රොෂාන්ගෙ ජීවිතයේ අලුත්ම වෙනස සොයා රොෂාන් – කුෂ්ලානි කැදැල්ලට ගොඩවදින්න එන්න

familylife.lk, MyFamily විශේෂාංගයට අපි හා හා පුරා කියල ගොඩවෙන්නෙ ජනප්‍රිය නළු රොෂාන් රණවනගෙ කැදැල්ලට. ඉතිං හැමදේටම කලින් අපි වෙනුවෙන් මේ වෙන්කරන වටිනා කාලයට අපි රොෂාන්ටත් රොෂාන්ගෙ දයාබර බිරිඳ කුෂ්ලානිටත් අපගේ දයාබර ස්තූතිය පිරිනමනවා.

ඉතිං රොෂාන් කොහොමද ජීවිතේ?

ජීවිතේ හොඳයි. සතුටින් සාමයෙන් කාලෙ ගෙවෙනව

රොෂාන් අපි පවුල කියන තේමාව මුල් කරගෙන ඒ හා බැඳුනු දැනුම හා විනෝදය අපගේ පාඨකයින්ට ලබාදෙන වෙබ් මැගසින් එකක්. ඉතිං අපි දැනගන්න කැමති රොෂාන්ට පවුලක් කියන්නෙ?

අවබෝධය, විශ්වාසය සමගින් මුසුවුනු අපරිමිත ආදරය ගොඩනගන සුවිශේෂී බැඳීමක් විදිහට තමයි මං පවුලක් කියන දේ දකින්නෙ. මේ දේවල් වලින් මොනව හරි අඩු වුනොත් ඒක පවුලක් වගේ එකක් මිසක් පවුලක් නෙවෙයි. ඕනෙම දෙන්නෙක් අතර හොඳ විශ්වාසයක්, අවබෝධයක් තියනව නම් කවදාවත් අනවශ්‍යය ප්‍රශ්ණ හැදෙන්නෙ නෑ. ඒ වගේ දෙන්නෙක් ලඟ නිතරම ආදරය රඳවගන්න පුලුවන්. එහෙම දෙන්නෙක් එකිනෙකාට ගරු කරනවා. අනිත් කෙනා කියන දේ අහන් ඉන්න, ඒ දේ තේරුම් ගන්න උත්සාහ කරනව. එතකොට නිකම්ම සතුට පිරුණු පවුලක් නිර්මාණය වෙනව.

රොෂාන්ගෙ ජීවිතේ අනෙක් කොටස, කුෂ්ලානි. අපි කැමතියි ඇය ගැනත් දැනගන්න.

ඇත්තටම ඔබ හරියටම කිව්ව. ඇය මගේ ජීවිතේ අනෙක් කොටස තමයි. ඒ කොටස නැතිව මගේ ජීවිතේ සම්පූර්ණ නෑ. විශේෂයෙන් ඇය මං වෙනුවෙන් කරන කැපකිරීම අතිවිශාලයි. මොකද ඇයත් රැකියාවක නිරත වෙනවා. ඉතිං ඇගේ වෘත්තියත් එක්ක සෑහෙන කාර්යබහුල චරිතයක්. ඒත් කොච්චර කාර්යබහුල වුනත් මට ඇය විශාල කාලයක් වෙන් කරනවා. මගේ වෘත්තීයට අදාල දේවල් වලදිත් ඇය උදවු කාරියක්, හවුල් කාරියක් විදිහට වැඩ කරනවා. ඇත්තටම මගේ ජීවිතේ පහසුව හදල දෙන්නෙ ඇය තමයි. ඇය ඉතාමත් දක්ෂ තැනැත්තියක්.

එහෙනම් කුෂ්ලානිත් වැඩ රාජකාරි බහුල තැනැත්තියක්. ඉතිං ඔබ දෙදෙනාම අතිශය කාර්ය බහුල වුනහම කොහොමද පවුලේ කටයුතු කළමනාකරණය කර ගන්නෙ?

හරිම වචනෙත් ඒකම තමයි. කළමනාකරනය. අපිට හොඳ කළමනාකරණයක් තිබෙනවා. කුෂ්ලානි මේ වැඬේට මටත් වඩා ගොඩක් දක්ෂයි. ඇගේ කළමනාකරණය තමයි අපි දෙන්නගෙම ජීවිත පහසු කරන්නෙ. අපි ඇත්තටම හොඳට සැලසුම් කරනවා. ගොඩක් වෙලාවට අපි ඒ සැලසුමට අදාලව එකතු වෙලා වැඩ කරනවා. එතෙන්දිත් කුෂ්ලානි මට හිතාගන්නවත් බැරි තරම් වැඩ ගොඩක් කරනව. එයාගෙ රැකියාව, මගේ රූගත කිරීම්, උත්සව අවස්ථා වලට සහභාගී වන අවස්ථා, වෙළඳ දැන්වීම් මේ හැම දේම ඇය අතින් සැලසුම් වෙනව වගේම ඒ හැම දේකම සහායිකාව විදිහටත් කටයුතු කරනවා. ඇත්තටම ඇය මට සුපර් වුමන් කෙනෙක්.

