කොරෝනා වෛරසයක් යනු කුමක්ද?

කොරෝනා වෛරසයක් වශයෙන් හඳුන්වනු ලබන්නේ සුවිශේෂ වශයෙන් මිනිසාගේ ශ්වසන පද්ධතිය වෙත බලපෑම් ඇති කරන තනි දාමයක් සහිත RNA ( RiboNucleic Acid) වෛරස් තත්ත්වයකි. මෙම කොරෝනා වෛරස් බහුලව දක්නට ලැබෙන්නේ වවුලන් අතරය.මේ වන විට හඳුනාගත් කොරෝනා වෛරස විශේෂ රාශියක් වවුලන් අතර සුලභව දක්නට ලැබෙන අතර නව කොරෝනා වෛරසයද වවුලන් මගින් මිනිසුන්ට සම්ප්‍රේෂණය වී ඇති බව මේ වන විට අනුමාන කරයි.

මීට පෙර ආසන්නතම කොරෝනා වෛරස් උවදුර ලෙස පැතිර ගිය මර්ස් (Middle East respiratory syndrome – MERS) වෛරස් තත්ත්වයද වවුලන් හරහා ඔටුවන්ටද, ඔටුවන් මගින් මිනිසුන්ටද සමිප්‍රේෂණය වී ඇති බව සොයාගෙන ඇත. මේ වෛරස් තත්ත්වයන්ට කොරෝනා නමින් නම් ලැබීමට ප්‍රධාන හේතුව වෛරස් ස්වභාවය දැකගත හැකි ඉලෙක්ට්‍රොනික් අන්වීක්‍ෂයන් තුලදී මෙය ඔටුන්නක හැඩය ගැනීමයි. 

කොරෝනා වෛරස් අලුත් දෙයක්ද?

නැත. කාලානුරූපව ඉතිහාසයේ පටන් කොරෝනා වෛරස් තත්ත්වයන්ට මිනිස් සංහතිය මුහුණ දී ඇති අතර පරිණාමයත් සමගම දැන් ප්‍රධාන කොරෝනා වෛරස් වර්ග හතරක් මිනිස් ශරීරය තුලද පවතින බව විද්‍යාඥයින් සොයාගෙන තිබෙනවා. ඒවා නම්

• HCoV-HKUI
• HCoV-OC43
• HCoV-NL 63
• HCoV-229E

වන අතර මෙම වෛරස මගින් සෙම්ප්‍රතිශ්‍යාව වැනි සුළු රෝගී තත්ත්වයන් පමණක් ඇති කරනු ලබයි. මෙම කොරොනා වෛරස් තත්ත්වයන් හඳුනාගැනීම සඳහා ශ්‍රේෂ්ඨ ශ්‍රී ලාංකික විද්‍යාඥයෙක් වන මහාචාර්ය ජෝසප් ශ්‍රියාල් මලික් පීර්ස් මහතා දක්වා ඇති ඉමහත් දායකත්වය පිළිබඳවද මතක් කළ යුතු වනවා. 

මීට අමතරව ලෝකයේ මිනිස් සංහතියට ඉතා දරුණු බලපෑමක් එල්ල කරන ලද 2002 – 2003 වසර වල මිනිසුන් 650කට අධික පිරිසකට මරු කැඳවමින් චීනය හා හොංකොං ආශ්‍රීතව පැතිර ගිය සාස් (Severe Acute Respiratory Syndrome – SARS) සහ 2012 – 2015 අතර කාලයේ රෝගීන් 800 ක් පමණ මරණයට පත් කරමින් සවුදි අරාබියේ ද පසුව මැද පෙරදිග, අප්‍රිකාව, ආසියාව සහ යුරෝපයේ වෙනත් රටවල ද පැතිර ගිය මර්ස් (Middle East Respiratory Syndrome – MERS) වෛරස් තත්ත්වයන් දෙක මෑත කාලයේ ඇතිවූ දරුණු කොරෝනා වෛරස් උවදුරු දෙක ලෙස හඳුන්වන්නට පුළුවන්. 

රෝගය මිනිසුන් අතර පැතිරෙන්නේ කෙසේද?

මෙම වෛරසය ප්‍රධාන වශයෙන් පැතිර යන්නේ බිඳිති වශයෙන් ආසාදිතයන්ගෙන් පිටවන සෙම, කෙල, කිවිසුම් යැවීමේදී පිටවන සොටු යන මාර්ග වලිනි. යමෙකු කිවිසුම් යවන විට, කහින විට, මෙන්ම මෙම ශ්‍රාවයන් ස්පර්ශ කර වෙනත් ස්ථාන ඇල්ලීම, වැනි ක්‍රියා මගින් මෙම වෛරසය පැතිරේ.

ඔබට කැස්සක් හෝ කිවිසුමක් ඇති වන්නේ ශරීරයට අනවශ්‍ය යමක් පිටකිරීම වෙනුවෙන් වුවද මෙම වෛරසය ඒ පිටවන දේ වාහකයන් ලෙසින් යොදාගෙන පැතිරීම සිදු කරයි. ඒ අනුව වෛරසය ඇතුල් වීම,

ඝෘජුවම – ශ්වසන බිඳිති හරහා

වක්‍රව – ආසාදිත දෑ ඇල්ලීමෙන් පසුව නාසය, මුඛය ස්පර්ශ කළ විට (ස්පර්ශය හරහා) සිදුවේ.

නව කොරෝනා වෛරසය ආසාදිතයෙකුගේ රෝග ලක්‍ෂණ මොනවාද?

• ඇඟපතෙහි ඇතිවන කැක්කුම
• හොටු ගැලීම ඇතුළු සුළු සෙම්ප්‍රතිශ්‍යා තත්ත්වයන්
• කැස්ස සහ උගුරේ ආමාරුව
• උණ ගතිය (මෙහිදී සමහරුන්ට තද උණ හටගන්නා නමුත් සමහරෙකුට සාමාන්‍ය උණ ගතියක් වුවු ද පැවතිය හැක.)
• දරුණු නිවුමෝනියා තත්ත්වයද ඇතිවිය හැකිය

මෙහිදී ප්‍රධාන ආසාදිත කාන්ඩ දෙකක් හඳුනාගත හැක.

• රෝගයේ මූලික අවස්ථාවේදීම රෝග ලක්‍ෂණ පෙන්නුම් කරන රෝගීන්
• රෝගය ආසාදිත මුත් රෝග ලක්‍ෂණ පෙන්නුම් නොකරන රෝගීන් 

වෛරසයෙන් ආරක්‍ෂාව වීම සඳහා ගත හැකි ක්‍රියාමාර්ග මොනවාද?

කොරෝනා වෛරසය සඳහා සාමාන්‍ය සෙම්ප්‍රතිශ්‍යාවකට ප්‍රතිකාර කරන ආකාරයට අමතරව විශේෂ කිසිදු සාර්ථක ඖෂධයක් මේ වන තෙක් සොයාගෙන නොමැත. එබැවින් වෛරසය ආසාදනය වීම වළවක්වා ගැනීමට කටයුතු කිරීම ඉතා වැදගත් වේ. මේ සඳහා ප්‍රධාන වශයෙන් සිදුකළ යුතු වන්නේ එදිනෙදා යහ පැවැත්ම රැක ගැනීමයි.

• කහින විට හෝ කිවිසුම් යවන විට නිතර ලේන්සුවක් භාවිතා කරන්න. ලේන්සුවක් ළඟ නැත්නම් අතෙහි වැලිමිට මුවට තබා කිවිසුම් පිටකිරීම සිදුකරන්න

• හැකි සෑම විටම හොඳින් සබන් හෝ විෂබීජ නාශක භාවිතයෙන් අත් සෝදන්න 

මෙම කාරනය ඉතාමත් වැදගත් වේ. විශේෂයෙන් නිසිපරිදි විෂබීජ නොරැදෙන්නට අත් සේදීමට බොහෝ දෙනා නොදනිති. හොඳින් සබන් හෝ විෂබීජ නාශක දියරයක් යොදා අතෙහි අත්ල මෙන්ම ඇඟිලි අතර මෙන්ම පිටි අල්ලද සේදිය යුතුය. සමහරුන් ඉතා ඉක්මනින් අත් සේදීමෙන් විෂබීජ ඉවත් වීම සිදු නොවේ. මේ නිසා කිහිප විටක් ඒ ගැන සැලකිල්ලෙන් අවම වශයෙන් තප්පර 40ක් හෝ 60ක් අතර කාලයක් හොඳින් අත් සේදිය යුතුය. විශේෂයෙන් පාසැල් යන ඔබේ දුවාදරුවන් මේ පිළිබඳව දැනුවත් කරන්න. 

• නිතර නාසය ඇල්ලීම, තැන තැන කෙළ ගැසීම ආදිය නොකරන්න

• මෙම වෛරසය ආසාදනය වූවන්ට ඇතිවන කුමන හෝ රෝග ලක්‍ෂණ පවතින්නේ නම් ඉක්මනින් වෛද්‍යවරයෙකු වෙත යොමුවන්න.

• ඔබට වෛරසය වැළඳී ඇති බවට තහවුරු වුවහොත් ජනාධික ප්‍රදේශ වල ගැවසීමෙන් වැලකී අන් පුද්ගලයන්ගේ ආරක්‍ෂාව වෙනුවෙන් ඔවුන්ගෙන් ඈත්වී අවශ්‍ය ප්‍රතිකාර සඳහා අදාල සෞඛ්‍ය අංශ වෙත යොමුවන්න.

මේ වන විට ශ්‍රී ලාංකිකයන් දෙදෙනෙක් අසාදනයට ලක් වීමත් සමග රට තුළ නොසන්සුන් තත්ත්වයක් හටගෙන තිබෙනවා. නමුත් නිකරුනේ කලබල වී අනවශ්‍ය බියක් ඇතිකර නොගත යුතුය. විමසිල්ලෙන් මෙන්ම පුරවැසියන් ලෙස මනා සෞඛ්‍ය පුරුදු අනුගමනය කරමින් තමාගේ මෙන්ම අනොකාගේ සෞඛ්‍යටද හානි නොපැමිණෙන ලෙස වගකීමෙන් කටයුතු කිරීම මෙවැනි උවදුරු අවස්ථාවක අප සැමගේ වගකීමයි. 

මෙම ලිපිය සැකසීමේදී සිය දැනුම නොමසුරුව ලබා දෙමින් අනුරාධපුර ශික්ෂණ රෝහලේ වෛරස වේදය පිළිබඳ විශේෂඥ වෛද්‍ය සාරංග සුමතිපාල මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

අවධානමට පෙර සූදානම සඳහා පහත මාධ්‍ය ඔස්සේ හැකිතාක් ෂෙයාකරන්න.

The post කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න appeared first on familylife.

මේ වන විට ලොව විවිධ රටවලින් මෙම රෝගීන් වාර්ථා වී ඇති අතර විදේශ මාධ්‍ය වාර්තා කරන අන්දමට දකුණු කොරියාව, හොංකොං, තායිවානය, තායිලන්ත, ජපානය වැනි චීනය ආශ්‍රීත රටවල් මෙන්ම ඇමරිකාවේ වොෂින්ටන් නගරයෙනුත් රෝගීන් වාර්ථා වී තිබෙනවා.
විශේෂයෙන් සාස් (Severe Acute Respiratory Syndrome – SARS), හා මර්ස් (Middle East respiratory syndrome – MERS) මෙන්ම පහසුවෙන් මිනිසෙකුගේ ශ්වසන පද්ධතියට හානි කළ හැකි මෙම වෛරසය මිනිසෙකුගෙන් මිනිසෙකුට පහසුවෙන් පැතිර යාමේ හැකියාව පවතිනවා.

මේ පිළිබඳ familylife.lk සම්පත් දායකයෙකු වන වෛද්‍ය හසින්ද උඩලගම මහතා සිය facebook පිටුවේ පළ කළ අදහසක් ඔහුගේ අවසරය ඇතිව අප පහතින් පළ කරන්නේ මේ පිළිබඳව ඉක්මනින් ඔබව දැනුවත් කිරීමට ඇති අවශ්‍යතාවය සලකා බලා. චීන වෛරසය නැතහොත් වූහැන් වෛරසය පිළිබඳ සවිස්තර ලිපියක් නුදුරේදීම ඔබ වෙත ගෙන ඒමට අප බලාපොරොත්තු වනවා.

වෛද්‍ය හසින්ද උඩලගම විසින් පළකළ සටහන –

චීන වෛරසය ගැන නිව්ස් ගොඩක් අය ශෙයාකරගෙන තියනව දැක්කා. ඒ සම්බන්ධව ලංකාවෙ තත්වය ගැන තවම හරියට දන්නෙ නෑ. තාම එහෙම ඒ වර්ගයේ වයිරස් සහිත ලෙඩ්ඩු නම් වාර්තා වෙලා නෑ. ඇඟේ හැප්පෙන ගානට දැන් චීන්නු ඉන්න නිසා අවදානමක් නෑමයි කියන්න බෑ.

එහෙම ලෙඩක් ආවත් ඉතින් කරන්න කියල විශේෂ දෙයක් නෑ. පැතිරෙන එක වලක්වන්න ක්‍රියාමාර්ග ගන්නයිතියෙන්නෙ. මේකත් ස්වසන මාර්ගය ආශ්‍රිත ලෙඩක්. ඒ නිසා වැඩිපුරම බෝවෙන්නෙ “බිඳිති” මාර්ගයෙන්. බිඳිති කියන්නෙ කෙල, සොටු, සෙම වගේ ස්වසන මාර්ගයෙන් නිපදවෙන දේවල්. මේ නිසා වෙනදා සාර්ස්, ඉන්ෆ්ලුවෙන්සා වගේ ලෙඩ වලදි කරපු ටිකම තමා කරන්න තියෙන්නෙ. නමුත් අපේ රටේ මිනිස්සු නොකරන එකම දේත් ඒක. මෙහෙම මොකක් හරි ලෙඩක් ගැන ආරංචියක් ආවම ගොඩක් අය කරන්නෙ පලවෙනි කිවිසුම ගියපු ගමන් ඩොක්ටර් කෙනෙක් ගාවට යන එක. ඒකෙ වැරැද්දක් කියන්නෙ නෑ. නමුත් ඒ අතරෙ වැදගත්ම කොටස ගොඩක් අය අතින් කෙරෙන්නෙ නෑ. ඒ කොටස තියෙන්නෙ ලෙඩාගෙ අතේ.

