දරුවන් පොත් පත් කියවන්න දක්වන උදාසීනතාවය නිසාම කාලය සමග ඔවුන්ගේ අධ්‍යාපන කටයුතුවලටත් යම් යම් බලපෑම් ඇති වෙනවා. ඒ වගේම දරුවන්ගේ කියවීමේ ආශාව එක රාත්‍රියකින් ගොඩ නගන්නත් බැහැ. දරුවෙක් පොත් පත් කියවීමට දක්වන ඇල්ම බැල්ම සමග තවත් බොහෝ වාසිදායක පරිසරයක් නිර්මානය වෙනවා. ඒ පරිසරය අප හිතනවාට වඩා දරුවාගේ අධ්‍යාපනයට ඉතාම හිතකාමී විදිහට අනාගතයේදී බලපෑම් ඇති කරනවා.

ඒ වුනත් අපේ බොහොම දෙමව්පියන් දරුවන්ට පාසලේ පොත පත හැරුනාම වෙන කිසිම කතා පොතක්, කවි පොතක් ඇහට පේන්නවත් දෙන්නේ නැහැ. සමහර දෙමව්පියන්ගේ මතයක් තියෙන්නේ ඉස්කෝලේ පොත් පත් ටික බලා ගත්තාම හොදටෝම ඇති, ඒකටත් වෙලාවක් නැති කාලයේ තවත් පොත් කියවන්න පටන් ගත්තොත් හොදට හිටිවී, වගේ මතයක්. ඒ වුනත් දරුවෙක් වෙතින් කිවන පුරුදු වගා වුනොත් ඔබ නොදන්නා වාසි බොහොමයක් ලබා ගැනීමට පුලුවනි.

එහෙම නම් දරුවන්ගේ කියවීමේ ආශාව වැඩිදියුණු කිරීමෙන් දරුවාට ලැබෙන වාසි මොනවාද?

දරුවාගේ කියවන ඇල්ම නිසා ඔහු බොහෝ දේ තනියම ඉගෙන ගැනීමට උනන්දුවක් දක්වනවා. වැඩිහිටියන් මත යැපෙනවා වෙනුවට තමන්ට අවශ්‍ය දැණුම පොත පත වෙතින් තනියෙන්ම කියවා දැන ගැනීමේ හැකියාව දරුවා උපයා ගන්නවා.

සවන්දීමේ කුසලතාවය ඇති වෙනවා.

සිංහල ජන සමාජය අතීතයේ පටන්ම පොත් පත් කියවන විට ඒ වෙනුවෙන් සවන්දීමට වැඩි කැමැත්තක් දැක්වූ ජන සමාජයක්. විශේෂයෙන් බණ කතා අහන්න තවමත් පොඩිත්තන් අත්තම්මා, සීයාට සමීප වෙනවා. අකුරු නොදන්නා යුගයේ පවා අකුරු දන්නා කෙනෙක් කියන කථාන්දර බොහොම කැමැත්තෙන් අසා සිටියා. ඒ නිසාම සවන්දීමේ හැකියාව දියුණු වුණා. අදටත් පොත් පත් කියවන දරුවා වෙතින් සවන්දීමේ හැකියාව නොදැනීම සංවර්ධනය වීමේ පරිසරයක් ගොඩ නැගෙනවා. ඒ නිසා දෙමව්පියන් නොදකින අන්දමට දරුවාගේ සවන්දීමේ කුසලතාවය පොත් පත් කියවීම නිසා සංවර්ධනය වෙන බවත් තරයේම මතක තබා ගන්නවා නම් අගෙයි.

ඒ වගේම දරුවාගේ චරිත සංවර්ධනය ගොඩ නගා ගැනීමටත් දරුවන්ගේ කියවීමේ ආශාව වැඩිදියුණු කිරීම උපකාරී වෙනවා. වචන දහස් ගණනකින් ලබා දෙන අවවාද වලට වඩා කතා පොතකින් ලබා දෙන ආදර්ශය ඉතා ප්‍රබල ලෙසින් දරුවාගේ හදවතට ආමන්ත්‍රනය කරනු ඇත.
පොත් පත් කියවන විට දරුවාගේ වාග් කෝෂය පුළුල් වෙනු ඇත. පොත පතින් දරුවා බොහෝ දේ ඉගෙන ගන්නා අතර ඒ දැණුම තමාගේ ජීවිතයට සම්බන්ධ කර ගැනීමේ හැකියාව පොත පතින් උපයා ගත හැකියි.

ඒ වගේම දරුවාගේ අධ්‍යාපනයට අවශ්‍ය අතිරේක දැණුම කියවන පොත් පතින් තමා විසින්ම සොයා දැන ගැනීමටත් හැකියාව ලැබෙනවා. ඒ අන්දමින් තමා විසින් සොයා ගන්නා දැනුම ඉතාම හොඳින් ධාරණය වෙනවා විතරක් නොවෙයි, එය අවශ්‍ය අන්දමින් ගලපා ගැනීමේ හැකියාවත් දරුවන් බාල කාලයේ පටන්ම ලබා ගන්නවා.

කියවන පුරුදු ගොඩ නගන්නේ කොහොමද?

ඔබ දරුවාට ඇති අසීමිත ආදරය නිසාම බාල කාලයේ පටන්ම ඔහු විසින් ඉල්ලන හැම දෙයක්ම ලබා දෙන්නනට උනන්දුවක් දක්වනවා. ඒ වගේම ඉගෙනුම් පරිසරයට අවශ්‍ය හැම දෙයම වුනත් ලබා දීම කිසිම විදිහකට මග ඇරෙන්නේ නැහැ. ඒ නිසා පොත් පත් වුනත් දරුවාගේ අතට ලබා දෙන්න. මුලින්ම ඔබ කියවන දේ දරුවාට අසන්න ඉඩ දෙන්න. එයින් පසුව ඒ කතාවේ දරුවාගේ හිත ගිය තැන් විමසා සිටින්න. එහෙම වුනාම දරුවාගේ හිතේ තවත් අලුත්ම කතාවක් ගොඩ නැගෙන තරමටම නිර්මාණශීලීත්වයක් අවදි වෙන්න පුලුවන්.

පොත් ඉරයි. අහුවෙන්න දෙන්න එපා.

පුංචි කමට දරුවා පොත් පත් ඉරීම වලක්වන්නත් බැරි දෙයක් වේවි. ඒත් දරුවාට පොත් නොදී සිටිම නොව පොත් පත් පරිස්සමින් ආරක්ෂා කර ගැනීමේ හුරුව ගොඩ නගන්න. අතීතයේදී පොතක් පතක් බිම වැටුනොත් එය නැවත අතට දුන්නේ පොතට වැද සමාව ඉල්ලන තරම් අහිංසක හැසිරීමකින්ය. අකුරු ඒ තරමටම පූජණීයත්වයෙන් එදා සලකන ලදී.

දරුවන්ගේ කියවීමේ ආශාව ඇති වෙන දේ කියවන්න දෙන්න.

පුංචි කාලයේ පටන්ම දරුවන්ට කුතුහලය ඇති වෙන කතාන්දර කියා දෙන අතරවාරයේම යම් යම් කුතුහලයක් දැනෙන අන්දමින් දරුවාගෙන් අදහස් විමසා සිටින්න. මේ අතර දරුවාගෙන් කතාව අවසානය ගැන විමසා සිටින්න. එවිට දරුවා යම් නිර්මානශීලී අදහසක් ගොඩ නැගීමටත් ඉඩ තිබේ.

දරුවන්ට කියවන දේ විවිධ අන්දමින් ලබා දීම වැදගත්. සමහර විට ඔබ කැමැති දෙයම දරුවාට ලබා දීම වෙනුවට විවිධ කියවන දේ ලබා දීම නිසා දරුවාගේ කියවන ඇල්ම වැඩිදියුණු වෙනු ඇත. එකම රාමුවකට දරුවා කොටු කිරීම වෙනුවට විවිධ දේ ලබා දෙන විට දරුවාගේ හිතේ ඇසූ පිරූ තැන් තව තවත් වැඩිදියුණු වෙනු ඇත.

දරුවන්ට පොත් කියවීම මෙතරම්ම වැදගත් ඇයි කියල අපි මීට පෙර ලිපියකිනුත් කතා කළා. පහතින් එම ලිපියට පිවිසෙන්න.

දරුවෙකුට පොත් කියවන්න හුරු කිරීම මෙච්චරම වැදගත් ඇයි කියල දන්නවද?

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post දරුවන්ගේ කියවීමේ ආශාව වැඩි දියුණු කිරීමට කළ හැකි දේවල්… appeared first on familylife.

පරිවර්ථන පොත් ඇතුළුව පොත් මිටියක් ඔක්තෝම්බරයේ මිලට ගත්ත අය, සාහිත්‍ය මාසය නිමාවෙලා දෙමසකට වඩා ගෙවුනත් තමන් මිලදී ගත් සියල්ල තවම කියවලා ඉවර නැතුව ඇති. සමහර විට කියවලා ඉවර වුනත් ඒ ගැන සගයන් එක්ක තියෙන සංවාද ඉවර වෙලා නැතුව ඇති. විශේෂයෙන් ම මේ වසරේ පරිවර්තන පොත් සම්බන්ධව ටිකක් වැඩිපුර කතා බහ කෙරුණු නිසා familylife.lk අපි හිතුවා ෆැමිලි රීඩ් තීරයෙන් පරිවර්තන කෘතියක් මිලට ගැනීමේදී සැලකිලිමත් විය යුතු කරුණු කිහිපයක් ගැන කතා කරන්න.

පරිවර්තන පොත් ලියවෙන්නේ ඇයි?

ඉංග්‍රීසි ඇතුළු විදේශ භාෂා ගැන ප්‍රමාණවත් දැනුමක් නැති නිසා පරිවර්තන පොත් කියවනවා කියන අදහස සමහර පුද්ගලයන් තුළ තියෙනවා. හැබැයි මේක නිවැරදි සිතිවිල්ලක් නම් නෙවෙයි. ඉංග්‍රීසි භාෂාවේ ප්‍රවීණයෝ පවා තමන්ගේ භාෂාවෙන් ලියවුනු පොත් කියවන්න ප්‍රිය කරනවා.

මව් හාෂාව තරම් වෙන කිසිම භාෂාවක් එතරම් හිතට අල්ලන්නේ නැති එක තමයි මේකට හේතුව වෙන්නේ. මේ හේතුව හන්දා තමයි රටක පරිවර්තන සාහිත්‍යක් තියෙන්නේ. වෙනත් විදියකින් කිව්වොත් පරිවර්තන සාහිත්‍ය කියන්නේ එක්තරා විදියක කලාවක් විදියට හදුන්වන්න පුළුවන් වෙනවා. 

පාඨකයින්ට සිදු වන අසාධාරණය 

නමුත් මේ වෙනකොට හතු පිපෙනවා වගේ පරිවර්තන පොත් බිහිවෙනවා වගේම මේ පොත්වල ගුණාත්මක භාවයත් එන්න එන්නම අඩුවෙනවා කියන චෝදනාව පාඨකයොන්ගෙන් එල්ලවෙනවා. මේ හේතුව නිසාම බොහෝ දෙනෙක් මුල් කෘතිය කියවන්න පෙළඹෙන බව දකින්න ලැබෙනවා. හැබැයි ගුණාත්මක පරිවර්තන පොත් බිහි නොවෙන එක මව් භාෂාවෙන් පමණක් පොත් කියවන පාඨකයොන්ට කරන විශාල අසාධාරණයක් බවත් කියන්න ම වෙනවා.

අනෙක් අතට මහන්සියෙන් හරි හම්බ කරගන්න සල්ලි ටිකක් අමාරුවෙන් ඉතිරි කරගෙන, පොත් කඩවලට හරි පොත් ප්‍රදර්ශනයට හරි ගිහින්, ආව පොත කියවලා ඉවර වුනාම “මේක ගත්ත සල්ලි අපරාදේ” කියලා පාඨකයොන්ට හිතෙනවනම් එක හරිම කණගාටුදායක තත්ත්වයක් විදියට තමයි අපි නම් දකින්නේ.

නිවැරදිම පරිවර්තකයා තෝරාගන්න

මේ හේතුව හන්දම, වර්ණවත් පිටකවරත්, සුපිරි මිල ගණනුත් එක්ක පරිවර්තන පොත් පිරිලා ඉතිරිලා තිබ්බත් පරිවර්තන කෘතියක් මිලට ගන්න කලින් දැන් ටිකක් වැඩිපුර හිතන්න වෙලා තියෙනවා. පරිවර්තන පොත්වලට පෙම් බදින බොහෝ දෙනෙක් තමන් කැමතිම රචකයාගේ එහෙමත් නැත්තන් පරිවර්තකයාගේ පොත් හෙවිල්ලක් බැලිල්ලක් නැතුව මිලට ගන්න පෙළඹිලා ඉන්නවා.

එහෙමත් නැත්තන් මේ කාල වකවානුව වෙනකොට ලෝකේ ජනප්‍රිය පොත් පරිවර්තනය කරලා ජනප්‍රිය වුනු “සෙලිබ්‍රිටි පරිවර්තකයොන්ගේ” පොත් මිලට ගන්නවා. හැබැයි පොත කියවනකොට දැනෙන්නේ පුදුමාකාර ව්‍යාකූල බවක්. පරිවර්තකයා පවා තේරුමක් ඇතුව පරිවර්තනය කරලා තියෙන බවක් මේ පොත්වලින් පෙනෙන්නේ නෑ. 

ඒ නිසා මුලින්ම කරන්න වෙන්නේ හොද පරිවර්තකයෙක් හොයාගන්න එක. පොත් කියවන්න ඇබ්බැහි වුනු, පොත් ගැන හොදට දැනුම් තේරුම් ඇති අයගෙන් රසවත් විදියට පරිවර්තන කටයුත්ත සිදු කරන පරිවර්තකයො ගැන අදහසක් ලබා ගන්න පුළුවන්කම තියෙනවා.