හිතෙන්නෙ නැද්ද වැඩ මුකුත් නොකර ගෙදරටම වෙලා ඉන්න?

නොහිතෙනව නෙවෙයි. ඇත්තටම වෙහෙසයි. ඒත් අපිට ඉලක්කයක් තියෙනවා. මේ අපිට වැඩ කරන්න පුළුවන් කාලය. ඒ වගේම පවුලකට යම් ස්ථාවරයක් හදාගන්න නම් අනිවර්යයෙන් මහන්සි වෙන්න ඕනෙ. ඒක අපි දෙන්නම හොඳින් අවබෝධකරගෙන ඉන්නෙ. ඕන දෙයක් සාර්ථක වෙන්නෙ මහන්සි වුනොත් විතරයි. ඒවගේ කැපකිරීමකට තමා සාර්ථක ජීවිතක් නිර්මාණය කරන්න පුළුවන්. ඒක දන්න හින්ද අපි මේ වෙහෙස කරදරයක්, පීඩාවක් විදිහට ගන්නෙ නෑ. හරියට කාලයක් මහන්සි වුනොත් හැමදාම වෙහෙස වෙන්න සිද්ද වෙන්නෙ නෑ.

අපිට කියන්නකො අර ප්‍රේමවන්තයෝ වෙලා ඉන්න කාලෙ තිබුණු ආදරයත් දැන් අඹුසැමියන් වශයෙන් එකිනෙකාට වන ආදරයත් වෙනස්ද කියල?

ඇත්තටම ඒ කාලෙ වුනත් අපි එහෙම බොළඳ ප්‍රේමවන්තයො වුනා කියල මට හිතෙන්නෙ නෑ. ඒ කාලෙට වඩා දැන් අපි පිරිනත වෙලා තමයි. ඒත් ඒ කාලෙත් අපි බැන්ඳට පස්සෙ කරන ගොඩක් දේවල් සැලසුම් කළා. දැන් අපි ඒ දේවල් ඉටුකර ගෙන තියෙන්නෙ ඒ කාලෙ එහෙම කරපු නිසා. එදා වගේම අදත් අපේ ආදරේ අලුත්. එහෙම වෙන්නෙ අපි දෙන්න එකට වැඩ කරන හින්ද. එකට ගෙයක් අස්පස් කරන කොට, වත්ත පිරිසිදු කරනකොට, කුස්සියෙ කෑමක් බීමක් හදනකොට නිකම්ම ඒ ආදරේ අලුත් වෙනව. ඒක සමහර වෙලාවට එදාටත් වඩා සුන්දරයි.

අපේ රටේ ගොඩක් පවුල කියන සංකල්පය සංස්කෘතික කාරනයක්. නමුත් වර්තමානයේ අපට පේනව පවතින සම්ප්‍රදායන්ට වෙනස් වූ පවුල් ඇතිවෙනවා. විශේෂයෙන් ලිවින් ටු ගෙදර් වගේ සංකල්ප. මේ ගැන ඔබේ අදහස මොකක්ද?

එහෙම කවුරු හරි ජීවත් වෙනව නම් එයාලට ඒකට අයිතියක් තියනව. හැබැයි මගේ පැත්තෙන් නම් මං කියන්නෙ විවාහයක් එක්ක මේ දේවල් වෙන එක හොඳයි. මොකද ඒක මට දැනෙන්නෙ මට තිබුණු පරිසරය, අපේ අම්ම තාත්ත ගෙවන ජීවිත එක්ක බලනකොට. මට මේ අපේ සංස්කෘතික පවුලෙ කිසි වැරැද්දක් පේන්නෙ නෑ. මම අපේ රටේ තියෙන මේ සංස්කෘතික පවුලට කැමතියි.

තාක්‍ෂනික මෙවලම් එක්ක, විශේෂයෙන් ජංගම දුරකථනය එක්ක පවුලේ පවතින සමතුලිතා බිඳී යනවා කියල මතයක් තියනවා. මේ ගැන මොකද හිතන්නෙ?