මෙහෙම මරණීය ලෙඩක් පැතිරෙන්න ඕනෙම නෑ. තමන්ට සෙම සෙම්ප්‍රතිශ්‍යා අසනීප තත්වයක් තියනව නම් අනේ අනිත් අයට බෝ නොකර ඉන්න බලන්න. මම දැකල තියනවා ගොඩක් අය ලේන්සු පාවිච්චි කරන්නෙ නෑ. “හා…ච්චෝ..!” ගාලා මුළු පලාතම හෙල්ලිලා යන්න තමා කිවිසුම් අරින්නෙ. අහල පහල ගෙවල් වල මිනිස්සුත් දන්නවා මේ මනුස්සයට හෙම්බිරිස්සාව හැදිලා කියලා. එච්චරට සද්දෙ. සද්දෙ වැඩියි කියන්නෙ “බිඳිති” පැතිරෙනවා වැඩියි. ඇත්තටම බිඳිති නෙමේ පැතිරෙන්නෙ සෙම බෝල බෝල.

කැස්ස නම් හෙම්බිරිස්සාව නම් ලේන්සුවක් පාවිච්චි කරන්න. හදිසියට ලේන්සුවක් නැත්නම් අතේ වැලමිටෙන් උඩ කොටසෙන් ආවරණය කරන්න. අත පාවිච්චි කරන්න එපා කියන්නෙ අතේ ගෑවෙන වයිරස් ඔයා අල්ලන අල්ලන තැන් වල තැවරෙන නිසා. ඒ තැන් අල්ලන අනිත් අයටත් ඒවා බෝවෙන්න පුලුවන්. හෙම්බා තියනවා නම් පුරුද්දක් විදියට නිතර නිතර අත සෝදන්න. මොකද ඔයා නොදැනුවත්ව කොහොමත් නහය අවට අල්ලන නිසා අත්වල විෂබීජ තියනවා. අසනීපයක් නැතත් මගතොටේ – බස්වල, පොලේ, කඩේ ගිහින් ආවම අත සෝදන එක පුරුද්දක් කරගන්න. දැන් කොහොමත් එක එක වයිරස් වැඩි නිසා නිකම් ලෙඩ වෙන එක අඩු කරගන්න ඒක උදව් වෙයි. පොඩි අයටත් මේවා පුරුදු කරන්න. පුලුවන් නම් හෙම්බා එක්ක ජොබ් එකට යද්දි මාස්ක් පාවිච්චි කරන්න.

මේ වගේ වසංගතයක් පැතිරෙනකොට සෙනග අතරෙ ගැවසෙන එක අඩු කරන්න ඕනෙ. මේ චීන වෛරසය වැඩිපුරම පැතිරිලා තියෙන්නෙ වෙලඳ සැල් හරහා. ෂොපින් කරන්න ගියාම රෝගීන් සහ නිරෝගී අය මුහු වෙනවා. චීනයෙ කට්ටිය මේ අවුරුද්දෙ මුල ලක්ෂ ගණනින් පිටරටවල් වල සංචාරය කරන්න නියමිතයි. මේ එයාගෙ නිවාඩු කාලයක්. ඒ නිසා තමා මේකෙ අවදානම වැඩි. ලංකාවටත් සෑහෙන පිරිසක් ඒවි. ලංකාවෙ පලවෙනි ලෙඩා වාර්තාවුණ දවසෙ ඉඳලා ශොපින් මෝල් වගේ විදේශිකයො වැඩිපුර ඉන්න තැන් වලට යන එක අඩු කරන්න වෙයි.

අනිත් කාරණය ඉතින් අහිංසක අපි (සෞඛ්‍ය සේවයේ අය) ගැනත් ඩිංගක් හිතන්න. ඇත්තටම කැස්ස තියනවා කියල කටින් කිව්වම ඇති. කැහැලා පෙන්වන්න ඕනෙ නෑ. කැහැලා පෙන්වන්නම ඕනෙ කියල හිතෙනවා නම් ලේන්සුවක් තියල කහින්න. අපි මාස්ක් දාගෙන ඉන්න එක ගැන මොනවත් හිතන්න එපා. වසංගතයක් ආවම ඒකෙන් ගොඩක්ම බැට කන කට්ටියක් තමා අපි. දොස්තරලා නර්ස්ලා ලෙඩ වෙලා නිවාඩු අරන් හොස්පිටල් එක අඩු ස්ටාෆ් එකකින් අමාරුවෙන් දුවලා රෝගී සත්කාරය ගැටළුවක් වෙනවට වඩා ස්ටාෆ් එක පරිස්සම් කරන එක වටිනවා. අපි මාස්ක් එකක් දාගෙන ඉන්න එක ගැනත් මොනවත් හිතන්න එපා. දෙගොල්ලන්ගෙම ආරක්ෂාවට තමා එහෙම මාස්ක් දාගෙන ඉන්නෙ. නැතුව ලෙඩ්ඩු ගැන අප්‍රියාවකට නෙමේ.

තමන්ගෙ ස්වසන – සනීපාරක්ෂාව ගැන මීට වඩා ටිකක් කල්පනා කරන්න. ගෝලීය උෂ්ණත්වය ඉහල යාමත් එක්ක ලොකු පොඩි වයිරස් ගොඩයි දැන්. ගොඩක් ඒවා ස්වසන මාර්ගය ආශ්‍රිත ඒවා. අවුරුද්දකට සැරයක් අලුත් වයිරස් එකක් අනිවාර්යයෙන් ජාත්‍යන්තර මට්ටමෙන් ව්‍යාප්ත වෙනවා. ලංකාවෙත් අවුරුද්දකට සැරයක් දැන් ඉන්ෆ්ලුවෙන්සා වසංගතයක් යනවාමයි. ඉතින් කෝකටත් කියල ඒ පැත්තෙ සනීපාරක්ෂාව ප්‍රැක්ටිස් කරන්න පටන් ගන්න.

මෙම ලිපියේ සවිස්තර ලිපිය පළ කර ඇත. ඒ සඳහා පිවිසීමට පහත මාතෘකාව ක්ලික්/ටැප් කරන්න

කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න

අවධානමට පෙර සූදානම සඳහා හැකිතාක් ෂෙයාකරන්න.

The post චීන වෛරසය ලංකාවට එන්න කලින් ඒ ගැන දැනුවත් වෙන්න… appeared first on familylife.

ඉන්ෆ්ලුවෙන්සා උණ ආයිත් රටපුරා පැතිරෙන්න පටන් අරන් තිබෙන මේ දවස්වල බබාගේ ඇඟ රත්වේගෙන එනකොට අම්මාගේත් ඉහ මොළ රත්වෙන්න පටන් ගන්නවා. පාසැල, පෙර පාසැල විතරක් නෙවෙයි පොදු ප්‍රවාහන, පොදු ස්ථාන අපේම වැරදිවලින් රුකුල් අරගෙන මේ වගේ ලෙඩ හතර වටේට අරන් යන්න ඕනේ වෙලාවක සූදානම්. ඒ කොහොම වුණත් පුංචිම පුංචි දරුවන්ට වගේම ආච්චිලා සීයලාටත් මේ ලෙඩ රෝගවලට ඔරෝත්තු දෙන්න පුළුවන්කමක් නම් නැහැ කියලා තමයි වෛද්‍යවරු කියන්නේ. අන්න ඒ නිසාම ඉන්ෆ්ලුවෙන්සා උණ හදා ගන්නවට වඩා ඒකෙන් වැලකෙන්න උත්සාහ කරන එකයි වටින්නේ. ඒ වෙනුවෙන් දැනුවත් වීම තමයි මූලික වෙන්නේ.

මොකද්ද‍ මේ රට වටේ යන ඉන්ෆ්ලුවෙන්සාව‍

ඉන්ෆ්ලුවෙන්සා උණ ප්‍රභේද තුනක් තියෙනවා. ඒ

• ඉන්ෆ්ලුවෙන්සා A
• ඉන්ෆ්ලුවෙන්සා B
• ඉන්ෆ්ලුවෙන්සා A1H1

ඉන්ෆ්ලුවෙන්සා A, B කොහොම වුණත් 2009 වසරේ ඉඳලම ලෝකේ අධි වසංගතයක් විදියට පැතිරුණු දරුණු තත්ත්වය තමයි ඉන්ෆ්ලුවෙන්සා A1H1 කියන්නේ.

කොහොමද මේ ඉන්ෆ්ලුවෙන්සාව හැදෙන්නේ

වෛරසය ආසදිත වූ පුද්ගලයකුගේ සෙම, සොටු දියර, ශ්වසනය මගින් රෝගය නිරෝගි පුද්ගලයෙකුට වැළ‍‍දෙනවා. මේ වෛරසය ශරීර ගත වුණාම මූලිකවම බලපෑම් ඇති කරන්නේ ශ්වසන පද්ධතියට. වෛරසය නාසයෙන් සිරුරට ඇතුළු වෙලා නාසය උගුර ආශ්‍රිතව ආසදනයට ලක්කරනවා.

ඊට පස්සේ,

වෛරසය ආසාදනය වෙලා සතියකට විතර පස්සේ අපේ ප්‍රතිශක්තිකරණ පද්ධතිය ඊට විරුද්ධව ප්‍රතිදේහ නිපදවලා වෛරසය පාලනය කරනවා. ඉතිං සාමාන්‍ය හොඳ සෞඛ්‍ය තත්ත්වයක ඉන්න කෙනෙකුට නම් උණ පාලනය කරලා විවේක ගත්තොත් රෝගය සිරුරෙන්ම සුව අතට පත්කරනවා. නමුත් ශරීරය දුර්වල අයෙක්ට නම් වෛද්‍ය උපකාරය අවශ්‍යයි. වයස අවුරුදු 60ට වැඩි අයට වගේම අවුරුදු 5ට අඩු දරුවන්ටත් මේ තත්ත්වය ටිකක් බරපතල විය හැකියි.

ඉන්ෆ්ලුවෙන්සා උණ රෝගයේදී පෙන්නුම් කරන රෝග ලක්ෂණ සාමාන්‍ය වෛරස් උණකදී පෙන්නුම් කරන රෝග ලක්ෂණ වලට බොහෝ දුරට සමානයි. ඒ කියන්නේ සෙම්ප්‍රතිශ්‍යව, නාසයෙන් සොටු දියර ගැලීම, ඇඟ පතේ මෙන්ම හිසේ වේදනාව, ඇස් රතු වීම වගේ ලක්ෂණ. ඒත් ඉන්ෆ්ලුවෙන්සා තත්ත්වයේදී මේ රෝග ලක්ෂණ, වෛරස් උ‍ණ තත්ත්වයේදීට වඩා බොහොම තදින් ඒ කියන්නේ දරුණු විදියට පෙන්නුම් කරනවා.

ඉන්ෆ්ලුවෙන්සා රෝග ලක්ෂණ

• අධික උණ
• මස්පිඩු වේදනාව
• තදබල හිසේ වේදනාව
• ඇස් ආශ්‍රිත ආසදන
• වමනය/පාචනය
• අප්‍රාණික බව

ඉන්ෆ්ලුවෙන්සා තත්ත්වයට ප්‍රතිකාර නැද්ද?

ඉන්ෆ්ලුවෙන්සාවේදී සාමාන්‍ය සෞඛ්‍ය තත්ත්වයේ සිටින අයෙක් නම් වෛරස උණ තත්ත්වයේදී වගේම විජලනයට ලක් වීම වළක්වා ගැනීම සඳහා වැඩිපුර දියර වර්ග ලබාගනිමින් වි‍වේකීව කාලය ගත කිරීම අත්‍යවශ්‍යයි. ඒ වගේම උෂ්ණත්වය පාලන කිරීම සඳහා පැරසිටමෝල් ලබාගත හැකියි. දින තුනක් ගත වුණත් උණ තියෙනවා නම් වෛද්‍ය උපදෙස් මත රුධිර පරීක්ෂාවකට යොමු විය යුතුයි.

ඒත් වයස අවුරුදු පහට අඩු කුඩා දරුවන්, වයස අවුරුදු 60 වැඩි වැඩිහිටියන්, ගැබිනි කාන්තාවන් වගේම ප්‍රතිශක්තිකරණ පද්ධතියේ ගැටලු තියෙන අය නම් මේ තත්ත්වයේදී මුල ඉඳලම වෛද්‍ය උපදෙස් මත කටයුතු කිරීම අවශ්‍යයි.

ඉන්ෆ්ලූවෙන්සා උණ පැතිරෙන එක වළක්ව ගන්න බැරිද?

බැරි නැහැ. ඒත් ටිකක් අපහසුයි. ඒකට අපි කවුරුත් කල්පනාකාරී වෙන්න ඕනේ. ඕනෑම බෝවන රෝගයකදී අනෙක් අය ගැනත් හිතලා සැලකිලිමත් වෙනවා නම් රෝග පැතිරීමේ අවදානම අවම කරගන්න පුළුවන්. ඉන්ෆ්ලුවෙන්සා උණ රෝග තත්ත්ව පැතිරීම අවම කරගන්න නම්,

• සම්පූර්ණයෙන් සුව වන තුරු වැඩිහිටි ඔබ රැකියාවට යාම, පොදු ස්ථානවල ගැවසීම නතර කරන්න
• රෝගී දරුවන් පෙර පාසැල් / පාසැල් යැවීම නොකරන්න
• මුඛ ආවරණයක් භාවිත කරන්න.
• රෝගය සීග්‍රයෙන් පැතිර යන කාලයේදී පොදු ස්ථානවල ගැවසීම හැකිතාක් අවම කරන්න
• පොදු ස්ථානවල පොදු ප්‍රවාහන සේවාවල ගමනාගමනයෙන් පසු හොඳින් පිරිසිදු වන්න
• තමාගේ පරිහරණය සඳහා ලේන්සු / ටිෂූ කඩදාසි / තුවා වෙන්කර තබාගන්න
• ආසදිත පුද්ගලයෙකුගේ පිඟාන / කෝප්පය භාවිත නොකළ යුතුය.
• ලේන්සුවක් / ටිශූ කඩදාසියක් නොමැති අවස්ථාවක රෝගී ඔබ කිවිසීම සඳහා වැලමිට භාවිත කිරිම මගින් ආසදනය ව්‍යාප්ත වීමේ අවදානම අවම කරගත හැක.

අද වන විට ඉන්ෆ්ලූවෙන්සා රෝගය සඳහා වූ එන්නත පෞද්ගලික අංශයේ රෝහල් වෙතින් ලබාගත හැකි අතර ඔබේ වෛද්‍යවරයා හමු වී අවශ්‍ය නම් ඒ පිළිබඳව උපදෙස් ලබාගන්න.

