දරුවාට පෙර පාසලක් තෝරා ගැනීමට පෙර මේ ගැනත් සිතන්න.

මේ ආකාරයට ඔබත් ඔබගේ දරුවාත් සූදානම් නම් සුදුසු පෙර පාසලක් පරීක්ෂා කිරීමේ හැකියාව ඔබට තියෙනවා. පළමුව ඔබේ හිතවතුන්ගෙන් නිර්දේශ ලැබූ, ඔබගේ අවශ්‍යතාවයට ගැළපෙන ආකාරයේ පෙර පාසල් කීපයක් පිළිඹදව අවධානය යොමු කරන්න. එම පෙර පාසල්වල පහත සදහන් ලක්ෂණයන් ඇතිදැයි සොයා බලන්න.

1. පෙර පාසල අනිවාර්යයෙන්ම රජයේ ලියාපදිංචි වූ නිසි ප්‍රමිතියකින් යුතු එකක් විය යුතුය. ලියාපදිංචි සහතිකය සහ ඊට අදාළ වෙනත් කරුණු පිළිබඳව විමසා සිටීමේ සහ පරීක්ෂා කිරීමේ අයිතිය ඔබ සතු ය.

2. පෙර පාසල් පාලිකාවන් නියමිත අධ්‍යාපන සුදුසුකම්වලින් සහ නිසි පුහුණුවක් ලැබූ අය විය යුතුයි. මේ පිළිබඳවද පැකිළීමකින් තොරව විමසා බලා නිරවුල් කරගත යුතුයි. ඔවුන් කරුණාවන්ත, ආදරණීය අවංක සහ පිරිසිදු (ශාරීරිකව) පුද්ගලයින් වීම ඉතාමත් වැදගත් කරුණකි.

3. පෙර පාසල පිහිටා ඇති ස්ථනය ඔබගේ නිවසට, කාර්‍යාලයට ආසන්න ස්ථානයක් වීම ඔබටත් දරුවාටත් පහසුවකි. එය ආරක්ෂාකාරී සහ පිරිසිදු පරිසරයක පිහිටා තිබීම අත්‍යවශ්‍යයි. එමෙන්ම පෙරපාසල සහ අදාළ උපකරණවල ආකර්ෂණීය බවත් ආරක්ෂාකාරී බවත් දරුවා තුළ ප්‍රියතාවයක් ඇති කිරීමට හේතු වේ.

4. දරුවන් ප්‍රමානයට සරිලන පාලිකාවන් සංඛ්‍යාවක් සිටිය යුතුය. දරුවාට ප්‍රමාණවත් ආරක්ෂාවක්, අවධානයක් ලබා දිය හැක්කේ එවිට ය.

5. විෂය නිර්දේශය පිළිබඳව විශේෂ අවධානයක් යොමු කළ යුතු වේ. පෙර පාසල් අධ්‍යාපනයට අකුරු ඉගැන්වීම තහනම් වූවත් ඇතැම් පෙර පාසල් තුළ විභාග පවා පවත්වන බව අසන්නට ලැබේ.

  මුල් ළමා විය සංවර්ධනයට මූලිකවම අයත් වන්නේ බුද්ධි වර්ධනය, කායික වර්ධනය, සෞන්දාර්‍යාතමක වර්ධනය, සමාජයීය හාචිත්තවේග සංවර්ධනය යන කරුණු වේ. ඒ යටතට, පින්තූර පෙන්වමින් කතා කියාදීම සහ කතා ගොඩනැගීමට අවස්ථාව ලබා දීම, වස්තූන්වල සමාන අසමානකම් සෙවීම, කුරුටුගෑම, ඇඹීම, කඩ ඉරි මත ඇදීම, පාට කිරීම, වස්තූන් සහ පින්තූර වර්ගීකරණය, නිරීක්ෂණ නිගමන වලට එළඹීම, අවකාශීය හැකියාවන් වර්ධනය කිරීම, ක්‍රීඩා කිරීම, කණ්ඩායම් හැඟීම වර්ධනය, උපදෙස් පිළිපැදීමට හුරු කිරීම, නිර්මාණකරනය, නැටුම් ගැයුම් වැයුම්, ඉදිරිපත්වීමේ හැකියාව වර්ධනය කිරීම, ස්වාධීනව කටයුතු කිරීමට ඉඩ ලබා දීම, තම වාරය එනතෙක් ඉවසීමට හුරු කරවීම, සමාජය හා ගනුදෙනු කිරීම හුරු වීමට ඉඩ ලබා දීම, අවස්ථාවට සහ ස්ථානයට ගැළපෙන ලෙස හැසිරීමට හුරු කිරීම සහ පරිසරය අධ්‍යනය වැනි කරුණු අයත් වේ.

