වතුර බීම මගින් ලස්සන වෙන්නෙ පුළුවන් කියල ඔබ සමහර විට අහල ඇති. මොනව හරි කරල ලස්සන වෙන්න කවුද අකමැති? විශේෂයෙන් ම කාන්තාවන් තමන්ගේ පෙනුම ගැන ගොඩක් උනන්දු වෙනවා. විවිධ රූපලාවන්‍ය ආලේපන, පෝෂණ අතිරේක, ශරීරයට එන්නත් කරන රසායනික ද්‍රව්‍ය වගේ දේවල් විතරක් නෙවෙයි රූපලාවන්‍යාගාරත් වැඩි වැඩියෙන් බිහිවෙලා තියෙන්නෙත මේ නිසයි.

ලස්සන ගැන කතා කරනකොට ශරීරයට ලැබෙන පෝෂණය, පෞද්ගලික පිරිසිදුකම වගේම නිරෝගිකම ගැනත් කතා නොකරම බෑ. ඒ වගේම ශරීරයට ප්‍රමාණවත් පරිදි ජලය ලැබීම මේ හැම කාරණයකටම වැදගත් වෙනවා. මේ නිසා පෙනුම සහ නිරෝගීකම ගැන සැළකිලිමත් වෙන කාන්තා පිරිමි හැමෝම වෙනුවෙන් familylife.lk අපි කෙනෙක්ගේ පෙනුමට ප්‍රමාණවත් ලෙස වතුර බීම කොයි තරම් වැදගත්ද කියන කාරුණ ගැන කතා කරන්න හිතුවා.

සාමන්‍ය පුද්ගලයෙකුගේ ශරීරයට දිනකට වතුර වීදුරු 6-8ක් පමණ අවශ්‍ය වෙන බව කියවෙනවා. හැබැයි ශරීර ස්කන්ධය අනුව මේ ජල අවශ්‍යතාවය පුද්ගලයාගෙන් පුද්ගලයාට වෙනස් වෙන්න ඉඩ තියෙනවා. මිනිස් ශරීරය නිර්මාණය කරන ට්‍රිලියන 37කට අධික සෛලවලට ප්‍රමාණවත් තරම් ජලය අත්‍යවශ්‍ය වෙනවා. සිරුරේ  සම්පූර්ණ පෙනුමට වගේම නිරෝගිකමටත්, ශක්තිවන්ත පැවැත්මටත් මේ දේ විශාල සහයෝගයක් ලබා දෙනවා. වෙන කිසිදු පානයකට සමාන කරන්න බැරි පානයක් වෙන ජලය සිරුරට ප්‍රමාණවත් තරමින් ලබා ගැනීමෙන් පහතින් කියවෙන වාසි ලබාගන්න හැකියාව තියෙනවා. 

වතුර බීම මගින් සම දීප්තිමත් වීම.

සමේ 64%ක පමණ ප්‍රතිශතයක ජලය අඩංගු වෙන නිසා සම වියළිබවට පත්වීමෙන් වළකිනවා. ශරීරයට අවශ්‍ය තරම් ජලය ලබෙන්නෙ නැතිවෙනකොට සම වියළි සහ රළු බවට පත්වෙලා ඉරිතලා ගිය ස්වරූපයක් ගෙන දෙනවා. ප්‍රමාණවත් තරම් ජලය ලැබෙන සමක් වියළි බවෙන් තොරවෙලා ඒකාකාරී විදියට දීප්තිමත් සහ මෘදු බවට පත්වෙනවා විතරක් නෙවෙයි සම වියපත් වීම අඩාළ කරන්නත් හේතු වෙනවා. පිටතින් කවර ආලේපන ආලේප කළත් ප්‍රමාණවත් තරම් ජලය සිරුරට ලබෙන්නේ නැත්නම් මේ ආලේපන මගිනුත් යහපත් ප්‍රතිඵල ලබාගැනීම පහසු කටයුත්තක් වෙන්නේ නෑ.

සමේ ඇදෙන සුළු බව වර්ධනය කිරීම.

සම ඇදීමේදී ඇතිවන පැල්ලම් (stretch marks) අවම කරගැනීමට වගේම සමේ දීර්ඝායුෂ වැඩි කරගැනීමට ප්‍රමාණවත් තරම් ජලය පානය කිරීම උපකාරී වෙනවා. සමේ ඇදෙනසුළු බව වැඩි වීම නිසා, සම ඇදීමේදි සමට වෙන හානිය අවම වෙන්න එය හේතුවක් වෙනවා.  

නියපොතු ශක්තිමත් වීම.

සමේ තෙතමනය ප්‍රමාණවත් තරමින් පැවතීම නියපොතුවල නිරෝගී බවට සහ ශක්තිමත් බවට සෘජුවම බලපානවා. ශක්තිමත් බවින් අඩු නියපොතු ඉක්මනින් කැඩී යාමට ලක්වෙනවා වගේම සිරුරට ප්‍රමාණවත් තරම් ජලය ලැබෙනකොට නියපොතු ලේසියෙන් ගැළවෙන්නෙත් නෑ. 

ශරීරයේ බර පාලනය කිරීම.

සිරුරේ බර, එහෙමත් නැත්තන් තරබාරුකම කියන්නේ බොහෝ දෙනෙක් කනස්සල්ලට පත්කරන කාරණයක්. ශරීරයට ජලය ලැබීම අඩු වීම වකුගඩුවල මනා ක්‍රියාකාරීත්වයට අහිතකර විදියට බලපානවා වගේම ඒ නිසාම අක්මාවට අමතර පීඩනයක් යොමු වෙනවා. ශරීරයේ මේදය දහනයට අක්මාවෙන් සුවිශේෂී කාර්යක් ඉටු කෙරෙනවා.

හැබැයි වකුගඩු අක්‍රියත්වය නිසා අක්මාව මගින් සිදු විය යුතු වැඩ කොටස වැඩි වෙනකොට මේදය දහනය කිරීමේ රාජකාරිය අඩාල වෙනවා. මෙහි ප්‍රතිඵලය විදියට ශරීරයේ මේදය තැන්පත් වීම සිදුවෙනවා. හැබැයි හොදින් වතුර බීම මගින් ඒ ගැටළුව විසදෙනවා. ආහාර ජීර්ණ කාර්ය හොදින් ඉටුවෙලා අධික ආහාර අවශ්‍යතාවය පාලනය කිරීම මගිනුත් සිරුරේ බර පාලනය වෙනවා.

කුරුළෑ පාලනය.

ප්‍රමාණවත් තරම් ජලය ලැබීම මගින් ඇතිවෙන සමේ තෙතමනය නිසා කුරුළෑ පාලනය වෙනවා. ඒ වගේම සිරුරේ ප්‍රතිශක්තිය ඇතිවීම සහ ශරීරයේ බැක්ටීරියා පාලනය වීම නිසාත් කුරුළෑ සහ නොයෙක් බිබිළි හටගැනීම වැළකෙනවා. වියළි සමේ තෙල් නිපදවීම ඉහළ යාම කුරුළෑ ඇතිවීමට ප්‍රධාන හේතුවක් විදියට පෙන්වන්න පුළුවන්. 

හිසකෙස්වල සුන්දරත්වයට.

ශරීරයට අවශ්‍ය තරම් ජලය ලැබෙන්නේ නැත්තන්, හිසකෙස් කැඩී යාම, දුර්වල වීම, ගැළවී යාම වගේ තත්ත්වයන් ඇතිවෙන්න ඉඩ තියෙනවා. විශේශයෙන්ම හිස් කබලේ වියළිබවත් වැඩිවෙන්න මේ දේ හේතු වෙනවා. හොදින් ජලය පානය කරන කෙනෙක්ගේ හිසකෙස්වල ඝනකම සහ කෙරටීන් මට්ටමත් ඉතා හොද තත්ත්වයක තියෙනවා විතරක් නෙවෙයි හිසකෙස්වල තද පැහැය වැඩි වෙන්නත් මෙය හේතුවක් වෙනවා.

දෙනෙත්වල සුන්දරත්වය රැක දීම.

ලස්සන ඇස් යුවළක් කියන්නේ කාන්තාවකට ආභරණයක් විදියට හදුන්වන්න පුළුවන්. ප්‍රමාණවත් තරම් ජලය පානය කිරීම මගින් දීප්තිමත් නෙත් යුවළක් ලබාගන්න හැකි වෙනවා. වියළි සහ රත් පැහැ ගැන්වුණු ඇස් දෙකක් එතරම් ප්‍රියමනාප වෙන්නේ නෑ. ඒ විතරක් නෙවෙයි ඇස්වල ඇතිවෙන ගිලී ගිය ස්වභාවය මගහරවා ගන්නත් ජලය පානය උපකාර කරනවා. විජලනයේ ලක්ෂණයක් වෙන ගිලී ගිය ඇස් නිසා මුහුණට වෙහෙසට පත් සහ වයසට ගිය ස්වභාවයක් ගෙන දෙනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post වතුර බීම මගින් ලස්සන වෙන්නෙ, නිරෝගි වෙන්නෙ මෙහෙමයි. appeared first on familylife.

අපේ කට්ටිය බනිනවා අනේ මොන මිනිස්සුද? එහෙම කරන්න පුලුවන්ද තමන්ගෙ ළමයින්ට කියලා. කොච්චර අසීරැ උනත් ඒ ව්‍යවසනයෙන් පීඩා විදින මිනිස්සුම තමයි ඒ අත්දැකීමෙ ස්වභාවය දන්නෙ.

අනිත් කාරනේ තමයි FB එක පුරාම චීන කෑම සංස්කෘතිය විවේචනය කරමින් හූනෝ, ගෙම්බන්, නයි, බල්ලො, වව්ල්ලු රස කර කර කන videos share වෙනවා. අපි කොච්චර විවේචනය කරත් ආහාර කියන්නෙ සංස්කෘතියෙම කොටසක්. චීනය කියන්නෙ පළාතෙන් පළාතට food culture එක වෙනස් වෙන රටක්. අපේ සංස්කෘතිය ඇතුලෙ කුකුල් මස්, ඉස්සො, දැල්ලො, මාලු කන එක සාමාන්‍ය දෙයක් වගේ තමයි චීන සංස්කෘතිය ඇතුලෙ හුනෝ, මීයෝ, ගෙම්බො කන එක සාමාන්‍ය දෙයක්. අපේ සංස්කෘතියෙන් පිට කෙනෙක්ට හාල්මැස්සො කන එක අප්පිරියා සහගත වෙන්න පුලුවන්.

කොහොම සංස්කෘතිය ගොඩ නැගුනත් මිනිස්සු මිලේච්ඡ යුගය පහුකරලා සෑහෙන කල් ගත වෙලා නිසා සමහර දේවල් කෑම රටාවන් වගේ දෙවල් නිසා පැවැත්මට තර්ජනයක් වෙන දේවල් වෙනස් කරගත යුතු වෙනවා. ඒ වගේම විවධ ගෝලීය දේශපාලන ක්‍රියාත්මක වීම් වල ප්‍රතිඵල නිසා ජීව විද්‍යාත්මක අවි වල ඵලයක් ලෙසත් මෙම වෛරසය පිලිබඳ මත ඵල උනා.