අවාසනාවකට ගාමිණි  වියන්ගොඩ, කේ. ජී කරුණාතිලක, දැදිගම වී රොද්‍රිගෝ වගේ පරිවර්තකයෝ බොහොම අඩුවෙන් තමයි අලුත් නිර්මාණ කරනව දකින්න ලැබෙන්නේ. අවුරුද්දකට විශාල ප්‍රමාණයේ පොත් 10-15ක් විතර පරිවර්තනය කරන පරිවර්තකයෙක්ගෙන් නිවැරදිම සහ රසවත්ම පරිවර්තනයක් බලොපොරොත්තු වෙන්න පුලුවන්ද කියන කාරණය ඇත්තටම සැක සහිත වෙනවා. 

ඒ වගේම පොත පරිවර්තනය වෙලා තියෙන වාර ගණන ගැනත් පොඩ්ඩක් හොයලා බලන්න. උදාහරණයක් ව්දියට ගත්තොත් “හරි පුදුම ඉස්කෝලේ” නමින් ලීලානන්ද ගමාච්චි මහත්මයා පරිවර්තනය කරලා තියෙන්නේ ඩොරති බ්‍රිටන් විසින් ඉංග්‍රීසියට පරිවර්තනය කරපු “ටෝට්ටෝ චාන්” කියන ජපන් බසින් ලියැවුණු කෘතියක්. ඒ වගේ කරුණු ගැනත් පොඩ්ඩක් හොයලා බලලම පොත් ගන්න එක තමයි වඩා හොද.

ප්‍රකාශකයා කවුද?

අනිත් කරුණ තමයි වගකීමක් සහිත ප්‍රකාශන ආයතනයකින් පොතේ පරිවර්තනයට වගකියනවද කියන කාරණය. සමහර පොත් ප්‍රකාශන ආයතන එකිනෙකා අතර ගැටුම් පවා ඇතිකරගනිමින් පොත් ප්‍රකාශන අයිතිය ලබා ගන්නවා. පිවර්තන සාහිත්‍ය ගැන ඇල්මෙන් පාඨකයා එන සද්භාවයෙන් පරිවර්තන ප්‍රකාශයට පත් කරනවාට වඩා  වානිජමය වාසි මුදුන් පමුණුවා ගැනීමක් තමයි එයින් දැක ගන්න පුළුවන්කම තියෙන්නේ.

බිස්නස් එකකින් එහා ගිය අරමුණක් හෝ පත පොතට ආදරය කරන, පොත් කියවන බවක් නම් මේ අයගෙන් දකින්න අමාරුයි. ඒ වගේම මුල් කෘතිය ප්‍රකාශනයට පත් කරපු ආයතනයෙන් අවසර අරගෙන නිත්‍යානුකූලව පොත පරිවර්තනය කරලද කියන කාරණය ගැනත් පොඩ්ඩක් හොයලා බලලම පොත් ගන්න.

මිලට ගන්න කලින් පොතේ අන්තර්ගතය ගැන හොයන්න

පරිවර්තනයක් මිලට ගන්න කලින් ඒ පොතේ මුල් කෘතිය ගැන අන්තර්ජාලය හරහා හොයලා බලන්න. පොත් සම්බන්ධ ෆෙස්බුක් සමුහ ඕනෑ තරම් මේ වෙනකොට දකින්න ලැබෙනවා. එවැනි තැන හරහා මුල් කෘතිය ගැනත් පරිවර්තනය ගැනත් විමසලා බලනවානම් විස්තර හොයාගන්න පුලුවාන්කම තියෙනවා.  විශේෂයෙන් ම තමන් ප්‍රිය කරන වර්ගයේ පරිවර්තන ගැන සමාන රුචියක් තියෙන පුද්ගලයින්ගෙන් වැඩි දුරටත් විස්තර හොයාගන්න හැකි වෙනවා.

මුල් කෘතිය මදක් හෝ කියවලා සංසන්දනයක් කරන්න පුළුවන් නම් වඩාත් සුදුසුයි. උදාහරණයක් විදියට great කියන ඉංග්‍රීසි වචනය සිංහලයට පරිවර්තනය කලාම ප්‍රධාන, උදාර, මහා වගේ අර්ථ කිහිපයක් එනවා. මුල් කෘතියේ මේ වචනය යොදාගෙන තියෙන අදහස හරි හැටි වටහාගෙන පරිවර්තන කලේ නැත්නම් සම්පූර්ණයෙන්ම වෙනස් අර්ථයක් තමයි එන්නේ.

ඒ වගේම මුල් කෘතිය ලියවුනු භාෂාවටම අනන්‍ය වුනු (උපමා පිරුළු වගේ දේවල්) යෙදුම් එහෙමත් නිවැරදිවම පරිවර්තනය වුනේ නැත්තන් තේරුමක්, රසයක් නැති පරිවර්තනයක් තමයි සිදු කෙරෙන්නේ.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

තවත් ලිපි කියවන්න මුල් පිටුවට පිවිසීමට පහත ලෝගෝව ක්ලික්/ටැප් කරන්න

The post පරිවර්තන පොත් මිලට ගන්න කලින් මේ දේවල් ගැනත් හිතන්න appeared first on familylife.

• දරුවෙකුට පොත පත හුරු කිරීමේදී හැකි තරම් ඉක්මනින් ඒ දේ ආරම්භ කිරීම ඉතාමත් සුදුසු බවට පර්යේෂණ මගින් කරුණු හෙළි වී ඇති අතර ඒ අනුව දරුවා මවුකුසේ ඉන්න කාලසීමාව තුළදී  මව විසින් ගීත ගායනය සහ කතන්දර පොත් කියවීම මගින් ළදරුවාට ඒවා ශ්‍රවනය කිරීමේ හැකියාව ඇති බවට පැවසෙනවා.

• වයස අවුරුද්දට වඩා අඩු ළදරුවන් විශාල වර්ණවත් පින්තූර සහිත බෝර්ඩ් බුක්ස් සහ රෙදිවලින් නිමාව කරන ලද ගීත අඩංගු පොත්වලටත්, වයස අවුරුද්දට වඩා වැඩි දරුවන් වාහන, සතුන් වැනි දේවල්වල පින්තූර අඩංගු වර්ණවත් පොත් පත් බැලීමටත්, අවරුදු 2-4 වයස් සීමාවේ දරුවන් අකුරු, ඉලක්කම් සහ පින්තූර සහිත කෙටි කතන්දර පොත්වලටත් වඩා ප්‍රියතාවයක් දක්වනවා.
• පොතක් කියවීමට පෙර සූදානමක් විදියට දරුවා ඒ සදහා ප්‍රියතාවයක් දක්වන අවස්ථාවක් සහ නිස්කලංක පරිසරයක් තෝරාගෙන දරුවාට අවශ්‍ය පොත තෝරාගැනීමට ඉඩහරින්න. දරුවන්ගේ රසඥතාවය එකිනෙකාට වෙනස් බව තේරුම්ගෙන ඒ ඒ තෝරා ගැනීම්වලට අනවශ්‍ය ආකාරයට බලපෑම් කිරීමෙන් වැළකීම ඉතාම වැදගත් වෙනවා.
• දරුවන්ට කතන්දර පොත් මිලට ගැනීමේදී දරුවා ප්‍රිය කරන ආකාරයේ පොත්වලට අමතරව දරුවාගේ ජීවන සංසිද්ධි සිහිපත් වන ආකාරය​ට පොත්පත් මිලට ගැනීමත් සිදු කිරීම මගින් දරුවාගේ අවධානය ලබාගැනීමේ හැකියාව වැඩි වෙනවා. එයට උදාහරණයක් ලෙසින් දරුවා පාසල් යන මුල්ම දිනය, ලෙඩකට බෙහෙත් ගැනීමට දොස්තර ළගට යෑම, පවුලට අලුතින් තවත් පොඩ්ඩෙක් එකතු වීම, උපන්දින, නිවසින් පිටතට ගිය දිනෙක වැනි අවස්ථා දක්වන්නට පුළුවන්.
• දරුවා තමන් සමීපයට අරගෙන පහසු ඉරියව්වකින් වාඩිවී පොත අල්ලාගැනීමට සහ පිටු පෙරළීමේ අවස්ථාව දරුවාට ලබාදෙන්න. එක් පිටුවක් නිදහසේ අධ්‍යනය කිරීමෙන් පසුව ඊළග පිටුවට පෙරළීමේ අවස්ථාව දරුවාට ලැබෙනවා.
• මුලින්ම තෝරාගත් පොතේ කවරය දරුවාට පෙන්වමින් කතුවරයා, කතාවේ ස්වභාවය සහ චරිත පිළිබඳව කෙටි හැඳින්වීමක් කරන්න. කුඩාම වයසේදී කතුවරයා හඳුන්වාදීම අවශ්‍ය නොවුනත් අවුරුදු 3 – 4 කාලයේදී දරුවාට පොත හඳුන්වන්නටත් (උදා – සිබිල් නැන්දගෙ පොතක්) එය උදවුවක් වේවි.

• දරුවන්ට කතන්දර පොත් කියා දීමේ දී එහි අඩංගු කතන්දරය මුළුමනින්ම කියා දීම අත්‍යවශ්‍ය වන්නේ නෑ. දරුවාද හවුල් කරගනිමින් අවශ්‍යනම් පින්තුරය බලාගෙන කතන්දරයක් ගොඩනැංවීමේ හැකියාව ඔබට තියෙනවා. චරිතවලට අදාළ වෙන ආකාරයට හඬ උස් පහත් කිරීම, කටහඬ වෙනස් කිරීම, ශබ්ද නගා කියවීම සහ රඟපාමින් වගේ​ම සින්දු කියමින් කතාව රඟදැක්වීම මගින් කතාන්දරය සජීවී වෙන අතරම දරුවාට අලසකමක් ඇති වීම අවම වෙනවා.
• දරුවාගේ අංග චලන වටහා ගනිමින් ක්‍රියා කිරීම මෙහි දී වැදගත් කරුණක් වෙනවා. පින්තූරය පෙන්වමින් කතාව කියාදෙන විට දරුවා ඊට අදාළ වචනය ඉක්මනින් ඉගෙනගන්නවා වගේම පින්තූරය දිහා බලාගෙන එය අධ්‍යනය කරන්නත්, ඒ ගැන කතා කරන්නත් දරුවාටත් අවස්ථාවක් ලබා දිය යුතු වෙනවා.
• අකුරු හඳුනන වයසක දරුවෙක් නම් අකුරු උඩින් ඇඟිලි  දුවවමින් වචන කියාගෙන යාම, දරුවට තනිවම වචන කියවීමට උපකාරයක් වෙනවා. ඉවසිලිවන්ත වීමත්, කිසිම හේතුවක් මත දරුවාට සැර වැර නොකිරීමත් අත්‍යවශ්‍ය කාරණයක්. ඒ වගේම කතාව කියා දෙන අතරතුර දරුවාගෙන් ප්‍රශ්න ඇසීම අනිවාර්යෙන් සිදු කළයුතු දෙයක් වෙනවා.
• කතාන්දරයේ සිදුවීම් සහ චරිත අතර අන්තර් සම්බන්ධතාවයක් ගොඩනඟා ගැනීමටත්, තමන් කියවන පොත පිළි​බඳ අවබෝධයක් ලබාගැනීමටත් මේ ප්‍රශ්න ඇසීම ඉතා වැදගත් වෙනවා. අවුරුදු 3ට වඩා වැඩි දරුවන්ට පොත් කියා දීමේ දී පොත කියාදීමට පෙර (පොත් කවරය පෙන්වා හිතෙන දේ ගැන උපකල්පනය කිරීම), පොත කියවන අතරතුර (චරිතය ගැන, ඊළගට සිදුවන දේ ගැන නිගමනයක ඒම/ චරිත අත්විඳින හැඟීම් පිළිබඳව දරුවාට දැනෙන දේ ගැන) සහ කතාව අවසානයේදී (අවසානය ගැන දරුවාට  හිතෙන දේවල්, කතාන්දරය පිලිබඳ මතකය සහ සාරාංශය) දරුවාගෙන් ප්‍රශ්න ඇසිය යුතු වෙනවා. ඒ වගේම, දරුවා අසන ප්‍රශ්නවලටත්  ඔබ විසින්  පිළිතුරු ලබා දිය යුතු වෙනවා.

• වචනවල තේරුම, සමාන වචන ගැන වගේම සමාන ශබ්ද රටාවක් ඇති වචන ගැන වගේම යථාර්තවාදී කතා, සුරංගනා කතා සහ සත්‍ය සිදුවීම් හා චරිත ඇති නමුත් සිදුවීමට සම්භාවිතාවයක් පමණක් ඇති කතා පිළිබඳවත් යම් අවබෝධයක් දරුවාට ලබා දිය යුතු වෙනවා.  ඒ වගේම පොතෙහි එන යම් යම් සංකල්ප (උදා:- මිනිස්සු එකිනෙකාගෙන් ඉගෙනගන්න දේවල්) පිළිබඳවත් ඉවසීමෙන් යුතුව දරුවාට පැහැදිලි කළ යුතු වෙනවා.
• කතාන්දරය කියා දීමෙන් පස්සේ දරුවා ප්‍රියතාවයක් දක්වනවානම් තවදුරටත් වෙනත් පොත් මගින් හෝ අන්තර්ජාලය මගින් කරුණු හොයලා කියා දෙන්න පුළුවන්. (උදා:- කතුවරයා ගැන, කතාවෙන් කියවෙන සත්තු ගැන). දරුවා ඉදිරිපත් කළ උපකල්පන පිළිබ​ඳ කතා කරමින් දරුවා ධෛර්යමත් කිරීමත් දරුවට විශාල සතුටක් ගෙන දෙන්නට හේතුවක් වේවී.
• දරුවා සමග පොත් කියවීම විනෝද ක්‍රීඩාවක් බවට පත්කරගන්න. උදාහරණයක් විදියට දරුවා ප්‍රිය කරන ආකාරයේ පොතක් කොහේ හෝ තැනක හංගා දරුවාට එය සොයාගෙන එන්න කියන්න පුළුවන්. දුර ගමනක් බිමනක් යනකොට කතා පොතක් ගෙනයාම, රසකැවිලි තෑගි දෙන ආකාරයට පොත් තෑගි දීම, දරුවා සමග එක්ව පොත් තෝරා මිලට ගැනීම වගේ දේවල් කරන්න පුළුවන්.
• දරුවෙකු කොයි තරම් පොත්පත්වලට ආසා වුවත් නිවසේ වැඩිහිටියන් ඒ දේ කරනවා නොදකිනවා නම් දරුවාගේ රුචිකත්වයත් අඩු වී යන නිසා මව්පියන් පොතපත ඇසුරු කරන්නට වැඩි අවධානයක් යොමු කල යුතු වෙනවා.

