කතාවට අපි කියන්නේ පුංචි දරුවෝ මල් වගේ කියලනේ. හැබැයි මේ පුංචි මල් සමනල්ලු ඉස්කෝලෙදිත් පෙර පාසලේදීත් එහෙමම ඉන්නවද? එහෙමත් නැත්තන් පාඩුවේ පැත්තකට වෙලා ඉන්න තවත් පොඩ්ඩෙකුට හිරිහැර කරන්න පෙළඹෙනවද?

සරදම් කිරීම, ඇනුම් පද කීම, නම් පටබැඳීම, කොන් කිරීම, පහර දීම, පයින් ගැසීම සහ සියලුම ශාරීරික සහ මානසික වද හිංසා මේ හිරිහැරවලට අයත් වෙනවා. Famillylife.lk අපි මේ ලිපියෙන් කතා කරන්නේ පාසලේදී/පෙර පාසලේදි ඔබේ දරුවා හිංසනයට ලක් වෙනවනම් (Bullying) ඔබට ගත හැකි ක්‍රියාමාර්ග මොනවාද කියන එක ගැනයි. 

කුඩා අවධියේදි සම වයස් කණ්ඩායම් අතින් දරුවන් හිංසනයට ලක්වීම , දරුවාගේ ආත්ම විශ්වාසයට විශාල වශයෙන් අහිතකර විදියට බලපානවා. විශේෂයෙන්ම ගුරුවරුන් සහ මව්පියන් මෙයට මැදිහත් වීම අත්‍යවශ්‍ය වෙනවා. දරුවන්ගේ ප්‍රශ්න දරුවන්ටම විසදා ගැනීමට අවස්ථාව දිය යුතු වුවත් වැඩිහිටියන් ඒ ගැටළුවලට මැදිහත් විය යුතු සීමාව පිළිඹදව ඔබ මනා අවබෝධයකින් සිටිය යුතු වෙනවා. එවැනි අවස්ථාවක ඔබට පහත සදහන් ආකාරයට ක්‍රියා කිරීමේ හැකියාව තියෙනවා.

ඇහුම්කන් දීම

හිංසනයට ලක්වෙන දරුවාට විශාල අවධානයක් සහ ආදරයක් ලබා දිය යුතු අතර වැඩි වැඩියෙන් සෙනෙහස දැක්වීම අත්‍යවශ්‍ය වෙනවා. සිදු වූ දේවල් පිලිබදව සරල ප්‍රශ්න අසමින් සම්පූර්ණ විස්තරය ගැන දැනුවත් වී සිදුවීම පිලිබදව සත්‍ය කරුණූම අනාවරණය කරගෙන සාරංශගත කරගන්න.

ඇතැම් දරුවන් අධික බිය නිසා කරුණු වසන් කිරීමට පවා ඉඩ තියෙන නිසා දරුවාගේ සිතේ විශ්වාසයක් ඇති කර සියළුම කරුණු හෙලිකරගන්න. මෙවැනි අවස්ථාවක කණගාටුවට පත්වීම, පීඩනයට හා බයට පත්වීම ඉතා සාමාන්‍ය දෙයක් බව පවසා දරුවා අස්වසන්න.

දරුවා නිකරුනේ හිංසනයට පත්වීම ඔහුගේ වැරැද්දක් නිසා සිදු වන දෙයක් නොවන බව වටහා දෙන්න. දරුවාගේ මව්පියන් වශයෙන් ඔහු වෙනුවෙන් පෙනී සිටින බවා වටහා දෙන්න. ගුරුවරුන් පාසලේදී තත්ත්වය මැඩපවත්වන අතරතුරේදි මව්පියන් නිවසෙදි දරුවාට ශක්තියක් විය යුතු වෙනවා.

සන්සුන්ව සිටින්න

තමන්ගේ දරුවා දිගින් දිගටම වෙනත් අයෙක්ගෙන් හිංසාවට පත් වීම කිසිම අම්මෙකුට තාත්තෙකුට ඉවසන්න පුළුවන් දෙයක් නොවන බව අපි දන්නවා. නමුත් ඔබ කෝපයට පත්ව සිටියත් ඒ බව දරුවාට අගවන්න එපා. කෝපයට පත්වී ප්‍රශ්න විසදීම සිදු කළ නොහැකි බව දරුවාට හැගෙන්න සලස්වන්න. දරුවා සමගත්, අදාළ අනෙකුත් පාර්ශවයන් සමගත් මේ ගැන සාකච්ඡා කළ යුත්තේ ඉවසීමෙනි. 

තේරුම් කරන්න

වෙනත් අයෙකු හිංසාවට පත් කිරීමට දරුවෙක් පෙළඹිමට බලපාන්න පුළුවන් කරුණු ගැන දරුවාට වැටහෙන ආකාරයට තේරුම් කරන්න. හිංසකයා ඇතැම් විට කවුරුන් හෝ අනුකරණය කරනවා විය හැකියි. ඒ දෙය නිවසේදී අහන දකින හෝ අත්විදින දෙයක් විමට බොහෝ දුරට ඉඩ තියෙනවා.

ඒ දරුවා අනෙක් අය සමග සහයෝගයෙන් සමගියෙන් සිටින ආකාරය ගැන නොදන්නවා වීමටද ඉඩ ඇත. එහෙමත් නැත්තන් අධි ක්‍රියාශීලි දරුවෙක් හෝ එයට සමාන තත්ත්වයකින් පෙළෙනවා වීමටත් ඉඩ තියෙනවා. කවරාකාරයෙන් ගත්තත් දරුවා ක්‍රියා කරන ස්වභාවයට දරුවගේ මව්පියන් සහ වැඩිහිටියන් වගකිව යුතු බවට වටහාගෙන දරුවාටත් එය තේරුම් කර දෙන්න උත්සහ කරන්න.

මේ ගැන තවදුරටත් අවබෝධයක් ලබාගන්න මේ ලිපිය කියවන්න – දරුවන්ගේ කරදරවලට හේතු නැතුවාම නෙවෙයි…

ගුරුවරුන් සමගින් සාකච්ඡා කරන්න

මේ දෙය අනිවාර්‍යෙන්ම සිදුවිය යුතු වෙනවා. ගුරුවරුන් වශයෙන් මේ තත්ත්වය මැඩ පැවැත්වීමේ හැකියාව ඔවුන් සතුවිය යුතු ය. ගුරුවරුන් සමග එක්වී පියවරක් ගන්නා බව දරුවාටත් දන්වා සිටින්න. ඉතා ඉවසිලිවන්තව හා පෞද්ගලිකව ගුරුවරයා සමග කතා කර සිදුවීම පිළිඹදව දන්වා උපකාර ඉල්ලන්න.

සිදුවීමේ සත්‍ය බරපතල බව වටහා දී මෙයට අනිවර්යය විසදුමක් තිබිය යුතු බව පවසන්න. විසදුමක් සාකච්චා කිරීමෙන් සතියකට පමණ පසු ප්‍රතිපල විමසන්න. ගුරුවරුන් සමග දිගින් දිගටම සම්බන්ධතාවය තබාගන්න.

හිංසා කරන දරුවා සමග කතා කරන්න.

ඉතා ඉවසීමෙන් සහ ආදරයෙන් එය සිදු කිරීමට වග බලා ගන්න. ඇතැම් විට ඒ දරුවාද වැඩිහිටියන්ගේ උපකාර අවශ්‍යකරන  දරුවෙක් වීමට ඉඩ තියෙනවා. අදාළ දරුවාගෙ මව්පියන් සමගත් සාකච්ඡා කරන්න. තත්ත්වය සමනය කරගැනීමට ඔවුන්ගෙනුත් උපකාර ඉල්ලන්න. මෙවැනි අවස්‍ථාවක අනිවර්යයෙන්ම ගුරුවරයාගේ මැදිහත් වීම මත මෙවැනි සාකච්ඡා සිදු කරන්න.

මේ ගැන තවදුරටත් අවබෝධයක් ලබාගන්න මේ ලිපිය කියවන්න – දරුවන් ගැන ඔබේ මැසිවිල්ල ඔවුන්ගේ සැනසිල්ලට හරවන්න

ඉවසිලිවන්තව හිංසකයාට විරුද්ධව නැගී සිටින ආකාරය දරුවාට කියා දෙන්න. 

උදා:- “මට ගහන්න එපා, මට ගොඩක් රිදෙනවා. මාව වැටුනොත් තුවාල වෙන්න ඉඩ තියෙනවා”

හිංසා කරන දරුවන් මගහැර අනෙකුත් දරුවන් සමග සිටින ලෙසත්, හිංසාවට පත්කරන්න උත්සහ කරන විට කෙළින්ම ගුරුවරයාට දන්වන ලෙසටත් උපදෙස් දෙන්න. දරුවාගේ අනෙක් මිතුරන්ගේ සහයෝගය මෙවැනි අවස්ථාවක ඉතාමත් වැදගත් වෙනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවන් හිංසනයට ලක්වීම ට පාසැලේ / පෙරපාසලේ ඇති ඉඩකඩ අහුරන්න appeared first on familylife.

මේ වෙනකොට දරුවන්ට අනවශ්‍ය තරම් නිදහසක් ලබාදීලා ඒ ජීවිත විනාශ වෙන්න ඉඩ දෙන මව්පියන් තරමටම හෙලිකොප්ටර් දෙමාපියන් ඉන්න නිසා familylife.lk අපි හිතුවා ඒ කාරණය ගැන මේ ලිපියෙන් කතා කරන්න.

දරුවන්ට අනවශ්‍ය තරම් අවධානයක් ලබාදෙන, ඔවුන්ගේ ගැටළුවලට සහ තීරණ වලට අසීමිත විදියට බලපෑම් කරන, දරුවන්ට කිසිම නිදහසක් හෝ ස්වාධීනත්වයක් ඇතුව හැදී වැඩෙන්න ඉඩක් ලබා දෙන්නේ නැති මව්පියන් “හෙලිකොප්ටර් පෙරන්ට්ස්” ගණයට අයත් වෙනවා.

තවත් විදියකින් කීවොත් තමන්ගේ දරුවාගේ ජීවිතයේ සෑම දෙයකටම මේ වගේ අම්මලා තාත්තලා මැදිහත් වෙනවා විතරක් නෙවෙයි ඒ මැදිහත්වීම් වලින් මිදෙන්න කිසිම දවසක තමන්ගේ දරුවට ඉඩක් ලබා දෙන්නේ නෑ. අනවශ්‍ය නිදහස තරමටම හෙලිකොප්ටර් දෙමාපියන් වශයෙන් සිදුකරන මේ දේත් දරුවාගේ ජීවිතයට සිදු කරන අකටයුත්තක් බව මේ ය තේරුම් ගන්නේ නෑ. අපි බලමු මේ කියන කාරණය දිගුකාලීනව දරුවාට අහිතකර විදියට බලපාන්නේ කොහොමද කියලා.

සෞඛ්‍යමය ගැටළු

මෙවැනි දරුවන්ට ළමා අවධියේදී වගේම වැඩිහිටි වයසේදීත් රෝගාබාධ වැළදීමට ඇති ඉඩ කඩ වැඩි වෙනවා. ගොඩක් වෙලාවට ඇති සුරක්ෂිතව හැදී වැඩෙන දරුවොන්ට තමන් අවට පරිසරය එක්ක එකතුවෙන්න තියෙන කාලය අවම බව ඔබ දකිනවා ඇති. ගල්, වැලි, වතුර, පස්, සුරතල් සතුන්, සමවයස් කණ්ඩායම් එක්ක මුහුවෙන්න ලැබෙන ඉඩ කඩ අඩු නිසාම මේ දරුවන් ඉතා ඉක්මනින් රෝගී වෙනවා.

ඒ වගේම මව්පියන්ගේ අධීක්ෂණය යටතේ යම් යම් සීමාවන්ට යටත්ව තෝරා බේරාගත් අහාර පාන පමණක් ලබා ගැනීම නිසාත් මේ තත්ත්වය ඉහල යනවා. අනෙක් අතට දරුවා නාන වෙලාව, කන වෙලාව, නින්දට යන වෙලාව, සෙල්ලම් කරන වෙලාව විදියට සියලු දෙයක්ම අම්මලා තාත්තලාට අනවශ්‍ය ආකාරයට සිදු වෙන නිසා පසු දරුවට මේ ගැන ස්වාධීන තීරණයක් ගන්න අවස්ථාවත් අහිමි වෙනවා.