කොහොම උනත් අපි කියවලා තියෙන දැකලා තියෙන විද්‍යා ප්‍රබන්ධ වල දැකපු සමහර මනංකල්පිත දේවල් මේ මොහොතේ පෘතුවිය තුල සිදුවෙමින් පවතිනවා. මරණය ඕනෑම මොහොතක අප කරා පැමිනෙනවා. එය වෛරසයක් ලෙසින්, බෝම්බයක්, වෙඩි උන්ඩයක් ලෙසින් වගේම හදිසි අනතුරන් ලෙසින් අප වෙත එන්න පුලුවන්.

ලංකාවෙ සමාජ ජාල කොයි තරන් දුරට ප්‍රබල වෙලා ද කියනවනම් එක රෑයින් වෙළද පොලේ තිබුණු මුඛ ආවරන සියල්ල අවසන් කලා. සිංහල බහෙත් බඩු කඩේක දැන් බේතකට හොයා ගන්න පෙරැම්කායන් කෑල්ලක් නෑ. තිබුනත් අස්ප ගනන් වලට විකිනෙවා. ලෝකෙම ප්‍රතම වතාවට වෙන්න ඇති face mask වලට පාලන මිලක් දාන්න උන එකම රට ලංකාව බවට පත්වෙනවා.

කොහොමත් මම දැකලා තියෙනවා ” ලංකාවෙ අපි වෙනස් “කියලා ආඩම්බරෙන් post share කරන අය. ඇත්තටම වෙන දේවල් දැක්කම මේ වගේ කට්ටියක් හොයා ගන්න නෑ ලෝකෙ කොහෙන්වත්. එක කොරෝනා රෝගීයයි වාර්තා උනේ doctors ලට පඩි වැඩි කරන්නලු කොරේානා වලට මූන දෙන්න. හැබැයි ඉතින් මේවා පිටි පස්සෙ විවිධ සංගම් දේශපාලන බලවේග ඇති. හැම මනුස්සයෙක්ම අවස්ථාවාදීන් ගොඩට දාන්න බෑ. දැන් අර වූහාන් වල අතරමං වුණු අපේ රටේ ළමයි එක්ක එන්න ගිය ශ්‍රී ලංකන් එයාර් ලයින් එකේ සේවක මඩුල්ල FB එක ඇතුලේ ජාතික වීරයන් බවට පත් කරාට ඔවුන් තමන්ගේ වෘත්තීමය වගකීම හරියාකාරව ඉටු කිරීමක් සිදු කළේ.

එහෙම කරාට ඒ අයගෙ ළමයි පාසැල් එවන්න එපා කියලා විදුහල්පති ගොල්ලො කට්ටියක් කියලා තිබුනා. මේ විදිහට කො⁣රෝනා අස්සෙ විවිධ සිද්ධීන් online ඇතුලේ විවේචනයට ලක් උනා. කොහොම උනත් කෙනෙක්ගෙ හරි වෙනත් ජාතියකගෙ හරි ව්‍යවසනයකදි තොපිලට යස වැඩේ කියන්න බෑ. අපි හැම වෙලේම තව කෙනෙක්ගෙ කරදරේකදි උදව් නොකලත් එයින් හිත හරි පොඩ්ඩක් සසල වෙනවනම් ඒක තමයි මනුස්සකම. මම ළගදි දැකපු post එකක් මතන් උනා. ඒකෙ තිබුනා,

“කාලා බීලා මිනිහෙකුට උදව්වක් කරගෙන හිටපන්.. සල්ලි මත්තෙම නැහුනට සොහොනේ ATM නෑ” කියලා. ඇත්ත තමයි බොලේ…

දැනෙනව නම් ශෙයා කරන්න

The post සල්ලි මත්තෙම නැහුනට සොහොනේ ATM නෑ – ඔන්ලයින් අහස යට 7 appeared first on familylife.

ප්‍රෝටීන්, මේදය, සෝඩියම්, යකඩ, පෝටෑසියම් වගේ ශරීරයට අත්‍යවශ්‍ය පෝෂක කොටස් අඩංගු මස්වලින් පිසගත්ත ආහාර වලට බොහෝ දෙනෙක් ප්‍රිය කරනවා. සමහරු මසක් මාළුවක් නැතුව කෑම කන්න කැමතිත් නෑ. මේ ඒ වගේ අයට මස්වලින් හදාගන්න පුළුවන් ස්නැක්ස් වර්ග කිහිපයක් ගැනයි. 

හැම් පීසා 

• බිස්කට් ඩෝ ග්‍රෑම් 200
• සෝස් අවශ්‍ය පමණට 
• කුඩා කොටු කපාගත් හැම් අවශ්‍ය පමණට 
• මොසරල්ලා චීස් 

පිටි ග්‍රෑම් 180, බේකින් සෝඩා තේ හැන්දක්, ලුණු ස්වල්පයක් ඉතා හොදින් මිශ්‍ර කරගන්න. බ්ලෙන්ඩරය, හෑන්ඩ් මික්ස්චරය එහෙමත් නැත්තන් ෆුඩ් ප්‍රොසෙසරය මේකට පාවිච්චි කරන්න පුළුවන්. මේ මිශ්‍රණයට බටර් මේස හැදී දෙකක් විතර එකතු කර ගනිමින් නැවතත් හොදින් මිශ්‍ර කරන්න. බිත්තර දෙකක්, ඔලිව් ඔයිල් මේස හැන්දක් සහ කිරි මිලි ලීටර් 20ක් පමණ වෙනම බදුනක හොදින් මිශ්‍ර කර පිටි මිශ්‍රණයට ටිකින් ටික එකතු කරන්න. මෙය මෘදු පිටි ගුලියක් ලෙස සකස් කරගෙන පැය දෙකක් පමණ ශීතකරණයේ තියන්න.

ඒ විදියට හදාගත්ත බිස්කට් ඩෝ එකෙන් සිහින් පැතලි කුඩා රවුම් හදාගෙන පරතරයක් ඇතුව අවන් ට්‍රේ එකේ තියන්න. ඒ උඩින් සෝස් තවරන්න. ඊටත් උඩින් හැම් සහ ග්‍රේට් කරගත්ත චීස් අතුරලා ෆැරන්හයිඩ් අංශක 400ට විනාඩි 8-10ක් බේක් කරගන්න. 

චිකන් වලින් බයිට් එකක්

• කුඩාවට කපාගත්ත කුකුළු මස් කැබලි ග්‍රෑම් 500 
• තෙල් අවශ්‍ය පමණට 
• පාන් පිටි කප් එකක්
• බිස්කට් කුඩු 
• බිත්තර දෙකක් 
• ලුණු, ගම්මිරිස්, සුදු ලුණු පේස්ට් 

ගම්මිරිස්, පිටි, සුදු ළූණු පේස්ට් සහ ලුණු බදුනකට දමා හොදින් මිශ්‍ර කරන්න. වෙනත් බදුනක් ගෙන බිත්තර දෙක වික්ස් කරගන්න. ඒ මිශ්‍රණ දෙක හොදින් එකතු කර මස් කැබලිවල තවරා ගන්න. මස් කැබලි බිස්කට් කුඩුවල දවටාගන්න. නවහත් පිටි මිශ්‍රණයේ සහබිස්කට් කුඩුවල තවරා හොදින් රත්කරගත් ගැඹුරු තෙලේ මද ගින්නේ බැදගන්න.

කටට සැරට මීට් බෝල්ස්

• කැමති වර්ගයකින් මස් ග්‍රෑම් 250 (හොදින් අඹරාගන්න)
• කුඩාවට කපාගත් ලොකු ළූණු මේස හැන්දක් 
• අවශ්‍ය නම් කුඩාවට කපාගත් බෙල් පේපර් මේස හැන්දක් 
• කුඩාවට කපාගත් මිංචි කොළ මේස හැන්දක් 
• මිරිස් කුඩු මේස හැදි 1 ½
• සුදුරු කුඩු ස්වල්පයක්
• ඉගුරු පේස්ට් තේ හැන්දක් 
• කොත්තමල්ලි කොළ ස්වල්පයක් 
• ලුණු අවශ්‍ය පමණට 
• ගම්මිරිස් කුඩු තේ හැන්දක් 

මේ අමුද්‍රව්‍ය සියල්ලම හොදින් මිශ්‍ර කරන්න. කුඩා බෝල සදා පැතලි මතුපිටක තියා විනාඩි 20ක් ස්ටීම් කරගන්න. ඉන් පසු ගැඹුරු තෙලේ බැදගන්න.

චිකන් ෆින්ගර්ස් 

• මයෝනිස් සෝස් මේස හැදි 4
• මී පැණි මේස හැදි 1
• මස්ටර්ඩ් පේස්ට් මේස හැදි 1
• විනාකිරි මේස හැන්දක් 
• ම්රිස් කුඩු මේස හැදි  1
• චිකන් බ්‍රෙස්ට් ග්‍රෑම්  450 (සිහින් පෙතිකපාගන්න)
• කුඩු කරගත් කොන් ෆ්ලෙක්ස් කප් 1 ½
• ග්‍රේට් කරගත් පාමේසන් චීස් මේස හැදි 3

මයෝනිස් සෝස්, මී පැණි, මස්ටර්ඩ් පේස්ට්, විනාකිරි සහ මිරිස් කුඩු හොදින් මිශ්‍රකර එයින් බාගයක් වෙනම බදුනකට දමා අයින් කරන්න (ඩිප් එක සදහා). චිකන් පෙති ඉතිරි මයෝනිස් මිශ්‍රණයේ දවටා කොන් ෆ්ලෙක්ස් සහ චීස් තවරා ගන්න. සෙල්සියස් අංශක 425 ට කලින් රත් කරගත් අවන් එකේ දමා විනාඩි 10-15 ක් බේක්‌ කරගන්න.

Chef Ramsay’s Hamburger and Sweet potato

• අඹරාගත් හරක් මස් ග්‍රෑම් 500
• ලුණු 
• ගම්මිරිස් කුඩු 
• අබ පේස්ට් තේ හැදි ½
• වොක්ෂයර් සෝස් (මේ කුකින් සෝස් එක සුපිරි වෙළද සැල් වලින් ගන්න පුළුවන්)
• බිත්තර කහ මද 2
• කෙචප් මේස හැදි 3
• කුඩාවට කපාගත් ළූණු ගෙඩි ½
• ලොකු බතල ගෙඩි 1
• ඔලිව් තෙල් 

සෙල්සියස් අංශක 200ට අවන් එක රත් කරගන්න. බතල ගෙඩිය පොතු හැර තීරු ලෙස කපාගන්න. ඔලිව් තෙල් සහ ලුණු යන්තමට තවරා රන් පැහැ වනතුරු සම්පුර්ණයෙන්ම බේක් ක‍රගන්න.  