මෙම ලිපිය සැකසීමේදී සිය දැනුම නොමසුරුව ලබා දෙමින් දඹුල්ල මූලික රෝහලේ වෛද්‍ය ඒ. එම්. එස් පතිරණ මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ඉන්ෆ්ලුවෙන්සා උණ ආයෙත් ඇවිත් – පරිස්සටම මේ දේවල් කරන්න appeared first on familylife.

ලංකාව පුංචි රටක්. දැනටමත් මිලියන 20කට අධික ජනගහනයක් ජීවත් වෙන, ණය බරත් අඩුවකින් නැතුව තිබෙන රටක් විදියට උපත් පාලනය අපේ රටට වැදගත් මාතෘකාවක්.

ඉස්සර පඩි පෙල දිගට ළමයි හැදුවත් අද අපේ තරුණ අය දරුවන් දෙදෙනෙකුට වඩා හදන්නේ කලාතුරකින්. හුඟක් කාන්තාවන් සාමාන්‍යයෙන් වයස 35-40 වන විට අවශ්‍ය දරුවන් බිහිකර අවසන්. ඉතින් ආර්තවහරණය වන තුරු තවත් වසර 10-15ක් දක්වා යම් උපත් පාලන ක්‍රමයක් අත්‍යාවශ්‍යයි.

තමන් බලාපොරොත්තු වෙන ප්‍රමාණයට වඩා දරුවන් බිහි කිරීමෙන් ප්‍රශ්න ‍ගොඩක් ඇති වෙනවා. මූලිකව පවුල් බර වැඩිවීම නිසා ආර්ථික තත්වය කඩා වැටෙනවා. වැඩියෙන් මුදල් අවශ්‍ය නිසා දවසේ වැ‍ඩි වේලාවක් දෙමව්පියන්ට රැකියා වලට කොටුවන්නට සිදුවෙනවා. මේ නිසා දෙමව්පියන්ට දරුවන් සමඟ ගත කරන්නට ඇති කාලය විශාල වශයෙන් අඩුවෙනවා.

දරුවෙකුට තම ජීවි‍තයේ මුල් දශක දෙක දෙමව්පියන්ගේ ඇසුර ලැබීම ඉතාමත් වැදගත්. මෙවැනි දෙමව්පිය ආදරයෙන් ගිලිහෙන දරුවන් පසුකාලීනව සමාජයට බරක් වීමේ වැඩි ප්‍රවණතාවයක් තිබෙනවා. දරු‍වන් සංඛ්‍යාව වැඩි වන විටද දරුවන්ට ලැබෙන අවධානය අඩු වෙනවා. මේ නිසා අවසානයේ පවුලක් වශයෙන් තෘප්ති‍යක් නැති වෙනවා.

ඉතින් තමන් බලාපොරොත්තු වන දරු‍වන් සංඛ්‍යාව ලැබී පවුල සම්පූර්ණ වීමෙන් අනතුරුව ස්ථිර උපත් පාලන ක්‍රමයක් සඳහා යෑම වැදගත් බව ඔබට තේරෙනවා ඇති.

ඉතින් අද “ඔබට සුදුසුම උපත් පාලන ක්‍රමය” ලිපි පෙලේ අවසන් ලිපියෙන් කතා කරන්නේ පවුල සම්පූර්ණ කර ගැනීමෙන් අනතුරුව භාවිතා කළ හැකි ස්ථීර උපත් පාලන ක්‍රම නැත්නම් වන්ධ්‍යකරණය (Sterilization) ගැනයි. 

ස්ථීර උපත් පාලන ක්‍රම වර්ග ප්‍රධාන වශයෙන් දෙකකි.

1. කාන්තාවන්ගේ පැලෝපීය නාල විච්ඡේදනය (Ligation & Resection of Tubes)
2. පුරුෂයින්ගේ වාසෙක්තමි ශල්‍යකර්මය (Vasectomy)

මේවා අතරින් වඩාත්ම සුලභ ස්ථීර උපත් පාලන ක්‍රමය වන්නේ කාන්තාවන්ගේ පැලෝපීය නාල වි‍ච්ඡේදනයයි. මීට හේතුව සිසේරියන් ශල්‍යකර්මයක් අතරතුරදී පහසුවෙන් මෙය සිදු කළ හැකි නිසා.

පැලෝපීය නාල විච්ඡේදනය කියන්නේ මොකද්ද?

» ස්ත්‍රී ප්‍රජනක පද්ධතියේ ගර්භාෂය ඩිම්බ කෝෂ දෙකට දෙපසින් සම්බන්ධ‍ වන්නේ පැලෝපීය නාල හරහායි. ඩිම්බ කෝෂ මඟින් මසකට වරක් මාරුවෙන් මාරුවට නිකුත් කරන ඩිම්බ ගර්භාෂය වෙත ගෙන එන්නේ මේ පැලෝපීය නාල හරහායි. ඉතින් මේ ශල්‍යකර්මයේදී සිදු වන්නේ ඉහත කී පැලෝපීය නාල දෙක මැදින් කපා ගැට ගැසීමයි. එමඟින් නිකුත් වෙන ඩිම්බ ගර්භාෂයට පැමිණෙන්නේ නෑ. ඉතින් කළලයක් ඇති වන්නට අවකාශයක් නෑ. මෙය පහසුවෙන් සිසේරියන් සැත්කමකින් දරුවෙකු බිහි කරන විට සිදු කළ හැකියි. ඊට අමතරව laparoscopic surgery එකක් ආකාරයටද කළ හැකියි.

පැලෝපීය නාල විච්ඡේදනය ආපසු යථා තත්වයට පත් කළ හැකිද?

• පැලෝපීය නාල නැවත සම්බන්ධ කර යථා තත්වයට පත් කළ හැකියි. නමුත් මෙය සාර්ථක වීම බොහොම අඩුය.

පැලෝපීය නාල විච්ඡේදනය කර ගන්නට අවශ්‍ය නම් සිදු කළ යුත්තේ කොහොමද?

• පහසුම ක්‍රමය ඔබ අවසාන දරුවා සිසේරියන් සැත්කමකින් බිහි කරනවා නම් එයට පෙර පැලෝපීය නාල විච්ඡේදනය සඳහාද ලිඛිතව කැමැත්ත ලබා දීමයි. ඔබ සියලු දරුවන් සාමාන්‍ය ආකාරයට බිහි කළා නම් ඔබට රජයේ රෝහලක නාරිවේද සායනයක් හරහා ඉහත ශල්‍යකර්මය සිදු කර ගැනීමට හැකියාව තිබෙනවා. මෙහිදී පහත කරුණු සැපිරිය යුතුයි.
• පවුල සම්පූර්ණ විය යුතුයි (ළමයි 3 දෙනෙක්)
• කාන්තාව සහ ස්වාමි පුරුෂයාගේ ලිඛිත කැමැත්ත

දෙවන ස්ථීර වන්ධ්‍යකරණය ක්‍රමය වාසෙක්තමි ශල්‍යකර්මයයි. කලාතුරකින් සිදු කෙරේ.

වාසෙක්තමි ශල්‍යකර්මය කියන්නේ මොකද්ද?

• පුරුෂයෙක්ගේ ශුක්‍රාණු නිපදවෙන්නේ වෘෂණ දෙක තුළ. මේවා vas deferens නැමැති ටියුබ දෙකක් හරහා තමයි පිටතට ගෙන එන්නේ. ඉතින් මෙම ශල්‍යකර්මයේ සිදුවන්නේ ඉහත vas deferens නමැති ටියුබ දෙක කපා ගැට ගැසීමයි. කොන්ඩම වලට අමතරව පුරුෂ‍යින් සඳහා ඇති එකම උපත් පාලන ක්‍රමය වාසෙක්තමි ශල්‍යකර්මයයි.

වාසෙක්තමි ශල්‍යකර්මය ආපසු යථා තත්වයට පත් කළ හැකිද?

• නොහැකියි.

වාසෙක්තමි ශල්‍යකර්මය කර ගන්නට අවශ්‍ය නම් සිදු කළ යුත්තේ කොහොමද?

• මෙය රජයේ රෝහලක ශල්‍ය වෛද්‍ය සායනයකින් හෝ මෞත්‍ර ලිංගික ශල්‍ය වෛද්‍ය (genitourinary surgery) සායනයක් හරහා සිදු කරගත හැකියි.

මෙම ලිපියෙන් “ඔබට සුදුසුම උපත් පාලන ක්‍රමය” ලිපි පෙල අවසන් වෙනවා. මේ ලිපි‍ පෙල අවසන් වනතුරු රැඳී සිට අදහස් දැක්වූ ඔබ සැමට ස්තූතියි.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ස්ථිර උපත් පාලන ක්‍රමයක් සම්පූර්ණ පවුලකට වැදගත් වන්නේ ඇයි? appeared first on familylife.

පෝෂණය කියන්නේ සෞඛ්‍යමත් ජීවිතයකට වැදගත්වන්නාවූ ප්‍රධාන සාධකයක්. බඩගිනි දැනුනම ඕනෑම දෙයක් කටට දාගන්නවට වඩා අපි ආහාර ලෙස ලබාගන්නා දේවල් පෝෂණීය වුණොත් අපිට ලැබෙන ප්‍රයෝජන අති විශාලයි. මේ නිසාම අලුත උපන් දරුවාගේ සිට මිය යන මහල්ලා දක්වාම අපි පෝෂණය කරන්නට විවිධ දෑ සිදුකරනවා.

අම්මලා තාත්තලා විදිහට අපිට නම් දැන් තියෙන ප්‍රධාන පෝෂණ ගැටලු වන්නේ අලුත උපන් දරුවාට මව්කිරිවලින් ලැබෙන පෝෂණය ප්‍රමාණවත්ද? අමතර ආහාර වලින් ලැබෙන පෝෂණය ප්‍රමාණවත්ද? වගේ දේවල්. මේ නිසාම ලිපි පෙලක් යටතේ අලුත උපන් දරුවාගේ සිට ක්‍රමයෙන් වැඩෙන දරුවාගේ පෝෂණ අවශ්‍යතා පිළිබඳ Familylife.lk සුව පියස හරහා ඔබව දැනුම්වත් කරන්න අප අදහස් කළා.

මේ එහි පළමු වැන්න වන අතර ඉන් මව්කිරි සම්බන්ධ අපේ අම්මලාට ඇතිවන ගැටලු රාශියකට පිළියම් ලැබෙනු ඇති බවට අපේ විශ්වාසයයි.

ඉපදී පළමු පැයේදී ස්ථාපිත කරන මවුකිරි

ලොව සියලුම රටවල වෛද්‍ය විද්‍යාත්මකව, පෝෂණය සම්බන්ධව හා සෞඛය සම්බන්ධව පවතින අංශ සියල්ලන්ම 100%ක්ම පිළිගත් දෙයක් වන්නේ අලුත උපන් දරුවෙකුට මාස හයක් ගතවන තුරුම මව්කිරි පමණක්ම ලබා දිය යුතු බවයි. එය ලෝක සෞඛ්‍ය සංවිධානය, යුනිසෙෆ් ආයතනය, එක්සත් ජාතීන්ගේ සංවිධානය හා ලොව සියලුම රටවල් එක හෙලාම ඒකමතිකව පිළිගෙන ඇත්තේ විද්‍යාත්මක සාක්ෂි මතයි.

දරුවෙකු මෙළොව ඉපදී පළමු පැය ඇතුලත ස්ථාපනය කරන මව්කිරි මාස හයෙන් පසු අනෙකුත් ආහාර ලබා දෙන අතරතුරද දරුවාට ලබා දිය යුතුවෙයි. සාමාන්‍යෙයන් මෙය දරුවාට අවුරුදු 2ක්වත් යනතුරු ලෙස දක්වයි. ප්‍රායෝගික බාධාවන් ලෙස මව රැකියාවක නිරත වෙන්නේ නම් ප්‍රසූත නිවාඩු අවහර වන නිසා මුල් මාස හය මවුකිරි ලබා දීම අඩාල වන්නට ඉඩක් පවතිනවා. නමුත් එයට විසදුම් ලෙස පවුල් සෞඛ්‍ය සේවා නිළධාරිනියන්ගේ උපදෙස් මත මවුකිරි දොවා තබා යෑමේ හැකියාවක් පවතිනවා.

එසේම ඇතැම් සේවා ස්ථානවල කිරි පැය ලෙස මවුකිරි ලබා දීමට පහසුකම් ලබා දී තිබෙනවා. අලුත උපන් දරුවෙකුට පළමු පැය තුළ මවුකිරි ලබා දීම අනිවාර්යෙන් සිදු කෙරෙන අතර මව සිසේරියන් සැත්කමකට ලක්වී සිහි නොමැති තත්ත්වයක සිටියද දරුවාට කෙසේ හෝ ඉපදී පළමු පැය ගතවීමට පෙර මවුකිරි ස්ථාපිත කිරීමට සෞඛ්‍ය සේවකයින් ගත හැකි උපරිම ක්‍රියාමාර්ග ගනු ලබයි.

මවුකිරි දරුවෙකුට වැදගත් ඇයි?

දරුවට අවශ්‍ය සියලුම පෝෂණ සංඝටක අවශ්‍ය ප්‍රමාණයට මවුකිරිවල අඩංගුය. මව ආහාරයට ගන්නා දේවල්වල පෝෂණ තත්ත්වය අඩු වැඩි වුවත්, දරුවාට අවශ්‍ය පෝෂණ සංඝටක සියල්ල මවුකිරි වල අඩංගු වෙනවා. ඒ නිසා, “ මම මන්ද පෝෂණයෙන් පෙලෙන මවක්, මම දුර්වලයි” කියලා බබාට මවුකිරිවලින් ලැබෙන පෝෂණය මදියි කියලා කිසිම මවක් සිතිය යුතු නැහැ. මවගේ පෝෂණ තත්ත්වය කුමක් වුවත් දරුවාට අවශ්‍ය සියලුම පෝෂණය මවුකිරි කියන ජීවී කිරෙන් නිපද වීමට තරම් සොබාදහම විශ්මිතයි.