ඒ වගේම වැඩිහිටි වියට පත්වෙලා මව්පියන්ගේ සිහිකැදවීම් නැති වෙනකොට මේ ය තමන්ගේ සෞඛ්‍ය ගැන සැලකිලිමත් වෙන එකත් අඩු වෙනවා. වෙනත් විදියකට කීවොත් තමන්ගේ පෞද්ගලික සෞඛ්‍ය නඩත්තු කරගැනීමේ හැකියාව මේ දරුවන්ට අහිමි වෙලා යනවා.

තමන් අති සුවිශේෂ බවට හැගීමෙන් පසු වේ. 

මේ ලෝකේ ඉන්නේ තමන්ගේ දරුවා විතරයි කියන හැගීමෙන් කටයුතු කරන අම්මලා තාත්තලා නොදැනුවත්ව හෝ දැනුවත්ව මේ අදහස කුඩා වයසේ ඉදලම දරුවාගේ හිතටත් කාවද්දනවා. “තමන්ට මේ දේ අනිවාර්යෙන් හිමි විය යුතුයි/ මේ දෙය ලබන්න එකම සුදුස්සා මම/ මෙතැන සිටින විශේෂම කෙනා මම” වගේ සිතිවිලි මේ දරුවන් තුළ නිතරා පවතිනවා.

මේ දේ සීමාව ඉක්මවා ගියාම, ජීවිතයෙන් අහිමි වීම් ලැබෙනකොට ඒ දේ දරාගැනීමේ හැකියාව මේ දරුවන්ට නැති වෙනවා. බලාපොරොත්තු බිදවැටීම්, විදවීම් සහ සමහර වෙලාවට සියදිවි නසාගැනීම් දක්වා මේ තත්ත්වය වර්ධනය වෙන්න ඉඩ තියෙනවා. 

චිත්තවේගාත්මක ගැටළු 

තමන්ගේහැගීම් පාලනය කරගැනීමට මේ දරුවන් හුරු වන්නේ ඉතාමත් අඩුවෙන්. දරුවන් වෙනුවට ඒ දේ අම්මලා තාත්තලා සිදු කිරීමම තමයි මෙයට හේතුව වෙන්නේ. දරුවා කෝපයට, දුකට හෝ කලබලයට පත්වෙන අවස්ථාවල ඒවාට ස්වාධීනව සහ හරියාකාරව මුහුණ දෙන්න හුරු කරනවා වෙනුවට මව්පියන් හැම විටම දරුවාට සහය දීමට ඉදිරිපත්වෙනවා.

දරුවා හුදෙකලා එන අවස්ථාවල වගේම වැඩිහිට වියට පත් වීමෙන් පසුවත් මේ දේ ඔහුගේ ජීවිතයට විෂා අහිතකර බලපෑමක්  සහ අවාසියක් වෙනවා. අවාසනාවන්ත විදියට විෂාදය සහ කිසිදු අකාරයකින් තමන්ගේ ජීවිතය ගැන තෘප්තියට පත් නොවෙන තත්වයකට මේ දරුවන් අනආතයේදී පත්වීමට ඇති ඉඩකඩ විශාල වෙනවා.

අසීරු තත්ත්වයන් ඉවසීමට ඇති නොහැකියාව.

මෙවැනි මවුපියන් ය‍ටතේ හැදෙන වැඩෙන දරුවන් අපහසුකම් සහ අසීරුතාවලට මුහුණ දීමට හරියාකාරව හුරු වන්නේ නෑ. දරුවා අපහසුවකට, වේදනාවකට හෝ අසීරුහාවයකට පත්වෙන සෑම අවස්ථාවකම මව්පියන් ඉදිරිපත්වෙලා දරුවාට ආරක්ෂක පලිහක් වගේ ක්‍රියා කරනවා. ස්වශක්තියෙන් අපහසුතා තේරුම් ගැනීමට ඇති හැකියාව මේ නිසා නැති වෙලා යනවා.

වැඩිහිටි වියට පත් වුනාම වැඩි වශයෙන් වෛද්‍ය ප්‍රතිකාර සදහා යොමුවෙන්නට මේ දරුවන් පෙලඹෙනවා. තමන්ට ඇතිවන කුඩා හෝ මානසික අපහසුතාවයක් වෙනුවෙන් වෛද්‍ය ප්‍රතිකාර ලබා ගැනීම අපරාධයක් හෝ ලජ්ජා විය යුතු කාරණයක් නොවුනත් මව්පියන්ගේ අනර්ථකාරී හැසිරීම නිසා දරුවා මේ තත්ත්වයට පැහැ වීම කනගාටුවට කාරණයක් විදියටයි අපි හදුන්වන්නේ.

කුසලතා වර්ධනයට ඇති හැකියාව අවම වේ.

තද කාලසටහනකට අනුව ආකෘතියක් ඇතුලේ හැදී වැඩෙන දරුවාට අවට පරිසරයෙන්, සම වයස් කණ්ඩායම් වලින් සහ සමාජයෙන් අත්දැකීම් ලබා ගැනීමට ඇති හැකියාව අවම වෙනවා. තමන්ගේ සහජ හැකියාවන් දියුණු කරගැනීමට ඉඩ ලැබෙනවාට වඩා දෙමව්පියන්ගේ රුචි අරුචිකම් අනුව ක්‍රියා කරන්න සිදු වෙනවා.

මවගෙන් පියාගෙන් මානසික සහනයක් හෝ සාර්ථකත්වය වෙනුවෙන් උත්තෙජනයක් නොලබන දරුවාට තමන්ගේම කියා අරමුණක් හෝ ඒ අරමුණ ජයගන්නට අවශ්‍ය හැකියා වර්ධනයක් නොලබා මව්පියන්ගේ රූකඩයක් බවට පත්වෙනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post හෙලිකොප්ටර් දෙමාපියන් වෙන්න ඔබත් කැමතිද? තීරණයට පෙර කියවන්න. appeared first on familylife.

පුංචි දූගේ පුතාගේ ජීවිතයේ වැදගත්ම කඩඉමක් වෙන විධිමත් පාසල් අධ්‍යාපනය ආරම්භ කිරීම, දෙමව්පියොන්ගේ හිත්වලට බලාපොරොත්තු ගොන්නක් විතරක් නෙවෙයි විශාල අභියෝගයකුත් ලබාදෙනවා.

දන්න ශිල්ප ඔක්කොම දක්වලා දරුවව පාසලකට ඇතුල් කරගත්තා කියලා මේ අභියෝගය අවසන් වෙන්නේ නම් නෑ. ඔබේ දරුවා වසරක් හෝ දෙකක් පෙරපාසල් ගිය දරුවෙක් හෝ පෙර පාසලකට එක් දිනක්වත් ගිහින් නැති දරුවෙක් වෙන්න පුළුවන්.

පවුලේ තනිව හැදුණු දරුවෙක් හෝ සහෝදර සහෝදරියන් / මිතුරන් පිරිවරාගෙන හැදුණු දරුවෙක් වෙන්නත් පුළුවන් හැබැයි මේ දෙවර්ගයේම දරුවොන්ට පාසල් යෑම කියන කාරණය වෙනස්ම අත්දැකීමක් වෙන බවනම් නොකියාම බෑ.

මේ අලුත් අත්දැකීම පොඩ්ඩට සුන්දර අත්දැකීමක් කරවන්න දෙමව්පියොන්ට කරන්න පුළුවන් දේවල් ගැන මේ ලිපියෙන් අපි ඔබව දැනුවත් කරන්න බලාපොරොත්තු වෙනවා.

ගැළපෙන පෙර පාසලක් තෝරගැනීම

පාසල් ගමනට දරුවෙක් සූදානම් කරවීම ගැන කතා කරද්දි දරුවාට පෙර පාසලක් තෝරාගැනීමේ සිටම මේ කාරණය ගැන සැළකිලිමත් වීම අත්‍යවශ්‍ය වෙනවා.

මුල් ළමා විය සංවර්ධනය සහ විධිමත් පාසල් අධ්‍යාපනය කියන ක්ෂේත්‍ර දෙක එකම අමාත්‍යයංශයකින් නියාමනය නොවෙන නිසා, දරුවා ඇතුළත් කරන්න බලාපොරොත්තු වෙන පාසලේ කටයුතු කෙරෙන ආකාරයට ගැළපෙන පරිදි පෙර පාසලක් තෝරගැනීම දෙමව්පියෝ විදියට ඔබේ වගකීමක් වෙනවා.

විශේෂයෙන්ම අධ්‍යාපනය ලබන මාධ්‍ය, සන්නිවේදනය සිදුවෙන භාෂාව වගේ කාරණා ගැන සැළකිළිමත් වීමෙන් අලුතින්ම පාසලට යන පොඩ්ඩා අපහසුතාවයට පත් වීම අවම කරගන්න හැකියාව ලැබෙනවා.

සම්බන්ධිත ලිපි – දරුවාට පෙර පාසලක් තෝරා ගැනීමේදී මේ ගැනත් සිතන්න

ඒ ඔබේ දරුවායි

පාසලේදී සාර්ථක ආරම්භයක් ලබාගන්න පෙරපාසලෙන් දරුවාට ලැබෙන අත්දැකීම් සහ පුහුණුව විශාල සහයෝගයක් වෙනවා. තමන් මුල් ළමාවිය අධ්‍යාපනය ලබා දෙන දරුවන් පාසලකට ඇතුළත්වීමට බලාපොරොත්තු වෙන දරුවන් බව සිහියේ තබාගෙන කටයුතු කිරීම පෙර පාසල් පාලිකාවන්ගේත් වගකීමක් වුනත් හැම දේම පෙර පාසලටම භාර දීලා දෙමව්පියන් පැත්තකට වෙන එක නම් සුදුසු ක්‍රියාවක් කියලා අපි කියන්නේ නෑ.

සම්බන්ධිත ලිපි – දරුවා කථා කරන්න ප්‍රමාද නම් මේ පිළිබඳ දැනුවත් වන්න

විශේෂයෙන් ම සාර්ථකව අදහස් ප්‍රකාශකිරීමේ හැකියාව, පෞද්ගලික පිරිසිදුකම, වැසිකිළි/ කැසිකිළි භාවිතය, සහයෝගයෙන් ක්‍රියා කිරීම, බෙදා හදා ගැනීම වගේ අත්‍යවශ්‍ය ගුණාංගත්, කතුර පැන්සල පාවිච්චිය, සවන්දීම, අවධානය යොමු කිරීම, කාලසටහනකට අනුව පිළිවෙලකට වැඩ කිරීම, ස්වාධීනව ක්‍රියා කිරීම, ගැටළුවලට මුහුණ දී විසදගන්නා ආකාරය වගේ කුසලතාවනුත් තමන්ට හැකි පරිදි සංවර්ධනය කිරීමට දෙමව්පියන් උත්සහ දැරීම පෙරපාසලෙන් පාසලට යන ඔබේ දරුවාගේ යහපතට හේතු වෙනවා.

යහළුවන් අත්‍යාවශ්‍යයි

දරුවන් කුඩා කාලයේ පටන්ම එකිනෙකාට වෙනස් පෞර්ෂත්ව ලක්ෂණ පෙන්වීම අතිශය සාමාන්‍ය කාරණයක් විදියට සළකන්න පුළුවන්. ඇතැම් දරුවන් උද්‍යෝගිමත්, ක්‍රියාශීලී සහ ඉක්මනින් හිත මිතුරන් ඇති කර ගැනීමට සමත් වුණත් ඇතැම් දරුවන් ඊට වෙනස් ගති ලක්ෂණ පෙන්වන්න ඉඩ තියෙනවා.

ඒ කවරාකාරයේ ගති ලක්ෂණ පෙන්වුවත් අලුතින්ම පෙරපාසලෙන් පාසලට යන ඔබේ දරුවාට යාළු මිත්‍රකම් ඇති කරගැනීමේ වැදගත්කම කියා දීම ඔබේ වගකීම වෙනවා.

වෙනස්ම පරිසරයකට යන දරුවාගේ හිතට සැනසිල්ලක් වෙන්න මේ අලුත් යාලුවෝ ලොකු උපකාරයක් වෙන්න තියෙන ඉඩකඩ වැඩි නිසා ගෙදර ඉන්න අම්මලා තාත්තලටත් ඒක ලොකු සහනයක් වෙවී.