අවසන් වශයෙන් ඇමෙරිකානු පර්යේෂණ ආයතනයක් විසින් දරුවන්ට කතන්දර පොත් කියා දීම සම්බන්ධයෙන් සිදුකල පර්යේෂණයක් මගින් හෙළිකරගත් තොරතුරු කිහිපයක් පහතින් දක්වනවා.

• කියවන්නා දරුවා සමග අන්‍යෝන්‍ය සම්බන්ධයක් තබා ගනිමින් කතාව කියා දිය යුතු වෙනවා. දරුවාට වචන කියවන්න නොහැකි වුවත් කතන්දරයක් සාකච්චා කරමින් කියවීම මගින් දරුවාගේ හැඟීම් ප්‍රකාශනයට සහ සිතීමේ හැකියාව දියුණු වීමට එය විශාල රුකුලක් වෙනවා. කතාව දික් ගැස්සවීම, ඒ පිලිබඳව කතිකාවතක් ගොඩ නැගීම, වචවල තේරුම සහ සිද්ධි සම්බන්ධතාවය ගොඩනැගීම මෙහිදී අත්‍යවශ්‍ය වෙනවා.
• එකම කතා පොත කිහිප වතාවක් කියා දීම මගින් මතක ශක්තිය ඉහළ යන බවත් එහි සඳහන්.
• කතන්දයක් කියා දීම මගින් නිසි ප්‍රතිපල ලැබීමට කතාව කියා දෙන්නා (මව්පියන්/ ආච්චි/සීයා…) හෝ දරුවාගේ වයස බලනොපාන අතර  නියමාකාරව කතාව කියා දීම පමණක් ප්‍රමාණවත් වන බවයි ඔවුන් පවසන්​නේ.

ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post දරුවන්ට කතන්දර පොත් කියලා දෙන්නේ මෙහෙමයි appeared first on familylife.

එහෙම හිතන ඔබට අපි කියනවා, දරුවෙකුට පොත් කියවන්න හුරු කිරීමෙන් ඔබ නොහිතන තරම් වාසි ඔබේ ළදරුවාට ලැබෙන බව. එවැනි වාසි පිළිබඳ ලියැවුණු මේ ලිපිය කියවීමෙන් පස්සේ නම් පොඩ්ඩාට පොත් පත් අරන් දෙන්න ඔබ දෙවරක් හිත හිත ඉන්නේ නැතිවෙයි කියලත් අපි විශ්වාස කරනවා.

පොඩ්ඩට පුළුවන්

පොතක් පින්තුරයක් බලන්න හෝ කතන්දරයක් අහන්න තරම් දරුවා චූටි වැඩියි කියලා කවදාවත් හිතන්න එපා. විශාල සහ වර්ණවත් පින්තූර දිහා බැලීම වගේම අම්මාගේ තාත්තගේ කටහඬ දිගින් දිගටම ඇසීම මාස 2-3ක ළදරුවෙකුට පවා ඉතාම වැදගත් බුද්ධි වර්ධක ක්‍රියාකාරකමක් වෙනවා.

පොත් තියෙන්නේ කියවන්න, පින්තුර බලන්න කියන මූලිකම අදහසත් වචන රටාව, රිද්මය, වචන කියවන ස්වරූපය, හඬේ උස්පහත් බව වගේ දේවල්  විතරක් නෙවෙයි පොතක පිටුවක් පෙරළීම, වමේ සිට දකුණට කියවීම වගේ දේවල් පවා කාලයත් එක්ක දරුවා නිවැරදිව ඉගෙනගන්නවා.

මේ සඳහා වචන තියෙන පොත් ම අවශ්‍ය වෙනවා කියලා අපි කියන්නේ නෑ. පින්තූර පමණක් ඇති පොත් අරන් පින්තුර පෙන්වමින් කතන්දර හදලා කියන්න වුණත් පුළුවන්කම තියෙනවා. කාලයක් තිස්සේ මේ දේවල් කරනකොට දරුවා පොත්වලට හුරුවෙන්නත් යම් යම් ධනාත්මක ප්‍රතිචාර දක්වන්නත් පටන් ගන්නවා.

හිතෙන දේවල් කියන්නේ මෙහෙමයි

තමන්ගේ හැඟීම් සන්නිවේදනය කරන්න දරුවට වචන අවශ්‍ය වෙනවා වගේම  දරුවාට දිනපතා ඇහෙන වචන ප්‍රමාණය සහ දරුවාගේ සන්නිවේදන හැකියාව අතර සෘජු සම්බන්ධයක් පවතිනවා. නිසි විදියට කතා කරන්න බැරි වුණත් කතා කරන්න අවශ්‍ය සෑම වචනයක් ම වයස අවුරුද්දක් වෙනකොට දරුවා ඉගෙනගෙන තියෙන බව පර්යේෂණ වලින් හෙළිවෙලා තියෙනවා. දරුවට ඇහෙන්නට පොත් පත් කියවීම මේ කාරණයේ දී විශාල පිටුවහලක් වෙනවා.

ඒ වගේම දරුවෙකුට පොත් පත් කියා දෙන මවුවරුන්ගේ දරුවන්ට අනෙක් දරුවන්ට වඩා සාරවත් වාග් මාලාවක් හිමිවෙන බවත් හොයාගෙන තියෙනවා. තමන්ගේ හැඟී ප්‍රකාශ කරන්න අවශ්‍ය වචන අනුකරණය තුලින් වගේම පින්තුර හඳුනාගැනීම මගිනුත් ඉගෙන ගන්න දරුවා පෙළඹෙනවා.   

අම්මගෙයි තාත්තගෙයි ආදරේ..

ඕනෑම ළදරුවෙක් වඩාත්ම ප්‍රිය කරන්නේ තමන්ගේ අම්මගේ තාත්තගේ ආදරය, සෙනෙහස සහ අවධානය උපරිමයෙන් හිමිවෙනවට. ඒ වගේම අම්මට තාත්තට තුරුළු වෙලා ඉන්නවා තරම් සැනසීමක් වෙන කිසිම දෙයකින් දරුවෙකුට ලබාගන්න පුළුවන් කියලා අපි විශ්වාස කරන්නේ නෑ. ඉතින් දරුවා තමන්ගේ ළයට තුරුළු කරගෙන පොතක් පෙන්වමින් කතන්දරයක්, සින්දුවක් කියාදීම තමන්ගේ හිතේ ඇති දරු සෙනෙහස පෙන්වන්න හොඳම ක්‍රමයක් විදියට හඳුන්වන්නට පුළුවන්කම තියෙනවා.

කියවීම විනෝදයක්

කුඩා දරුවන් ඩිජිටල් තිරවලට ඇබ්බැහි වීම මේ වෙනකොට ලෝකේ පුරාම ඉන්න මව්පියන්ට විශාල ගැටළුවක් බවට පත්වෙලා තියෙනවා. දරුවාගේ බුද්ධි වර්ධනයට ඉතාමත් අහිතකර විදියට බලපාන මේ පුරුද්ද දරුවන් තුළ මුලින්ම රෝපණය  කරන්නෙත් මව්පියන් ම වීම අවාසනාවන්ත තත්ත්වයක් විදියට හඳුන්වන්න පුළුවන්.

හැබැයි පොත පතට ඇබ්බැහි වුණ අම්මලා තාත්තලා නිරායාසයෙන් ම තමන්ගේ දරුවොන්ටත් මේ දායාදය ලබා දෙනවා. පසුකාලීනව මේ දේ දරුවාගේ ප්‍රියතම විනෝදාංශය වීමට ඇති ඉඩකඩ ඉතාමත් වැඩියි. අතට අහුවෙන පත්තර කෑල්ල පවා කියවන්න පෙලඹෙන මේ දරුවන් කාලයත් එක්ක දැනුම් ආකරයක් බවට පත්වෙනවා.

භාෂා විශාරද

දරුවෙකුට තමන්ගේ මව් භාෂාවට අමතරව වෙනත් භාෂා උගන්වන්නත් පොත්පත් කියා දීම විශාල පිටුවහලක් වෙනවා. ලංකාවේ අපි නම් ගොඩක්ම උනන්දු වෙන්නේ සිංහල/දමිළ භාෂාවන්ට අමතරව ඉංග්‍රීසි භාෂාව උගන්වන්න තමයි. මේ ක්‍රමයේ දී ප්‍රයෝජනවත් වෙන වටිනා ඉංග්‍රීසි ළමා කතා පොත් මේ වෙනකොට උවමනා තරම් වෙළද සල්වල දකින්නට ලැබෙනවා.

බබා අවධානෙන්

දරුවාගේ පළමු තුන් වසරේ සංවර්ධනය පිළිබඳව මව්පියන් ඉතාමත් දැනුවත්ව සහ සැලකිල්ලෙන් කටයුතු කිරීම අත්‍යවශ්‍ය වෙන්නේ පුද්ගලයෙක්ගේ මොළයේ 80%ක පමණ ප්‍රමාණයක් ඉපදිලා මුල් අවුරුදු 3 ඇතුළත වර්ධනය වෙන නිසයි. වෙනත් විදියකින් කිවොත් ස්පොන්ජ් එකකට වතුර උරාගන්නවා වගේ මේ කාලයේදී දරුවා තමන් අත්විඳින දේවල් ඔලුවට දාගන්නවා.

මේ කාලය තුලදී පොත් පත් ආශ්‍රය කරන දරුවාට තමාගේ අවධානය එක තැනක රදවා ගැනීමේ හැකියාව සහ මතක ශක්තිය කියන වටිනා හැකියාවන් උරුම වෙනවා. ඉතා කුඩා අවධියේ දීම කතන්දර පොතක් කියල දෙන විනාඩි 10-15 තුළදී එයට නිසි  අවධානය යොමු කිරීමේ හැකියාවත්, සිදුවීම් සහ චරිත මතක තබා ගැනීමේ හැකියාවත් ලබාගන්නවා විතරක් නෙවෙයි,  වයසත් එක්ක දරුවා  මේ හැකියාව දියුණු කරගන්නත් සමත් වෙනවා. 

මේ දේ අධ්‍යාපනය ලබන කාලය වෙනකොට කොයි තරම් අත්‍යවශ්‍ය වෙනවද කියන කාරණය වැඩිහිටි ඔබ අත්දැකීමෙන්ම දන්නවා ඇති කියලා අපි හිතනවා.

ෆැන්ටසිය සහ රියැලිටිය 

සාර්ථක ජිවිතයක් ගතකරන්න නම් යථාර්ථයත් මායාවත් අතර වෙනස හඳුනාගැනීමට හුරු වීම අත්‍යවශ්‍ය වෙනවා. මේ හැකියාව නොමැති වීම නිසා වල්මත් වෙන තරුණ වැඩිහිටි ජිවිත ඕනෑ තරම් සමාජයේ දකින්නට ලැබෙනවා. හැබැයි පොත පත ඇසුරු කරන්න හුරු වෙන දරුවට මේ හැකියාව නිරායාසයෙන්ම ඇතිවෙනවා. තවත් විදියකින් කිවොත් මේ හැකියාව දරුවා තුල ඇති කරවන්න බුද්ධිමත් මව්පියන් සමත්වෙනවා.

IQ මාස්ටර්

දරුවෙකුට පොත් කියවන්න හුරු කිරීමෙන් පසුව කාලයත් එක්ක දරුවා දැනුම පිපාසිතයෙක් බවට පත්වෙනවා. පාසල් අධ්‍යාපනය ලබන වයසට ආවම මේ කාරණය දරුවාට ඉතාම සුබවාදී බලපෑමක් තමයි ඇති කරන්නේ.

එකිනෙකට වෙනස් මාතෘකා පිලිබඳව ඇතිවන කුතුහලය සහ විස්තර සෙවීම, ප්‍රශ්න ඇසීම වගේ කාරණා දරුවෙකුට කවදාවත් අයහපතක් නම් කරන්නේ නෑ. ඒ වගේම වර්ණ, අකුරු, ඉලක්කම්, හැඩතල වගේ දරුවෙක් දැනුවත් විය යුතු අංශ ගැන විනෝදාත්මක විදියට කියලා දෙන්නට පුළුවන් වීමත් විශාල වාසියක් වෙනවා.

සාධාරණ බබා

දරුවෙක් තුල කුඩා අවධියේ සිටම ඇති කල යුතු ඉවසීම, කාරුණික බව, සානුකම්පිත බව, බෙදාහදා ගැනීම, උපකාර කිරීම, සත්තුන්ට සහ පරිසරයට ආදරය කිරීම, සාධාරණත්වය වගේ යහපත් ගුණාංග වගාවට හොදම ක්‍රමයක් විදියට පොත් පත් පෙන්වන්න පුළුවන්කම තියෙනවා.

වටිනාම දේවල් ලැබෙන්නේ පොත පතිනි

පුද්ගලයෙකුට තියෙන වටිනාම හැකියාවක් විදියට පරිකල්පන ශක්තිය සහ නිර්මාණශීලි බව පෙන්වන්න පුළුවන්. කෙනෙක්ට මේ හැකියාව විවිධ ක්‍රමවලින් උරුම වෙන්න පුළුවන්. මේ නිර්මාණශීලිත්වය ඇතිවෙන්න ප්‍රධාන ක්‍රමයක් විදියට කුඩා අවධියේ පොත් පත් පරිශීලනය කිරීම පෙන්වන්න පුළුවන්. 