මවකගෙන් මවකට තමන්ගේ දරුවාට නිපදවෙන මවුකිරිවල සංඝටක වෙනස් වීමේ හැකියාවක් තිබෙනවා. උදාහරණයක් ලෙස නිර්මාංශ මවකගේ සිරුරෙන් නිපදවෙන මවුකිරිවල සංඝටක මාංශ අනුභව කරන මවකගේ සිරුරේ නිපදවෙන මව්කිරිවල අඩංගු සංඝටක සමඟ සුලු වෙනස්කම් දැක ගත හැකියි. සාමාන්‍යයෙන් නිර්මාංශ මවකගේ මවුකිරිවල අඩංගු මේද අම්ල වල සංයුතිය මාංශ අනුභව කරන මවකගේ මවුකිරිවල අඩංගු මේද අම්ලවල සංයුතියට වඩා වෙනස් කම් සුලුවෙන් දක්වනවා.

නමුත් මවක් නිර්මාංශ වීම සුදුසු නැති බවක් මින් අදහස් නොකරයි. නිර්මාංශ මවක් මේ ගැන අනවශ්‍ය බියක් ඇති කර ගෙන විවිධ පිටිකිරි වර්ග බීමට අවශ්‍යතාවක් මෙන් අදහස් නොකෙරෙයි. මවුකිරිවලින් දරුවෙකුට අවශ්‍ය සියලුම පෝෂණයන් ලැබෙන්නේ මාස හයක් යනතුරු පමණක් බව මතක තබාගත යුතු දෙයකි.

මන්දයත් මාස හයෙන් පසු එකදිගට මවුකිරි පමණක් ලබා දුනහොත් දරුවාට මන්දපෝෂණ තත්ත්වයක් ඇතිවීමේ අවධානමක් පවතියි. යකඩ ඌණතා, ශක්ති නැත්නම් කැලරි ඌණතා, විටමින් හා ඛනිජ ලවණ ඌණතා ඇති වීමේ අවධානමක් පවතියි. මාස හයෙන් පසු දරුවෙකු ශීඝ්‍ර වර්ධනයක් අත්පත් කරගන්නා බැවින් ආහාර හදුන්වා දීම අත්‍යාවශ්‍ය වේ.

මවුකිරි දරුවාට ප්‍රමාණවත්ද ? දැනගන්නේ කොහොමද?

සාමාන්‍යයෙන් හොඳ උපත් බරක් යැයි සැලකෙන උපත් බර කිලෝ 3 ½ක් තිබුණු දරුවෙක්ගේ බර මාස හයක් ගතවන විට දෙගුණ විය යුතුය. එනම් කිලෝ 7ක් පමණ විය යුතුය. දරුවාට නිසි පරිදි පෝෂණය ලැබෙන විට දරුවා අවුරුද්දක් වන විට උපත් බර තුන්ගුණයක් විය යුතුය. එනම් කිලෝ 10 ½ක් පමණ විය යුතුය.

මේ කාලයේදී දරුවාගේ උස වැඩිවීම බර වැඩිවෙන අයුරෙන් සිදු නොවෙයි. එය ක්‍රමාණුකූලව වැඩිවෙයි. මෙහිදී මවුවරු දැනගත යුතු විශේෂම දෙය වන්නේ ළමුන්ගේ වර්ධනය ඒ ඒ දරුවාට සුවිශේෂ ආකාරයකින් සිදුවන බවයි. මේ නිසා තමන්ගේ දරුවාගේ වර්ධනය අනෙක් දරුවන් සමග සන්සන්දනය නොකළ යුතු වෙයි. කළ යුත්තේ දරුවාට ලබා දී ඇති වර්ධන ප්‍රස්ථාර සටහනේ මාසෙන් මාසෙට බර කිරා ලකුණු කරන විට එය ක්‍රමානුකූලව ඉහලට යන්නේද යන්න සොයා බැලීමය.

දරුවාට පාචනය, උණ වැනි රෝග වලින් තොරව සිටියදී මවුකිරි මුල්මාස හයේ නිවැරදිව ලබා දුන්නේ නම් මෙම ප්‍රස්ථාර සටහන ක්‍රමානුකූලව ඉහලට ගමන්කරනු ලබයි. දරුවෙකුට මවුකිරි බීමට අවශ්‍යතාව මුල් කාලය තුළ පැයත් පැය තුනත් අතර තුර ඇතිවේ. ඒහැර කාල සටහනක් අනුව පැය දෙකෙන් දෙකට මවුකිරි දිය යුතුයැයි නියමයක් නොමැත.

එසේම දරුවා කිරි ඉල්ලා අඬන සෑම අවස්ථාවකදීම මවුකිරි ලබාදිය යුතුය. මවුකිරි ලබා දිය යුත්තේ දරුවාගේ අවශ්‍යතාවය මත මිස මවගේ අවශ්‍යතාව මත නොවේ. මවගේ පියයුරෙන් දරුවෙකුගේ කටට කිරි ගලා එන්නේ දරුවෙකු අඬන අවස්ථාවේදී හා කිරි උරාබොන අවස්ථාවේදී බව මතක තබා ගත යුතුය.

දරුවා දිනකට හය හත් වරක් මුත්‍රා පිට කිරීම දරුවා හොඳට කිරි බොන බවට මවට ලබා දෙන එකම සංඥාව වේ. එසේම කිරි බොන විට දරුවෙකුට නින්ද යන්නේ මවුකිරිවල ඇති ස්වභාවික රසායනයන් නිසාවෙනී. මන්දයත් දරුවාගේ ශීඝ්‍ර වර්ධනයට නින්ද අවශ්‍ය බැවිනි.

මීලඟට පියයුරු දෙකෙන්ම මාරු කරමින් කිරි ලබා දියයුතුවේ. කිරි ඉරීමේ කාලය තීරණය කරන්නේ දරුවාය. ඒ නිසා නිවැරදි ආකාරයට දරුවා පියයුරට ලංකර මවුකිරි ලබා දිය යුතුය. නොඑසේනම් කිරි ඉරීමේ අපහසුතාවය නිසා දරුවා කිරි ඉරීම අතහරියි. එසේම ඇතැම් දරුවන් තනපුඩුව ඉරීමෙන් යම් මානසික තෘප්තියක් ලබන බැවින් වැඩි වේලාවක් කිරි ඉරීම සිදුකළ හැකිය. ඒ හැර බලහත්කාරයෙන් කාලසටහනකට අනුව මවකට මවුකිරි දරුවාට පෙවීම සිදුකළ නොහැක. මවුකිරි ලබා දෙන විට නිවැරදි ආණතියට දරුවා රඳවා ගැනීමත්, දරුවාගේ කුසතුළ එකතුවෙන වාතය ඉවත් කරමින්( ගුඩුස් යැවීම) නිසි අයුරෙන් දරුවාට මවුකිරි ලබා දෙන්නේනම් දරුවා නිවැරදි ලෙස මවුකිරෙන් පෝෂණය වෙයි.

මුල් මාස හයේ මවුකිරි පමණයි

වැඩිහිටියන්ගේ දුර්මත හමුවේ රස්නේ කාලවලදී මාස 6ට අඩු ලමුන්ට වතුර පෙවීම සිදුකරනු දැකගත හැකියි. නමුත් එය නොකර යුතුම දෙයකි. කොත්තමල්ලි, තැඹිලි ආදි කිසිවක් මාස හයක් ඉක්මවන තුරු දරුවාට ලබා නොදිය යුතුය. වෛද්‍ය නිර්දේශමත යම් ඖෂධයක් ලබා දීමට සිදුවූවොත් හැර මාස හයක් ඉක්මවන තුරු වෙනත් කිසිදු පානයක් දරුවාට ලබා නොදිය යුතුය.

මන්දයත් මාස හයට අඩු දරුවන්ට වතුර වුවත් අපත්‍යවීමට හැකියාවක් පවතියි. එමෙන්ම අනෙක් දියරවර්ග දිරවීම සම්බන්ධ ගැටලු ඇතිවීමටත් ඒවා සමඟ ක්ෂුද්‍ර ජීවින් සිරුරට ඇතුලු වී විවිධ ලෙඩ රෝග ඇති වීමත් සිදුවිය හැකිය. මාස හය ගතවීමට පෙර මෙවන් දියර වර්ග දරුවාට ලබා දීමෙන් දරුවාගේ වර්ධනය අඩාල වීම සිදුවේ. ඒ වගේම දරුවාගේ මොළය වර්ධනයට මවුකිරි තරම් සුදුසු වෙනත් කිසිම නිෂ්පාදනයක් මෙලොව නොමැති බව මතක තබා ගත යුතුය.

දරුවා බුද්ධිමත් කිරීමට යැයි කියා වෙළඳ පොලේ අලෙවි වන පිටිකිරි වර්ග ලබා දීම අනවශ්‍ය බව මෙයින් වටහා ගත යුතුම වේ. සුවිශේෂී තත්ත්වයන් මත විශේෂඥ වෛද්‍යවරයෙක් නිර්දේශ කළ හොත් පමණක්ම දරුවෙකුට පිටිකිරි ලබාදීම සිදුකළ යුතු නමුත් මවක් හිතුමනාපෙට දරුවෙකුට පිටිකිරි ලබා නොදිය යුතුවෙයි.

මවුකිරි වලින් දරුවාට ලැබෙන වාසි

අනාගතයේ දරුවාට වැළදිය හැකි ලෙඩ රෝග ගණනාවකින්ම වැලැකීමට අවශ්‍ය ප්‍රතිශක්තිය මවුකිරි හරහා දරුවෙකුට ලැබෙයි. මුල් මාස හයේ මවුකිරි පමණක්ම පානය කළ දරුවෙකු ස්ථුල වන්නේ නැත. දියවැඩියාව, ඇතැම් පිළිකාවර්ග ( රුධිර ගත පිළිකා විශේෂ), හෘදයාබාධ, ශ්වසන රෝග, චර්ම රෝග, අසාත්මිකතා ආදී රෝග වැලදීමේ අවධානම අඩුවෙයි.

මීලඟට ඉහළම සෞඛ්‍ය ආරක්ෂිත බවක් මවු ujකිරිවලින් ලැබෙයි. පිටස්තරින් කිසිදු විෂබීජ දරුවාට මවුකිරි හරහා ගමන් නොකරයි. නමුත් පිටිකිරි ලබා දෙන විට විෂබීජ දරුවාගේ ශරීරයට ගමන් කරයි.

මුල් මාස හයේදී මවුකිරි පමණක් පානය කරන දරුවෙකුගේ බුද්ධිමට්ටම ඉතා ඉහළ බව පරීක්ෂණ වලින් තහවුරු කරගෙන ඇති දෙයකි.

මීලඟට මවගේ ආදරය හා ලබැඳියාව මවුකිරි ලබා දෙන අවස්ථාවේ දරුවාට ලැබෙන නිසා දරුවාගේ මානසික වර්ධනයත් ඉතා ඉහළ වේ. එය සමාජීය වශයෙන් ඉතා වැදගත් වේ.

මවුවරු අතර ඇති දුර්මත

අනේ අම්මේ මගේ බබාට කිරිමදි කියලා මට හිතෙනවා. මොකක්ද මම කරන්න ඕන? මේවගේ ප්‍රශ්න සමාජ මාධ්‍ය හරහා ඇති කරගෙන තිබෙන කණ්ඩයම් අතර නිතර දකින්නට ලැබෙනවා. ඇත්තටම මවකගෙන් එරෙන කිරි දරුවෙකුට මදි වෙනවාද? නැත. මවකගෙන් එරෙන කිරි දරුවෙකුට ප්‍රමාණවත් නොවන්නේ ඉතාම කලාතුරකිනී.

එනම් මවකගේ අන්තරාසර්ග ග්‍රන්ථිවල යම් ගැටලුවක් නැත්නම් හෝමෝන ගත ගැටලුවක් තිබේනම් පමණක් මෙම තත්ත්වය කළාතුරකින් ඇතිවෙයි. ඒ හැර මවකට ඇති පෝෂණ ගැටලු නිසා දරුවාට කිරි අඩුවීමක් සිදුවන්නේ නැත.

නමුත් දරුවෙකුට කිරි මදි යැයි හිතෙන්නට හේතුවන ප්‍රධාන සාධකය වන්නේ මවක් නියම ක්‍රමවේදයට දරුවාට මවුකිරි පෙවීම සිදු නොකිරීමයි. එනම් දරුවා නිවැරදි ඉරියව්වෙන් තබා පියයුරට දරුවාගේ කට ලඟා නොකර සිටීමෙන් දරුවාට කිරි උරා බීමට බාධාවන් ඇති වීමයි.

මීලගට අම්මලා අතර තියෙන දුර්මතයක් තමයි නාලා ඇවිත් කිරි දෙන්න හොඳ නැහැ කියන එක. කිරි සීතල වෙලා හෙම්බිරිසාව හැදෙයි කියලා ඇතැම් පැරණි මත දරණ අය මවුවරුන්ට උපදෙස් ලබා දෙනවා. නමුත් එහි කිසිදු සත්‍යතාවයක් නොමැත.

මනුෂ්‍යා යනු අචලතාපී සත්ත්වයෙකි. මිනිසාගේ ශරීර උශ්නත්වය වතුරේ බැස සිටියත් සැලකිය යුතු මට්ටමින් අඩුවීමක් සිදුවන්නේ නැත. තලගොයා, කබරයා වැනි සතුන්ගේ නම් ජලයේදී ශරීර උෂ්ණත්වය පහල යයි. නමුත් මනුෂ්‍යා ගේ එසේ නොවෙයි.

ඒ නිසා නෑමෙන් පසු මවුකිරි සීතල නොවේ. මවුකිරි රත් වෙන්නට යැයි කියා නෑමෙන් පසු උණු වතුර බීමෙන් කිසිවක් සිදුවන්නේ නැත.

මීලගට කුඩා මාලු වර්ග හාල්මැස්සන් වැනි දේ ආහාරයට ගැනීමෙන් මවුකිරි හරහා කුඩා කටු දරුවාට යන බවට ඇත්තේද දුර්මතයකි.

නමුත් මවක් මවුකිරි දෙන කාලය තුළ කෝපි, තේ වැඩි පුර පානය නොකළ යුතුය යන්නේ සත්‍යතාවක් පවතියි. කෝපි, තේ වල අඩංගු සංයෝග දරුවාට මවුකිරි හරහා යෑමෙන් දරුවාගේ නින්ද අඩුවෙන බව සොයාගෙන ඇත. ඒ හැර වෙන සෞඛ්‍ය ගැටලු ඇති නොවේ.

එසේම මධ්‍යසාර භාවිතයෙන් මවක් මවුකිරි ලබා දෙන කාලයේදී තොර විය යුතුය.