සම්බන්ධිත ලිපි – දරුවා කේන්ති කාරයෙක් නම් ඔබත් මේ දේවල් දැනගෙන ඉන්නම ඕනෙ

ගුරුවරිය සමග හොඳ සන්නිවේදනයක් පවත්වා ගන්න

තමන්ගේ දරුවාට විශේෂ අවධානයක් යොමු කළ යුතු අසනීප තත්ත්වයක් / අසාත්මිකතා හෝ වෙනත් එවැනි කාරණයක් තියෙනවා නම් ඒ ගැන ගුරුවරිය දැනුවත් කිරීම අතිශය වැදගත් වෙනවා. ඒ වගේම තමන්ගේ අවශ්‍යතාවය / අවශ්‍ය උපකාරය පැකිළීමකින් තොරව ගුරුවරියට දැනුම් දෙන ආකාරය ගැනත් කියා දීම දරුවාට සහනයක් වේවි.

ආරක්‍ෂාව මූලිකයි

පෙරපාසලෙන් පාසලට යන ඔබේ දරුවාට ආරක්ෂාව කියන කාරණය නම් අමතක කරන්න පුළුවන් දෙයක් නෙවෙයි. කුඩා වයසේ පටන්ම තමන්ගේ ආරක්ෂාව සළසාගන්න විදිය ගැන දරුවාට දැනුම ලබාදෙන එක අත්‍යවශ්‍ය කාරණයක් වෙලා තියෙනවා.

පාසල් වෑන් රථයේදි, පන්ති කාමරයේදි සහ පාසලේ ඕනෑම තැනකදි තමන්ට වෙන හිරිහැරයක්, අපයෝජනයක් හෝ වෙනත් ඕනෑම කරදරයක් ගැන වහාම දෙමව්පියන් සහ ගුරුවරිය දැනුවත් කරන විදිය දරුවාට කියලා දෙන්න.

නාදුනන පුද්ගලයින්ගෙන් ප්‍රවේසම් වීම, වෙනත් දරුවෙක් හිරිහැර කරනවා නම් එයින් ආරක්ෂා වීම, වැඩිහිටි සිසුවෙක්ගෙන් බලපෑම් ඇත්නම් එයින් ආරක්ෂා වීම, තමන්ගේ බඩු බාහිරාදිය ප්‍රවේසම් කරගැනීම විතරක් නෙවෙයි ගුරුවරියගෙන් යම් ගැටළුවක් සිදුවෙනවා නම් ඒ ගැන පවා දෙමව්පියන් දැනුවත් කළ යුතු බව දරුවාට වටහා දෙන්න. 

ඉහත කරුණුවලට අමතරව,

• අදාළ පාසලේ, සිසු සිසුවියන්ගේ, ගුරුවරියන්ගේ පින්තූර පෙන්වමින් ඒ අය ගැන දරුවා සමග කතා බහ කරමින් ආගන්තුක ස්වභාවය මගහැරවීමට උත්සහ කිරීම.
• පාසල් යෑමෙන් දරුවාට ලැබෙන ප්‍රතිලාභ ගැන කියා දීම. (තනිවම කතන්දර පොත් කියවීම, අලුත් ක්‍රීඩාවන්ට සහභාගි වීමට ලැබීම….)
• අලුත් පන්තියට එන අනිත් දරුවන්, පන්තියේදි කරන ක්‍රියාකාරකම් ගැන සාකච්ඡා කරමින් දරුවා තුළ ප්‍රියතාවයක් ඇති කරවීම.
• අලුත් පාසලට යන දිනයේදි ලැබෙන( නිළ ඇදුම්, පොත්පත්, කෑම පෙට්ටි, වතුර බෝතලය) අලුත් උපකරණ පෙන්වීම, ඒ ගැන කතා කිරීම, ඒවා දරුවාගේ ප්‍රියතාවය අනුව ලබා දීමට උත්සහ කිරීම.
• පාසල් යෑම ගැන කතා පොත් කියවීම, දරුවාගේ අදහස් විමසීම, රුචි අරුචිකම් විමසීම, පෙර පාසලත් පාසලත් එකිනෙකට වෙනස්වෙන ආකාරය ගැන කතා කිරීම.
• දරුවාගේ බඩු භාණ්ඩවල නම සදහන් කර හදුනාගැනීමට පහසු කරවීම.
• ඒ පාසලට යන හිතවත් පවුල්වල ශිෂ්‍යයින් හදුන්වා දීම. ඒ අය ලවා පාසල ගැන විස්තර දරුවාට ලබා දීම.
• හැකියාවක් ඇත්නම් පමණක් දරුවා සමග පාසලේ සෑම ස්ථානයකටම යමින් ඒවා හදුන්වා දීම.
• හොදට ඉගෙනගන්න, අහවලා වගේ දක්ෂයෙක් වෙන්න, ළකුණු ගන්න වගේ දේවල් නිරන්තරයෙන් කියමින් දරුවා පීඩනයට පත් කිරීම නම් කිසිසේත්ම සුදුසු නැති බව අමතක කරන්න එපා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post පෙරපාසලෙන් පාසලට යන ඔබේ දරුවා ගැන මේ දේවල් හිතට ගන්න. appeared first on familylife.

අවාසනාවන්ත විදියට අපේ ගෙවල්වලට වගේම පාසල්වලටත් තහනම් මාතෘකාවක් වෙලා තියෙන ලිංගික අධ්‍යාපනය දරුවන් වෙත සාර්ථකවය සන්නිවේදනය නොවීම තුළින් සමාජමය ගැටළු රාශියක් ඇති වෙලා තිබෙනවා. අඩු වයස් ගැබ් ගැනීම්, ලිංගාශ්‍රිත රෝග, මානසික සහ කායික සෞඛ්‍ය බිදවැටීම්, අධ්‍යාපනය කඩාකප්පල් වීම, කායික අපයෝජන, මිථ්‍යා සහ වැරදි මතවල එල්බගෙන ක්‍රියා කිරීම, අහිතකර ඇබ්බැහිකම්වලට හුරු වීම ඇතුළු බොහෝ අහිතකර ප්‍රතිවිපාකවලට මූලික ම හේතුවක් විදියට “දරුවන්ට නිසි වයසට ගැළපෙන විදියට ලිංගික අධ්‍යාපනය ලබා නොදීම” පෙන්වන්න පුළුවන්කම තියෙනවා.

familylife.lk කියවන ඔබ මවක් හෝ පියෙක් නම් ළග ළගම එන අළුත් අවුරුද්දේ තමන්ගේ දරුවාට ලබා දෙන අළුත් දැනුම් ගොන්නට මේ කතා කරන කරුණත් එකතු කරගන්න කියලා අපි මතක් කරනවා.

දරුවාට ක්‍රමානුකූල ලිංගික අධ්‍යාපනය ලබා දීම කුඩා කාලයේ සිටම ආරම්භ කිරීම, පසුකාලීනව මව්පියන්ට මේ ගැන දරුවා එක්ක විවෘතව කතා කරන්න විශාල උපකාරයක් වෙනවාට නොඅනුමානයි. කාන්තාවන් සහ පිරිමින්, පවුල, කුඩා දරුවන්, ගර්භණී මව්වරුන් වගේ උදාහරණ අරගෙන වයසට ගැළපෙන විදියට අදහසක් ලබාදීමේ හැකියාව තියෙනවා. ඒ සදහා ඔබට පහත සදහන් ක්‍රමෝපායන් උපකාරයක් වෙයි කියලා අපි විශ්වාස කරනවා.

අපි ලිංගික අධ්‍යාපනය ලබපු විදියටම ද අපේ දරුවන්ටත් ඒ දනුම ලබා දෙන්නේ?

අපි බොහෝ දෙනෙක් ලිංගික අධ්‍යාපනය ලැබුවේ අවිධිමත් ක්‍රමවලට කියලා ඔබට මතක ඇති. ඒ දේටත් නව යොවුන් වියට එනකන් ම බලාගෙන ඉන්නත් වෙලා තියෙනවා. අනෙක් අතට ඒ අහපු දේවල් නිවැරදි ම දේවලුත් නෙවෙයි. ඒ වගේම මේ  ගැන දෙයක් අහලා දැනගන්න පුළුවන් වැඩිහිටියෙක්, ගුරුවරයෙක් අපිට හිටියද? අඩුම තරමේ පාසලේ සෞඛ්‍ය පාඩමේදිවත් මේ ගැන කතා බහ කරන්න ගුරුවරු පෙළඹුනාද? දෙමව්පියෝ එක්ක මේ ගැන කතාකරන්න හිතන්නවත් බය වුණා නේද? හරිහමන් ලිංගික අධ්‍යාපනයක් නොලැබීම නිසා අපිට ලැබුණු අහිතකර තත්ත්වයන් මොනවද? අවසන් වශයෙන් අපිට උරුම වෙලා තිබුණු තත්ත්වයම අපේ දරුවන්ටත් උරුම කරලා දෙනවද? සන්සන්දනාත්මකව සළකලා බලලා සුදුසු දේ ඔබම තෝරාගන්න.

වයසට ගැළපෙන්න කියා දෙන්න.

දරුවාගේ වයසට සහ මානසික සංවර්ධනයට ගැළපෙන තරමට විතරක් දැනුම ලබාදෙන්න. දරුවා දෙයක් ගැන අහනවානම් උත්තර දෙනවා ඇර අහන්නේ නැති දේවලට කරුණු දැක්වීම ඔහුගේ මනසට දරාගැනීම අපහසු වේවී. කොහොමත් දරුවෝ කියන්නේ කුතුහලය උපරිමයෙන් තියෙන කණ්ඩායමක් නිසා ගොඩක් වෙලාවට දිගින් දිගටම ප්‍රශ්න අහන්න ඉඩ තියෙන බවත් මතක තියාගන්න වෙනවා. 

දරුවාගේ දැනුම වටහාගන්න.

දරුවන්ට ලිංගික අධ්‍යාපනය ලබාදීමේදී දරුවා මේ ගැන ප්‍රශ්න අහන වෙලාවට සංවාදයක් සිදු කෙරෙන විදියට ආපස්සට දරුවගෙනුත් ප්‍රශ්න අහන්න. දරුවා මොන වගේ දේවල් ගැන දැනට දැනුවත්ද, මොන විදියට ඒ දැනුම ලබාගෙනද කියලා මෙයින් දැනගන්න පුළුවන් වෙනවා. හැබැයි කලබල නැතුව බොහොම ප්‍රවේශමෙන් ඒ දේ කරන්න සිද්ධ වෙනවා.

තොරතුරු අරන් ඒ තොරතුරු මත දරුවාට දෝශාරෝපන එහෙම කළොත් දරුවා හැමදෙයක්ම මව්පියන්ගෙන් හංහන්න පටන් ගන්නවා. මේ විදියට කතා බහ කරගෙන යනකොට දරුවා තුළ වැරදි අදහස් තියෙනවනම් නිවැරදි කරන්න ඔබට පුළුවන්කම තියෙනවා. ඒ වගේම කතා බහ නවත්තන්න අවශ්‍ය තැන ගැනත් හොද අවධානයකින් ඉන්න වෙනවා.

අවංක වෙන්න.

දෙමව්පියෝ බොරු කියනකොට ඒ දේ තේරුම් ගැනීමේ හැකියාව දරුවොන්ට තියෙනවා. දරුවන්ට ලිංගික අධ්‍යාපනය ලබාදීමේදී මව්පියන් බොරු කියන බව වැටහුනොත් දරුවා ප්‍රශ්න ඇසීමෙන් වළකින්න ඉඩ තියෙනවා. ඒ නිසා දරුවෝ ඉස්සරහා ලිංගිකත්වය ගැන කතා කිරීමේදී අවංකව කතා කිරිම ඉතාම වැදගත් වෙනවා. දරුවා අහන දේ ගැන උත්තරයක් දෙන්න තමන් දන්නේ නැත්තන් ඒ දේ කියන්න පැකිළෙන්න අවශ්‍ය නෑ. ප්‍රශ්නයට නිවැරදි උත්තරය හොදින් හොයලා බලලා කියලා දෙන්නම් කියලා දරුවට කීමේ හැකියාව මව්පියන්ට තියෙනවා. 

දැනුම ලබාගන්න.

දරුවන් එක්ක ගණුදෙනු කිරීම ඉතාම කල්පනාවෙන් කළ යුතු දෙයක් වෙනවා. මේ සදහා දැනුමින් යාවත්කාලීන වීම අත්‍යවශ්‍ය කරුණක් වෙලා තියෙනවා වගේම දැනුම ලබාගන්න පුළුවන් විවිධ ක්‍රම සහ විධිත් තියෙනවා. පොත් පත්, අන්තර්ජාල ලිපි, වීඩියෝ දර්ශන වගේ දේවල් මාර්ගයෙන් අවශ්‍ය කරුණු දැන කියාගන්න පුළුවන්. ඒ වගේම මේ වෙනකොට ලිංගික අධ්‍යපනය සම්බන්ධව දරුවන්ට ගැළපෙන විදියට සිංහලෙන් ලියැවුණු පොත් පත් තියෙන බවත් අපි මතක් කරනවා. 

