගැනයි, අන්තිමට බනිස් ගෙඩියට අත් වෙන ඉරණම ගැනයි තමයි මේ පොතෙන් කියවෙන්නේ. පොඩ්ඩෝ ප්‍රිය කරන ආකාරයේ පින්තුර මේ පොතෙත් අඩංගු වෙලා තියෙනවා.

අපූරු කතා

කර්නේ චුකොව්ස්කි කියන රුසියානු ලේඛකයා විසින් රචනා කරපු “ටෙලිෆෝනය, අවුසද හාමි, කාටත් පාඩමක්, නැතිවුණු හිරු” කියන ළමා කතන්දර 4 මේ පොතේ අඩංගු වෙනවා. ප්‍රගති ප්‍රකාශකයෝ තමයි මේ අපුරු කතන්දර කීපය කවි කතන්දර විදියට, ලස්සන පින්තූරත් සමග ප්‍රකාශයට පත් කරලා තියෙන්නේ. මේ කතා වෙන වෙනම පොත් 4ක් විදියටත් මිලට ගන්න පුළුවන්කම තියෙනවා. දැනුම ලබාදෙන අතරේම විනෝදයත් සපයන කතා පොතක් විදියට මේ පොත හඳුන්වන්න පුළුවන්කම තියෙනවා.

Monster in the well

පොඩි දරුවෝ අතරේ බොහොම ජනප්‍රිය ළමා කතා ලේඛිකාවක් වන සිබිල් වෙත්තසිංහ මහත්මියගේ “ලිඳේ යකා” කියන කතා පොත ඇතුළුව තවත් පොත් ගණනාවක් කතුවරිය විසින් ම ඉංග්‍රීසි පරිවර්තනය කරලා තියෙනවා. ඕනෑම පොත් හළකින් මේ පොත් මිලට ගැනීමේ හැකියාව තියෙනවා. අතහැරලා දාපු ළිඳක ජීවත්වෙන යක්ෂයෙක් එතනින් එළියට අරගන්න අදිත් කියන පොඩ්ඩා මේ යක්ෂයව මිනිස්සු එක්ක ජීවත්වෙන්න පුළුවන් තත්ත්වයට පත්කරන ආකාරය ගැන තමයි මේ කතාවෙන් කියැවෙන්නේ.

කතාවේ සාරාංශය විදියට පොතේ අන්තිමට මෙන්න මේ වචන කීපය සඳහන් වෙලා තියෙනවා.”To make a cruel heart soft and tender, kinder and love are magic wonders”. මේ අවසන් ආදර්ශය ඕනෑම කුඩා දරුවෙකුට තමුන් වැඩිහිටියෙකු වෙන මොහොතේ මතකයේ තිබෙනවානම් කොයිතරම් ලස්සන ලෝකයක් හදන්නට හැකිවේවිද?

The ugly duckling

ලේඩිබර්ඩ් පොත් මාලාවේ පළමු මට්ටමේ(Level 1) පොත්වලින් එකක් ගැන තමයි අපි ඊළ​ඟට කතා කරන්නේ. පුංචි කාලේ කැතම  කැත තාරාවෙක් විදියට හඳුනගෙන හැමෝම අතහැරලා දාපු හංස පැටියෙක් කාලයත් එක්ක එයාගේ ලස්සන හංස ස්වරූපයට පත්වෙන ආකාරය තමයි මේ කතාවෙන් කියවෙන්නේ. අවුරුදු 3ක පොඩි දරුවෙකුට වුණත් කතාවේ වාක්‍ය පවා මතක හිටින ආකාරයට තමයි කතාන්දරය ලියැවිලා තියෙන්නේ.