ඇත්තටම ඒක පවුලකට විතරක් නෙවෙයි හැම දේටම බලපානව. බලන්න දැන් යාලුවො කට්ටියක් හම්බවුනහම, නෑදෑ පිරිසක් ගෙදරකටම ආවහම, මේ කොයි වෙලාවටත් තමන් වෙනම ලෝකයක් එක්ක තමා මොබයිල් ෆෝන් එකෙන් ගණුදෙනු කරමින් ඉන්නෙ. ඒ හමුවීම් වලින් වැඩකුත් නෑ. ඇත්තටම අපිටත් මේ බලපෑම නොතිබුනා නෙවෙයි. දැන් අපි දෙන්න කරන්නෙ අපි කවුරු හරි ටිකක් වැඩිපුර වෙලා මොබයිල් ෆෝන් එකේ ඉන්නව නම් අනිත් කෙනා ඒ ගැන දැනුවත් කරනව. මේ දේ ටිකක් කලක් කරන කොට අපි අත්‍යවශ්‍යම දේකට ඇරෙන්න මොබයිල් ෆෝන් පාවිච්චි කරන එක සෑහෙන්න අඩු වුනා. එතකොට තමයි දැනෙන්නෙ කොච්චර වෙලාවක් ඉතුරු වෙනවද කියල. තමන්ට දැනුමක් ලැබෙන වැදගත් දේකට ඇරෙන්න ටෙක්නොලොජි වලට වහල් වෙන්න හොඳ නෑ. මේක අද ලෝකෙටම ප්‍රශ්නයක්.

අපි කුෂ්ලානි එක්කත් ටිකක් කතා කරමු

කුෂ්ලානි අපිට කියන්නකො ඔබට රොෂාන්ගෙන් ලැබෙන සහයෝගය කොයි වගේද කියල?

ගොඩක් ලොකු සහයෝගයක් ලැබෙනවා. මොකද මටත් ඉතාමත් කාර්යබහුල වෘත්තීමය ජීවිතයක් තියෙනවා. ඉතිං එහෙම වෙද්දි රොෂාන්ගෙන් ලැබෙන සහයෝගය ඇත්තටම අගය කරන්න ඕනෙ. නැත්තම් මේ දේවල් මෙතරම් ලේසි වෙන්නෙ නෑ. අපි දෙන්න එකතු වෙලා වැඩ කරන්න තමයි හැම වෙලාවෙම බලන්නෙ. අපි නිතරම එකතු වෙලා ගෙදර අස්පස් කරන වැඩ කරනවා. කොහොමත් අපි ගෙදර ගෘහභාන්ඩ තබා ඇති පිළිවෙල නිතරම වෙනස් කරනවා. ඒව කරන්නෙ කරන්න ඕනෙ හින්ද නෙවෙයි. ඒව කරන එකෙන් අපි දෙන්නම සතුටක් ලබනවා. අනික මං අසනීප වුනහම හැමදේම කරනනෙ රොෂාන්. මගේ අම්ම තාත්ත පුංචි කාලෙ මාව බලාගත්ත වගේම රොෂාන් මාව බලාගන්නව.

විශේෂයෙන්ම ලංකාවේ ජනප්‍රියම නළුවාගේ බිරිඳ වීම ගැන ඔබට තියෙන්නෙ මොන වගේ හැඟීමක්ද?

අපි විවාහ වුනේ අවුරුදු එකොලහක ආදර සම්බන්ධතාවයකින් පසුවයි. ඒ සම්බන්ධකම පටන් ගන්න කොට අපි අනාගතයේ කවුරු වෙනවද කියලවත් අපි දෙන්නම දැනන් හිටියෙ නෑ. රොෂාන්ගෙ රංගන ජීවිතය ආරම්භ වුනේ ඊට පසුව. ඉතිං මම ආදරේ කලේ රොෂාන්ට මිසක් නළුවෙකුට නෙවෙයි. අද මම නිහතමානීව ආඩම්බර වෙනව රොෂාන් ඉන්න තැන ගැන. එයා වෘත්තීය නලුවෙක්. එත් ඒක මට ලොකුවට දැනෙන්නෙ නෑ. එයා නළුවෙක් කියල ඔළුවෙ තියාගෙන ඒක ආභරනයක් වගේ පාවිච්චි කරන්න මම කැමති නෑ. එයාට මිනිස්සු ආදරය කරන එකට මං කැමතියි.

රිදී තිරේ රොෂාන්ගෙ ප්‍රේමවන්තියො ගැන කේන්තියක් එහෙම ඇවිල්ලම නැද්ද?