මූලිකත්වය ගන්න.

සමහර දරුවෝ ස්වභාවයෙන් ම නිතර නිතර ප්‍රශ්න අහන අය වෙනකොට සමහර දරුවෝ යම් යම් කරුණු ගැන මව්පියන්ගෙන් අහන්න ලැජ්ජා වෙනවා. ඒ වගේ වෙලාවට අම්මාට තාත්තාට මුල් වෙලා දරුවන්ට ලිංගික අධ්‍යාපනය සම්බන්ධ කාරණා කතා කරන්න සිදු වෙනවා. වෙන වෙනත් මාර්ගවලින් දරුවන් වැරදි තොරතුරු ලබාගන්න කලින් නිවැරදි අධ්‍යාපනයක් ලබාදෙන එක නුවණට හුරුයි කියලා අපි හිතනවා.

ඉවසිලිවන්ත වෙන්න.

දරුවා දෙයක් ගැන අහනකොට ”ඔයාට මොකටද ඔය ලොකු අයගේ කතා/ ඔවා දැන්මම ඔයාට වැඩක් නෑනේ, ගිහින් පොතක් පතක් බලාගන්න” වගේ ආදීකාලීන උත්තර නම් දෙන්න එපා. ඒ වගේම තමන් දකින දෙයක් ගැන දරුවා ප්‍රශ්නයක් ඇහුවොත් සුදුසු තැනකට ගිහින් දරුවා එක්ක ඒ ගැන කතා කරන්නත්, පෞද්ගලිකත්වය, අන් අයගේ පෞද්ගලිකත්වයට අත පෙවිය හැකි සීමාව වගේ කරුණු ගැනත් ඉවසිලිවන්තව සහ ආදරයෙන් කියා දෙන්න.

කතාබහ පවත්වාගෙන යන්න.

තමන්ගේ රහස් අවයව ආවරණය වෙන විදියට ඇදුම් ඇදගැනීමේ වැදගත්කම කියාදෙන වයසේ සිට දරුවා වැඩිහිටි වියට පත්වෙන තුරුම දරුවාට දැනුම අවශ්‍ය සෑම මොහොතේම මේ කාරණය ගැන කතා බහ කිරීම අත්‍යවශ්‍ය වෙනවා. මෙය සැගවිය යුතු කාරණාවක් විදියට නොසළකා විවෘතව කතා කිරීම මගින් දරුවාට තවදුරටත් මව්පියන් සමග සමීප වීමේ අවස්ථාව ලැබෙනවා.   

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post දරුවන්ට ලිංගික අධ්‍යාපනය ලබාදීමේදී සැලකිලිමත් විය යුත්තේ ඇයි? appeared first on familylife.

ඝන ආහාර ගැනීම ආරම්භ කළ දරුවාට පහත සදහන් ආහාර වර්ග වයස අවුරුද්ද පහුවෙන තුරු ලබා දෙන්න එපා කියන කාරණයත් සිහියේ රදවා තබාගන්න.

• මී පැණි – ළදරුවන්ට ඉතා අහිතකර බැක්ටීරියාවක් අඩංගු වෙනවා
• එළ කිරි – ළදරු උදරයට දරාගත නොහැකි තරම් ලැක්ටෝස් ප්‍රමාණයක් අඩංගු වෙනවා.
• රටකජු, හේසල් නට්, ආමන්ඩ් වැනි නට්ස් වර්ග – ප්‍රෝටින් වලින් අනූන වුවත් අසාත්මිකතා ඇතිවිය හැකියි. අසාත්මික නැතිනම් ලබාදෙන්න පුලුවන්කම තියෙනවා.
• කූනිස්සෝ, පොකිරිස්සෝ – රසදිය අනුපාතය ඉහළයි.
• සීනි අඩංගු සියලුම රසකැවිලි වර්ග සහ පැණි බිම වර්ග
• ලුණු – ළදරු වකුගඩුවලට දරාගත නොහැකියි.
• බිත්තර සුදු මදය – අසාත්මිකතා ඇතිවිය හැකියි. 
• අමු එලවලු – නයිට්‍රේට් විශාල වශයෙන් අඩංගු වෙනවා.

පහත සදහන් සියළුම පෝශක කොටස් දරුවා ලබාගන්නවා කියන කාරණය තහවුරු කරගනිමින් සමබල ආහාර වේලක් දරුවාට ඝන ආහාර ආරම්භය සඳහා ලබාදෙන්න උත්සහ කරන්න. ඒ වගේම දරුවාට අසාත්මික ආහාරත් හදුනාගන්න.

• ප්‍රෝටීන් – සෛල වර්ධනයට, ආහාර ශක්තිය බවට පත් කිරීමට, ප්‍රතිශක්තිය වර්ධනය කිරීමට, ආසාදන වැළැක්වීමට සහ ඔක්සිජන් පරිවහනයට අවශ්‍ය වෙනවා – මස්, කරවල, බිත්තර, මාළු, නට්ස් වර්ග, බෝංචි සහ අනෙකුත් රනිල කුලයේ ආහාර, කිරි ආහාර, පියලි සහිත ඇට වර්ග.
• කාබෝහයිඩ්‍රේට් – සිරුරට ශක්තිය ලබාදෙන ප්‍රධාන ආකාරයයි. මේදය සහ ප්‍රෝටීන් පාවිච්චි කරලා සෛල නිර්මාණය සහ පිළිසකර කිරීමට උපකාර වෙනවා. තන්තු සහ පිශ්ටය විදියට ලැබෙන කාබෝහයිඩ්‍රෙට් තමයි දරුවන්ට සුදුසු වෙන්නේ – අල වර්ග, බත්, පැස්ටා, නූඩ්ල්ස්, පිටි ආහාර, කිරි ආහාර, රනිල බෝග
• මේදය – දරුවන්ට ශක්තිය ලැබෙන ප්‍රධාන මූලාශ්‍රයකි- කිරි ආහාර, බටර්, තෙල්, ගිතෙල්, මාළු, නට්ස් වර්ග, අලිපේර, තල, වට්ටක්කා ඇට
• කැල්සියම් – දත් සහ ඇටකටු වර්ධනයට, ලේ කැටි ගැසීමට, ස්නායු පේෂි සහ හදවතේ ක්‍රියාකාරීත්වයට වැදගත් වෙනවා- මව්කිරි, චීස්, යෝගට්, බිත්තර කහ මදය, බ්‍රොකොලි, නිවිති ටෝෆු, කුඩා මාළු, කූනිස්සන්, කතුරුමුරුංගා, තම්පලා
• යකඩ – ලේ නිපදවීම ප්‍රධාන වශයෙන්ම සිදු කරනවා- රතු මස්, පීකුදු, රනිල කුලයෙ ආහාර, නට්ස් වර්ග, නිවිති, ගොටුකොළ, වට්ටක්කා ඇට, රතු හාල්, මුහුදු ආහාර,
• ෆෝලේට් – සෛල ගොඩනැගීමට සහ වර්ධනයට වැදගත්  වෙනවා- නිවිති, කිඩ්නි බීන්ස්, පියලි ඇට, පැපොල්,
• තන්තු – දරුවාගේ බඩවැල් වල සමමිතියක් ගොඩනැගීමට, පසු කාලීනව පිළිකා සහ හදවත් රෝගවලින් වැළකීමට වැදගත් වෙනවා – පළතුරු, එළවලු, කුරුට්ට සහිත ධාන්‍ය, රනිල කුලයේ ආහාර

• විටමින් ඒ – ඇස්වල පෙනීමට, සමේ නිරෝගිකමට, අසාත්මිකතා වැළැක්වීමට, ප්‍රතිශක්තිය වර්ධනයට අවශ්‍ය වෙනවා- කැරට්, කහ බතල, වට්ටක්කා, ගෝවා, බිත්තර කහ මදය, සියළුම කහ පැහැති එලවලු සහ පළතුරු 
• විටමින් සී – සෙම්ප්‍රතිශ්‍යාව වැලකීම, රුධිර පරිවහනය ශක්තිමත් කිරීමට හැකියාව තියෙනවා- ඇඹුල් පළතුරු, තක්කාලි, දෙහි, කොමඩු, ගෝවා, නිවිති, පැපොල්, කොලිෆ්ලවර්, බ්‍රොකොලි.
• විටමින් ඩී – අස්ථි වර්ධනයට, සෛල ක්‍රියාකාරිත්වයට. සැමන්, කෙළවල්ලො, සාඩින්, යෝගට්, මව්කිරි, බටර්, උදෑසන ළා හිරු එළිය
• ඔමේගා –  මොළයේ වර්ධනයට – සැමන්, සාඩින්, නට්ස් වර්ග, හුරුල්ලන්, නිවිති, සෝයා
• විටමින් ඊ – ප්‍රති ඔක්සිකාරකයකි. සමේ පැහැය වර්ධනයට සහ නව සෛල වර්ධනයට- තිරිගු, ධාන්‍ය, ඔලිව්, සෝයා, බතල, අලිපේර
• විටමින් කේ – ලේ කැටි ගැසීමට – නිවිති ඇතුළු පලා වර්ග, ගෝවා, හතු
• විටමින් බී – ස්නායු සෛල වර්ධනයට, ආහාර ජීර්ණයට, මතකය වර්ධනයට, නව පටක වර්ධනයට, ශරීරයේ පරිවෘත්තීය ක්‍රියාවලියට, ප්‍රතිශක්තිය වර්ධනයට, රතු රුධිරානු වර්ධනයට – සත්ත්වමය ආහාර, පලා වර්ග, ධාන්‍ය, හතු, බිත්තර, මාළු, බඩ ඉරිගු, කොල්ලු, එලවලු, පලතුරු, තක්කාලි  
• සින්ක් – හරක් මස්, වට්ටක්කා, තල, නිවිති, යෝගට්, චීස්, නිවුඩු සහල්

මෙම ලිපිපෙළේ පසුගිය ළිපි සඳහා පහතින් පිවිසෙන්න

පළමු ලිපිය – ළදරුවෙකුට ඝන ආහාර මාස හයෙන් පසු මේ විදිහට අරඹන්න

දෙවන ලිපිය – අවුරුද්දට අඩු දරුවන්ගේ ආහාර රටාව සැකසිය යුතු ආකාරය

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post දරුවාට ඝන ආහාර ආරම්භය සඳහා මේ දේවල් දැන සිටීම අනිවාර්යයි appeared first on familylife.

දරුවාගේ කථනය ප්‍රමාද වීම ඔහුගේ සංවර්ධනයේ එක් ඌනතාවයක් විදියට හදුන්වන්න පුළුවන්. මෙහිදී දරුවාට අන් අයගේ අදහස් වටහාගන්න වගේම තමන්ට ප්‍රකාශ කරන්න අවශ්‍ය දේ හරියටම කියාගන්නත් අපහසු වෙනවා. මේ නිසා සමාජ සම්බන්ධතා ගොඩනගා ගැනීම, හැසිරීම සහ අධ්‍යාපනය කියන කාරණාවලදි දරුවා තුළ යම් පසුබෑමක්  ඇතිවෙන්න වගේම දරුවාට මේ පසුබෑම මානසිකවත් බලපාන්න පුළුවන්.

දරුවා උපත ලබන මොහොතේදි පවා දරුවාගේ පළමු හැඬීම ගැන විශේෂ අවධානයක් යොමුකරන්නේ දරුවා කතා කරන්න ප්‍රමාදයි කියන කාරණයේ ඇති අවධානම නිසයි. රෝහලෙන් පිටවිමට පෙර ඔබට ලබාදෙන දරුවාගෙ සෞඛ්‍ය වර්ධක සටහනේ විවිධ වයස් මට්ටම්වලදි ළදරුවාගේ වර්ධනය ගැන සටහන් වෙලා තියෙන කරුණු ගැන ඉතා හොදඳින් සැළකිලිමත් වෙන්න කියන කාරණයත් අපි මෙහිදී ඔබට මතක් කරනවා.