ලේඩිබර්ඩ් කතා පොත්වල තියෙන එක් විශේෂත්වයක් විදියටත් ඒ ගුණාංගය හඳුන්වන්න පුළුවන්කම තියෙනවා. ඒ වගේම කතාන්දරය ඉවර වුනාම බබාගෙන් අහන්න ප්‍රශ්න කීපයක් සහ කරන්න පොඩි ක්‍රියාකාරකමකුත් මේ පොත්වල අඩංගු වෙලා තියෙනවා. එය දරුවාට කතාව කොයිතරම් මතකද කියන දේ දැනගන්නත්, පොතෙන් දැනෙන විනෝදය වැඩි කරවන්නත් හේතුවක් වේවි.

Hop hop and away

Richard Scarry’s Great Big Schoolhouse Readers කියන පොත් මාළාවේ දෙවන මට්ටමේ (Level 2) බොහොම අපූරු පොතක් තමයි “හොප් හොප් ඇන්ඩ් අවේ” කියන්නේ. පාසලේ තියෙන වැඩසටහනකට තමන්ගේ සුරතල් ගෙම්බාව අරන් යන හක්ල් කියන පූස් පැටියා සහ එයාගේ අනිත් යාළුවොත් ගැන තමයි මේ පොතෙන් කියැවෙන්නේ.

පොඩ්ඩෝ බොහොම කැමතිවෙන විදියේ පින්තුරත් එක්කම එකම විදියට කියවගෙන යන්න පුළුවන් විදියට මේ පොතත් ලියවිලා තියෙනවා. එකම විදියට ලියැවුණු වාක්‍ය තියෙන නිසා කියවීම පුරුදු වෙන දරුවෙකුට පවා මේ පොත කියවීම පහසු වෙනවා කියන්න පුළුවන්.

At the farm

Really Decent Flip Flap පොත් පෙළින් එක් පොතක් වන මෙයින් කියවෙන්නේ ගොවිපොළක ජීවත්වෙන සතුන් කීපදෙනෙක් සහ ඒ ඒ සතුන් හඬනගන විදියත් පිලිබ​ඳවයි. කවියක් වගේ ලස්සනට වචන ගලාගෙන යන විදියට තමයි පොත ලියවිලා තියෙන්නේ. මේ පොතේ පිටුවක් පෙරළන්නේ දෙපැත්තට.

ඒ කියන්නේ අනිත් පොත්වල වගේ වම් පැත්තට නම් නෙවෙයි. ඉතින් සතාගේ පින්තුරය හරියට ගැළපෙන විදියට පොතේ පිටු පෙරළන එකත් පොඩ්ඩට අභියෝගයක් වෙනවා. මරදානේ සරත් පොත් හළෙන් මේ හාර්ඩ් බෝර්ඩ් පොත් මිලට ගැනීමේ හැකියාව තියෙනවා. ඒ වගේම බිග්බෑඩ් වුල්ෆ් වගේ ජාත්‍යන්තර පොත් සල්පිලකින් මිලදීගන්නටත් හැකියාව තිබෙනවා.

The trouble with the tippers

වර්ණවත් සහ විශාල පින්තූරත්, අකුරුත් අඩංගු වෙලා තියෙන මේ පොතට නම් කිසිම පොඩ්ඩෙක් අකමැති වෙන එකක් නෑ. පොතත් ප්‍රමාණයෙන් අනිත් පොත්වලට වඩා විශාලයි. ගොඩනැගිල්ලක් හදන තැනක වැඩකරන ඉදිකරන්නන්ටත් ටිපර් එකකටත් සිදු වෙන අකරතැබ්බයක් ගැන තමයි මේ  කතාවෙන් කියවෙන්නේ.

එක් එක් පිටුවේ අඩංගු වෙලා තියෙන වචන පිටුවේ පැත්තකින් පින්තුරවලින් වෙනමත් හඳුන්වලා දීලා තියෙනවා. මහ මග දකින්න ලැබෙන විශාල ටිපර් රථයක් වගේම ඉදිකරීම් වැඩ දැක්කම මේ පොත දරුවාට පහසුවෙන් මතක් කරන්නත් පුළුවන්කම තියෙනවා.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

The post පුංචි පැංචෙකුට ගැළපෙන ඉංග්‍රීසි, සිංහල කතන්දර පොත් appeared first on familylife.