අඹරාගත් මස් ලුණු සහ ගම්මිරිස් එකතුකර පදම් වෙන්න තියන්න. එයට අබ පේස්ට්, කෙචප්, බිත්තර කහ මද සහ සිහින්ව කපාගත් ළූණු එකතු කර හොදින් මිශ්‍ර කර අවශ්‍ය හැඩයට හැම්බර්ගර්ස් හදාගෙන ග්‍රිල් කරගන්න. නිතරම දෙපැත්ත පෙරළීම හෝ තද කිරීම නොකරන්න. මෙය පාන්, සැලඩ් සහ බේක් කරගත් බතල සමග ආහාරයට ගන්න පුළුවන්.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ස්නැක් රෙසිපි – මස් වර්ග භාවිතයෙන් හදන රසම රස කෑම appeared first on familylife.

Coco (2017)

සම්මාන ගණනාවක් දිනාගත්ත ඇමෙරිකන් ඇනිමේෂන් චිත්‍රපටයක් වෙන මෙයින් කියවෙන්නේ අවුරුදු 12ක් වයසැති මිගෙල් කියන පිරිමි ළමයෙක් සහ එයාගෙ පවුල ගැන කතාවක්. වැරදීමකින් මළවුන්ගේ ලෝකයට යන මිගෙල්ට සංගීතඥයෙක් වෙන එයාගේ මී මුත්තව මුණ ගැහෙනවා. ලොකු වැරදි වැටහීමක් නිසා මිගෙල්ගේ හත්මුතු පරම්පරාවම සංගීතයට වෛර කරන අතරේ ගායකයෙක් වාදකයෙක් වෙන්න ආසාවෙන් ඉන්න මිගෙල් පවුලේ අය එක්ක තරහවෙනවා. ජරමර ගොඩකින් පස්සේ අවසානයේ මේ ප්‍රශ්න ඔක්කොම විසදෙන විදිය හරිම අපූරු විදියට නිර්මාණය වෙලා තියෙනවා. ඒ විතරක් නෙවෙයි ලස්සන සිංදු කිහිපයකුත් මේ චිත්‍රපටයේ අඩංගුවෙනවා. 

The Croods (2013)

දවල් කාලයේ කෑම ටිකක් හොයාගන්න පුදුමාකාර විදියට උත්සහ කරන ගල් යුගයේ පවුලක් රාත්‍රියට ගල් ගුහාවක ගුලිවෙලා නිදා ගන්නවා. මොකද ගින්දර ගැන දන්නෙවත් නැති එයාලා රාත්‍රී කාලයට බයයි. මෙහෙම ජීවත්වෙන අතරවාරයේ මෙයාලගෙ නිවහන විනාශ වෙලා මේ පවුලට අලුත් පළාතකට යන්න වෙනවා. වෙනස්ම විදියේ පරිසරයකට යන මෙයාලට තවත් අමුත්තෙකුත් මුණ ගැහෙනවා. අලුත් පරිසරයේදි මුහුණ දෙන්න වෙන සිදුවීම් ගැන තමයි චිත්‍රපටයෙන් කියවෙන්නේ. හාස්‍යජනක සිදුවීම්වලින් පිරුණු මේ ඇනිමේෂන් චිත්‍රපට නිර්මාණයේ දෙවන කොටසත් 2015 නිකුත්වෙලා තියෙනවා.

Up (2009)

කාල් ෆ්‍රෙඩ්‍රික්සන් කියන වැන්දඹු සීයා කෙනෙක් සහ රසල් කියන බෝල ගෙඩියක් වගේ දගකාර කොලු පැංචෙක් බැලුම් බෝල ගැටගහපු ගෙදරක නැගලා පියාඹගෙන ගිහින් කරපු හපන්කමක් ගැන තමයි මේ චිත්‍රපටයෙන් පෙන්වන්නේ. කාල්ගේ මියගිය බිරිඳගේ බලාපොරොත්තුවක්, එහෙමත් නැත්තන් හීනයක් හැබෑ කරන්න තියෙන උවමනාව නිසා දකුණු ඇමෙරිකාවට තමයි මෙයාලා පියාඹන්නේ. ඉතාම විනෝදජනක සහ සංවේදී සිදුවීම් සහිත චිත්‍රපටයක් විදියට හදුන්වන්න පුළුවන් මේ චිත්‍රපටය සම්මාන රාශියකටත් නිර්දේශ වෙලා තියෙනවා.

Ratatouille (2007)

රැටටුලි කියන්නේ ප්‍රංශයේ බොහොම ජනප්‍රිය කෑම වර්ගයක්. ඒ වගේම මේ චිත්‍රපටයෙන් කියවෙන්නේ රැටටුලි වගේම තවත් කෑම ජාති ගොඩක් රසට හදන්න දක්ෂ, කවදා හරි චෙෆ් කෙනෙක් වෙන්න හීන මවන රෙමි කියන මී පැංචෙක් ගැන. එයාගේ හීනේ හැබෑ කරගන්න උදව් කරන්නේ පැරීසියේ අවන්හලක වැඩ කරන ඇල්ෆ්‍රෙඩො කියන තරුණ කුණු කසළ ඉවත්කරන තරුණයා. ඒ වසරේ නිමැවුනු ඇනිමේෂන් චිත්‍රපට අතරින් සම්මාන කිහිපයක්ම දිනා ගත්ත මේ චිත්‍රපටය බලන්න කිසිම කෙනෙක් අකමැති වෙයි කියලා නම් හිතන්න අමාරුයි.

Chicken run (2000)

ට්වීඩි කියන නපුරු අයිතිකාර යුවළක් පාලනය කරන ගොවිපොළක ජීවත්වෙන කුකුළු රංචුවක් ගැන තමයි මේ චිත්‍රපටය ගොඩ නැගිලා තියෙන්නේ. මේ අයිතිකාර ජෝඩුව තීරණය කරනවා වැඩි ලාබ ලබාගන්න කුකුළොන්ව මස් කරලා විකුණන්න. භීතියට පත්වෙන කුකුළු රංචුව ගොවිපොළෙන් පැනලා යන්න තීරණය කරනවා. හැමදාම අසාර්ථකත්වයට පත්වෙන මෙයාලට අන්තිමේ තියෙන එකම බලාපොරොත්තුව තමයි රොකී කියන කුකුල් තරුණයා. කුකුල් රංචුව පැනලා දරන උත්සහයත්, ඒ උත්සහය සාර්ථක වෙනවද කියන එකත් දැනගන්න නම් මේ ලස්සන චිත්‍රපටය බලන්නම වෙනවා. 

Tangled (2010)

ජර්මානු සුරංගනා කතාවක චරිතයක් වෙන රපුන්සල් කියන කුමාරිකාව ප්‍රධාන කරගෙන තමයි මේ චිත්‍රපටය නිර්මාණය වෙන්නේ. කුඩා කාලයේම රාජ මාළිගාවෙන් පැහරගෙන රපුන්සල්ව එක්ටැම්ගෙයක හිරකරගන්න නපුරු මායාකාරියක් රපුන්සල්ගේ ලස්සන දිග මැජික් කොණ්ඩය තරුණබව ලබා ලබාගන්න පාවිච්චි කරනවා. මේ ලස්සන කුමාරිකාවගේ අවාසනාවන්ත ඉරණම සම්පූර්ණයෙන් ම වෙනස් වෙන්නේ ෆ්ලින් කියන කඩවසම් තරුණ හොරා මුණගැහීමෙන් පස්සේ. මේ චිත්‍රපටයට කාන්තා පාර්ශවය නම් වැඩිපුර කැමතිවෙයි කියලා අපි හිතනවා.

Zootopia (2016)

සූටොපියා නගරයේ පොලිසියට එකතුවෙන පළමු හා නිළධාරිනිය වෙන නිර්භීත ජුඩි සහ, වංචාවෙන් ජීවත්වෙන නරියෙක් වෙන නික් කියන දෙන්නා එකතුවෙලා අතුරුදහන් වූ විලෝපික සත්තු 14 දෙනෙක් සොයාගැනීම පිළිබද අපරාධය පරීක්ෂණයක් විසදන විදිය තමයි මේ චිත්‍රපටයේ කතාව වෙලා තියෙන්නේ. හිනාවෙන්න කැමති අයට කියාපු චිත්‍රපටයක් විදියට සූටොපියා පෙන්වන්න පුළුවන්. ඒ වගේම මේකේ දෙවන කොටසත් නිෂ්පදනය කරනවා කියලා තමයි ආරංචිය තියෙන්නේ. 

Shaun the sheep (2015)

 2007 ටීවී සීරිස් එකක් විදියටත් 2015 දි චිත්‍රපටයක් විදියටත් නිර්මාණය වුණු මෙයින් කියවෙන්නේ ගොවිපොළක ජීවත්වෙන බැටළු රංචුවක්, එයාලව බලාගන්න බල්ලෙක් (බිට්සර්‍ර්), අයිතිකාරයා සහ ඌරන් කිහිපදෙනෙක් ගැනයි. පුදුමාකාර කරදරකාරයෝ වුණු මෙයාලගේ දගකාරකම හන්දම සිහි විකල් බවට පත්වුණු මෙයාලගේ අයිතිකාරයා නගරයක අතරමං වෙනවා. අතුරුදහන් වුණු තමන්ගේ අයිතිකාර ගොවියාව හොයගෙන ශෝන්, බිට්සර් ඇතුළු බැටළු රංචුව නගරයට යෑමේ කතාව තමයි මේ චිත්‍රපටයට පාදක වෙලා තියෙන්නේ. 2019 දි මෙහි දෙවන කොටසත් නිර්මාණය කරලා තියෙනවා.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ඇනිමේෂන් චිත්‍රපට බලන්න කැමති සැමට මෙන්න හොඳම එකතුවක් appeared first on familylife.

විවාහයෙන් පස්සේ වගකීම් වැඩි වෙලා, දරු මල්ලොන්ගේ, පවුලේ සහ රැකියාවේ වැඩ කටයුතු බහුල වෙද්දි තමන්ගේ සැමියා/ බිරිද සහ දරුවෝ වෙනුවෙන් ම වැය කරන්න දවසක් ලැබෙනවා නම් කොයි තරම් සතුටක් ද කියන කාරණය වැටහෙන්නේ ඒ අත්දැකීම ලබන කෙනෙක් ම විතරයි. familylife.lk අපි මේ ලිපියෙන් කතාකරන්නේ ආදරවන්තයින්ගේ දිනයේදි පවුලේ අයත් එක්ක එකතුවෙලා ආදරෙන් සහ සතුටෙන් පිරී ඉතිරුණු සුන්දර දවසක් ගත කරන්න පුළුවන් ක්‍රම කීපයක් ගැනයි. පෙබරවාරි 14 නිවාඩු දවසක් නොවෙන හන්දා මේ එන සති අන්තය හෝ මේ වෙනුවෙන් වෙන් කරගත්තටත් කිසිම වැරැද්දක් නෑ.