දරුවාගේ කථනය ඇතුළුව අනෙකුත් වර්ධන ක්‍රියාකාරකම්වල සැළකිවයුතු අඩුවක් දක්නට ලැබෙනවානම් අනිවාර්යයෙන්ම ළමා රෝග විශේෂඥයෙකු වෙතට යොමු වීම තමයි ඔබ කළ යුතු වන්නෙ. සමහර වෙලාවට ඔබට දරුවාගේ ආබධිත තත්වයක් හඳුනාගන්න අපහසු වුණත් පළපුරුද්ද සහ වෘත්තීය සුදුසුකම් සහිත වෛද්‍යවරයාට එය හොඳින් වැටහෙනවා. යම් ගැටළුවක් ඇත්නම් හැකි තරම් කල් ඇතුව හඳුනා ගැනීම මගින් එය සුව කර ගැනීම පහසු වෙනවා.

දරුවෙකුගේ කථනය ප්‍රමාද වෙන්න පහත සදහන් කරුණු බ​ලපානවා.

1.      කථන සහ භාෂා සංවර්ධන අබාධිත බව නිසා මොළයේ ක්‍රියාකාරීත්වයේ වෙනස්කම් සිදුවෙනවා. මෙ හේතුව නිසා කථන ශබ්ද නිපදවීම, සන්නිවේදය සදහා භාවිතා කරන භාෂාවේ වචන භාවිතය අපහසු වීම, අන් අය කියන දේවල් වටහාගැනීම අපහසු වීම වගේ ලක්ෂණ දක්නට ලැබෙනවා.

2.      ඇසීමේ දුර්වලතා නිසාත් කථාව ප්‍රමාද වෙනවා. මව්පියන් හො​ඳ අවධානයෙන් ඉන්නවනම් මේ තත්ත්වය පහසුවෙන්ම හදුනාගන්න පුළුවන්කම තියෙනවා.

3.      දරුවා ජීවත්වන පරිසරය මෙයට ප්‍රධනම හේතුවක් වෙන්න පුළුවන්. විශේෂයෙන්ම අම්මා තාත්තා, රැකබලා ගන්නා පුද්ගලයා ඇතුළු නිවසේ සාමාජිකයින් දරුවා එක්ක  කතා බහා කරනවා අඩු නම් දරුවාගෙ කථන හැකියාව දියුණු වෙන්නේ නෑ. ඒ වගේම සම වයස් දරුවන් සමග සම්බන්ධතා අඩු වීමත් මෙයට හේතු වෙනවා.

4.      දරුවා ඩිජිටල් තිර භාවිතා කිරිමත් කථන ප්‍රමාදයට හේතු වෙනවා. අපි මේ ගැන පෙර ලිපි කිහිපයකින් කතා කලා. (ලිපි සඳහා මෙතන ක්ලික්/ටැප් කරන්න)

5.      අඩු මාසෙන් ඉපදුනු දරුවන් තුළ සංවර්ධන ඌණතා පවතින්න ඇති ඉඩකඩ වැඩි වෙනවා.

6.      ශෝතෙන්ද්‍රියේ ක්‍රියාකාරිත්වයේ අබාධ සහිත බව නිසා කථන ශබ්ද හදුනා ගැනීමේ (විකේතනය) ගැටළු  ඇතිවෙනවා. මෙය අවධානය යොමු කිරීම, වටහා ගැනීම සහ ස්මරණය කියන කාරණාවලට අහිතකර විදියට බලපානවා. නමුත් චිකිත්සනය මගින් මෙය සුව කරගත හැකිවෙනවා.

7.      ස්නායු ආබාධ තත්වයන් නිසා කථනයට අවශ්‍ය පේශීන් වලට බලපෑම් ඇතිවෙනවා.

8.      කථනය ප්‍රමාද වීම ඔටිසම් තත්ත්වයට පත් වීම නිසාත් සිදුවිය හැකි දෙයක් වෙනවා.

9.      තොල, තල්ල වැනි මුඛය ආශ්‍රිත ආශ්‍රිත ස්ථානවල ආබාධ හේතුවෙනුත් කථනය ප්‍රමාද වෙනවා.

10. පාසල වැනි යම් විශේෂ ස්ථානයකදි පමණක් කතා නොකර සිටීම.

දරුවාගේ කථන ප්‍රමාදය යම් සැකයක් ඇත්නම් නොපමාව වෛද්‍ය උපදෙස් ලබාගන්න අතරෙම දරුවාගේ කථන හැකියාව දියුණු කරන්න මව්පියන් විදියට ඔබට පහත සදහන් උපක්‍රම පවිච්චි කරලා බලන්න පුළුවන්කම තියෙනවා.

1.      දරුවා කුසේ ඉන්න කාලේ සිටම දරුවා සමග කතා බස් කරන්න. ඔබ මේ ගැන සිතා නොතිබුණත් දරුවාට ඔබ පවසන සියලුම දේවල් ඇසෙනවා.

2.      අලුත උපන් දරුවාගෙ මිමිණීම වලට ප්‍රතිචර දක්වන්න. දරුවා සමග කතා බස් කරමින් හුරතල් කරන්න.

3.      දරුවා සමගින් හැංගිමුත්තෝ සෙල්ලම සහ සෙල්ලම් බඩු යොදාගනිමින් ක්‍රීඩා කරන්න.

4.      දිනපතා තමුන් කරන කියන සියළුම දෑ පිළිබදව දරුවා සමගින් කතා බහ කරන්න. දරුවාගේ වාග් මාලාව මේ නිසා දියුණු වෙනවා.

5.      කතන්දර, කතන්දර පොත්, කවි සිංදු කියා දෙන්න. දරුවා සමග එකතු වී ඒවා අලුතින් නිර්මාණය කරන්න. රගපාමින් ඒවා කියවන්න. මේ හරහා මතකය, ශ්‍රවනය සහ හැගීම් ප්‍රකාශනය කියන දේවල් දියුණු වෙනවා.

6.      කිසිම අවස්ථාවක දරුවාට බලපෑම් කිරීම සිදු කරන්නෙපා. කතා බහේ වැරදි සිදුවන විට ඉතා ආදරයෙන් එය නිවැරදි කරන්න.

7.      දරුවා තනි වචනයෙන් පිළිතුරක් දෙන විට හෝ යමක් කියන විට නැවත එය අලුතින් වචන එකතු කරමින් දියුණු කරන්න.

8.      දිනය පුරාවට දරුවාට ඇසෙන දකින හැගෙන දේවල් ගැන ප්‍රශ්න අසන්න. දරුවාගේ ප්‍රශ්නවලට පිලිතුරු දෙන්න. තොරතුරු බෙදාගැනීමට ධෛර්‍යමත් කරන්න.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවා කතා කරන්න ප්‍රමාදයි නම් මේ කරුනු ගැන දැනුවත් වන්න. appeared first on familylife.

ඇයි අපේ දරුවාට තරහ යන්නේ…

• සමහර විට නිවසේ පරිසරය දරුවාට පීඩාවක් වෙන්න පුලුවනි.
• දරුවා ස්වභාවයෙන්ම ආවේගශීලී විය හැකියි. දෙමවුපියන්ගෙන් ලැබෙන ආදරය සහ අවධානයේ ගැටළු තිබීම.
• බාල කාලයේදී ලබන අහිතකර අත්දැකීම්.

දරුවට තරහ යන හේතු දැනගත්තා නම් අපි තව තවත් දරුවා තරහ ගැන්වීමට යොමු විය යුතුද?

අකමැත්තෙන් වුනත් කිව යුත්තක් තිබෙනවා. අපේ ඇතැම් වැඩිහිටියන් දරුවන් තරහ ගන්වා බලමින් ඒ තත්ත්වය ඔවුන්ට විනෝදයක් කර ගන්නවා. එය ඉතාම වැරදියි. දරුවෙකුට වුනත් අනවශ්‍යය විදිහට තරහ යෑම ඔවුන්ගේ මානසිකත්වයට එතරම් ගැලපෙන දෙයක් නොවෙයි. ඒ නිසා හැකි තරම් දරුවාට තරහ ඇති වෙන පරිසරය වැලැක්වීම මිස ඔවුන් තරහ ගැන්වීම නම් එතරම් සුදුසු නැහැ.

අක්කලා අයියලා තරහ ගන්වනවා නම්…

බාල දරුවාට තරහ යනවා දකින ඇතැම් වැඩිහිටි දරුවන් නංගී හෝ මල්ලිව තරහ ගැන්වීමට බොහොම කැමැතියි. ඒ නිසා නිතරම බලන්නේ බාලදරුවාට තරහ ගැන්වීමටයි. මෙහිදී දෙමව්පියන් විදිහට ඔබ බුද්ධිමත් වීම වැදගත්. ඊට හේතුව වැඩිමහල් කියන්නේත් ඔබේ බාල දරුවාට වඩා අවුරුදු කීපයක වෙනසක් තිබෙන පොඩි එකෙක්. ඒ නිසා මල්ලි හෝ නංගී තරහ ගස්වන්න එපා කියමින් වැඩිමහල් දරුවාට දැඩි දඩුවම් පමුණුවන විට ඔවුන් බාල දරුවා සමග අමනාප කම් ගොඩ නගා ගන්නවා. එවිට ප්‍රසිද්ධියේ නොවුනත් නොපෙනෙන විදිහට හෝ බාල දරුවාට හිරිහැර කරමින් ඔහු හෝ ඇය තරහ ගැන්වීමට උත්සාහ කරනවා. ඒ නිසා කිසිම විටෙක වැඩිමහල් දරුවන්ට දඬුවම් කිරීමට වඩා ආදරයෙන් ඒ ගැන කියා දීම ඉතාම වටිනවා.

කවදාවත් තවත් කෙනෙක් සමග සමාන කරන්න එපා.

ඔබේ දරුවාගේ දහසකුත් එකක් වැරදි තිබුනත් ඒවා තවත් අයෙකුගේ හොඳ සමග සමාන කරන්න එපා. වැඩිහිටියන් විදිහට ඔබගේ අපේක්‍ෂාව සෙසු ආදර්ශමත් දරුවෙකු සමග සංසන්දනාත්මකව සාපේක්ෂ කරමින් ඒ චරිතයේ හොඳ ඔබේ දරුවාට ආදේශ කිරීම ගැන වුනත් ඔවුන් ඒ එතරම් කැමැත්තක් නැහැ. එයින් වෙන්නේ හේතු නැතුවාම නිතරම අප්‍රසන්න චරිතයක් බවට ඔබේ දරුවා පත් වීම පමණයි.

අතීතය ගෙවී අවසානයි.

දරුවෙක් වැරදි කළ විට ඔවුන්ගේ අතීත වැරදිත් ඒ සමග සම්බන්ධ කර ගන්න එපා. අවස්ථාවට පමණක් අවවාද හෝ දඬුවම් ලබා දෙන්න. එසේ නොමැතිව ඔබ නිතරම අතීතය හාරා අවුස්සන විට දරුවාගේ ආවේගශීලිත්වය තවත් උත්සන්න තත්වයට පත් වේවි.

දරුවා සමග කාලය ගත කරන්න

දරුවන්ට දෙමව්පියන්ගේ අවදානය, ආදරය අවශ්‍ය වෙනවා. එහි අඩුපාඩු වූ විට මට ආදරය කරන්න යැයි ඉල්ලා සිටින්න බැහැ. නමුත් ඉතා සියුම් විදිහට ඒ වෙනුවෙන් ප්‍රතිචර දක්වනන් දරුවන් හරි රුසියන්. ඒ නිසා දරුවාට ආදරය කරන්න. ඔවුන් සමග කාලය ගත කරනන් ඉඩ සලසා ගන්න. එවිට තරහාව යනු දරුවාට ආගන්තුක දෙයක් බවට පත් වේවි.

දෙමව්පියන්ගේ තරහ දරුවන් පිට එපා

බොහෝ විට දෙමව්පියන්ට ඔවුන්ගේ තරහ පිට කිරිමට හොඳම චරිත බවට පත්ව ඇත්තේ දරුවන්. නමුත් එය කිසිදු ලෙසකින් සාධාරණ නැහැ. ඔබගේ ආවේගශීලිත්වය දකින දරුවන් එය අනුකරණයට සූදානම් වෙනවා. ඒ නිසා නිතරම දරුවන් ඉදිරියේදී ආදර්ශමත් චරිත වීමත් ඉතාම වැදගත්.

මේ දේවල් ගැන තවත් දැනුවත් වීම වැදගත්. බලන්න මේ ලිපිත් ඔබේ දැනුවත් භාවයට ඉවහල් වෙනවද කියල

01. දරුවන්ගේ කරදරවලට හේතු නැතුවාම නෙවෙයි…

02. දරුවන් ගැන ඔබේ මැසිවිල්ල ඔවුන්ගේ සැනසිල්ලට හරවන්න

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවා කේන්තිකාරයෙක් නම් ඔබත් මේ දේවල් දැනගෙන ඉන්නම ඕනෙ. appeared first on familylife.