විශේෂයෙන්ම පින්තුර පොත් ඇසුරෙන් කතන්දර නිර්මාණය කිරීම, ඊලඟ සිදුවීම උපකල්පනය කිරීම, කතාන්දරය ගැන වෙනස් ආකාරයකට සිතීම වගේ දේවල්වලින් මේ හැකියාව දියුණු වෙනවා කියලා කියන්න පුළුවන්.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

The post දරුවෙකුට පොත් කියවන්න හුරු කිරීම මෙච්චරම වැදගත් ඇයි කියල දන්නවද? appeared first on familylife.

නිරන්තරයෙන් ම පොත පත ගැන ඔබව දැනුවත් කරන familylife.lk අපි මේ ලිපියෙන් ඔබට අරන් එන්නේ අවුරුදු 2ත් 5ත් අතරෙ පොඩ්ඩන්ට ගැළපෙන ඉංග්‍රීසි සහ සිංහල පරිවර්තන කතන්දර පොත් කිහිපයක් පිළිබඳ තොරතුරු යි.

අවුරුදු 2ට වැඩි දරුවොන්ට විතරක් නෙවෙයි ඊට වඩා වයසින් අඩු දරුවෙකුට වුණත් අපි මේ කියන පොත් බලන්න කිසිම තහනමක් නෑ. විශේෂයෙන් ම දරුවාගේ පරිකල්පන ශක්තිය දියුණු වීම, බුද්ධි වර්ධනය වීම, භාෂා හැකියාව සහ අවධානය රඳවා තබාගැනීමේ හැකියාව දියුණු වීම ඇතුළු වාසි රැසක් පොත් කියවීම තුළින් ඔබේ දරුවාට හිමි වෙනවා.

පින්තූර කතා

එන්. රැඩිලොව් කියන රුසියානු චිත්‍ර ශිල්පියා විසින් අඳින ලද චිත්‍රවලට පද්‍ය නිර්මාණය කරලා තියෙන්නේ  එන්.ගෙර්නිත් සහ නතාලියා දිලක්තොර්ස්ක්යා කියන රචකයෝ දෙන්නා. රුසියානු බසින් නිමවුනු පො​තේ සිංහල පරිවර්තනය ප්‍රකාශයට පත් කෙරෙන්නේ ප්‍රගති ප්‍රකාශකයෝ විසින්.

මේ පොතේ සිංහල පරිවර්තනය  වගේම ඉංග්‍රීසි පරිවර්තනයත් මිලට ගන්න පුළුවන්කම තියෙනවා. බොහොම අපූරු පින්තුරත්, ඒ පින්තුර ආශ්‍රිතව ලියැවුණු වෙනස්ම ආකාරයේ පුංචි පුංචි කවි/ කතන්දරත් මේ පොතෙහි අඩංගු වෙනවා. ඒ වගේම පින්තුරය බලාගෙන තනියම කතන්දරයක් කියන්න වුණත් පොඩිත්තට අවස්ථාව ලබා දෙන්න​ට  හැකියාව තියෙනවා.

පුංචි පැටවූ සහ උන්ගේ අම්මලා

ජිආං යීමින් කියන චීන ජාතික කතුවරයා විසින් රචනා කෙරුණු මේ පොතේ ඇති හුරුබුහුටි පින්තුර ඇදලා තියෙන්නෙත් ඔහු විසින්මයි. සිංහල පරිවර්තනය සවිමන් උරුගොඩවත්ත විසිනුත්, බෙදාහැරීම අරුණ ප්‍රකාශකයෝ විසිනුත් සිදු කරනවා. මේ කතා පොත “සිගිති විද්‍යා කතා පෙළ” කියන ඉතාම අපූරු පොත් පෙළෙන් එක පොතක් පමණයි.

පොඩි දරුවොන්ට ගැළපෙන සරල විදියට, බොහෝ අවස්ථාවල සතුන් ආශ්‍රිතව යම් යම් විද්‍යාත්මක කරුණු පැහැදිලි කිරීමක් තමයි මේ පොත් පෙළෙන් සිදු කෙරෙන්නේ.

  පුංචි රවුම් බනිස් ගෙඩිය

මේ පොතේ කතුවරයෙක් පිළිබදව සටහනක් ඇතුළත් වෙලා නම් නැති වුනත් සිංහල පරිවර්තනය කැනොල් ප්‍රකාශකයන් විසින් සිදුකෙරිලා තියෙන බව සඳහන් වෙලා තියෙනවා. වයසක ආච්චි කෙනෙක් හදන පුංචි බනිස් ගෙඩියක්, පෝරණුවෙනුයි ගෙදරිනුයි එළියට පැනලා යනකොට මුණගැහෙන අය ගැනයි, අන්තිමට බනිස් ගෙඩියට අත් වෙන ඉරණම ගැනයි තමයි මේ පොතෙන් කියවෙන්නේ. පොඩ්ඩෝ ප්‍රිය කරන ආකාරයේ පින්තුර මේ පොතෙත් අඩංගු වෙලා තියෙනවා.

අපූරු කතා

කර්නේ චුකොව්ස්කි කියන රුසියානු ලේඛකයා විසින් රචනා කරපු “ටෙලිෆෝනය, අවුසද හාමි, කාටත් පාඩමක්, නැතිවුණු හිරු” කියන ළමා කතන්දර 4 මේ පොතේ අඩංගු වෙනවා. ප්‍රගති ප්‍රකාශකයෝ තමයි මේ අපුරු කතන්දර කීපය කවි කතන්දර විදියට, ලස්සන පින්තූරත් සමග ප්‍රකාශයට පත් කරලා තියෙන්නේ. මේ කතා වෙන වෙනම පොත් 4ක් විදියටත් මිලට ගන්න පුළුවන්කම තියෙනවා. දැනුම ලබාදෙන අතරේම විනෝදයත් සපයන කතා පොතක් විදියට මේ පොත හඳුන්වන්න පුළුවන්කම තියෙනවා.

Monster in the well

පොඩි දරුවෝ අතරේ බොහොම ජනප්‍රිය ළමා කතා ලේඛිකාවක් වන සිබිල් වෙත්තසිංහ මහත්මියගේ “ලිඳේ යකා” කියන කතා පොත ඇතුළුව තවත් පොත් ගණනාවක් කතුවරිය විසින් ම ඉංග්‍රීසි පරිවර්තනය කරලා තියෙනවා. ඕනෑම පොත් හළකින් මේ පොත් මිලට ගැනීමේ හැකියාව තියෙනවා. අතහැරලා දාපු ළිඳක ජීවත්වෙන යක්ෂයෙක් එතනින් එළියට අරගන්න අදිත් කියන පොඩ්ඩා මේ යක්ෂයව මිනිස්සු එක්ක ජීවත්වෙන්න පුළුවන් තත්ත්වයට පත්කරන ආකාරය ගැන තමයි මේ කතාවෙන් කියැවෙන්නේ.

කතාවේ සාරාංශය විදියට පොතේ අන්තිමට මෙන්න මේ වචන කීපය සඳහන් වෙලා තියෙනවා.”To make a cruel heart soft and tender, kinder and love are magic wonders”. මේ අවසන් ආදර්ශය ඕනෑම කුඩා දරුවෙකුට තමුන් වැඩිහිටියෙකු වෙන මොහොතේ මතකයේ තිබෙනවානම් කොයිතරම් ලස්සන ලෝකයක් හදන්නට හැකිවේවිද?

The ugly duckling

ලේඩිබර්ඩ් පොත් මාලාවේ පළමු මට්ටමේ(Level 1) පොත්වලින් එකක් ගැන තමයි අපි ඊළ​ඟට කතා කරන්නේ. පුංචි කාලේ කැතම  කැත තාරාවෙක් විදියට හඳුනගෙන හැමෝම අතහැරලා දාපු හංස පැටියෙක් කාලයත් එක්ක එයාගේ ලස්සන හංස ස්වරූපයට පත්වෙන ආකාරය තමයි මේ කතාවෙන් කියවෙන්නේ. අවුරුදු 3ක පොඩි දරුවෙකුට වුණත් කතාවේ වාක්‍ය පවා මතක හිටින ආකාරයට තමයි කතාන්දරය ලියැවිලා තියෙන්නේ.

ලේඩිබර්ඩ් කතා පොත්වල තියෙන එක් විශේෂත්වයක් විදියටත් ඒ ගුණාංගය හඳුන්වන්න පුළුවන්කම තියෙනවා. ඒ වගේම කතාන්දරය ඉවර වුනාම බබාගෙන් අහන්න ප්‍රශ්න කීපයක් සහ කරන්න පොඩි ක්‍රියාකාරකමකුත් මේ පොත්වල අඩංගු වෙලා තියෙනවා. එය දරුවාට කතාව කොයිතරම් මතකද කියන දේ දැනගන්නත්, පොතෙන් දැනෙන විනෝදය වැඩි කරවන්නත් හේතුවක් වේවි.

Hop hop and away

Richard Scarry’s Great Big Schoolhouse Readers කියන පොත් මාළාවේ දෙවන මට්ටමේ (Level 2) බොහොම අපූරු පොතක් තමයි “හොප් හොප් ඇන්ඩ් අවේ” කියන්නේ. පාසලේ තියෙන වැඩසටහනකට තමන්ගේ සුරතල් ගෙම්බාව අරන් යන හක්ල් කියන පූස් පැටියා සහ එයාගේ අනිත් යාළුවොත් ගැන තමයි මේ පොතෙන් කියැවෙන්නේ.

පොඩ්ඩෝ බොහොම කැමතිවෙන විදියේ පින්තුරත් එක්කම එකම විදියට කියවගෙන යන්න පුළුවන් විදියට මේ පොතත් ලියවිලා තියෙනවා. එකම විදියට ලියැවුණු වාක්‍ය තියෙන නිසා කියවීම පුරුදු වෙන දරුවෙකුට පවා මේ පොත කියවීම පහසු වෙනවා කියන්න පුළුවන්.

At the farm

Really Decent Flip Flap පොත් පෙළින් එක් පොතක් වන මෙයින් කියවෙන්නේ ගොවිපොළක ජීවත්වෙන සතුන් කීපදෙනෙක් සහ ඒ ඒ සතුන් හඬනගන විදියත් පිලිබ​ඳවයි. කවියක් වගේ ලස්සනට වචන ගලාගෙන යන විදියට තමයි පොත ලියවිලා තියෙන්නේ. මේ පොතේ පිටුවක් පෙරළන්නේ දෙපැත්තට.

ඒ කියන්නේ අනිත් පොත්වල වගේ වම් පැත්තට නම් නෙවෙයි. ඉතින් සතාගේ පින්තුරය හරියට ගැළපෙන විදියට පොතේ පිටු පෙරළන එකත් පොඩ්ඩට අභියෝගයක් වෙනවා. මරදානේ සරත් පොත් හළෙන් මේ හාර්ඩ් බෝර්ඩ් පොත් මිලට ගැනීමේ හැකියාව තියෙනවා. ඒ වගේම බිග්බෑඩ් වුල්ෆ් වගේ ජාත්‍යන්තර පොත් සල්පිලකින් මිලදීගන්නටත් හැකියාව තිබෙනවා.

The trouble with the tippers

වර්ණවත් සහ විශාල පින්තූරත්, අකුරුත් අඩංගු වෙලා තියෙන මේ පොතට නම් කිසිම පොඩ්ඩෙක් අකමැති වෙන එකක් නෑ. පොතත් ප්‍රමාණයෙන් අනිත් පොත්වලට වඩා විශාලයි. ගොඩනැගිල්ලක් හදන තැනක වැඩකරන ඉදිකරන්නන්ටත් ටිපර් එකකටත් සිදු වෙන අකරතැබ්බයක් ගැන තමයි මේ  කතාවෙන් කියවෙන්නේ.

එක් එක් පිටුවේ අඩංගු වෙලා තියෙන වචන පිටුවේ පැත්තකින් පින්තුරවලින් වෙනමත් හඳුන්වලා දීලා තියෙනවා. මහ මග දකින්න ලැබෙන විශාල ටිපර් රථයක් වගේම ඉදිකරීම් වැඩ දැක්කම මේ පොත දරුවාට පහසුවෙන් මතක් කරන්නත් පුළුවන්කම තියෙනවා.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

The post පුංචි පැංචෙකුට ගැළපෙන ඉංග්‍රීසි, සිංහල කතන්දර පොත් appeared first on familylife.

භාෂාව සහ  අන්තර්ගතය කියන කරුණු දෙකෙන් උසස්ම තත්ත්වයේ තියෙන මේ කෘති, වයස අවුරුදු 10න් පමණ ඉහළ දරුවන් වෙනුවෙන් තමයි රචනා වෙලා තියෙන්නේ. අපි මේ සටහන කතුවරයාගේ නමින්ම හඳුන්වන්නේ ඒ එක් එක් කතුවරයාගෙන් වටිනා කෘතීන් රැසක්ම ලියැවී ඇති නිසායි. ඒ වගේම මේ ලැයිස්තුවේ විශේෂත්වය වන්නේ දරුවන්ට කියන්නට පරිවර්ථන කෘතීන්ම සොයන මවුපියන්ට ලංකාවේ නියම බස් වහර, ජීවන රටා දරුවන්ට කියාදෙන්නට මෙන්ම තමන්ගේම අතීතකාමය අවුස්සාගන්නටත් මේ කෘතීන් හරහා හැකිවීමයි.

කුලසේන ෆොන්සේකා

• බුරු පොරය
• සිරිමල්ගේ වික්‍රම
• තුන් යහළු වික්‍රමය
• සෝමපුර වීරයෝ
• රන්සිරිගේ සංග්‍රාමය
• කල්ලන්දුවේ මුතු කොල්ලය

වැනි අමතක කරන්න බැරි පොත් රචනා කළ කුලසේන ෆොන්සේකා කියන්නේ ළමා සහ නව යොවුන් පාඨකයින්ට පොත් පත් කියවීමේ ආසාව ඇති කරපු කතුවරයෙක් කීවොත් නිවැරදියි.