ආදරණීය ආහාර වේලක්/ විශේෂ ආහාරයක්

හැමදාම උදේ පාන්දර නැගිටලා හදිසියේ හදාගන්න කෑම පාර්සලය වෙනුවට නිවාඩු දවසේ කට්ටියත් එක්කම ටිකක් වැඩිපුර නිදාගෙන නැගිටලා වෙනදට හදන්නේ නැති සරල කෑම වේලක් පිළියෙල කරගන්න. වෑංජන ගොඩක් අවශ්‍ය නැති, ලේසියෙන් හදගන්න පුළුවන් විශේෂ බත් වර්ග හදන ක්‍රම අන්තර්ජාලයේ තියෙනවා. දවල් කෑමට පොඩි වෙලාවක් අරන් එහෙම දෙයක් හදාගන්න උත්සහ කරන්න.

නිතරම පිළියෙල කරන්නේ නැති පීසා (අවශ්‍ය රොටී වර්ගය මිලදි ගන්න පුළුවන්), ස්ප්‍රින් රෝල්ස් (ශීට්ස් මිලදී ගන්න පුළුවන්), බිත්තර ආප්ප වාගේ ගෙදර හැමෝම කන්න කැමති දෙයක් රාත්‍රී ආහාරයට පිළියෙල කරගන්න පුළුවන්නම් ඒකත් හොද වෙනසක් වේවි. මේවා හදන්න අවශ්‍ය බඩු කලින් ගෙනත් තියාත්තනම් වගේම කට්ටියම සහයෝගයෙන් කෑම හදන වැඩේ කරනවනම් තවත් වටිනවා. තමන්ට වියද කරන්න පුළුවන් ආකාරයට, කාලය යොදවන්න පුළුවන් ආකාරයට කෑම බීම හදාගන්න උත්සහ කරන එක තමයි වඩාත්ම සුදුසු කියලත් අමතක කරන්නෙපා. 

තමන්ම නිර්මාණය කරපු කාර්ඩ් පතක් / කුඩා තිළිණයක්

විශාම වියදම් දැරීම නම් කොහෙත්ම අවශ්‍ය නෑ. පොඩ්ඩෝ එක්ක එකතුවෙලා ගෙදර තියෙන දේවල්වලින් ම ලස්සනට කාර්ඩ් එකක් හදලා තමන්ගේ බිරිදට/ සැමියට තමන් කොච්චර ආදරේ කරනවද කියන එක සටහන් කරලා දෙනවනම් ඒ ප්‍රමාණවත්. සුළු මුදලකට පොතක්, විසිතුරු ආභරණයක්, පැළයක්, සුවද විලවුන් බෝතලයක් වගේ දෙයක් කැමැත්ත අනුව තෝරාගන්න පුළුවන්.

මූවි ටයිම්

පවුලේ කට්ටියම එකතු වෙලා ගෙදරම ඉදන් චිත්‍රපටයක් බලන්න උත්සහ කරන්න. ගෙදරදීම පොප් කෝර්න් හදාගන්න එකත් ගොඩක් ලේසියිනේ. කැමතිනම් කට්ටියම එළියට ගිහින් ෆිල්ම් හෝල් එකකින් බැලුවත් වැරැද්දක් නෑ. රෑ වෙලා පොඩ්ඩෝ නිදාගත්තම දෙන්නා එක්ක එකතුවෙලා රොමෑන්ටික් මූවි එකක් බලන එකත් හොද අත්දැකීමක් වේවි.

ෆොටෝ ශූට් එකක්

ලොකු ලොකු කැමරා නම් ඕනිම නෑ. මේකට ෆෝන් එකේ කැමරාව හොදටම ප්‍රමාණවත්. සතුටින් ගෙවන දවසේ සුන්දර මොහොතවල් පින්තූර අරගෙන තියාගන්න එක සුන්දර සිහිවටනයක් විදියට ගොඩක් වටීවී. 

පොඩ්ඩෝ එක්ක සෙල්ලමක්

වෙනදට සෙල්ලම් කරන්නේ පොඩ්ඩෝ විතරනේ. ආදරවන්තයින්ගේ දිනය අම්මයි තාත්තයි බබාලයි හැමෝම එකතුවෙලා සෙල්ලම් කරන්නත් පැයක්වත් වෙලාව වෙන්කරගන්න. ගෙදර සංගීත භාණ්ඩ තියෙනවනම් ඒවා වාදනය කරන ගමන් සින්දුවක් එහෙම කියන්නත් තහනමක් නෑ. මේ වගේ සුළු දේවලින් දරුවෝ සතුටු වෙන තරම ඔබට අදහගන්නවත් බැරිවෙයි.

පික්නික් එකක්

ලොකු දුරකට පික්නික් යන්න ඕනි නෑ. මිදුලේ හෙවණ තියෙන ගහක් යට පිරිසිදු කරගෙන, කෑම බීම අරගෙන නිදහසේ පැයක් දෙකක් විවේකයෙන් ගත කරන එක පවුලේ හැමෝටම සුන්දර අත්දැකීමක් වෙන්න ඉඩ තියෙනවා. අවශ්‍ය නම් ඩේ අවුට් එකක් වගේ පිටතට ගිහින් කාලා බීලා විනෝදවෙලා වුණත් එන්න පුළුවන්. 

දෙන්නගේ ආදර කතාව

අම්මයි තාත්තයි මුණගැහුණු විදිය කියලා දෙන්න පුළුවන් තරම් වයසක බබාලා ඉන්නවනම් ඔන්න ඒ කතන්දරේ එයාලට කියලා දෙන්න පුළුවන්. ඒ කාලේ රසවත් සිදුවීම් සිහිකරන එක ඔබටත් සතුටුදායක මොහොතක් වේවි. 

පරණ පින්තූර

ආදර කතාව කියන ගමන් ඒ කාලේ ෆොටොස් ටිකත් බැලුවනම් ආදරේ තවත් අලුත් වෙන්න ඉඩ තියෙනවා. වෙඩින් ඇල්බම් එක, වීඩීයෝ එක එහෙමත් බලන්න වෙලාවක් වෙන්කරගන්න පුළුවන් නම් තවත් වටිනවා.

ෆෝන් තහනම්

තමන්ගේ පවුලේ අය වෙනුවෙන් වෙන් කරන සුන්දර දවසේ ජංගම දුරකථනය, සමාජ ජාල වෙබ් අඩවි, නිමාවක් නැති දුරකතන ඇමතුම් ඉවත්ම කරලා දානවා නම් ඒ දේ විශාල සහනයක් වෙන්න ඉඩ තියෙනවා. 

ආදරේ තරම් මෙච්චරයි.

තමන්ගේ බිරිදට / සැමියාට / දරුවන්ට තමන් කොච්චර ආදරේ කරනවද, තමන්ට ඔවුන් කොයි තරම් වටිනවද, ඔවුන් සමගින් කාලය ගත කරන එක තමන්ට කොයි තරම් සතුටක්ද කියන කාරණය ගැන හෙළිකරන්න මැළිවෙන්න එපා. නොහිතන තරමේ වෙනසක් ඔබට අතවිදින්න හැකියාව ලැබේවි.

සතුටු දේවල් විතරමයි

මේ දිනය ඇතුළත හැකිතරම් සතුට, සැනසීම සහ සෙනෙහස ගෙනෙන දේ විතරක් කියන්න කරන්න උත්සහ කරන්න. තමන්ගෙන් සිදුවෙන සුළු සුළු වැරදි, හිත් රිදිම් වළක්වා ගන්නත්, අනෙක් අයගෙන් සිදු වෙන එවැනි අතපසුවීම්  නොසළකා හැර සමාව දෙන්නත් කාරුණික වෙන්න. 

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post ආදරවන්තයින්ගේ දිනය පවුලේ අයත් එක්ක එකතුවෙලා සමරන්න කැමති ද? appeared first on familylife.

FB එක නිසා හුදකලා වෙලා තිබුණු ජීවිත වලට අලුත් online ජීවිතයක් ලැබිලා තියෙනවා. මේ අතරෙ විවිද තරාතිරමෙ විවිධ අධ්‍යාපනික මට්ටම්වල, විවිධ රැකියාවල නිරත ⁣වන අය ඉන්නවා. ඒ වගේම ගෙදරට වෙලා ළමයි එක්ක කුස්සියේ වැඩ ටිකත් කරගෙන හුදකලා ජීවිත ගත කරන අයත් ඉන්නවා. ⁣ගෙදර ළමයි බලා ගෙන ඉන්න ගෑණු නුගත් ගෑණු, රස්සාවල් කරන අය මාර වැදගත් උගත් කියලා එක එක මිනුම් දඩු හදාගෙන අනෙකාව පහත් කිරීම නිසා මේ group ඇතුලෙ බුකි වලි වලට හේතු වෙනවා.

තමන් කරන කියන දේ සහ තමන්ගේ මතය පමණක් නිවරදි කියන පදනම වැරැදී කියන දේ ගොඩක් අය දන්නෙ නෑ. උගත්කම්, දැනුම තියාගෙන ගෙවල් වල ළමයි බලාගෙන ඉන්න අය කොච්චර නම් ඉන්නවද. අනික හැම ගෑණියෙක්ටම කතාවක් තියෙනවා. ඒ කතාව එකිනෙකාගෙන් එකිනෙකාට වෙනස් වෙනවා. ඒ වෙනස කෙනෙක් හරි වෙන්නවත් වැරදි වෙන්නවත්, පොෂ් වෙන්නවත් ගොඩේ වෙන්නවත් හේතුවක් නෙමෙයි.

අනික ගොඩක් ගෙදර හුදකලා ජීවිත ගත කරන අයට පොඩි බිස්නස් එකක් කරගන්නත් දැන් ඉඩකඩ ලැබිලා තියෙනවා. ඒ ගොල්ලො තමන්ගෙ මාකට් එක හදාගෙන මාර තරඟයක් (startup competition) එකකුත් ගොඩ නගාගෙන යනවා. likes පොරය පටන් ගන්නෙ ඔතෙන්දි තමයි. මේ අතරෙ කිසිම තරඟයකට සුදානමක් නැති හුදෙක් විනෝදාංශය තකා page maintain කරගෙන අනිත් අයගේ දුක සතුට බෙදාගෙන online සැරිසරණ ජීවිතත් තියෙනවා.

ඉතින් ඔය group ඇතුලෙ page ඇතුලෙ කෙහෙවලු පටලව ගන්න එන්නෙ තව කෙනෙක්ගෙ දියුණුව දක්ෂකමක් බලා ඉන්න බැරි උනාම. ඒ වට මැදි උනාම අර කිසිම ආර්තික වාසියක් බලාගෙන මේවයෙ සැරි සරණ ජීවිතවල හිත රිදෙනවා, කනස්සල්ලට පත් වෙනවා. online කියලා ඉතින් වෙනසක් නෑ, ගමක, office එකක කොහේ උනත් තව කෙනෙක්ගෙ දියුණුවක් දක්ෂකමක් බලන් ඉන්න බැරි ගෑණු කොච්චර නම් ඉන්නවද?