ඒ හැර බලමාලු අන්නාසි තක්කාලි ආදිය මවුකිරි ලබාදෙන කාලයේදී ආහාරයට නොගතයුතුය යන මතය බැහැර කළ යුත්තකි. මවකට එම ආහාර අසාත්මික නම් ඒවාගෙන් වැලැකිය හැකි අතර එය තීරණය කළ යුත්තේ මව විසින්මය. ආසාත්මික නොවේ නම් ඕනෑම ආහාරයක් ගත හැකි අතර අප අතර පවතින මතයක් අනුව කිරි එරීමට උදව්කරන කොස් පොලොස් ආදිය මෙන්ම ඕනෑම පෝෂණීය ආහාරයකින් කිරි එරීම වර්ධනය කරයි.

නිවැරදි ලෙස ආහාර ලබා ගන්නා මවකට විශේෂිත පිටි වර්ග හෝ විශේෂිත නිෂ්පාදනය කරන ලද කිරිවඩනවා යැයි සදහන් දෑ මිලදී ගැනීම අවශ්‍ය වන්නේ නැත. පලා වර්ග, ෆෝලික් අම්ලය, කැල්සියම් සහිත ආහාර ( මීකිරි, යෝගට්, චීස්,කුඩා මාලු, මුරුංගා කොළ, කතුරුමුරුංගා, පරිප්පු ආදිය) ගත යුතුය. එසේ නොවුණ හොත් මවගේ සිරුරේ කැල්සියම් අවම වී පසුකාලීනව දත්වල ගැටලු, අස්ථිවල ඝනත්වය අඩුවී ඔස්ටියෝපොරෝසිස් රෝගය වැළදිය හැකිය.

මව්කිරි ලබා දෙන මවකට ලැබෙන වාසි

• • මව්කිරි ලබා දෙන මවකට යලි ගර්භණී වන්නට පෙර තිබූ සිරුර යලි ලගාවීමේ හැකියාවක් පවතියි. (සෑම දරු උපතකින්ම පසු ගැබ්ගැනීමට පෙර සිටි දේහ ස්කන්ධය කිලෝ එකකින් වැඩිවන බව විද්‍යාත්මකව දක්වා තිබෙයි.)

• • ගර්භණී සමයේ ප්‍රසාරණය වූ ගර්භාෂය යථා තත්ත්වයට පත්වීම සිදුවේ. මෙයින් මීලඟ දරු උපතට අවශ්‍ය නිරෝගී ගර්භාෂය මවකගේ පිහිටයි.

• • මාස හයක් නොකඩවා මව්කිරි දුන් මවකට පියයුරු පිළිකා, ඩිම්බකෝෂ ගත පිළිකා ඇතිවීමේ අවධානම අඩුය.

• • දරු ප්‍රසූතියේදී රුධිරගලනයක් ඇතිවූ මවකගේ එම තත්ත්වය නතර වීමද මවුකිරි ලබා දීමෙන් සිදුවේ.

• • තාවකාලිකව ඔසප් චක්‍රය ප්‍රමාද වන බැවින් ස්වභාවික උපත් පාලනයක් සිදුවේ.( 100%ක් ස්ථිර පවුල් සැලසුම් ක්‍රමයක් නොවේ)

• දියවැඩියාව, අධිරුධිර පීඩනය ආදී රෝග වලක්වා ගත හැකිය.

සුවිශේෂී අවස්ථාවන්

උපත් බර අඩු දරුවෙකු එනම් කිලෝ 2 ½කට අඩු බරක් ඇති දරුවෙක්ට ඇතිවිය හැකි සංකූලතා පිළිබඳ සොයා බලා මවුකිරි සමඟ විටමිනයක් නිර්දේශ කිරීමට හැකිය. එය මවට ලබාදී මව හරහා දරුවාට ලැබෙන ලෙස හෝ සෘජුව දරුවාට ලබාදෙන ලෙස හෝ වෛද්‍යවරුන් නිර්දේශ කළ හැකිය.

එසේම වර්ධන සටහනේ බර අඩුවෙන බවක් මාස කිහිපයක් තුළ පෙන්නුම් කෙරේ නම් ඊට හේතුව සොයා බලා පරික්ෂා කර අදාල වෛද්‍ය උපදෙස් ලබා දෙනු ඇත. දරුවාගේ වර්ධන සටහනේ කුමක් පෙන්වූවත් එයට ගත යුතු පිළියම සැම විටම වෛද්‍යවරයෙකු විසින් නිර්දේශ කළ යුත්තක් විය යුතුය.

මෙම ලිපිය සැකසීමේදී සිය දැනුම නොමසුරුව ලබා දෙමින් වයඹ විශ්ව විද්‍යාලයේ මානව පෝෂණය පිළිබඳ ජ්‍යෙෂ්ඨ කථිකාචාර්ය, ආචාර්ය රේණුක සිල්වා මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post සුව දිවියයි – පෝෂණයයි (1 කොටස) ~ මවුකිරි නම් පෝෂණයේ අත්තිවාරම appeared first on familylife.

“මචන් මම මේ කතා කළේ පොඩි විස්තරයක් දැනගන්න. බිසීද?”

නිදා ගන්න ඔන්න මෙන්න ඉන්න කොට කෝල් එකක් ආවේ ඊයේ විවාහ උන ලඟම යාලුවෙක් ගෙන්.

නෑ කියන්න. මොකද්ද කේස් එක?

“මචන් දන්න‍වනේ දැන්ම අපේ ළමයි හදන්න අදහසක් නෑ. මට වත් එයාටවත් බැඳපු ගමන් ළමයි හදාගෙන වාත කරගන්න බෑ. අපි බැලුවේ අවුරුද්දක් වත් මෙහෙම ඉන්න.”

ඔව් මට තේරෙනවා. පවුලක් හරියට සැලසුම් නොකළොත් ජීවිතේම විඳවන්න වෙන්න පුලුවන්.

“මට අවුරුද්දක් වෙනකන් birth control කරන්න විදියක් suggest කරන්න පුලුවන්ද? ඔයාලා ඉතින් ඕවා හොඳට දන්නවනේ. කොන්ඩම් ගැන නම් කියන්න එපා ඒකට අපි හොයන්නේ ඊට වැඩිය ලේසි දෙයක්.”

මේ වගේ දුරකථන ඇමතුම් කීපයක්ම මට පසුගිය දවස් වල ආවා. ඒ අයට මම වගේ වෛද්‍යවරයෙක් ලඟම මිතුරෙක් උන නිසා මේ වගේ ගැටලුවක් දුර දිග යන්නට කලින් නිවැරදි තොරතුරු දැන ගන්න හැකියාවක් ලැබුනා. නමුත් සමහරු බැඳලා මාස 9 යනකොට ළමයි ඉපදිලත් ඉවරයි. ඉතින් ජීවිත කාලයක් මේ නොහිතා ගත්ත තීරණය ගැන වද වෙනවා. ඉතින් ඔබට සුදුසුම උපත් පාලන ක්‍රමය ලිපි පෙලේ දෙවැනි ලිපියෙන් සාකච්ඡා කරන්නේ ඔබ ලඟදි විවාහ උන කෙනෙක් නම් පවුල් සැලසුම් කළ යුතු ආකාරය පිළිබඳවයි.

මේ ගැන විස්තර ගන්න පුලුවන් කාගෙන්ද?

» පවුල් සෞඛ්‍ය නිලධාරිනියන් (midwife) කෙනෙක් ර‍ටේ සෑම MOH කොට්ඨාශයකම ගමක් ගානේ වෙන් කරලා යොදවලා තියෙන්නේ මේ දැනුම අලුතින් විවාහ උන අයට වගේම වෙනත් ඕනෑම කෙනෙකුට ලබා දෙන්න. මීට අමතරව රජයේ රෝහල් වල අදාළ ඒකක වලිනුත් මෙම දැනුම ලබා ගන්නට හැකියාව තියෙනවා. මීට අමතරව පවුල් සෞඛ්‍ය කාර්යාංශය (Family Health Bureau) නම් රජයේ ආයතනයත් ප්‍රජනක සෞඛ්‍යයට අදාල දැනුම සහ පහසුකම් සළසා දෙන්න වෙන් උන ආයතනයක්.

විවාහ උන ගමන් භාවිතා කළ හැකි උපත් පාලන ක්‍රම මොනවාද?

» උපත් පාලන ක්‍රම ප්‍රධාන වශයෙන් තාවකාලික ක්‍රම හා ස්ථීර ක්‍රම ලෙස වෙන් කෙරෙනවා. මෙවැනි යුවලකට ඉදිරි දිනෙක දරුවෙක් බලාපොරොත්තු වන නිසා අනිවාර්යයෙන්ම තාවකාලික ක්‍රමයක් භාවිතා කළ යුතුයි.

තාවකාලික උපත් පාලන ක්‍රම යටතේ,

1. ශුක්‍රාණු ඇතුල්වීම අවහිර කරන ක්‍රම : (පුරුෂ හා ස්ත්‍රී කොන්ඩම්)

2. හෝමෝනමය ක්‍රම

3. ගර්භාෂය අභ්‍යන්තරයට ඇතුල් කරන උපාංග (Intra Uterine Devices)

ඔබේ අවශ්‍යතාවය අනුව ඔබට සුදුසුම උපත් පාලන ක්‍රමය ඉහත සඳහන් එකකින් ඕනෑම එකක් වෙන්න පුලුවන්. එක් එක් ක්‍රම වල වාසි අවාසි විවිධයි. ඉතින් එකින් එක මම පැහැදිලි කරන්නම්.

1. ශුක්‍රාණු ඇතුල්වීම අවහිර කරන ක්‍රම : (පුරුෂ හා ස්ත්‍රී කොන්ඩම්)

» මෙහිදී වෙන්නේ ලැටෙක්ස් වලින් සාදපු කොපුවක් මඟින් ශුක්‍රාණු යෝනි මාර්ගයට ඇතුල් වීම වැලැක්වීමයි. මේ ගැන මම පළමු වැනි ලිපියෙන් සාකච්ඡා කළා.

නමුත් භාවිතයේදී ඇති අපහසුතාවය නිසා සහ අමතක වීමට ඇති ඉඩකඩ නිසා හුඟක් අය මේ ක්‍රමයට වැඩි කැමැත්තක් දක්වන්නේ නෑ.

2. හෝමෝනමය ක්‍රම

» මෙහිදී වෙන්නේ ස්ත්‍රී ප්‍රජනක පද්ධතියට අදාළ හෝමෝන පිටතින් ලබා දීමයි. මෙමඟින් ගර්භාෂ‍ය පිළිසිඳ ගැනීමක් ඇති නොවන ආකාරයට සකස් කිරීම සහ ඩිම්බ නිපදවීම තාවකාලිකව නතර කිරීම සිදු වෙනවා. ලබා ගත හැකි ආකාර කීපයක් තිබෙනවා.

a. ගිලින පෙති : දිනකට එක බැඟින් ගත යුතු දවස් 28ක ආර්තව චක්‍රයක් ඇති වන පරිදි හෝමෝන අඩංගු කර නිපදවා ඇති පෙති වර්ගයකි. වෙළඳපොලේ ඇති ජනප්‍රියම පෙති වර්ගය මිතුරි වේ.

වාසි : 

» දින 28කට වරක් ආර්තව චක්‍රය ක්‍රමවත්ව සිදුවීම
» ආර්තවයේදී ඇතිවන වේදනාව සහ රුධිර ගලනය අඩුවීම
» ස්ත්‍රී ප්‍රජනක පද්ධතිය ආශ්‍රිත පිළිකා ඇතිවීමේ අවදානම අඩුවීම
» මිලෙන් අඩුය

අවාසි :

» ලිංගිකව ‍සම්ප්‍රේෂණය විය හැකි රෝග වලින් ආරක්ෂාවක් නැත
» පෙති දිනපතා ගැනීමට සිදුවීම නිසා අමතක වීමට ඇති හැකියාව
» වමනය, ඔක්කාරය, කැරකිල්ල වැනි අතුරු ආබාධ (සුලු ප්‍රමාණයකට)
» දේහ බර වැඩිවීමට ඇති හැකියාව

බෙහෙත් නතර කර මාසයකින් නැවත පිළිසිඳ ගැනීමක් බලාපොරොත්තු විය හැකිය.

b. එන්නත් : සාමාන්‍යයෙන් මාස තුනකට වරක් අතේ ඉහළ බාහුවට එන්නත් කරන බෙහෙතකි. වෙළඳපොලේ ඇති ජනප්‍රියම වර්ගය Depo-Provera වේ.

වාසි : 
» එන්නත් ලබා ගත යුත්තේ මාස තුනකට වරක් පමණි.

අවාසි :
» ලිංගිකව ‍සම්ප්‍රේෂණය විය හැකි රෝග වලින් ආරක්ෂාවක් නැත
» ආර්තවය සම්පූර්ණයෙන් නතරවීමට හැකිය (බෙහෙත භාවිතා කරන කාලය තුළ)
» දේහ බර වැඩිවීමට ඇති හැකියාව
» වෛද්‍යවරයෙකු විසින් ලබා දිය යුතුයි

බෙහෙත් නතර කර නැවත පිළිසිඳ ගැනීමක් ඇතිවීමට මාස 3ක් ගතවිය හැක.

c. සම යටට ඇතුල් කරන කරල් : මේවා බොහෝදුරට වසර තුනක් පමණ දීර්ඝ කාලයක් භාවිතා කළ හැකියි. වෛද්‍යව‍රයෙකු විසින් අතේ ඉහළ බාහුවේ සම යටට කැපුමක් හරහා අදාළ ඖෂධය අඩංගු කරල් දෙකක් ඇතුල් කිරීම සිදු කරයි. වෙළඳපොලේ ඇති ජනප්‍රියම වර්ගය Jadelle වේ.

වාසි : 
» වසර තුනක් වැනි කාලයකට උපත් පාලනය සිදුවේ

අවාසි :
» ලිංගිකව ‍සම්ප්‍රේෂණය විය හැකි රෝග වලින් ආරක්ෂාවක් නැත
» ආර්තවය සම්පූර්ණයෙන් නතරවීමට හැකිය (බෙහෙත භාවිතා කරන කාලය තුළ)
» දේහ බර වැඩිවීමට ඇති හැකියාව
» ඉවත් කළ හැක්කේ වෛද්‍යවරයෙකුට පමණි
» මිල තරමක් වැඩිය

බෙහෙත් ඉවත් කර නැවත පිළිසිඳ ගැනීමක් ඇතිවීමට මාස 6-12ක් ගතවිය හැක.