ඔබ තෝරාගන්න ළදරු පාසල මූලිකත්වය දෙන්නේ ඉහත සදහන් කරුණුවලට අදාළ ක්‍රියාකාරකම්වලට ද, එසේත් නැතනම් අකුරු කියවීම ලිවීම වැනි දේවල්වලටද යන්න හොඳින් සොයා බලන්න.

6. පෙර පාසල තුළ කටයුතු කෙරෙන භාෂා මාධ්‍ය යන කරුණට වැඩි අවධානයක් ලබා දෙන්න. මෙය ඔබගේ දරුවා පසුකාලීනව ඇතුළත් කරවන පාසලටද අදාළ කරුණකි. පෙර පාසල් සහ පාසල් ඉගැන්වීම් කටයුතු කෙරෙන භාෂා මාධ්‍ය අතර නොගැලපීමක් තිබීම දරුවා අපහසුතාවයට පත් කරන්නක් විය හැකි ය. නමුත් මේ වන විට ඉංග්‍රීසි සහ සිංහල භාෂා ද්විත්වයෙන්ම ඉගැන්වීම කෙරෙන පෙර පාසල් බහුල නිසා එය විශාල ගැටළුවක් නොවීමට ඉඩ තිබේ.

7. ගෙදර වැඩ ලබාදීම, විභාග වැනි දෑ පෙර පාසල් දරුවෙකුට අවශ්‍ය නොවේ. නමුත් මේ දේවල් සිදු කෙරෙන පෙර පාසල් පවතින බැවින් ගුරුවරුන් හා කතා බස් කර එය පැහැදිලි කරගැනීම වැදගත් වේ.

8. පෙර පාසලට පිරිසිදු ඉතිහාසයක් ඇතිද, එහිදී දරුවන්ට හිංසා පීඩා සිදුවී ඇත්ද, මුදල් වංචා වැනි දෑ සිදු වී ඇත්ද යනාදිය පිළිඹදව සොයා බලන්න.

9. දරුවාගේ උපන් හපන්කම් සහ හැකියාවන් දියුණු කරගැනීමට, දරුවාට ස්වාධීනව කටයුතු කිරීමට ඉඩ ලබා දෙන සහ වයසට ගැළපෙන අධ්‍යාපනයක් ලබාදෙන පෙර පාසලක්ද යන්න සොයා බලන්න.

10. නිතර නිතර මුදල් එකතු කරන සහ වසරේ වැඩි කාලයක් වර්ෂාවසාන විවිධ ප්‍රසංගයට දරුවන් වෙහෙසවමින් පුහුණු කරන පෙර පාසලක් නම් එය තෝරාගැනීමට පෙර දහස් වතාවක් සිතන්න.

11. ගුරුවරුන් සහ දරුවන් එකිනෙකාට දක්වන ආදරය, ගෞරවය, අනෙක් දරුවන් උදෑසන පෙර පාසලට එන විට සහ ආපසු පිටවී යනවිට දක්වන ප්‍රතිචාරයන් නිරීක්ෂණය කරන්න. දරුවා පෙර පාසලට ඇතුළත් කිරීමට පෙර දින කිහිපයක් පෙර පාසලට පැමිණ මේ පිළිබඳව අධ්‍යනයක යෙදෙන්න. අසල්වැසියන්ගෙන්, අනෙක් දරුවන්ගේ මවුපියන්ගෙන් තොරතුරු ලබාගන්න.

12. අවසන් වශයෙන් ඔබ තෝරාගන්න පෙර පාසල සම්බන්ධව ඔබගේ සිතට ස්වභාවිකව දැනෙන සැබෑ හැඟීම අනුව කටයුතු කරන්න. හිතේ සැක සංඛා තබා ගනිමින් දරුවා පෙර පාසලකට ඇතුළත් නොකරන්න. දරුවාගේ අදහස් ද විමසීමට අමතක නොකිරීම ඔබගේ වගකීමක් බව සිහියේ තබාගන්න.

කවරයේ ඡායාරූපය – dominellimusic.com