අනිත් කාරනේ තමයි online යාළුකම් හරි ඉක්මනට ගොඩනැගෙනවා. කවදාවත් අහලවත්, දැකලවත් නැති අය group හරහා අලුත් යාළුවො විදිහට FB එකෙන් රින්ගනවා. FB එකට රිංගුවා කියන්නෙ තමන්ගෙ ජීවිත වලටත් ඇතුලු වෙනවා. එතනදි නම් ටිකක් පරිස්සන් වෙන්න ඔනි. මොකද ගොඩක් අය තමන්ගෙ ජීවිතේ wall එකේ දානවනේ. දුක බෙදා ගන්න, උපදෙස් දෙන්න ගොඩක් අය ඉදිරිපත් වෙනවා. එතනදි ගෑණු පිරිමි දෙගොල්ලොම මේ විදිහට ජීවිත ඇතුලට එන්න පුලුවන්.

ඒක නිසා හොදට නරකට දෙකටම මේක බලපාන්න පුලුවන් කියන අවබෝධයෙන් online සැරි සරනවානම් මේ බුකියෙ ඉහ ගහගෙන ඉන්න පුලුවන්. ගෑහැණුන්ට එරෙහිව ගැහැණුන් වගේම, ගෑණු වෙනුවෙන් පිරිමි එක්ක වලියට යන නෝනලත් ඔනි තරන් හම්බ වෙනවා. පහු ගිය දවසක යකඩ ගැහැණුන් සහ බොලඳ ගැහැණුන් ගැන සමන් එදිරිමුණි කියන රචකයගේ ලියවිල්ලක් නිසා ලොකු ආන්දෝලනයක් බුකිය ඇතුලෙ ඇති උනා. ලෝකෙ යකඩ ගැහැණුන් බිහිවෙලා තියෙනවා. ඒවට බලපාන සමාජ ආර්ථික ආගමික දේශපාලනික හේතු තිනෙවා. ඒ ගැන හැදෑරීමක් නැතුව ඒ මහත්තයා යකඩ ගැහැණුන් කියලා කෙනෙක් නෑ කියලා, ගැහැණුන් බොලද වන විට පිරිමියාගේ ගෞරවය ඔවුන්ට ලැබෙනවා කියන පදනමින් තමයි ඒක ලියලා තිබුනෙ. අන්න එතෙන්දිනම් අපේ කාන්තාවො ටිකට හොදටම තරහා ගිහින් තිබුනා.

ඔහුගේ ලියවිල්ලෙන් කොටසක් මම මෙහි උපුටා දක්වන්නම්….

“විප්ලව මෙහෙයවන ගැහැණු දරුවනි, මුලින්ම ගවුම හදාගෙන වාඩි වෙන්න.

ගැහැණු උපතින්ම ළඳබොළඳය. සියුමැලිය. මෘදුය. සුන්ඳරය. ලාලිත්‍යානුකූලය. ඔවුහු ගස් ගල් වගේ නොවෙති. ඔවුන් ලතාවෝ වෙති. රළු සුලං නොවෙති. මල් සුවඳ රැගත් මදපවනම වෙති. ශක්ති සම්පන්න භාවය අතින් පවා ඉතාම ඉතාම ඉතාම අල්පමාත්‍රීය අවස්ථාවකදී හැරුණු කල අන් සෑම අතින්ම ගැහැණිය පිරිමියාට වඩා ළපටිය. ඔවුන්ට ගැහැණුන් කියන්නෙ ඒ නිසාය. “

– සමන් එදිරිමුණී –

ඔහුගේ මතය විවේචනය කරමින් කාන්තාවො රැසක් ඔහුට එරෙහිව රචනා පිට රචනා බුකිය පුරාම ලියල තියනවා දුටුවා. බුකිය තුල අරගල කරන කාන්තාවනි. ගැහැණුන් ලෙස අරගල කල යුතුව ඇත්තේ මෙවන් ලියවිලි වලට බැණ වැදීමටවත්. පිළිතුරැ දීමටවත් නොව තමන් තුලම අරගලය දියත් කිරීමටයි. ජිවිතය දිනා ගත යුත්තේ තමන් සමග සටන් කිරීමෙන්ම පමණි.

ජීවන අරගලය හමුවේ වේගයෙන් වෙනස් වෙන සමාජ හැලහැප්පීම් හමුවෙ අපේ ළමයි රැක ගත යුතුව තියෙනවා. මේ උඩු දුවන තරගකාරීත්වය හමුවේ ඔබේ අපේ දරැවන් සංවේදී මිනිසුන් ලෙස ගොඩනගන්න අරගල කරන්න. ඔබේ ළමයි හැම අතින්ම හොද නිෂ්පාදනයක් ලෙස ගොඩ නගන්න. කකුල් දෙක ලන් කරගෙන ගවුම හදාගෙන වාඩි වෙලා ඉන්න වෙලාවක් නැති වෙයි. මෙවන් ලියවිලි වලට පිලිතුරැ බැදිය යුත්තේ කිුයාවෙන්මය. යකඩ ගැහැණුන්ට බය වෙන එක පිරිමි ස්වාභාවයක්. හැබැයි කකුල් ලං කරගෙන දෙවෙනි ඉනිම බලන අක්කලා නංගිලාට නම් මේ කියපු එක වැටහෙයිද දන්නෙ නෑ.

දැනෙනව නම් ශෙයා කරන්න

The post යකඩ ගැහැණුන් සහ බොලඳ ගැහැණුන් – ඔන්ලයින් අහස යට 6 appeared first on familylife.

කොරෝනා වෛරසයක් යනු කුමක්ද?

කොරෝනා වෛරසයක් වශයෙන් හඳුන්වනු ලබන්නේ සුවිශේෂ වශයෙන් මිනිසාගේ ශ්වසන පද්ධතිය වෙත බලපෑම් ඇති කරන තනි දාමයක් සහිත RNA ( RiboNucleic Acid) වෛරස් තත්ත්වයකි. මෙම කොරෝනා වෛරස් බහුලව දක්නට ලැබෙන්නේ වවුලන් අතරය.මේ වන විට හඳුනාගත් කොරෝනා වෛරස විශේෂ රාශියක් වවුලන් අතර සුලභව දක්නට ලැබෙන අතර නව කොරෝනා වෛරසයද වවුලන් මගින් මිනිසුන්ට සම්ප්‍රේෂණය වී ඇති බව මේ වන විට අනුමාන කරයි.

මීට පෙර ආසන්නතම කොරෝනා වෛරස් උවදුර ලෙස පැතිර ගිය මර්ස් (Middle East respiratory syndrome – MERS) වෛරස් තත්ත්වයද වවුලන් හරහා ඔටුවන්ටද, ඔටුවන් මගින් මිනිසුන්ටද සමිප්‍රේෂණය වී ඇති බව සොයාගෙන ඇත. මේ වෛරස් තත්ත්වයන්ට කොරෝනා නමින් නම් ලැබීමට ප්‍රධාන හේතුව වෛරස් ස්වභාවය දැකගත හැකි ඉලෙක්ට්‍රොනික් අන්වීක්‍ෂයන් තුලදී මෙය ඔටුන්නක හැඩය ගැනීමයි. 

කොරෝනා වෛරස් අලුත් දෙයක්ද?

නැත. කාලානුරූපව ඉතිහාසයේ පටන් කොරෝනා වෛරස් තත්ත්වයන්ට මිනිස් සංහතිය මුහුණ දී ඇති අතර පරිණාමයත් සමගම දැන් ප්‍රධාන කොරෝනා වෛරස් වර්ග හතරක් මිනිස් ශරීරය තුලද පවතින බව විද්‍යාඥයින් සොයාගෙන තිබෙනවා. ඒවා නම්

• HCoV-HKUI
• HCoV-OC43
• HCoV-NL 63
• HCoV-229E

වන අතර මෙම වෛරස මගින් සෙම්ප්‍රතිශ්‍යාව වැනි සුළු රෝගී තත්ත්වයන් පමණක් ඇති කරනු ලබයි. මෙම කොරොනා වෛරස් තත්ත්වයන් හඳුනාගැනීම සඳහා ශ්‍රේෂ්ඨ ශ්‍රී ලාංකික විද්‍යාඥයෙක් වන මහාචාර්ය ජෝසප් ශ්‍රියාල් මලික් පීර්ස් මහතා දක්වා ඇති ඉමහත් දායකත්වය පිළිබඳවද මතක් කළ යුතු වනවා. 

මීට අමතරව ලෝකයේ මිනිස් සංහතියට ඉතා දරුණු බලපෑමක් එල්ල කරන ලද 2002 – 2003 වසර වල මිනිසුන් 650කට අධික පිරිසකට මරු කැඳවමින් චීනය හා හොංකොං ආශ්‍රීතව පැතිර ගිය සාස් (Severe Acute Respiratory Syndrome – SARS) සහ 2012 – 2015 අතර කාලයේ රෝගීන් 800 ක් පමණ මරණයට පත් කරමින් සවුදි අරාබියේ ද පසුව මැද පෙරදිග, අප්‍රිකාව, ආසියාව සහ යුරෝපයේ වෙනත් රටවල ද පැතිර ගිය මර්ස් (Middle East Respiratory Syndrome – MERS) වෛරස් තත්ත්වයන් දෙක මෑත කාලයේ ඇතිවූ දරුණු කොරෝනා වෛරස් උවදුරු දෙක ලෙස හඳුන්වන්නට පුළුවන්. 

රෝගය මිනිසුන් අතර පැතිරෙන්නේ කෙසේද?

මෙම වෛරසය ප්‍රධාන වශයෙන් පැතිර යන්නේ බිඳිති වශයෙන් ආසාදිතයන්ගෙන් පිටවන සෙම, කෙල, කිවිසුම් යැවීමේදී පිටවන සොටු යන මාර්ග වලිනි. යමෙකු කිවිසුම් යවන විට, කහින විට, මෙන්ම මෙම ශ්‍රාවයන් ස්පර්ශ කර වෙනත් ස්ථාන ඇල්ලීම, වැනි ක්‍රියා මගින් මෙම වෛරසය පැතිරේ.

ඔබට කැස්සක් හෝ කිවිසුමක් ඇති වන්නේ ශරීරයට අනවශ්‍ය යමක් පිටකිරීම වෙනුවෙන් වුවද මෙම වෛරසය ඒ පිටවන දේ වාහකයන් ලෙසින් යොදාගෙන පැතිරීම සිදු කරයි. ඒ අනුව වෛරසය ඇතුල් වීම,

ඝෘජුවම – ශ්වසන බිඳිති හරහා

වක්‍රව – ආසාදිත දෑ ඇල්ලීමෙන් පසුව නාසය, මුඛය ස්පර්ශ කළ විට (ස්පර්ශය හරහා) සිදුවේ.

නව කොරෝනා වෛරසය ආසාදිතයෙකුගේ රෝග ලක්‍ෂණ මොනවාද?