3. ගර්භාෂය අභ්‍යන්තරයට ඇතුල් කරන උපාංග (Intrauterine Devices)
‍

මෙය සාමාන්‍ය ජනවහරේ ලූපයක් ලෙස හැඳින්වේ. මෙය වෛද්‍යවරයෙකු විසින් ගර්භාෂයේ අභ්‍යන්තරයේ රඳවන උපාංගයකි. වසර 5-10 අතර කාලයක් භාවිතා කළ හැකිය. වර්ග දෙකකි.

a.  Copper T ලූපය : මෙහි ඇති කොපර් ලෝහය මඟින් ශුක්‍රාණු විනාශ වේ. මෙහි හෝමෝන අඩංගු නැත.
b.  හෝමෝන අඩංගු ලූපය (Mirena) : මෙහි ඇති හෝමෝන මඟින් ගර්භාෂ‍ය පිළිසිඳ ගැනීමක් ඇති නොවන ආකාරයට සකස් කිරීම සිදු වෙනවා.

වාසි : 
» වසර 5-10ක් වැනි කාලයකට උපත් පාලනය සිදුවේ

අවාසි :
» ලිංගිකව ‍සම්ප්‍රේෂණය විය හැකි රෝග වලින් ආරක්ෂාවක් නැත
» අනවශ්‍ය ආකාරයට රුධිර ගලනයන් සිදුවිය හැකියි
» ලූපය හදිස්සියේ ඉවත්වීම සිදුවිය හැකියි
» මාසිකව ලූපය නිවැරදිව ස්ථානගතව ඇත්දැයි පරික්ෂා කර බැලිය යුතුයි
» ඉවත් කළ හැක්කේ වෛද්‍යවරයෙකුට පමණි

හෝමෝන අඩංගු ලූපය :
» ආර්තවය සම්පූර්ණයෙන් නතරවීමට හැකිය (බෙහෙත භාවිතා කරන කාලය තුළ)
» දේහ බර වැඩිවීමට ඇති හැකියාව
» මිල අධිකය

හෝමෝන සහිත ලූපය ඉවත් කර නැවත පිළිසිඳ ගැනීමක් ඇතිවීමට මාස 6-12ක් ගතවිය හැක.

‍මේ ඕනෑම උපත් පාලන ක්‍රමයක් ඔබේ MOH කොට්ඨාශයේ පවුල් සෞඛ්‍ය නිලධාරිනිය හරහා අදාළ සායනයෙන්, සියලුම රජයේ රෝහල් වලින් සම්පූර්ණයෙන්ම නොමිලේ ලබා ගත හැකි අතර පුද්ගලික අංශයෙන් මුදල් ගෙවා ලබා ගත හැකියි.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post උපත් පාලනය ගැන අලුත විවාහ වුනු අය දැනගත යුතුම දේවල් appeared first on familylife.

“පාටියට ආපු තරුණියන්ගේ බෑග්වල උපත් පාලක කොපු”
පොලිස් කූඩුවේ නැවතුණු ෆේස්බුක් සොමියේ තවත් තොරතුරු හෙළිවෙයි.

පසුගියදා ලෙඩ්ඩු බලල ඉවරවෙලා ෆෝන් එකෙන් නිව්ස් බල බල හිටපු මම එක්තරා ජනප්‍රිය ප්‍රවෘත්ති වෙබ් අඩවියක දුටු සිරස්තලයක්. සිරස්තලයෙන් ප්‍රවෘත්තිය මොකද්ද කියලා හිතා ගන්න බැරි නිසාම කියවලා බැලුවා. ප්‍රවෘත්තිය කියවලා බැලුවාම එතන ඇත්තටම වැරැද්ද මත්ද්‍රව්‍ය සම්බන්ධ එකක්. නමුත් ඒ අතර උපත් පාලන කොපු වගයකුත් පරික්ෂා කිරීමේදී හමුවෙලා තිබුනා.

ඇත්තටම උපත් පාලන කොපු ලඟ තබා ගැනීම වැරදිද? මෙවැනි සිරස්තලයක් නිර්මාණය කරන්න තරම් එය ලොකු දෙයක් උනේ කොහොමද?

පෙබරවාරි මාසයේ වැලන්ටයින් එකත් එක්ක මේ ගැන ලොකු කතාවක් වෙන නිසා වෛද්‍යවරයෙක් විදියට මේ කතාබහට යමක් එකතු කරන්නේ නොකියා ඉන්න බැරි නිසයි. තරමක සංවෘත ස්වභාවයක් සහිත ලාංකික සංස්කෘතියේ ලිංගිකත්වයට තවමත් ලැබිය යුතු තරමේ අවධානයක් නොලැබෙන බව කණගාටුවට කරුණක්. උපත් පාලන ක්‍රම ගැන විවිධ ආකාරයේ ලිපි ලියැවිලා තිබුනත් ප්‍රායෝගික භාවිතයට අනුව එම ක්‍රම වෙන් කරලා ලියැවුන ලිපි මම දැකලා නෑ.

ඉතින් අද කියන්න යන්නේ තරුණ, පවුලක් සම්පූර්ණ කර නැති අයට භාවිතා කළ හැකි ජනප්‍රියම තාවකාලික උපත් පාලන ක්‍රමය වන කොන්ඩම ගැනයි.

මුලින්ම කියන්න ඕන මම දන්නා පරිදි කොන්ඩමයක් ලඟ තබා ගැනීම දඬුවම් ලැබිය හැකි වරදක් වන්නේ නෑ. එය භාවිතා කරන්නට යන ආකාරය අනුව නම් අනාචාරයේ හැසිරීම යටතේ වැරදිකරුවෙකු වන්නට පුලුවන්.

නමුත් මා මෙතන දකින වැදගත්ම දේ ඒ තරුණියන් කවුරුන් වූවත් ඔවුන් කොන්ඩම් ලඟ තබා ගැනීමට තරම් විමසිලිවන්ත වීමයි. ඒ කියන්නේ අද තරුණියන් අවදානමට පෙර සුදානමකින් සිටින බවයි. ඒක බොහොම හොඳ ප්‍රවනතාවයක්. ලිංගිකව සක්‍රීය ඕනෑම යුවතියක් කොන්ඩමයක් ලඟ තබා ගැනීම නුවනට හුරුයි. ඒ ඇයි?

ලිංගික එකතුවීමක් කියන දේ බොහෝ විට කලින් සැලසුම් කරපු දෙයක් වන්නට තියෙන ඉඩ ගොඩක් අඩුයි. ඉතින් නොහිතන වේලාවක් නොහිතන දේවල් වෙන්නට පුලුවන්. නමුත් ඔබට හැකියාවක් තිබෙනවා නම් එහිදී දැලි පිහියෙන් දිව නොකපා‍ ගෙන කිරි කන්න?

කොන්ඩමය පිහිටට එන්නේ ඒ අවස්ථාවේදීයි. වර්තමානයේදී ලංකාවේ අස්සක් මුල්ලක් නෑර ඕනෑම තැනකින් ලබා ගත හැකි තරමට කොන්ඩම අද ද්වීපව්‍යාප්තයි. ඒ විශාල හේතු රාශියක් මත.

කොන්ඩම කොයි ආකාරයේ උපත් පාලන ක්‍රමයක්ද?

කොන්ඩම අවහිරතා ආකාරයේ උපත් පාලන ක්‍රමයක්. එනම්‍ මෙහිදී සිදුවන්නේ ශුක්‍රාණු යෝනි මාර්ගයට ඇතුල්වීම අවහිර කිරීමයි. තවද මෙහි කිසිම හෝමෝනයක් අඩංගු නැති නිසා එමඟින් ඇතිවන අතුර ආබාධ කිසිවක් ඇතිවන්නේ නෑ.

සාර්ථක වීමේ ප්‍රතිශතය කොපමණද?

හදිස්සියේ ඉරී යෑමකදී හැර මෙය 98%ක්ම ගැබ් ගැනීම් වැලැක්වීමට සමත් ක්‍රමයක්.

අතුරු ආබාධ මොනවාද?

කොන්ඩම් නිෂ්පාදනය කර ඇත්තේ ලැටෙක්ස් නමැති අමුද්‍රව්‍යයකින් නිසා එයට ඇතිවිය හැකි ආසාත්මිකතාවයක් ඇති වූවොත් හැර වෙන කිසිම අතුරු ආබාධයක් නෑ.

කොන්ඩමයෙන් කෙරෙන්නේ උපත් පාලනය විතරද?

උපත් පාලනය කොන්ඩ‍මයේ මූලික කාර්ය උනත් ලිංගික ‍සම්ප්‍රේෂණය විය හැකි රෝග වලින් ආරක්ෂා විය හැකි ‍එකම ක්‍රමය මෙයයි. දැනට දියුණු වෙමින් පවතින රටවල පමණක් නොව පළමු වන ලෝකයේ රටවල් වල පවා HIV/AIDs, සිපිලීස්, ගොනෝරියා, ක්ලැමීඩියා, හෙපටයිටිස් වැනි ලිංගික ‍සම්ප්‍රේෂණය වන රෝග සාර්ථකව පාලනය කරන්නට කොන්ඩම බහුලව යොදා ගැනෙනවා. ලෝක සෞඛ්‍ය සංවිධානය රටකට අත්‍යාවශ්‍ය බෙහෙත් ලැයිස්තුවේ පවා මෙය අඩංගු කර ඇත්තේ ‍ඒනිසයි.

වඩාත්ම උචිත කාටද?

ඕනෑම කෙනෙකුට උචිතයි. නමුත් තාවකාලික උපත් පාලන ක්‍රමයක් නිසා වඩාත්ම තරුණ, පවුලක් සම්පූර්ණ කර නොමැති අයට වඩාත් සුදුසුයි. එ්වගේම සරුභාවය පමාවීමක් සිදු වන්නේද නෑ.

ලබා ගන්නේ කොහෙන්ද?

ඕනෑම සුපිරි වෙළඳසැලකින්, ෆාමසියකින්, ඔබේ ‍ගමේ මහජන සෞඛ්‍ය පරීක්ෂක (PHI), පවුල් සෞඛ්‍ය නිලධාරිනිය (midwife) හෝ ලඟම රජයේ රෝහලේ ලිංගික රෝග සායනයෙන් ඔබට පහසුවෙන් ලබා ගත හැකියි.

මීට අමතරව ශ්‍රී ලංකා පවුල් සංවිධාන සංගමය ලංකාවේ පළමු වතාවට කොන්ඩම් අලෙවි යන්ත්‍රයක් නැතිනම් Condom Vending Machine (Vendom Sri Lanka) එකක් පිහිටෙව්වා මීට වසරකට පමණ පෙර. අද වෙනකොට එවැනි යන්ත්‍ර දිවයින පුරා ස්ථාන 9කට ව්‍යාප්තව ඇති බව ඔබ දන්නවාද?

යන්ත්‍ර තියෙන්නේ : 

» ශ්‍රී ලංකා පවුල් සංවිධාන සංගමය, බුලර්ස් මාවත, කොළඹ 07.
» ශ්‍රී ලංකා ජාතික ලිංගාශ්‍රිත රෝග හා ඒඩිස් මර්දන වැඩසටහන, නො.29, ද සේරම් පෙදෙස, කොළඹ 10.
» Shore by O Car Park, ගල්කිස්ස.
» රාගම ෆාමසි, නො.37, තේ වත්ත පාර, රාගම.
» චින්තන Training Center, පුත්තලම් පාර, නයිනමඩම.
» කුරුඳුගහ හැතැප්ම Medical Center, කුරුඳුගහ හැතැප්ම, ඇල්පිටිය.
» තරිඳු ෆාමසි, හික්කඩුව.
» ස්වයං රැකියා මධ්‍යස්ථානය, අපනයන සැකසුම් කලාපය, කොග්ගල.
» Cheeky Monkey, මිදිගම.

ඉදිරි දිනෙකදී අනෙකුත් උපත් පාලන ක්‍රම ගැනත් ප්‍රායෝගික භාවිතයට අනුව දැනුවත් කරන්නම්. අදහස් වලට හැමදාම ‍වගේ මම විවෘතයි.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post Sex ගැන හොයන අය කොන්ඩම් ගැන මේ දේවල් දැනගෙන ඉන්න appeared first on familylife.

“ගර්…ගර්… ගර්…”
“අපෝයී නින්දක් නැහැ මෙයාගෙ ගෙරවිල්ල නිසා”
“ආ… මම ගොරවනවා”
“නැතිව, හරියට පරණ එන්ජින් එකක් ස්ටාට් කරලා වගේ ”

ඇතැම් විට ගොරවන තැනැත්තාට ශාරීරිකව හා මානසිකව බලපාන අතරම ගොරවන තැනැත්තා සමග නිදන සාමාජිකයන්ටද ශාරීරිකව හා මානසිකව මෙම තත්ත්වය නිසා ගැටළු ඇතිවිය හැකිය.

ඇයි නින්දෙන් ගොරවන්නේ ?

ගෙරවීමට බලපාන හේතුව හුස්ම ගැනීම හා සම්බන්ධයි. සාමාන්‍යයෙන් අපේ ශ්වසන මාර්ගය දහවල් කාලයට වඩා රාත්‍රී කාලයේදී ප්‍රමාණයෙන් අඩුවීමක් සිදුවෙනවා. එසේම ඇතැම් පුද්ගලයන්ගේ විවිධ හේතූන් නිසා සාමාන්‍ය තත්ත්වයට වඩා ශ්වසන මාර්ගය පටුවීම හේතුවෙන් හුස්ම ගැනීමේදී ශබ්දයක් පිටවේ.

ශාරීරික හා ඇතැම් පුරුදු නිසා ශ්වසන මාර්ගයේ අර්ධ අවහිරතාවය හේතුවෙන් හුස්ම ගැනීම අපහසු වේ. මේ නිසා අර්ධව අවහිර වූ මාර්ගය ඔස්සේ වායු ධාරාවක් ගමන් කිරීමෙන් ශබ්දයක් නිකුත් වේ.

ඇතැමුන් නින්දේදී ගොරවන්නේ පහත ශාරිරික ව්‍යුහමය ගැටලුකාරී තත්ත්වයන් නිසාය

• ශ්වසන මාර්ගයේ පැති බිත්ති අධික ලෙස හැකිලීම.
• නාසයේ ඇති අවහිරතා තිබීම.
• එනම් නාසයේ බිත්තියේ ඇඳ තිබීම , නාසයේ මස් දළු තිබීම.
• මෘදු තල්ල විශාලව පිහිටීම සහ එහි අධික නම්‍යශීලිභාවය නිසා.
• ඉතා විශාල දිවක් පිහිටා තිබීම.
• විශාල ඇඩිනොයිඩ් ග්‍රන්ථියක් පිහිටීම.
• සෙම් ගෙඩි විශාල වීම.
• අපිජීවිකාවේ අධික නම්‍යශීලිභාවය.
• ස්ථූලභාවය නිසා ගෙලෙහි අධික මේදය තැනැපත්ව තිබීම.
• ඇතැමුන් නින්දේදී ගොරවීමට හේතුව ඔවුන්ගේ ජීවන චර්යාවේ විවිධ පුරුදු විය හැකිය.
• අධික ලෙස නිදිමැරීම.
• දුම්පානය කිරීම.
• මත්පැන්, හා මත් බෙහෙත් භාවිත කිරීම.