මේ පොත්වලින් බොහොමයක ප්‍රධාන චරිතය හෝ චරිත වීරයෙක් කරවමින් තමයි කතාව ගොඩනැගිලා තියෙන්නේ. මේවායින් සිරිමල්ගේ වික්‍රම කියන කෘතිය පුරාවටම අඩංගු වෙලා තියෙන්නේ හාස්‍යජනක සිදුවීම්. ළමා හිත්වල ඇති අව්‍යාජත්වය, අවංකකම, මානව හිතවාදී ගුණය, බුද්ධිමත්කම සහ නිර්භීතකම වගේ ගුණාංග ඉස්මතු කරවමින් කතාන්දරයක් ගොඩනැගීම කතුවරයාගේ උත්සාහය වෙලා තියෙනවා.

ටී. බී ඉලංගරත්න

මහනුවර ප්‍රදේශයේ ඉපිද හැදී වැඩුණු ටී.බී. ඉලංගරත්න මහතා රචනා කළ පොත්පත් සියල්ලෙන්ම පාහේ උඩරට සිංහල ගැමි ජීවිතයේ චාරිත්‍ර වාරිත්‍ර, ගති පැවතුම් සහ ව්‍යවහාරික බස, සරලබව, ජීවනෝපාය, සාරධර්ම වගේ දේවල් පිළිබඳව කරුණු හෙළිවෙනවා.

ඒ වගේම තමන්ගේ ළමා කාලය, තරුණ කාලය වගේම විවාහය කියන ජිවන සංසිද්ධිවලට අදාළ කරුණු ඇසුරු කරගනිමිනුත් මෙතුමා කෘති රචනා කරලා තියෙනවා.  ටී. බී ඉලංගරත්න කියන නමත් එක්කම ඈඳුණු “අඹ යාළුවෝ” කෘතිය වගේම ටෙලි  නාට්‍ය ගැන තියෙන මතකයන් අදටත් අපේ සිතිවිලි ළමා කාලයට අරන් යනවා. ඊට අමතරව

• තිලක
• විලම්බීත
• තිලක හා තිලකා
• හපනා
• නෑදෑයෝ
• නයනා
• මංගලා

වගේ නවකතා විශාල සංඛ්‍යාවකුත් ළමා කෙටි කතා කිහිපයකුත් මෙතුමා අතින් රචනා වෙලා තියෙනවා. මේ පොත්වල විශේෂත්වය වන  සරල කෙටි වාක්‍ය, ගැමි යෙදුම් සහ කුඩා පරිච්චේද සහිත බව නිසා කතාව නොනවත්වා කියවගෙන යාමේදී අපහසුවක් ඇතිවෙන්නෙත් නෑ.

මාර්ටින් වික්‍රමසිංහ

ළමා සහ යොවුන් සාහිත්‍ය ගැන කතා කරනකොට අමතක කරන්න බැරි පොතක්  විදියට “මඩොල්දුව” හදුන්වන්න පුලුවන්. ඊට අමතරව කතුවරයාගේ ළමා කාලයේ අත්දැකීම් ඇසුරින් ලියවුනු

• මගේ කතාව
• උපන්දා සිට
• විද්‍යා විනෝද කතා

වගේ ළමා සහ යොවුන් නවකතා මෙතුමා අතින් ලියවිලා තියෙනවා. සරල උපමා, රූපක, දකුණු ලකට අවේනික සහ චිත්ත රූප මවන සරල බස් වහර නිසා මේ පොත් දරුවෙකුට කියවන්න සුදුසු ම ආකාරයේ පොත් විදියට සලකන්න පුළුවන්. ඒ වගේම දරුවෙකුට ලියන්නට තරමේ සුදුසු පෙළඹවීමක් කරන්නටත් රචකයාට හැකියාව තිබෙනවා. බොහෝ දුරට මවාපෑම් නැති සත්‍ය කරුණු අඩංගු වීමත් විශේෂ කරුණක් විදියට පෙන්වන්න පුළුවන්.

දොන් පීටර් පියතුමා

• ගැටවර මුලාව
• වාසනා මහල් (කෙටි කතා)
• අමල්ගේ බල්ලා
• වන ගත ළමෝ
• හොල්මන් දුපත
• ඩිංකි
• විදුහලේ විත්ති

වගේ පොත් රචනා කරපු දොන් පීටර් පියතුමා කියන්නෙත් ළමා සහ යොවුන් සාහිත්‍ය ගැන කතාකරනකොට අමතක කරන්න බැරි රචකයෙක්. ඛේදාන්තයකින් අවසන් වන බොහෝ කෘතීන් තිබුනත් වැඩි වශයෙන් මෙතුමා අතින් ලියවුනෙත් වීර ළමා කතා කාණ්ඩයට අයත් වෙන කෘති.

තමන්ගේ කෘති හරහා කුඩා දරුවන්ට ආදර්ශය සපයන්නත්,  කුඩා දරුවන් තුල ඇති මානව දයාව, සංවේදීබව, සත්ත්ව කරුණාව වගේ ගුණාංග ගැන කතා කරන්නත්, කියවීම හරහා විනෝදය වගේම පරිකල්පන හැකියාව නගා සිටුවන්නත් මෙතුමා උත්සහ කරලා තියෙනවා.

හේමචන්ද්‍රිකා ලියනගේ

• කතුවරියගේ
• තැනට සුදුසු නුවණ
• පින් ළමයා
• දිරි දැරියෝ
• මල් සමනලියෝ
• මිහිරි කල්පනා

වගේ බොහෝ දුරට  නව යොවුන් දැරියන්  ප්‍රධාන චරිත විදියට අරන් ලියවුනු යොවුන් නවකතා විදියට හදුන්වන්න පුළුවන්. පින් ළමයා, දිරි දැරියෝ, මල් සමනලියෝ කියන්නේ පාසල් දැරියන් කිහිපදෙනෙක් පිළිබඳව කියවෙන බොහොම රසවත් තුන් ඈඳුතු නවකතා පෙළක්.

තමන්ගෙන් සිදුවන වැරදි නිවැරදි කරගනිමින්, මුහුණදීමට සිදුවන ගැටළු විසදගනිමින් ජීවිතය ජයගන්න උත්සහ කරන චරිත පිළිබද කතා පුවත් මේ පොත්වල අඩංගු වෙනවා. ඉතාම සරල, විනෝදකාමී සහ කුතුහලය දනවන ආකාරයට ලියවිලා තියෙන මේ පොත් කිහිපයත් කුඩා දරුවෙකුට අසාවෙන් කියවන්න පුළුවන් කෘති විදියට හදුන්වන්න පුලුවන්.

පියසේන කහ​ඳගමගේ

දේශපාලන පළිගැනීම් ලෙස ජිවිත කාලය පුරාවට දුෂ්කර ප්‍රදේශවල ස්ථාන මාරුවීම ලැබූ පියසේන කහදගම මහතා එම  ප්‍රදේශවල ජන ජීවිතය ආශ්‍රය කරගෙන, සත්‍ය කරුණු අඩංගු පර්යේෂණාත්මක කෘති රචනා කළා. බින්තැන්න, දඹාන, මින්නේරිය, දිගාමඩුල්ල  ප්‍රදේශවල සමාජ, ආර්ථික, සංස්කෘතික වටපිටාව, දුෂ්කරතා, කුඹුරු ගොවිතැන, හේන් වගාව සහ ඒ ආශ්‍රිත බස් වහර වගේ දේවල් ඇසුරු කරගෙන

• අපේ ගමේ විත්ති
• හේනේ විත්ති
• වනගත චාරිකා
• සාරකෙත
• රන්වන් කරල්
• බින්තැන්නේ විත්ති
• කෙතක මහිම
• වනේ ඇඳුනු පියසටහන්
• දඩබිමේ හපන්නු

වගේ බොහෝ පොත් පාසල් දරුවන්ට අතිරේක කියවීම් විදියට පවා නිර්දේශ වෙලා තියෙනවා. මිට අමතරව කොටිරාලට පාඩමක්, පනාමුරේ ඇත්රාජා සහ හොල්මන් කොරිය ඇතුළු තවත් පොත් ගණනාවකුත් මෙතුමා අතින් රචනා වෙලා තියෙනවා.

ඩී. ඇම්. කරුණාරත්න

ඩී. ඇම්. කරුණාරත්න මහතා අතින් ලියවුනු යොවුන් සාහිත්‍ය කෘති අතරෙන්

• කම්මලේ දෝංකාරය
• ගිම්හානයේ වික්‍රමයක්
• බස්තියන්ගේ සොහොන
• කදුකරයේ දඩයම

කියන පොත් කිහිපය ප්‍රධාන වෙනවා. මෙයින් කම්මලේ දෝංකාරය හැරුණම අනිත් පොත් රහස් පරීක්ෂක කතා පොත් විදියට හදුන්වන්න පුළුවන්.

විශේෂම කරුණ තමයි සාමාන්‍යයෙන් රහස් පරීක්ෂක කතා රචනයට මෙරට කතුවරුන් පෙළඹෙන අවස්ථා විරල වුවත්, කුතුහලය සහ සරල බව නොනැසෙන විදියට මෙවැනි පොත් රචනයට කතුවරයා සමත්කමක් පෙන්වීමයි.

දෙනගම සිරිවර්ධන

සුන්දර සහ ඉතා සංවේදී කතා තේමාවන් ඇතුළත් කෘතින් රචනා ක​ළ කතුවරයෙක් විදියට දෙනගම සිරිවර්ධන මහතා හදුන්වන්න පුළුවන්.

• කතරක පිපුණු මල් දෙකක්
• පුංචි ගොපල්ලා
• අපට අපේ අත්
• ගුරු පඬුරු
• මිතුරෝ
• තාත්තලා සහ පුත්තු
• වැහි වලාව
• පුංචි ගොපල්ලා

වගේ කෘතිවලින් මානුෂික සම්බන්ධතා, සමාජයේ ඇති ගැටළු, මාපිය ගැටුම් නිසා අසරණ වන දරුවන්, දුෂ්කර දිවි පැවතුම් වගේ කරුණු ගැන කතා කරනවා. මේ දේවල් ළමා හා යොවුන් මනසට කාවදින විදියකට සරලව සහ තාත්වික විදියට රචනා කරන්නත් කතුවරයා සමත් වෙලා තියෙනවා.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

The post වයස අවුරුදු 10 ක් වූ ඔබේ දරුවාට තෑගි කරන්නට අපූරු වූ පොත් ගොන්නක් appeared first on familylife.

– විශිෂ්ටතම ස්වතන්ත්‍ර නවකතාව – රාජ්‍ය සාහිත්‍ය සම්මානය – විමල් උදය හපුගොඩආරච්චි – යකඩ සිල්පර

විසි වැනි සියවසේ මුල් භාගයේ, සුදු ජාතිකයන් විසින් මෙරට දුම්රිය මාර්ගය තැනීම හා සම්බන්ධව ලියැවුණු මේ කෘතිය කතුවරයාගේ පස්වන නව කතාවයි. මෙය ඓතිහාසික නවකතා ගණයට අයත් කෘතියක්. කොළඹ සිට යාපනය දක්වා ඉදිකෙරෙන දුම්රිය මාර්ගය  තැනීමේ ව්‍යාපෘතියේ  ප්‍රධාන ඉංජිනේරුවරයා වන ඩන්ස්ටන් මුලර්,  ඔහුගේ බිරිද වන රූත් මුලර්, හේන කුලේ තරුණයෙකු වන පදක්කයා, ඔහුගේ බිරිද රම්බා සහ දේවාලයේ කපුවා වන ගවරා කියන චරිත ප්‍රධාන කරගෙන තමයි මේ කෘතිය ගොඩනැගිලා තියෙන්නේ. දුම්රිය මාර්ගය ඉදි කිරීම ආරම්භ වීම හේතුවෙන් එකිනෙකා සමග සම්බන්ධ  වෙන මේ චරිතවල ජිවන රටාවන්  ක්‍රමක්‍රමයෙන් වෙනස් වන ආකාරය මේ කෘතියෙන් පෙන්වා දෙනවා.

බ්‍රිතාන්‍ය පාලනය යටතේ දුම්රිය මාර්ග ඉදිකිරීමේ ඉතිහාසය, වසර 200කට පෙර කාල සීමාව තුළ ශ්‍රී ලංකාවේ පැවති  කුල ක්‍රමයේ ස්වභාවය, එවකට පැවති සමාජ – ආර්ථික ක්‍රමය, ස්ත්‍රී– පුරුෂ සම්බන්ධතාවල ස්වරුපය කියන කරුණු කිහිපයක පිලිබදවම ඉතා හොදින් පර්යේෂණ කිරීමෙන් පසු රචිත පොතක් විදියට මේක හදුන්වන්න පුළුවන්.

– හොඳම ස්වතන්ත්‍ර කෙටි කතා සංග්‍රහය – රාජ්‍ය සාහිත්‍ය සම්මාන – සුමුදු නිරාගි සෙනෙවිරත්න – ගිහින් එන්න කානිවල්

පොත් කියවන්නන් අතර ඉතා ජනප්‍රිය වුනු “දුල්වල අලංකාරේ” කියන කෘතියේ රචිකාවිය වන කතුවරියගේ පළමු කෙටි කතා සංග්‍රහය වන මේ කෘතිය කෙටි කතා අටකින් සමන්විත වෙනවා. සිලි සිලි බෑග් යනුවෙන් හදුන්වන පොලිතින් බෑග් මෙරටට හඳුන්වලා දුන් කාල වකවානුව ඇසුරින් ලියවුණු “සිලි සිලි සිරි සිරි”, තරුණ බෞද්ධ මෙහෙණියකට මුහුණ දීමට සිදුවන අභියෝග ඇසුරින් ලියවුණු “මිදුණා මිදුණා මනාව මිදුණා”, නුග ගසක් යට වැදුම් පිදුම්වලට පත් වන පුල්ලෙයාර් දේව ප්‍රතිමාවක් ඇසු​රෙන් ලියවුණු “අග්නි ප්‍රේත වස්තුව”, අනගාරික ධර්මපාල චින්තනය ඇසුරෙන් ලියැවුණු “ගිහින් එන්න කානිවල් ”, රණවිරු වැන්දඹුවන් සහ රාජ්‍ය සේවය ඇසුරින් ලියවුණු “ගඩුව”, ස්ත්‍රී ලෝලියෙකු සහ ඔහුගේ බිරිද අතර වන සම්බන්ධතාවය ඇසුරින් ලියවුණු “කළු පෙට්ටිය”, අද්භූත සිදුවීමක් අළලා ලියැවුණු “රාමු දෙකක කතාවක් ” සහ  වැවකින් නිවසක පොකුණකට ගෙනා මත්ස්‍යයෙකුගේ  දෘෂ්ටිකෝණයෙන් ලියවුනු “පෙතියා ” කියන කෙටි කතා අට මෙහි අඩංගු වෙනවා.