• ඇඟපතෙහි ඇතිවන කැක්කුම
• හොටු ගැලීම ඇතුළු සුළු සෙම්ප්‍රතිශ්‍යා තත්ත්වයන්
• කැස්ස සහ උගුරේ ආමාරුව
• උණ ගතිය (මෙහිදී සමහරුන්ට තද උණ හටගන්නා නමුත් සමහරෙකුට සාමාන්‍ය උණ ගතියක් වුවු ද පැවතිය හැක.)
• දරුණු නිවුමෝනියා තත්ත්වයද ඇතිවිය හැකිය

මෙහිදී ප්‍රධාන ආසාදිත කාන්ඩ දෙකක් හඳුනාගත හැක.

• රෝගයේ මූලික අවස්ථාවේදීම රෝග ලක්‍ෂණ පෙන්නුම් කරන රෝගීන්
• රෝගය ආසාදිත මුත් රෝග ලක්‍ෂණ පෙන්නුම් නොකරන රෝගීන් 

වෛරසයෙන් ආරක්‍ෂාව වීම සඳහා ගත හැකි ක්‍රියාමාර්ග මොනවාද?

කොරෝනා වෛරසය සඳහා සාමාන්‍ය සෙම්ප්‍රතිශ්‍යාවකට ප්‍රතිකාර කරන ආකාරයට අමතරව විශේෂ කිසිදු සාර්ථක ඖෂධයක් මේ වන තෙක් සොයාගෙන නොමැත. එබැවින් වෛරසය ආසාදනය වීම වළවක්වා ගැනීමට කටයුතු කිරීම ඉතා වැදගත් වේ. මේ සඳහා ප්‍රධාන වශයෙන් සිදුකළ යුතු වන්නේ එදිනෙදා යහ පැවැත්ම රැක ගැනීමයි.

• කහින විට හෝ කිවිසුම් යවන විට නිතර ලේන්සුවක් භාවිතා කරන්න. ලේන්සුවක් ළඟ නැත්නම් අතෙහි වැලිමිට මුවට තබා කිවිසුම් පිටකිරීම සිදුකරන්න

• හැකි සෑම විටම හොඳින් සබන් හෝ විෂබීජ නාශක භාවිතයෙන් අත් සෝදන්න 

මෙම කාරනය ඉතාමත් වැදගත් වේ. විශේෂයෙන් නිසිපරිදි විෂබීජ නොරැදෙන්නට අත් සේදීමට බොහෝ දෙනා නොදනිති. හොඳින් සබන් හෝ විෂබීජ නාශක දියරයක් යොදා අතෙහි අත්ල මෙන්ම ඇඟිලි අතර මෙන්ම පිටි අල්ලද සේදිය යුතුය. සමහරුන් ඉතා ඉක්මනින් අත් සේදීමෙන් විෂබීජ ඉවත් වීම සිදු නොවේ. මේ නිසා කිහිප විටක් ඒ ගැන සැලකිල්ලෙන් අවම වශයෙන් තප්පර 40ක් හෝ 60ක් අතර කාලයක් හොඳින් අත් සේදිය යුතුය. විශේෂයෙන් පාසැල් යන ඔබේ දුවාදරුවන් මේ පිළිබඳව දැනුවත් කරන්න. 

• නිතර නාසය ඇල්ලීම, තැන තැන කෙළ ගැසීම ආදිය නොකරන්න

• මෙම වෛරසය ආසාදනය වූවන්ට ඇතිවන කුමන හෝ රෝග ලක්‍ෂණ පවතින්නේ නම් ඉක්මනින් වෛද්‍යවරයෙකු වෙත යොමුවන්න.

• ඔබට වෛරසය වැළඳී ඇති බවට තහවුරු වුවහොත් ජනාධික ප්‍රදේශ වල ගැවසීමෙන් වැලකී අන් පුද්ගලයන්ගේ ආරක්‍ෂාව වෙනුවෙන් ඔවුන්ගෙන් ඈත්වී අවශ්‍ය ප්‍රතිකාර සඳහා අදාල සෞඛ්‍ය අංශ වෙත යොමුවන්න.

මේ වන විට ශ්‍රී ලාංකිකයන් දෙදෙනෙක් අසාදනයට ලක් වීමත් සමග රට තුළ නොසන්සුන් තත්ත්වයක් හටගෙන තිබෙනවා. නමුත් නිකරුනේ කලබල වී අනවශ්‍ය බියක් ඇතිකර නොගත යුතුය. විමසිල්ලෙන් මෙන්ම පුරවැසියන් ලෙස මනා සෞඛ්‍ය පුරුදු අනුගමනය කරමින් තමාගේ මෙන්ම අනොකාගේ සෞඛ්‍යටද හානි නොපැමිණෙන ලෙස වගකීමෙන් කටයුතු කිරීම මෙවැනි උවදුරු අවස්ථාවක අප සැමගේ වගකීමයි. 

මෙම ලිපිය සැකසීමේදී සිය දැනුම නොමසුරුව ලබා දෙමින් අනුරාධපුර ශික්ෂණ රෝහලේ වෛරස වේදය පිළිබඳ විශේෂඥ වෛද්‍ය සාරංග සුමතිපාල මහතා දැක්වූ සහයෝගයට familylife.lk අපගේ ස්තුතිය මෙසේ පළකරමු.

අවධානමට පෙර සූදානම සඳහා පහත මාධ්‍ය ඔස්සේ හැකිතාක් ෂෙයාකරන්න.

The post කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න appeared first on familylife.

මේ වන විට ලොව විවිධ රටවලින් මෙම රෝගීන් වාර්ථා වී ඇති අතර විදේශ මාධ්‍ය වාර්තා කරන අන්දමට දකුණු කොරියාව, හොංකොං, තායිවානය, තායිලන්ත, ජපානය වැනි චීනය ආශ්‍රීත රටවල් මෙන්ම ඇමරිකාවේ වොෂින්ටන් නගරයෙනුත් රෝගීන් වාර්ථා වී තිබෙනවා.
විශේෂයෙන් සාස් (Severe Acute Respiratory Syndrome – SARS), හා මර්ස් (Middle East respiratory syndrome – MERS) මෙන්ම පහසුවෙන් මිනිසෙකුගේ ශ්වසන පද්ධතියට හානි කළ හැකි මෙම වෛරසය මිනිසෙකුගෙන් මිනිසෙකුට පහසුවෙන් පැතිර යාමේ හැකියාව පවතිනවා.

මේ පිළිබඳ familylife.lk සම්පත් දායකයෙකු වන වෛද්‍ය හසින්ද උඩලගම මහතා සිය facebook පිටුවේ පළ කළ අදහසක් ඔහුගේ අවසරය ඇතිව අප පහතින් පළ කරන්නේ මේ පිළිබඳව ඉක්මනින් ඔබව දැනුවත් කිරීමට ඇති අවශ්‍යතාවය සලකා බලා. චීන වෛරසය නැතහොත් වූහැන් වෛරසය පිළිබඳ සවිස්තර ලිපියක් නුදුරේදීම ඔබ වෙත ගෙන ඒමට අප බලාපොරොත්තු වනවා.

වෛද්‍ය හසින්ද උඩලගම විසින් පළකළ සටහන –

චීන වෛරසය ගැන නිව්ස් ගොඩක් අය ශෙයාකරගෙන තියනව දැක්කා. ඒ සම්බන්ධව ලංකාවෙ තත්වය ගැන තවම හරියට දන්නෙ නෑ. තාම එහෙම ඒ වර්ගයේ වයිරස් සහිත ලෙඩ්ඩු නම් වාර්තා වෙලා නෑ. ඇඟේ හැප්පෙන ගානට දැන් චීන්නු ඉන්න නිසා අවදානමක් නෑමයි කියන්න බෑ.

එහෙම ලෙඩක් ආවත් ඉතින් කරන්න කියල විශේෂ දෙයක් නෑ. පැතිරෙන එක වලක්වන්න ක්‍රියාමාර්ග ගන්නයිතියෙන්නෙ. මේකත් ස්වසන මාර්ගය ආශ්‍රිත ලෙඩක්. ඒ නිසා වැඩිපුරම බෝවෙන්නෙ “බිඳිති” මාර්ගයෙන්. බිඳිති කියන්නෙ කෙල, සොටු, සෙම වගේ ස්වසන මාර්ගයෙන් නිපදවෙන දේවල්. මේ නිසා වෙනදා සාර්ස්, ඉන්ෆ්ලුවෙන්සා වගේ ලෙඩ වලදි කරපු ටිකම තමා කරන්න තියෙන්නෙ. නමුත් අපේ රටේ මිනිස්සු නොකරන එකම දේත් ඒක. මෙහෙම මොකක් හරි ලෙඩක් ගැන ආරංචියක් ආවම ගොඩක් අය කරන්නෙ පලවෙනි කිවිසුම ගියපු ගමන් ඩොක්ටර් කෙනෙක් ගාවට යන එක. ඒකෙ වැරැද්දක් කියන්නෙ නෑ. නමුත් ඒ අතරෙ වැදගත්ම කොටස ගොඩක් අය අතින් කෙරෙන්නෙ නෑ. ඒ කොටස තියෙන්නෙ ලෙඩාගෙ අතේ.

මෙහෙම මරණීය ලෙඩක් පැතිරෙන්න ඕනෙම නෑ. තමන්ට සෙම සෙම්ප්‍රතිශ්‍යා අසනීප තත්වයක් තියනව නම් අනේ අනිත් අයට බෝ නොකර ඉන්න බලන්න. මම දැකල තියනවා ගොඩක් අය ලේන්සු පාවිච්චි කරන්නෙ නෑ. “හා…ච්චෝ..!” ගාලා මුළු පලාතම හෙල්ලිලා යන්න තමා කිවිසුම් අරින්නෙ. අහල පහල ගෙවල් වල මිනිස්සුත් දන්නවා මේ මනුස්සයට හෙම්බිරිස්සාව හැදිලා කියලා. එච්චරට සද්දෙ. සද්දෙ වැඩියි කියන්නෙ “බිඳිති” පැතිරෙනවා වැඩියි. ඇත්තටම බිඳිති නෙමේ පැතිරෙන්නෙ සෙම බෝල බෝල.

කැස්ස නම් හෙම්බිරිස්සාව නම් ලේන්සුවක් පාවිච්චි කරන්න. හදිසියට ලේන්සුවක් නැත්නම් අතේ වැලමිටෙන් උඩ කොටසෙන් ආවරණය කරන්න. අත පාවිච්චි කරන්න එපා කියන්නෙ අතේ ගෑවෙන වයිරස් ඔයා අල්ලන අල්ලන තැන් වල තැවරෙන නිසා. ඒ තැන් අල්ලන අනිත් අයටත් ඒවා බෝවෙන්න පුලුවන්. හෙම්බා තියනවා නම් පුරුද්දක් විදියට නිතර නිතර අත සෝදන්න. මොකද ඔයා නොදැනුවත්ව කොහොමත් නහය අවට අල්ලන නිසා අත්වල විෂබීජ තියනවා. අසනීපයක් නැතත් මගතොටේ – බස්වල, පොලේ, කඩේ ගිහින් ආවම අත සෝදන එක පුරුද්දක් කරගන්න. දැන් කොහොමත් එක එක වයිරස් වැඩි නිසා නිකම් ලෙඩ වෙන එක අඩු කරගන්න ඒක උදව් වෙයි. පොඩි අයටත් මේවා පුරුදු කරන්න. පුලුවන් නම් හෙම්බා එක්ක ජොබ් එකට යද්දි මාස්ක් පාවිච්චි කරන්න.