 මව්කිරි වලින් පසු සුදුසු බත් තලපයද? සුප් හා කැඳ වර්ගද?

ළදරුවන්ගේ පෝෂණය සඳහා මව්කිරි සහ ආහාර ලබාදීම කෙරෙහි වන නිර්දේශ, විද්‍යාත්මකව සනාථ වූ කරුණුවලට අනුව ලෝක සෞඛ්‍ය සංවිධානයෙන් සකසා ඇති ජාත්‍යන්තර නිර්දේශයන් අනුව දේශීය පසුබිමට සරිලන පරිදි ගොඩනැගී පවතින බව පළමුවෙන් මෙහිදී කිව යුතුය. අමතර ආහාර ලබා දීම ළදරුවාට මාස 06 සම්පූර්ණවීමේ සිට ආරම්භ කළ යුතුවේ.

එහිදී පළමුවෙන්ම ලබාදීමට සුදුසු වන්නේ උකුවට තලපයක් ලෙස සකස් කර ගත් ආහාරයකි. මේ වෙනුවට කැඳ, සුප්, පලතුරු යුෂ, වතුර ආදී පානවර්ග ලබා දීම නොකළ යුතුය. 
මේ නිර්දේශයන් විද්‍යානුකූල පසුබිමක් සහිත වූවකි. ළදරුවාගේ ආමාංශය කුඩාය. එහෙත් දරුවන්ගේ වර්ධනයට අවශ්‍ය වන ශක්ති සහ පෝෂණ අවශ්‍යතා ඉහළය. එමනිසාත්, ළදරුවාට බත් ඇට ලෙස කවන්නට නොහැකි නිසාත් තලපයක් ලෙස සකස් කර මෙම පළමු අමතර ආහාරය ලබාදීමට යෝජනා කෙරේ. මෙම තලපය එනම් උකු, හැන්දේ රැඳී තිබෙන ලෙස සැකසීම වැදගත්ය.

දරුවා ඉපද මාස 6ක් ගතවන තුරුම මව්කිරෙන් පමණක්ම පෝෂණය වූ නිසා ඔහු හෝ ඇය හදුනන්නේ මව්කිරිවල රසයයි. මේ නිසා මුලින්ම සකසන තලපයට මව්කිරි ස්වල්පයක් එකතුකර දරුවාට හුරු රසයෙන් ආහාර හුරු කිරීම සිදුකළ හැකිය. ඉන්පසු ක්‍රමයෙන් විවිධ රසයන්ට දරුවා හුරු කරමින් ආහාර ලබා දීම සිදුකළ හැක.

තෙල් හෝ මේද වර්ග ලබා දීම සුදුසුද?

මෙම අමතර ආහාරයේ ශක්ති ඝනත්වය ඉහළ නැංවීම සඳහා එයට පොල් තෙල්, උකු පොල් කිරි, බටර් වැනි දෙයක් එකතු කළ හැකිය. මෙසේ එකතු කරන තෙල් හෝ මේද තේ හැන්දකින් කිලෝ කැලරි 40ක් පමණ ළදරුවාට අවශ්‍යවන ශක්ති ප්‍රමාණය යහමින් ලබාදීමට හැකිවේ.එසේම තල,රටකජු ආදී මේදය අඩංගු ඇට වර්ගයන්ද ආහාරයන්ට එකතු කළ හැකිය.

මස් මාළු එකතු කළ යුත්තේ ඇයි?

 මීලඟට අපගේ අවධානය යොමුවිය යුතු තවත් කරුණක් නම් නීරක්තිය නැතිනම් රක්තහීනතාවයි. වෛද්‍ය පර්යේෂණායතනයක සිදුකළ අධ්‍යයන මගින්ද පෙන්වාදී ඇත්තේ කුඩා දරුවන් අතර රක්තහීනතාව ඉහළ මට්ටමක පවතින බවයි. එසේම විදේශීය පර්යේෂකයන් පෙන්වාදී ඇත්තේ වයස අවුරුදු 03 වන විට දරු‍වකුගේ මොළයේ වර්ධනයෙන් 80%ක්ම නිමාවන බැවින් රක්තහීනතාව ඇති වුවහොත් එවැනි දරුවන්ගේ බුද්ධිඵලය පහළ වැටෙන බවයි.

මෙම වයස් සීමාවෙන් පසුව කවර තරමක් යකඩ අඩංගු ආහාර, පෙති, සිරප් ලබා දුන්නද එම තත්ත්වය ආපසු හැරවීම අපහසු බව ඔවුහු පවසති. එමනිසා ළමයින්ගේ අනාගත කායික වර්ධනයට පමණක් නොව බුද්ධි වර්ධනයට, ඉගෙනීමේ හැකියාව, මතකය නංවාළීම ආදී සියල්ලමට අත්තිවාරම දැමිය යුත්තේ ළදරු හා ළමා කාලයේදීය. දරුවාට යකඩ පෝෂක ලැබීම සහතික කිරීම සඳහා මස්, මාළු, හාල් මැස්සන් ආදී සත්ත්වමය ආහාර ලබාදීම අත්‍යවශ්‍ය වේ.

මේ ආහාර තුළ අඩංගු වන්නේ ශරීරයට අපහසුවෙන් උරාගන්නා හීම් යකඩය. අමතර ආහාර ලබාදීම අරඹා දින 6-7කින් පමණ මෙම යකඩ සපිරි සත්වමය ආහාර ලබාදීම ආරම්භ කළ යුතුමය. පලා වර්ග, පියළි ඇට වර්ග, ඇට ජාති ආදීයේ යම් ප්‍රමාණයන්ගෙන් යකඩ පැවතියද ඒවා සියල්ල හීම් නොවන යකඩ බැවින් ශරීරයට උරාගැනෙන්නේ සුළු වශයෙන් හෙවත් 5%ක් වැනි ඉතා සුළු ප්‍රමාණයකි.

බිත්තර කහමදය තුළත් යකඩ පැවතියද ඒවා හීම් නොවන යකඩය. බිත්තර අනිවාර්යෙන්ම ළමයාට ලබාදිය යුතු ගුණවත් ආහාරයක් වුවත් ඉන් යකඩ ලබාගත හැක්කේ ඉතා සුළු ප්‍රමාණයකි. ඒ නිසා දරුවන්ගේ ආහාරයට රතුමස් හෝ රතුමාලු කෑල්ලක් හෝ පීකුදු කෑල්ලක් හෝ හාල්මැස්සන් වැනි යකඩ සපිරි සත්ත්වමය ආහාරයක් දිනපතාම එක් කිරීම තුළින් රක්තහීනතාව වැළැක්වීමට පුළුවන.

මුල් මාස හයෙන් පසු දරුවෙකුගේ පෝෂණය ගැන කතා කිරීමේදී තවත් වැදගත් අවශ්‍යතාවක් වන්නේ දරුවාට විවිධ ආහාර හුරු කිරීමය. ආහාරයක ඇති පෝෂක වර්ග හා ප්‍රමාණ ආහාරයෙන් ආහාරයට වෙනස් වේ. එම නිසා විවිධ ආහාර වර්ග දීම මගින් දරුවාට ප්‍රධාන පෝෂකයන් මෙන්ම සුළු ප්‍රමාණවලින් ලැබිය යුතු එහෙත් අත්‍යවශ්‍ය වෙනත් විටමින්, ඛණිජ වර්ග වැනි අනෙක් පෝෂක ද්‍රව්‍යන්ගෙන්ද මිශ්‍රණයක් යහමින් ලැබේ. තවද දිනපතාම ඒකාකාරී ආහාර ලැබීම නිසා ටික කලකට පසු දරුවා කෑම අප්‍රිය කිරීමට පෙළඹීම එයින් වැළකේ.

දරුවාගේ ආහාරයට ලුණු හා සීනි එකතු කළ යුතුද?

දරුවන්ගේ ආහාරයට පළමු වසර තුළ ලුණු හා සීනි එකතු කිරීම නම් කිසිසේත්ම නොකළ යුතුය. වයස අවුරුදු එකේ සිට නිවසේ සාදන පවුලේ ආහාරවලට දරුවා යොමු කරන වයසේදී ඇතිවන අප බොහෝ විට දකින ගැටලුවක් වන්නේ පැණි රසයට හා ලුණු රසයට කැමති වැඩිහිටියන් තම දරුවන්ටත් එම පුරුද්ද ඇති කිරීමට දරන උත්සාහයයි. මෙසේ කිරීමෙන් වැළකීම දෙමාපියන්ගේ වගකීමකි.

වයස මාස 06 සිට ලුණු, සීනි එකතු නොකළ යහපත් ආහාර මගින් හොඳ වර්ධනයක් මෙන්ම සෞඛ්‍යමත් ජීවන රටාවක්ද ලැබිය හැකිය. එවැනි දරුවෙකුට වයසින් වැඩුණු පසු වුවද සීනි අඩු කිරීමට හෝ ලුණු අඩු කිරීමට විශේෂ පණිවිඩ ලබාදීම අවශ්‍ය නොවන්නේ දරුවා මුල සිටම එවැනි ආහාර රටාවකට හුරුව සිටින හෙයිනි. 

ඇට වර්ග, අල වර්ග හා පළා වර්ග එකතකළ යුත්තේ ඇයි?

දරුවා හුරු කළ යුතු තවත් ආහාර වර්ගයක් වන්නේ රනිල නැතිනම් මාංශ භෝගයන්ය. පියලි ඇට ලෙසින් හඳුන්වන මෙම ආහාරය යනු පරිප්පු පමණක් නොවේ. බෝංචි, මුං, කඩල, කව්පි යනාදිය එයට ඇතුළත්ය. එසේම රටකජු, කජු, කොට්ටම්බා ඇට, කොස් ඇට ආදීයෙහිද අත්‍යවශ්‍ය මේද අම්ල ඇතුළු පෝෂක අඩංගු නිසා ක්‍රම ක්‍රමයෙන් දරුවාගේ ආහාරයටද ඒවා එක් කළ හැකිය.

මේ අතරම තදකොළ පැහැ පලා වර්ග, තද කහ සහ තැඹිලි පාට එළවළු හා පලතුරුද බිත්තර කහමදය, පීකුදු, දරුවාගේ ආහාරවලට එක් කිරීමෙන් ඒවා තුළ අඩංගු විටමින් ඒ ලැබෙන අතර එමගින් දරුවා ලෙඩ රෝගවලින් ආරක්ෂා කිරීමට, නීරෝගී ඇස් පෙනීමට, සම නිරෝගීව පැවතීමට උපකාර කරයි. එමනිසා මෙවැනි ආහාරයක් දරුවාගේ දිනපතා ආහාර වේලට එකතු කිරීම වඩා උචිතය.

කෙටි ආහාර වේල් ලෙස ලබා දිය හැකි ආහාර වර්ග මොනවාද?

එමෙන්ම කෙටි ආහාර වශයෙන් දරුවාට ලබාදිය යුතු ආහාර කවරේද යන්න බොහෝ දෙමවුපියන්ට ඇති ගැටලුවකි. කෙටි ආහාරයක් යනුවෙන් හඳුන්වන්නේ කුඩා ප්‍රමාණයකින් වැඩි පෝෂණයක් සපයන ආහාරයකි. අල, බතල, මඤ්ඤොක්කා, වට්ටක්කා වැනි තැම්බූ දේ පොල් හෝ බටර් සමග සකස් කර කෑල්ලක් ලබාදීම, බිත්තරයක් තම්බා හෝ ඔම්ලට් ලෙස සකස් කර කෑල්ලක් ලබාදීම, පලතුරු වර්ගයක් ආදීය ඒ අතරින් සුදුසු කෙටි ආහාරය.

මේ ආකාරයට මුල් මාස හයෙන් පසු දරුවෙකුගේ පෝෂණය වැදගත් වන්නේ එය පෝෂණය හා සෞඛ්‍ය නංවාළීම පමණක් නොව කායික වර්ධනය මෙන්ම බුද්ධිමය වර්ධනයද එමගින් දියුණු වන නිසාය. මුල් අවුරුදු තුනේදී දරුවාට නිසි පෝෂණය ලබා නොදුන්නොත් ඊට පසු කෙතෙරම් උත්සාහ කළද මෙම තත්ත්වය ප්‍රශස්ත කරගත නොහැක. 