– හොඳම පරිවර්ථි​ත නවකතාව – රාජ්‍ය සාහිත්‍ය සම්මාන – පරිවර්තනය නිලුක කදුරුගමුව – මුහුද යට දිවයින

මෙය දහඅටවන සියවසේ අගභාගය වන විට සැන් දොමෑං දිවයින හෙවත් වර්තමානයේ හයිටි රාජ්‍ය යනුවෙන් හැදින්වෙන රාජ්‍ය පසුබිකොට ගෙන පැවති වහල්බාවය ඇසුරින් ඉසබෙල් අයියන්දේ විසින් රචනා කළ  අගනා කෘතියක සිංහල පරිවර්තන යි. තම රාජ්‍යයේ  ජනයා පීඩාවට පත්කළ වහල්බවේ ම්ලේච්චත්වයත්  සහ එයට එරෙහි අරගලයේ දී දෛවෝපගත ලෙස මුණ ගැසෙන තෙතේ හෙවත් සරිතේ නමැති වහලිය සහ තුලුස් වල්මොරුන් නමැති වතු පාලකයා ප්‍රධාන චරිත කරගනිමින් ගොඩ නැගුනු මේ කෘතිය ඉසබෙල් අයියන්දෙගේ වෙනත් කෘති හා සමානවම ආදරය, රාගය, කෘරත්වය යනාදී ලක්ෂණ එකට කැටිවූ ආකර්ශනීය අපුර්ව කෘතියක් විදියට හදුන්වන්න පුළුවන්.

– විශිෂ්ටතම නවකතාව – ස්වර්ණ පුස්තක සම්මානය සහ ගොඩගේ සාහිත්‍ය සම්මානය – සමන් වික්‍රමාරච්චි – අප්පච්චි ඇවිත්

මෙම කෘතියේ වෙනස් ආකෘතිය සහ  සරල අන්තර්ගත නිසා වඩාත් කතාබහට ලක් වූ කෘතියක් විදියට හදුන්වන්න පුළුවන්කම තියෙනවා. අප්පච්චි ඇවිත් කෘතියෙන් කියවෙන්නේ තමන්ගේ මිය ගිය පියා ආවේශ වී සිය බිරිඳ හා දියණිය මරා දමන පුද්ගලයකු ගැන කතාවකි.

මේ කුඩා කෘතිය කොටස් තුනකින් යුක්ත වෙනවා. නිශ්ශංක නම් පරිපාලන සේවා ජ්‍යෙෂ්ඨ නිලධාරියාගේ බිරිඳ වන සුමාලි සහ ඔවුන්ගේ දියණිය වන සුමුදු යන දෙදෙනාගේ පශ්චාත් මරණ පරීක්‍ෂණයේ දී ඉදිරිපත් වන කට උත්තර තුනකින් පළමු කොටස සම්පුර්ණ වෙනවා. තුන්වන කොටස විත්තිය වෙනුවෙන් පෙනී සිටින නවක නීතිඥයාගේ දේශනයෙනුත්, දෙවැන්න එම දේශනයේ දී නීතිඥයා විසින් පළමු විත්තිකරුගේ ප්‍රකාශය ලෙස සලකුණු කර ඉදිරිපත් කළ නිශ්ශංක විසින් කියන ලදැයි කියන දීර්ඝ විස්තරයෙනුත් සමන්විත වෙනවා.

බිරිදගේ පියාගේ බලපෑම නිසා තම පියාගෙන් වෙන්ව මාමණ්ඩිය ලබා දෙන නිවසකට එන නිශ්ශංක, ඔහුගේ නීතිඥයා පවසන ආකාරයට තමන්ගේ දියණියත් බිරිදත් ඝාතනය කරන්නේ පියා ආවේශ වීම හේතුවෙන් බව කතාවෙන් කියවේ. මේ තත්ත්වය මනෝ ව්‍යාධි තත්වයක් ද එහෙමත් නැත්නම් නිශ්ශංකට සැබවින්ම මිය ගිය පියා ආරූඪ වනවාදැයි වටහාගෙන කතාව කියවීම පාඨකයාට අයත් කාර්යයක් විදියට තමයි අපි නම් දකින්නේ. ඒ වගේම සමන් වික්‍රමාරච්චි මහතාගේ අසන්ධිමිත්තා කියවා ඇතිවූ ආශක්ත බවින් යුතුව මෙය කියවන්නට යනවානම් එය ඔබේ බළාපොරොත්තු බිඳ දමන්නක් වන්නට ඉඩ ඇති බවටත් අප අනතුරු අඟවනවා.

– විශිෂ්ටතම කෙටි කතා සංග්‍රහය – ස්වර්ණ පුස්තක සම්මානය – ලියනගේ අමරකීර්ති – අළු පැහැති ආරංචි

නිතර නිතර කතාබහට ලක් නොවන පුද්ගල චරිත වගේම අවස්ථා ප්‍රධාන කරගනිමින් රචනා කෙරුණු කෙටි කතා 7 කින් මේ කෘතිය සමන්විත වෙනවා.

භාණ්ඩ ඍජු අලෙවිකරණයේ යෙදෙන තරුණයෙකුට කවියෙකු යයි සිතා රැවටෙන මහාචාර්යවරයෙක් සම්බන්ධ කරගෙන ලියවුනු “කවියෙකු සොයා” කෙටි කතාව මුල සිට අග දක්වාම කුතුහලයෙන් පිරුණු නිර්මානයක් විදියට හදුන්වන්න පුළුවන්.

“ඉඩි අමින් සහ වැලිමඩ සමන්” කෙටිකතාව, 1988/89 කාලය තුළ ජනතා විමුක්ති පෙරමුණේ නැගී සිටීමත්, මර්ධනකාරී වැඩපිළිවෙලකින් එය කඩාකප්පල් කළ රජය සහ ආරක්ෂක අංශත්, නිරපරාදේ මිය ගිය තරුණ ජිවිතත් ඇසුරින් ලියැවුණකි.

ටෙලි නාට්‍ය නිෂ්පාදනයේ සැබෑ මුහුණුවර විදහා දක්වන කෙටිකතාවක් විදියට “දෙවන රංගනය” නිර්මාණය හදුන්වන්න හැකියාව තියෙනවා. සීසීටීවී දර්ශන පෙළක් මත පදනම්ව තමන්ගේ ජිවිතයේ වැදගත් තීරණයකට එළඹෙන තරුණියක් පිලිබදව කතා පුවතක් “අළු පැහැති ආරංචි” කෙටිකතාවෙන් කියැවෙනවා.

“හදවත සිඳුනු තැන” කෙටි කතාවෙන්, තරුණ වියේ දී ඇතිකරගත් අනියම් සබදතාවයක් පිළිබද පසුතැවෙන විශ්‍රාමික ගුරුවරියක් පිලිබදවත්, Down syndrome රෝගයෙන් පෙළෙන නිසල් නම් දරුවා ප්‍රධාන කොටගෙන නිර්මාණය කෙරුණු “එකම පුතා ” කියන කෙටි කතා ද්විත්වයත් ඊට අමතරව “සෝ බර සමය” යනුවෙන් තවත් කෙටි කතාවකුත් මෙම කෘතියේ අන්තර්ගතය ලෙස හඳුන්වන්න පුළුවන්.

---

ඔබ වැනිම පොතට පතට ආදරය කරන, දැනුමට, රසවින්දනයට ප්‍රියකරන තවත් අයෙකුගේ යහපත වෙනුවෙන් පහත මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න

---

කවරයේ ඡායාරූපය – media.buzzle.com

The post 2018 අවුරුද්දේ සාහිත්‍ය සම්මාන දිනූ මෙම කෘති ඔබත් කියෙව්වද? appeared first on familylife.

1. දුම්රියේ යුවතිය

පෝලා හෝකින්ස් විසින් 2015 දි ලියැවුණු “The girl on the train” කියන පොත  කෝශලී සිරිචන්ද්‍ර අතින් “දුම්රියේ යුවතිය” නමින් පරිවර්තනයට ලක්වෙනවා. මෙහි මුල් කෘතිය වසරක් ඇතුළත ලොව පුරා පිටපත් මිලියන 15ක්  විකිණීමෙන් සහ භාෂා 40 ට අධික ප්‍රමාණයට පරිවර්තනය වීමෙන් පැහැදිලි වෙනවා මෙයට කොයි තරම් පාඨක පිරිසකගේ ආදරය හිමිවෙලා තියෙනවද කියන එක ගැන. ඒ වගේම මේ පොත ඇසුරින් 2016 දි “The girl on the train” කියලා චිත්‍රපටයකුත් නිපදවෙනවා. රේචල්, ඇනා සහ මේගන් කියන කාන්තාවන් තුන්දෙනෙක් වරින් වර තමන්ගේ කතාව කියන ආකාරයට තමයි කතාව ලියවෙන්නේ.

මෙහි ප්‍රධන චරිතය වෙන්නේ රේචල් කියන තරුණ කාන්තාව. ඇයගේ කලින් සැමියා වන ටොම් විවාහ වී සිටින්නේ ඇනා සමගින්. ඇනාගේ සහ ටොම්ගේ නිවසට ආසන්න නිවසක මේගන් සහ ඇගේ සැමියා වෙන ස්කොට් පදිංචි වෙලා ඉන්නවා. දිනපතා උදේ හවස මෙතනින් ගමන් කරන රේචල් දුම්රිය සංඥාවක් ලග දුම්රිය නතරවෙනකොට මේ ගෙවල් පේළිය දකිනවා. මේ අයගේ ජීවිත යම් සිදුවීම් මාලාවක් නිසා එකට සම්බන්ධ වෙන ආකාරය තමයි මේ පොතෙන් කියවෙන්නේ. පරිච්ඡේදයක් පාසාම කුතුහලය වැඩිවෙන ආකාරයට ලියැවුණු මේ පොත ත්‍රාසජනක පරිවර්තන කියවන්න කැමති අයට වඩාත් ගැළපේවි.

2. Twilight පරිවර්තන පොත් පෙළ

ෆැන්ටසි ගණයේ පරිවර්තනවලට ප්‍රිය කරන අය වෙනුවෙන්ම ලියැවුණු පොත් පෙළක් විදියට ට්විලයිට් පොත් මාලාව හදුන්වන්න පුළුවන්. ස්ටෙෆනි මේයර් විසින් රචනා කෙරුණු “Twilight, New moon, Eclipse, Breaking dawn part 1 සහ Breaking dawn part 2″ කියන පොත් චින්තා සුභාෂිණි රණසිංහ විසින් “ගොම්මන් කළුවර, අමාවක, මිලින හිරු, හිමිදිරි උදාව 1 සහ හිමිදිරි උදාව 2″ යන නම්වලින් පරිවර්තනය වෙලා තියෙනවා. ප්‍රේමණීය වැම්පයරයා එඩ්වර්ඩ්ටත් වෘක සම්භවයක් ඇති මිතුරා ජේකබ්ටත් මැදි වන ඉසබෙලා ස්වෝන්ගේ ඉරණම විසදෙන ආකාරය මේ පොත් පෙළින් කියවෙනවා. ආදරය, භීතිය, කුතුහලය, අද්භූතබව කියන හැමදේම කැටිවුණු හීන ලෝකයක් විදියට මේ කතා මාලාව හදුන්වන්න පුළුවන්.

3. සාරාගේ ගෙත්තම

අද්භූත නමුත් සිදු නොවිය නොහැකි ආකාරයේ කෘති රචනා කරන වික්ටෝරියා හෝල්ට්ගේ “Kirkland Revels (1963) ” නමැති කෘතිය ඉ.ක. ජිනදාස විසින් “සාරාගේ ගෙත්තම” නමින් පරිවර්තනය කෙරෙනවා. කර්ක්ලන්ඩ් දේවස්ථානයේ  නටඹුන් අතර ඉදිකෙරුණු  රොක්වෙල් පරපුරේ මන්දිරය වෙන රෙවෙල්ස් නිවසේ හිමිකාරයා වන්නට සිටින ගේබ්‍රියල්, කැතරින් සමගින් විවාහ වී නිවසට පැමිණ සතියකට පසු සිය දිවි නසාගන්නවා. ඒ වන විටත් ගර්භණීව සිටින කැතරින් සහ ඥාති තරුණයෙක් වන සයිමන් මෙය දිවි නසා ගැනීමක් ද, මිනීමැරුමක් ද යන්න සොයා බලනවා. කැතරින්ගේ දරු ගැබට පවා අවදානමක් වන මේ සොයා යෑම අවසානයේ ඔවුන් මේ කුමන්ත්‍රණයේ සුළ මුල සොයා ගන්නවා. ප්‍රේමය, ධෛර්‍යය, භීතිය වගේම කුතුහලයෙන් පිරුණු මේ පොත සාර්ථක පරිවර්තනයක් විදියට හදුන්වන්න පුළුවන්.