නින්දෙන් ගෙරවීමට ගොදුරු වූවෙක් නම්

• දහවල් අධික නිදිමත
• අධික තෙහෙට්ටුව
• අධ්‍යාපනයට හෝ රැකියාවට අවධානය යොමු කිරීමට නොහැකිවීම
• අධික රුධිර පීඩනය නිසා හිසරදය ඇති වීම

වැනි තත්ත්වයන්ගෙන් පීඩාවට ලක්වේ. එසේම ගොරවන පුද්ගලයකු සමීපයේ නිදන අයටද සුව නින්දක් නොලැබෙන අතර එය පවුලේ අසමගියට හේතු වේ. එසේම අන් සාමජිකයන්ට අධික රුධිර පීඩන තත්ත්වයන් හා නින්ද ආශ්‍රීත රෝගද ඇතිවිය හැකියි.

ගෙරවීමේ රෝගය නිසා වෙනත් රෝග වැළඳිය හැකිය

• හෘදයට, මොළයට, රුධිර වාහිනීවලට මෙම තත්ත්වය තදින් බලපානු ලබයි. ඉතා තරුණ වියේදීම අධික රුධිර පීඩනයට, හෘදයාබාධ වලට හා ආගාධයන්ට ගොදුරු විය හැකිය.
• ලිංගික බෙලහීනතාවය ඇතිවීමට ද සරුභාවය අඩුවීමට ද රුධිරයේ ඔක්සිජන් මඳ බව හේතු වන බව දැන් සොයාගෙන තිබේ.

නින්දෙන් ගෙරවීම සුව කරගත හැකිද?

• උගුර,කන , නාසය හා ගෙල පිළිබඳ විශේෂඥ වෛද්‍යවරයකු වෙත යොමු වන්න. එහිදී ඔබේ නාස, උගුර හොඳින් පරීක්ෂා කරනු ඇත.
• ඔබට දහවලට නින්ද ඇති වීම පිළිබඳ වෛද්‍යවරයා හොඳින් අධ්‍යනය කොට ඔබව නිද්‍රා පරීක්ෂණයක් සඳහා යොමු කර නින්දෙන් ගෙරවීම හා සම්බන්ධ ශ්වසන අවහිරතා පිළිබඳ නිගමනයකට එළැඹ ඒ අනුව ප්‍රතිකාර තීරණය කරනු ඇත.
• නින්දෙන් ගෙරවීමට හේතු වන නාසයේ ඇදයක් තිබේනම්, සෙම් ගෙඩි තිබේනම් හෝ උගුරේ හෝ නාසයේ වෙනත් ආබාධයක් තිබේනම් ශල්‍යකර්මයක් මගින් එම තත්ත්වයට විසඳුමක් ලබා ගත හැකිය.
• තරබාරු බව නිසා නින්දෙන් ගොරවන්නේ නම්, තරබාරු බව පාලනය කිරීමෙන් එම තත්ත්වයෙන් මිදිය හැකිය.
• නින්දෙන් ගොරවන පුද්ගලයන් සඳහා “සී පැප්” නමින් හැඳින්වෙන උපකරණය වෛද්‍ය උපදෙස් අනුව වෙළෙඳපොළෙන් මිලදී ගැනීමට හැකිය. එම උපකරණය පැළඳගෙන නින්දට යාමෙන් නින්දෙන් ගෙරවීම පාලනය කළ හැකිය. “සී පැප්” උපකරණය සැමවිටම ස්වසන මාර්ගය විවෘත කර තැබීමට උපකාරී වෙනවා. පුද්ගලයා මහත පුද්ගලයකු වුවත්, ශ්වසන මාර්ගයේ වෙනත් අවහිරතා තිබුණත්, මෙම සී පැප් උපකරණය මගින් නිරන්තරයෙන්ම උගුර, ග්‍රසනිකාව යන ස්ථාන විවෘතව තබා පෙනහළු තුළට පහසුවෙන් වාතය ඇතුළු කරනු ලැබේ. එසේ වාතය පෙනහළු තුළට ඇතුළු වන්නේ උපකරණය මගින් අධික පීඩනයකින් වාතය තල්ලූ කිරීම නිසයි. මෙම සී පැප් උපකරණය ඉතා පහසුවෙන් භාවිතා කළ හැකි අතර පැළඳගෙන සිටීමටද පහසු උපකරණයක්ය.

ඉතින් ඔබටත් හොරා ඔබ තුලින් නින්දෙන් ඇති වන අමිහිරි ගෙරවීමට පියවරක් ගෙන ඔබත් සතුටින් නීරෝගීව ජීවත් වන්න.

මෙම ලිපිය සැකසීමේදී සිය දැනුම නොමසුරුව ලබා දෙමින් ගෝල්ඩන් කී රෝහලේ උගුර කන, නාසය හා ගෙල පිළිබඳ විශේෂඥ ශල්‍ය වෛද්‍ය සීතා අරඹේපොළ මහත්මිය දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post නින්දේදී ගෙරවීම සාමාන්‍ය දෙයක් කියල නම් හිතන්න එපා appeared first on familylife.

තරුණකම රැකගන්න කළ යුතු දේ ගැන කතා කරන විට ඒ කතා බහ කාන්තාවන්ට වගේම පුරුෂ පක්ෂයටත් අදාලයි. ඒ කොහොම වුනත් පිරිමියකුට සාපේක්ෂව කාන්තාවකගෙ වියපත් පෙනුම ඉක්මණින්ම ලඟා වෙන්නෙ විවාහයෙන් පසු දරුවන් ලැබුණට පසු තමන්ට තමන්ව අමතක වීම නිසයි.

වයසින් මහලු වුනත් පෙනුමින් තරුණකම රැකගන්න පුළුවන්නම් කොයිතරමි අගේද?

ඔව් පුළුවන්, භෞතචිකිත්සාවේදී ඇන්ටි ඒජින් (Anti Aging) ඒ කියන්නේ වයසට යාම කල් දමා ගැනීමයි. භෞතචිකිත්සාවේදී භෞතික විද්‍යාවේ මූලධර්ම අනුව ශාරීරිකව සහ මානසිකව සිදුවන සංකූලතාවයන්ට ප්‍රතිකාර කිරීම තුලින් ඇන්ටි ඒජින් ඒ කියන්නේ වයසට යාම කල් දමා ගැනීම කල හැකියි.

අපි හැමෝගෙම සුන්දරත්වය පිළිඹිබු වන්නේ මුහුණෙන් එනිසා තරුණකම ගැන කතාබහේදී මුහුණට ලැබෙන්නේ සුවිශේෂී ස්ථානයක්. තරුණකම, මුහුණේ හැඩය සහ මුහුණෙහි වර්ණය අතර තිබෙන්නේ සහ සම්බන්ධතාවයකි.

සාමාන්‍යයෙන් කුඩා අවදියේ සිට මුහුණෙහි හැඩය ඕවලාකාර ස්වභාවයක් ගනියි. එහෙත් වයසින් මුහුකුරායත්ම මුහුණේ හැඩය වෙනසකට ලක්වේ. මුහුණේ අස්ථි පද්ධතියට අනුව මුහුණේ මාංශපේෂීන් මගින් මුහුණේ හැඩය තීරණය කරයි. මුහුණේ මාංශපේෂීන් වැඩි වශයෙන් එක් අස්ථියකින් පටන් ගෙන අවසන් වනුයේ සම හෝ තවත් මෘදු පටකයකින්ය. එම නිසා මුහුණේ සම ඉතා ඉක්මණින් එල්ලාවැටීමක් සිදු විය හැකිය

ළමා වියේ සිට යොවුන් විය දක්වා මුහුණේ මාංශපේෂීන් මුහුණේ ඉරියව් අනුව ඉතා නම්‍යහීලීව හොඳ ක්‍රියාකාරීත්වයකින් යුක්තවනවා. ඒත් සමගම නව යොවුන් වියට පත් වන විට ක්‍රමයෙන් මුහුණේ මාංශපේෂීවල ක්‍රියාකාරීත්වය අඩුවේ. ඒ අනුව අප දිනෙන් දින වයසට යාමත් සමඟම මාංෂ පේෂීන් හී ක්‍රියාකාරීත්වය අඩු වන බව ඔබට තේරුම් යන්නට ඇත. මෙසේ ක්‍රියාකාරීත්වය අඩුවීම නිසා මුහුණේ තැනින් තැන අපදව්‍ය රැස් වන නිසා ඇස් යට කළු පැහැවීම, ලප කැළැල් ඇති වීම, මුහුණෙහි පැහැපත් බව අඩු වී සම දුර්වර්ණ වීම ආදිය සිදුවේ.

මුහුණ එල්ලා වැටීම් සහ අවපැහැ වීම සාමාන්‍යයෙන් නම් වයස අවුරුදු 30ත් 35ත් අතර මෙම තත්ත්වය ඇති වුවත් වර්තමානය වන විට මෙම තත්ත්වය අවුරුදු 18, 19 වයස් වල පසුවන අයටද බලපාන තත්ත්වයක් බවට පත්ව ඇත.

අකාලයේ මුහුණ වියපත් වන්නට හේතූ

• මාංෂ පේෂීන් අතර ඇති ඉඩ ප්‍රමාණය ආවරණය කරන්නේ තෙල් තට්ටුවක් මගින්ය. මුහුණේ බර ඉහළට ඇද තබා ගනිමින් මුහුණේ මාංෂ පේෂීන් ශක්තිමත්ව ඝණව සහ මුහුණේ හැඩය නිසිපරි දිපවත්වා ගැනීමට මෙම තෙල් තටිටුව උපකාරීවේ. මාංෂ පේෂීන් වල තෙල් තට්ටුවේ බර අනවශ්‍ය ලෙස වැඩි වු විට සම එල්ලා වැටීමට ලක්වේ.
• එසේම මුහුණේ මාංෂ පේෂීන් හී තෙල් තට්ටුව වැඩිවූ විට පරිවෘත්තීය ක්‍රියාවලියද අඩපණ වේ එවිට සම මගින් තෙල් නිෂ්පාදනය කෙරෙන ග්‍රන්ථීන් මේද නිපදවීම අඩු කරන නිසා සමෙහි තෙතමනය රඳවා ගැනීමට අවශ්‍ය තෙල් අඩුවී සම වියළීමට, සම රැලි වැටීම මුහුණ වයස් ගත පෙනුමක් ඇති කරමින් එල්ලා වැටීමත් සිදුවේ.
• හිරු එළියට සහ සම මත කුණු දූවිලි සහ වාහන දුම් ආදිය නිසා සහ මුහුණේ මැරුණ සම ඉවත් නොකිරීම මුහුණේ සම අවපැහැයට ලක්වේ.
• සමෙහි මාංෂ පේෂීන වල ශක්තිමත් බව අඩු වන විට රුධිර සැපයුමද අඩුවේ. එම නිසා සම ඇතුලත මාංෂ පේෂීන් වලට ඔක්සිජන් හා නිසි පෝෂණය නොලැබීම නිසාත් පරිවෘත්තීය ක්‍රියාවලිය නිසි පරිදි සිදුනොවීම.
• නිතර නිතර සබන් භාවිත කර මුහුණ සේදීම.

තරුණ බව ඉස්මතු වන්නට සම රැක ගන්න

• මුහුණෙහි පැහැපත් බව ඉස්මතු කිරීමට නම් මුහුණේ තැන්පත්ව ඇති අපද්‍රව්‍ය ඉවත් කර සමට නිසි පරිදි ඔක්සිජන් සැපයුමක් සහ නිසි පෝෂණයත් ලබා දිය යුතුය. භෞත චිකිත්සාවේදී මෙම කාරණා සපුරා පැහැපත් නීරෝගී සමක් ලබා ගැනීමට අල්ට්‍රා සවුන් නමැති විද්‍යුත් උපකරණය මගින් ශබ්ද තරංග උපයෝගී කරගනියි.
• අල්ට්‍රා සවුන්ඞ් ශබ්ද තරංග කියූ සැනින් ඔබ යම් චකිතයක් බියක් ඇති වන්නේ මෙම තරංග මිනිසාගේ සිරුරට අහිතකර වේ යැයි යන අදහස මතය. එහෙත් අල්ට්‍රා සවුන්ඞ් ශබ්ද තරංග වාතයේ ඇති අපේ කනට ඇසෙන ශබ්ද තරංග වලටත් වඩා සියුම්ය. මෙම උපකරණය මගින් හර්ඞ්ස් 20000 කට වඩා වැඩි ඉතා සියුම් ශබ්දතරංග ප්‍රතිකාර සඳහා භාවිතයට ගනියි.
• කෙසේ වුවද මෙම තරංග මිනිස් ශරීරයට අහිතකර නොවන බව විද්‍යාත්මකව තහවුරු කර ඇත. මුහුණේ තරුණකම රැකගන්න, තරුණ පෙනුම උද්දීපනයේදී වඩාත් වැදගත් වන්නේ මාංෂ පේෂීන් ශක්තිමත් කිරීමය. ඒ සඳහා විවිධ ආකාරයේ සංවේදීතාවය අඩු විද්‍යුත් උපකරණ මගින් මුහුණේ කුඩා මාංෂ පේෂීන් පවා උද්දීපනය කර නැවත ක්‍රියාකාරී තත්ත්වයට පත් කිරීම සිදු කල හැකිය.

නිවසේදීම ඔබට තනිවම කළ හැකි සරල ව්‍යායාම කිහිපයක් කිරීමෙන්

අපි දැන මෙම සරල ව්‍යායාම කිහිපයක සලකා බලමු.

ඇස් වටා රැළි වැටීම අවම කිරීම

කට දෙපැත්ත රැළි වැටීම වලක්වා ගැනීම

1 වන ක්‍රමය

• කට බාගෙට ඇර ඕ අකුර ශබ්ද වන ලෙස තොල් උල් කරන්න.
• මෙම ඉරියව්වෙන් තත්පර පහක් පමණ ඉන්න.
• දැන් නැවත සෙමෙන් සෙමෙන් නැවත කට වහන්න.
• තත්පර පහක් පමණ සිට නැවත ඉහත පියවර අනුගමනය කරන්න.