මේ වගේ වසංගතයක් පැතිරෙනකොට සෙනග අතරෙ ගැවසෙන එක අඩු කරන්න ඕනෙ. මේ චීන වෛරසය වැඩිපුරම පැතිරිලා තියෙන්නෙ වෙලඳ සැල් හරහා. ෂොපින් කරන්න ගියාම රෝගීන් සහ නිරෝගී අය මුහු වෙනවා. චීනයෙ කට්ටිය මේ අවුරුද්දෙ මුල ලක්ෂ ගණනින් පිටරටවල් වල සංචාරය කරන්න නියමිතයි. මේ එයාගෙ නිවාඩු කාලයක්. ඒ නිසා තමා මේකෙ අවදානම වැඩි. ලංකාවටත් සෑහෙන පිරිසක් ඒවි. ලංකාවෙ පලවෙනි ලෙඩා වාර්තාවුණ දවසෙ ඉඳලා ශොපින් මෝල් වගේ විදේශිකයො වැඩිපුර ඉන්න තැන් වලට යන එක අඩු කරන්න වෙයි.

අනිත් කාරණය ඉතින් අහිංසක අපි (සෞඛ්‍ය සේවයේ අය) ගැනත් ඩිංගක් හිතන්න. ඇත්තටම කැස්ස තියනවා කියල කටින් කිව්වම ඇති. කැහැලා පෙන්වන්න ඕනෙ නෑ. කැහැලා පෙන්වන්නම ඕනෙ කියල හිතෙනවා නම් ලේන්සුවක් තියල කහින්න. අපි මාස්ක් දාගෙන ඉන්න එක ගැන මොනවත් හිතන්න එපා. වසංගතයක් ආවම ඒකෙන් ගොඩක්ම බැට කන කට්ටියක් තමා අපි. දොස්තරලා නර්ස්ලා ලෙඩ වෙලා නිවාඩු අරන් හොස්පිටල් එක අඩු ස්ටාෆ් එකකින් අමාරුවෙන් දුවලා රෝගී සත්කාරය ගැටළුවක් වෙනවට වඩා ස්ටාෆ් එක පරිස්සම් කරන එක වටිනවා. අපි මාස්ක් එකක් දාගෙන ඉන්න එක ගැනත් මොනවත් හිතන්න එපා. දෙගොල්ලන්ගෙම ආරක්ෂාවට තමා එහෙම මාස්ක් දාගෙන ඉන්නෙ. නැතුව ලෙඩ්ඩු ගැන අප්‍රියාවකට නෙමේ.

තමන්ගෙ ස්වසන – සනීපාරක්ෂාව ගැන මීට වඩා ටිකක් කල්පනා කරන්න. ගෝලීය උෂ්ණත්වය ඉහල යාමත් එක්ක ලොකු පොඩි වයිරස් ගොඩයි දැන්. ගොඩක් ඒවා ස්වසන මාර්ගය ආශ්‍රිත ඒවා. අවුරුද්දකට සැරයක් අලුත් වයිරස් එකක් අනිවාර්යයෙන් ජාත්‍යන්තර මට්ටමෙන් ව්‍යාප්ත වෙනවා. ලංකාවෙත් අවුරුද්දකට සැරයක් දැන් ඉන්ෆ්ලුවෙන්සා වසංගතයක් යනවාමයි. ඉතින් කෝකටත් කියල ඒ පැත්තෙ සනීපාරක්ෂාව ප්‍රැක්ටිස් කරන්න පටන් ගන්න.

මෙම ලිපියේ සවිස්තර ලිපිය පළ කර ඇත. ඒ සඳහා පිවිසීමට පහත මාතෘකාව ක්ලික්/ටැප් කරන්න

කොරෝනා වෛරසය ආසාදනයෙන් මිදෙන්න මේ දේවල් අනිවාර්යයෙන් කරන්න

අවධානමට පෙර සූදානම සඳහා හැකිතාක් ෂෙයාකරන්න.

The post චීන වෛරසය ලංකාවට එන්න කලින් ඒ ගැන දැනුවත් වෙන්න… appeared first on familylife.

කතාවට අපි කියන්නේ පුංචි දරුවෝ මල් වගේ කියලනේ. හැබැයි මේ පුංචි මල් සමනල්ලු ඉස්කෝලෙදිත් පෙර පාසලේදීත් එහෙමම ඉන්නවද? එහෙමත් නැත්තන් පාඩුවේ පැත්තකට වෙලා ඉන්න තවත් පොඩ්ඩෙකුට හිරිහැර කරන්න පෙළඹෙනවද?

සරදම් කිරීම, ඇනුම් පද කීම, නම් පටබැඳීම, කොන් කිරීම, පහර දීම, පයින් ගැසීම සහ සියලුම ශාරීරික සහ මානසික වද හිංසා මේ හිරිහැරවලට අයත් වෙනවා. Famillylife.lk අපි මේ ලිපියෙන් කතා කරන්නේ පාසලේදී/පෙර පාසලේදි ඔබේ දරුවා හිංසනයට ලක් වෙනවනම් (Bullying) ඔබට ගත හැකි ක්‍රියාමාර්ග මොනවාද කියන එක ගැනයි. 

කුඩා අවධියේදි සම වයස් කණ්ඩායම් අතින් දරුවන් හිංසනයට ලක්වීම , දරුවාගේ ආත්ම විශ්වාසයට විශාල වශයෙන් අහිතකර විදියට බලපානවා. විශේෂයෙන්ම ගුරුවරුන් සහ මව්පියන් මෙයට මැදිහත් වීම අත්‍යවශ්‍ය වෙනවා. දරුවන්ගේ ප්‍රශ්න දරුවන්ටම විසදා ගැනීමට අවස්ථාව දිය යුතු වුවත් වැඩිහිටියන් ඒ ගැටළුවලට මැදිහත් විය යුතු සීමාව පිළිඹදව ඔබ මනා අවබෝධයකින් සිටිය යුතු වෙනවා. එවැනි අවස්ථාවක ඔබට පහත සදහන් ආකාරයට ක්‍රියා කිරීමේ හැකියාව තියෙනවා.

ඇහුම්කන් දීම

හිංසනයට ලක්වෙන දරුවාට විශාල අවධානයක් සහ ආදරයක් ලබා දිය යුතු අතර වැඩි වැඩියෙන් සෙනෙහස දැක්වීම අත්‍යවශ්‍ය වෙනවා. සිදු වූ දේවල් පිලිබදව සරල ප්‍රශ්න අසමින් සම්පූර්ණ විස්තරය ගැන දැනුවත් වී සිදුවීම පිලිබදව සත්‍ය කරුණූම අනාවරණය කරගෙන සාරංශගත කරගන්න.

ඇතැම් දරුවන් අධික බිය නිසා කරුණු වසන් කිරීමට පවා ඉඩ තියෙන නිසා දරුවාගේ සිතේ විශ්වාසයක් ඇති කර සියළුම කරුණු හෙලිකරගන්න. මෙවැනි අවස්ථාවක කණගාටුවට පත්වීම, පීඩනයට හා බයට පත්වීම ඉතා සාමාන්‍ය දෙයක් බව පවසා දරුවා අස්වසන්න.

දරුවා නිකරුනේ හිංසනයට පත්වීම ඔහුගේ වැරැද්දක් නිසා සිදු වන දෙයක් නොවන බව වටහා දෙන්න. දරුවාගේ මව්පියන් වශයෙන් ඔහු වෙනුවෙන් පෙනී සිටින බවා වටහා දෙන්න. ගුරුවරුන් පාසලේදී තත්ත්වය මැඩපවත්වන අතරතුරේදි මව්පියන් නිවසෙදි දරුවාට ශක්තියක් විය යුතු වෙනවා.

සන්සුන්ව සිටින්න

තමන්ගේ දරුවා දිගින් දිගටම වෙනත් අයෙක්ගෙන් හිංසාවට පත් වීම කිසිම අම්මෙකුට තාත්තෙකුට ඉවසන්න පුළුවන් දෙයක් නොවන බව අපි දන්නවා. නමුත් ඔබ කෝපයට පත්ව සිටියත් ඒ බව දරුවාට අගවන්න එපා. කෝපයට පත්වී ප්‍රශ්න විසදීම සිදු කළ නොහැකි බව දරුවාට හැගෙන්න සලස්වන්න. දරුවා සමගත්, අදාළ අනෙකුත් පාර්ශවයන් සමගත් මේ ගැන සාකච්ඡා කළ යුත්තේ ඉවසීමෙනි. 

තේරුම් කරන්න

වෙනත් අයෙකු හිංසාවට පත් කිරීමට දරුවෙක් පෙළඹිමට බලපාන්න පුළුවන් කරුණු ගැන දරුවාට වැටහෙන ආකාරයට තේරුම් කරන්න. හිංසකයා ඇතැම් විට කවුරුන් හෝ අනුකරණය කරනවා විය හැකියි. ඒ දෙය නිවසේදී අහන දකින හෝ අත්විදින දෙයක් විමට බොහෝ දුරට ඉඩ තියෙනවා.

ඒ දරුවා අනෙක් අය සමග සහයෝගයෙන් සමගියෙන් සිටින ආකාරය ගැන නොදන්නවා වීමටද ඉඩ ඇත. එහෙමත් නැත්තන් අධි ක්‍රියාශීලි දරුවෙක් හෝ එයට සමාන තත්ත්වයකින් පෙළෙනවා වීමටත් ඉඩ තියෙනවා. කවරාකාරයෙන් ගත්තත් දරුවා ක්‍රියා කරන ස්වභාවයට දරුවගේ මව්පියන් සහ වැඩිහිටියන් වගකිව යුතු බවට වටහාගෙන දරුවාටත් එය තේරුම් කර දෙන්න උත්සහ කරන්න.

මේ ගැන තවදුරටත් අවබෝධයක් ලබාගන්න මේ ලිපිය කියවන්න – දරුවන්ගේ කරදරවලට හේතු නැතුවාම නෙවෙයි…

ගුරුවරුන් සමගින් සාකච්ඡා කරන්න

මේ දෙය අනිවාර්‍යෙන්ම සිදුවිය යුතු වෙනවා. ගුරුවරුන් වශයෙන් මේ තත්ත්වය මැඩ පැවැත්වීමේ හැකියාව ඔවුන් සතුවිය යුතු ය. ගුරුවරුන් සමග එක්වී පියවරක් ගන්නා බව දරුවාටත් දන්වා සිටින්න. ඉතා ඉවසිලිවන්තව හා පෞද්ගලිකව ගුරුවරයා සමග කතා කර සිදුවීම පිළිඹදව දන්වා උපකාර ඉල්ලන්න.