4. හිමි අහිමි

ඩැනියෙල් ස්ටීල්ගේ “Kaleidoscope” කියන පොත “හිමි අහිමි” නමින් පරිවර්තනය කරන්නේ කෝශලී සිරිචන්ද්‍ර විසින්. පසුකාලීනව දක්ෂ නළුවෙකු බවට පත්වෙන සෑම් වෝකර් කියන ඇමෙරිකානු යුධ භටයා, සොලෝන්ජ් බැර්ත්‍රොන් කියන රූමත් ප්‍රංශ ජාතික කාන්තාව සමගින් දෙවන ලෝක යුද සමයේදී ප්‍රේමයෙන් බැදෙනවා. සුරංගනා කතාවක් වගේ වෙන ඔවුන්ගේ පෙම් කතාව අවසානයේ ශෝකාන්තයක් වන අතරේ මව්පියන් අහිමි වන ඔවුන්ගේ දියණියන් තිදෙනා එකිනෙකාගෙන් වෙන්කොට පවුල් තුනක් විසින් හදා වඩා ගැනෙනවා. මව්පියන්ගේ හිතවතෙකුගේ මාර්ගයෙන් වසර 30 ට පසු නැවත එක් වන මේ සොයුරියන් තිදෙනා පිළිබ​ඳ ඉතාමත් අනුවේදනීය කතා පුවත මෙහි අඩංගු වෙනවා.

5. මළවුන්ගෙන් නැගිට ආ පළිගන්නා

1886 දි මාරි කොරෙලි විසින් රචනා කෙරුණු “Vendetta” නම් කෘතිය අජිත් ප්‍රියශාන්ත රත්නායක වීසින් “මළවුන්ගෙන් නැගිට ආ පළිගන්නා” නමින් පරිවර්තනය කෙරෙනවා. 1959 දි ඩී.සී රණසිංහ මහතා අතින් ද, පසුකාලීනව ඩේවිඩ් කරුණාරත්න මහතා අතින්​ද මෙය “දෙයියෝ සාක්කි“  නමින් සංක්ෂිප්තව පරිවර්තනය කෙරෙනවා.

නීනා නමැති තරුණියව විවාහ කරගන්නා ෆැබියෝ රොමානි නමැති තරුණ සිටුවරයා ඇය සමග ප්‍රීතියෙන් දිවි ගෙවන අතරේ 1884 දි නේපල්ස් වෙ​ත කොළරා වසංගතය පැමිණෙනවා. එක් දිනක මිය ගියා යැයි වරදවා වටහාගැනීමක් හේතුවෙන් රොමානි සිටුවරයා ද මිහිදන් කෙරෙනවා. නැවත සිහිය ලබා සොහොන් ගෙයින් මිදී එන සිටුවරයාගේ සිත කම්පාවට පත් වෙන්නේ නීනා ඔහුගේ හොදම මිතුරා සමගින් පෙමින් වෙලී සිටින ආකාරය දැකීමෙන්. තමන් පත්ව සිටි මුළාව වටහාගන්නා ඔහු පසුව ඒ දෙදෙනාගෙන් පළිගන්නා ආකාරය පිළිබද කතාව මේ පොතෙන් කියවෙනවා. විශේෂතම කරුණ වෙන්නේ විසින්ම තවත් කාන්තාවක් තුළ පවතින චපලකම හා වංචනික බවත්, ආලයත් වෛරයත් අතර ඇත්තේ කෙස් ගසක වෙනසක් පමණක්ය යන්නත් හුවා දක්වමින් රචනා මෙය කර තිබීමයි.

6. ප්‍රේම සැදෑවෝ

ඊ.එල් ජේම්ස්ගේ “Fifty shades of Gray” කියන ආන්දෝළනාතමක කෘති පෙළ රංජිත් කුරුප්පු විසින් “ප්‍රේම සැදෑවෝ” නමින් පරිවර්තනය කෙරෙනවා. මේ පොත් මාලාවේ පොත් 5ක් මේ වන විට නිකුත් වෙලා තියෙනවා. භාෂා 12කට පරිවර්තනය වෙමින් පිටපත් දස ලක්ෂ ගණනින් අලෙවි වුණු මේ පොත් පෙළ ඇසුරෙන් චිත්‍රපට මාලාවකුත් නිපදවුනා.

පරපීඩ​ක කාමුකත්වයෙන් පෙළෙන ක්‍රිස්ටියන් ග්‍රේ නම් කෝටිපති තරුණ ව්‍යාපාරිකයා, ඇනස්ටාසියා ස්ටීල් නමැති තරුණිය සමග සම්බන්ධතාවයක් ඇති කරගැනීමත්, ප්‍රේමයෙන් වෙළීමත්, විවාහ වීමත් සමග ඔහු මේ තත්ත්වයෙන් ක්‍රමක්‍රමයෙන් මිදෙන ආකාරය පිළිබ​ඳව මේ පොතෙන් කියවෙනවා. අතිශය සෘංගාරාත්මක සිදුවීම් ඇතුළත් නිසා වැඩිහිටියන්ට වඩාත් සුදුසු බව පොතේ පළමුවෙන්​ම සදහන් කරලා තියෙනවා.

7. සම්භවය

ඩෑන් බ්‍රවුන් විසින් රචිත “Origin” නමැති කෘතිය කුමාර සිරිවර්ධන විසින් “සම්භවය” නමින් පරිවර්තනය කෙරෙනවා. ඩෑන් බ්‍රවුන්ගේ “The da vinci code”, “ඩාවින්චි කේතය” නමිනුත් “Inferno”, “නිරය” නමිනුත් පරිවර්තනය වන්නේ මේ පරිවර්තකයා අතින්මය. Angels and demons කෘතියේ ප්‍රධාන චරිතය වන මහාචාර්‍ය රොබර්ට් ලැන්ඩන් මේ සියළුම පොත්වල ප්‍රධාන චරිතය වනවා.

මොහුගේ කෘති හරහා විවිධ ක්ෂේත්‍රයන්ට අදාළව කරුණු ලියැවෙන සහ දැනුම ලබාදෙන අතරම කෘතිය පුරාවටම කුතුහලය එක ලෙසම රඳවා තබා ගන්නත් නොසිතු විරූ අවසානයක් ලබා දෙන්නත් සමත්වෙනවා.සම්භවය පොතෙන් කියවෙන්නේ එඩ්මන්ඩ් කියර්ෂ් නමැති විද්‍යාඥ‍යා මිනිසාගේ සම්භවය පිළිබදව නව කරුණක් හෙළිකිරීමට සූදානම් වන විටදී හදිසියේ ඝාතනයට ළක් වීමත්, ඔහුගේ සොයාගැනීම ලොවට හෙළිකිරීමට ලැන්ග්ඩන් සහ ස්පාඤ්ඤයේ අනාගත රැජින අම්බ්‍රා දරන මාරාන්තික උත්සහයත් පිළිබදවයි.

ඔබ වැනිම රසිකත්වය ප්‍රිය කරන තවත් කෙනෙකුගේ රසවින්දනය සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

Cover Photo – w1.wallls.com

The post විවිධ රසයන්ගෙන් යුතු පරිවර්තන කෘති 7ක් විඳගන්න… appeared first on familylife.

මාස 6-7 දී පවා දරුවන්ට ලබා දිය හැකි ආකාරයේ හාර්ඩ් බෝර්ඩ් පොත් පවා දැන් මිලදී ගන්න පුළුවන්. භාෂා හැකියාව, නිර්මාණාත්මක හැකියාව, විවිධ මාතෘකා පිළිබද දැනුම වර්ධනය, බුද්ධි වර්ධනය, ළමා මනස එක්තැන් කිරීමේ හැකියාව වැනි බොහෝ වාසි කියවීම තුළින් දරුවාට හිමි වෙනවා. හොදම දේ දරුවන්ට කියලා කියනවනේ. තමන්ගේ දරුවා පිළිබද වගකීම ඇත්තේ මව්පියන්ට නිසා  තමන්ගේ දරුවාට හොද දේ තෝරාගැනීම මව්පියන්ගේ වගකීම කියන කරුණත්, පොඩි කාලේ තමන් රස විදපු මේ පොත් පත් තමන්ගේ දරුවන්ටත් කියවන්න ඉඩහසර ලබාදෙන්න උත්සහ කරන්න කියන කරුණත් මතක් කරන ගමන් අපි වැඩේ පටන් ගමු.මේ ලිපියෙන්  අපි අරන් එන්නේ අකුරු හොදින් කියවන්න පුළුවන් අවුරුදු 8 න් වගේ ඉහළ දරුවන්ට ගැලපෙන පොත් 9 ක්.

1. මඩොල් දූව

මර්ටින් වික්‍රමසිංහ මහතා විසින් රචිත පොත්වලින් පොඩි දරුවොන්ගේ හිත වඩාත්ම ඇදබැදගත්ත පොත විදියට “මඩොල්දූව” හදුන්වන්න පුළුවන්. කොටින්ම කීවොත් ගෙදරින් පැනලා ගිහින් පාළු දූපතක් අස්වද්දගෙන ජීවත් උන උපාලියි ජින්නයි ළමයින්ගේ වීරයෝ උනා. ඇණියේ රාලගේ බත් මුලේ තිබ්බ බල මාළු ඇඹුල් තියලුයි, පොල් සම්බෝලයි, සම්බා හාලේ බතුයි ගැන විතරක් නෙවෙයි, වැදි සන්නිය, හොර කල්ලිය, කජු කැඩීම වගේ උපාලිලගේ තක්කඩිකම් දගකාරකම් ගැන දෙතුන් පාර කියෙව්වත් මදි හිතෙන මේ පොත ආශ්‍රිතව චිත්‍රපටයක් පවා නිපදවුනා.

2. සෝමපුර වීරයෝ

කුලසේන ෆොන්සේකා මහත්මයා විසින් රචනා කරපු ගවේෂණාත්මක යොවුන් නව කතාවක් තමයි “සෝමපුර වීරයෝ” කියන්නේ. සෝමාවතී චෛත්‍ය්ය සහ අවට නටඹුන් නැරඹීමට යන මිතුරන් තිදෙනෙක්, පුරාවිද්‍යා  ගවේෂණයක් සදහා ගොස් අතුරුදහන් වන ගුරුවරයෙක් සහ පුරාවස්තු සොරුන් කල්ලියක් වටා බැදුනු කතාවක් විදියට මෙය හදුන්වන්න පුළුවන්. කුතුහලය සහ ත්‍රාසය සොයන පොඩ්ඩොන්ට නම් මේ පොත හොදට අල්ලල යයි.

3. ගස සහ ළමයා

ෂෙල් සිල්වර්ස්ටයින් කියන ලේඛකයා විසින් රචනා කරපු මේ පොතෙන් කියවෙන්නේ පොඩි දරුවෙක් සහ ගහක් පිළිබද කතාවක්. පොඩි දරුවෝ පරිසරයට කොච්චර ආදරේ කරනවද, වයසින් වැඩෙන විට මිනිස්සු කොච්චර ආත්මාර්ථකාමී වෙනවද සහ ස්වභාවධර්මය මිනිසාට කොච්චර සෙතක් සලසනවද කියන කරුණු මේ පොඩි පින්තූර කතාව හරහා කියවෙනවා.

4. ටොම් සෝයර්

මාක් ට්වේන් විසින් රචනා කරපු මේ ළමා නවකතාව ලෝකය පුරාම ඉන්න ළමා පාඨකයන්ගේ හිත දිනාගත්ත පොතක් විදියට හදුන්වන්න පුළුවන්. මව්පියන් අහිමිවූ, ලොකු අම්මා විසින් හදා වඩා ගන්න ටොම්ගේත්, එයාගේ යාළුව  හක්ල්බරිගේත් තක්කඩිකම් හා මැරකමුත් දරුවන් තුළ ඇති අහිංසකබව, අව්‍යාජබවත් වීරකම් හා ත්‍රාසජනක ක්‍රියාවන් කෙරෙහි ඇති කැමැත්තත් හොදින් නිරූපනය වන පොතක් තමයි ටොම් සෝයර් කියන්නේ.

5. ලස්සන වසිලිස්සා

දැන් කියන්න යන්නේ පොත් කියවන ඈයෝ හැමෝම වගේ පොඩි කාලේ කියවපු ලස්සන රුසියන් ළමා කතාවක් වෙන “ලස්සන වසිලිස්සා” ගැන. මෙහි සුරංගනා කතා 16ක් අඩංගු වෙනවා. ඉතාම සරල භාෂාවකින් ලියවුණු මේ පොත දරුවෙක් කියවීමට හුරු කරවන්න උනත් පාවිච්චි කරන්න පුළුවන්. බාබයිගා යකින්න, ඉවාන්ලා වගේ අමතක නොවෙන චරිත කීපයක්ම ඉන්න මේ පොත පොඩ්ඩොන්ව සුරංගනා ලෝකයකට අරන් යන පොතක් විදියට හදුන්වන්න පුළුවන්.

6. චාර්ලි සහ අරුම පුදුම චොකලට් කම්හල

මේ කියන්නේ නම් හීනයක් වගේ ලස්සන, ඒ ඇසුරින් චිත්‍රපටයක් පවා නිපදවුන පොතක් ගැන. ලමයින් වෙනුවෙන් වටිනා කියන හොද පොත් ගණනාවක්ම ලියපු රොල්ඩ් ඩාල්ගේ පොත්වලින් වඩාත්ම ප්‍රසිද්ධම පොත විදියට චාලි සහ චොකලට් කම්හල හදුන්වන්න පුළුවන්. පුදුමාකාර ගතිගුණ තිබුන විලී වොන්කා කියන චොකලට් කම්මල් හිමියා සහ ඔහුගේ කම්හල බලන්න යන ළමයින් පිළිඹද කතාවක් ගැන තමයි මෙයින් කියවෙන්නේ. අහිංසක වගේම ගුණ යහපත් දරුවෙක් උන චාලිට අවසානයේ හිමි වෙන වාසනාව ගැන චාලිටත් වඩා සතුටු වෙන්න පොත කියවන අපි පෙළඹෙනවා. පොඩි දරුවොන්ට විතරක් නෙවෙයි අම්මලා තාත්තලටත් කියවන්න හොද පොතක් තමයි මේක.