මෙම ලිපිය සැකසීමේදී සිය දැනුම නොමසුරුව ලබා දෙමින් වයඹ විශ්ව විද්‍යාලයේ මානව පෝෂණය පිළිබඳ ජ්‍යෙෂ්ඨ කථිකාචාර්ය, ආචාර්ය රේණුක සිල්වා මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post මුල් මාස හයෙන් පසු දරුවෙකුගේ පෝෂණය ගැන මවක් දැනගත යුතුම දේවල් appeared first on familylife.

උතුම් මව් පදවිය ලැබීම යනු කාන්තාවකට ජිවිතයේ ලැබිය හැකි සුන්දරම අත්දැකීමක් බව සැබෑවකි. නමුත් එහි සුන්දරත්වය නියමාකාරයෙන් අත්විඳීමට අවස්ථාව ලැබෙන්නේ දෙමව්පියන් තම දරුවන් වෙනුවෙන් වූ වගකීම් නිසි ආකාරව ඉටු කරන්නට වූ විට පමණි. විශේෂයෙන්ම දරුවෙකු පිළිසිඳගත් බව දැනගත් දින සිටම ඒ සඳහා අවශ්‍ය වගකීම් දෙමව්පියන් ලෙස ඔබ කරට ගත යුතු වෙයි. එහිදී මවගේ වගකීම් සහගත බව අන් කවරටත් වඩා වැදගත් වෙයි.

ගර්භනී මව්වරුන් හෝ වේවා වෙනත් සාමාන්‍ය පුද්ගලයෙකු හෝ වේවා තමන්ගේ දත් සම්බන්ධව නිරන්තර අවධානයකින් සිටීම වැදගත්. එලෙසම එය නිවැරදි ලෙස ආරක්ෂා කර ගැනීමද වැදගත්. දිනපතා දවසට දෙවරක් කෑමට පසු දත් මැදීම, ඔබ ලබාගන්නා සෑම සුළු හෝ ප්‍රධාන ආහාර වේලකට පසුවම කට සේදීම සහ ජලය පානය කිරීම සම්බන්ධව නිරන්තර අවධානයෙන් සිටීම, ප්‍රධාන වශයෙන් යහපත් මුඛ සෞඛ්‍යයක් වෙනුවෙන් ඔබට උපකාරී වේ.

එලෙසම තම මුඛ සෞඛ්‍ය සම්බන්ධව සැකයක් හෝ ප්‍රශ්නයක් ඇති වූ විට හැකි ඉක්මනින් දන්ත වෛද්‍යවරයෙකු වෙත යාමටද වගබලා ගත යුතුය. අඩුම තරමේ මාස 6කට වරක්වත් දන්ත වෛද්‍යවරයෙකු වෙත ගොස් දත් පරීක්ෂාවක් සිදුකර ගැනීම වැදගත්.

ගර්භණී සමයේදී මව්වරුන්ගේ ඇතිවන දත් දිරීමක්, විදුරුමස්වල ඇතිවන රෝගී තත්ත්වයක් හෝ වෙනත් ඕනෑම ආකාරයක මුඛ සෞඛ්‍ය සම්බන්ධ ප්‍රශ්නයකදී ගර්භණී සමයේ මුල් මාස තුන හැර මැද මාස තුන ඇතුළතදී අවශ්‍ය ප්‍රතිකාර ලබා ගැනීමට යොමුවීම අනිවාර්යයි. එසේ නොමැති වූ විට ඉතා බරපතල තත්ත්වයන්ට මුහුණ දීමට සිදුවන අවස්ථාද අද වනවිට විරල නොවේ.

ගැබිනි සමයේ මුඛ සෞඛ්‍ය සම්බන්ධ වැරදි මත රාශියක් අප අතර පවතී.

මව අවැසි තරමින් කැල්සියම් නොගත්විට ඇයගේ දත්වල කැල්සියම් දිය වී ඒවා දරුවාට ලැබෙන බව පැවසීම ඉන් එකකි. එලෙසම වමනය යන කාලයට දත් මැදීම සිදු නොකළ යුතු බවද ගැබිනි සමයේ දන්ත ප්‍රතිකාර කිරීමෙන් වැලකි සිටිය යුතු බවටද තවත් මත රාශියකි. නමුත් මතක තබා ගත යුතුම කාරණය වන්නේ මේවා සියල්ල අසත්‍ය මතයන් බවයි.

මෙවැනි අසත්‍ය මතයන් පිළිගෙන තම මුඛ සෞඛ්‍ය පිළිබඳ අවධානය නොදෙන, නොඑසේ නම් වැරදි පුරුදුවල යෙදෙන මව්වරුන්ට සැබවින්ම ඉදිරියේදී ගැටලු ගණනාවකට මුහුණ දීමට සිදුවන බව නම් නොරහසකි.

ගැබිනි සමයේ ඔබගේ දත්වල කිසියම් හෝ ගැටලුකාරී තත්ත්වයක් පැනනැගී ඇත්නම් මෙවැනි කාලයක ඒ සඳහා ප්‍රතිකාර ගැනීම නුසුදුසු යැයි සිතා එය සඟවාගෙන සිටීම වෙනුවට සිදුවිය යුත්තේ දන්ත වෛද්‍යවරයෙකු වෙත ගොස් පරීක්ෂාවක් කරගැනීමයි.

එලෙස වෛද්‍ය උපදෙස් නොගෙන සිටීමෙන් තත්ත්වය තවත් බරපතල වියහැකි අතර ඉතා අවම මට්ටමේ ඇති ගැටලුවක් අනවශ්‍ය බිය හෝ මිත්‍යා මතවල එල්බගෙන සිටීම හේතුවෙන් බරපතල තත්ත්වයන් දක්වා පත්වීමට බොහෝවිට ඉඩකඩ ඇත. එනිසා වඩාත්ම සුදුසු වන්නේ ගර්භනී ඔබගේ මුඛ සෞඛ්‍ය සම්බන්ධ කිසියම් වෙනසක් දැනුනු වහාම දන්ත වෛද්‍යවරයෙක් වෙත ගොස් උපදෙස් ලබා ගැනීමයි.

වමනය යන කාලයට දත් මැදීමේ තරමක අපහසුවක් ඇති වීම සාමාන්‍ය කරුණකි. නමුත් එසේ සිතා දත් මැදීමෙන් වැළකී සිටීම වෙනුවට ඒ වෙනුවෙන් තමන්ට ගැලපෙන නිවැරදි ක්‍රමයක් තෝරාගැනීම වැදගත්ය. උදාහරණයක් ලෙස දන්තාලේපය මාරු කිරීම වැනි ක්‍රමයක් උත්සහ කළ හැක.

මෙහිදී විශේෂයෙන්ම සඳහන් කළ යුතු කරුණු කිහිපයක්ද වෙයි. යම් අවස්ථාවන්වලදී දත් නරක් වීමෙන් සැරවා එකතු වීමක් සිදුවිය හැකි අතර එමගින් ඇතිවන තුවාලයන් ඉතා වේදනාකාරී විය හැක. එවැනි අවස්ථාවල දන්ත වෛද්‍ය උපදෙස් වෙත ගැබිනි මව යොමු කිරීම අතිශය වැදගත් කාරණයකි. එලෙසම ගර්භනී මවකගේ මුඛයේ විදුරුමස් හා ඊට යටින් පවතින අස්ථි කොටස් දියවීම වැනි රෝග තත්ත්වයන්ද ඇතිවිය හැකි අතර එය කුස තුළ සිටින දරුවාටද ඉතා අහිතකර ලෙස බලපෑම් කිරීමට සමත්ය.

සාමාන්‍යයෙන් ගර්භනී මවකට විදුරුමස් රෝගයක් පවතින අවස්ථාවන්හිදී සෑමවිටම බැක්ටීරියා මුදා හැරීමක් ඒ හරහා සිදුවේ. මෙහි ප්‍රතිපලයක් ලෙස උපත් බර අඩු දරුවන්, නොමේරූ දරුවන් මෙන්ම මළ දරු උපත් ඇතිවීමේ අවධානමක්ද පවතී.

දරු ප්‍රසූතියකින් අනතුරුව දත් දුර්වල වීම, කැඩී යාම, දිරා යාම වැනි තත්ත්වයන් ඇතිවීම කෙරෙහි දරු ප්‍රසූතිය සෘජුවම බලපෑම් නොකරයි. එය හඳුන්වාදිය හැක්කේ ගර්භනී සමයේ සිදුවන යම් යම් වෙනස්කම්වලට මව අනුගත නොවීම නිසා ඇතිවන තත්ත්වයක් ලෙසයි.

සාමාන්‍යයෙන් ගර්භනී සමයේදී මවගේ ආහාර රටාව වෙනදාට වඩා යම් වෙනස්වීමකට ලක් වෙයි. වෙනදා ලබාගත් ප්‍රධාන ආහාර වේල් තුනට අමතරව කෙටි ආහාර වේලක් හෝ ආහාර වේල් කිහිපයක් ලබාගැනීමට මව්වරුන්ට සිදුවීම සාමාන්‍ය දෙයකි. නමුත් ඒ සෑම කෙටි ආහාර වේලකින් පසුවද හොඳින් කට සෝදා ජලය පානය කිරීමට ඔබ තුළ පුරුද්දක් ඇති කරගැනීම මෙහිදී වඩා වැදගත්ය.

එසේ නොවුනහොත් දත් දිරා යාමට ඇති ප්‍රවනතාවය ඒ හරහා තව තවත් වැඩි වීමට ඉඩකඩ පවතී. නමුත් ඒ දත් දිරායාමට හේතුවිය හැකි එක් අවස්ථාවක් පමණයි. මීට බලපෑ හැකි තවත් හේතු තිබිය හැකිය. සමහර මව්වරුන්ට ගැබිනි සමයේ මුල් මාස තුන ඇතුළතදී තදබල ලෙස වමනය ඇතිවීමට ඉඩකඩ පවතින අතර එමගින් මුඛයේ ආම්ලිකතාවය වැඩි වී දත් ක්ෂය වීමකට ලක්වීමෙන් එනමලය දියවී යාමක් සිදුවිය හැකිය.

මෙලෙස ඇතිවන දන්ත රෝගී තත්ත්වය ඉරෝෂන් ( Erosion ) ලෙස හඳුන්වන අතර ඒ නිසා දත් හිරි වැටීමකටද ලක්විය හැක. මෙවැනි තත්ත්වයකදී දත් නොමැද සිටීම නොකළ යුතු අතර ඒ හරහා සිදුවන්නේ තත්ත්වය තවත් උත්සන්න වීම පමණයි. එනිසා මෙවැනි තත්ත්වයකදී ඔබගේ ප්‍රසව හා නාරි වෛද්‍යවරයාගෙන් අවශ්‍ය උපදෙස් ලබා ගැනීම අනිවාර්ය කරුණක්.

දත් නොමැද සිටීමෙන් බැක්ටීරියා තැම්පත් වීම චක්‍රයක් සේ සිදුවන නිසා උදැසන දත් මැදීම කළ නොහැකි කෙනෙකුට කෙසේ හෝ පැය 24කට දෙවරක් දත් මැදීම කලයුතු බවට වෛද්‍යවරුන් උපදෙස් ලබාදෙයි. එවැනි තත්ත්වයකදී විසඳුම් ලෙස භාෂ්මික ද්‍රාවණ මගින් මුඛය සේදීම, වෛද්‍ය උපදෙස් සහිතව ෆ්ලෝරයිඩ් අඩංගු කට සෝදන දියර වර්ගයක් භාවිත කිරීම සිදුකල හැකියග\.

ගර්භනී සමයේදී ශරීරයේ සිදුවන හෝමෝන සාන්ද්‍රනයේ වෙනස්වීමද, මුඛයේ විදුරුමස් දියවීම කෙරෙහි බෙහෙවින් බලපෑම් ඇති කරයි. එමගින් විදුරුමස් ඉදිමීමකට ලක්වන අතර දත් මැදීමේදී විදුරුමස්වලින් රුධිරය ගැලීමක්ද සිදුවිය හැකිය.

මෙවැනි තත්ත්වයකදී බොහෝ මව්වරුන් දත් මැදීම අඩු කිරීමට හෝ දත් නොමැද සිටීමට කටයුතු කරන අතර එය කිසිසේත් නොකළ යුත්තකි. කෙසේ හෝ දිනපතා දවසට දෙවරක් දත් මැදීම අනිවාර්යෙන්ම කළ යුත්තක් බව මතක තබා ගත යුතුය.