2 වන ක්‍රමය

• කට බාගෙට ඇර ඊ අකුර ශබ්ද වන ලෙෂ කට තබා ගන්න.
• මෙම ඉරියව්වෙන් තත්පර පහක් පමණ ඉන්න.
• දැන් නැවත සෙමෙන් සෙමෙන් නැවත කට වහන්න.
• තත්පර පහක් පමණ සිට නැවත ඉහත පියවර අනුගමනය කරන්න.

3 වන ක්‍රමය

• කට හොඳින් පුම්බා ගන්න.
• මෙම ඉරියව්වෙන් තත්පර පහක් පමණ ඉන්න.
• දැන් නැවත සෙමෙන් සෙමෙන් නැවත කට ලිහිල් කරන්න.
• තත්පර පහක් පමණ සිට නැවත ඉහත පියවර අනුගමනය කරන්න.

මේ ඉතාම සරල ව්‍යායාම කිහිපයක්ය. මෙම ක්‍රම හොඳින් ප්‍රගුණ කල පසු සංකීර්ණ ව්‍යායාම සඳහා ඔබට යොමු විය හැකිය. එහිදී මුළු මුහුණම එකවර ව්‍යායාමක යෙදේ.

1 වන ක්‍රමය

• මෙම ක්‍රමය මග මුළු මුහුණටම ව්‍යායාමයක් ලැබේ.
• වහල දෙසට මුහුණ සිටින සේ ඉහළ බලා ගන්න.
• දැන් ඔබ හාද්දක් දෙන විට කට උල් කරන ආකාරයට දෙතොල් උල් කරන්න.
• මෙම ඉරියව්වෙන් තත්පර පහක් පමණ සිට නැවත ලිහිල් කරන්න.
• මෙම ව්‍යායාමයද වාර පහක් පමණ කරන්න.

2 වන ක්‍රමය

• දෙනෙත් සෙමෙන් සෙමෙන් පියාගන්න.
• ඒ සමගම දිව එළියට දමන්න.
• දැන් දෙනෙත් ලිහිල් කරමින් දිව ඇතුලට ගන්න.
• මෙම ව්‍යායාමයද වාර පහක් පමණ කරන්න.

මෙම ව්‍යායාම කිරීමට වයස් භේදයක් නැත. අපේ සුන්දරත්වය අහිමි වූ පසු දුක් වනවාට වඩා තරුණකම රැකගන්න, සුන්දරත්වය එලෙසම පවත්වා ගන්න හැකියාව ඇති බව මේ ලිපියෙන් ඔබට පසක් වන්නට ඇත. එසේ නම් පමා නොවන්න. මේ ලස්සන වන්නට කාලයයි.

මෙම ලිපිය සැකසීමේදී සිය දැනුම නොමසුරුව ලබා දෙමින් වරලත් භෞතචිකිත්සක සංගමයේ ජාතික සංවිධායක, ෆිසියෝ ලයිෆ් ආයතනයේ අධ්‍යක්ෂ, වරලත් භෞතචිකිත්සක ආචාර්ය සුජීව වීරසිංහ මහතා (072 – 4506976) දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post තරුණකම රැකගන්න හිතන අය මේ ලිපිය අනිවාර්යයෙන් කියවන්න appeared first on familylife.

අද දවස වෙද්දි ආහාර ජීවිතයේ හැම මොහොතකටම සම්බන්ධ වෙලා තිබෙනවා. ආගමික උත්සව, සංස්කෘතික උත්සව වගේම තමන්ගේ රට, ජාතිය, ආගම, නිරූපණය කරන්නත් සමහර අවස්ථාව වලදි ආහාර වර්ග භාවිතා වෙනවා වගේම සමාජ තත්ත්වය පවා ආහාර වලින් පෙන්නන්න සමහරු උත්සහ කරනවා ඔබ දැක ඇති.

එත් අද සමාජයේ කීයෙන් කී දෙනෙක් තමන් කන බොන දේවල් ගැන සිතා බලනවද? වර්තමානයේ කන බොන දේවල් නිසා තමන්ට හැදෙන්න පුලුවන් ලෙඩ රෝග මොනවද කියන එක ගැන කිසියම් හෝ අදහසක් තියෙනවද?

ඉතින් ඒ ගැන හිතන්න පටන් අරන් එදිනෙදා ජීවිතයේ මේ පුරුදු ඔබත් ඇති කර ගත්තොත් නිරෝගී ජීවිතයක් ලබාගන්න වගේම දිගුකල් ජීවත් වෙන්නත් පුලුවන් වේවි.

විවිධ වර්ගයේ ආහාර අනුභව කරන්න

අපි ගන්න ආහාර වල කබොහයිඩේ්‍රට්, ප්‍රෝටීන්, ලිපිඩ, විටමින් වර්ග, ඛණිජ ලවණ, තන්තු සහ ජලය කියන ප්‍රධාන සංඝටක විවිධ ප්‍රමාණ වලින් අඩංගු වෙනවා. උදාහරණයක් විදිහට අල වර්ග, පිටි වර්ග වලින් සාදන ආහාර වල අඩංගු කාබෝහයිඩ්‍රේට් ප්‍රමාණය වැඩියි. කොමඩු, පිපිඤ්ඤා, කැකිරි වගේ ආහාර වල අඩංගු ජලය ප්‍රමණය වැඩියි. මේ එක් එක් සංඝටක වලින් ශරීරයේ පැවැත්මට අවශ්‍ය ශක්තිය, වර්ධනයට අවශ්‍ය අමුද්‍රව්‍ය ලබා දීම වගේ විවිධ දායකත්ව ලබා දෙනවා.

ඒක නිසා අපි සියලු පෝෂ්‍ය පදාර්ථ ආවරණය වන විදිහට විවිධ වර්ගයේ ආහාර පාන දවස පුරා අහාරයට ගැනීම වැදගත්.

ආහාර හදුනා ගන්න

අතට අහුවෙන හැමදේම කටට දාගන්න බලාගෙන ඉන්න අයට අමතක කරන දෙයක් තමයි මාළුව නහින්නෙත් කට හින්ද කියන අපේ පැරණි කියමන. මේ දේ මතක ඇති තේරුම් ගත් අය නම් කන්න ඕනේ මොනවද, නැත්තේ මොනවද කියලා අවබෝධයක් තියා ගන්නවා. ආහාර වර්ග වල තියෙන පෝෂණ ගුණය අනුව දිනපතා ගත යුතු, ඉදහිට ගත යුතු හා කලාතුරකින් ගත යුතු ආහාර කියලා ආහාර වර්ග කරගන්න අපිට පුලුවන්.

උදාහරණයක් විදිහට එලවළු. පළතුරු, ඉඳිආප්ප, බත්, රොටී වගේ පිටි ආශ්‍රිත නිෂ්පාදන දිනපතා ගන්න පුලුවන් ආහාර විදිහට සලකන්න පුලුවන්. කේක්, බිස්කට් , ෆරයිඩ් රයිස් ගැඹුරු තෙලේ බැදපු ආහාර වගේ ආහාර ඉදහිට ගත යුතු ආහාර විදිහට සලකන්න පුලුවන්. සිසිල්  බීම, අයිස් ක්‍රීම්, ටොෆී, නොකා ඉන්න තරමට හොදයි.

ආහාර වල සීනි, ලුණු මට්ටම් සම්බන්ධයෙන් අවධානය යොමු කරන්න

වර්තමානයේ සුලභව හමුවෙන දියවැඩියාව, අධිරුධිර පීඩනය වගේ බෝ නොවන රෝග බොහොමයක් ඇති වීමට එක ප්‍රධාන හේතුවක් තමයි අධික සීනි සහ ලුණු භාවිතය. නිරෝගී වැඩුණු පුද්ගලයෙකුට දිනකට ගත හැකි උපරිම සීනි ප්‍රමාණය වන්නේ සීනි හැදි 06ක්(ග්‍රෑම් 25). අපිට පුලුවන් එක් අරන ලද සීනි Added Suger අඩංගු ආහාර පාන සීමා කරලා සීනි භාවිතය ප්‍රශස්ත මට්ටමක තියා ගන්න.

මේක පවුලේ හැමෝටම වැදගත් දෙයක්. මොකද ළමා වයසෙදි නොදැනුවත්කමට දරුවා ඉල්ලන සෑම අවස්ථාවකම පැණි රස කෑම වර්ග, අරන් දෙන්න දෙමව්පියන් පුරුදු වුණොත් දරුව ලොකු වෙද්දිත් ඒ ප්‍රමාණයටම ආහාරයට ගන්න පෙලබෙනවා. ඒක නිසා පවුලේ ලොකු කුඩා හැමෝගෙම සීනි භාවිතය ගැන සැලකිලිමත් වීම සෞඛ්‍යය යහ පැවැත්මක් පවත්වා ගැනීමට රුකුලක්.

නිරෝගී වැඩුණු පුද්ගලයෙක්ට දිනකට ගත හැකි උපරිම ලුණු ප්‍රමාණය තේ හැදි 01 ක් (ග්‍රෑම් 4)

නිවසේ ආහාර පිලියෙල කරන කොට ආහාර වලට එකතු කරන ලුණු ප්‍රමාණය පාලනය කරන එක අපිට ලෙහෙසියෙන්ම කරන්න පුලුවන් දෙයක්. ඒ වගේම ලුණු අධික ලෙස අඩංගු වෙන මුරුක්කු වගේ වෙලදපලේ තියෙන ආහාර පාලනයක් ඇතුව පාවිච්චි කිරීමෙන් හෘරදයාබාධ වැනි බෝ නොවන රෝග වැලදීමට ඇති අවදානම අඩු කර ගන්න පුලුවන්.

පලතුරු එලවලු වැඩි ප්‍රමාණයක් ආහාරයට ගන්න

දිනකට අවම වශයෙන් එලවලු වර්ග 03ක් සහ පළතුරු වර්ග 02ක් වත් ආහාරයට ගන්න ඕනේ. අපේ ශරීරයේ ක්‍රියාකාරිත්වයට අවශ්‍ය වෙන විවිධ පෝෂණ සංඝටක බොහොමයක් පළතුරු වල  අඩංගුව පවතිනවා. ඒත් වර්තමානයේ බොහෝ දෙනා පුරුදු වී තිබෙන්නේ පෝෂණ ගුණයෙන් අඩු, බොහෝ විට පිටරටින් ගෙන්වන පලතුරු භාවිත කරන්න. ඉතින් ඔබට පුලුවන් නම් පලතුරු වර්ග ගෙවත්තේ හිටවලා තමන්ගේම පවුලේ අයගේ පරිභෝජනයට අවශ්‍ය වස විස නැති පලතුරු දෙන්න. ඒක පවුලේම පෝෂණයටත් හොදයි. ඒ වගේම කායික මෙන්ම මානසික, සමාජීය සෞඛ්‍යයත් වර්ධනය වීමටත් වැදගත් කාර්‍ය භාරයක් ඉටු වෙනවා.

සෞඛ්‍යය යහ පැවැත්මක් සඳහා අපිට අවශ්‍ය දේ අපිම වවාගමු

අපේ අතීත සමාජය දිහා හැරිලා බැලුවොත් එදිනෙදා ජීවිතයේ පරිහරණයට අවශ්‍ය ආහාර නිපදවා ගන්න බොහෝ දෙනක් පුරුදු වෙලා සිටියා. එලවලු, පලතුරු ගස් හැදෙන්න අවශ්‍ය පාරිසරික සාධක ඉතා ඉහලින් ලංකාවේ තියෙනවා.  ධාන්‍ය ධනය නෙක මල් පලතුරු පිරි ජය භූමිය රම්‍යා කියලා ජාතික ගීය කියන හැම වෙලාවකම මේ දේ මතක් වුණත් වර්තමාන වන විට කාලය කියන සාධකය නිසා මේ සම්බන්ධයෙන් සැලකිල්ලක් දක්වන්නේ නෑ. නමුත් ඔබ සොයා බැලුවහොත් ලෝකයේ බොහෝ දියණු රටවල් මේ වන විට අතීත පාරීභෝගික රටාවන් නැවත පිළිපදින්නට පටන් අරන් තිබෙනවා.

වස විස අඩංගු වෙලදපලේ තියෙන එලවලු පලතුරු වෙනුවට කාබනික පොහොර භාවිතා කර ගෙවත්තේ කුඩා ඉඩක වුවත් වගා කරගන්න පුළ්වන් ආහාර වර්ග ගනණාවක් තිබෙනවා. ඔබ හිතයි මේ කාර්යබහුල කමත් එක්ක වගාවක් සඳහා කාලය වෙන්කරන්නෙ කොහොමද කියල. නමුත් ඔබ මතක තබා ගත යුතු කරුණක් වන්නේ ඔබ මේ සඳහා වෙන් කරන කාලය මගින් ඔබේ ජීවිතයට තව දවසක හෝ ආයු කාලය වැඩි වෙන බව.

මීට අමතරව විශේෂ අවශ්‍යතා මත  ගර්භනී මාතාවන්, ළදරුවන්, වැඩිහිටි හා මහළු පුද්ගලයන්  යන අයට සුවිශේෂී වූ පෝෂණ අවශ්‍යතා වෙනස් විය හැකියි. ඒ අවස්ථා වලදී වෛද්‍ය උපදෙස් ලබා ගැනීම වඩා සුදුසුයි.

මේ සරල ක්‍රියාකාරකම් වලින් ඔබට මූලිකව තමන්ගේ පුරුදු වෙනස් කරගෙන යහපත් පෝෂණයකට මග පාද ගන්න පුලුවන්.  ඉදිරි ලිපි වලින් අපි එ පිලිබදව තව දුරටත් කතා කරමු.

මෙම ලිපිය සැකසීමේදී සිය දැනුම නොමසුරුව ලබා දෙමින් කැළණිය විශ්වවිද්‍යාලයේ වෛද්‍ය පීඨයේ ජ්‍යෙෂ්ඨ කතිකාචාර්ය, ප්‍රජා වෛද්‍ය විශේෂඥ මනූජා පෙරේරා මෙනවිය දැක්වූ සහයෝගයට familylife.lk අපගේ ස්තුතිය මෙසේ පළකරමු.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post සෞඛ්‍යය යහ පැවැත්මක් මගින් තව දිනක් හෝ වැඩිපුර ජීවත් වෙමු… appeared first on familylife.