7. වීරයා ඔබයි

මේ කියන්න යන්නේ කියවන්නාට අමුතුම අත්දැකීමක් වෙන පොත් පෙළක් ගැන. ආර්.ඒ මොන්ටිගොමරි කියන ලේඛකයා විසින් රචනා කරපු මේ පොත් පෙළේ පොත් 15ක් අඩංගුයි. පොත කියවගෙන යනකොට සමහර පිටු අග අපිට තෝරාගැනීමක් කරන්න දෙනවා. අපේ තෝරාගැනීම අනුව තමයි අපි කියවන කතාවේ අවසානය තීරණය වෙන්නේ. ත්‍රාසය, විනෝදය, දැනුම හැම දෙයක්ම කැටි උණ මේ පොත් පෙළ දරුවන්ගේ බුද්ධි වර්ධනයටත් ඉවහල් වෙනවා. ඒ වගේම දරුවොන්ට විතරක් නෙවෙයි අම්මලා තාත්තලාටත් කියවන්න පුළුවන් අපූරු පොත් පෙළක් විදියට හදුන්වන්න පුළුවන්.

8. සදාකාලික කළණ මිතුරා

මතකද පොඩි කාලේ ටීවී එකෙන් මාල්ගුඩි දවස් බලපු විදිය?අන්න ඒකේ හිටපු ස්වාමියි එයාගේ යාලුවොයි ගැන තමයි මේ පොතෙන් කියවෙන්නේ. ආර්.කේ නාරායන් විසින් රචිත මුල් පොතේ නම තමයි ස්වාමි ඇන්ඩ් ෆ්රවරෙන්ඩ්ස්. කුඩා දරුවන්ගේ දගකාරකම් සහ අහිංසකකම් පිරුණු සුන්දර ළමා විය පිළිබදව ලියවුණු මේ පොත කියවනකොට දැනෙනවා ලංකාවේ උපාලි ගිනිවැල්ලෙලයි, ඇමෙරිකාවේ ටොම් සෝයර්ලයි, ඉන්දියාවේ ස්වාමිලයි අතර කිසි වෙනසක් නැති විත්තිය.

9. මගුල් කෑම

දරෑවන් උදෙසා වටිනා පොත් ගණනාවක් රචනා කරපු කුමාරතුංග මුනිදාස මහතාගේ එවැනි එක් පොතක් තමයි මගුල් කෑම කියන්නේ. වංචාවක් මගින් කුකුළන් රවටා කුකුළු මස්  කෑමට සිතූ නරි රැළක් සහ කුකුළු රංචුවක් පිළිබද කතාවක් තමයි මෙයින් කියවෙන්නේ. කුඩා දරුවන් උදෙසා ලියැවුණු පොතක් උනත් හාස්‍යජනක විදියට සමාජ විවරණයක් කෙරෙන පොතක් විදියටත් හදුන්වන්න පුළුවන්. වඩා සරල භාෂාවකින් නොලියවුණු පොතක් නොවුනත් මෙය ළමා පාඨකයින් විසින් කියවිය යුතුම පොතක් විදියටයි අපි නම් දකින්නේ.

ඔන්න ඉතිං සැප්තැම්බර් සාහිත්‍ය මාසය වෙනුවෙන් පවතවන පොත් ප්‍රදර්ශන වලට එහෙම යනව නම් තමන්ගේ පුංචි දුව පුතා වෙනුවෙන් මේ පොත් ටික මිලදී ගන්න අමතක කරන්න එපා. දරුවන්ට කියවීම පිළිබඳ ඇතිවන රුචිකත්වය ඒ මුදලට වඩා බොහොම ලොකු වටිනාකමක් මතුවට හදල දේවි.

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කියවීමට හුරුවෙන දරුවෙකුට තෑග්ගක් දෙන්න කදිම පොත් 9 ක් appeared first on familylife.

ඔබේ කුටුම්භයේත් පොත් කියවීමේ රසිකයින් සිටිනවානම් පවුලේ ස්වාමියාත් බිරින්දෑත් දරුවනුත් එක්ව ප්‍රදර්ශනයට යන්නට ඔබ දින ගනිනවා ඇති. නමුත් ඊට පෙර මොහොතක් ඔබ මේ ගැනත් සිතිය යුතුයි. මේ කාරණා 7 ඔබ මේ සාහිත්‍ය මාසයේ යන්නට පෙර සිතුවොත් සහ සැපිරුවොත් එයින් ඔබට වාසියක්ම වන බව අපි ඉඳුරාම දන්නවා.

පොත් ලැයිස්තුවක්

ඔබ සැබෑ කියවන්නෙක් නම් පොත් ප්‍රදර්ශනයට යන හේතුවක් තිබිය යුතුයි. ඒ එකම ස්ථානයකින් පොත් ටික තෝරාගැනීමට හැකිවීමත්, වට්ටම් හිමි වීමත්, සිතට සැහැල්ලු මිතුරන් මුණගැසෙන වටපිටාවක් වීමත්, දුර්ලභ පොත් හැමුවීමට ඉඩ තිබීමත් යන කාරණා වෙයි. කෙසේ වුවත් එසේ යන ඔබ අත පොත් ලැයිස්තුවක් තිබීම අතිශය වැදගත්. එහි ඔබට මිලදීගැනීමට අවශ්‍ය පොත්, සහ එහි ප්‍රකාශකයා සඳහන් වූවානම් ප්‍රමාණවත්. සාමාන්‍යයෙන් ප්‍රකාශකයා වෙතින් හොඳම වට්ටම ලැබෙන නිසා පොත තිබීමේ වැඩිම සම්භාවීතාවය ඇත්තේ ප්‍රකාශකයා සතුව නිසාත් එය සාර්ථක වනු ඇති.

ඉතුරුම් සැලැස්මක්

පොත් ප්‍රදර්ශනයට යන ඔ‌බ ඔබේ සැප්තැම්බර් මාසයේ පඩියෙන් කොටසක් ගෙන හෝ එදිනට ඔබගේ අතේ ගැවසෙන මුදලෙන් කොටසක් ගෙන පොත් ගන්නට යනවානම් එය එතරම් නුවණැති ක්‍රියාවක් නොවෙයි. වසරක් පුරා ඔබට මසකට සුළු මුදලක් ඉතිරි කරන්නට හැකිවූවානම් එය ඔබට සරිලන වැයපසක් ඉතිරි කර දෙන්නට ඉඩ තියෙනවා. ඒ වගේම ඔබට දැන් කල් නැති වුනත් මෙම මාස දෙකක කාලය හෝ ඒ වෙනුවෙන් යම් මුදලක් ඉතිරි කරන්නට හැකිනම් සැප්තැම්බරයේ අනෙකුත් අවශ්‍යතා වෙනුවෙන්ද වියදම් කරන්නට මුදල් ඉතිරි වේවි.

සැලසුම්

පළමුවෙන්ම ඔබේ අරමුණ පැහැදිලි කරගත යුතුයි. ඔබ පොත් ප්‍රදර්ශනයට යන්නේ මිතුරන් හා විනෝද වීමේ මූලික අරමුණෙන්ද? වසරක් පාසා යායුතු නිසාද? නැතිනම් ඔබට සැබවින්ම මෙම පොත් ප්‍රදර්ශනයෙන් පොත් මිලදී ගැනීමේ අරමුණක් තිබෙනවාද? කියා සිතන්න. සැබවින්ම අරමුණක් ඇත්නම් පොත් ගන්නට යන දිනය බොහෝ දෙනා පැමිණෙන සතිඅන්ත හෝ නිවාඩු දිනයක්ද?  පොත් ගන්නට යන වේලාව සෙනග අඩුවෙන් ගැවසෙන රාත්‍රී හෝ කාර්යාල වේලාවක්ද? පොත් ගන්නට යන්නේ කා සමගින්ද? පොත් ගන්නට යන්නේ බස් රථයකින්ද? ඔබ තෝරාගන්නට පොත් විශාල ප්‍රමාණයක් ලැයිස්තු ගත කර සිටිනවානම් ඒ සමගින් නැවත බස් රථයක පැමිණිය හැකිද?  යන සියළු සැලසුම් ඔබ සිතිය යුතුමයි.

ළමයි ගෙනයනවානම්

දෙමවුපියන් සමගින් පොත් තෝරන්නට දරුවනුත් එක්වීම දරුවන්ගේ මානසිකත්වයට සුබවාදී බළපෑමක් සිදුකරන්නක්. එනිසා ඔබේ දරුවනුත් කියවීමට හිතැත්තන් කරවන්නට මෙය සුබවාදී ආරම්භයක් කළ හැකියි. නමුත් දරුවන් සමගින් ගමන් කරද්දී පොත් ගැනම පමණක් නොව ඔබට දරුවන්ගේ සුවපහසුව ගැනත් අනිවාර්යෙන්ම සිතන්නට සිදුවෙනවා.

දරුවන්ගේ ආහාරපාන වගේම ඔවුන්ගේ ආරක්ෂාව ගැනත් අනිවාර්යෙන්ම සිතන්න සිදුවෙනවා. ඒ නිසා යම් හෙයකින් මගහැරුනොත් දරුවාට රැඳී සිටින්නට තැනක් කියාදී, දරුවාගේ සාක්කුවකට දෙමවුපියන්‌ ගැන විස්තර ඇතුළත් කොළයක් ඇතුළු කරන්නට කටයුතු කරන්න.

අමතර වියදම්

මෙවන් පොත් සල්පිලකට යන ඔබට පොත්වලට වියදම් කරන මුදලට අමතරව තවත් වියදම් කිහිපයක්ම එක්වෙන්නට ඉඩ තියෙනවා. අතරින් පතර කන්නට යෙදෙන ආහාර බොහෝමයක් පොත් සල්පිල පුරාම තිබෙනවා. ඒ අතර අතිශය ප්‍රසිද්ධ නූඩ්ල්ස් වගේම තවත් කෙටි ආහාර සහ බීම වර්ග බොහෝමයක් එහි තියෙනවා. ඒවායේ වියදමත් අනිවාර්යෙන්ම ඔබට දරන්නට සිදුවෙනවා. ඒ වගේම ඔබ බස් රථයක ගමන් කළත් ඔබ සතුව පොත් අධිකනම් ඔබට ත්‍රී රෝද රථයකට මුදල් වෙන්කරන්නට සිදුවෙනවා. ඒවගේම කෙටි ආහාර අතරේ ප්‍රධාන ආහාර වේලාවක් පැමිණීමත් සාමාන්‍යයෙන් සිද්ධ වෙන දෙයක්.

විකල්ප

කොළඹ ජාත්‍යන්තර පොත් සල්පිලට යනවාට වඩා පහසු විකල්ප ඔබට සොයාගන්නට හැකියි. උදාහරණයකට පොත් ප්‍රදර්ශනය පැවැත්වෙන සමයේ බොරුල්ල සහ පුංචි බොරුල්ල ප්‍රදේශයේ සුළු දුරක් ඇතුළතින් ඔබට ගොඩගේ, සුරස, සමයවර්ධන, විජේසූරිය වැනි පොත් හල් බොහෝමයක් සොයාගත හැකියි. ඒවායේදීත් ඔබට පොත් සල්පිලෙන් ලැබෙන වට්ටමම හෝ ඊටත් වැඩි වට්ටමක් ලැබෙන අතරේ වැඩි සෙනගකින් තොරව පොත් තේරීමේ හැකියාවත් ලැබෙනවා. ඒ වගේම ගොඩගේ වැනි පොත්හලකින් පැරණි දුර්ලභ පොත් රාශියක් නිවීසැනසිල්ලේ තෝරාගන්නට හැකියාවත් ලැබෙනවා. මේ සියල්ල හා සසඳා බලද්දී පෙර සඳහන් කරපු අමතර වියදමත් නොමැතිව, තෙරපීමක් නොමැතිව නිවීසැනසිල්ලේ පොත් තෝරාගන්නට අවස්ථාව ලැබෙනවා.

ඔබ දුර පලාතක සිට පැමිණෙන්නේද?

කොළඹ ජාත්‍යන්තර පොත් ප්‍රදර්ශනයට ඔබ දුර බැහැර පෙදෙසක සිට පැමිණෙන්නෙක් නම් ඔබ අනිවාර්යෙන්ම පෙර සූදානමක් තබා ගත යුතුයි. ඔබට යම් පොතක් මගහැරුනොත් එය මිලදීගන්නට තවත් දිනක් පැමිණෙන්නට සිදුවන නිසා ඔබ අනිවාර්යයෙන්ම ඔබේ පොත් ලැයිස්තුව වඩා පිළිවෙළකට ප්‍රකාශකයා සේම අනෙකුත් මිළදී ගත හැකි පොත් අලෙවිසල්ද සඳහන් කරගෙන පැමිණීම වටිනවා. ඒ වගේම දුරක සිට පැමිණෙනවා නම් කිහිපදෙනෙකු එක්ව වාහනයක පැමිණීම වඩා සාර්ථක ක්‍රමයක්. ඒ අනුව දිගු කාලයක් පුරා සල්පිලෙහි ඇති සියළු පොත්හල් තුළට ගොඩවදින්නට ඔබට ඉඩහසර ලැබෙනවා.

පොත් ප්‍රදර්ශනයට යන්නෙ ඔබේ දුවට හෝ පුතාට පොත් තෝරාගැනීමට නම් බලන්න මේ ලිපියත් ඔබට වැදගත් නේද කියලා.

කියවීමට හුරුවෙන දරුවෙකුට තෑග්ගක් දෙන්න කදිම පොත් 9 ක්

මෙම ලිපිය ගැන ඔබගේ අවංක අදහස් කමෙන්ට්ස් ඔස්සේ අපට කියන්න. ඔබ වැනිම දැනුම අවැසි තවත් කෙනෙකු දැනුවත් කිරීම සඳහා පහත ඇති මාධ්‍ය ඔස්සේ මෙම ලිපිය ෂෙයා කිරීමට අමතක නොකරන්න.

The post කොළඹ ජාත්‍යන්තර‌ පොත් ප්‍රදර්ශනයට යන්නට පෙර… appeared first on familylife.