සිදුවීමේ සත්‍ය බරපතල බව වටහා දී මෙයට අනිවර්යය විසදුමක් තිබිය යුතු බව පවසන්න. විසදුමක් සාකච්චා කිරීමෙන් සතියකට පමණ පසු ප්‍රතිපල විමසන්න. ගුරුවරුන් සමග දිගින් දිගටම සම්බන්ධතාවය තබාගන්න.

හිංසා කරන දරුවා සමග කතා කරන්න.

ඉතා ඉවසීමෙන් සහ ආදරයෙන් එය සිදු කිරීමට වග බලා ගන්න. ඇතැම් විට ඒ දරුවාද වැඩිහිටියන්ගේ උපකාර අවශ්‍යකරන  දරුවෙක් වීමට ඉඩ තියෙනවා. අදාළ දරුවාගෙ මව්පියන් සමගත් සාකච්ඡා කරන්න. තත්ත්වය සමනය කරගැනීමට ඔවුන්ගෙනුත් උපකාර ඉල්ලන්න. මෙවැනි අවස්‍ථාවක අනිවර්යයෙන්ම ගුරුවරයාගේ මැදිහත් වීම මත මෙවැනි සාකච්ඡා සිදු කරන්න.

මේ ගැන තවදුරටත් අවබෝධයක් ලබාගන්න මේ ලිපිය කියවන්න – දරුවන් ගැන ඔබේ මැසිවිල්ල ඔවුන්ගේ සැනසිල්ලට හරවන්න

ඉවසිලිවන්තව හිංසකයාට විරුද්ධව නැගී සිටින ආකාරය දරුවාට කියා දෙන්න. 

උදා:- “මට ගහන්න එපා, මට ගොඩක් රිදෙනවා. මාව වැටුනොත් තුවාල වෙන්න ඉඩ තියෙනවා”

හිංසා කරන දරුවන් මගහැර අනෙකුත් දරුවන් සමග සිටින ලෙසත්, හිංසාවට පත්කරන්න උත්සහ කරන විට කෙළින්ම ගුරුවරයාට දන්වන ලෙසටත් උපදෙස් දෙන්න. දරුවාගේ අනෙක් මිතුරන්ගේ සහයෝගය මෙවැනි අවස්ථාවක ඉතාමත් වැදගත් වෙනවා.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවන් හිංසනයට ලක්වීම ට පාසැලේ / පෙරපාසලේ ඇති ඉඩකඩ අහුරන්න appeared first on familylife.

මේ නිසා එළවලු මිල වැඩි කාලෙට පවුලේ පෝෂණය රැකෙන විදියට ආහාර සම්බන්ධව ක්‍රියාකරන ආකාරය ගැන කතා කරන්න familylife.lk අපි තීරණය කළා. හැබැයි ඉතින් එක කාල සීමාවකට කොටු නොවී එදිනෙදා ජීවිතයේදි මේ කියන පියවරවල් අනුගමනය කළොත් නම් සෑහෙන වියදම් ප්‍රමාණයක් අඩු කරගන්නත් හැකියාව ලැබේවී. 

ගහෙන් කඩාගත්ත ගමන් තියෙන එළවලු පළතුරු ම අවශ්‍ය නෑ.

හැම අවස්ථාවකදි ම නැවුම් ආහාර බෝග ම ලබාගන්න තියෙන හැකියාව අඩු නිසා වියළාගත්, ශීතකර කල්තබාගත්, සකස් කර බෝතල් කරගත්, බීම ආකාරයට පිළියෙල කරගත් වගේ ආකර කිහිපයකින්ම තියෙන එළවලු පළතුරු පරිභෝජණයට මැළිවෙන්න එපා. ඒ ඒ ආකාරවලින් ආහාරයට ගන්න පුළුවන් බෝග ලාභදායි මුදලකට මිලට ගන්න හැකි ස්ථාන හොයාගන්න පුළුවන් නම් තවත් වාසිදායක වෙනවා.

එක එක දවසට වෙන වෙනස් දේවල් කන්න.

සතියකට සැරයක් සතියටම ගැළපෙන්න මීල් ප්ලෑන් එකක් හදලා ඒ කෑම වර්ග පිළියෙළ කරන්න අවශ්‍ය දේවල් අවශ්‍ය ප්‍රමාණවලින් විතරක් මිලට ගන්නවනම් නාස්තිය අවම වෙනවා වගේම විවිධත්වයක් ඇතුව ආහාර පිළියෙළ කරගන්නත් හැකියාව ලැබෙනවා. 

එළවලු පළතුරු බහුල කාලයට මිලට අරන් කල්තියාගන්න පුළුවන් විදියට සකස් කරගන්න.

එළවලුවක් හෝ පළතුරක් බහුලව දකින්නට ලැබෙන කාලවලදි ටිකක් වැඩිපුර අරගෙන කල්තියෙන විදියට සකස් කරලා පසුව පාවිච්චියට ගැනීම අපේ රටේ ඉවුම් පිහුම් කලාවට අලුත් දෙයක් නම් නෙවෙයි. හැබැයි මේ විදියට තොග අරගන්නකොට මතක ඇතුව ඇත්තටම තමුන් ආහාරයට ගන්නවනම් විතරක් මිලට අරන් නිවැරදි ක්‍රමවලටම කල්තියා ගන්න උත්සහ කරන්න.

විකල්ප පාවිච්චි කරන්න

කඩල, කව්පි, මුං වගේ ඇට වර්ග,කොස් පොළොස්, පැපොල්, පලා වර්ග වගේම මීට කලින් මිලට ගත්තේ නැති එළවලු පළතුරු වර්ගත් මේ කාල සීමාවේදි උත්සහ කරලා බලන්න. විශේෂයෙන් ම ආහාරයට ගන්න සුදුසුයි කියලා නොදැන හිටියත් ආහාරයට සුදුසු පලා වර්ග එහෙම ගෙවත්තේ වැවිලා තියෙන්න ඉඩ ඇති නිසා ඒ ගැනත් අවධානය යොදවන්න.

පොෂ්‍යදායි ආහාරවලට වැඩි මුදලක් වෙන් කරන්න.

එළවලු, පළතුරු ගණන් ගියත් ඒවා කෑම වේලෙන් ඉවත් කරන එක ශරීර සෞඛ්‍යට නම් සුබදායක නෑ. ඒ නිසා වෙනත් කාලවලදි ක්ෂණික ආහාරවලට, ඇගට ගුණ නැතත් ලේසියට කන මිලාධික ආහාරවලට පොඩ්ඩක් තිත තියලා එළවලු පළතුරුවලට වැඩි මුදලක් වෙන් කරන්න උත්සහ කරන්න.

වගාකරුවන්ගෙන් මිලට ගන්න.

මේ දේ නම් හැමෝටම කරන්න අපහසු වෙයි. හැබැයි කෙළින්ම ගොවියන්ගෙන් ආහාර බෝග මිලට ගන්න පුළුවන්කමක් තියෙනවනම් නැවුම් සහ ලාභදායක දේවල් මිලට ගන්න අවස්ථාව ලැබෙනවා.

අලුත් ආහාර වට්ටෝරුවලට ආහාර පිසගන්න.

ගොඩක් වෙලාවට අපි පුරුදුවෙලා ඉන්නේ ලේසියට එකම ක්‍රමවලට එළවලු පිසගන්න. ඒ වගේම ගෙදර ගෙනාව එළවලු වලින් පොඩ්ඩක් ඉතුරුවෙලා තියෙනවනම් වේළිලා ගියාම විසිකරලා දානවා. හැබැයි මේ විදියට විසිකරන්නේ නැතුව ගැළපෙන එළවලු කීපයක් එකට එකතු කරලා උයාගන්න, එහෙමත් නැත්තන් සලාද හදාගන්න හෝ අලුත් ම වට්ටෝරුවකට පිසගන්න උත්සහ කරනවනම් සල්ලි දීලා අරන් එන කෑම වර්ග අපතේ යෑමෙන් වැළකෙනවා. පළතුරු වර්ගවලිනුත් බීම, අතුරුපස වගේ දේවල් පිළියෙල කරගන්න හැකියාව ලැබෙනවා.

තවත් විස්තර මේ ලිපියෙන් – එළවළු පිසීමේදී පෝෂණය රැකගන්න මේ ක්‍රම අත්හදා බලන්න

ගෙදර ගෙනත් කපාගන්න.

ගොඩක් වෙලාවට සුපිරි වෙළදසැල්වල කපලා අසුරපු එළවලු සහ පළතුරු විකිණීම සදහා තියෙනවා. මේවා සාමාන්‍ය මිලට වඩා ඉහළ මිලකට තමයි අලෙවි කරන්නේ. ඒ වගේම එළවලු, පලා වර්ග පිසගන්නා අවස්ථාවේදීම කපන එක තමයි වඩාත් සුදුසු වෙන්නේ.

ආහාර බෝග නිවැරදිව අසුරන්න.

ගොඩක් වෙලාවට එළවලු වර්ග අසුරන්නේ ශීතකරණයේ. මෙහෙම අසුරනකොට එළවලු වර්ග, විශේෂයෙන්ම පලා වර්ග වේළිලා කොළ හැලිලා නාස්ති වෙනවා. භාජනවල ඇසීරීම, පත්තර පිටුවලින් ආවරණය කර බෑග්වල ඇසිරීම, සිප් ලොක් බෑග්වල ඇසිරීම, සෝදා පිරිසිදු කර වතුර වේලා ශීතකරණයේ දැමීම වගේ සුදුසු ක්‍රමයකට අසුරන්න පුරුදු වෙනවනම් මේ නාස්තියත් අවම කරගන්න ඉඩ ලැබෙනවා.

අවශ්‍ය තරමට විතරක් උයන්න.

පවුලේ සාමාජිකයින්ගේ අවශ්‍යතාවයට සරිලන ප්‍රමාණයට පමණක් ආහාර පිළියෙල කරගන්නවා නම් අපතේ යෑම අවම වෙනවා. ආහාර ඉතිරිවෙනවා නම් ශීතකරණයේ දමා ඊළග වේලට එකතුකරගන්නත් හැකියාව තියෙනවා.

වගා කරන්න

තමන්ටම කියලා වගාවක් පවත්වාගෙන යනවානම් එළවලු පළතුරුවල ගණන් නොබලා වස විස නැති නැවුම් ආහාර පරිභෝජනය කරන්න අවස්ථාව ලැබෙන නිසා පවුලේ හැමෝමත් එක්ක එකතුවෙලා ගෙවතු වගාවක් පටන් ගන්න එකත් හොදම පිළියමක් විදියට පෙන්වන්න පුළුවන්.

තවත් විස්තර මේ ලිපියෙන් – ගෙවතු වගාව ගැන උනන්දු අය දැනගත යුතුම දේවල් මෙන්න

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post එළවලු පළතුරු මිලාධික කාලවලට පවුලේ පෝෂණය රැකගන්නෙ මෙහෙමයි appeared first on familylife.