අනේ නැහැ. රොෂාන්ගේ වෘත්තිය ගැන මම හොඳින්ම දන්නවා. රොෂාන් වෘත්තිය සමග තමන්ගෙ පවුල් ජීවිතය කවදාවත් පටලවා ගන්නෙ නැහැ. ඇත්තටම මම තමයි රොෂාන්ට කියන්නෙ සමහර ප්‍රේම ජවනිකාව වල අඩුපාඩුකම් පවා. මොකද අපි පෙම්වතුන් කාලෙවත් අපි බොළඳ පෙම්වතුන් වුනේ නෑ. ඒ කාලෙත් අපි ගොඩක් පරිනත විදිහට හිතුව. දැනටත් අපිට පේනව අපේ සම වයසේ අයට වඩා අපිට ජීවිතේ ගැන ලොකු වැටහීමක් තියනව කියල. ඉතිං අද වෙනකම් ඉතාමත් සාර්ථකව අපිට එකට ජීවත් වෙන්න පුලුවන් ඒ වැටහීම හින්ද. හරි අවබෝධයක් ඇතුව ජීවත් වෙනව නම් ඉරිසියා හිතන්න, කේන්ති ගන්න කිසිම හේතුවක් නෑ.

දෙන්නටම නිවාඩුවක් තිබුනොත් ?

ඇත්තටම අපි දෙන්නගෙම විනෝදාංශය තමා ඇවිදින්න යන එක. ඒකට අපිට වෙනම සැලැස්මක් පවා තියෙනවා. ඒක අපි විවාහ වෙන්නත් කලින් ඉඳන්ම සැලසුම් කරපු දෙයක්. මේ වන විට රටවල් තිස් පහක විතර අපි සංචාරය කරල තියෙනව. ඇත්තටම අපිට හොඳ ඉලක්කයක් තිබුන මේ සංචාරයන් සඳහා මුදල් සොයා ගැනීම ඇතුලු සියලුම දේවල් වලට. ඉතිං අවුරුදු හතරක කාලයක් ඇතුලත අපි සැලසුම් කළ විදිහටම ඒ සංචාර වල යෙදෙන්න අපිට පුලුවන් වුනා. ඒ අතරින් නෝවේ සහ චෙක් රාජ්‍යයේ ප්‍රාග් නගරය අපේ වඩාත්ම සිත්ගත් රටවල් වුනා.

රොෂාන් මොකක්ද මේ ජීවිතේ අලුත් වෙනසක් සිද්ධ වෙන්න යනව කියන ආරංචිය

ඔවු මගේ රංගන ජීවිතයේ ලොකු වෙනසක් ළඟදීම ඔයාලට බලාගන්න පුළුවන්. මම ප්‍රථම වතාවට සිනමා නිර්මානයක ප්‍රතිවීරයාගේ චරිතයට පණ පොවනවා වගේම මෙම චිත්‍රපටයේ මම ද්විත්ව චරිත නිරූපනයකත් යෙදෙනවා. ඇත්තටම මං මේ වෙලාවෙ ස්තුතියිවන්ත වෙනවා හර්ෂ උඩකන්ද කියන තරුණ අධ්‍යක්‍ෂකවරයාට මට මේ අවස්ථාව ලබා දුන්නට. මොකද මම හිටියෙ එක රාමුවක. මට ලැබුනෙ එක වගේම චරිත. ඒ රාමුවෙන් පිටට එන්න මේ චිත්‍රපටය මට අවස්ථාවක් දුන්න.
මේ චිත්‍රපටය ගැන කිව්වොත් මේක තාක්‍ෂණික අතින් ඉතා ඉහළ ගනයේ ක්‍රියාදාම චිත්‍රපටයක්. නම් කරල තියෙන්නෙ FACE TO FACE කියල. මම මේ චරිතය වෙනුවෙන් මගේ කටහඬ හිතාමතාම වෙනස් කර ගත්ත. ලොකු කැපවීමක් ඇතුලෙ කරපු චරිතයක්. මං හිතන්නෙ වෙනස්ම රංගන ශිල්පියෙක් මේ චරිතය හරහා ඔබට දැක ගන්න පුළුවන්කම ලැබේවි.

අවසාන වශයෙන් අනාගත බලාපොරොත්තු ගැන කිව්වොත් ?

ඇත්තටම එහෙම ලොකු බලාපොරොත්තු නෑ. අපි සැලසුම් කළ දේවල් තියෙනවා. මෙච්චර කල් කළා වගේ ඒ ඒ කාල වලදී ඒ සැලසුම් සාර්ථක කර ගන්න තමයි බලාපොරොත්තු වෙන්නෙ. හොඳ රටට වැඩක් කරන දරුවන් බිහිකරල සතුටින් හොඳ පවුලක් විදිහට ජීවත් වෙන්න තමයි පුද්ගලික ජීවිතේ තියන ආශාව. වෘත්තීමය පැත්තෙන් වෙනස් චරිත නිරූපනය කරමින් හොඳ ගමනක් යන්න හිතාගෙන ඉන්නව

විශේෂ ස්තුතිය
ඡායාරූප – දිලිප් කුමාර් Photography
සහාය – චින්තක කපුගමගේ CAPTUREidea photography