කෙසේ නමුත් මව්වරුන්ගේ නොසැලකිලිමත්කම බොහෝවිට ඔවුන්ගේ මුඛ සෞඛ්‍ය සම්බන්ධ ගැටලුවලට හේතුවන අතර යහපත් මුඛ සෞඛ්‍යයක් පවත්වාගැනීම කුස තුළ වැඩෙන දරුවා තුළද යහපත් මුඛ සෞඛ්‍ය තත්ත්වයක් නිරායාසයෙන්ම ඇති කිරීමට හේතු වනු ඇති බවද මතක තබා ගත යුතුය.

මෙම ලිපිය සැකසීමේදී සිය දැනුම නොමසුරුව ලබා දෙමින් අම්බලන්ගොඩ මෙඩිප්ලස් දන්ත ශල්‍යාගාරයේ දන්ත ශල්‍ය වෛද්‍ය එස්. ඒ. එල්. ආලංක මහාතා දැක්වූ සහයෝගයට Familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post අම්මාගේ දන්ත සෞඛ්‍යය දරුවාගේ දත් රැකෙන්න බලපාන බව දන්නවද? appeared first on familylife.

බොහෝවිට දරුවන්ට ශක්තිමත් වාග් මාලාවක් ගොඩනගා ගැනීමට මෙන්ම ඔවුන්ගේ මූලික අධ්‍යාපනයෙන් වැඩි කොටසක් ලබා ගැනීමට අවස්ථාව සැලසෙන්නේ දරුවන් සහ දෙමව්පියන් අතර පවතින අන්තර් සබඳතා හරහායි.

ඔවුන් තම සිඟිති මුවින් පළමු වරට අම්මා තාත්තා යැයි පැවසීම තරම් සතුටක් දෙමව්පියන්ට තවත් නැති තරම්මය. බොහෝවිට දරුවන්ට ශක්තිමත් වාග් මාලාවක් ගොඩනගා ගැනීමට මෙන්ම ඔවුන්ගේ මූලික අධ්‍යාපනයෙන් වැඩි කොටසක් ලබා ගැනීමට අවස්ථාව සැලසෙන්නේ දරුවන් සහ දෙමව්පියන් අතර පවතින අන්තර් සබඳතා හරහායි.

බහතෝරන වයසේ දරුවෙකුට ශක්තිමත් වාග් මාලාවක් ගොඩනගා ගැනීමට මෙන්ම වචන කතා කිරීමට හැඩගැස්සවීම සඳහා දෙමව්පියන්ගේ නිරන්තර සහයෝගය ලැබිය යුතුය. බහ තෝරන වයසේ සිටින නමුත් හරියාකාරව වචන හැසිරවීම අපහසු දරුවන් බොහෝවිට නිර්මාණය වන්නේ එලෙස දෙමව්පියන් තමන්ගේ වගකීම් සහගත බවින් මිදුණු විටය. ඔවුන්ගේ කාර්යබහුල ජිවිතයේ දරුවන් වෙනුවෙන් වෙන්කිරීමට තරම් ප්‍රමාණවත් කාලයක් නොමැති වීම ප්‍රධාන වශයෙන් මෙම ගැටලුවට හේතුවේ. 

සාමාන්‍යයෙන් දරුවෙකු උපතේ සිට අවුරුදු හතරත් පහත් දක්වා කාලය ඔවුන්ගේ කථන හා භාෂා කුසලතා වර්ධනය සඳහා උයෝගී කරගනියි. එයට දරුවා ජීවත්වන වටපිටාව සහ ඒ හරහා ලැබෙන උත්තේජනයන් මෙන්ම තම දෙමව්පියන් අතර පවතින සම්බන්ධතාවයද ප්‍රධාන වශයෙන් හේතුවේ.

කුඩා දරුවෙකු ඉපදීමටත් පෙර සිටම සන්නිවේදනය වෙනුවෙන් හොඳ සූදානමක් ලබා ගන්නා අතර එය මව ගැබ් ගෙන සති පහළොවක් ගතවන තැන, දරුවාට ශබ්ද ඇසීමට පටන් ගැනීමත් සමග ආරම්භ වේ. එය ආරම්භයේදී මවගේ හද ගැස්ම පමණක් වන අතර කල්යත්ම බාහිරින් අප පවසන දේවල් ද දරුවාට ඇසීමට පටන් ගනියි.

එසේම කලලයට සති විසි පහ සම්පුර්ණවීමත් සමග බාහිරින් කුස මත ලබා දෙන චලන වෙත දරුවාද සංවේදී වෙමින් චලන දැක්වීමට පටන් ගනියි. ඒ අනුව දරුවා කුස තුළ සිටින සමයේ සිටම ඔවුන්ගේ සන්නිවේදන කුසලතා වර්ධනය වෙනුවෙන් අප සැලකිලිමත් විය යුතුය.

සාමාන්‍යයෙන් දරුවන් මෙලොව එලිය දකින මොහොතේ සිට තම හැඟීම් ප්‍රකාශනය සඳහා බොහෝවිට තෝරාගන්නේ හැඩිමයි. උපතේ සිට මාස තුනක් පමණ යනතුරු දරුවන් නිදිමත, බඩගින්න සහ වේදනාව වැනි කරුණු ප්‍රධාන වශයෙන් හැඩිමමගින් සන්නිවේදනය කරයි.

මාස දෙකක් පමණ ගතවන තැන කෙටි ශබ්ද පිට කිරීම අරඹන අතර මව දෙස බලමින් සිනාසීමට ද උත්සහ කරයි. මෙම කාල සීමාව දරුවා සමග නිතර කතා බහ කිරීමට පෙළඹිය යුතු අතර අප පවසන දේවල්වලට වාචිකව නැවත ප්‍රතිචාර දැක්වීමේ හැකියාවක් නැති නමුත් එම කතා බහට ඇහුම්කන් දීම ඉදිරියේදී දරුවාට විවිධ ශබ්ද සෑදීමේ පහසුවක් නිර්මාණය කරදෙයි. එනිසා උපතේ සිට මාස තුනක් දක්වා කාලය තම දරුවා වෙනුවෙන් වැඩි කාලයක් වෙන්කරමින් විවිධ ශබ්ද සාදමින් ඔවුන් සමග  සෙල්ලම් කිරීම අනිවාර්යයෙන් කල යුත්තකි.

මාස තුන සිට හය දක්වා කාලයද දරුවාගේ සන්නිවේදනයන වර්ධනය වෙනුවෙන් අතිශය වැදගත් කාල සීමාවක් වන අතර විවිධ ශබ්දවලට හිස හරවමින් ඒවාට ප්‍රතිචාර ලෙස නැවත ශබ්දයක් පිටකිරීමට දරුවන් මෙම වයසේදී උත්සහ දරයි.

මාස හයත් අවුරුද්දත් අතර කාලය දරුවෙකුගේ බහ තෝරන අවධියේ වැදගත්ම කොටසකි. මෙහිදී ඔවුන් එකම ශබ්දය නැවත නැවත පිටකිරීමට උත්සහ දරන අතර ඔවුන්ට ඇසෙන වචන අනුකරණයට උත්සහ දරයි. තමන්ගේ නමට ප්‍රතිචාර දැක්වීමේ හැකියාවක්ද පවතින අතර මව පිය ලබාදෙන සරල උපදෙස් පිළිපැදීමේ හැකියාවක්ද ඇත.

දරුවෙකුට අවුරුද්දක් සම්පුර්ණ වන තැන අලුත් වචන පැවසීමට පටන් ගැනීමක් සාමාන්‍යයෙන් සිදුවේ. සරල විධානයන්ට ප්‍රතිචාර දැක්වීමට පටන් ගන්නා අතර පවසන යමක් අත දිගුකර පෙන්වීමට උත්සහ ගනියි. මෙම කාලය තුළ තනි වචනයෙන් හෝ වචන දෙක තුනක කුඩා වාක්‍ය වලින් දරුවා සමග කතා බහේ යෙදීම වැදගත්ය.

දරුවා සමග අඩු වේගයෙන් රිද්මයක් සහිතව කතා කිරීම තුලින් ඔවුන්ගේ මොළයේ භාෂා උත්තේජනය වැඩිවීමට හේතුවේ. සාමාන්‍යයෙන් වයස අවුරුදු 2ක් 3ක් පමණ වනවිට දරුවන්ට වචන දහයක් හෝ ඊට වැඩි ප්‍රමාණයක් කතා කිරීමේ හැකියාව පවතියි. එලෙසම වචන කිහිපයක් එකතු කරමින් කෙටි වාක්‍ය සෑදීමට මෙන්ම එපා කියන සියලු දේවල් කිරීමට පෙළඹීම මෙවැනි බහ තෝරන වයසේ දරුවෙකුගේ සාමාන්‍ය සිරිත වේ.

අවුරුදු 3ක් සම්පුර්ණ වන දරුවෙකු බොහෝ විට පැහැදිලිව සම්පුර්ණ වාක්‍ය කතා කරන අතර සරල සිද්ධීන් විස්තර කිරීමේ හැකියාවක්ද පවතියි. වයස අවුරුදු හතරක් පමණ වනවිට දරුවන්ගේ වාග් මාලාවේ වචන 1000ක් පමණ ඇතුලත් වන අතර විධාන තේරම් ගැනීම මෙන්ම ඒවාට නිවැරදිව ප්‍රතිචාර දැක්වීමේ හැකියාවක්ද ඇත.

නිපාත පද, බහු වචන තේරුම් ගැනීම මෙන්ම කොහේද, මොකක්ද, කවදාද වැනි ප්‍රශ්නවලට නිවැරදිව ප්‍රතිචාර දැක්වීමේ හැකියාව සාමාන්‍යයෙන් දරුවෙකුට ලැබෙනුයේ වයස අවුරුදු හතරත් පහත් අතර කාලය තුලය. එනිසා එම කාලය තමන් හා සම වයසේ දරුවන් හා ගැටෙමින් නිර්මාණාත්මක සෙල්ලම් කිරීමට යොමුවන කාල සීමාවක් වන අතර දරුවාගේ වයසට සහ කැමැත්තට ගැලපෙන අයුරේ ක්‍රීඩාවලට ඔවුන් යොමු කිරීමද වැදගත්ය.

කෙසේවෙතත් වයස අවුරුදු පහක් පමණ වනවිට භාෂාව තේරුම් ගැනීම හා වචන භාවිතය සම්බන්ධව දරුවන් තුළ ඉතා හොඳ මට්ටමේ හැකියාවක් පවතින අතර තමන්ගේ සම්පුර්ණ නම, වයස ආදිය පැවසීමේ හැකියාවක්ද ඇත. දරුවාගේ භාෂා කුසලතා තවදුරටත් වර්ධනය කිරීම උදෙසා නිවසේ සහ පෙර පාසලේදී සිදු කරන ක්‍රියාකාරකම් සම්බන්ධව කතා බහ කිරීම සහ ඒ හරහා දරුවාට කතාන්දර ගොඩනැගීමට අවස්ථාව සලසාදීම සිදුකල යුතුය.

සාමාන්‍යයෙන් වයස අවුරුදු හයක් පමණ වනවිට දරුවෙකු තමන්ට එදිනෙදා අසන්නට දකින්නට ලැබෙන දේවල් මත තම වාග් මාලාව සහ භාෂා රටාව වැඩිදියුණු කරගැනීමට උත්සහ දරණ අතර වැඩිහිටියන් කතා කරන භාෂා රටාවටම සමානව භාෂාව භාවිතා කිරීමට හැකියාව ලබා ගනියි.

මේ අනුව බහ තෝරන වයසේ ඔබේ දරුවාට ඒ වෙනුවෙන් දෙමව්පියන්ගේ නිරන්තර සහයෝගය ලබා දීම වැදගත්වන අතර එය ශක්තිමත් වාග් මාලාවක් මෙන්ම සාර්ථක භාෂා භාවිතයක් ගොඩනගා ගැනීමට උදව් වේ. එලෙසම අදාළ වයස් මට්ටම්වලදී පෙන්විය යුතු කුසලතාවයන් ඔබේ දරුවා නොපෙන්වන අවස්ථාවක් වේ නම් ඒ පිලිබඳ සැලකිලිමත් වීම දෙමව්පියන්ගේ වගකීමක් වන අතර වාග් ව්‍යාධිවේදීවරයෙකු හමුවී උපදෙස් ලබා ගැනීමට කටයුතු කල යුතුය.                 

මෙම ලිපිය සැකසීමේදී සිය දැනුම නොමසුරුව ලබා දෙමින් කතන හා භාෂා ව්‍යාධිවේදී නිමීර චතුරංග වීරරත්න මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post බහ තෝරන දරුවෙකු සිටින ඔබට ඇති වගකීම හඳුනාගන්න appeared first on familylife.